पुणे : डॉ. पी. व्ही. कुलकर्णी यांनी अहमदाबाद येथील फिजिकल रिसर्च लॅबोरेटरी येथे भारतातील पहिल्या अवरक्त किरण खगोलशास्त्र या क्षेत्रात मोठे योगदान दिले आहे. माऊंटअबूवरील गुरूशिखरावर वेधशाळा बांधून टेलिस्कोपचीही निर्मिती केली आहे. डॉ. कुलकर्णी आपल्या कामाप्रति शिस्तप्रिय आणि जिद्दी शास्त्रज्ञ म्हणून प्रसिद्ध होते. त्यांच्या ‌‘ॲरो ऑफ (माय) टाईम‌’ या इंग्रजी आत्मचरित्राचा डॉ. संगीता गोडबोले यांनी केलेला भावानुवाद मनाची पकड घेणारा असून डॉ. कुलकर्णी यांचे व्यक्तिचित्रण आणि कार्य या पुस्तकातून आपल्या समोर येते, असे प्रतिपादन अहमदाबाद येथील स्पेस ॲप्लिकेशन सेंटर आणि तिरुवनंतपूरम येथील विक्रम साराभाई स्पेस सेंटरचे माजी संचालक पद्मश्री डॉ. प्रमोद काळे यांनी केले.

खगोलभौतिकशास्रज्ञ डॉ. पी. व्ही. कुलकर्णी लिखित ‌‘ॲरो ऑफ (माय) टाईम‌’ या मूळ इंग्रजी आत्मचरित्राचा ‌‘माझ्या काल-शराचा प्रवास‌’ या डॉ. संगीता गोडबोले यांनी भावानुवाद केलेल्या पुस्तकाचा प्रकाशन समारंभ आज (दि. 7) आयोजित करण्यात आला होता. पुस्तकाचे प्रकाशन पद्मश्री डॉ. काळे यांच्या हस्ते झाले. त्या वेळी ते बोलत होते. भांडारकर ओरिअन्टल रिसर्च इन्स्टिट्यूट, श्री नवलमल फिरोदिया ऑडिटोरिअम, लॉ कॉलेज रोड येथे कार्यक्रमाचे आयोजन करण्यात आले होते. ललिता कुलकर्णी, पी. आर. एल. अहमदाबाद मधील निवृत्त वैज्ञानिक डॉ. एन. एम. अशोक, आयुकातील डॉ. रंजन गुप्ता, ग्रंथालीचे सुदेश हिंगलासपूकर प्रमुख यांची प्रमुख उपस्थिती होती.
माऊंटअबू येथील टेलिस्कोपच्या बांधणीच्या काळात डॉ. पी. व्ही. कुलकर्णी यांच्याशी अनेकदा संवाद घडल्याचे डॉ. प्रमोद काळे यांनी सांगितले.
डॉ. संगीता गोडबोले पुस्तकाविषयी बोलताना म्हणाल्या, डॉ. पी. व्ही. कुलकर्णी यांचे इंग्रजीतील आत्मचरित्राचे हस्तलिखित माझ्या वाचनात आल्यानंतर एखाद्या व्यक्तीचा जीवनप्रवास कशापद्धतीने मार्गदर्शक ठरू शकतो याची जाणीव झाली. डॉ. कुलकर्णी यांच्यातील संशोधकवृत्ती, ध्येय साध्य करण्यासाठी घेतलेले कष्ट, अथक परिश्रम आणि ध्यास हे माझ्या मनाला भिडले. यातून पुढील पिढीला संशोधन क्षेत्रात येण्याची जिद्द निर्माण व्हावी या विचाराने या पुस्तकाचा मराठी भाषेत भावानुवाद केला आहे. या पुस्तकाच्या निर्मितीत अनेक दिग्गज शास्त्रज्ञ-संशोधकांची मोलाची मदत झाली आहे.
ललिता कुलकर्णी म्हणाल्या, हे पुस्तक एका असाधारण बुद्धिमान व्यक्तीचे आत्मचरित्र आहे. डॉ. पी. व्ही. कुलकर्णी यांच्या अष्टपैलू व्यक्तिमत्वाचे दर्शन या पुस्तकातून घडते. डॉ. संगीता गोडबोले यांनी स्वत:चा व्यवसाय, संसार, छंद सांभाळून अथक प्रयत्नातून उत्तम भावानुवाद केला आहे.
डॉ. एन. एम. अशोक म्हणाले, डॉ. पी. व्ही. कुलकर्णी हे माझे गुरू होते. नाईट एअर ग्लो या क्षेत्रातील संशोधनात त्यांचे योगदान मोठे आहे. एक गुरू म्हणून त्यांना आपल्या शिष्याने गुरूपेक्षाही मोठे व्हावे अशी इच्छा होती.
डॉ. रंजन गुप्ता म्हणाले, डॉ. पी. व्ही. कुलकर्णी यांनी आम्ही गुरूजी या नावे संबोधत असू. त्यांच्याकडून मला अनेक गोष्टी शिकायला मिळाल्या हा प्रवास आनंददायी होता. सुरेश हिंगलासपूरकर यांनी मनोगत व्यक्त केले.
डॉ. व्ही. बी. शेवरे (निवृत्त वैज्ञानिक, पी. आर. एल. अहमदाबाद), डॉ. सुरेश नाईक (निवृत्त गटसंचालक, इस्रो), अरविंद कोलगे (निवृत्त अभियंता, एएसएसी, अहमदाबाद) यांची विशेष उपस्थिती होती. सूत्रसंचालन डॉ. संयुक्ता कुलकर्णी यांनी केले तर आभार मधुवंती कुलकर्णी यांनी मानले.

