पुणे : गजा मारणे कैदेत असताना त्याची मटण पार्टी झोडणाऱ्या पुणे पोलिस दलातील १ अधिकाऱ्यासह ४ कर्मचाऱ्यांचे निलंबन करण्यात आले आहे. गजा मारणेला पुण्याहून सांगली कारागृहात घेऊन जाताना मारणे याने पोलिसांच्या समक्ष ढाब्यावर मटण पार्टी केल्याचा धक्कादायक प्रकार समोर आला होता.मकोकाचा आरोपी असूनही ढाब्यावर पोलिस व्हॅन थांबवून त्याला मटण खाऊ दिल्याने एकच खळबळ उडाली होती. यामुळे पुणे पोलिसांवर प्रश्नचिह्न उभे राहिले होते.

या प्रकरणी सहायक पोलिस निरीक्षक सुरज राजगुरु यासह हवालदार महेश बामगुडे, हवालदार सचिन मेमाणे, हवालदार रमेश मेमाणे, पोलिस शिपाई राहुल परदेशी यांना निलंबित करण्यात आळे आहे. मोक्का कारवाई अंतर्गत गजा मारणे पुण्यातील येरवडा कारागृहात शिक्षा भोगत होता. त्याला सांगली तुरूंगात नेण्यात येत होते

गजा मारणेला पुण्यातील येरवडा कारागृहातून सांगली कारागृहात पाठवण्याचा निर्णय घेण्यात आला. त्याला घेऊन पोलीस व्हॅन सहाय्यक पोलिस निरीक्षक व चार पोलीस कर्मचाऱ्यांसोबत सांगलीच्या दिशेने निघाली. मात्र थेट कारागृहात पोहोचण्याआधी साताऱ्यात असलेल्या ढाब्या वर व्हॅन थांबली पोलिस कर्मचाऱ्यांनी तिथे जेवण केले.

दरम्यान पोलीस व्हॅनच्या मागावर असलेल्या मारणे टोळीची गाडी सुद्धा त्याठिकाणी येऊन थांबली. मारणेच्या गॅंगच्या गुंडांनी ढाब्या मधून एक मटण प्लेट आणली आणि थेट व्हॅन मध्ये बसलेल्या मारणे याला दिली. ही सगळी घटना ढाब्यावर असलेल्या सीसीटीव्हीमध्ये कैद झाली. पुणे पोलिस आयुक्तांना प्रकार समजला आणि त्यांनी या संपूर्ण प्रकरणाची चौकशी सुरू केली. गुन्हे शाखेच्या अधिकाऱ्यांनी या घटनेची तपासणी करण्यासाठी सर्व सीसीटीव्ही तपासले. त्यातून ही मटण पार्टी झाल्याचे धक्कादायक सत्य समोर आले.

पोलिस सह आयुक्त रंजन कुमार शर्मा यांनी ही यानंतर पोलिस अधिकारी आणि कर्मचाऱ्यांवर कारवाई केली आहे. तर गुंड गजा मारणेला ढाब्यावर भेटलेल्या सतीश शिळीमकर, विशाल धुमाळ तसेच बाळकृष्ण उर्फ पांड्या मोहिते यांच्यावर सुद्धा गुन्हा दाखल केला आहे.

कुलगुरू दादासाहेब केतकर यांना अभिवादन

पुणे : गरीब व होतकरू मुलांच्या शिक्षणासाठी कार्यरत पुणे विद्यार्थी गृह संस्थेचा ११६ वा वर्धापनदिन उत्साहात साजरा झाला. संस्थेचे संस्थापक कुलगुरू दादासाहेब केतकर, डॉ. अण्णासाहेब खैर यांच्या प्रतिमेस पुष्पहार अर्पण करून अभिवादन करण्यात आले. संस्थेच्या आवारातील धनुर्धारी श्रीराम मंदिरात सकाळी संस्थेचे कार्याध्यक्ष राजेंद्र बोऱ्हाडे यांच्या हस्ते शास्त्रोक्त पूजा, अभिषेक व महाआरती, तर दुपारी वेदघोष करण्यात आला. सायंकाळी माजी विद्यार्थी, देणगीदार, हितचिंतकांसाठी मेळाव्याचेही आयोजन केले होते. 

