पुणे : पुण्यातील पिंपरी – चिंचवडमधील मोशी रोड भागात शुक्रवारी एका महिलेचा मृतदेह आढळल्याने एकच खळबळ उडाली. महिला तिच्या घरातून १९ फेब्रुवारीपासून बेपत्ता होती. अखेर शुक्रवारी तिचा मृतदेह आढळला. या घटनेची माहिती तात्काळ पोलिसांना देण्यात आली, त्यानंतर पोलिसांकडून महिलेच्या हत्येप्रकरणी पुढील तपास सुरू आहे.भोसरी येथील चक्रपाणी वसाहतीमध्ये महिला आपल्या पती आणि दोन मुलांसोबत राहत होती. महिलेचा पती आणि महिला मजूर म्हणून काम करत होते. दोघेही आपल्या घराजवळील मजुरांच्या पिक-अप पॉईंटवर जायचे. १९ फेब्रुवारी रोजीही ती नेहमीप्रमाणे पिक-अप पॉईंटवर गेली, पण त्यानंतर मात्र ती बेपत्ता झाली.मृत महिलेची ओळख पटली असून ती मूळची छत्तीसगढ येथील रहिवासी असल्याचं समोर आलं आहे. तन्नू देवेंद्र साहू, वय वर्ष ३५ असं मृत महिलेचं नाव आहे. महिला अचानक बेपत्ता होऊन अशाप्रकारे गोणीत तिचा मृतदेह आढळल्याने परिसरात एकच खळबळ उडाली आहे.शुक्रवारी संध्याकाळी एका कंटेनर ड्रायव्हरने जाधववाडी मोशी रोडवर मटेरे हाऊस चौकाजवळ एका खुल्या मैदानात अतिशय दुर्गंधी आल्याची सूचना पोलिसांना दिली. भोसरी पोलीस तात्काळ घटनास्थळी दाखल झाले. त्यांनी तपास केल्यानंतर एका पिवळ्या रंगाच्या गोणीत त्यांना महिलेचा मृतदेह आढळून आला. खुल्या मैदानात झाडांजवळ गोणी ठेवली होती. गोणीतील मृतदेहाला दुर्गंधी येऊ लागली होती. गोणीजवळ एक मोबाईल फोनदेखील आढळला.पोलिसांकडून मृतदेह शवविच्छेदनासाठी पाठवण्यात आला आहे. गोणीजवळ आढलेल्या मोबाईल फोनचा पोलिसांकडून तपास सुरू आहे. प्राथमिकरित्या महिलेची हत्या केल्याचं समोर येत आहे. मात्र डॉक्टरांनी शवविच्छेदन अहवाल येण्याआधी मृत्यूच्या कारणाबाबत कोणतंही विधान केलं नाही.

वडगाव शिंदे येथे न्यू माॅडेल हाॅस्पिटलचे भूमिपूजन दि. २२ फेब्रुवारी रोजी सुरेंद्र बापूसाहेब पठारे व आवाहन फाउंडेशन’ आणि ‘जॉन्सन कंट्रोल्स’चे अधिकारी यांच्या प्रमुख उपस्थित पार पडले.

पुणे: वडगावशेरी मतदारसंघातील ग्रामीण भागातील आरोग्य व्यवस्था अधिक सक्षम करण्याच्या उद्देशाने ‘आवाहन फाउंडेशन’ आणि ‘जॉन्सन कंट्रोल्स’ यांच्या सहकार्याने न्यू मॉडेल हॉस्पिटल उभारण्याचा निर्णय घेण्यात आला आहे. या हॉस्पिटलच्या भूमिपूजन सोहळ्याला प्रमुख उपस्थिती म्हणून सुरेंद्र पठारे, ‘आवाहन फाउंडेशन’ आणि ‘जॉन्सन कंट्रोल्स’ यांचे मुख्य कार्यकारी अधिकारी तसेच वडगाव शिंदे गावचे सरपंच सौ. हेमलता शिंदे, उपसरपंच व नागरिक बांधव उपस्थित होते.

वडगाव शिंदे सारख्या ग्रामीण भागाला आरोग्य सुविधांनी अधिक सक्षम करण्यासाठी सरपंच सौ. हेमलता शिंदे यांनी ‘आवाहन फाउंडेशन’ आणि ‘जॉन्सन कंट्रोल्स’ यांच्याकडे केलेल्या सततच्या पाठपुराव्यामुळे हा महत्त्वाचा प्रकल्प प्रत्यक्षात येऊ शकला. हे न्यू मॉडेल हॉस्पिटल संपूर्ण अत्याधुनिक वैद्यकीय सोयी-सुविधांनी सुसज्ज असणार आहे व यामध्ये विविध रोगांवरील उपचार पद्धती तसेच तातडीच्या सेवा उपलब्ध असतील. यामुळे ग्रामीण भागातील नागरिकांना शहरात जावे लागणार नसून नागरिकांचा वेळ व खर्च वाचेल तसेच तातडीच्या उपचारांसाठी मदत होईल. आरोग्य सुविधा गावामध्येच मिळणार असल्याने नागरिकांमध्ये आनंद तसेच समाधानाचे वातावरण आहे.