पुणे : आदर्श आई हा पुरस्कार माझ्या एकटीचा नसून समस्त मातृवर्गाचा आहे. मुलगा-मुलगी असा भेद न करता मी मुलांना समान वागणूक दिली. त्यांच्याशी मैत्रीचे नाते जपले. स्त्रीचा सन्मान करावा, असे संस्कार प्रत्येक आईने मुलांवर केल्यास समाजातील अपप्रवृत्तींना आळा बसेल, असे विचार प्रसिद्ध लेखिका, कवयित्री ललिता श्रीपाल सबनीय यांनी व्यक्त केले.
रंगत-संगत प्रतिष्ठानतर्फे आदर्श आई पुरस्काराने आज (दि. 7) ललिता सबनीस यांचा गौरव करण्यात आला. सत्काराला उत्तर देताना त्या बोलत होत्या. पुरस्काराचे वितरण रंगत-संगत प्रतिष्ठानच्या कार्याध्यक्ष मैथिली आडकर यांच्या हस्ते झाले. पत्रकार भवन येथे आयोजित कार्यक्रमात रंगत-संगत प्रतिष्ठानचे अध्यक्ष ॲड. प्रमोद आडकर, अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांची प्रमुख उपस्थिती होती. सन्मानपत्र, शाल, श्रीफळ आणि भेटवस्तू असे पुरस्काराचे स्वरूप होते.
रंगत-संगत प्रतिष्ठानतर्फे ललिता सबनीस यांचा आदर्श आई पुरस्कार देऊन त्यांचा सन्मान करण्याची संधी मिळाल्याने पुरस्काराची उंची वाढली असल्याचे मैथिली आडकर यांनी सुरुवातीस सांगितले.
महात्मा फुले यांना पाहता आले नाही पण महात्मा फुले यांचे समग्र साहित्य वाचले आहे. श्रीपाल सबनीस हे आपल्या आयुष्यातील महात्मा फुले आहेत, असे आवर्जून नमूद करून ललिता सबनीस म्हणाल्या, आयुष्याच्या वाटचालीत पती श्रीपाल सबनीस तसेच सासूबाई यांनी कायम प्रोत्साहन दिले. त्यांच्या सहकार्यामुळेच यश कमावता आले.
पत्नीचा आदर्श आई पुरस्काराने गौरव केला जात असताना एका मंचावर बसता आले हा आनंदाचा क्षण आहे, असे सांगून डॉ. श्रीपाल सबनीस म्हणाले, प्रत्येक स्त्री कर्तव्याच्या जाणीवेने वाटचाल करीत असते. मातेला वंदन करणे हे प्रत्येकाचे कर्तव्य आहे. महिलांबाबत समाजात चुकीच्या घटना घडत असताना मातृसंस्कृती पराभूत झाली का याविषयी विचारमंथन व्हायला हवे. मुलगा चुकला म्हणून आईला दोष देण्यात अर्थ नाही.
सुरुवातीस ॲड. प्रमोद आडकर यांनी प्रास्ताविकात पुरस्कारामागील भूमिका स्पष्ट केली. परिचय आणि मानपत्राचे वाचन वैजयंती आपटे यांनी तर सूत्रसंचालन शिल्पा देशपांडे यांनी केले.
पुरस्कार वितरण सोहळ्यानिमित्त आई विषयावर आयोजित कविसंमेलनात भारती पांडे, प्रभा सोनवणे, वेदस्मृति कृती, मीना सातपुते, मीनाक्षी नवले, तनुजा चव्हाण, हेमंत केतकर, मिलिंद शेंडे, मिलिंद जोशी, सीताराम नरके, स्वप्नील पोरे, डॉ. ज्योती रहाळकर यांचा समावेश होता.

