मुंबई-शिवसेना उद्धव बाळासाहेब ठाकरे पक्षाचे आमदार अनिल परब यांनी मंगळवारी विधान परिषदेत भाजप आमदार नीतेश राणे यांच्यावर कडाडून हल्ला चढवला. त्यांनी त्यांचा उल्लेख ‘नेपाळी’ असा केला. महाराष्ट्रात एक नेपाळी आहे. मीच हिंदू धर्म वाचवू शकतो असे त्याला वाटते, असे ते म्हणालेत. यावेळी पक्षप्रमुख उद्धव ठाकरे हे परब यांच्या बाजूलाच बसले होते हे विशेष.अनिल परब आज विधानपरिषदेत संविधानावरील चर्चेत बोलताना म्हणाले की, हल्ली काय झाले आहे की मांसाहार करायचा नाही असे कुणीतरी सांगत आहे. त्यांना हा अधिकार कुणी दिला? मटण कोणते खायचे, झटका मटण खायचे की हलाल खायचे हे तुम्ही सांगणार का? एक मंत्री सांगतो की आपण काय खायचे आणि काय खायचे नाही. राज्यात हिंदू – मुस्लिम वाद होतील असे वातावरण आहे.

या देशाविरोधात काम करणारा कोणताही व्यक्ती मग तो हिंदू असो की मुस्लीम तो आपल्या देशाचा शत्रू आहे असे बाळासाहेब ठाकरे यांनी सांगितले होते. दुर्दैवाने त्यावेळी जे काही बॉम्बस्फोट झाले, ज्या काही गोष्टी झाल्या, त्यात मुस्लीम समाजाचे लोकं आढळले. म्हणून बाळासाहेबांनी त्यावेळी ही भूमिका मांडली होती.पण आज काय सुरू आहे? माझ्याकडे एका सोसायटीत एक नेपाळी वॉचमन आहे. तो अख्खी रात्र जागते रहो म्हणून ओरडत असतो. त्याच्यामुळेच आम्ही सुरक्षित आहोत असे त्याला वाटते. तसा एक नेपाळी महाराष्ट्रात फिरत आहे. त्याला वाटते, त्याच्यामुळे हिंदू धर्म टिकलाय. त्याचा असा समाज झालाय. हल्ली तो अशी शाल-बिल घेऊन फिरत आहे. अरे त्यांच्या जीवावर नाही, हिंदू धर्म सांभाळायला आम्ही समर्थ आहोत. आमच्यात तेवढी ताकद आहे.अनिल परब यांनी यावेळी नीतेश राणे यांचे नाव घेतले नाही. पण त्यांचे हावभाव पाहता त्यांचा रोख त्यांच्याकडेच होता हे स्पष्ट आहे. यावेळी त्यांच्या बाजूला हसलेले उद्धव ठाकरेही गालातल्या गालात हसत होते.

अनिल परब पुढे म्हणाले, माझ्या धर्माने किंवा मला ज्यांनी शिकवण दिली त्यांनी आम्हाला स्वतःच्या धर्माचे संरक्षण करताना दुसऱ्याच्या धर्मावर जाणिवपूर्वक अन्याय करण्याचे शिकवले नाही. जाती-जातीत तेढ वाढवणे शिकवले नाही. त्यामुळे मागच्या काही दिवसांत ज्या काही घटना घडल्या आहेत, या घटना पाहिल्या तर जाती-जातीत तेढ निर्माण करण्याचे काम सुरू असल्याचे दिसून येते.

आज सभागृहात वेगवेगळ्या गोष्टींवर चर्चा झाली. मी सर्वच गोष्टींवर भाष्य करत नाही. संविधानावर चर्चा करण्यास दोन दिवसही पुरणार नाहीत. पण संविधानाने मला जे अधिकार दिलेत, त्यांची पायमल्ली करण्याचा अधिकार ना मला विरोधक म्हणून आहे ना सत्ताधाऱ्यांना आहे. त्यामुळे मी राहायचे कसे? मी खायचे काय? बोलायचे काय? याचे अधिकार दुसरा कुणी ठरवू शकत नाही. हा माझा जन्मसिद्ध अधिकार आहे आणि तो मी बजावणारच. त्यात दुसऱ्या कुणाचा हस्तक्षेप मला मान्य नाही आणि तो मान्य करू पण देणार नाही, असे अनिल परब म्हणाले.

