पिंपरी, पुणे (दि. ०६ जानेवारी २०२५) पिंपरी चिंचवड एज्युकेशन ट्रस्ट (पीसीईटी) संचालित एस. बी. पाटील कॉलेज ऑफ आर्किटेक्चर ॲण्ड डिझाइनने तीन आणि चार जानेवारीला आयोजित केलेल्या आंतरराष्ट्रीय शाश्वतता उद्दीष्टे चिंतन परिषदेमध्ये रिमोट केंद्र म्हणून महत्त्वाची भूमिका बजावली. एकुण १५ रिमोट केंद्रांपैकी पुण्यातून एकमेव केंद्र एस. बी. पाटील आर्किटेक्चर कॉलेज येथे होते.
कार्यक्रमाचे उद्घाटन पिंपरी चिंचवड महानगरपालिकेचे अतिरिक्त आयुक्त चंद्रकांत इंदलकर यांच्या हस्ते करण्यात आले. इंदलकर यांनी १७ शाश्वतता उद्दीष्टे आणि भारतातील त्यांची अंमलबजावणी याविषयी माहिती दिली.
प्रभारी प्राचार्य आर्किटेक्ट शिल्पा पाटील यानी संशोधन टीम आणि विद्यार्थी परिषेदेच्या नेतृत्वाखाली महाविद्यालयाने स्वच्छ उर्जा, शाश्वतता शहरे आणि हवामान कृती यासारख्या महत्वाच्या विषयावर केलेले कार्य याबाबत माहिती दिली.
आर्किटेक्चर आणि अभियांत्रिकी विद्यार्थी यांच्या उपस्थितीत या परीषेदेने शाश्वततेच्या दिशेने प्रयत्नशिल पावले उचलण्यावर भर दिला आणि स्थानिक समुदायात जनजागृती केली.
पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्षा पद्मा भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयुचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांच्या मार्गदर्शनाखाली कार्यक्रमाचे आयोजन करण्यात आले होते. सुत्रसंचालन प्रा. अनुजा सिंग यांनी केले.

पुणे-कारागृहात बंदिस्त असलेल्या सराईत गुन्हेगार आरोपीस जामीन देण्यासाठी लष्कर न्यायालायात बनावट कागदपत्रे सादर करण्यात आल्याचा धक्कादायक प्रकार वानवडी पोलिसांनी उघडकीस आणला. याप्रकरणी सात आरोपींविरुद्ध गुन्हा दाखल करण्यात आला असून पोलिसांनी बनावट आधारकार्ड, शिधापत्रिका ही बोगस कागदपत्रे जप्त केली आहे.

याप्रकरणी संतोष शंकरराव तेलंग (वय ३२, रा. शेवाळवाडी , हडपसर,पुणे) याच्यासह सात आरोपीांविरुद्ध गुन्हा दाखल करण्यात आला आहे. याबाबत पोलीस कर्मचारी सोमनाथ कांबळे यांनी वानवडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, लष्कर न्यायालयाचे स्थलांतर वानवडीतील महात्मा फुले सांस्कृतिक भवन येथे करण्यात आले आहे. सराईत गुन्हेगार बच्चनसिंग जोगिंदरसिंग भोड याला कोंढवा पोलिसांनी गंभीर चोरीच्या गुन्ह्यात अटक केली होती. भोंडविरुद्ध चार गु्न्हे दाखल झाले होते. या गुन्ह्यात भोंडला जामीन मिळवून देण्यासाठी लष्कर न्यायालयातील एका वकिलामार्फत तेलंग आणि साथीदारांनी बनावट कागदपत्रे सादर केली. कागदपत्रांची पडताळणी करण्यात आली. त्यावेळी बनावट आधारकार्ड, शिक्षापत्रिका सापडल्या. चौकशीत बनावट कागदपत्रे सादर करुन जामीन मिळवून देण्याचा प्रकार उघडकीस आला.तेलंग याला ताब्यात घेण्यात आले. त्याच्या दुचाकीच्या डिक्कीत बनावट कागदपत्रे देखील मिळून आले आहे . वरिष्ठ पोलीस निरीक्षक संजय पतंगे यांच्या मार्गदर्शनाखाली उपनिरीक्षक एस टोणे पुढील तपास करत आहेत.