पुणे-पुन्हा वाघोली व लोणी काळभोर पोलीस स्टेशन हद्दीतील अवैध दारू भट्ट्यांवर कारवाई करून पोलिसांनी सुमारे दहा लाखाचे दारू चे साहित्य जप्त करून दोघांविरुद्ध गुन्हा दाखल केला आहे .

या संदर्भात पोलिसांनी सांगितले कि,’दि.०६/०३/२०२५ रोजी युनिट ६ कडील प्रभारी पोलीस निरीक्षक श्री. वाहिद पठाण व पथक असे युनिट हद्दीत अवैध धंद्यांच्या अनुषंगाने पेट्रोलिंग करत असताना लोणी काळभोर पोलीस स्टेशन हद्दीत रामदरा डोगराचे पायथ्याशी मुकेश करमावत, वय ५० वर्षे, रा. गणेशनगर, नवरत्न गोडवून जवळ, मंतरवाडी, फुरसुंगी, पुणे हा हातभट्टीची गावठी दारू तयार करीत असल्याबाबत माहिती मिळाल्याने सदर माहितीच्या अनुषंगाने छापा कारवाई केली असता एकुण रु. ८,३५,०००/- रू कि.चा मुद्देमाल मिळुन आला त्यामध्ये गावठी हातभट्टीची सुमारे ७५० लिटर तयार दारु १५,००० लीटर कच्चे रसायण व इतर साहित्य असा मुद्देमाल मिळुन आल्याने मुकेश करमावत याचे विरुद्ध लोणी काळभोर पो.स्टे येथे गु.र.नं.१२०/२०२५ महाराष्ट्र प्रोव्हिबिशन अॅक्ट कलम ६५ (ई) (फ) (ब) (क) अन्वये गुन्हा दाखल करून पुढील तपास लोणी काळभोर पो.स्टे. यांचे कडुन करण्यात येत आहे.
तसेच दि.०५/०३/२०२५ रोजी युनिट ६ कडील पथक युनिट हद्दीत अवैध धंद्यांच्या अनुषंगाणे पेट्रोलिंग करत असताना बोरकर वस्ती भावडी, वाघोली पुणे येथील मोकळ्या जागेत महिला नामे रीना पवन राजपूत ही हातभट्टीची गावठी दारू तयार करीत असल्याबाबत माहिती मिळाल्याने सदर माहितीच्या अनुषंगाने छापा कारवाई केली असता एकूण १,५७,०००/- रू कि.चा मुद्देमाल त्यामध्ये ७० लिटर गावठी हातभट्टीची तयार दारू, ४००० लिटर कच्चे रसायण व इतर साहित्य असा मुद्देमाल मिळुन आल्याने महिला नामे रीना पवन राजपूत हिचे विरुद्ध वाघोली पोलीस स्टेशन येथे महाराष्ट्र प्रोव्हिबिशन अॅक्ट कलम ६५ (ई) (फ) (ब) (क) अन्वये गुन्हा दाखल करून पुढील तपास वाघोली पो.स्टे. यांचे कडुन करण्यात येत आहे.
सदरची कामगिरी अप्पर पोलीस आयुक्त गुन्हे शैलेश बलकवडे, पोलीस उप आयुक्त (गुन्हे) श्री निखिल पिंगळे, सहा. पोलीस आयुक्त गुन्हे २ श्री राजेंद्र मुळीक यांचे मार्गदर्शनाखाली गुन्हे शाखा, युनिट ६ चे पोलीस निरीक्षक वाहिद पठाण, सहा. पोलीस निरीक्षक मदन कांबळे, पोलीस उप निरीक्षक रामकृष्ण दळवी, पोलीस अंमलदार बाळासाहेब सकटे, रमेश मेमाणे, नितीन मुंढे, कानिफनाथ कारखेले, ऋषीकेश ताकवणे, सचिन पवार, ऋषीकेश व्यवहारे, शेखर काटे, गणेश डोंगरे, समीर पिलाने, नितीन धाडगे, बाळासाहेब तनपुरे, सुहास तांबेकर, महिला पोलीस अंमलदार प्रतिक्षा पानसरे, किर्ती मांदळे यांनी केली आहे.

