पुणे :

“राष्ट्रीय समाज पक्षा’च्या झालेल्या “राज्यस्तरीय कार्यकर्ता मेळाव्या’त आवाहन केल्याप्रमाणे सदस्यत्वासाठी “रासप युवक आघाडी’ आणि “विद्यार्थी आघाडी’ यांच्या वतीने दुचाकी फेरीचे आयोजन करण्यात आले होते.

शहराध्यक्ष देवेंद्र धायगुडे, विद्यार्थी आघाडी अध्यक्ष रोहन आडे, विठ्ठल बोरकर, जेमीश पठाण, प्रदेश प्रवक्ते दीपक बिडकर यांनी झेंडा दाखविल्यानंतर या दुचाकी फेरीस प्रारंभ झाला. कोथरूड शिवाजी पुतळा, कर्वे रस्ता, जंगली महाराज रस्ता, पुणे स्टेशन, मार्केटयार्ड असा दुचाकी फेरीचा मार्ग होता. मार्केटयार्ड येथे फेरीची सांगता झाली. या रॅलीमध्ये 50 दुचाकीस्वार सहभागी झाले होते. एक रूपया देऊन सदस्यत्व देण्यात येणार आहे.अशी माहिती यावेळी देण्यात आली.

पुणे :

विधानसभा निवडणुकीत पुण्यातील सर्व मतदारसंघांत महाराष्ट्र नवनिर्माण सेनेचा सपशेल पराभव झाल्यानंतर पक्षाध्यक्ष राज ठाकरे यांनी मंगळवारी त्यांच्या ‘राजमहाल’ या निवासस्थानी कसबा विधानसभा मतदारसंघातील प्रभागनिहाय कार्यकर्त्यांशी समोरासमोर संवाद साधला. यावेळी राज यांनी कार्यकर्त्यांची चांगलीच झाडाझडती घेतली. पक्षाचा झालेला पराभव त्यांनी गांभीर्याने घेतला असून, लवकरच शहर कार्यकारणीत बदल करण्याचे संकेत आज दिले.

राज ठाकरे सध्या पुणे मुक्कामी आहेत. शहरात मनसेची मोठी ताकद आहे. पक्षाचे २९ नगरसेवक पुणे महापालिकेत निवडून आले होते. तरीही मनसेचा एवढा मोठा पराभव कसा झाला, याची कारणे राज यांनी कार्यकर्त्यांशी बोलून जाणून घेतली. पुण्यातील पराभवाबाबत खूप लोकांचे फोन, पत्र, निरोप आले होते. या सर्व लोकांना मुंबईला बोलावणे ठीक नव्हते. त्यामुळे आपणच पुण्यात कार्यकर्त्यांशी संवाद साधला. ४ – ५ वर्षांपूर्वीही अशाच प्रकारच्या कार्यकर्त्यांशी गाठी-भेटी घेतल्या होत्या.

आपल्या पक्षाचे कार्यकर्ते, नगरसेवकांनी इतर पक्षांचे कसे काम केले? गडबड कोणी केली? नुकसान कोणी केले? जुने पदाधिकारी काम करीत नाही का? अशा विविध प्रश्नांची माहिती राज ठाकरे यांनी कार्यकर्त्यांशी बोलून घेतली. पक्षाचे नुकसान करणार्‍या पदाधिकार्‍यांवर लवकरच कारवाई करण्यात येणार असल्याचे संकेत मिळाले आहेत. इतरांची गाळणी ठेवण्यापेक्षा कार्यकर्त्यांशी समोरासमोर चर्चा सुरू आहे. कोथरूड, हडपसर, पर्वती, खडकवासला, शिवाजीनगर, पुणे कॅन्टोन्मेंट, विधानसभा मतदारसंघांतील आढावाही घेण्यात येणार आहे. मुंबईतील शिवतीर्थावर शिवसेनाप्रमुख बाळासाहेब ठाकरे यांच्या द्वितीय स्मृतिदिनाच्या निमित्ताने राज ठाकरे आणि शिवसेना पक्षप्रमुख उद्धव ठाकरे एकत्रित आले होते. बर्‍याच वर्षांंनंतर हे दोघे भाऊ एकत्रित आल्याने महाराष्ट्रातील राजकारणात खळबळ उडाली होती. त्या पार्श्‍वभूमीवर पुण्यातील मनसे आणि शिवसेनेच्या कार्यकर्त्यांना विचारणा केली असता, मराठी माणसाच्या हितासाठी दोघांनीही एकत्रित येण्याचे आवाहन यावेळी करण्यात आले.
या विधानसभा निवडणुकीत नरेंद्र मोदी यांची लाट असल्याचाही एक मतप्रवाह पक्षात आहे. असे असतानाही मनसेची स्थापना झाल्यापासून पुणेकरांनी पक्षाला मोठी साथ दिली आहे. २00७ च्या पुणे महापालिका निवडणुकीत पक्षाचे केवळ ८ नगरसेवक निवडून आले होते. त्यानंतर २0१२ च्या महापालिका निवडणुकीत तब्बल २९ नगरसेवक निवडून आले होते. विरोधी पक्षनेतेपदही मिळाले होते. तरीही पक्षाचा ज्या प्रमाणात महापालिकेत ठसा उमटायला हवा होता, तो दिसून आला नाही. लोकसभा आणि विधानसभा निवडणुकीत झालेल्या पराभवानंतर प्रथमच राज ठाकरे यांनी थेटपणे कार्यकर्त्यांंशी संवाद साधला. त्यामुळे कार्यकर्त्यांंचा आत्मविश्‍वास कमालीचा वाढल्याचे दिसून आले. पक्षाचा पराभव झाला असला तरी यापुढील काळात आणखी जोमाने काम करणार असल्याचा विश्‍वास कार्यकर्त्यांंनी बोलून दाखविला.

