पुणे – प्राध्यापकांची भरती विद्यापीठ स्तरावर करण्याचा विचार महायुती सरकार करत असून, हे धोरण काँग्रेसला मान्य नाही. प्राध्यापकांची भरती महाराष्ट्र लोकसेवा आयोग (एमपीएससी) मार्फतच व्हावी, अशी मागणी महाराष्ट्र प्रदेश काँग्रेसचे उपाध्यक्ष, माजी आमदार मोहन जोशी यांनी मा.राज्यपालांकडे केली आहे. तसेच मा.मुख्य मंत्री देवेंद्रजी फडणवीस, आणि महाराष्ट्र लोकसेवा आयोगाचे अध्यक्ष यांच्याकडेही पत्राद्वारे केली आहे.

प्राध्यापकांची भरती एमपीएससी मार्फत करण्याची प्रक्रिया पारदर्शी असून, या प्रक्रियेत गुणवत्ता, जातीनिहाय आरक्षण आणि याचबरोबर भ्रष्टाचारमुक्त निवड केली जाते. याकरिता महाराष्ट्रातील प्राध्यापकांची भरती एमपीएससी मार्फत करणे गरजेचे आहे, असे मोहन जोशी यांनी म्हटले आहे.

महाराष्ट्रातील विद्यापीठे राज्य सरकारच्या अखत्यारीत येतात. त्यांचे प्रमुख राज्यपाल असतात. विद्यापीठात रिक्त जागा तयार झाल्यानंतर त्या राज्य शासनाच्या सामान्य प्रशासन विभागाला कळवून मुख्य मंत्र्यांच्या संमतीने आयोगाला कळविल्या जातात. त्यानंतर आयोगामार्फत भरतीची प्रक्रिया राबविली जाते. ही पद्धत पारदर्शी आहे. तसेच कायद्यानुसारही ही प्रक्रिया विशिष्ट कालावधीत करणे आयोगाला बंधनकारक आहे, असे निवेदनात म्हटले आहे. विद्यापीठ स्तरावर भरती केल्यास ही प्रक्रिया पारदर्शी न रहाता, त्यात भ्रष्टाचाराला वाव राहील. गुणवत्तेला महत्त्व रहाणार नाही, अशी शक्यता आहे, याकरिता विद्यापीठ स्तरावर भरती करण्याला काँग्रेस पक्षाचा विरोध राहील, असे मोहन जोशी यांनी पत्रात म्हटले आहे.

