वाहतूक सुरळीत करण्यासाठी शासकीय यंत्रणेची संयुक्तपणे व‍िशेष मोहीम

पुणे : शहराभोवती असणाऱ्या राष्ट्रीय व राज्यमार्गावर अनधिकृतपणे उभारलेल्या बांधकामांमुळे वाहनधारकांना सातत्याने वाहतूक कोंडीचा त्रास सहन करावा लागत आहे. पीएमआरडीएचे महानगर आयुक्त डॉ. योगेश म्हसे यांनी याची दखल घेत इतर शासकीय यंत्रणांच्या मदतीने गत काही द‍िवसात तीन टप्यात राबवलेल्या व‍िशेष मोह‍िमेत साडेतीन हजार अनधिकृत बांधकामांवर कारवाईचा बडगा उगारण्यात आला आहे.

वाहतूक कोंडीचा प्रश्न न‍िकाली काढण्यासाठी पीएमआरडीएसह राष्ट्रीय महामार्ग, सार्वजनिक बांधकाम विभाग, पीएमसी, पीसीएमसी यांनी अनधिकृत बांधकामांवर कारवाईसाठी संयुक्तरित्या विशेष मोहीम हाती घेतली आहे. यात पह‍िल्या टप्यात नगर वाघोली रोडवर २९ जानेवारी ते १३ फेब्रुवारी २०२५ दरम्यान राबवलेल्या ८२२ कारवाई ८२ हजार २०० चौरस फुटावरील अनधिकृत बांधकामांचे न‍िष्कासन करण्यात आले. दुसऱ्या टप्यात पुणे नाशिक रोड, पुणे सोलापूर रस्ता आण‍ि चांदणी चौक पौड रस्त्यादरम्यानची अनधिकृत बांधकामे पाडण्यात आली. ३ ते १३ मार्चदरम्यान राबवलेल्या या कारवाईत २ हजार ४७८ कारवाई करत २ लाख ४७ हजार ८०० चौरस फुटावरील अनधिकृत बांधकामांवर हातोडा पडला.

पीएमआरडीएकडून त‍िसऱ्या टप्याच्या मोह‍िमेची आखणी करण्यात आली असून त्याची सुरुवात १७ मार्चपासून करत ती ३० मार्चपर्यंत चालणार आहे. यात १७ आण‍ि १८ मार्च रोजी हडपसर ते द‍िवे घाट आण‍ि पुणे – सातारा रोड २१० अनधिकृत बांधकामे काढण्यात आल्याने ३४ हजार ५०० चौरस फुटांपर्यंतचा रस्ता मोकळा झाला. साधारण गत दोन मह‍िण्यात तीन टप्यात राबवलेल्या अनधिकृत बांधकामांविरुद्धच्या मोह‍िमेत एकूण ३ हजार ५१० अनधिकृत बांधकामे पाडण्यात आल्याने ३ लाख ४७ हजार ३०० चौरस फुटावरील अतिक्रमण काढण्यात आले आहे.

तीन टप्यात व‍िशेष मोहीम
१ ) पह‍िल्या टप्यात नगर वाघोली रोडवर केलेल्या ८२२ कारवाई ८२ हजार २०० चौरस फुटावरील अनधिकृत बांधकामांचे न‍िष्कासन
२ ) दुसऱ्या टप्यात पुणे नाशिक रोड, पुणे सोलापूर रस्ता आण‍ि चांदणी चौक पौड रस्त्यावर २ हजार ४७८ कारवाईत २४७८०० चौरस फुटावरील अनधिकृत बांधकामांवर हातोडा
३ ) त‍िसऱ्या टप्यात हडपसर ते द‍िवे घाट, पुणे – सातारा रोड एकूण २१० अनधिकृत बांधकामे काढल्याने ३४५०० चौरस फुटांपर्यंतचा रस्ता मोकळा झाला

पुणे- येथील नामांकित कंपनीला गंडा घालण्याच्या उद्देशाने फसवणुक केलेली रक्कम ४०,९०,६०५/-रूपये सायबर पोलीसांच्या सतर्कतेने कंपनीस परत मिळवुन देण्यात यश आले आहे.

