पुणे-

पुणे आंतरराष्ट्रीय विमानतळावरील जुन्या टर्मिनलवरुन होणारी सर्व उड्डाणे आता नव्या टर्मिनल वरून होणार असून याची अंमलबजावणी आजपासून करण्यात आली आहे, अशी माहिती केंद्रीय नागरी हवाई वाहतूक राज्यमंत्री मुरलीधर मोहोळ यांनी दिली. उड्डाणांसाठी आवश्यक असलेल्या तांत्रिक तयारीचा आढावा मंत्री मोहोळ यांनी विमानतळाच्या विविध विभागाच्या अधिकाऱ्यांकडून घेतला.

पुणे विमानतळावरील नवीन टर्मिनल काही महिन्यांपूर्वी सुरु करण्यात आले असून या टर्मिनलवरुन होणाऱ्या उड्डाणांची संख्या टप्प्याटप्प्याने वाढवण्यात आली आहे. मात्र इमिग्रेशनच्या यंत्रणेबाबतची निर्माणाधीन प्रक्रिया आता पूर्णत्वास गेली आहे. मंत्री मोहोळ यांनी या सर्व प्रक्रियेचा आढावा घेतला आणि तांत्रिक बाबींसंदर्भात माहितीही घेतली.

याबाबत माहिती देताना केंद्रीय मंत्री मोहोळ म्हणाले, ‘पुणे विमानतळावरुन आताच्या घडीला एकूण ३ मार्गांवरून ५ आंतरराष्ट्रीय उड्डाणे सुरु असून ही सर्व उड्डाणे नव्या टर्मिनलकडे स्थलांतरित करण्यात आली आहेत. आंतरराष्ट्रीय विमान प्रवासासाठी पुणेकर प्रवाशांसाठी आजवर जुनेच टर्मिनल वापरले जात होते, ज्यावर अद्ययावत सुविधांचा अभाव होता. आता मात्र आंतरराष्ट्रीय प्रवासाची सुरुवात सुखकर होणार आहे.’

‘इमिग्रेशन संदर्भातील तांत्रिक प्रक्रिया पूर्णत्वास नेऊन नवे टर्मिनल आंतरराष्ट्रीय प्रवासासाठी उपलब्ध करून देण्यात आले आहे. पुणे विमानतळाच्या विकासासाठी मोदी सरकार कटिबद्ध असून अद्ययावत सुविधा उपलब्ध करुन देण्याची मालिका अशीच अखंडित राहील’, असेही केंद्रीय मंत्री मोहोळ म्हणाले.

पुणे – मेट्रो च्या कामामुळे स्थलांतरित झालेले शिवाजीनगर एसटी स्थानक लवकरच पूर्वीच्या जागी उभे राहील, अशी माहिती आमदार सिद्धार्थ शिरोळे यांनी आज (सोमवारी) प्रसारमाध्यमांना दिली.

या स्थानकाच्या स्थलांतराबाबत उपमुख्य मंत्री अजित पवार यांच्यासमवेत सिद्धार्थ शिरोळे यांनी आज सविस्तर चर्चा सर्कीट हाऊसवर झालेल्या बैठकीत केली. एसटी स्थानकाचे स्थलांतर लवकरच मूळ जागी करावे, अशी विनंती शिरोळे यांनी, उपमुख्य मंत्री पवार यांना केली. लगेचच पवार यांनी परिवहन मंत्री प्रताप सरनाईक यांच्याशी फोनवर चर्चा केली. त्यानंतर एसटी स्थानक हलविण्याचे काम लवकर करण्याचे निर्देश महा मेट्रोच्या प्रशासनाला पवार यांनी दिले.

एसटी स्थानक स्थलांतर प्रकल्पाबाबत महाराष्ट्र राज्य परिवहन महामंडळ (एसटी) आणि महा मेट्रो (पुणे) यांच्यात करार अंतिम टप्प्यात असून, महा मेट्रो हे काम पूर्ण करणार आहे. हा प्रकल्प लवकर व्हावा, यासाठी दोन्ही बाजू प्रयत्न करणार आहेत, असे आमदार शिरोळे यांनी सांगितले.

