मुंबई – भाजपची सत्ता आल्यानंतर भविष्यात भाजपमध्ये बहुजन विरुद्ध उच्चवर्णीय असा सामना रंगणार असल्याची चुणूक दिसू लागली आहे , पुण्यातून विक्रमी साडेतीन लाखाच्या मताधिक्याने लोकसभेत निवडून गेलेल्या अनिल शिरोळे तसेच पर्वतीतून विधानसभेला विजय मिळवणाऱ्या माधुरी मिसाळ यांच्याकडे पक्षाचे दुर्लक्ष होत आल्याचा आरोप मराठा आणि बहुजन समाजातून होवू लागला आहे त्यातला महाराष्ट्राच्या मुख्यमंत्रिपदी बहुजन समाजाचा नेता हवा होता, या महसूलमंत्री तथा पक्षाचे ज्येष्ठ नेते एकनाथ खडसे यांच्या वक्तव्याने या चर्चेला अधिक वाव मिळतो आहे विशेष म्हणजे शपथविधीनंतर अवघ्या दोन दिवसात खडसेंचे हे वक्तव्य प्रसारित झाले आहे . एकंदरीत ‘मोदी -शहा बोले महारष्ट्र भाजप डोले’ अशा स्थितीत भाजपचे ज्येष्ठ -वरिष्ठ नेते कार्यकर्ते भाजपची सत्ता येवूनही दुर्लक्षित होत असल्याने नाराजीचा सूर दिसत आहे
भाजपच्या १२२ आमदारांपैकी ४८ ओबीसी, १९ मराठा, १९ अनुसूचित जाती, ६ अनुसूचित जमाती, २७ खुल्या गटाचे आमदार असताना नैसर्गिक न्यायाने बहुजन समाजाचीच व्यक्ती मुख्यमंत्रिपदाच्या खुर्चीवर बसायला हवी होती, असा सूर पक्षाच्या वर्तुळात उमटतो आहे. यामुळे सत्तेवर विराजमान होऊन तीन एक दिवस झाले नसताना भाजपमध्ये दोन तट पडल्याचे दिसत आहे आहे.
मुख्यमंत्रिपदाच्या शर्यतीत फडणवीसांबरोबर एकनाथ खडसे, विनोद तावडे, सुधीर मुनगंटीवार व पंकजा मुंडे होत्या. मात्र पंतप्रधान नरेंद्र मोदी यांनी फडणवीस यांच्या नावावर शिक्कामोर्तब केल्याने उरलेल्या चारपैकी सर्वात नाराज दिसत आहेत ते खडसे. शपथविधी सोहळ्यातही खडसेंची देहबोली निराश असल्याच्या भावना दाखवत होती. पंढरपूरला सोमवारी कार्तिकी एकादशी निमित्त पांडुरंगाची पूजा खडसेंच्या हस्ते झाली. या वेळी प्रसारमाध्यमांशी बोलताना खडसेंनी मुख्यमंत्रिपदावर बहुजनांचा सूर आळवून आपला हक्क होता, असे बोलून दाखवले.
खडसे हे भाजपचे सर्वात ज्येष्ठ नेते असून त्याचा सत्ताधारी तसेच विरोधी पक्ष म्हणून काम करतानाचा अनुभव दांडगा आहे. विधिमंडळात खडसेंच्या मागच्या बाकावर बसून फडणवीसांनी कामकाजाचे धडे गिरवले. विशेष म्हणजे फडणवीसांना विधिमंडळातील सर्वोत्तम आमदाराचा पुरस्कार मिळाला होता.
दरम्यान विश्वनाथ प्रताप सिंह हे पंतप्रधान असताना मंडल आयोगाचा प्रश्न सुटला होता, असे विचार ओबीसी चळवळीतील नेते नितीन चौधरी यांनी मांडले.