पुणे : सामाजिक क्षेत्रात योगदान देणाऱ्या रोटरी क्लबतर्फे शनिवारी (दि. 4) आणि रविवारी (दि. 5) पुण्यात पहिले रोटरी मराठी साहित्य संमेलन होत आहे. प्रसिद्ध कादंबरीकार विश्वास पाटील यांच्या अध्यक्षतेखाली होत असलेल्या संमेलनात साहित्यिक चर्चा घडणार असून विविध विषयांवर परिसंवादात मान्यवरांची मते ऐकावयास मिळणार आहेत. गप्पा, कविसंमेलन, प्रहसने आणि संगीत नाटकाचेही आयोजन करण्यात आले आहे.
कोथरूडमधील यशवंतराव चव्हाण नाट्यगृहात अखिल भारतीय मराठी साहित्य संमेलनाच्या धर्तीवर पहिले रोटरी साहित्य संमेलन होणार आहे. दि. 4 रोजी सकाळी 9:15 वाजता ग्रंथदिंडीने संमेलनाची सुरुवात होणार असून उद्घाटन समारंभ सकाळी 10 वाजता आयोजित करण्यात आला आहे. संमेलनाचे उद्घाटन प्रसिद्ध क्रिकेटपटू पद्मभूषण चंदू बोर्डे यांच्या हस्ते होणार आहे. खासदार प्रा. डॉ. मेधा कुलकर्णी, उच्च व तंत्रशिक्षण मंत्री चंद्रकांत पाटील, महापालिका आयुक्त राजेंद्र भोसले, महाराष्ट्र साहित्य परिषदेचे कार्याध्यक्ष प्रा. मिलिंद जोशी, नॅशनल बुक ट्रस्टचे विश्वस्त राजेश पांडे, नगरसेवक जयंत भावे, उपप्रांतपाल मोहन पालेशा, डि. लर्निंग जिल्हा प्रशिक्षक पंकज शहा, संतोष मराठे, नितीन ढमाले यांची प्रमुख उपस्थिती असणार आहे. सकाळी 11:30 वाजता संमेलनाध्यक्ष विश्वास पाटील यांच्या मुलाखतीचा कार्यक्रम आयोजित करण्यात आला आहे. दुपारी 2:45 वाजता ‌‘यशस्वी लेखनाची सूत्रे‌’ या विषयावर परिसंवाद, दुपारी 4:15 वाजता ‌‘मन:शांती‌’ हे प्रहसन, सायंकाळी 4:30 वाजता रोटरियन्सचा सहभाग असलेले निमंत्रितांचे कविसंमेलन होणार आहे. तर रात्री 8:30 वाजता ‌‘संगीत कट्यार काळजात घुसली‌’ या नाटकाचा प्रयोग आयोजित करण्यात आला आहे.
संमेलनाच्या दुसऱ्या दिवसाची सुरुवात शिववंदना नृत्याने होणार असून सकाळी 10 वाजता प्रसिद्ध व्यंगचित्रकार शि. द. फडणीस यांचा रोटरी व्होकेशनल एक्सलन्स ॲवॉर्डने सन्मान करण्यात येणार आहे. सकाळी 11 वाजता अशोक नायगावकर यांच्या मुलाखतीचा कार्यक्रम होणार असून दुपारी 2 वाजता ‌‘ऑफिस ऑफिस‌’ हे प्रहसन सादर करण्यात येणार आहे. त्यानंतर दुपारी 2:15 वाजता ए. आय.चा साहित्यावर परिणाम होईल का? या विषयावर परिसंवाद आणि दुपारी 3:45 वाजता ‌‘आगलावे वि. पेटवे‌’ हे प्रहसन सादर होणार आहे. ग. दि. माडगूळकर यांच्या गीतांवर आधारित ‌‘अमृतसंचय‌’ हा सांगीतिक कार्यक्रम दुपारी 4 वाजता आयोजित करण्यात आला आहे. सायंकाळी 5:30 वाजता प्रसिद्ध राजकीय विश्लेषक भाऊ तोरसेकर यांच्या समवेत गप्पांचा कार्यक्रम होणार आहे. या प्रसंगी सहकार आणि नागरी विमान वाहतूक केंद्रीय राज्यमंत्री मुरलीधर मोहोळ यांची उपस्थिती असणार आहे. त्यानंतर संमेलनाध्यक्ष विश्वास पाटील आणि प्रांतपाल शितल शहा, सूर्यकांत वझे यांच्या प्रमुख उपस्थितीत समारोप समारंभ आयोजित करण्यात आला आहे.

पुणे, दि. २: पुणे जिल्ह्याचे जिल्हाधिकारी म्हणून जितेंद्र डूडी यांनी आज पदभार स्वीकारला. यावेळी मावळते जिल्हाधिकारी डॉ. सुहास दिवसे यांनी त्यांचे स्वागत करून त्यांच्याकडे पदभार सोपवला.

जिल्हाधिकारी श्री. डुडी यांनी यापूर्वी सन २०१९ मध्ये सहायक जिल्हाधिकारी तथा प्रकल्प अधिकारी एकात्मिक आदिवासी विकास प्रकल्प कार्यालय तळोदा, नंदूरबार, सन २०१९ ते २०२० या कालावधीत सहायक जिल्हाधिकारी मंचर तथा प्रकल्प अधिकारी एकात्मिक आदिवासी विकास प्रकल्प कार्यालय घोडेगाव, पुणे तर सांगली जिल्हा परिषदचे मुख्य कार्यकारी अधिकारी आणि सातारा जिल्हाधिकारी या पदावर काम केले आहे.

श्री. डूडी यांच्या सेवा कालावधीत पोषण अभियानातंर्गत ५ व्या राष्ट्रीय पोषण महिन्यात अधिकाधिक उपक्रम राबवून उल्लेखनीय कामगिरी केल्याबद्दल राज्यात तृतीय पुरस्काराने त्यांना सन्मानित करण्यात आले. तसेच राष्ट्रीय मतदान दिन २०२४ च्यावेळी पुणे विभागात उत्कृष्ट जिल्हा निवडणूक अधिकारी म्हणून प्रथम पुरस्कारानेही त्यांना सन्मानित करण्यात आले आहे.