अनुभवाची खाण असलेल्या ज्येष्ठ नागरिकांचा आदर करणे ही आपली भारतीय संस्कृती आहे. मात्र, हा आदर आता दिवसेंदिवस कमी होत असल्याचे उपमहापौर आबा बागुल म्हणाले.
पुणे शहर कॉंग्रेस ज्येष्ठ नागरिक संघातर्फे आज बालगंधर्व रंगमंदिर येथे ‘प्रियदर्शनी इंदिरा पुरस्कार’ प्रदान करण्यात आला. अध्यक्षस्थानी कृष्णकांत जाधव होते. माजी आमदार मोहन जोशी, नीता रजपूत, नगरसेविका लक्ष्मीताई घोडके उपस्थित होत्या.
\आबा बागुल म्हणाले, मागील १५ वर्षांपासून आम्ही ज्येष्ठ नागरिकांना काशी यात्रा घडवितो. त्याला नागरिकांचा चांगला प्रतिसाद मिळत आहे. ज्येष्ठांना पीएमटी पास कमी दरात मिळण्यासाठी पुणे महापालिकेतर्फे प्रय▪करण्यात येईल. तसेच ५00 रुपये देण्याच्या योजनेची तरतूद बजेटमध्ये करण्यात येणार आहे. प्रतिमा इंगोले (विदर्भकन्या), लिज्जत पापडच्या चेतना नहार, कबड्डी सुवर्णपदकविजेती किशोरी शिंदे, बॉक्सिंगचे जागतिक खेळाडू अजितसिंग कोचर, वृत्तपत्रविक्रेत्या चंपाताई करपे यांना ‘प्रियदर्शनी इंदिरा पुरस्कार’ प्रदान करण्यात आला. उत्तम भुमकर यांनी सूत्रसंचालन केले. कृष्णकांत जाधव यांनी प्रास्ताविक केले.

पुणे- २०१२-२०१४ सालच्या बॅचचे पीआयबीएमचे विद्यार्थी यांचा ५वा दीक्षांत समारंभ १६ नोव्हेंबर रोजी पुण्यात संपन्न झाला.कार्पोरेट जगत मधील अधिकारी व्यक्ती या कार्यक्रमात उपस्थित होते. यामध्ये श्री पवन पंजवानी (एम. डी टेक्नॉलाजी, जे पी मॉर्गन चेस), अजित दत्ता (सीईओ, टाटा ग्रीन बॅटरीज्) आणि अन्य मान्यवर व्यक्ती उपस्थित होते.

या दीक्षांत समारंभात श्री पंजवानी यांनी कार्पोरेट जगतातील आपले अनुभव सांगितले आणि विद्यार्थ्यांना सांगितले की आपला हेतू साध्य करण्यासाठी कठीण परिश्रम करावेत.

श्री सतीश वारानसी रिलायन्स जे आय ओ चे अस्स्टेट केअर चे प्रमुख म्हणाले की तुम्ही मोठी मोठी स्वप्ने पाहा. श्री देवाशिष शर्मा, सायनी राय आणि आशिष गेहलोत यांना टॉप विद्यार्थीचा पुरस्कार प्रदान करण्यात आला. पीआयबीएम या संस्थेच्या सर्व विद्यार्थ्यांना ४.७ लाख रुपये सरासरी सॅलरी पॅकेज प्राप्त झाले आहे.