हिंदू आध्यात्मिक सेवा संस्थेतर्फे आयोजित हिंदू सेवा महोत्सवाची संत संमेलनाने सांगता 
पुणे : छत्रपती शिवाजी महाराजांनी महाराष्ट्र धर्म टिकवला आणि वाढविला. त्याच महाराष्ट्रात संत चरणांचे आशीर्वाद मिळणे हे प्रत्येकाचे भाग्य आहे. पैसा, अपत्य किंवा लॉटरी हे भाग्य नाही. संत दर्शन हेच खरे भाग्य आहे. आपल्याकडे प्रत्येकाची प्रार्थना पद्धती वेगळी असली तरी धर्म व देशाप्रती भाव असायला हवा, असा सूर संत संमेलनात उमटला. 
हिंदू आध्यात्मिक सेवा संस्थेतर्फे हिंदू सेवा महोत्सवाचे आयोजन स.प.महाविद्यालयाच्या मैदानावर करण्यात आले होते. याचा समारोप संत संमेलनाने झाला. यावेळी नाशिकच्या महंत वेणा भारती, ह.भ.प.चिदंबरम महाराज साखरे, कीर्तनकार गणेश महाराज भगत, इस्कॉन चे बलभद्रकृपा प्रभू, रासपती प्रभू, परमात्मा प्रभू, हिंदू आध्यात्मिक सेवा संस्थेचे राष्ट्रीय संयोजक गुणवंत कोठारी, संस्थेचे अध्यक्ष अशोक गुंदेचा, संस्थेचे महामंत्री किशोर येनपुरे, उपाध्यक्ष पंडित शिवकुमार श्री, इस्कॉनचे संजय भोसले, स्वामीनारायण मंदिरचे राधेश्याम अग्रवाल, चरणजितसिंग सहानी, श्रीमंत दगडूशेठ हलवाई सार्वजनिक गणपती ट्रस्टचे महेश सूर्यवंशी आदी उपस्थित होते.
वेणा भारती म्हणाल्या, विश्वाला एकत्र करण्याची मोहीम भारताने मांडली आहे. पुण्यातील महोत्सवात असेच कार्य झाले असून येथे मठ मंदिरांचे साधू संत यांचे दर्शन झाले. अध्यात्म ही वीरश्री असून महाबळ वाढविणारी आहे. अध्यात्म्यात स्वतःची ओळख करून परमेश्वरापर्यंत ते आपल्याला पोहोचवत असते.  
चिदंबरम महाराज साखरे म्हणाले, महाराष्ट्रात असे महोत्सव होणे गरजेचे आहे. पुढील १० ते १५ वर्षात कीर्तन परंपरा चालेल की नाही, अशी शंका काहींना वाटत होती. मात्र अशा महोत्सवातून विश्वास निर्माण होत आहे. तसेच आपल्या परंपरेची ओळख देखील होत आहे. 
बलभद्रकृपा प्रभू म्हणाले, परमेश्वराकडे पाठ फिरवली तर आपण अधर्मि होऊ आणि दुःख सुरु होईल. साधू संतांचे हेच काम आहे की अशा लोकांना परमेश्वराशी जोडणे. त्याकरिता गीता, भागवत वाचन आणि नामजप रोज करायला हवे. आपण परमेश्वराला मार्गदर्शक बनविले, तरच योग्य दिशेला जाऊ शकतो. 
कृष्णकुमार गोयल म्हणाले, देवस्थानाच्या सामाजिक कार्यातून सर्वाना प्रेरणा मिळेल. सेवा, कर्तव्य, त्याग याची महती महोत्सवात पाहायला मिळाली, असेही ते म्हणाले. अशोक गुंदेचा म्हणाले, धर्मावर विश्वास व एकता वाढविणे यासाठी महोत्सवाच्या माध्यमातून प्रयत्न करण्यात आला. शालेय मुला-मुलींमध्ये संस्कार रुजावे, याकरिता देखील अनेक उपक्रम राबविण्यात आले होते. धर्माबद्दल सर्वांच्या मनात प्रेम वाढविणे हाच उद्देश होता, असेही त्यांनी सांगितले. किशोर येनपुरे यांनी सूत्रसंचालन केले. 