सामाजिक एकोप्याच्या भावनेतून आयोजन; सहाव्या हंगामात १६ पुरुष, आठ महिला संघ खेळणार
पिंपरी (पुणे) : सिंधी प्रीमिअर लीग क्रिकेट स्पर्धेचे सहावे पर्व यंदा १५ फेब्रुवारी ते ९ मार्च २०२५ या कालावधीत पिंपरी येथे होणार आहे. या स्पर्धेत यंदा १६ पुरुष, तर आठ महिला संघ सहभागी होणार आहेत. पिंपरी येथील एमसीसी, मृणाल क्रिकेट ग्राउंडवर होणाऱ्या या स्पर्धेचे थेट प्रक्षेपण सिंधी प्रीमिअर लीग फेसबुक पेजवरून पाहता येणार आहे, अशी माहिती संयोजन समितीचे कन्वल खियानी, हितेश दादलानी यांनी पत्रकार परिषदेत दिली.
थेरगाव येथील हॉटेल नूरीयामध्ये झालेल्या पत्रकार परिषदेवेळी उद्योजक डब्बू आसवानी, श्रीचंद आसवानी, सागर तेजवानी यांच्यासह संयोजन समितीतील कमल जेठानी, रोनक पंजाबी, अवि इसरानी, अंकुश मुलचंदानी, नरेश नशा, करण आसवानी, अवि तेजवानी, सोमेश गिडवाणी, कुणाल गुडेला, रितेश आठवानी, मनीष गेरेजा, महिला प्रतिनिधी अवनी तेजवानी, खुशबू पंजाबी, हिना गोगिया, शिखा सेवानी, शीतल पहलानी, रुपाली पंजाबी संघमालक व प्रायोजक उपस्थित होते.
हितेश दादलानी म्हणाले, “देशभरात विखुरलेला सिंधी समाज एकत्रित यावा, त्यांच्यात तंदुरुस्तीविषयी जागरूकता व्हावी, तसेच मोबाईल-इंटरनेटच्या जाळ्यात न अडकता मैदानावर खेळण्याला प्राधान्य द्यावे आणि खेळातून उभारलेल्या निधीचा समाजासाठी उपयोग व्हावा, या उद्देशाने ही स्पर्धा आयोजित केली जाते. सिंधी समाजातील उद्योजक तरुणांनी एकत्र येऊन या क्रिकेट लीगचे आयोजन केले आहे. ‘सिंधी प्रीमियर लीग सीजन ६’चे उद्घाटन १५ फेब्रुवारी २०२५ रोजी सायंकाळी ६ वाजता होणार आहे. यावेळी माजी क्रिकेटपटू, सिंधी समाजातील प्रतिष्ठित व्यक्ती, तसेच खेळाडू, संघ मालक व कुटुंबीयांची उपस्थिती असणार आहे. स्पर्धेतून मिळालेला निधी सामाजोपयोगी आणि विधायक कामासाठी देण्यात येतो”
कन्वल खियानी म्हणाले, “गेल्या पाचही हंगामात या स्पर्धेला मोठा प्रतिसाद मिळाला आहे. यंदा स्पर्धेला अधिक व्यापक स्वरूप आले असून, खेळाडूंची संख्याही वाढली आहे. पुण्यासह परभणी, जळगाव, नांदेड, बंगळुरू, जयपूर येथूनही खेळाडू सहभागी होत आहेत. आयपीएलच्या धर्तीवर या स्पर्धेची रचना करण्यात आली आहे. महिलांनाही खेळासाठी प्रोत्साहन दिले जात असून, यंदा महिलांचे आठ संघ स्पर्धा खेळणार आहेत. पुरुषांचे १६ संघमालक व महिलांचे आठ संघमालक आपल्या २४ संघांसह स्पर्धेत उतरणार आहेत. पुरुष संघांची नवे सिंधी संस्कृतीवर आधारित, तर महिला संघांची नवे नद्यांवर आधारित आहेत.”