यावेळी पीआयबीएमचे माननीय अध्यक्ष आणि कार्यकारी संचालक रमण प्रीत म्हणाले की सर्व विद्यार्थ्यांनी आपली स्वप्ने आणि आपले हेतू साध्य करण्यासाठी कष्ट करावेत आणि ती पूर्ण करण्यासाठी प्रयत्न करावेत.

कार्पोरेट जगतचे श्री पवन पंजवानी (एम. डी. टेक्नॉलाजी, जे. पी. मॉर्गन चेस), श्री शंतनू चौधरी (व्हीपी, एचआर ऍण्ड हेड, मंहिंद्रा लॉजिस्टीक), श्री दिनेश सोटा (सल्पाईज ऍण्ड डिस्ट्रीबूशन, एस्सार आईल, लिमिटेड), श्री मनीष रोहतगी (इंटर नॅशनल मार्केटिंग हेड, महिंद्र टू व्हिलर्स), श्री अजित दत्ता (सीईओ, टाटा ग्रीन बॅटरीज्), श्री सतीश वाराणसी (प्रमुख अस्स्टिेड केअर, रिलायन्स जे आय ओ), श्री झुल्फी अली भुत्तो (रिटेल हेड लेनेव्हो इंडिया स्मार्ट फोन्स) आणि श्री चार्ल्स वरगीज (व्ही पी न्यू इनिशिएटिव्ह डेटा व्हीजन सॉफ्टवेअर सोल्यूशन्स प्रा. लि.) यांच्या हस्ते विद्यार्थ्यांना प्रमाणपत्र देण्यात आली.

वर्धमानपुरा सोसायटीतील अस्वच्छतेबद्दल बिल्डरवर
कारवाई करण्याचे नगरसेविका मानसी देशपांडे यांचे प्रशासनाला आदेश

पुणे :
मार्केटयार्डजवळील वर्धमानपुरा उच्चभ्रू सोसायटीतील अस्वच्छता, घाण, दूषित पाणी पाहून महानगरपालिकेच्या अधिकाऱ्यांनी बिल्डरवर कारवाई करावी, असे आदेश नगरसेविका सौ.मानसी देशपांडे यांनी रविवारी दिले. रविवारी सोसायटीतील रहिवाशांनी “स्वच्छ भारत अभियाना’चे आयोजन केले होते. “सुयोग ग्रुप’, “जैन आशापुरी ग्रुप’, “लिजेंड ग्रुप’, “कुबेर प्रॉपर्टीज’ यांनी संयुक्तपणे बांधलेल्या या सोसायटीमध्ये 300 फ्लॅट्‌स आहेत. बिल्डरनी सोसायटीला हस्तांतरण केलेले नाही. देखभालीसाठी कोट्यवधी रुपये गोळा केले आहेत. मात्र, अस्वच्छतेपोटी पालिकेने मागील आठवड्यात डेंग्यू आळ्या सापडल्याने 11 हजार रुपये दंड केलेला आहे. तरीही बिल्डरने दुर्लक्ष केल्याने सौ. मानसी देशपांडे यांनी या बिल्डर मंडळींवर कारवाई करावी, असे अधिकाऱ्यांना सांगितले. बंद पोहण्याचा तलाव, ठिकाठिकाणी साचून राहिलेले पाणी, अस्वच्छता यामुळे सोसायटीतील 20 जणांना डेंग्यूची लागण झालेली आहे, अशी माहिती रहिवासी भाजपचे ज्येष्ठ कार्यकर्ते शामसुंदर कलंत्री यांनी दिली.

यावेळी स्वच्छता अभियानाने स्वच्छतेस प्रारंभ करण्यात आला. श्यामसुंदर कलंत्री, हर्षद लोढा, अनिल पोरवाल, अमित मुनोत, राजू सुराणा, माणिक बोकरीया, मीना कलंत्री, रश्मी ढालावत, फुटरमल खिंवसरा, महेश खिंवसरा, अशोक खिंवसरा, सोहनलाल परमार, वालचंद कटारिया, माधुरी राठोड आदी 200 जणांचा सहभाग होता. बिल्डरवर कारवाईची मागणीही यावेळी करण्यात आली.