या संदर्भात पोलिसांनी सांगितले कि,’सायबर पोलीस स्टेशन, पुणे शहर कडील तक्रार अर्ज क्रमांक १७९/२०२५ यामध्ये “नामांकीत कंपनीच्या अकाऊंट यांना सायबर गुन्हेगाराने अनोळखी मोबाईल क्रमांकावरून व्हॉटसअॅप मेसेज करून सदर कंपनीचे एम.डी. असल्याचे भासवुन ते एका मीटींग मध्ये असल्याचे व हा माझा पर्सनल मोबाईल क्रमांक असल्याचे सांगुन दुस-या कंपनीचे पेमेंट तात्काळ करावयाचे आहे असे बतावणी करून कंपनीचे बैंक खात्यामधुन त्यांनी व्हॉटसअॅप मेसेज द्वारे पाठविलेल्या बैंक खात्यामध्ये रक्कम ४०,९०,६०५/-रूपये पाठविण्यास सांगुन आर्थिक फसवणुक केली आहे.” म्हणुन तक्रार नोंद आहे.
पोलीस आयुक्त अमितेश कुमार यांनी सायबर गुन्हेगारीवर आळा घालण्यासाठी दिलेल्या मार्गदर्शक सुचनांचे पालन करून सदर तक्रारीची गंभीर दखल घेऊन परराज्यातील बँक खात्याबाबत पत्रव्यवहार करून तसेच सदरचे बँक खाते हे परराज्यातील असल्याने तेथील नोडल अधिकारी यांचे संपर्क साधुन वेळोवेळी पाठपुरावा करून त्यांचे मदतीने फसवणुक झालेली रक्कम गोठविण्यात येवुन ती तक्रारदार यांना परत मिळवुन देण्यात सायबर पोलीस स्टेशन पुणे शहर यांना यश आले आहे.
सदरची कामगिरी ही पोलीस उपआयुक्त विवेक मासाळ , सहाय्यक पोलीस आयुक्त मच्छिंद्र खाडे,वरीष्ठ पोलीस निरीक्षक स्वप्नाली शिंदे , यांचे मार्गदर्शनाखाली पोलीस उपनिरीक्षक तथा तपासी अधिकारी तुषार भोसले व पोलीस अंमलदार नवनाथ कोडे, किरण जमदाडे, अश्विनी भोसले, ज्योती दिवाणे, माधुरी कराळे व सोनाली चव्हाण यांचे पथकाने केलेली आहे.
अशा प्रकारची सायबर फसवणुक टाळण्यासाठी काय काळजी घ्यावी –
१. अनोळखी मोबाईल क्रमांकावरून मेसेज करून तुमचा बॉस किंवा जवळची व्यक्ती असल्याचे भासवुन पैशाची मागणी केल्यास, त्या व्यक्तीशी संपर्क साधल्याशिवाय पैसे पाठवु नये.
२. अनोळखी मोबाईल क्रमांकावरून कॉल करून तुमच्या जवळच्या व्यक्तीचा आवाज काढुन पैशाची मागणी केल्यास, त्या व्यक्तीशी संपर्क साधल्याशिवाय पैसे पाठवु नये.
(स्वप्नाली शिंदे) वरीष्ठ पोलीस निरीक्षक सायबर पोलीस स्टेशन, पुणे शहर

पुणे- महिला कारागृह पोलीस भरतीदरम्यान गोंधळ उडाला आहे. यावेळी लोखंडी गेटचा दरवाजा मोडून मुली आत घुसल्या. या गोंधळात अनेक मुली जखमी झाल्याची माहिती आहे.त्यांच्या पायाला दुखापत झाल्याचं सांगण्यात येत आहेत. या भरती प्रक्रियेची तयारी व्यवस्थित नसल्याने हा गोंधळ उडाल्याचं दिसून आलं आहे.दरम्यान दीड महिन्यांपासून म्हणजेच 29 जानेवारीपासून पोलिस भरती प्रक्रिया राबवली जात आहे. सुरुवातीला 500-1000 उमेदवारांना बोलावले होते. त्यानंतर 1500 उमेदवारांना बोलावण्यात आले. आता 1500 विद्यार्थ्यांची शारीरिक चाचणी सुरू आहे. अत्यंत शांतपणे येथे प्रक्रिया सुरू आहे. आजपासून महिला उमेदवारांची भरती प्रक्रिया सुरू झाली आहे. त्यांच्याबरोबर त्यांचे पालक आले होते. त्यामुळे साडेचार वाजता गर्दी जमली होती. पण चेंगराचेंगरी झालेली नाही. साडेचार वाजता उमेदवारांना आत घेण्यात आले आणि शिस्तीत भरती प्रक्रिया सुरू झाली, अशी माहिती पोलिस उपायुक्त संदीप भाजीभाकरे यांनी दिली.