पुणे- बाणेर आणि बालेवाडीतील पदपथ अतिक्रमण मुक्त करून पादचाऱ्यांना सुरळीत पणे चालू द्या अशी मागणी आज येथे माजी नगरसेवक अमोल बालवडकर यांनी केली .

ते म्हणाले,’ आज बाणेर-बालेवाडी परिसरातील पदपथांवर वाढत चालेले अतिक्रमण व त्यामुळे नागरीकांना होणारा त्रास लक्षात घेवुन औंध-बाणेर वॅार्ड ॲाफिसचे क्षेत्रिय अधिकारी श्री.गिरीष दापकेकर यांना प्रत्यक्ष भेटुन बाणेर-बालेवाडी अतिक्रमण मुक्त पदपथ करण्यासंदर्भात निवेदन दिले. यावेळी बाणेर-बालेवाडी परिसरातील सर्व पदपथांवर अतिक्रमण करणारे पथारीवाले, छोटे व्यावसायिक, खाद्य विक्रेते व टॅम्पोस्टॅाल, भाजीवाले यांच्यावर तातडीने कारवाई करुन हे सर्व पदपथ अतिक्रमण मुक्त करण्याची मागणी केली.
यावेळी हे अतिक्रमण हटविण्यासाठी तातडीने “विशेष भरारी पथकाद्वारे” कारवाईला सुरुवात करुन सर्व अनधिकृत पथारीवाले, खाद्य विक्रेते व टेम्पो स्टॅाल, भाजीवाले यांच्यावर कारवाई करण्याचे आश्वासन क्षेत्रीय अधिकारी श्री.दापकेकर यांनी दिले. पुढील एक आठवडा भरारी पथकाच्या सहाय्याने हि कारवाई सातत्याने बाणेर-बालेवाडी परिसरात करण्यात येईल असे देखिल त्यांनी सांगितले.

पुणे: शैक्षणिक व संशोधन क्षेत्रामधील उल्लेखनीय कामगिरीबद्दल कर्वे समाज सेवा संस्थेच्या सेंटर फॉर मेंटल हेल्थ अँड डीसएबिलीटीज चे अध्यक्ष सहा प्राध्यापक चेतन दिवाण यांचा राज्याचे माजी मंत्री श्री बबनरावजी पाचपुते यांच्या हस्ते तसेच सनराईज ग्रुप ऑफ इन्स्टिट्यूट चे संस्थापक अध्यक्ष सतीश शिंदे तसेच सनराईज प्रशालेच्या मुख्याध्यापिका सौ राजश्री शिंदे यांच्या प्रमुख उपस्थितीत यावर्षीचा शैक्षणिक योगदानाबद्दल सनराईज शैक्षणिक पुरस्कार प्रदान करून गौरव करण्यात आला.

यावेळी सनराइज् ग्रुप ऑफ इन्स्टिट्यूट च्या वतीने माजी मंत्री बबनरावजी पाचपुते यांना जीवनगौरव, सावित्रीबाई फुले पुणे विद्यापीठाच्या मराठी विभागाचे प्रमुख प्राध्यापक संदीप सांगळे यांना शैक्षणिक, ग्रामीण विकास केंद्र जामखेड चे ॲड डॉ अरुण जाधव यांना सामाजिक, नाशिकचे अप्पर जिल्हाधिकारी अरुण आनंदकर यांना प्रशासकीय सेवा, आमदार संग्राम जगताप यांचे बंधू तथा जिल्हा परिषद सदस्य सचिन भाऊ जगताप यांना कृषी, रुक्मिणी सहकारी बँक श्रीगोंदा चे चेअरमन सीए वसंतराव गुंड यांना बँकिंग, सुरज इंजीनियरिंग चे नानासाहेब शिंदे यांना उद्योजकता तसेच दैनिक प्रभात श्रीगोंदा चे तालुका प्रतिनिधी योगेश चंदन यांना पत्रकारिता या क्षेत्रातील कार्याबद्दल सनराईज पुरस्कार प्रदान करून सन्मानित करण्यात आले.सहा. प्रा चेतन दिवाण यांच्या या पुरस्काराबद्दल कर्वे समाज सेवा संस्थेच्या वतीने संस्थेच्या विश्वस्त मंडळाचे अध्यक्ष श्री मधुकर पाठक, व्यवस्थापन समितीचे अध्यक्ष विनायक करळे, संचालक डॉ महेश ठाकूर, विविध क्षेत्रातील मान्यवर, शिक्षक, शिक्षकेतर कर्मचारी वर्ग विद्यार्थ्यांच्या वतीने अभिनंदन करण्यात आले आहेश्रीगोंदा येथे पार पडलेल्या या सोहळ्यासाठी विविध क्षेत्रातील मान्यवर, शिक्षक , पालक तसेच विद्यार्थी मोठ्या संख्येने उपस्थित होते