पुणे- मराठी दौलतीचे प्रधानपंत माधवराव पेशवे यांच्या दोनशे एक्केचाळीसाव्या पुण्यतिथी निमित्त आज त्यांच्या पुतळ्यास पुष्पहार अर्पण करुन आदरांजली वाहण्यात आली.यावेळी उपमहपौर आबा बागुल,नगरसेविका स्मिताताई वस्ते,अश्विनी कदम,क्रीएटिव्ह फौंडेशन चे अध्यक्ष संदीप खर्डेकर,देवदेवेश्वर संस्थान चे उदयसिंह पेशवे,रमेश भागवत,डोक्टर प्रभाकर ताकवले,श्री.सुभाष बाठे ई.उपस्थित होते.या वेळी बोलताना श्री.ताकवले म्हणाले “माधवराव पेशवे हे प्रचंड कर्तुत्ववान प्रधानपंत होते.1761 ला पानीपत च्या लढाई नंतर पुढील 18 वर्ष त्यानी पुण्याचा धाक निर्माण केला.पुन्हा कोणी ललकारु नये अशी परिस्थिती निर्माण केली.त्यांच्याकडे गुणग्राहकता होती.त्यांच्याच काळात रामशास्त्रींसारखे न्यायमूर्ती कार्य करत होते.”त्यांच्या सारखा पेशवा होणे नाही,ज्यानी लढाई न लढता देखील धाक निर्माण केला.”

पुणे: नेहा भाटे, परिमल फडके आणि पवित्र भट या दिग्गज कलाकारांनी सादर केलेल्या भरतनाटयमच्या नृत्याविष्कारातून संतांच्या तत्वज्ञानाची अनुभूती रसिक प्रेक्षकांनी घेता आली. खडके फाउंडेशनच्या ‘देखिला देवो’ या संतांच्या रचनांवरील सी. डी. प्रकाशनानिमित्त या कार्यक्रमाचे आयोजन करण्यात आले होते.

सुप्रसिध्द व्हायोलियनवादक प्रभाकर जोग यांच्या हस्ते बालगंधर्व रंगमंदिर येथे सी. डी. चे प्रकाशन करण्यात आले. श्री संत सेवा संघाचे संस्थापक संजय गुरुजी, स्वामी रामानंदतीर्थ मराठवाडा विद्यापीठाचे कुलगुरु डॉ. पंडित विद्यासागर, राज्याचे पर्यटन संचालक सतीश सोनी, प्रतिष्ठानचे संजय खडके यावेळी उपस्थित होते.

ज्ञानेश्वर महाराज, तुकाराम महाराज, श्रीनिळोबाराय या संतांनी रचलेले अभंग आणि वारकरी संप्रदायाला भक्तिरसात चिंब करणाऱ्या ‘गजरा’चा सी. डी. मध्ये समावेश आहे. संजय गुरुजी यांनी संहिता लेखन केले असून जीवन धर्माधिकारी यांनी संगीत दिले. पंडित रघुनंदन पणशीकर व जितेंद्र अभ्यंकर यांचा स्वर असून स्वर्णिमा यांनी निरुपण केले आहे.

पंढरपूरच्या विठ्ठल मंदिराच्या भव्य प्रतिकृतीसमोर नेहा भाटे, परिमल फडके आणि पवित्र भट या कलाकारांनी भरतनाटयमच्या माध्यमातून संतांचे तत्वज्ञान उलगडून सांगितले. अशाप्रकारचा हा पहिलाच प्रयोग होता.

‘अनुपम्य मनोहर, कासे शोभे पीतांबर’, ‘कैवल्याचा गाभा, व्यापूनिया ठेला नभा’, ‘लेकुराचे हित, वाहे माऊलीचे चित्त’ आदी संतरचनांचे निरूपण, सादरीकरण व नृत्याविष्कार आणि’जय जय विठोबा रखुमाई’, ‘ज्ञानेश्वर माऊली जय ज्ञानराज माऊली तुकाराम’ हा वारकरी संप्रदायाला प्राणाहून प्रिय असणारा गजर आणि पालखी, रिंगण, फुगडया, फेर ही वारीतील मनोहारी दृष्ये रसिकांना टिपता आली.

मारुती तुपे, ओमप्रकाश वाघमारे, दीपक राठोड या कार्यकर्त्यांना विविध क्षेत्रातील योगदानाबद्दल प्रत्येकी पंचवीस हजार रुपयांची शिष्यवृत्ती देऊन गौरविण्यात आले.