सरपंच सौ. शिंदे म्हणाले, “वडगाव शिंदे ग्रामस्थांसाठी सुसज्य हाॅस्पिटल मिळावे म्हणून मी वारंवार शासकीय स्तरावर पाठपुरावा केला होता. पंरतू काही तांत्रिक अडचणीमुळे ते शक्य झाले नाही. ‘आवाहन फाउंडेशन’ आणि ‘जॉन्सन कंट्रोल्स’ यांच्याकडे केलेल्या सततच्या पाठपुराव्यामुळे हा महत्त्वाचा प्रकल्प प्रत्यक्षात येऊ शकला. या न्यू मॉडेल हॉस्पिटलसाठी शासनाकडे निधीची मागणी केली आहे. तसेच उपचारासाठी आवश्यक वैद्यकीय सेवा आणि कर्मचाऱ्यांची नियुक्ती करावी, अशी विनंती केली आहे.”

” वडगावशेरी मतदारसंघाचा सर्वांगीण विकास करण्यासाठी मूलभूत सुविधा सक्षम करणे आवश्यक आहे. आरोग्य व्यवस्थेचा विकास हा त्यातील महत्त्वाचा भाग आहे. न्यू मॉडेल हॉस्पिटलमुळे ग्रामीण भागातील नागरिकांना अत्याधुनिक वैद्यकीय सेवा मिळतील, जी आजच्या काळाची गरज आहे. तसेच, वडगाव शिंदे येथील न्यू मॅाडेल हाॅस्पिटल, आधुनिक सोईसुविधांयुक्त करण्यासाठी सर्वेातपरी प्रयत्न करण्याच्या दिशेने व वडगावशेरी मतदारसंघाच्या विकासाच्या दृष्टीने आमदार बापूसाहेब पठारे हे सदैव तत्पर आहेतच या सामाजिक प्रकल्पांच्या माध्यमातून वडगावशेरी मतदारसंघ आरोग्य, शिक्षण आणि जीवनमान उंचावण्याच्या दिशेने वेगाने पुढे जाईल.” असे मत सुरेंद्र पठारे फाऊंडेशनचे अध्यक्ष सुरेंद्र पठारे यांनी व्यक्त केले.

भूमिपूजन समारंभाप्रसंगी हवेली तालुका सभापती अशोक बापू खांदवे, वडगाव शिंदे गावच्या प्रथम लोकनियुक्त सरपंच सौ हेमलता विलास शिंदे, उपसरपंच सौ शिवानी शिंदे, युवराज काकडे, सौ उषा काकडे, सौ योगिता शिंदे, सौ दिपाली शिंदे, ग्रा.वि.अधिकारी दयानंद कोळी, प्राथमिक आरोग्य केंद्राच्या डॉ. वैशाली मांगले, ग्रा.प.कर्मचारी इंद्रायणी विविध कार्यकारी सोसायटीचे चेअरमन कल्याण आबा शिंदे, भरत काकडे, पदा चव्हाण, नितीन शिंदे, राजेंद्र शिंदे, सचिन काकडे, विक्रांत गव्हाणे, जयदीप शिंदे, रामभाऊ काकडे गणेश शिंदे, विलास शिंदे, सुनील काकडे, विजय शिंदे, मच्छिंद्र शिंदे, राजेंद्र शिंदे, वैभव शिंदे, भरत काकडे, खंडू काकडे, विलास काकडे, संभाजी शिंदे, विजय साकोरे, महेंद्र काकडे, बापू काकडे, सदाशिव काकडे, भीमराव शिंदे, अरुण काकडे, धनाजी बारणे, तानाजी शिंदे, विनोद शिंदे, आवाहन फाउंडेशन’ आणि ‘जॉन्सन कंट्रोल्सचे प्रसन्न बारी, तुषार जाधव, वर्तिका जिंदल, विजय नेहरे, अमोल कुंभार, मोहम्मद जाहिद इस्लाम इत्यादी मान्यवर उपस्थित होते.