ते पुढे म्हणाले, निधीचे समान वाटप हा घटनेने दिलेला अधिकार आहे. पण केंद्र सध्या राज्याच्या बाबत निधी वाटपात दुजाभाव दाखवत आहे. आता राज्यात सुद्धा असाच प्रकार सुरू झाला आहे. माझ्या मतदार संघात 100 कोटी रुपयांच्या वर्क ऑर्डर दिल्या गेल्या. आता त्याठिकाणी निधी दिला जात नाही. आम्ही काम करायचे नाही का? एका वॉर्डात निधी दिला जातो आणि दुसऱ्या वॉर्डात निधी दिला जात नाही.खालच्या सभागृहात आम्हाला अद्याप विरोधी पक्षनेता दिला नाही. का दिला नाही हे आम्हाला लिहून द्या असे आम्ही अध्यक्षांना बोललो. पण ते यावर बोलायला तयार नाहीत. आम्ही काय गुन्हा केला हे त्यांनी सांगावे. आमच्याकडे संख्याबळ नाही म्हणून होत नसेल तर तसे लिहून द्यावे. पण तेही तसे करत नाहीत.

अनिल परब म्हणाले, आम्ही विधानपरिषदेच्या सभापतींवर अविश्वास प्रस्ताव दाखल केला. हा प्रस्ताव नियमानुसार घेण्याची गरज होती. पण तो तुम्ही नाकारला. तो कोणत्या कायद्याने नाकारला हे तरी दाखवा. आमचा अविश्वास प्रस्ताव नाकारला आणि लगेच तुम्ही विश्वासदर्शक प्रस्ताव आणला. केवळ तुम्ही घटनापीठावर बसलेला आहात म्हणून तुम्हाला चॅलेंज करता येत नाही. त्यामुळे आता आम्ही थेट सभापतींवर अविश्वास प्रस्ताव दाखल केला आहे.

मंत्रिपदाची इच्छा, पण उपाध्यक्षपदावर बोळवण

मुंबई-उपमुख्यमंत्री अजित पवार यांच्या नेतृत्वातील राष्ट्रवादी काँग्रेसचे आमदार अण्णा बनसोडे यांची विधानसभेच्या उपाध्यक्षपदी बिनविरोध निवड झाली आहे. अध्यक्ष राहुल नार्वेकर उद्या त्यांच्या निवडीची औपचारिक घोषणा करतील.विधानसभेच्या उपाध्यक्षपदासाठी राष्ट्रवादीच्या राजकुमार बडोले, संजय बनसोडे व अण्णा बनसोडे या 3 नेत्यांची नावे चर्चेत होती. अखेर या अण्णा बनसोडे यांनी बाजी मारली. या पदासाठी महायुतीकडून अण्णा बनसोडे यांचा एकमेव अर्ज आला होता. तो सोमवारी दुपारी झालेल्या पडताळणीत वैध ठरला. त्यामुळे त्याची या पदावर बिनविरोध निवड झाली आहे. यासंबंधीची अधिकृत घोषणा अध्यक्ष राहुल नार्वेकर बुधवारी दुपारी सभागृहात करतील.

अण्णा बनसोडे यांनी महापालिकेत 3 टर्म नगरसेवक म्हणून काम केले आहे. त्यांनी स्थायी समितीचे अध्यक्षपदही भूषविले आहे. ते राष्ट्रवादी काँग्रेसचे अध्यक्ष तथा उपमुख्यमंत्री अजित पवार यांचे कट्टर समर्थक आहेत. ते पुणे जिल्ह्यातील पिंपरी विधानसभा मतदारसंघाचे विधानसभेत नेतृत्व करतात. ते 2009 मध्ये पहिल्यांदा आमदार म्हणून निवडून आले. त्यानंतर 2014 ला त्यांना पराभवाची चव चाखावी लागली. पण 2019 मध्ये ते पुन्हा विधानसभेत पोहोचले. राष्ट्रवादी काँग्रेसमधील फुटीनंतर त्यांनी अजित पवारांची साथ देण्याचा निर्णय घेतला आणि 2024 मध्ये ते पुन्हा विधानसभेवर पोहोचले. अजितदादांच्या बालेकिल्ल्यातील पिंपरीचे शिलेदार म्हणून त्यांना ओळखले जाते.