पुणे शहरातील प्रसिद्ध संतश्रेष्ठ श्री. ज्ञानेश्वर महाराज पादुका मंदिर, ज्ञानेश्वर पादुका चौक, येथे सालाबादप्रमाणे दिनांक २० नोव्हेंबर २०१४ रोजी संजीवन समाधी दिन सोहोळा मोठ्या भक्तिभावाने संपन्न होणार आहे, दिवसभरतील कार्यक्रम पुढील प्रमाणे आहेत पाहटे ४.३० ते ६.३० वाजे पर्येंत काकड आरती, सकाळी ८ ते ९-३० वाजेपार्येंत माउलींच्या पादुकांचा महाअभिषेक व महाआरती, दुपारी ४ ते ६ ह. भ. प श्री अभयमहाराज टिळक यांचे प्रवचन सायंकाळी ६ ते ७ माउलींच्या पादुकांची दिंडी सहा मिरवणूक, ७ ते ८ कीर्तन, व ८ ते १० महाप्रसाद असे या सोहळ्याचे स्वरूप आहे. अशी माहिती संतश्रेष्ठ श्री. ज्ञानेश्वर महाराज पादुका मंदिरचे मुख्य विश्वस्त श्री. संतोष उर्फ बापूसाहेब जगताप यांनी दिली. या सोहळ्यामध्ये भाविकांनी व भजनी मंडळानी मोठ्या संख्येने सहभागी व्हावे असे आव्हान विश्वस्त श्री महेश क्षीरसागर व श्री दिलीप शेळके यांनी केले आहे. मंदिराचे विश्वस्त श्री. अमेय जगताप उत्सव प्रमुख म्हणून काम पाहणार आहेत.

आशिया, आफ्रिका व युरोप या तीनही खंडाच्या सर्वोच्च शिखरावर राष्ट्रगीत वाजवणारा एकमेव मानव.

विक्रमवीर आनंद बनसोडे याने सुरु केलेल्या “वर्ल्ड पीस सेव्हन समीट” मोहिमेतील चवथे शिखर नुकतेच ३ नोव्हेंबर रोजी त्याने सर केले असून त्याअंतर्गत ऑस्ट्रेलियातील माउंट कोसिस्झ्को व इतर ९ शिखरे सर करणाऱ्या पहिल्या भारतीय टीमचे नेतृत्व करण्यचा विक्रम त्याच्या नावे झाला आहे. ही मोहीम संपवून नुकतेच सिडनी मध्ये आगमन झाल्यावर “इंडिया बुक ऑफ रेकॉर्ड’” ने आनंद ला एक सुखद आनंदचा क्षण देत त्याला त्याच्या मागच्या रेकॉर्ड ची नोंद “इंडिया बुक ऑफ रेकॉर्ड” मध्ये झाल्याचे मेलद्वारे कळवले. नुकतेच ऑस्ट्रेलिया मधील मोहीम पूर्ण करून सोलापुरात आलेल्या आनंद बनसोडे याने पत्रकार परिषदेत ही माहिती दिली.

आनंदने मे २०१२ मध्ये माउंट एव्हरेस्ट, जुलै २०१४ मध्ये युरोपातील सर्वोच्च माउंट एल्ब्रूस, ऑगस्ट २०१४ मध्ये आफ्रिकेतील सर्वोच्च किलीमांजारो व ३ नोव्हेंबर २०१४ रोजी ऑस्ट्रेलिया खंडातील सर्वोच्च माउंट कोसिस्क्को हि शिखरे सर केली आहेत. या प्रत्येक शिखरावर भारताचे राष्ट्रगीत वाजवण्याचा विक्रम त्याने केला असून या प्रत्येक मोहिमा काहीतरी वेगवेगळ्या सामाजिक विषयांना समर्पित केल्या होत्या.