शाहीर हिंगे लोककला प्रबोधिनी आणि सृजनसभा पुणे यांच्या वतीने होनराज मावळे यांनी संगीतबद्ध केलेल्या रचनांची विशेष मैफिल
पुणे: ख्याल, टप्पा, तराणा, स्वरमालिका याचबरोबर सेवा हैं यज्ञ कुंड समिधा सम हम जले. शिवछत्रपती जय हो. आनंदाचा कंद माझा मधुमिलिंद. जय देव जय देव जय जय शिवराया ही सावरकर लिखित आरती अशा एकाहून एक सरस रचना सादर करीत होनराज मावळे यांनी आपल्या संगीतरचनाकार म्हणून सुरू असलेल्या प्रवासातील स्वरसाधना पुणेकरांसमोर उलगडली. मावळे यांच्या सुरेल संगीत रचनांची पर्वणी श्रोत्यांना या निमित्ताने ऐकायला मिळाली.

शाहीर हिंगे लोककला प्रबोधिनी आणि सृजनसभा पुणे यांच्या वतीने होनराज मावळे यांनी संगीतबद्ध केलेल्या रचनांची विशेष मैफिलीचे आयोजन कर्वे रस्त्यावरील स्वातंत्र्यवीर सावरकर स्मारक सभागृह येथे करण्यात आले होते. यावेळी शाहीर हिंगे लोककला प्रबोधिनीचे अध्यक्ष आचार्य शाहिर हेमंतराजे मावळे, प्रा. संगीता मावळे यावेळी उपस्थित होते. होनराज मावळे, पार्थ कुलकर्णी, अनुजा जोशी, गार्गी काळे (गायन), सई जोशी (संवादिनी), आदेश वाटाडे (कीबोर्ड) केदार टिकेकर, ओंकार तळवणेकर (तबला) अक्षदा इनामदार, सक्षम जाधव (तालवाद्ये) प्रसाद भारदे यांनी निवेदन केले.

कार्यक्रमाच्या सुरुवातीला होनराज मावळे यांनी राग श्री मध्ये ‘जय जय एकदंत लंबोदर’ हा ख्याल सादर केला. त्यानंतर राग भीमपलास मध्ये ‘गुनिजन चर्चा करे’ ही रचना सादर केली. कार्यक्रमाच्या दुसऱ्या भागात उपशास्त्रीय रचना सादर झाल्या ‘जादूभरी तोरी अखिया रसिली’ हे गार्गी काळे हिने तर  ‘गुरु बिन कौन बताये बाट’ या होनराज मावळे यांनी सादर केलेल्या गीताला श्रोत्यांनी विशेष दाद दिली.

कार्यक्रमाच्या उत्तरार्धात सादर झालेल्या ‘हे हिंदू नृसिंहा प्रभो  शिवाजी राजा’, ‘वेदमंत्राहून आम्हा वंद्य वंदे मातरम’ या गीतांच्या संगीत रचनांनी रसिकांची विशेष दाद मिळवली. ‘भारतमाता स्तुतीपर तराना’ हा या कार्यक्रमातील विशेष आकर्षक रचना होती.
होनराज मावळे सावित्रीबाई फुले पुणे विद्यापीठ ललितकला केंद्र येथून शास्त्रीय संगीतातून द्विपदवीधर झाल्या निमित्त संगीत पर्वारंभ या विशेष मैफीलीचे आयोजन प्रा.संगीता मावळे व आचार्य शाहीर हेमंतराजे  मावळे यांनी आयोजन केले.या कार्यक्रमात होनराज यांच्या कला मार्गदर्शकांप्रती  कृतज्ञता सोहळा आयोजित करण्यात आला होता. या वेळी डॉ. केशवचैतन्य कुंटे, डॉ. शरद खरे, संजय करंदीकर, यशोधन महाराज साखरे, डॉ. मिलिंद दुगड आदि मान्यवर उपस्थित होते.