लोढा जिनियस प्रोग्राम आणि अशोका विद्यापीठाची भागीदारी;  9 वी ते 12 वीच्या हुशार विद्यार्थ्यांसाठी अर्ज प्रक्रिया सुरू· ‘व्हॉट अनलॉक्स युअर जिनियस?’ या डिजिटल कॅम्पेनची सुरुवात· कुटुंबाकडून मिळालेल्या ₹20,000 कोटींच्या निधीनंतर लोढा फाऊंडेशनचा उपक्रम अधिक व्यापक

 पुणे : लोढा फाउंडेशनच्या नुकत्याच स्थापन झालेल्या लोढा जिनियस प्रोग्रामतर्फे अशोका विद्यापीठाच्या भागीदारीने 9वी ते 12वीच्या हुशार विद्यार्थ्यांसाठी पूर्णतः प्रायोजित बहुवर्षीय शैक्षणिक कार्यक्रमासाठी अर्ज मागविण्यात आले आहेत. अर्ज प्रक्रिया 1 डिसेंबर 2024 पासून 15 जानेवारी 2025 पर्यंत सुरू राहणार आहे. अभिषेक लोढा आणि त्यांच्या कुटुंबाने लोढा फाउंडेशनला दिलेल्या निधीनंतर लगेच हा उपक्रम जाहीर करण्यात आला आहे. लोढा जिनियस प्रोग्राम हा बहुवर्षीय उपक्रम आहे, ज्यामध्ये दरवर्षी अशोका विद्यापीठात चार आठवड्यांचा कॅम्पस अनुभव आणि वर्षभर सुरू राहणारे शिक्षण यांचा समावेश आहे. हा कार्यक्रम सर्व प्रमुख परीक्षा मंडळांशी सुसंगत आहे आणि विद्यार्थ्यांना त्यांच्या अभ्यास अधिक सखोल करण्यास व निवडलेल्या क्षेत्रात करिअरच्या विविध मार्गांचा शोध घेण्यास याची मदत होते. या उपक्रमात सखोल विज्ञान व गणिताचे अभ्यासक्रम, उपयुक्त जीवनकौशल्ये, सातत्यपूर्ण मार्गदर्शन, आणि विशेष इंटर्नशिप या संधींचा समावेश आहे. हा कार्यक्रमांतर्गत नोबेल पुरस्कार विजेत्यांसह नामांकित शिक्षणतज्ज्ञांचा सहभाग असून विद्यार्थ्यांना माध्यमिक शाळेपासून त्यांच्या पहिल्या नोकरीपर्यंत मदत करण्यात येते. काही निवडक विद्यार्थ्यांना अमेरिकेत शिक्षण घेण्यासाठी किंवा आंतरराष्ट्रीय STEM कार्यक्रमांमध्ये सहभागी होण्यासाठी शिष्यवृत्ती संधी देखील उपलब्ध करून दिल्या जातात. या कार्यक्रमावर प्रतिक्रिया देताना लोढा फाउंडेशनच्या हेड ऑफ एज्युकेशन महिका शिशोदिया म्हणाल्या, “लोढा जिनियस प्रोग्रॅम हा नव्यानेच स्थापन करण्यात आलेल्या लोढा फाउंडेशनचा फ्लॅगशिप कार्यक्रम आहे. भारतभरातील विशेष प्रतिभावान मुलांसाठी, त्यांच्या उत्पन्नाच्या पार्श्वभूमीची पर्वा न करता, शिक्षणाचा दर्जा उंचावणे हा या कार्यक्रमाचा मुख्य उद्देश आहे. मुलांचे मूल्यमापन एका प्रवेश परीक्षेद्वारे केले जाते. या परीक्षेत विशिष्ट अभ्यासक्रमावर न भर देता वैज्ञानिक तर्कशक्ती, गणित आणि लॉजिक यावर या परीक्षेत भर देण्यात येतो. त्यानंतर त्यांच्या समस्या-निवारणाच्या क्षमतेनुसार आम्ही विद्यार्थ्यांची निवड करतो आणि प्रतिभावान विद्यार्थी निश्चित करण्यासाठी त्यांची मुलाखत घेतो आणि त्यांना ‘जिनियस’ म्हणतो. या कार्यक्रमाच्या तिसऱ्या वर्षात या प्रतिभावान विद्यार्थ्यांना वेगाने प्रगती करण्यासाठी सुयोग्य व्यक्तींशी संपर्क साधून देतो, संधी आणि आयडिया उपलब्ध करून देतो. उद्याचे परिवर्तनकर्ते, नेतृत्व आणि समाजसेवकघडवणे हा लोढा जिनियस कार्यक्रमाचा उद्देश आहे; असे