सातही खंडातील सात सर्वोच्च शिखरे सर करण्याची मोहीम एव्हरेस्टवीर आनंद ने हाती घेतली असून त्यांतर्गत त्याने जगातील सात खंडातील सर्वोच्च उंचीवर भारताचे राष्ट्रगीत वाजवण्याचा एक आगळा-वेगळा विक्रम करण्याचा निर्णय घेतला आहे. ६ मे २०१२ रोजी एव्हरेस्टवरील कॅम्प-२ वर भारताचे राष्ट्रगीत वाजवून जगातल्या सर्वोच्च उंचीवर राष्ट्रगीत वाजवण्याचा विक्रम त्याने केला होता. त्याची नोंद लिम्का बुक ऑफ रेकॉर्ड, युनिक वर्ल्ड रेकॉर्ड मध्ये नोंद झाली होती.तसे प्रमाणपत्र त्याला २०१३ मध्येच मिळाले होते. २०१४ यावर्षात जागतिक शांततेची मोहीम हाती घेवून त्याने १७ जुलै रोजी युरोपातील सर्वोच्च माउंट एल्ब्रूस, १५ ऑगस्ट रोजी आफ्रिकेतील सर्वोच्च माउंट किलीमांजारो हि शिखरे सर करून त्याच्या सर्वोच्च उंचीवर भारताचे राष्ट्रगीत वाजविले होते. याशिवाय या सर्व मोहिमा वेगवेगळ्या सामाजिक विषयांना समर्पित करून गिर्यारोहणाला एक आगळी-वेगळी सामाजिक बांधिलकीची जोड दिली. आता आनंदने वाजवलेल्या राष्ट्रगीताची नोंद “इंडिया बुक ऑफ रेकॉर्ड्स” मध्ये झाली असून रेकॉर्ड बाबतीत आगळी वेगळी गोष्ट म्हणजे त्याने केलेल्या सामाजिक विषयांच्या समर्पनाचीही इंडिया बुक ने रेकॉर्ड मध्ये नोंद केली आहे. या बाबतीतले पत्रही त्याला पाठवले असून लवकरच दिल्ली मध्ये या प्रमाणपत्राचे वितरण केले जाणार आहे. असे आनंद ने सांगितले. यावेळी पत्रकार परिषदेस राजेश जगताप, स्वप्नपूर्ती चे सुरेश नारायणकर उपस्थित होते.

प्रायोजकांचे आभार-

युरोपातील माउंट एल्ब्रूस मोहीम ‘बहुजन हिताय संघ’, श्री.रत्नाकर गायकवाड व पुणे येथील सुहास गांधी यांनी प्रायोजक केली होती. आफ्रिकेतील मोहीम मुळचे सोलापूरचे असलेले उद्योजक श्री.प्रमोद साठे यांनी प्रायोजक केली होती. यांच्यामुळेच आज माझ्या मोहिमा यशस्वी झाल्या असून त्यांच्या विश्वासामुळेच आज देशाचे नाव उंचावू शकलो त्यामुळे हे यश त्यांचे आहे असे आनंद ने सांगितले.

ऑस्ट्रेलियातील मोहिमेबद्दल-

ऑस्ट्रेलियातील सर्वोच्च १० शिखरे सर करणाऱ्या प्रथम भारतीय टीमचे नेतृत्व आनंद ने केले असून हि मोहीम यशस्वी करण्यापागे गुरु सुरेंद्र शेळके यांनी खूप मोठी साथ दिली आहे असे आनंद ने सांगितले. ११ गिर्यारोहाकांपैकी पैकी ८ जणांनी १० शिखरे सर करून ऑस्ट्रेलियन गिर्यारोहण क्षेत्रात एक इतिहास नोंदला आहे. त्यामुळे कॅनबेरा येथील भारतीय दुतावासानेही आनंद व टीमचे अभिनंदन केले होते. याशिवाय आनंदने युनायटेड नेशन्सच्या स्त्री-पुरुष समानतेच्या असलेल्या हिफोरशी या मोहिमेसाठी शिखरावर ३ जोडपी व इतर गिर्यारोहकांना समानतेची शपत दिली होती. १४००० फुटावरून फ्री फॉल करून हिफोरशी मोहिमेला समर्पक अशी कामगिरी आनंदने केली आहे. या मोहिमेतून ऑस्ट्रेलियातील १० सर्वोच्च शिखरे सर करण्याचा विक्रम प्रथम भारतीय आनंद व इतर ७ जणांच्या नावे झाला आहे.

ऑस्ट्रेलिया मधील १० सर्वोच्च शिखरे सर करण्याचा विक्रम करणारी प्रथम भारतीय टीम –

यांच्या नावे झाला विक्रम- आनंद बनसोडे (टीम लीडर), आकाश जिंदाल (दिल्ली), साची सोनी(जयपूर), मनीषा वाघमारे (औरंगाबाद), शरद व अंजली कुलकर्णी (मुंबई), श्रीकांत व रुपाली चव्हाण ( पुणे).

याशिवाय टीम मधील संजना दलाल(मुंबई) व महाराष्ट्र पोलीस मधील दिनेश व तारकेश्वरी राठोड हे ऑस्ट्रेलिया मधील ५ सर्वोच्च शिखरे सर करू शकले.