औद्योगिकनगरी म्हणून ओळख असलेल्या पिंपरी-चिंचवड शहरातील आमदाराला आत्तापर्यंत एकदाही कॅबिनेट अथवा राज्यमंत्रिपद मिळाले नाही. आत्तापर्यंत शहरातील 5 नेत्यांना राज्यमंत्रिपदाचा दर्जा असलेले महामंडळ मिळाले. मात्र शहराच्या 40 वर्षाच्या इतिहासात एकदाही कॅबिनेट किंवा राज्यमंत्रिपद मिळाले नाही. मंत्रिपदाचे प्रबळ दावेदार मानले जात असलेले आणि तीनवेळा निवडून आलेले भोसरीचे भाजप आमदार महेश लांडगे आणि पिंपरीचे राष्ट्रवादी (अजित पवार) अण्णा बनसोडे मंत्रिपदासाठी तीव्र इच्छुक होते. परंतु, मंत्रिपदाऐवजी आमदार बनसोडे यांना मंत्रिपदाचा दर्जा असलेले विधानसभेचे उपाध्यक्षपद मिळाले आहे.

एकेकाळी पिंपरी-चिंचवड हा अजित पवार यांचा बालेकिल्ला होता. पण भाजपने 2017 म्ध्ये त्यांच्या बालेकिल्ल्याला सुरुंग लावला. सध्या भाजपचे विधानसभेचे दोन आणि विधानपरिषदेत दोन असे चार आमदार या शहरात आहेत. राष्ट्रवादीचा एकमेव आमदार आहे. महायुतीमध्ये सत्तेत सहभागी असलेल्या अजित पवार यांनी आमदार बनसोडे यांना उपाध्यक्षपद देऊन या शहराला महत्त्व दिले आहे. उपाध्यक्ष पदावर बसण्याची संधी मिळाल्याने बनसोडे यांना राज्याच्या विधिमंडळात महत्त्वाची भूमिका बजावता येईल. बनसोडे यांना ताकद देऊन महापालिकेत पुन्हा राष्ट्रवादीची सत्ता आणण्यासाठी अजित पवार हे प्रयत्नशील असल्याचे बोलले जात आहे.

उपसभापती डॉ. नीलम गोऱ्हे यांची मुख्यमंत्र्यांकडे मागणी

मुंबई, : ओटीटी प्लॅटफॉर्म आणि स्टँडअप कॉमेडी शोजमध्ये मोठ्या प्रमाणावर आक्षेपार्ह, अयोग्य आणि संवेदनशील टिप्पण्या करण्यात येतात. त्यामुळे संबंधित व्यक्ती आणि समाजघटकांविषयी अनादराची भावना निर्माण होते. या पार्श्वभूमीवर, महाराष्ट्र विधान परिषदेच्या उपसभापती डॉ. नीलम गोऱ्हे यांनी मुख्यमंत्री देवेंद्र फडणवीस यांच्याकडे ठोस धोरणात्मक निर्णय घेण्याची मागणी केली आहे.

डॉ. गोऱ्हे यांनी मुख्यमंत्री देवेंद्र फडणवीस यांना दिलेल्या पत्रात म्हटले आहे की, “भारतीय घटनेने प्रत्येक नागरिकाला भाषण स्वातंत्र्य दिले आहे, मात्र त्याचा गैरवापर स्वतःच्या प्रसिद्धीसाठी किंवा अन्य व्यक्ती अथवा समाजघटकाच्या प्रतिमेला धक्का पोहोचवण्यासाठी होऊ नये.”

सध्या रंगभूमीवरील प्रयोगांसाठी रंगभूमी परीक्षण मंडळ आहे, तर चित्रपटांसाठी सेन्सॉर बोर्ड कार्यरत आहे. मात्र, ओटीटी प्लॅटफॉर्म आणि स्टँडअप कॉमेडी शोजवर कोणतेही प्रभावी नियमन नाही. त्यामुळे त्यावर प्रदर्शित होणाऱ्या सामग्रीवर कोणतेही बंधन नाही. “या माध्यमांवर होणाऱ्या वक्तव्यांमुळे समाजात तेढ निर्माण होऊ शकते, त्यामुळे योग्य ती आचारसंहिता तयार करणे गरजेचे आहे,” असेही त्यांनी पत्रात नमूद केले आहे.

लोकसभेतही शिवसेनेचे खासदार नरेश म्हस्के यांनी यासंदर्भात चिंता व्यक्त केली होती. ओटीटी आणि स्टँडअप कॉमेडी शोजवर नियंत्रण आणण्यासाठी कायदेशीर चौकट ठरवावी, अशी मागणी त्यांनी संसदेत केली होती.

डॉ. गोऱ्हे यांनी मुख्यमंत्र्यांना विनंती केली आहे की, राज्य शासनाने या विषयावर गांभीर्याने विचार करावा आणि योग्य ती आचारसंहिता लवकरात लवकर लागू करावी.