या स्पर्धेतील पुरुष गटामध्ये मस्त कलंदर (गीता बिल्डर्स, मयूर तिलवानी), सुलतान ऑफ सिंध (डब्बू आसवानी फाउंडेशन, हिरानंद आसवानी), मोहेंजोदरो वॉरियर्स (मिलेनियम डेव्हलपर्स, हरीश अभिचंदानी), सिंधफूल रेंजर्स (जीएस असोसिएट्स, जितू पहलानी), एसएसडी फाल्कन (विक्रम रोहेडा फोटोग्राफी, विक्रम रोहेडा), इंडस डायनामॉस (साईबाबा सेल्स, रोहन गेहानी), दादा वासवानीज ब्रिगेड (आसवानी प्रमोटर्स अँड बिल्डर्स, श्रीचंद आसवानी), झुलेलाल सुपरकिंग्ज (द कॉर्नर लाउंज, सनी गोगिया), हेमू कलानी ग्लॅडिएटर्स (ट्रिओ ग्रुप, बिपिन डाखनेजा), गुरुनानक नाइट्स (पीव्हीआर टाईल्स वर्ल्ड, प्रकाश रामनानी), संत कंवरम रॉयल्स (विजयराज असोसिएट्स, क्रिश लाडकानी), आर्यन्स युनायटेड (विशाल प्रॉपर्टीज, विशाल तेजवानी), जय बाबा स्ट्रायकर्स (सुखवानी असोसिएट्स, सागर सुखवानी), सिंधी इंडियन्स (मनसुखवानी असोसिएट्स, मनीष मनसुखवानी), अजराक सुपरजायंट्स (लाइफक्राफ्ट रियल्टी, हितेश दादलानी) व पिंपरी योद्धाज (कुणाल कम्युनिकेशन्स, कुणाल लखानी) अशी या संघांची नावे आहेत.
महिलांच्या संघात गंगा वॉरियर्स (तेजवानी हँडलूम्स अँड फर्निशिंग्स, अन्वी व अविनाश तेजवानी), गोदावरी जायंट्स (काजल ड्रेसेस, हरप्रीत सग्गु व पवन जयसिंघानी), झेलम क्वीन्स (सिटी कार्स, शिखा व रॉकी सेवानी), सिंधू स्टारलेट्स (जीएस असोसिएट्स, शीतल व जितू पहलानी), यमुना स्ट्रायकर्स (टॅलेन ट्रेजर ऍक्टिव्हिटी सेंटर, रिया व पवन कोटवानी), नर्मदा टायटन्स (आरआर सोल्युशन्स, रेशम वाधवानी व सपना मेलवानी), कृष्णा सुपरनोव्हाज (एसएसजीएन, रुपाली व प्रवीण पंजाबी) आणि इंद्रायणी थंडरबोल्ट्स (स्पोर्टिफाय, सई लॉन्स, अनिशा व करण आसवानी) यांचा समावेश आहे. महिलांमध्ये ९०, तर पुरुषांमध्ये २५१ खेळाडूंनी सहभाग नोंदवला.
सुखवानी लाईफ स्पेसेस (विकी सुखवानी), एएनपी कॉर्प (ऋषी अडवाणी), नुरिया होमेटेल हॉस्पिटॅलिटी (सागर सुखवानी), आसवानी प्रमोटर्स अँड बिल्डर्स (अनिल आसवानी), सिंग स्टील अँड अल्युमिनियम (मनजीत सिंग वालेचा), उत्तम केटरर्स (नवजीत कोचर), जय मोबाईल (गोपी आसवानी), रवी बजाज व रोहित तेजवानी, ग्रोफिन (अभिजित बोनगीरवार), एसएसडी एक्स्पोर्ट हॉंगकॉंग लिमिटेड (वरून वर्यानी), सेवानी इन्शुरन्स (हर्ष सेवानी), साईबाबा सेल्स प्रायव्हेट लिमिटेड (रोहन गेहाने), विशाल प्रॉपर्टीज (विशाल तेजवानी), बालाजी होम्स (आशुतोष चंदीरामानी), क्लासिक कलेक्शन (नीरज चावला), ग्लो वर्ल्ड (महान जेस्वानी), रिशा वॉच स्टोअर (जॅकी दासवानी), आकार कृष्णानी ग्रुप (राहुल कृष्णानी),  सोलार्ज एनर्जी (विनीत व कौशिक धर्मानी), स्टीरलियन (राजकुमार जवारानी, देवेश चंचलानी),  विक्रम रोहिडा फोटोग्राफी, सीजे हब (चिनू जैन), फेरो (कुणाल कुदळे) यांचे या स्पर्धेसाठी सहकार्य लाभले आहे.