नागपूर – मुख्यमंत्री देवेंद्र फडणवीस यांनी सोमवारी नागपुरात झालेल्या पत्रकार परिषदेत वेगळ्या विदर्भाच्या आपल्या वचनावर भाजप ठाम असून एलबीटी बाबत योग्य पर्याय शोधला जात असल्याचे म्हटले आहे. विदर्भाबाबत केंद्र सरकार आणि भाजपचे केंद्रीय नेतृत्व याबाबत अंतिम निर्णय घेणार असल्याचे ते म्हणाले. त्याचबरोबर नागपुरात मिनी मंत्रालय थाटण्याचा विचार सुरू असल्याचेही फडणवीस यांनी स्पष्ट केले आहे.
विदर्भ राज्याच्या मागणीबाबत बोलताना मुख्यमंत्री म्हणाले की, भाजप आपल्या वचनावर कायम आहे. केंद्र सरकार आणि भाजपचे केंद्रीय नेतृत्व यासंबंधात योग्य निर्णय घेणार आहे.
मंत्रालयाचे कामकाज पूर्णपणे संगणकीकृत करण्याचा सध्या सरकारचा विचार सुरू आहे. सरकारी कामकाजासाठी ई प्लॅटफॉर्म तयार झाल्यानंतरच मिनी मंत्रालयाची संकल्पना प्रत्यक्षात उतरवता येणार आहे. त्यासाठी आयटी विभागाची बैठक बोलावली जाणार असल्याचे फडणवीस यांनी सांगितले.
विदर्भातील मुद्दे सोडवण्यासाठी विधानसभेचे नागपुरातील हिवाळी अधिवेशन अधिक काळ चालवणे गरजेचे असल्याचेही मुख्यमंत्री म्हणाले. त्यामुळे अजेंड्यावर येणा-या विषयांबाबत चर्चा पूर्ण होईपर्यंत अधिवेशन सुरू राहणार असल्याचे त्यांनी सांगितले.
एलबीटीबाबतच्या पर्यायाचा सरकार विचार करत आहे. गुंतवणूकदार आणि व्यावसायिक यांच्याशी चर्चा करून याबाबत योग्य तो निर्णय घेतला जाईल. असेही ते म्हणाले

मुंबई -तडजोडी सफल होईनात ,एकमेकांवर विश्वास बसेना अशा अवस्थेत सध्या भाजपा-शिवसेनेतील सत्ता स्थाप्नाबाबाटची स्थिती असून विश्वासदर्शक ठरावाआधी मंत्रिमंडळात स्थान देण्याची शिवसेनेची मागणी मुख्यमंत्री देवेंद्र फडणवीस यांनी धुडकावल्याची माहिती सूत्रांकडून मिळत असून मुख्यमंत्र्यांच्या या ताठरपणाला शिवसेना सरकारविरोधात मतदान करून प्रत्युत्तर देण्याची शक्यता नाकारता येणारी नसल्याचे बोलले जाते
भाजपचे राष्ट्रीय अध्यक्ष अमित शहा आणि संरक्षण मंत्री अरुण जेटली यांच्या विनंतीनंतर शिवसेना पक्षप्रमुख उद्धव ठाकरे देवेंद्र फडणवीस सरकारच्या शपथविधी सोहळ्याला उपस्थित राहिले होते. त्यामुळे भाजपचा जीव भांड्यात पडला, असे वाटत होते. मात्र, शिवसेनेने भाजप सरकारला पाठिंबा देण्याबाबत अद्यापही पत्ते उघड केलेले नाहीत. शिवसेनेला उपमुख्यमंत्रीपदासह सत्तेत एक तृतियांश वाटा हवा असून त्याबाबत जोपर्यंत ठोस निर्णय होत नाही, तोपर्यंत भाजपला झुलवत ठेवण्याचे शिवसेनेने ठरवल्याचे दिसत आहे. भाजपकडून अरुण जेटली यांची शिवसेनेशी बोलणी सुरू असल्याचे कळते. मात्र, भाजपसोबत फरफटत जायचे नाही, असाच बाणा शिवसेनेने अंगिकारला आहे. उद्धव ठाकरे यांनी शिवसेनेला सत्तेची घाई नाही, असे सांगून भाजप नेत्यांना योग्य तो संदेश दिला आहे.
यापार्श्वभूमीवर आता चेंडू भाजपच्या कोर्टात असल्याचे दिसत असून सरकार वाचवण्यासाठी शिवसेनेला साकडे घालण्याच्या मनस्थितीत सध्या तरी भाजप नाही आहे. ६ वा ९ नोव्हेंबर रोजी मंत्रिमंडळाचा विस्तार होईल. यावेळी शिवसेनेचे मंत्री शपथ घेतील, अशी शक्यता वर्तविली जात होती. मात्र, देवेंद्र फडणवीस यांनी बहुमत सिद्ध झाल्याशिवाय मंत्रिमंडळ विस्तार नाही, असे आता ठणकावल्याचे कळत आहे. याबाबत अधिकृतरीत्या कोणीही काहीही बोण्यास तयार नसल्याचे हि दिसते आहे