पुणे-येत्या महानगरपालिका निवडणुकीच्या अनुषंगाने पुणे शहरात शिवसेनेची पक्ष बांधणी मोठ्या प्रमाणावर मजबूत झाली असून मागील काळात पुणे महानगरपालिका निवडणुकीत शिवसेनेच्या धनुष्यबाणावर लढवलेल्या सर्व जागा शिवसेनाच लढवेल अशी भूमिका शिवसेना पुणे शहरप्रमुख नाना भानगिरे यांनी मांडली.

नाना भानगिरे पुढे म्हणाले की, पुणे शहरात प्रभाग निहाय शिवसैनिकांची बैठक आयोजित करून अनुकूल असणाऱ्या प्रभागात शिवसेनेच्या वतीने मतदारांचा सर्व्हे सुद्धा केला जात असून इतर पक्षातील कोणतेही नगरसेवक महायुतीतल्या घटक पक्षात सामील झाले तरीही राज्य पातळीवर महायुतीचा ठरलेला फॉर्म्युलाच संपूर्ण राज्यात राबविल्या जाणार आहे. येत्या काळात शिवसेनेत काही नगरसेवक व विविध पक्षांचे पदाधिकारी मोठ्या प्रमाणावर प्रवेश करणार आहेत, ते पुढे म्हणाले, संपूर्ण राज्यात महायुती म्हणून तिन्ही पक्ष कार्यरत असून महाराष्ट्र राज्याचे उपमुख्यमंत्री एकनाथ शिंदे साहेब व शिवसेनेचे वरिष्ठ नेते जे ठरवतील त्याचप्रमाणे पुणे शहरात येत्या महानगरपालिकेच्या निवडणुकीला शिवसेना सामोरे जाणार आहे हेही त्यांनी स्पष्ट केले. शिवसेना पुणे शहरात 40 ते 50 जागांवर पूर्वतयारी आढावा, संघटन बांधणी आणि निवडणुकीच्या अनुषंगाने तयारी करीत आहे, शिवसेनेच्या प्रत्येक गटप्रमुखाला सक्रिय करत सोशल मीडियाच्या माध्यमातून लाखो पुणेकरांपर्यंत पोहोचण्यासाठीही शिवसैनिक मोठ्या प्रमाणावर प्रयत्न करत असून निश्चितच पुणे शहरात शिवसेनेच्या माध्यमातून पुणेकरांचे प्रश्न सोडविण्यासाठी कायम तत्पर असू असेही त्यांनी सांगितले. यावेळी पत्रकार परिषदेला शिवसेनेचे सहसंपर्कप्रमुख अजय भोसले, महिला आघाडी सहसंपर्कप्रमुख सुदर्शना त्रिगुनाईत, पुणे जिल्हा महिला आघाडी संपर्कप्रमुख गीतांजली ढोणे, युवा सेना शहरप्रमुख निलेश गिरमे, उपशहर प्रमुख सुधीर कुरूमकर, संजय डोंगरे, सुनील जाधव, शहर संघटक श्रीकांत पुजारी, नवनाथ निवंगुणे, युवासेना कार्यकारणी सदस्य श्रुतीताई नाझिरकर, सुरेखा पाटील, नितीन लगस, गणेश काची, निलेश जगताप, व शिवसेनेचे सर्व प्रमुख पदाधिकारी मोठ्या संख्येने उपस्थित होते.

पुणे : दिव्यांग बांधवाना मदतीचा हात देऊन त्यांना स्वावलंबी बनविण्यासाठी अखिल म्हसोबा उत्सव मंडई ट्रस्टच्या वतीने त्यांना सायकलींचे वाटप करण्यात आले. बुरुड आळी येथे दिव्यांगांसाठी विशेष सायकल वाटप कार्यक्रम आयोजित करण्यात आला. गरजू दिव्यांग बांधवांना प्रोत्साहन देण्यासाठी कार्यक्रमाचे आयोजन करण्यात आले होते.