विद्यार्थी जे भारताला शाश्वत भविष्याकडे नेतील आणि राष्ट्र व समाजाच्या विकासासाठी योगदान देतील. “लोढा जिनियस प्रोग्राम हा कठोर शैक्षणिक अध्ययन, मार्गदर्शन आणि वास्तविक जगातील अनुभव यांचा अनोखा संगम आहे. लोढा फाउंडेशनसोबत या उपक्रमात सहभागी होताना आम्हाला अभिमान वाटतो. हा उपक्रम यंदा अधिक पुढे नेऊन शिक्षण क्षेत्र व समाजासाठी महत्त्वपूर्ण योगदान देण्याचे आमचे ध्येय आहे. गेल्या वर्षापासून भारतातील हुशार विद्यार्थ्यांचा मोठ्या प्रमाणावर सहभाग पाहायला मिळत आहे. ही भागीदारी म्हणजे शिक्षणाच्या माध्यमातून भारताचे भविष्य घडवण्याच्या आमच्या सामूहिक बांधिलकीचे प्रतीक आहे,” असे अशोका विद्यापीठाचे कुलगुरू सोमक रायचौधरी यांनी सांगितले. अशोका विद्यापीठाच्या सायन्स अॅडव्हायजरी कौन्सिलचे अध्यक्ष प्रो. के. विजयराघवन म्हणाले, “लोढा जिनियस प्रोग्राम हा केवळ एखाद्या सामान्य उन्हाळी कार्यक्रमापुरता मर्यादित नाही. तो एक सर्वसमावेशक आणि नावीन्यपूर्ण शैक्षणिक उपक्रम आहे. अशोकामधील आकर्षक उन्हाळी उपक्रमाच्या अनुभवासोबतच, या कार्यक्रमाच्या माध्यमातून वर्षभर सखोल शिक्षण, मार्गदर्शन आणि विकासाच्या संधी उपलब्ध होतात. अशोका विद्यापीठ आणि लोढा फाउंडेशन यांची भागीदारी शिक्षणाच्या माध्यमातून भारतातील भविष्यातील नेतृत्व आणि परिवर्तनकर्त्यांना सक्षम बनवण्याच्या आमच्या सामूहिक वचनबद्धतेचे प्रतीक आहे.” संपूर्ण कोर्स आणि त्यातील उपक्रमांचा सर्व खर्च लोढा फाउंडेशन उचलत असल्यामुळे विद्यार्थ्यांवर, त्यांच्या पालकांवर किंवा शाळांवर कोणताही आर्थिक भार येत नाही.देशभरातील प्रतिभावंत मुलांना सहभागी होण्याची संधी मिळावी यासाठी लोढा फाउंडेशनने ‘व्हॉट अनलॉक्स युअर जिनियस?’ या नावाने एक डिजिटल कॅम्पेन सुरू केले आहे. हे कॅम्पेन पालक, विद्यार्थी, शाळा, शिक्षक (प्रशिक्षक, मार्गदर्शक इ.) आणि सरकारी शिक्षण मंडळांवर लक्ष केंद्रित करते. कॅम्पेनच्या व्हिडिओमध्ये या अनोख्या कार्यक्रमाची झलक पाहायला मिळते आणि तो यूट्यूब व इंस्टाग्रामवर पाहता येऊ शकतो. हा कॅम्पेनमध्ये ‘व्हॉट अनलॉक्स युअर जिनियस? > पीपल, अपॉर्च्युनिटीज अँड आयडियाज’ या संदेशावर भर देण्यात आला आहे. कार्यक्रमाची रूपरेषा· पात्रता : मे 2025 पर्यंत 9वी ते 12वीमधील विज्ञान आणि गणितातील असामान्य कामगिरी केलेले विद्यार्थी.· स्थळ : अशोका विद्यापीठ, सोनीपत येथे वार्षिक कॅम्पस अनुभव, तसेच ऑनलाइन आणि ऑफलाइन माध्यमातून सुरू राहणारे शिक्षण.· महत्त्वाच्या तारखा: अर्ज प्रक्रिया 1 डिसेंबर 2024 पासून 15 जानेवारी 2025 पर्यंत | कॅम्पस अनुभव मे 2025 च्या मध्यापासून जून 2025 च्या मध्यापर्यंत.· शुल्क: विद्यार्थ्यांच्या कार्यक्रमाचा सर्व खर्च पूर्णतः प्रायोजित.· अध्ययन निष्पत्ती : सखोल आणि बहुविषयक शिक्षणाद्वारे विज्ञान आणि गणिताच्या क्षितिजाचा विस्तार. · अर्जासाठी भेट द्या : www.lodhageniusprogramme.com