पुणे विद्यार्थी गृह संस्थेच्या नियामक मंडळाचे उपाध्यक्ष, ज्येष्ठ माजी विद्यार्थी शिक्षणतज्ज्ञ श्रीधर पाटणकर, सदस्या पौर्णिमा लिखिते, संस्थेचे कार्याध्यक्ष राजेंद्र बोऱ्हाडे, उपकार्याध्यक्ष सुभाष जिर्गे व अमोल जोशी, कार्यवाह संजय गुंजाळ, कोषाध्यक्ष कृष्णाजी कुलकर्णी, कुलसचिव दिनेश मिसाळ, संचालक मंडळातील सदस्य आनंद कुलकर्णी, सुनील रेडेकर, राजेंद्र कडुस्कर, रमेश कुलकर्णी, डॉ. राजेंद्र कांबळे यांच्यासह सल्लागार व कार्यकारी मंडळाचे सदस्य, माजी विद्यार्थी, देणगीदार, हितचिंतक, शिक्षक-शिक्षकेतर कर्मचारी आदी उपस्थित होते.

पुण्यातील नामांकित कायदेतज्ज्ञ ऍड. श्रीकांत कानेटकर, माजी विद्यार्थी न्यायाधीश श्रीपाद देशपांडे, संस्थेच्या सल्लागार मंडळाचे सदस्य डॉ. सतीश देसाई यांच्यासह अनेक माजी विद्यार्थी, देणगीदार यांनी संस्थेला वर्धापनदिनाच्या निमित्ताने देणगी देऊन उपकृत केले. हा सोहळा पुणे विद्यार्थी गृहाच्या सदाशिव पेठेतील मुख्यालयात झाला. वर्धापनदिनाच्या निमित्ताने ११ व १२ मे या दोन दिवशी संस्थेत आयोजित निवासी संमेलनात राज्यभरातील ९५ वर्षे वयापर्यंतचे माजी विद्यार्थी सहभागी झाले होते.

सद्यस्थितीला रस्ता नसल्यामुळे नागरिकांची मोठी गैरसोय; पावसाळ्यापूर्वी काम पूर्ण करण्यासाठी तातडीने परवानगी द्यावी

मुंबई: धानोरी ते चऱ्होली प्रस्तावित डी. पी. रस्त्यासाठी आवश्यक असलेली वनविभागाची परवानगी तातडीने मिळावी, अशी मागणी आमदार बापूसाहेब पठारे यांनी महाराष्ट्र राज्य वनमंत्री गणेश नाईक यांच्याकडे केली आहे. पठारे यांनी भेट घेऊन निवेदन दिले.

धानोरी सर्व्हे नंबर ५ ते चऱ्होली हद्द या दरम्यानच्या डी. पी. रस्त्याचे काम पुणे महानगरपालिकेमार्फत सुरू करण्यात आले आहे. मात्र, प्रस्तावित मार्गिकेतील काही भाग वन विभागाच्या अखत्यारीत येत असल्याने त्या ठिकाणी ना-हरकत प्रमाणपत्र मिळणे आवश्यक आहे. सदर प्रमाणपत्र न मिळाल्यामुळे रस्त्याच्या कामात अडथळा येत आहे व नागरिकांना यामुळे मोठी गैरसोय सहन करावी लागत आहे.

या संदर्भात बोलताना आमदार पठारे म्हणाले, “धानोरी, टिंगरेनगर, विश्रांतवाडी, कळस, येरवडा, लोहगाव व चऱ्होली या भागातील रहिवाशांसाठी धानोरी ते चऱ्होली जोडणारा हा रस्ता खूप महत्त्वाचा आहे. सद्यस्थितीत पर्यायी रस्ता उपलब्ध नाही. पावसाळा जवळ आल्याने हा रस्ता तातडीने पूर्ण होणे आवश्यक आहे.”

वनमंत्री गणेश नाईक यांनीही या मागणीला सकारात्मक प्रतिसाद दिला असून, संबंधित वन अधिकाऱ्यांशी संपर्क साधून लवकरात लवकर या प्रस्तावाला मंजुरी देण्यासाठी प्रयत्न केले जातील, असे आश्वासन दिल्याचे आमदार पठारे यांनी सांगितले.

पुणे, दि.13: नॅशनल कौन्सिल फॉर हॉटेल मॅनेजमेंट अँड केटरिंग टेक्नॉलॉजी, नोएडा, आयएचएम यांच्या वतीने एनसीएचएमसीटीशी संलग्न असलेल्या आयएचएम सोलापूर येथे बी.एससी-एचएचए (हॉस्पिटॅलिटी अँड हॉटेल अॅडमिनिस्ट्रेशन) अभ्यासक्रमाच्या प्रवेश घेण्यासाठी पात्र उमेदवारांकडून ३१ मे २०२५ पर्यंत अर्ज मागविण्यात येत आहेत.