पुणे : स्वामी विवेकानंद आणि विश्वशांतिदूत महर्षी विनोद यांची जयंती तसेच आंतरराष्ट्रीय ख्यातीचे आत्मयोग-गुरू डॉ. संप्रसाद विनोद यांच्या सुवर्णसाधनेच्या अमृतयोग वर्षानिमित्त येत्या १२ जानेवारीला ‘महा-ध्यान शिबिर’ हा विशेष कार्यक्रम आयोजित करण्यात आला आहे. स्वारगेट येथील गणेश कला क्रीडा मंच येथे सकाळी नऊ ते एक या वेळेत हा कार्यक्रम होणार आहे. या महाध्यान शिबिरात ध्यानाचे स्वरूप, त्याचा दैनंदिन जीवनाशी संबंध, मानसिक ताणाचे नियोजन, अशा विविध विषयांची ओळख करून देण्यात येणार आहे.
या वेळी खासदार मेधा कुलकर्णी, पुण्याचे विभागीय आयुक्त डॉ. चंद्रकांत पुलकुंडवार, माजी मंत्री दिवाकर रावते, ज्येष्ठ पत्रकार विजय कुवळेकर, सावित्रीबाई फुले पुणे विद्यापीठाचे कुलगुरू डॉ. सुरेश गोसावी, प्र-कुलगुरू डॉ. पराग काळकर आदी मान्यवर उपस्थित राहणार आहेत. येथे सर्वांना मुक्त प्रवेश आहे. https://forms.gle/iZ6qNQ 552dN CuS1z7. या लिंकवर नोंदणी करणे आवश्यक आहे.