आजपासून पुण्यात महिला कारागृह पोलीस भरती सुरू झाली आहे. त्यासाठी अनेक तरूणी पुण्यात दाखल झाल्या आहेत. ५३१ कारागृह महिला पोलीस जागांसाठी ही भरती प्रक्रिया पार पडते आहे. मात्र यासाठी तीन हजारांपेक्षा जास्त मुलींनी गर्दी केली. मात्र, यावेळी अकार्यक्षम व्यवस्थापनामुळे गोंधळ उडाला.पोलीस प्रशासनाकडून भरतीसाठी आलेल्या मुलींच्या रांगेतील नियोजनात गोंधळ उडाला. गेटवर झालेल्या गर्दीमुळे लोखंडी गेट तुटून पडले आणि त्यावरून मुली आतमध्ये पळत सुटल्या. यावेळी चेंगराचेंगरी झाली. त्यामुळे अनेक मुलींच्या पायाला गंभीर दुखापती झाली.

या घटनेनंतर मुलींच्या पालकांकडून संतप्त प्रतिक्रिया आल्या आहेत. शिवाजी नगर पोलीस मुख्यालयात जो प्रकार घडला यावर पालकांमध्ये मोठी नाराजी व्यक्त केली आहे. यावेळी या पालकांची काही स्थानिक पोलिसांशी बाचाबाचीदेखील झाली.दरम्यान, ही भरती प्रक्रिया २०२२-२३ पासून रखडलेली आहे. ५१३ जागेसाठी ही रखडलेली भरती प्रक्रिया आता कुठे पार पडते आहे. असं असताना नियोजन नसल्याने या भरती प्रक्रियेला गालबोट लागल्याचं दिसून आलं आहे. या पोलिसांच्या अकार्यक्षम व्यवस्थापनामुळे मैदानी चाचणीमध्ये आपली मेहनत तर व्यर्थ जाणार नाही ना अशी भावना विद्यार्थी आणि पालकांमध्ये दिसत आहे.

भालचंद्र पाठक कुटुंबियांकडून मदतीच्या वारशाची जपणूक : आर. एच. मोहम्मद
कार्यक्रमातून साधली राष्ट्रीय एकात्मता : आर. एच. मोहम्मद