विद्यार्थ्यांनी लावले सुमारे ३० स्टॉल
पुणे : विद्यार्थ्यांना व्यवहारज्ञान प्राप्त व्हावे आणि गणित विषयाच्या मूलभूत क्रियांना चालना मिळावी, या उद्देशाने बाजीराव रस्त्यावरील नू.म.वि. मराठी शाळेच्या प्रांगणात ‘बाल आनंद मेळावा’ आयोजित करण्यात आला. या उपक्रमात विद्यार्थ्यांनी विविध खाद्यपदार्थ, भाजीपाला, शैक्षणिक साहित्य, खेळण्यांची छोटी दुकाने मांडून व्यवहारज्ञानाचा अनुभव घेतला. याशिवाय नेमबाजी, रिंग फेकणे आणि गंमत जत्रेतील विविध खेळांमधून मुलांनी आनंद घेतला.

शिक्षण प्रसारक मंडळीच्या नू.म.वि. मराठी शाळेच्या प्रांगणात मेळाव्याचे आयोजन करण्यात आले. मेळाव्याचे उद्घाटन शि. प्र. मंडळीचे श्रीकृष्ण चितळे, पराग ठाकूर यांच्या हस्ते करण्यात आले. यावेळी मुख्याध्यापिका माया सोयाम, पर्णल ठाकूर हे उपस्थित होते.

पराग ठाकूर म्हणाले, विद्यार्थ्यांच्या मानसिक व शारीरिक जडणघडणीबरोबर स्वसंरक्षणासाठी शाळेत लाठी-काठीचे प्रशिक्षण दिले जात आहे. त्याचप्रमाणे, आधुनिक तंत्रज्ञानाशी त्यांचा संपर्क वाढावा यासाठी कॉम्प्युटर लॅब सुरू करण्यात आली आहे. विद्यार्थ्यांना व्यवहारज्ञान मिळावे, त्यांचा आत्मविश्वास वाढावा याकरिता आनंद मेळाव्याचे आयोजन करण्यात आले, असेही त्यांनी सांगितले.