पुणे- शिवसेना पक्षप्रमुख उद्धव ठाकरे हे आपल्या घराण्याची कुलदैवत कार्ल्यातील एकवीरा देवीच्या दर्शनाला मंगळवारी येत आहेत. त्यांच्यासमवेत विधानसभेत निवडून आलेले सर्व ६३ आमदारही एकवीरा देवीचे दर्शन घेतील, अशी माहिती शिवसेनेच्या प्रवक्त्या नीलम गो-हे यांनी येथे दिली.
उद्धव ठाकरे यांनी रविवारीच कोल्हापूरच्या महालक्ष्मीचे दर्शन घेऊन नवस फेडला. विधानसभेत चांगले यश मिळू दे, निवडून आलेल्या सर्व आमदारांना तुझ्या दर्शनाला घेऊन येईन असे उद्धव ठाकरे यांनी कोल्हापूरच्या अंबाबाई व कार्ल्यातील एकवीरा देवीला नवस केला होता. विधानसभेत शिवसेनेला अपेक्षित यश मिळाले नसले तरी एकट्याच्या बळावर चांगलेच यश मिळाले असे मानले जात आहे. लोकसभा निवडणुकीतही शिवसेनेचे १८खासदार निवडून आल्यानंतर उद्धव ठाकरे यांनी त्या सर्वांना एकवीरा देवीच्या दर्शनाला आणले होते.
विधानसभेच्या निवडणुकीच्या प्रचारावेळी कोल्हापूरातील करवीरनिवासिनी श्री अंबाबाईला ठाकरे यांनी साकडे घातले होते. यानंतर कोल्हापूर जिल्ह्यातील दहापैकी६ जागांवर शिवसेनेचे उमेदवार विजयी झाले. त्या सर्व आमदारांना घेऊन ठाकरे यांनी रविवारी सपत्नीक अंबाबाईचे दर्शन घेतले.

मनसेला धक्क्यावर धक्के बसत असून मनसेच्या नाशिकच्या गडातले खंदे शिलेदार वंसत गीते आणि सचिन ठाकरे यांनी आज आपल्या पदाचा राजीनामा दिला. नाशिक महापालिकेत सत्ता असतानाही विधानसभा निवडणुकीत मनसेचा झालेला पराभव, हेच या दोघांच्या राजीनाम्याचे कारण असल्याचे सूत्रांनी सांगितले.
गेल्यावेळी १३ आमदार निवडून आणणाऱ्या राज यांच्या झोळीत केवळ एका आमदाराचे दान यावेळी पडले. त्यामुळे अस्वस्थ झालेल्या राज ठाकरे यांनी पराभवाच्या कारणांची शोधाशोध सध्या सुरू केली आहे. . राज ५ नोव्हेंबरला नाशकात येणार आहेत. त्याआधीच आज मनसेचे प्रदेश सरचिटणीस वसंत गीते आणि जिल्हाध्यक्ष सचिन ठाकरे यांनी आपल्या पदांचे राजीनामे दिले. त्यांच्यापाठोपाठ मनसेचे नाशिकमधील आणखीही प्रमुख पदाधिकारी राजीनामा देण्याच्या तयारीत असल्याचे सांगण्यात येत आहे.
द रम्यान, ‘मी पक्ष सोडणार नाही. पक्षाचा सामान्य कार्यकर्ता म्हणून मी काम करत राहणार आहे’, असे गीते यांनी सांगितले.

नवी दिल्ली-‘भाजप सोड, नाहीतर परिणाम भोगायला तयार राहा. नरेंद्र मोदीही तुला वाचवू शकणार नाहीत’, अशा धमकीचा फोन भाजपचे प्रवक्ते शाहनवाज हुसेन यांना दुबईहून आल्यानं त्यांचे कुटुंबीय, समर्थक हादरले असून पक्षनेत्यांमध्येही काळजीचा सूर ऐकू येतोय. या फोनसंदर्भात हुसेन यांनी संसद मार्ग पोलीस स्टेशनात तक्रार दाखल केली आहे.
दुबईतील एका नंबरवरून शनिवारी रात्री साडेअकराच्या सुमारास आपल्याला दोन फोन आले. तेव्हा आपण पाटण्याहून दिल्लीत पोहोचलो होतो आणि विमानतळावरून घरी जात होतो. पलीकडची व्यक्ती अत्यंत अर्वाच्य भाषेत बोलत होती. विविध वाहिन्यांवरून मोदी सरकारचं समर्थन केल्याबद्दल त्यानं शिवीगाळ केली आणि भाजप सोडण्याची धमकी दिली, असं शाहनवाज हुसेन यांनी तक्रारीत म्हटलं आहे. पक्षातून बाहेर न पडल्यास मोदीही वाचवू शकणार नाहीत, असंही त्यांना बजावण्यात आलंय.
या तक्रारीची गंभीर दखल घेऊन तपास सुरू करण्यात आला आहे, अशी माहिती वरिष्ठ पोलीस अधिकाऱ्यांनी दिली. हा फोन नेमका कुणी केला असावा, यावरून वेगवेगळे कयास बांधले जात आहेत.