उमेदवार मान्यताप्राप्त मंडळाकडून कोणत्याही विद्याशाखेत १२ वी परीक्षा उत्तीर्ण झालेला असावा. इयत्ता बारावीत इंग्रजी विषय घेऊन परीक्षा उत्तीर्ण झालेला असावा. प्रवेशाकरिता वयाची अट नाही. प्रवेशासाठी सरकारी नियमांनुसार आरक्षण राहील. हा अभ्यासक्रम जवाहरलाल नेहरू विद्यापीठाकडून मान्यताप्राप्त असून विद्यापीठाकडून अंतिम पदवी प्रदान करण्यात येईल.

इच्छुक उमेदवाराने दाखल्यांच्या प्रती जोडून संस्थेत अर्ज करावा. अर्ज पोस्टाने किंवा वर नमूद केल्याप्रमाणे ईमेलद्वारे देखील पाठवता येतील. प्रवेश अर्ज आणि इतर तपशील https://ssmihm.maharashtratourism.gov.in या संकेतस्थळावर उपलब्ध आहे. अधिक माहितीकरीता मृणाल एम ९७६७२५७०२१ यांच्याशी संपर्क साधावा.

एनसीएचएमसीटीद्वारे घेण्यात येणाऱ्या लेखी परीक्षेच्या आधारे प्रवेश दिला जाईल. याबाबतच्या तारखा पात्र अर्जदारांना कळविण्यात येतील. लेखी परीक्षेच्या वेळापत्रकाची माहिती मिळविण्यासाठी उमेदवारांनी संस्थेच्या संकेतस्थळाला भेट द्यावी, असे विभागीय पर्यटन कार्यालयाच्या उप संचालक शमा पवार यांनी प्रसिद्धी पत्रकान्वये कळविले आहे.

पुणे -फेब्रुवारी 2025 मध्ये महाराष्ट्र राज्य माध्यमिक व उच्च माध्यमिक शिक्षण मंडळाने घेतलेल्या दहावी बोर्ड परीक्षेमध्ये चाटे शिक्षण समुहाच्या विद्यार्थ्यांचे उत्तुंग यश मिळाले आहे.महाराष्ट्रातील चाटे शिक्षण समुहाचा प्रत्येक विद्यार्थ्यी हा आजच्या दिवसाची वाट आतुरतेने बघत होता.कारण आत्मविश्वास सांगत होता.चाटे म्हणजे यश आणि यश म्हणजे चाटे हे समीकरण साध्य करण्यासाठीच.आज दहावीचा निकाल लागल्यानंतर चाटे शिक्षण समुहाने सातारा रोड चाटे कोचिंग क्लासेस च्या शाखेवरती सत्कार समारंभ आयोजित केला होता. सर्व यशस्वी विद्यार्थ्यांचे .प्रा.फुलचंद चाटे यांनी अभिनंदन केले, या वेळी प्रा विजय बोबडे व अन्य मान्यवर उपस्थित होते. दुपारी एक वाजत निकाल पाहिल्यानंतर चाटेंच्या प्रत्येक पालकांच्या चेहर्‍यावरील स्मितहास्य हेच सांगत होते कि चाटेंचा पॅटर्न सक्सेसफुल झाल्यामुळेच आपल्या पाल्याचा निकाल उत्तम लागला आणि स्वप्नाची सुरूवात छान झाली.आजच्या गुणवंत विद्यार्थ्यांच्या सत्कार समारंभ प्रसंगी एस.एस.सी बोर्ड चे उपस्थित गुणवंत विद्यार्थी पर्नवी कुलकर्णी 99.60% तेजस्वी सावंत 98.40% जाधव श्लोक 98.00% यदित काळे 97.80% बर्नवाला त्वीषा 97.80 अनुज तांबे 97.80 शिंदे दुर्वेश मुक्ता देशमुख 97.00% 96.40% दिक्षीत इशान 96.40% फाटक जाई 96.40% तनिष नलगे 95.80 मृनाली गावडे 95.80% सिध्दी तळे 95.60% पियुषा नाईक 95.60% व सी.बी.एस.ई बोर्ड मधून सृष्टी वाडकर 95.08% गार्गी घुटे 94.60%
सावरदा ठाकरे 94.40% आयुष इंगळे 94.00% पुजा भोसले 93.60% अनिल कोल्हे 93.40% प्रज्वल जाधव 93.40% ओंकार सोनाकुल 93.00% सिंग सजल 92.80% अहिरराव इशान 92.40% बांगल पृथ्वीराज 92.40% तांबे ॠतुपर्ण 91.20% ताजवे सई 91.20% यांचा सत्कार करून शुभेच्छा देण्यात आल्या.