पुणे, दि. २४:बाजार समित्या या कृषि पणन व्यवस्थेचा महत्वाचा घटक आहे. अगदी कोरोनाच्या काळातही सर्व व्यवहार ठप्प असतांनाही, बाजार समित्यांनी शेतमालाची पुरवठा साखळी कार्यक्षमपणे हाताळून सुरळीत राखली. त्याची सरकारने, जागतिक बँकेने व प्रसार माध्यमांनीही दखल घेतली आहे,त्यामुळे राज्यातील बाजार समितीचे महत्त्व अधोरेखित झाले आहे. महाराष्ट्र हे मोठे कृषी निर्यातदार राज्य आहे.जागतिक बाजार समितीच्या धर्तीवर राज्याची पणन व्यवस्था स्पर्धात्मक करणे आवश्यक असून शेतकऱ्यांना केंद्र मानून राज्याच्या बाजार समित्या सक्षम करण्यासाठी प्रयत्न करणार आहे, असे प्रतिपादन पणन मंत्री तथा महाराष्ट्र राज्य कृषी पणन मंडळाचे अध्यक्ष जयकुमार रावल यांनी केले. तसेच परिषदेत मांडलेल्या सकारात्मक सूचना च्या संदर्भात धोरणात्मक निर्णय घेणार आहेत. त्याचप्रमाणे बाजार समित्यांना अर्थसंकल्पात हक्काचा निधी उपलब्ध करून देण्यासाठी प्रयत्न करणार असल्याचे ही त्यांनी सांगितले.

महाराष्ट्र राज्य कृषी पणन मंडळाच्यावतीने आयोजित कृषी उत्पन्न बाजार समित्यांची राज्यस्तरीय पणन परिषदेच्यावेळी उद्घाटनप्रसंगी ते बोलत होते. यावेळी राज्याचे कृषी मंत्री माणिकराव कोकाटे, आमदार चरणसिंह ठाकूर, आ.दिलीप बनकर, आ.अनुराधा चव्हाण, सहकार आयुक्त दीपक तावरे, कृषी पणन संचालक विकास रसाळ, महाराष्ट्र राज्य कृषी पणन मंडळाचे व्यवस्थापकीय संचालक संजय कदम, सरव्यवस्थापक विनायक कोकरे तसेच राज्यातील सर्व बाजार समित्यांचे सभापती, उपसभापती, संचालक व सचिव आदी उपस्थित होते.

मंत्री रावल पुढे म्हणाले की, शेतमालाच्या उत्पादनाच्या बाबतीत आपण जरी आघाडीवर असलो तरी त्याची सक्षम पणन व्यवस्था निर्माण करण्याच्या अनुषंगाने काम करण्याची गरज आहे. शेतकऱ्यांनी उत्पादित केलेल्या शेतमालाला किफायतशीर भाव मिळण्यासाठी पणन व्यवस्थेला अधिक स्पर्धात्मक करणे आवश्यक आहे. सुयोग्य पणन सुविधांच्या अभावामुळे शेतमालाची काही प्रमाणावर सुगी पश्चात हानी होते. प्रत्यक्षात अवकाळी पाऊस, गारपीट यासारख्या नैसर्गिक आपत्ती, व शेतमालाची अशास्त्रीय वाहतूक व हाताळणीमुळे होणारे नुकसान टाळण्याकरीता प्रयत्न करावे.

राज्यातील बहुतांश बाजार समित्यांच्या मालकीच्या जमीनी गावातील किंवा शहरातील अत्यंत मोक्याच्या ठिकाणी असून, त्यांचा विकास करण्यासाठी कृषी उत्पन्न बाजार समित्यांनी स्थानिक गरजा लक्षात घेवून व्यवसाय विकास आराखडे तयार करावे. कालबध्द कार्यक्रम राबवून ते अंमलात आणले पाहिजे, राज्यामध्ये एकूण 305 कृषि उत्पन्न बाजार समित्या व त्यांचे 625 उपबाजार आवार कार्यरत आहेत. राज्यातील काही आदिवासी भागात व राज्यातील 69 तालुक्यांमध्ये नव्याने बाजार समिती नव्याने निर्माण करण्याचा निर्णय घेण्यात आला आहे.

कृषी उत्पन्न बाजार समितीने अधिकाधिक शेतमाल बाजार समिती आवारात विक्रीसाठी येण्याकरीता शेतकऱ्यांना विविध सोई-सुविधा, शेतकऱ्यांचे संपर्क व प्रबोधन, शेतकऱ्यास शेतमालाचे पैसे देण्याबाबत संरक्षण, शेतकऱ्याच्या बांधावर जाऊन शेतमाल संकलन व माफक दरात वाहतूक, आधुनिक तंत्रज्ञानाचा वापर, शेती विषयक व प्रक्रिया विषयक तंत्रज्ञान याची उपलब्धता व माहिती देणे, अधिनस्त बाजार घटकांवर प्रभावी नियंत्रण ठेवणे, बाजार समितीची व्यावसायीक उत्पन्न वाढीसाठी गोदाम व शीतगृह उभारणी, निर्यातीसाठी मुलभूत सुविधा निर्माण करणे, ग्रेडींग, स्टोअरेज, पॅकींग इत्यादींनी प्रोत्साहन देणे स्वत:चा व्यवसाय विकास आराखडा तयार करुन त्याची कालबध्द अंमलबजावणी करणे आवश्यक आहे.