महावितरणचे मुख्य अभियंता श्री. राजेंद्र पवार यांचे गौरवोद्गार

पुणे, दि. ०६ जानेवारी २०२५: क्रांतीज्योती सावित्रीबाई फुले यांनी स्त्रीशिक्षणाचा पाया रचला व शिक्षणाद्वारे महिलांची आत्मनिर्भरतेकडे वाटचाल सुरू झाली. एकेकाळी पुरुषांचे क्षेत्र समजल्या जाणाऱ्या वीजक्षेत्रात देखील स्वकर्तृत्वाने भरारी घेणाऱ्या महिला शक्तीचे अस्तित्व खऱ्या अर्थाने प्रकाशमान झाले आहे, असे गौरवोद्गार मुख्य अभियंता श्री. राजेंद्र पवार यांनी काढले.

क्रांतीज्योती सावित्रीबाई फुले यांच्या जयंतीनिमित्त महावितरणच्या पुणे परिमंडलातील महिला अभियंत्यांसाठी रास्तापेठ येथील ‘प्रकाशदूत’ सभागृहात कार्यशाळेचे आयोजन करण्यात आले होते. या कार्यशाळेत मार्गदर्शक म्हणून श्री. पवार बोलत होते. ते म्हणाले की, वीजक्षेत्र अत्यंत धकाधकीचे असले तरी महिला अभियंता, अधिकारी व कर्मचाऱ्यांनी अत्यंत प्रभावीपणे व आत्मविश्वासाने महावितरणच्या प्रगतीला हातभार लावला आहे. महावितरणने तंत्रज्ञ व विद्युत सहायक म्हणून महिलांना देशात सर्वप्रथम संधी दिली आहे. वीज यंत्रणेतील तांत्रिक कामे, ग्राहकांच्या तक्रारींचे निवारण, नवीन वीजजोडण्या आदी तांत्रिक कामे महिला अभियंता व कर्मचारी समर्थपणे करीत आहे. ही आत्मनिर्भरता देखील अभिमानास्पद आहे.

या कार्यशाळेत सहायक महाव्यवस्थापक (वित्त) सौ. माधुरी राऊत, कार्यकारी अभियंता श्री. धनराज बिक्कड, उपकार्यकारी अभियंता डॉ. संतोष पाटणी यांनी विविध योजना व कामांच्या इम्प्रुव्हमेंट ऑफ पॅरॉमीटर्ससह पीएम सूर्यघर वीज योजना, वीजहानी कमी करणे तसेच महसूलवाढ व वसूली आदींबाबत माहिती दिली. या कार्यशाळेला उपमुख्य औद्योगिक संबंध अधिकारी श्री. भुपेंद्र वाघमारे यांची तसेच ३० महिला अभियंत्यांची उपस्थिती होती.

झाडांच्या सुरक्षेसाठी १३ जानेवारी रोजी वन विभागाच्या अधिकाऱ्यांसोबत बैठक

नामदार चंद्रकांतदादा पाटील यांच्याकडून म्हातोबा टेकडीची पाहाणी

पुणे-कोथरुड मधील म्हातोबा टेकडीवरील आगीच्या घटनेमुळे चंद्रकांतदादा पाटील संतप्त झाले असून; अशा विकृतींना चाप बसविण्याचे निर्देश आज पुन्हा वन विभागाच्या अधिकाऱ्यांना दिले. तसेच, झाडांच्या सुरक्षेसाठी उपाय योजनांसंदर्भात १३ जानेवारी रोजी वन विभागाच्या मुख्यालयात बैठक घेऊन सविस्तर चर्चा करणार असल्याचेही त्यांनी यावेळी स्पष्ट केले.

नामदार चंद्रकांतदादा पाटील यांनी आपल्या ६५ व्या वाढदिवसानिमित्त कोथरुडमधील म्हातोबा, पाषाण, महात्मा टेकडीवर औषधी वनस्पतींसह पर्यावरण संवर्धनात अतिशय महत्वाचे ठरणारे वृक्षांची लागवड केली. गेल्या आठवड्यात तीन वेळा म्हातोबा टेकडीवर येणाऱ्या काही टवाळखोरांनी आग लावून नष्ट करण्याचा प्रयत्न केला. त्या पार्श्वभूमीवर आज नामदार पाटील यांनी घटनास्थळाची पाहाणी करुन आढावा घेतला.

यावेळी वन विभागाचे अधिकारी मुख्य वन संरक्षक मनोज बारबोले, सहाय्यक उप वन संरक्षक दिपक पवार, भाजपा कोथरुड दक्षिण मंडल अध्यक्ष डॉ. संदीप बुटाला, सरचिटणीस दिपक पवार, दिलीप उंबरकर, सचिन मोकाटे, म्हातोबा टेकडी ग्रुपचे दामोदर कुंबरे, रोहिदास सुतार, दंडवते मारुती टेकडी ग्रुपचे संजीव उपळेकर, गणेश आंग्रे, जयंतराव पेशवे, राजू इनामदार, तात्यासाहेब निकम, विश्वास कुलकर्णी, निसर्गप्रेमी रमेश दांडेकर यांच्या सह अनेक पर्यावरण प्रेमी उपस्थित होते.