चाटे शिक्षण समुहाचे पुणे विभागीय संचालक प्रा.फुलचंद चाटे यांनी उपस्थित विद्यार्थी व पालक वर्ग यांना अभिनंदन करून दहावी नंतर पुढे काय? याबद्दलही मार्गदर्शन केले.आजचे हे सक्सेस हे एक/दोन दिवसांचे नसून नववी पासूनच शिक्षकांनी करून घेतलेली मेहनत आहे व तुमच्यासारख्या पालकांनी दिलेली प्रेरणा आहे.त्यामुळे चाटे पॅटर्न आज फलित ठरला आहे.आजच्या निकालावरती न थांबता लगेच पुढचे उज्वल भविष्य घडवण्यासाठी अकरावी/बारावी नंतर च्या प्रवेश प्रक्रियेच्या तयारीला सर्वानी तयारीला लागणे गरजेचे आहे.कारण दहावीच्या परीक्षेपेक्षा जेईई नीट सीईटी अशा उच्च शिक्षणासाठीच्या स्पर्धेत्मक परीक्षेचा पॅटर्न वेगळा असतो.अकरावी व बारावी साठी वेळेचे महत्त्व लक्षात घेऊन आपल्या घराजवळील आणि ज्या ठिकाणी प्रवेश प्रक्रियेची तयारी करून घेतली जाते अशाठिकाणी अकरावी सायन्स चा प्रवेश घेणे गरजेचे आहे. मित्र किंवा नातेवाईक म्हणतात म्हणून नव्हे तर आपल्या आवडीनुसार विषय व दिशा ठरवा.प्रत्येकाला जीवनाच्या प्रवासात पुढे जायचे असेल तर आपण काय करणार आहोत हे अगोदर निश्चित केले पाहीजे.त्यासाठी प्रथम स्वत:ला ओळखा स्वत: मधील गुण ओळखा सकारात्मक विचार करा.स्वप्न साकार करण्यावर भर द्या वेळ कोणासाठी थांबत नाही त्यासाठी परीक्षेच्या काही दिवस अगोदर अभ्यास करण्यापेक्षा आतापासूनच दोन वर्ष अभ्यास करा प्रत्येक दिवस आपला आहे असं समजून तयारीला लागा यश तुमचेच आहे कारण तुमच्यासोबत चाटे शिक्षण समूह आहे चाटे शिक्षण समूह आहे.राज्य व राष्ट्रीय पातळीवर विविध स्पर्धा परीक्षा व त्याचा अभ्यासक्रम इंजिनिअरिंग मेडिकल व विज्ञान शाखेतील शिक्षण आणि अकरावी बारावी सह जेईई नीट सीईटी एनडीए यासारख्या परीक्षेनंतर देशातील नामांकित संस्था आयआयटी एनआयटी बीआयटी व्हीआयटी आयआयएससी आयआयएसईआर एनआयएसईआर याबाबत ही पालकांना मौलिक मार्गदर्शन केले.चाटे शिक्षण समुहाचे अध्यक्ष गोपीचंद चाटे सर यांनी फोनद्वारे अभिनंदन करत शुभेच्छा दिल्या आजच्या सत्कार समारंभ प्रसंगी सातारा रोड बालाजी नगर शाखेवरती पुणे विभागीय व्यवस्थापक प्रा.विजय बोबडे सर, प्राचार्य नवनीत राजपाल ,रणजीत जगताप , नामदेव माने शाखा व्यवस्थापक रत्नाकर सोनवणे श्री अनंतराव इंगळे विष्णु पालवे , प्रविण जावळे प्रा.सचिन ढाकणे, महेश ढबाले , गणेश ढाकणे, प्रा.प्रशांत जाधव इतर पुण्यातील सर्व शाखा व्यवस्थापक व आदी शिक्षक शिक्षिकेत्तर कर्मचारीवर्ग उपस्थित होते.