मुंबई- मंत्री जयकुमार गोरे यांना अडकवण्याच्या प्रकरणात शरद पवार यांच्या पक्षाचा मोठा हात असल्याचा आरोप मुख्यमंत्री देवेंद्र फडणवीस यांनी सभागृहात केला आहे. या प्रकरणात सुप्रिया सुळे आणि रोहित पवार हे आरोपी तुषार खरात याच्या संपर्कात होते. या प्रकरणाचे विरोधात जे व्हिडिओ तयार केले गेले, ते आधी खासदार सुप्रिया सुळे आणि आमदार रोहित पवार यांना पाठवण्यात आले असल्याचा मोठा आरोप देखील फडणवीस यांनी केला आहे. त्यामुळे आता या प्रकरणावरून राज्यभरात चांगलाच गोंधळ निर्माण होण्याची शक्यता वर्तवली जात आहे. विरोधकांच्या वतीने विधिमंडळात मांडण्यात आलेल्या सर्वच प्रश्नांची उत्तरे फडणवीसांनी आज दिली. या वेळी त्यांनी मंत्री जयकुमार गोरे यांना अडकवण्याचा कट कशा पद्धतीने आखला गेला, याची माहिती दिली. तसेच या प्रकरणावरून त्यांनी सुप्रिया सुळे आणि रोहित पवार यांच्यावर गंभीर आरोप केले आहेत. तुषार खरात आणि इतरांनी जयकुमार गोरे प्रकरणात विरोधात व्हिडिओ तयार केल्यानंतर, ते व्हिडिओ खासदार सुप्रिया सुळे आणि आमदार रोहित पवार यांना पाठवण्यात आले आहेत. आता या प्रकरणाची चौकशी होईल. मात्र, त्यांनी आत्मचिंतन करण्याची आवश्यकता असल्याचे फडणवीस यांनी म्हटले आहे. आपण राजकीय शत्रू नाही तर राजकीय विरोधक आहोत. मात्र, अशा प्रकारे कोणाला जीवनातून उठवून टाकायचे, अशा प्रकारचे राजकारण होत असेल तर हे चुकीचे असल्याचे फडणवीस यांनी म्हटले आहे.

विरोधकांनी कितीही प्रयत्न केला तरी आम्ही तिघे एकमेकांच्या पायात पाय घालणार नाही. तर एकमेकांच्या हातात हात घेऊन काम करणारे असल्याचे मुख्यमंत्री देवेंद्र फडणवीस यांनी म्हटले आहे. दादा एकदम दरडावून बोलतात, त्यामुळे त्यांच्याविषयी कोणी बोलत नाही. मात्री आम्ही दोघे, शांततेत बोलत असतो. मात्र तुम्ही कितीही काड्या घालण्याचा प्रयत्न केला, तरीही आमच्यात एकी कायम राहणार असल्याचा दावा मुख्यमंत्री देवेंद्र फडणवीस यांनी केला आहे. जितेंद्र आव्हाड ज्यावेळी राज्यातील घटना घडामोडींबद्दल बोलत होते. त्यावेळी ते बांगलादेश विषय बोलता की काय? असा मला प्रश्न पडत असल्याचे देवेंद्र फडणवीस यांनी म्हटले आहे. दंगेखोर आणि बलात्कार करणाऱ्यांचा एवढा पुळका का? असा प्रश्न देवेंद्र फडणवीस यांनी विचारला आहे. अक्षय शिंदे याचा एनकाऊंटर झाला नसता तर चांगले झाले असते. मात्र तो स्वातंत्र्य सेनानी असल्यासारखी छाती बडवली जात असल्याचा आरोप फडणवीस यांनी केला आहे. दंगेखोर आणि बलात्कार यांना कायद्याने शिक्षा झाली पाहिजे. मात्र त्यांच्या विषयी कोणाच्या मनात संवेदना निर्माण झाली असेल तर ते योग्य नाही. त्या संदर्भात त्यांची मने तपासूनच पहावी लागतील, असे देखील फडणवीस यांनी म्हटले आहे. आप इतना भी गरज गरज के ना बरसों, की मैं आंधी तूफान या सैलाब बन जाऊं। खैर मुश्किल मुझ में तो अभी साख बाकी है, आप खुद अपनी फितरत के बारे में सच बोलो, आप में वह पहले वाली बात कहा बाकी है। सीबीआयने अत्यंत आधुनिक तंत्रज्ञानाचा वापर करून बीड मधील संतोष देशमुख हत्या प्रकरणाचा तपास केला आहे. त्यामुळे सीबीआयच्या अधिकाऱ्यांचे फडणवीस यांनी अभिनंदन केले आहे. या प्रकरणात आधी फोन शोधून काढला आणि नंतर फोन मधून डिलीट केलेला डेटा पुन्हा मिळवण्यात तपास यंत्रणेला यश आले आहे. या प्रकरणातले जे गुन्हेगार आहेत त्यांनी अतिशय निर्घृणपणे संतोष देशमुख यांची हत्या केली आहे. या गुन्हेगारांना जी सर्वोच्च शिक्षा आहे, ती शिक्षा दिली जाईल. यासाठी सर्व प्रयत्न राज्य सरकारच्या वतीने केले जातील, असे आश्वासन फडणवीस यांनी सभागृहात दिले आहे.