खंडित केलेल्या वीजजोडण्यांची स्वतंत्र पथकांद्वारे तपासणी सुरु–

पुणे, दि. ७ मार्च २०२५: महावितरणच्या महसूलाचा आर्थिक स्त्रोत प्रामुख्याने वीजबिलांची वसूली हाच आहे. मात्र वारंवार आवाहन करून देखील वीजबिलांच्या थकबाकीचा भरणा होत नसल्याने पुणे प्रादेशिक विभागातील पाच जिल्ह्यांमध्ये घरगुती, व्यावसायिक व औद्योगिक ग्राहकांकडे ३१० कोटी ८४ लाख रुपयांची थकबाकी आहे. आर्थिक अडचणीत असलेल्या महावितरणकडून घरगुती, वाणिज्यिक व औद्योगिक थकबाकीदारांचा वीजपुरवठा खंडित करण्याची कटू कारवाई सुरू असून गेल्या ३५ दिवसांच्या कालावधीत ५१ हजार ७३५ थकबाकीदारांचा वीजपुरवठा खंडित करण्यात आला.

यासोबतच थकबाकीमुळे वीजपुरवठा खंडित केलेल्या वीजजोडण्यांच्या तपासणीचे काम स्वतंत्र पथकांद्वारे सुरु आहे. यामध्ये शेजाऱ्यांकडून किंवा इतर ठिकाणाहून थकबाकीदार विजेचा वापर करीत असल्याचे आढळल्यास शेजारी व संबंधित थकबाकीदारांविरुद्ध भारतीय विद्युत कायदा २००३ च्या कलम १३५/१३८ नुसार कारवाई करण्यात येत आहे.

थकीत वीजबिलांपोटी वीजपुरवठा खंडित करणे व खंडित केलेल्या वीजजोडण्यांची तपासणी करण्यासाठी महावितरणचे सर्व अभियंता, अधिकारी, कर्मचारी सध्या ‘ऑन फिल्ड’ आहेत. पुणे प्रादेशिक संचालक श्री. भुजंग खंदारे, मुख्य अभियंते सर्वश्री राजेंद्र पवार (पुणे), स्वप्निल काटकर (कोल्हापूर) व धर्मराज पेठकर (बारामती) उपविभाग व शाखा कार्यालयांना भेटी देऊन थकबाकी वसूलीचा आढावा घेत आहेत. वीजबिल थकीत असेल तर नियमानुसार वीजपुरवठा खंडित करण्याची कारवाई सुरु आहे. त्यामुळे थकबाकी तसेच चालू वीजबिलांचा भरणा करून सहकार्य करावे असे आवाहन महावितरणकडून करण्यात आले आहे.

पुणे प्रादेशिक विभागात घरगुती, वाणिज्यिक व औद्योगिक ग्राहकांकडे सद्यस्थितीत पुणे जिल्हा- १९९ कोटी ९९ लाख रुपये, सातारा- २० कोटी ४० लाख रुपये, सोलापूर- ४४ कोटी ७ लाख रुपये, कोल्हापूर- २० कोटी ८० लाख रुपये आणि सांगली जिल्ह्यात २४ कोटी ९५ लाख रुपयांची थकबाकी आहे. वीजबिलांच्या थकबाकीमुळे गेल्या ३५ दिवसांमध्ये घरगुती, वाणिज्यिक व औद्योगिक वर्गवारीतील ५१ हजार ७३५ थकबाकीदारांचा वीजपुरवठा खंडित करण्यात आला आहे. यामध्ये पुणे जिल्हा- ४२ हजार ७३, सातारा- १९२०, सोलापूर- ४२७९, कोल्हापूर- १४९० आणि सांगली जिल्ह्यातील १९७३ थकबाकीदारांचा समावेश आहे.

वीजग्राहकांना केव्हाही व कुठूनही ऑनलाइनद्वारे थकीत व चालू वीजबिल भरण्याची सोय www.mahadiscom.in या वेबसाईटवर तसेच महावितरणच्या मोबाईल अॅपद्वारे उपलब्ध आहे. सोबतच ५ हजार रुपयांपेक्षा अधिक बिल असणाऱ्या सर्व लघुदाब ग्राहकांना आरटीजीएस किंवा एनईएफटीद्वारे वीजबिल भरण्याची सुविधा देखील उपलब्ध आहे.