पुणे : भरत नाट्य मंदिरात वर्षानुवर्षे नेपथ्य, प्रकाश योजना, कपडेपट तसेच तिकिट विक्रीची जबाबदारी यशस्वीपणे सांभाळणाऱ्या पडद्यामागील तंत्रज्ञांचा आज (दि. 13) रसिक प्रेक्षकांच्या उपस्थितीत सत्कार करण्यात आला.
निमित्त होते ते 33व्या वासंतिक नाट्य महोत्सवाच्या समारोप सोहळ्याचे. भरत नाट्य संशोधन मंदिराची निर्मिती असलेल्या ‌‘कट्यार काळजात घुसली‌’ या नाटकाने महोत्सवाचा समारोप झाला.
रंगमंचावर अभिनय करणारे कलाकार वेगवेगळ्या भूमिकांमध्ये, पेहरावात दिसतात. रंगमंचावरील कलाकारांच्या पाठीमागे असलेले नेपथ्य तसेच प्रसंग उठावदार करणारी प्रकाशयोजना प्रेक्षकांना भुरळ घालते. कलाकारांच्या जोडीने तंत्रज्ञ आणि पडद्यामागील सहाय्यकांमुळे नाटकामध्ये अनोखे रंग भरले जातात. पडद्यामागे झटणाऱ्या तंत्रज्ञांना प्रेक्षकांसमोर येण्याची कधी संधी मिळत नाही. ही संधी भरत नाट्य संशोधन मंदिराच्या व्यवस्थापनाने आज त्यांचा जाहीर सत्कार करून अनोख्या पद्धतीने दिली. उपस्थित प्रेक्षकांनीही टाळ्यांच्या गजरात पडद्यामागील कलाकारांचे कौतुक केले. विठ्ठल हुलावळे, रामचंद्र घावारे, जितेंद्र सुतार, अभिजित गायकवाड, शंतनू कोतवाल, विनायक कापरे, सुधीर फडतरे, पुष्कर केळकर, नरेंद्र वीर, संदीप देशमुख, राकेश घोलप आणि गणेश भोसले यांचा सत्कार भरत नाट्य संशोधन मंदिराचे अध्यक्ष पांडुरंग मुखडे यांच्या हस्ते करण्यात आला. सत्कार सोहळ्याची संकल्पना कार्याध्यक्ष अभय जबडे यांनी विशद केली.

पुणे – महाराष्ट्र विद्यार्थी सहाय्यक मंडळ संचालित शाळांनी इयत्ता दहावीच्या परीक्षेत उल्लेखनीय यश संपादन करत गुणवत्तेची उज्ज्वल परंपरा यंदाही कायम राखली आहे. पुणे, कोळविहिरे, कोंढवा आणि बारामती येथील चारही शाखांचा निकाल अत्यंत समाधानकारक लागला असून विद्यार्थ्यांची गुणवत्ता आणि शिक्षकांचे परिश्रम अधोरेखित करणारा ठरला आहे.

अशोक विद्यालय आणि कनिष्ठ महाविद्यालय, टिळक रोड, पुणे या शाळेचा निकाल 93.33 टक्के लागला आहे.

या शाळेतील नाईक शौर्या पुष्कर हिने 97.20 टक्के गुण मिळवत प्रथम क्रमांक पटकावला आहे.

गायकवाड आरव किशोर (90.80%) आणि देशपांडे विहान विशाल (90.20%) यांनी अनुक्रमे द्वितीय व तृतीय क्रमांक मिळवला.

या यशाबद्दल मुख्याध्यापिका उर्मिला केशव भोसले यांचे विशेष अभिनंदन करण्यात आले.

महर्षी वाल्मिक विद्यालय, कोळविहिरे या ग्रामीण भागातील शाळेचा निकाल 100 टक्के लागला असून विद्यार्थिनी मस्के नम्रता रोहिदास हिने 83 टक्के गुण मिळवत प्रथम क्रमांक मिळवला आहे.

या यशामागे शाळेच्या शिक्षकवृंदासह मुख्याध्यापक अशोक चव्हाण यांचे मोलाचे योगदान आहे.

जडाबाई दुगड विद्यालय, कोंढवा या शाळेने 94.18 टक्के निकालाची नोंद करत उत्तम कामगिरी बजावली आहे.

मुख्याध्यापिका जयश्री जाधव यांच्या नेतृत्वाखाली शाळेने हे यश संपादन केले.