या आनंद मेळाव्यात विद्यार्थ्यांनी सुमारे ३० स्टॉल लावले होते. विद्यार्थी व पालकांनी मिळून धान्य, कडधान्य, भाजीपाला, शैक्षणिक साहित्य, खेळणी, तसेच घरी बनवलेले केक, चॉकलेट, बिस्किट, मोदक यांसारख्या खाद्यपदार्थांचे प्रदर्शन सादर केले. रिंग फेकणे, बॉलने ग्लास पाडणे, पाळणा, जम्पिंग जॅक अशा खेळांमधून उपस्थितांनी आनंद लुटला.

पुणे-अध्यात्मिक गुरु व लेखक सरश्री यांचा “या… ध्यानामध्ये जगायला शिकूया” हा अध्यात्मिक कार्यक्रम सिंहगड रोड येथील मनन आश्रम येथे मोठ्या उत्साहात पार पडला. या प्रसंगी हजारोंच्या संख्येने नागरिकांनी या कार्यक्रमात सहभाग घेतला होता. यावेळी सरश्री यांनी उपस्थित नागरिकांना मार्गदर्शन केले. आजच्या धावपळीच्या युगात ध्यान करणे किती गरजेचे आहे. याचे त्यांनी महत्त्व पटवून देत त्याच बरोबर ध्यानामध्ये कसे जगायचे याचा त्यांनी उपस्थितांना कानमंत्र दिला.यावेळी बोलताना सरश्री म्हणाले, की “एखादी गोष्ट मिळवण्यासाठी लोक हजारो तंत्र, मंत्र शिकत असतात, हे करा, ते करा, हे कसे मिळवायचे, ते कसे मिळवायचे याचे मंथन करत बसतात.” सोशल मीडियावर जावून अशा प्रकारचे हजारो व्हिडीओ लोक बघतात. मी कोण आहे. याचा विचार न करता स्वतःला सोशल मीडियावरती शोधत असतात. ज्या ठिकाणी तुम्ही नाहीत. त्या ठिकाणी तुम्ही कसे सापडाल. त्यामुळे आभासी दुनियेत न रमता खऱ्या आयुष्यात आपण सर्वांनी जगायला शिकले पाहिजे. तुम्ही नसलेल्या गोष्टी बनवण्याचा विचार केलात तर तुम्हाला पूर्णत्व मिळणार नाही. तुम्ही म्हणाला मी एक स्त्री आहे, तर स्त्री हे पूर्ण ज्ञान नाही, तो स्त्री असण्याचा एक भाग आहे. आपण जे काही झालो त्यात फक्त समाधान आहे, तुम्ही जे जीवन जगत आहात ते आता संपून जाईल. तुम्हाला स्वत:ला स्वतःबद्दल जाणून घ्यायचे आहे ? मग ध्यान करताना तुम्ही काय गृहीत धरत आहात, जे तुम्ही गृहीत धरत आहात त्यात समाधान आहे ? ध्यानात बसलेले असताना, तुम्हाला काय वाटत आहे? याचा विचार व्हायला हवा. ध्यानामध्ये आपण जगायला शिकल्याशिवाय आपण जीवनाचा आनंद घेऊ शकत नाही. 