जागतीक पातळीवर अनेक राष्ट्रांनी त्यांच्या अन्नधान्य साठ्यात मध्ये वाढ केल्यामुळे कृषि पणन क्षेत्राचे महत्त्व अधोरेखीत झाले आहे. कृषि पणन क्षेत्र हे शाश्वत विकासाचे क्षेत्र असल्याने मोठ्या प्रमाणावर गुंतवणूक येऊ लागली आहे. आंतरराष्ट्रीय स्तरावर माहिती तंत्रज्ञानाचा वापर, कमोडीटी मार्केटस्, फ्युचर व फॉरवर्ड मार्केटींग, ऑनलाईन मार्केटींग, विविध प्रमाणीकरण, पॅकेजींग इत्यादी तरतुदींमुळे आव्हाने निर्माण झालेमुळे उत्पादक शेतकऱ्यांबरोबरच कृषि पणन व्यवस्थेला आधुनिकतेची कास धरणे आवश्यक झालेले आहे. शेतीमालाची विक्री व्यवस्था निर्माण करणे हे बाजार समित्यांच्या स्थापनेच्या वेळचे उद्दीष्ट होते. तथापि सध्याच्या बदलत्या जागतिकीकरण व उदारीकरणाच्या वातावरणात बाजार समित्यांनी त्यांच्या कामकाजात आवश्यक बदल करणे गरजेचे आहे.

कृषि उत्पन्न बाजार समित्यांनी भविष्यात अधिकाधिक पारदर्शकता ठेवून व शेतकऱ्यांना आधुनिक सुविधा पुरवून आकर्षित केले पाहीजे. अजूनही बऱ्याच बाजार समित्यांच्या बाजार आवारांत पारदर्शक विक्री व्यवहार होत नाहीत.बाजार आवारात विक्रीसाठी आलेल्या शेतमालाचे योग्य वजन, शेतमालाला वाजवी भाव व शेतमाल खरेदीचे चुकारे वेळेत करणे याची सुनियोजित व्यवस्था निर्माण करणे आवश्यक आहे. बाजार समितीने बाजार आवारात जास्तीत जास्त शेतमाल विक्रीसाठी येईल यासाठी शेतकऱ्यांशी संपर्क वाढवून त्यांचेसोबत उत्तम समन्वय ठेवणे आवश्यक आहे.

अमेस्टरडॅम व पॅरिस बाजारपेठांच्या धर्तीवर राज्यात ही आंतरराष्ट्रीय दर्जाचे मार्केट उभारणार-पणन मंत्री जयकुमार रावल

मोबाईल ॲप, बाजार आवारांतील आधुनिक डिस्प्ले सिस्टीम यांचा वापर करुन राज्यातील व देशातील शेतमालाची आवक, बाजारभाव, तसेच इतर आवश्यक माहितीचा रिअल टाईम डेटा सर्व बाजार घटकांना सार्वजनिक रित्या उपलब्ध करुन दिला पाहिजे. कृषि पणन व्यवस्थेतील आधुनिक तंत्रज्ञानाच्या वापराबाबत वेगाने काम झाले पाहिजे . त्यादृष्टीने पहिले पाऊल म्हणून राज्याचे मुख्यमंत्री यांचे कडुन मंजुर पणन विभागाच्या 100 दिवसांच्या कार्यक्रमात “राज्यात आंतरराष्ट्रीय दर्जाची बाजार समिती उभारणे या विषयाचा समावेश करणेत आलेला आहे. या अंतर्गत अल्समीर, अमेस्टरडॅम, रुगींश, पॅरिस बाजार पेठ या आधुनिक बाजारपेठांच्या धर्तीवर राज्यात आंतरराष्ट्रीय दर्जाचे मार्केट उभारणेचा राज्य शासनाचा विचार आहे. त्यासाठी आवश्यक सविस्तर प्रकल्प अहवाल महाराष्ट्र राज्य कृषी पणन मंडळाकडून तयार करणेत येत आहेत, असेही मंत्री श्री. रावल म्हणाले.
 
शेतकऱ्यांना सोई-सुविधा उपलब्ध करुन देण्यासाठी कृषी उत्पन्न बाजार समितीने काम करावे-कृषीमंत्री ॲड माणिकराव कोकाटे

शेतकऱ्यांची गैरसोय टाळण्यासोबतच त्यांच्या शेतमालाला संरक्षण देण्याकरीता विविध सोई-सुविधा उपलब्ध करुन देण्याचे कृषी उत्पन्न बाजार समितीने काम करावे, असे प्रतिपादन कृषीमंत्री ॲड. माणिकराव कोकाटे यांनी केले.