पुणे : देशातील नामवंत संशोधकांपैकी भालचंद्र मोहनीराज पाठक हे एक होते. त्यांनी तत्त्वांशी कधीही तडजोड केली नाही. त्यांचे बोलणे रोखठोक असायचे. ते कष्टकऱ्यांसाठी धावून जात असत. सामाजिक शिकवणुकीचा वारसा जपत पाठक कुटुंबियांनी मदतीचे कार्य सुरू ठेवले आहे.बाबां चे संपूर्ण आयुष्यच समाजा करीता आदर्श आहे.असे गौरवोद्गार माजी प्रमुख जिल्हा व सत्र न्यायाधीश, आणी आत्ताचे महाराष्ट्र विक्रीकर न्यायाधीकरणाचे न्यायिक सदस्य आर. एच. मोहम्मद यांनी काढले. समाजा-समाजात जातीच्या भिंती उभ्या राहात असताना या कार्यक्रमाच्या माध्यमातून राष्ट्रीय एकात्मता साधली असल्याचेही त्यांनी आवर्जून नमूद केले.
भारतीय कला प्रसारिणी सभेचे दिवंगत सचिव तथा देशातील नामवंत संशोधक भालचंद्र मोहिनीराज पाठक यांच्या सातव्या स्मृतीदिनानिमित्त आज (दि.19) गरजू व अनाथ विद्यार्थ्यांना शैक्षणिक साहित्य व धान्य तसेच आवश्यक वस्तूंचे वाटप मोहम्मद यांच्या अध्यक्षतेखाली आयोजित कार्यक्रमात करण्यात आले. त्या वेळी ते बोलत होते. हिंदूहृदय सम्राट बाळासाहेब ठाकरे कलादालनात या कार्यक्रमाचे आयोजन करण्यात आले होते. जांभूळवाडीतील मतिमंद विद्यालयातील विद्यार्थ्यांना ही मदत देण्यात आली. भारतीय कला प्रसारिणी सभेचे सचिव पुष्कराज भालचंद्र पाठक, प्राचार्य डॉ. अभिजित नातू, प्राचार्य संजय भारती मंचावर होते.
प्रास्ताविकात सचिव पुष्कराज पाठक म्हणाले, संशोधक वृत्तीचे असलेले भालचंद्र पाठक अन्यायाविरुद्ध पेटून उठत असत. निष्काम कर्मयोग या भावनेतून ते कष्टकऱ्यांमध्ये रमले. सढळ हाताने आणि निरपेक्ष भावनेने ते मदतीचा हात पुढे करीत. त्यांचा जीवनप्रवास हाच आमच्यासाठी उपदेशाप्रत आहे. त्यांनी घालून दिलेल्या आदर्शावर आमची वाटचाल सुरू आहे. कलेच्या माध्यमातून भालचंद्र पाठक आणि शिवसेनाप्रमुख बाळासाहेब ठाकरे यांच्या स्नेहाचाही उलगडा त्यांनी केला.
भालचंद्र पाठक आणि त्यांच्या परिवाराशी असलेला स्नेहभाव उलगडून आर. एच. माहेम्मद म्हणाले, भालचंद्र पाठक यांनी अनेक संकटांचा सामना करत वाटचाल केली. पाठक कुटुंबियांनीही अनेक समस्या पार करत वाटचाल सुरू ठेवली आहे. ज्यांच्यात धैर्य असते अशांचीच परिक्षा परमेश्वर पाहात असतो. पाठक कुटुंबिय तत्त्वांशी तडजोड न करता वाटचाल करीत आहेत, ही गौरवाची गोष्ट आहे.
मान्यवरांचे स्वागत पुष्कराज पाठक यांनी केले. सूत्रसंचालन शिल्पा देशपांडे यांनी केले तर आभार प्राचार्य अभिजित नातू यांनी मानले.
.