या पाहाणी वेळी मुख्य वन संरक्षक मनोज बारबोले यांनी घटनेची माहिती नामदार चंद्रकांतदादा पाटील यांना दिली. त्यावर घटना घडू नये; यासाठी काय उपाययोजना केल्या आहेत, अशी विचारणा केली. त्यावर मनुष्यबळ अभावामुळे अशा घटनांवर नियंत्रण मिळवण्यात मर्यादा येत असल्याचे अधिकाऱ्यांनी नामदार पाटील यांच्यासमोर स्पष्ट केले. त्यावर लोकसहभागातून मनुष्यबळ उपलब्ध करुन देऊ; अशी ग्वाही यावेळी ना. पाटील यांनी दिली.

झाडांच्या सुरक्षेसाठी टेहळणी बुरुज उभारणे, रात्रीच्या सुमारास अशा घटना टाळण्यासाठी म्हातोबा मंदिर परिसरात सौर ऊर्जेद्वारे पथदिवे कार्यान्वित करणे, झाडांची निगा राखण्यासह वाळलेले तण काढण्यासाठी मनुष्यबळ वाढविणे, पर्यावरण संवर्धनासाठी कॅम्प उपक्रम राबविणे, टेकडींवर गुरांना चराईवर नियंत्रण आणणे, यांसह दुपार आणि संध्याकाळच्या सत्रात संपूर्ण भागात वन विभागाच्या कर्मचाऱ्यांची गस्त वाढविणे आदी सूचना करण्यात आल्या.

त्यावर लोकसहभागातून मनुष्यबळ वाढविण्यासाठी सर्वतोपरी मदत करण्याची ग्वाही यावेळी ना. पाटील यांनी दिली. तसेच, गस्त वाढविण्यासाठी होमगार्डची मदत घ्यावी अशी सूचना त्यांनी केली. त्यासोबतच झाडांच्या सुरक्षेसाठी प्रशासनासमोरच्या इतर अडचणींवर सविस्तर चर्चा करण्यासाठी १३ जानेवारी रोजी बैठक घेणार असल्याचेही स्पष्ट केले. यामध्ये प्रशासन आणि पर्यावरण प्रेमींसोबत संवाद प्रस्थापित करुन; वृक्ष संवर्धनामध्ये येणाऱ्या अडचणींवर मात करावी, अशा सूचनाही त्यांनी यावेळी दिल्या.

पुणे, दि. ६: महाराष्ट्र राज्य परीक्षा परिषदेमार्फत १० नोव्हेंबर २०२४ रोजी घेण्यात आलेल्या शिक्षक पात्रता परीक्षेची अंतिम उत्तरसूची प्रसिद्ध करण्यात आली असल्याचे परीक्षा परिषदेचे उपायुक्त संजयकुमार राठोड यांनी कळविले आहे.

परीक्षा परिषदेमार्फत १० नोव्हेंबर रोजी घेण्यात आलेल्या शिक्षक पात्रता परीक्षेच्या पेपर क्रमांक १ व २ च्या प्रश्नपत्रिकेतील कोणत्याही प्रश्नाबाबत किंवा पर्यायी उत्तराबाबत त्रुटी, आक्षेप असल्यास परीक्षा परिषदेकडे १६ डिसेंबर २०२४ पर्यंत पाठविण्याबाबत कळविण्यात आले होते. त्यानुसार विहित मुदतीत प्राप्त झालेल्या लेखी निवेदनांवर विषय तज्ज्ञांचे अभिप्राय घेऊन ही अंतिम उत्तरसूची प्रसिद्ध करण्यात आली आहे.

अंतिम उत्तरसूचीबाबत कोणतेही निवेदन, आक्षेप स्वीकारले जाणार नाहीत, याची उमेदवारांनी नोंद घ्यावी. या अंतिम उत्तरसूचीनुसार महाराष्ट्र शिक्षक पात्रता परीक्षा २०२४ (एमएएचएटीईटी) परीक्षेचा निकाल यथावकाश परिषदेच्या संकेतस्थळावर प्रसिद्ध करण्यात येईल, असेही श्री. राठोड यांनी कळविले आहे.