शेतकऱ्यांना शेतमालाची विक्री केल्यानंतर त्यांना शाश्वती वाटली पाहिजे. शेतकरी विश्वासाने माल विक्री करतात ते पूर्णतः विक्री व्यवस्थेवर अवलंबून असतो. त्यामुळे शेतकऱ्यांची फसवणूक होणार नाही, याबाबत दक्षता घ्यावी. याकरीता व्यापाऱ्यांची कृषी उत्पन्न बाजार समितीकडे नोंदणी करणे, त्यांच्याकडून आवश्यकतेनुसार काही रक्कम अनामत रक्कम म्हणून जमा करुन घेणे, खरेदी-विक्री व्यवहाराची माहिती, कर्जफेडीची क्षमता आदीबाबत पणन विभागाने विचार करावा.

शेतकऱ्यांनी रासायनिक शेती ऐवजी सेंद्रीय शेती करण्यावर भर दिला पाहिजे. कृषी क्षेत्रात विविध उपक्रमशील प्रयोग करण्यात येत होत असून त्याचा शेतकऱ्यांना लाभ होईल यादृष्टीने काम केले पाहिजे. शेतकरी चांगल्या प्रतीच्या शेतमालाचे उत्पादन करीत असतात, त्यांची जनजागृती केली पाहिजे. कृषी उत्पन्न बाजार समितीने राज्यात शेतकरी विक्री केंद्रे निर्माण केले पाहिजे. कृषी उत्पन्न बाजार समितीच्या आवारात दर्शनी भागात मोठ्या आकाराचा एलईडी पडदा लावून त्यावर शेतमालाचे भाव, कृषी विषयक योजनांची माहिती, पर्जन्यमान, हवामान अंदाज आदींबाबत माहिती प्रकाशित केली पाहिजे.

राज्यात विविध ठिकाणी कृषी विभागाच्या जागेबाबत कृषी उत्पन्न बाजार समितीच्यावतीने करण्यात येणाऱ्या मागणीबाबत सकारात्मक विचार करण्यात येईल. शेतकरी प्रगतशील असून त्यांच्या शेतमालाला भाव मिळवून देण्यासोबतच त्यांच्या मनातील अस्थिरता कमी करण्याकरीता कृषी व पणन विभागाच्या समन्वयाने येत्या काळात नाविन्यपूर्ण उपक्रम राबविण्यात येईल, असेही ॲड. कोकाटे म्हणाले.

श्री. कदम म्हणाले, राज्यातील बाजार समित्यांच्या विविध विषयांसंदर्भात संवाद साधण्यासाठी येथे बाजार समित्यांच्या राज्यस्तरीय परिषदेचे आयोजन करण्यात आले. राज्यात कृषी उत्पन्न बाजार समितीच्या माध्यमातून शेतकऱ्यांचे उत्पादित मालाला भाव मिळवून देण्यासाठी प्रयत्न करण्यात येत आहे, असेही श्री. कदम म्हणाले.

श्री. रावल यांच्या हस्ते २० वर्षापासून अधिक कार्यकाळ पूर्ण केलेल्या सभापतींचा सन्मान करण्यात आले. यावेळी बारामती कृषी उत्पन्न बाजार समितीची वाटचाल आणि कामकाजाबाबत चित्रफीत दाखविण्यात आली.

पुणे : अलीकडे फॅशन शोचे पर्व फुटलेले आहे. पाच – सहा वर्षांच्या बालकांपासून पन्नाशी गाठलेल्या महिला – पुरुषांचेही फॅशन शो होत असतात. या सर्व फॅशन शो पेक्षा एक आगळा – वेगळा, सामाजिक बांधिलकी आणि महिला आरोग्य जनजागृती घडवणारा फॅशन शो कशिश सोशल फाउंडेशनच्या सहकार्याने कशिश प्रॉडक्शन्स घेणार आहे. रांका मिस / मिसेस / मिस्टर ग्लोबल इंडिया या फॅशन शो मधून महिला आरोग्य विषयक जनजागृती करण्यात येणार आहे अशी माहिती कशिश सोशल फाउंडेशनचे अध्यक्ष, पुण्याचे पॅडमॅन योगेश पवार यांनी सोमवारी पत्रकार परिषदेत दिली.

पुणे श्रमिक पत्रकार संघ येथे झालेल्या पत्रकार परिषदेला कशिश सोशल फाउंडेशनचे अध्यक्ष योगेश पवार यांच्यासह रांका ज्वेलर्स चे शिवम अरोरा, काशिश प्रॉडक्शन्स च्या ब्रँड ॲम्बेसेडर स्नेहल नार्वेकर,केतकी शिरबावीकर,निलाक्षी जाधव आदि मान्यवर उपस्थित होते.

फॅशन शो विषयी माहिती देताना योगेश पवार म्हणाले, आपल्या सामाजिक कर्तव्याच्या जाणिवेतून कशिश सोशल फाउंडेशनच्या सहकार्याने कशिश प्रॉडक्शन्स च्या वत्तीने यंदाच्या महिला दिना निमित्त हा फॅशन शो आयोजित केला आहे. यामध्ये महिलां मध्ये स्वच्छता, मासिक पाळी आदीं बाबत जनजागृती करण्यात येणार आहे. हा फॅशन शो ३ मार्च रोजी एलप्रो मॉल चिंचवड येथे पार पडणार आहे.