मुंबई : राज्यात महायुती सरकारच्या मंत्रिमंडळ विस्तारानंतर अखेर 8 दिवसांनी मंत्र्‍यांचे खातेवाटपही पार पडले. त्यामध्ये, अनेक नेत्यांच्या खात्यांची खांदेपालट करण्यात आल्याचं पाहायला मिळालं. तर, काही नेत्यांना पहिल्यांदा मंत्रि‍पदाची संधी मिळाल्यानंतर महत्त्वाच्या खात्यांची जबाबदारी देखील देण्यात आली आहे. मंत्रिमंडळ (Minister) खातेवाटपानंतर आता मंत्र्यांना मंत्रालयातील दालनाचे आणि दालनाच्या पाठोपाठ सरकारी बंगल्यांचेही वाटप करण्यात आले. त्यामध्ये, विधानपरिषद सभापती राम शिंदे यांना ज्ञानेश्वरी हा बंगला देण्यात आला असून विधानसभा अध्यक्ष राहुल नार्वेकर (Rahul narvekar) यांना शिवगिरी बंगल्याची चावी मिळाली आहे. भाजप प्रदेशाध्यक्ष आणि महसूल मंत्री चंद्रशेखर बावनकुळे यांना रामटेक बंगला देण्यात आला आहे.चंद्रकांत पाटील यांना सिंहगड बंगला देण्यात आला आहे.

महायुतीच्या 31 मंत्र्यांना बंगल्याचं वाटप करण्यात आलं असून त्याची यादीही समोर आली आहे. त्यानुसार महसूलमंत्री चंद्रशेखर बावनकुळेंना रामटेक, राधाकृष्ण विखे पाटलांना रॉयलस्टोन, पंकजा मुंडेंना पर्णकुटी, शंभूराज देसाईंना मेघदूत तर गणेश नाईकांना पावनगड बंगला देण्यात आला आहे. धनंजय मुंडेंना सातपुडा, देण्यात आला आहे.

पहिल्या रोटरी डिस्ट्रिक्ट साहित्य संमेलनात होणार गौरव

पुणे : जानेवारीत आयोजित करण्यात आलेल्या पहिल्या रोटरी डिस्ट्रिक्ट मराठी साहित्य संमेलनात सुप्रसिद्ध व्यंगचित्रकार शि. द. फडणीस यांचा रोटरी व्होकेशनल एक्सलन्स ॲवॉर्ड देऊन गौरव केला जाणार आहे, अशी माहिती प्रांतपाल 3131चे शितल शहा यांनी निवेदनाद्वारे कळविली आहे.
शनिवार, दि. 4 आणि रविवार, दि. 5 जानेवारी 2025 या कालावधीत यशवंतराव चव्हाण नाट्यगृहात रोटरी डिस्ट्रिक्ट मराठी साहित्य संमेलनाचे आयोजन करण्यात आले आहे. व्यवसायिक सेवा देताना सामाजिक कार्य करणाऱ्या व्यक्तीस मानाचे रोटरी व्होकेशनल एक्सलन्स ॲवॉर्ड देऊन गौरविले जाते. संमेलनाचे निमित्त साधून फडणीस यांचा गौरव केला जाणार आहे.
वयाच्या शंभरीत पदार्पण केलेले शि. द. फडणीस हे आजही तेवढ्याच उर्जेने आणि उमेदिने कार्यरत आहेत. आजही त्यांची व्यंगचित्रे विविध माध्यमांधून प्रसिद्ध होत असून ते आपल्या व्यंगचित्रांद्वारे लोकांना हसवत आहेत. व्यंगचित्रे समाजातील विसंगतीवर टिकात्मक पद्धतीने भाष्य करणारी असतात हा समज फडणीस यांच्या व्यंगचित्रांमधून खोटा ठरला आहे. त्यांच्या शब्दविरहित चित्रांनी खमंग, खुसखुशीत विनोद निर्मिती केली आहे. अनेक लेखकांची पुस्तके, नियतकालिके आणि दिवाळी अंकांच्या मख्यपृष्ठांद्वारे त्यांची व्यंगचित्रे समाजमनास भिडली आहेत. शि. द. फडणीस यांच्या प्रयत्नाने कायदाच्या माध्यमातून चित्रकारांना कॉपीराईटचे हक्क मिळवून दिले आहेत. शि. द. फडणीस यांची व्यंगचित्रे देश-परदेशातील आर्ट गॅलरीमध्ये झळकली आहेत.