यावेळी सावित्रीबाई फुले पुणे विद्यापीठाचे प्र-कुलगुरु डॉ. पराग काळकर, ज्येष्ठ उद्योजक रमणशेठ लुंकड, श्रीमंत दगडूशेठ हलवाई सार्वजनिक गणपती ट्रस्टचे अध्यक्ष सुनील रासने, लक्ष्मीबाई दगडूशेठ हलवाई दत्त मंदिर ट्रस्टचे अध्यक्ष राजेंद्र बलकवडे, उद्योजक विजय कुमार मर्लेचा, ट्रस्टचे विश्वस्त अध्यक्ष राहुल सूर्यवंशी, उपाध्यक्ष निवृत्ती जाधव आदी मान्यवर उपस्थित होते. 
पुणे आणि परिसरातील पाच गरजवंत दिव्यांग बांधवांना या सायकली देण्यात येणार आहेत. तसेच त्यांना आत्मनिर्भर होण्याकरिता ही भेट उपयुक्त ठरणार आहे.  ज्येष्ठ उद्योजक रमणशेठ लुंकड यांच्या वाढदिवसानिमित्त या उपक्रमाचे आयोजन करण्यात आले होते. 

ज्येष्ठ उद्योजक रमण लुंकड म्हणाले, दिव्यांग बांधवांना स्वावलंबी बनवण्यासाठी आणि त्यांच्या जीवनात सकारात्मक बदल घडवण्यासाठी अशा प्रकारचे उपक्रम खूप महत्त्वाचे आहेत. या सायकलींमुळे त्यांना दैनंदिन जीवनातील अडचणींवर मात करता येईल. समाजातील प्रत्येक घटकाने अशा उपक्रमांसाठी हातभार लावला पाहिजे.

पुणे : हौसेखातर कमरेला पिस्टल लावून फिरणार्‍या अल्पवयीन मुलाला सहकारनगर पोलिसांनी के के मार्केट च्या पार्किंगच्या जागेत पकडले. त्याच्याकडून गावठी पिस्टल जप्त केले आहे.

सहकारनगर पोलीस ठाण्यातीलपोलीस अधिकारी व पोलीस अंमलदार हे नव वर्षाच्या आगमनानिमित्त बंदोबस्तासाठी पेट्रोलिंग करीत होते. ते तीन हत्ती चौकात आले असताना पोलीस अंमलदार अमोल पवार यांना बातमीदारामार्फत बातमी मिळाली की, एक जण के के मार्केट च्या पार्किंगच्या जागेतील टीव्हीएस शोरुमचे पाठीमागील गल्लीत कोणाची तरी वाट पहात असून त्याच्या कमरेला पिस्टल सारखे हत्यार लावलेले दिसत आहे.वरिष्ठ पोलीस निरीक्षक छगन कापसे यांनी तातडीने कारवाई करण्यास सांगितले. त्यानुसार सहायक पोलीस निरीक्षक सागर पाटील व अंमलदार यांनी मिळालेल्या माहितीच्या ठिकाणी बालाजीनगरला जाऊन या अल्पवयीन मुलाला ताब्यात घेतले. त्याच्या पॅन्टमध्ये खोचलेले ६० हजार रुपयांचे गावठी बनावटीचे पिस्टल मॅगझीनसह जप्त केले.

ही कामगिरी अपर पोलीस आयुक्त प्रविणकुमार पाटील, पोलीस उपायुक्त स्मार्तना पाटील, सहायक पोलीस आयुक्त राहुल आवारे, सहकारनगर पोलीस ठाण्याचे वरिष्ठ पोलीस निरीक्षक छगन कापसे यांच्या मार्गदर्शनाखाली सहायक पोलीस निरीक्षक सागर पाटील, बापू खुटवड, पोलीस अंमलदार अमोल पवार, किरण कांबळे, बजरंग पवार, चंद्रकांत जाधव, महेश मंडलिक, अमित पदमाळे, सागर सुतकर, योगेश ढोले, महेश भगत,खंडु शिंदे यांनी केली आहे.

पुणे: महात्मा फुलें, ज्ञानज्योती सावित्रीबाई व फातिमाबी शेख यांच्या वेशभूषेतील कवी-कवयित्रीनी सादर केलेल्या काव्यरचना, फुले दाम्पत्याचा गौरवपूर्ण उल्लेख, विचारांचा जागर, सावित्री-ज्योति यांच्यासह आद्यक्रांतिगुरू लहुजी वस्ताद साळवे, भारतरत्न डॉ. बाबासाहेब आंबेडकर यांचा जयघोष करीत पहिल्या आंतरराष्ट्रीय फुले फेस्टिव्हलचे उद्घाटन गुरुवारी झाले.