या सामाजिक उपक्रमांबद्दल शिवम अरोरा म्हणाले,महिला आरोग्य जनजागृती करण्यासाठी योगेश पवार यांनी या फॅशन शो ची संकल्पना मांडली ती तेजपाल रांका यांना अतिशय महत्वाची वाटली, आपण समाजाचे देणे लागतो या भावनेतून आम्ही या फॅशन शो चा भाग होत आहोत.या स्पर्धेत सहभाग घेणाऱ्या प्रत्येक स्पर्धकाला रांका ज्वेलर्स तर्फे फोटोशूट तसेच चांदीचे नाणे देण्यात येणार आहे.

प्रकृतीची शुद्धता व मानवतेच्या उत्थानाच्या दिशेने निरंकारी मिशनचे एक स्वर्णिम पाऊल

ओंकारेश्वर नदीच्या घाटाची स्वच्छता संपन्न

पुण्यात एकाच वेळी ४२ ठिकाणी ‘स्वच्छ जल – स्वच्छ मन’ अभियान संपन्न

पुणे:-परम वंदनीय सतगुरु माता सुदीक्षाजी महाराज व सत्कारयोग्य आदरणीय निरंकारी राजपिता रमितजी यांच्या पावन आशीर्वादाने २३ फेब्रुवारी २०२५ची स्वर्णिम प्रभात एक नवीन जागृती व सेवेच्या दिव्य प्रकाशाचा संदेश घेऊन आली ज्यामध्ये ‘अमृत प्रोजेक्ट’ अंतर्गत ‘स्वच्छ जल, स्वच्छ मन’ अभियानाच्या तिसऱ्या टप्प्याचे आयोजन विश्वभरात केले गेले.

या अभियाना अंतर्गत पुणे जिल्ह्यातील इंद्रायणी, मुळा, मुठा, भीमा, भामा, घोडनदी, पवना, वेळू, कुकरी, मिना, कऱ्हा, मांडवी, आनंदी या नद्यांसह शहरातील विविध तलाव अशा ४२ ठिकाणी ही मोहीम राबविण्यात आली. ज्यामध्ये ओंकारेश्वर नदी घाट, कात्रज तलाव,आळंदी-देहू-चऱ्होली येथील इंद्रायणी नदी घाट,मोरया गोसावी मंदिराचा पवना नदी घाट आदी प्रमुख जलस्रोतांची स्वच्छता करण्यात आली ज्यामध्ये हजारो निरंकारी सेवादल स्वयंसेवक व भाविक भक्तगणांनी मोठ्या उत्साहाने भाग घेतला अशी माहिती मिशनचे पुणे जिल्हा प्रभारी ताराचंद करमचंदानी यांनी दिली.

संत निरंकारी मंडळाचे सचिव व समाज कल्याण प्रभारी श्री.जोगिंदर सुखीजा यांनी माहिती देताना सांगितले, की देशभरात राबविलेल्या ‘अमृत प्रोजेक्ट’ परियोजनेच्या दरम्यान सर्व सुरक्षा नियमांचे पूर्णपणे पालन करण्यात आले. युवावर्गाचा विशेष सहभाग हा अभियानाचा मुख्य आधार होता. त्यांनी हेही सूचित केले, की ही मोहीम केवळ एका दिवसापुरती सीमित नाही तर दरमहा विविध घाट व जलस्रोतांची स्वच्छता निरंतर चालू राहील. संत निरंकारी मिशनची सामाजिक शाखा, संत निरंकारी चॅरिटेबल फाउंडेशनच्या विद्यमाने, पूज्य बाबा हरदेवसिंहजी यांच्या असंख्य दिव्य शिकवणूकींतून प्रेरणा घेत या पावन अभियानाचे आयोजन करण्यात आले.

२७ राज्ये व केंद्रशासित प्रदेशातील १६५० पेक्षा अधिक ठिकाणी १० लाखांहून अधिक संख्येने सेवाभावनेने ओतप्रोत स्वयंसेवक भक्तगणांनी संपूर्ण देशामध्ये एकाच वेळी हे महान अभियान साकारले. हे दृश्य केवळ प्राकृतिक स्वच्छतेपर्यंत सीमित न राहता, अंतर्मनाला निर्मळ आणि पवित्र करण्याऱ्या एका आध्यात्मिक यात्रेचे सुंदर प्रतीक बनले. प्रत्येक श्रद्धाळु भक्ताची समर्पित उपस्थिती या गोष्टीचे प्रमाण होते, की जेव्हा प्रेम, सेवा आणि समरसतेचा दिव्य संगम होतो तेव्हा प्रकृतीही नवजीवनाचा अनुभव घेते.