कलासक्त कल्चरल फाऊंडेशन आयोजित कार्यक्रमास रसिकांची मनमुराद दाद

पुणे : ‌‘संगीतकाराच्या वेशातला गोष्टाड्या‌’ असे अभिरूप धारण करून कौशल इनामदार यांनी आपल्या सांगितीक जीवनाचा पट उलगडला. काही अनुभव, काही मिश्किल टिप्पणी तर विविध गीते सादर करून त्यांनी कार्यक्रमात रंगत आणली. मी संगीतकार कसा झालो येथपासून, बालगंधर्व चित्रपटातील गीते तसेच मराठी अभिमान गीताच्या निर्मितीमागील कथाही त्यांनी रसिकांसमोर मांडली.
निमित्त होते कलासक्त कल्चरल फाऊंडेशनतर्फे आयोजित गप्पा, गोष्टी आणि गाण्यांवर आधारित ‌‘इनामदारी‌’ या कार्यक्रमाचे. एस. एम. जोशी सभागृहात रंगलेला हा कार्यक्रम रसिकांची मनमुराद दाद मिळवत गेला. सुप्रसिद्ध संगीतकार कौशल इनामदार यांच्यासह चैतन्य गाडगीळ, अमेय ठाकुरदेसाई, सोमेश नार्वेकर यांचा या कार्यक्रमात सहभाग होता.
गोष्टीवेल्हाळता ही आपल्या देशाची ओळख असून या अद्भूत कथारम्य आवडीसह भारतीयांचा दुसरा छंद म्हणजे गाणे गुणगुणणे असे सांगून कौशल इनामदार म्हणाले, माझे आजोबा उत्तम व्हायोलिन वादक होते. ते या परदेशी वाद्यावर अभिजात शास्त्रीय संगीताचे सूर आळवित असत. आजोळी गेलेलो असताना रात्री त्यांच्या स्वरांच्या हिंदोळ्यावरच झोपेच्या आधीन होत असे आणि जागे होत असतानाही त्यांच्याच सूरांची साथ लाभत असे. यातूनच माझ्यामध्ये संगीताची विषेश रूची निर्माण झाली.
युवावस्थेत मी गझलांच्या माहोलात वावरत असे. यातूनच छंदबद्ध लिखाणाचा प्रयत्नही केला आणि गीतकार होण्याची उर्मीही बाळगली.
स्वाभाविक चाल बनविणे म्हणजेच शब्दांचा आणि चालीचा जन्म एकाचवेळी झाला असावा अशी संगीत रचना करण्याकडे माझा कल होता. अशा गप्पांच्या मुशाफिरीत रसिकांना गुंगवून टाकतानाच कौशल यांनी ‌‘दया घना रे दया घना रे‌’, ‌‘घन आभाळीचा तडकावा‌’ तसेच गझलकार सुरेश भट, अरुण म्हेत्रे, अशोक बागवे आणि नलेश पाटील यांच्या गझला सादर करून मैफलीत रंग भरले.
संगीत सुचताना बारा स्वरांच्या मुशाफिरीतूचन निर्मिती होते असे सांगून इनामदार पुढे म्हणाले, संगीत रचना करताना साधर्म्य आणि सांगीतिक चोरी यामधील पुसटश्या रेषेचे भान असणे आवश्यक आहे. गायक, कवीला जसा रियाजाला किंवा विचारांला वेळ मिळू शकतो तसा संगीतकाराच्या रियाजाला वेळ उपलब्ध नसतो, असे सांगून एकाच गझलेला दोन वेगळ्या संदर्भांनी वेगवेगळी चाल कशी लावली याचेही सादरीकरण कौशल इनामदार आणि सोमेश नार्वेकर यांनी केले.
बालगंधर्व चित्रपटाच्या संगीत निर्मितीप्रसंगी ‌‘परवर दिगार‌’ या कव्वालीची निर्मिती का कराविशी वाटली आणि कशी केली हेही त्यांनी मनमोकळेपणाने रसिकांना सांगितले.
मराठी अभिमान गीताच्या निर्मितीमागील कथा उलगडताना मराठी भाषिकांना मातृभाषेचा जाज्वल्य अभिमान पाहिजे, असे सांगून विविध प्रसंगांच्या रसभरीत वर्णनांनी प्रेक्षकांना भावविभोर केले.
प्रास्ताविकात संस्थेचे अध्यक्ष श्रीरंग कुलकर्णी यांनी संस्थेच्या कार्याविषयी माहिती सांगितली. कलाकारांचा सत्कार श्रीरंग कुलकर्णी, विनिता आपटे, माधुरी वैद्य यांच्या हस्ते करण्यात आला.

दुर्घटनेची सखोल चौकशी करण्याची आमदार हेमंत रासने यांची विधानसभा सभागृहात मागणी

पुणे/मुंबई- (दि १९): आज सकाळी हिंजवडी फेज १ येथे मिनी बसला भीषण आग लागल्याची दुर्घटना घडली, यामध्ये प्रवास करणाऱ्या व्योमा ग्राफिक्स कंपनीतील चार जणांचा होरपळून मृत्यू झाला. या दुर्घटनेची तातडीने सखोल चौकशी करण्यात यावी, तसेच संबंधित कंपनीमार्फत मृतांच्या कुटुंबीयांना योग्य ती आर्थिक करण्यासाठी शासनाने निर्देश द्यावेत, अशी मागणी आमदार हेमंत रासने यांनी विधानसभा सभागृहात केली. शासनाने संबंधित कंपनीवर जबाबदारी निश्चित करावी आणि कुटुंबीयांना न्याय द्यावा, असे आवाहन त्यांनी यावेळी केले.

भविष्यात अशा दुर्घटना होऊ नयेत म्हणून प्रशासनाने सार्वजनिक आणि खासगी वाहतूक व्यवस्थेच्या सुरक्षिततेसंदर्भात आवश्यक उपाययोजना कराव्यात, अशा दुर्घटना टाळण्यासाठी ठोस पावले उचलावीत तसेच आग लागलेल्या संबंधित वाहनाची देखभाल आणि सुरक्षा तपासणी झाली होती का, याचाही सखोल तपास करण्यात यावा, अशी मागणी देखील यावेळी हेमंत रासने यांनी केली आहे.