अंगावर हिरवे इरकल, कपाळी आडवा गंध, हाती पुस्तक, ओठी सावित्री-ज्योतिचा जागर अशा स्वरूपात शेकडो महिला सावित्रीबाईंच्या पेहरावात अवतरल्या! डोक्यावर फुले फेटा, अंगात कोट घालून आयोजक महात्मा फुलेंच्या पेहरावात आल्याने सभागृहात जणू सावित्रीबाई, ज्योतिराव आल्याची भावना उपस्थितांच्या मनात होती.

भिडेवाडाकार कवी विजय वडवेराव यांच्या संकल्पनेतून देशातील मुलींची पहिली शाळा भिडेवाडा आंतरराष्ट्रीय काव्यजागर अभियानांतर्गत पहिला आंतरराष्ट्रीय फुले फेस्टिव्हल २ ते ५ जानेवारी या कालावधीत होत आहे. नवी पेठेतील एस. एम. जोशी फाउंडेशनच्या सभागृहात महाराष्ट्रासह देशविदेशातून ६०० कवी, साहित्यिक, विचारवंत, कलाकार यामध्ये सहभागी झाले आहेत.

क्रांतीसूर्य महात्मा जोतीराव फुले आणि ज्ञानज्योती सावित्रीबाई फुले यांनी पुण्यातील बुधवार पेठेतील भिडेवाड्यात सुरु केलेल्या देशातील पहिल्या मुलींच्या शाळेचा इतिहास जतन व्हावा, फुले दाम्पत्याच्या कार्यकर्तृत्वाचा प्रचार व प्रसार व्हावा आणि हा इतिहास पुढच्या पिढ्यांपर्यंत पोहोचावा, या उद्देशाने या फेस्टिवलचे आयोजन केले आहे. देश-विदेशातील सहाशे कवींचा काव्य महोत्सव, भिडेवाडा या विषयावर मराठी गझल मुशायरा, एकपात्री प्रयोग, शालेय विद्यार्थ्यांच्या नाट्यछटा, एकांकिका, सांगितिक पोवाडे, महिला सक्षमीकरणासाठी लाठीकाठी, दांडपट्टा प्रात्यक्षिक असे विविध कार्यक्रम फेस्टिव्हलमध्ये होणार आहेत. लंडन, ऑस्ट्रेलिया, अबुधाबी आदी देशांतून, तसेच केरळ, मध्यप्रदेश, राजस्थान, गुजरात, दिल्ली, तेलंगणा, उत्तरप्रदेश आदी राज्यातून कवी-कवयित्री सहभागी झाले आहेत.

महात्मा फुले व सावित्रीबाई फुले यांचा त्याग, समर्पण आणि देशाच्या जडणघडणीतील योगदान अमूल्य आहे. फुले दाम्पत्याला भारतरत्न मिळायला हवा. ही एक चळवळ असून, फुले विचार पुढच्या पिढीमध्ये रुजवण्यासाठी प्रयत्न करत आहोत. जिल्हास्तरावर, राज्यस्तरावर फुले दाम्पत्याचा कार्यजागर करणारे कार्यक्रम वर्षभर घेतले जातात. ज्यांनी कर्मठ व्यवस्थेच्या विरोधात जाऊन स्त्री शिक्षणाचा पाया रोवला, लोकांचा शिव्याशाप, चिखलफेक, शेणाचे गोळे अंगावर झेलले, त्याग व समर्पण भावनेने कार्य केले, त्या फुले दाम्पत्याला भारतरत्न पुरस्कार मिळण्यासाठी अभियान राबवणार आहोत, असे वडवेराव म्हणाले.

पुणे- कालच्या ३१ डिसेंबर २०२४ या अंतिम दिवशी १ जानेवारी पर्यंत पुण्याच्या वाहतूक शाखेच्या पोलिसांनी एकूण २६३३ वाहन चालकांच्या वर कारवाई केली आहे. यात ट्रिपल सीट च्या १७६ तर सिग्नला मोडणाऱ्यां ११८ आणि नो एन्ट्री त एन्ट्री करणाऱ्या ६३२ वाहनचालकांचा समावेश आहे .ड्रंक अँड ड्राईव्ह प्रकरणी ८५ जणांवर कारवाई करण्यात आली आहे.

या सर्वांवर १९ लाख ८१ हजार ४५० रुपयांची दंडात्मक कारवाई करण्यात आली .