सतगुरु माताजींनी पाण्याचे महत्व अधोरेखित करताना समजावले, की पाणी अमृतासमान आहे जे प्रकृतीने आपल्याला सर्वोत्तम उपहाराच्या रुपात प्रदान केले आहे. त्याची स्वच्छता आणि संरक्षण ही केवळ एक जबाबदारीच नव्हे तर आमची स्वाभाविक सवय बनून गेली पाहिजे. बऱ्याचदा आपण अजाणतेपणे आपण वापरा व फेकून द्या अशा वस्तू व घाण जलस्रोतांमध्ये टाकून प्रदूषणात भर घालत असतो ज्यामुळे पर्यावरणाची हानी होते. याच चिंतनातून प्रेरित होऊन ‘प्रोजेक्ट अमृत’ सारख्या सामाजिक उपक्रमाची सुरुवात करण्यात आली आहे जी जल संरक्षण आणि स्वच्छतेच्या प्रति जागरुकता पसरविण्याचा एक महत्वपूर्ण प्रयास आहे.

बाबा हरदेवसिंहजी यांच्या जन्मदिवसाला समर्पित असलेल्या या पवित्र सेवा अभियानात प्रत्येक भक्ताला जल संरक्षणाच्या दिशेने योगदान देण्याची संधी मिळाली. हा पुढाकार केवळ घाट आणि जलस्रोतांच्या स्वच्छतेवर केंद्रीत नसून घरांमध्येही लहान-सहान सवयीतून जल बचतीला प्रोत्साहित करत आहे ज्यायोगे पाण्याचा आदर व्हावा आणि हे अमूल्य संसाधन भविष्यातील पिढ्यांसाठी सुरक्षित राहू शकेल.

पर्यावरण सुरक्षा अंतर्गत जल संरक्षणामध्ये आपली सकारात्मक सक्रिय भूमिका निभावत ग्लोबल एनर्जी ॲन्ड एन्व्हायरनमेंट फाउंडेशन (GEEF) ने संत निरंकारी चॅरिटेबल फाउंडेशनला (SNCF) प्रतिष्ठित ‘वाटर कंजर्वेशन इनिशिएटिव्ह एनजीओ ऑफ द ईयर २०२५’ पुरस्कार देऊन गौरविले आहे. हा गौरवपूर्ण सन्मान SNCFच्या प्रोजेक्ट अमृत – स्वच्छ जल, स्वच्छ मन आणि त्यातील विविध जल संरक्षण व स्वच्छतेसाठी घेतलेल्या पुढाकाराच्या प्रति अथक समर्पणाचे प्रतीक आहे. नि:संशय जल संसाधनांची शुद्धता आणि सतत संरक्षण करण्यामध्ये SNCF द्वारे केले जाणारे प्रयास समाजाला स्वच्छ, स्वस्थ आणि समृद्ध भविष्याकडे अग्रेसर होण्यामध्ये महत्वपूर्ण भूमिका निभावत आहेत.

महापालिकेचे “भय” हवे “अभय” नको…

पुणे -अभय योजना आणून महापालिका प्रामाणिकपणे कर भरणाऱ्यांना अवमानित करत असून कर बुडव्यांचा सन्मान करत असल्याचा आरोप करत असल्या अभय योजना आणू नका असे जाहीर आवाहन माजी विरोधी पक्षनेते उज्वल केसकर, आणि सुहास कुलकर्णी यांनी महापालिका आयुक्त राजेंद्र भोसले यांना केले आहे.

केसकर यांनी असे म्हटले आहे कि,’महानगरपालिकेमध्ये पुन्हा एकदा कर आकारणी कर संकलन विभागात कर बुडव्यांसाठी ‘अभय योजना ‘ आणण्याचे नियोजन केले जात आहे.१ मार्च ते ३१ मार्च या कालावधीमध्ये ही अभय योजना राबवण्याचे निश्चित झाले आहे असे कळते. त्यामुळे पुणे शहरातीलप्रामाणिक “करदाता” जो आहे त्याच्यावर अन्याय होतो आहे. कर बुडवणारी माणसं ही तीच तीच आहेत कर बुडवणाऱ्या लोकांना सन्मान मिळतो, एक नवीन प्रवृत्तीला आपण जन्म देतो कर भरायचा नाही वर्षा दोन वर्षांनी “अभय” योजना आणायची ही एक छोटीशी प्रथा आणि पायंडा पुणे महानगरपालिकेमध्ये पडत आहे.
राज्य शासनाने कायद्यामध्ये सुधारणा करून दंडाची रक्कम कमी करावी.गतवर्षी १२०० प्रॉपर्टी सील केल्या होत्या, यावर्षी २५० देखील नाही.प्रामाणिक पुणेकर “कर” भरणाऱ्याला असे आवाहन करावे लागेल की तुम्ही सुद्धा “कर” भरू नका दंड लागणार नाही, अभय योजना येणार आहे.आपण प्रामाणिकपणे बिल आले नाही तरी “ऑनलाइन” बिल काढून एक महिन्याच्या आत भरून टाकतो तरी आपला सन्मान केला जातच नाही पण कर बुडवणाऱ्या लोकांचा सन्मान केला जातो.
आमची महापालिका आयुक्त यांना विनंती आहे कृपया आपण चला ओके हि अभय योजना आणू नका महानगरपालिकेचे “भय” निर्माण होईल अशा पद्धतीची कृती करा.