मुंबई:’राजसंन्यास’ ही राम गणेश गडकरी यांची कादंबरी, तसेच ‘रायगडाला जेव्हा जाग येते’, ‘थोरातांची कमळा’, ‘बेबंदशाही’, ‘प्रणयी युवराज’, ‘स्वप्न भंगले रायगडाचे’ आणि ‘इथे ओशाळला मृत्यू’ यासारख्या नाटक अन् चित्रपटांवर बंदी घाला, अशी मागणी अमोल मिटकरी यांनी सभागृहात केली आहे.
अमोल मिटकरी म्हणाले की, राज्यात आपण छत्रपती शिवाजी महाराज, छत्रपती संभाजी महाराज, डॉ.बाबासाहेब आंबेडकर या महापुरुषांचे आपण नेहमी नाव घेतो. एवढी मोठी संत परंपरा, महापुरुष लाभले असताना करही समाजद्रोही लोकांकडून जाणीवपूर्वक महापुरुषांचा अपमान केला जातो. अलीकडेच नागपूरचं उदा. प्रशांत कोरटकर नावाच्या व्यक्तीने इतिहास संशोधक इंद्रजीत सावंत यांना फोन करत ज्या प्रकारे धमकी दिली, छत्रपती शिवाजी महाराज यांचा अपमान केला त्याला एका महिन्यानंतर अटक झाली. तर दुसरीकडे राहुल सोलापूरकर नावाच्या व्यक्तीने डॉ. बाबासाहेब आंबेडकर आणि छत्रपती शिवाजी महाराजांचा अवमान केला. त्यावर एफआयआरदेखील झाला नाही. यावर आपण काही कडक कायदा करणार का नाही.

अमोल मिटकरी पुढे बोलताना म्हणाले की, एखाद्याच्या धार्मिक भावना दुखावल्या गेल्या तर आपण तात्काळ त्याच्यावर गुन्हा दाखल करतो. नेत्यावर कुणी बोलले तर आक्रमक रित्या पुढाकार घेत कारवाई करा म्हणतो. पण महाराष्ट्राचे वैभव असणाऱ्या छत्रपती शिवाजी महाराज छत्रपती संभाजी महाराज यांचा एखादा चिल्लर माणूस अवमान करत असेल आणि त्याला अटक होण्यासाठी महिनाभर लागत असेल तर हे महाराष्ट्राच्या दृष्ठीने चांगले नाही.

थोरातांची कमळामधून दाखवला अत्यंत वाईट प्रसंग

अमोल मिटकरी म्हणाले की, महापुरुषांबद्दल आक्षेपार्ह वक्तव्य करण्याची एक परंपरा आता सुरू झाली आहे. म्हणजे आक्षेपार्ह वक्तव्य करा आणि पोलिस सुरक्षा घेत सुरक्षित स्थळी जा हे राज्याला न शोभणारे आहे. एका चित्रपटानंतर तरुण पिढीने संभाजी महाराज यांच्याबद्दल माहिती घेण्यास सुरूवात केली. संभाजी महाराजांवर 20 नाटकं आणि 35 ते 40 चित्रपट आहेत जी युट्युबवर उपस्थित आहेत. उदाहरण द्यायचे असेल तर थोरातांची कमळा हा चित्रपट तुम्ही पाहिला तर त्यामध्ये संभाजी महाराज ते थोरात्याच्या कमळेला थेट बोहल्यावरुन उचलून नेतानाचा अत्यंत वाईट प्रसंग दाखवलेला आहे. इतकंच नाही सरकारकडून एक पुस्तक विकले जाते, त्यामध्ये संपूर्ण गडकरी असे एक नाटक आहे. म्हणजे रामगणेश गडकरी यांचे ते पुस्तक आहे त्या नाटकाचे नाव आहे राजसंन्यास आणि त्यामध्ये असे लिहले आहे की, संभाजी महाराज आणि तुळसा यांच्या नात्यामधील ते नाटक आहे, अशी पुस्तकांवर बंदी घालण्यात यावी.