मुंबई-आज मनसे अध्यक्ष .राज ठाकरे यांनी महाराष्ट्र राज्याचे मुख्यमंत्री देवेंद्र फडणवीस यांची सह्याद्री अतिथी गृह येथे भेट घेतली… कालच मनसे अध्यक्ष राजसाहेब ठाकरे यांनी अहमदनगर जिल्ह्या पाथर्डी तालुक्यातील जावखेड खालसा ह्या गावात जाऊन तिहेरी हत्याकांड झालेल्या जाधव कुटुंबियांची भेट घेतली…जाधव कुटुंबियांना भेटल्यावर राज यांनी त्यांचा दौरा अर्ध्यावर सोडून तत्काळ राज्याच्या मुख्यमंत्र्यांना भेटण्याचा निर्णय घेतला. या भेटी दरम्यान राज ठाकरे यांनी मुख्यमंत्र्यांना निवेदन दिले असून पुढील गोष्टी निवेदनात उल्लेख करण्यात आला आहे, जाधव कुटुंबियांच्या हत्याकांडात असलेल्या दोषींना कठोर शासन झाले पाहिजे, तसेच अश्या गुन्हेगारांना लवकरात लवकर शिक्षा होण्यासाठी द्रुतगती न्यायालये- विशेष न्यायालये उभारायला हवीत, पोलिस यंत्रणेमध्ये सुधारणा यायला हवी असून पोलिसांना अधिक अधिकार द्यायला हवेत, समाजातील द्रुष्ट प्रवृत्तीच्या लोकांना कायमचा धाक कसा बसवता येईल याचा विचार करायला पाहिजे. या निवेदनाबरोबर राज ठाकरे यांनी उस उत्पादक शेतक-यांना प्रतीटन पहिला हप्ता रु.२५००/- आणि अंतिम दर रु..३०००/- मिळाला पाहिजे या मागणीचे निवेदनसुद्धा दिले आहे… मनसे अध्यक्ष मा.राजसाहेब ठाकरे आणि महाराष्ट्र राज्याचे मुख्यमंत्री मा. देवेंद्र फडणवीस यांच्यामध्ये महाराष्ट्रातील विविध विषयासंदर्भात सुमारे २०-२५ मिनिटे चर्चा झाली, सुरवातीला राज ठाकरे यांनी गुलाबांचा पुष्पगुच्छ देवून मुख्यमंत्री देवेंद्र फडणवीस यांचे अभिनंदन केले… या चर्चे दरम्यान मनसे नेते बाळा नांदगावकर, नितीन सरदेसाई, अविनाश अभ्यंकर, आमदार शरद सोनावणे, मनसे विद्यार्थी सेनेचे अध्यक्ष आदित्य शिरोडकर आदी उपस्थित होते…

मुंबई – मुख्यमंत्री देवेंद्र फडणवीस यांनी गृह,-नगर विकास, गृहनिर्माण आणि आरोग्य खाती स्वतःकडे ठेवली आहेत. ज्या खात्यांची जबाबदारी कुणावरही सोपवण्यात आलेली नाहीत, अशी खातेही फडणवीस यांच्याकडेच राहणार आहेत, अशी माहिती मुख्यमंत्री कार्यालयाने दिली आहे.

आज झालेले खातेवाटप –

एकनाथ खडसे – महसूल, अल्पसंख्याक आणि वफ्त, कृषी, पशु संवर्धन, दुग्ध, मत्स व्यवसाय, उत्पादन शुल्क.

सुधीर मुनगंटीवार – अर्थ आणि नियोजन, वन खात्याची जबाबदारी

विनोद तावडे – शिक्षण, क्रीडा आणि सांस्कृतिक खाते, उच्च व तंत्रशिक्षण, वैद्यकिय शिक्षण, मराठी भाषा.

पंकजा मुंडे – ग्रामविकास, जलसंवर्धन, महिला आणि बालकल्याण.

प्रकाश मेहता- उद्योग, खाण आणि संसदीय कामकाजमंत्री.

चंद्रकांत पाटील – सहकार, विपणन, टेक्सटाईल आणि सार्वजनिक बांधकाम.

विष्णू सवरा – आदिवासी विकास, सामाजिक न्याय आणि विशेष सहाय्य.

दिलीप कांबळे – आदिवासी विकास, सामाजिक न्याय आणि विशेष सहाय्य विभागाचे राज्यमंत्री.

विद्या ठाकूर – ग्रामविकास विभागाच्या राज्यमंत्री.