शारदा निकेतन इंग्लिश मिडियम स्कूल, बारामती या शाळेने 100 टक्के निकालाची नोंद केली असून विद्यार्थिनी खक्कल प्रतीक्षा महेश हिने 81.5 टक्के गुण मिळवत यश मिळवले आहे.

मुख्याध्यापक खान शबान यांचे मार्गदर्शन शाळेच्या गुणवत्तापूर्ण यशामागे आहे.

या सर्व यशस्वी निकालाबद्दल संस्थेचे अध्यक्ष मा. मोहनदादा जोशी, सचिव प्रसाद आबनावे, खजिनदार प्रथमेश आबनावे, सहसचिव पुष्कर आबनावे, संचालक गौरव आबनावे व प्रज्योत आबनावे यांनी विद्यार्थ्यांचे, शिक्षकांचे व मुख्याध्यापकांचे अभिनंदन केले.

 संस्थेचे सचिव प्रसाद आबनावे यांनी याप्रसंगी सांगितले, “निकाल ही केवळ शैक्षणिक टक्केवारी नव्हे, तर संस्थेच्या मूल्याधिष्ठित शिक्षणपद्धतीचे प्रतीक आहे. हे यश विद्यार्थ्यांच्या मेहनतीबरोबरच शिक्षक व शाळा व्यवस्थापनाच्या एकत्रित प्रयत्नांचे फलित आहे.”* 

या यशस्वी निकालामुळे मंडळाच्या शाळा गुणवत्तेच्या दिशेने सातत्याने वाटचाल करत असल्याचा विश्वास पालक व विद्यार्थ्यांमध्ये निर्माण झाला आहे.

पुणे-छोटेसे प्राणी संग्रहालय , फुलराणी,नौका विहाराचे तळे, आणि बाजूला मोठ्ठी प्रशस्त सारस बाग .. पुण्याचे आणि पर्यटकांचे आकर्षण म्हणून इतिहासात नोंद असलेली सारस बाग आज जॉगिंग ट्रक म्हणूनही वापरणे सोयीचे ठेवलेले नाही . सणस मैदानावर भरणारी सर्कस तर लुप्तच झाली . पण हा परिसर एकूणच अतिक्रमणे आणि आरोग्य विषयक प्रश्नांनी ग्रासला आहे आणि इथले ऐतिहासिक पर्यटन स्थळ नामशेष होण्याच्या मार्गावर पोहोचले आहे. महापालिकेने या भागाचा पर्यटन स्थळ म्हणून विकास करायचा अशा दृष्टीकोनातून न पाहता , आजी माजी लोकप्रतिनिधींच्या कार्यकर्त्यांच्या पोटापाण्याची सोय म्हणूनच याकडे पाहून या पर्यटन स्थळाचा नाश चालविला आहे. इथले सर्व व्यावसायिक गरीब पोटार्थी नाहीत , कोणीही हातावर पोट असलेला नाही .पण त्यांच्यासाठी महापालिका आजवर पायघड्या घालीत आली आहे.आणि त्यांच्यामुळे सारस बागेची शान लयाला चालली आहे.

दररोज बागेत सकाळी फिरायला येणारे ५९ वर्षीय रहिवासी नितिन काकडे म्हणाले, खाद्यपदार्थांच्या स्टॉल्सनी पदपथावर अतिक्रमण केले आहे टेबल आणि खुर्च्या ठेवण्यासाठी त्यापलीकडेही वाढ केली आहे. योग्य ड्रेनेज नाही. रात्री जेव्हा ते त्यांचे स्टॉल धुतात तेव्हा घाणेरडे पाणी थेट रस्त्यावर येते. यामुळे केवळ दुर्गंधी निर्माण होत नाही तर अरुंद रस्त्यामुळे वाहनांनाही धोका निर्माण होतो. लोक त्यांचे दोन्ही बाजूला वाहने पार्क देखील करतात.पुण्याच्या प्रमुख ऐतिहासिक बागांपैकी एक असलेल्या सारस बाग येथे अतिक्रमण, देखभालीचा अभाव आणि खराब स्वच्छता यामुळे मंदिरात येणाऱ्या भाविकां मध्ये चिंता निर्माण झाली आहे, ज्यामुळे पुणे महानगरपालिकेची (पीएमसी) पर्यटन स्थळांच्या जतनाबद्दलची उदासीनता दिसून येते.नानासाहेब पेशवे यांनी बांधलेले आणि पर्वतीच्या पायथ्याशी असलेले सारस बाग हे शहराच्या मध्यभागी एक प्रमुख आकर्षण आहे. तथापि, नागरिकांचा आरोप आहे की त्याची बिकट स्थिती डोळ्यांना त्रास देणारी आणि सुरक्षिततेला धोका निर्माण करणारी आहे. मुख्य प्रवेशद्वार आहे खराब स्थिती, जवळच्या रस्त्यावर अन्नपदार्थांच्या दुकानांनी अतिक्रमण केले आहे, ज्यामुळे पर्यटकांना अरुंद आणि अस्वच्छ रस्त्यांवरून जावे लागते.