हिंजवडी फेज वनमध्ये चालकाच्या पायाखाली अचानक आग लागली. त्यावेळी चालक आणि पुढचे कर्मचारी तातडीनं खाली उतरले. मात्र, मागचे दार न उघडल्यानं चौघांचा होरपळून मृत्यू झाल्याची घटना घडली. व्योमा ग्राफिक्स कंपनीचे एकूण 12 कर्मचारी या टेम्पोमध्ये प्रवास करत होते.

अध्यक्षा ॲड. सुशिबेन शाह यांनी घेतली गंभीर प्रकरणांची दखल

पुणे -महाराष्ट्र राज्य बाल हक्क संरक्षण आयोगाच्या वतीने पुणे जिल्ह्यातील विविध बालहक्क प्रकरणांवर दिनांक १७ व १८ मार्च रोजी जिल्हाधिकारी कार्यालय, पुणे येथे दोन दिवसीय सुनावणी पार पडली. या सुनावणी दरम्यान बालकांच्या शिक्षण हक्कांशी संबंधित प्रकरणे, मूलभूत हक्कांचे उल्लंघन, तसेच विविध कायद्यांतर्गत प्राप्त तक्रारींवर सखोल चर्चा करण्यात आली.

या सुनावणीत एकूण ६० प्रकरणांची सुनावणी घेण्यात आली. त्यामध्ये बालकांचा मोफत व सक्तीचा शिक्षण अधिनियम, २००९ अंतर्गत प्राप्त तक्रारी, POCSO अधिनियम अंतर्गत लैंगिक शोषणासंदर्भातील प्रकरणे, JJ Act (जुवेनाईल जस्टिस कायदा) अंतर्गत प्रकरणे आणि बाल हक्क उल्लंघनासंदर्भातील विविध तक्रारींचा समावेश होता.

सुनावणीदरम्यान विविध शासकीय यंत्रणांचे प्रतिनिधी उपस्थित होते. बालकल्याण समिती, पुणेचे अध्यक्ष आणि सदस्य, जिल्हा महिला आणि बालविकास अधिकारी, पोलीस विभागाचे वरिष्ठ अधिकारी, प्राथमिक शिक्षणाधिकारी (पुणे महानगरपालिका), पिंपरी-चिंचवड महानगरपालिका शिक्षण विभागाचे अधिकारी तसेच शिक्षण संचलनालयातील अधिकारी व कर्मचारी या सुनावणीत सहभागी झाले.

या सुनावणीत शिक्षण विभागाशी संबंधित तक्रारींच्या अनुषंगाने काही शाळांनी शिक्षण विभागाशी संबंधित तक्रारींच्या अनुषंगाने काही शाळांनी सुनावणी दरम्यान आयोगाने दखल दिल्यामुळे पालक व शाळा यांच्यामध्ये सामंजस्याने पालकांना त्यांच्या पाल्याची शाळा सोडल्याचे दाखले दिल्या बाबतचा अहवाल सादर केला. तसेच पोलीस विभागाशी संबंधित प्रकरणांमध्ये झालेल्या कार्यवाहीचा अहवाल आयोगासमोर सादर करण्यात आला.

मुलांच्या शिक्षणाच्या हक्कांचे उल्लंघन करणाऱ्या शाळांवर योग्य ती कारवाई करण्याचे निर्देश आयोगाने दिले आहेत. तसेच, POCSO आणि JJ Act अंतर्गत प्रकरणांमध्ये कठोर कायदेशीर पावले उचलण्याचे आदेश देण्यात आले. बालकांचे हक्क संरक्षित राहावे आणि त्यांना न्याय मिळावा, यासाठी महाराष्ट्र राज्य बाल हक्क संरक्षण आयोग कटिबद्ध आहे, असे यावेळी आयोगाच्या अध्यक्षा ॲड. सुशिबेन शाह यांनी सांगितले.

सदर सुनावणीस आयोगाचे सदस्य संजय सेंगर, जयश्री पालवे, चैतन्य पुरंदरे, सायली पालखेडकर, प्रज्ञा खोसरे देखील उपस्थित होते.