सुनील देशमुख लिखित ‘विदेशमुखी’ यशोगाथाचे प्रकाशन
पुणे, ता. २४: “विद्येचे माहेरघर अशी ओळख असलेले पुणे आता औद्योगिक नगरी म्हणूनही ओळखले जाऊ लागले आहे. इथली हवा, माती ही वेगळीच असून, पुणे शहराला एक वैभवशाली वारसा आहे. या पुण्याने अनेकांना घडवले असून, यशाच्या उत्तुंग शिखरावर नेले आहे,” असे प्रतिपादन सिम्बायोसिस आंतरराष्ट्रीय विद्यापीठाचे संस्थापक डॉ. शां. ब. मुजूमदार यांनी व्यक्त केले. जर मी पुण्यात आलो नसतो, तर सिम्बायोसिस संस्था सुरू करू शकलो नसतो, असेही डॉ. मुजुमदार म्हणाले.

जिद्द आणि उमेदीने संघर्षाशी दोन हात करून आयुष्याला प्रेरणादायी यशोगाथा बनवलेल्या लेखक सुनील देशमुख लिखित ‘विदेशमुखी’ पुस्तकाचे प्रकाशन डॉ. मुजुमदार यांच्या हस्ते झाले. सेनापती बापट रस्त्यावरील सुमंत मुळगावकर सभागृहात झालेल्या या सोहळ्यात प्रमुख पाहुणे म्हणून माहिती तंत्रज्ञान तज्ज्ञ डॉ. दीपक शिकारपूर, लेखक सुनील देशमुख, प्रकाशक अमलताश बुक्सचे सुश्रुत कुलकर्णी उपस्थित होते.

डॉ. शां. ब. मुजूमदार म्हणाले, “तुमच्यात किती जिद्द, चिकाटी आहे, यावरच तुमचे यश अवलंबून असते. प्रत्येकाने हार न मानता चिकाटीने आपल्या क्षेत्रामध्ये कार्य करत राहिले पाहिजे. मात्र, असे करत असताना इतरांशी संवाद साधताना नम्रता बाळगलीच पाहिजे. काणतेही क्षेत्र असो हतोटी, सचोटी, कसोटी आणि दुरदृष्टी या चार गोष्टी अत्यंत महत्वाच्या आहेत. या चार गोष्टींचा अवलंब करून कोणत्याही क्षेत्रात उत्तुंग यश प्राप्त करता येऊ शकते. प्रत्येकाने आपले मुल्य वाढवण्यासाठी झटले पाहिजे. स्वतःचे मुल्य वाढवल्यास आपण नक्कीच प्रगती करू शकतो.”

डॉ. दीपक शिकारपूर म्हणाले, “लेखनाला तंत्रज्ञानाची जोड द्यायला हवी. सध्याचा काळ डिजिटल तंत्रज्ञानाचा आहे. युवापिढी वाचनासाठी पुस्तकांबरोबरच तंत्रज्ञानाचाही उपयोग करते. त्यामुळे अधिकाधिक वाचकांपर्यंत पोहोचण्यासाठी पॉडकास्ट, ऑडिओ बुक अशा विविध माध्यमांचा उपयोग केला पाहिजे. संघर्षातूनच आयुष्य घडत असते. त्यामुळे आयुष्यात आलेल्या आव्हानांना आत्मविश्वासाने सामोरे जात प्रगतीच्या दिशेने जात राहावे. सुनील देशमुख यांनी असाच जिद्दीने केलेला हा प्रवास इतरांसाठी प्रेरक राहील, अशी खात्री वाटते.”

सुनील देशमुख यांनी पुस्तकाचा प्रवास उलगडून सांगितला. सिम्बायोसिस संस्थेचा माजी विद्यार्थी म्हणून मुजुमदार सरांकडून प्रेरणा घेतली. जिद्दीने काम करत राहिलो. आयुष्यात अनेक संघर्षाचे क्षण आले, पण त्यात खचून न जाता धैर्याने उभा राहिलो. या प्रवासात अनेकांनी चांगली साथ दिली. त्यामुळे हा प्रवास अधिक सुखद होत गेला, असे देशमुख यांनी नमूद केले. प्रियांका जोशी यांनी सूत्रसंचालन केले. माधुरी देशमुख यांनी आभार मानले.