“ते ठिकाण पवित्र आहे, आणि तरीही तिथे खूप घाण आहे. बागेत कुत्र्यांची संख्या वाढली आहे. ते पर्यटकांना घाबरवतात आणि चावतातही. संपूर्ण रस्त्यावर दुकानदारांनी अतिक्रमण केले आहे आणि लोकांना मोकळेपणाने चालण्यासाठी जागा नाही.अशाच भावना शुक्रवार पेठेतील रहिवासी अजित शाह जे दररोज सारसबाग गणपतीला प्रार्थना करण्यासाठी सारसबागला भेट देतात त्यांनी व्यक्त केली आहे

“खाण्यापिण्याच्या दुकानांनी आणि खाद्यपदार्थांच्या दुकानांनी फूटपाथवर अतिक्रमण केले आहे आणि त्यांचे टेबल आणि खुर्च्या ठेवण्यासाठी त्यापलीकडेही विस्तार केला आहे. योग्य ड्रेनेज नाही. रात्री, जेव्हा ते त्यांचे स्टॉल धुतात तेव्हा घाणेरडे पाणी थेट रस्त्यावर येते.-प्रेमा देव , वय ५०, मॉर्निंग वॉकर

“संपूर्ण रस्ता दुकानदारांनी अतिक्रमित केला आहे आणि लोकांना मोकळेपणाने चालण्यासाठी जागा नाही. अधिकाऱ्यांनी कठोर कारवाई करावी.”
-अरूण गुजराथी , वय ७२ , रा. बिबवेवाडी.

सर्व प्रतिक्रिया -Rajvant Singh

पुणे, दि. १३ मे २०२५: महावितरणच्या पुणे परिमंडलमधील १ कोटी ४५ लाख ५८ हजार ८६ रुपयांच्या थकीत वीजबिलासंबंधी न्यायप्रविष्ट असलेली ३४१ प्रकरणे नुकत्याच झालेल्या येथील राष्ट्रीय लोकअदालतीमध्ये निकाली निघाली आहेत. यामध्ये दोन वीजचोरीच्या प्रकरणांतील वीजबिल व तडजोड शुल्काच्या ५९ लाख २७ हजार रुपयांचा समावेश आहे.

जिल्हा विधी सेवा प्राधीकरणाच्या वतीने आयोजित नुकत्याच झालेल्या राष्ट्रीय लोकअदालतीमध्ये पुणे परिमंडलातील थकीत वीजबिलांबाबत न्यायप्रविष्ट असलेली प्रकरणे तडजोडीसाठी ठेवण्यात आली होती. यामध्ये सर्वाधिक रास्तापेठ मंडलमधील ६५ लाख २५ हजार ९५६ रुपयांची २६६ प्रकरणे, पुणे ग्रामीण मंडलमधील ४३ लाख ६५ हजार रुपयांची ४२ तर गणेशखिंड मंडलमधील ३६ लाख ६७ हजार रुपयांची ३३ प्रकरणे असे एकूण १ कोटी ४५ लाख ५८ हजार रुपयांचे ६७० प्रकरणे निकाली काढण्यात आली. तसेच कलम १३५ अन्वये दोन वीजचोरीच्या प्रकरणांमध्ये वीजबिल व तडजोड शुल्कापोटी एकूण ५९ लाख २७ हजार रुपयांचा भरणा केला.

या लोकअदालतमध्ये महावितरणकडून प्रभारी विधी सल्लागार श्री. दिनकर तिडके, विधी अधिकारी नीतल हासे, गणेश सातपुते, अंजली चौगुले यांच्यासह अभियंते, लेखा अधिकारी व कर्मचाऱ्यांनी सहभाग घेतला.