पुणे : रंगत-संगत प्रतिष्ठानतर्फे मराठीतील आद्य शायर भाऊसाहेब पाटणकर यांच्या जयंतीनिमित्त प्रसिद्ध कवी, गझलकार शाम खामकर (खडकवाडी, ता. पारनेर, जि. अहिल्यानगर) यांचा भाऊसाहेब पाटणकर स्मृती पुरस्काराने गौरव केला जाणार आहे.
कार्यक्रम रविवार, दि. 29 डिसेंबर 2024 रोजी सकाळी 11 वाजता पत्रकार भवन, दुसरा मजला, नेवी पेठ येथे होणार असून पुरस्काराचे वितरण अखिल भारतीय मराठी साहित्य संमेलनाचे माजी अध्यक्ष, ज्येष्ठ कथाकार भारत सासणे यांच्या हस्ते होणार आहे. सन्मानपत्र, शाल, श्रीफल असे पुरस्काराचे स्वरूप आहे, अशी माहिती रंगत-संगत प्रतिष्ठानचे अध्यक्ष ॲड. प्रमोद आडकर यांनी निवेदनाद्वारे कळविली आहे. कार्यक्रमास विशेष अतिथी म्हणून सिने-नाट्य अभिनेत्री, कवयित्री भाग्यश्री देसाई यांची उपस्थिती असणार आहे.
कार्यक्रमाच्या उत्तरार्धात गझल मुशायरा आयोजित करण्यात आला असून यात प्रमोद खराडे, नचिकेत जोशी, डॉ. मंदार खरे, सुनिती लिमये, नूतन शेटे, कविता क्षीरसागर, चंचल काळे, डॉ. मृणालिनी गायकवाड, स्वाती यादव, उर्मिला वाणी, डॉ. मृदुला कुलकर्णी-खैरनार, प्रभा सोनवणे, स्वप्नील पोरे यांचा सहभाग असणार आहे. कार्यक्रम सर्वांसाठी खुला आहे.

पुणे दि. २३: सनाथ वेल्फेअर फाउंडेशन वर्धा यांच्यावतीने दोन दिवसीय मार्गदर्शन शिबिर व अनाथांच्या मेळाव्याचे आयोजन करण्यात आले होते. या शिबिरात शिवसेना नेत्या तथा विधानपरिषद उपसभापती डॉ. नीलम ताई गोऱ्हे यांनी दृकश्राव्य माध्यमाद्वारे मार्गदर्शन केले.

याप्रसंगी बोलताना नीलमताई म्हणाल्या की, “भविष्यकाळात स्त्रियांच्या चळवळीमध्ये राजकारणामध्ये अनाथ मुलींचा नक्कीच सहभाग मोठ्या प्रमाणात आपल्याला दिसून येईल. त्याचप्रमाणे ४ थे महिला धोरणामुळे मुलींच्या आर्थिक प्रगतीकडे तसेच महिला सक्षमीकरणाच्या विषयात आपल्या सर्वांना निश्चितच प्रगती झाल्याची पाहायला मिळेल.

मुलींच्या अनाथ गृह संस्थांची sop करणे गरजेचे आहे. अनाथ मुला- मुलींच्या विवाह जमावण्यासंबंधी राज्यातील विविध संस्थांनी एकत्रितपणे काम करणे गरजेचे आहे. अनाथ मुलींना बाळंतपणासाठी माहेरवाशींचे प्रेम मिळावे म्हणून अनेक मोठ्या संस्थांशी चर्चा करून एक कक्ष उभारणी बाबतीत सकारात्मक पाऊल उचलण्याविषयी नक्कीच प्रयत्न केला जाईल”, असे मत उपसभापती डॉ. नीलम गोऱ्हे यांनी व्यक्त केले.

“आफ्टर केअर वस्तीगृहाच्या निर्मितीकरिता शासनाकडे पाठपुरावा करणार”, असे मतही यावेळी उपसभापती नीलम ताई गोऱ्हे यांनी मांडले.