पुणे- येत्या बुधवारी( 4 तारीख) पुण्यात होऊ घातलेल्या मुस्लिम आरक्षण परिषदेला पुणे पोलिसांनी परवानगी नाकारली आहे. या आरक्षण परिषदेला एमआयएमचे खासदार असावुद्दीन ओवेसी हे हजर राहणार होते. ओवेसी हे धार्मिक व वादग्रस्त वक्तव्य करण्यास पटाईत असल्याने शिवसेनेचे पुणे शहरप्रमुख विनायक निम्हण यांनी ओवेसींच्या भाषणाला व सभेला विरोध केला होता. तसेच या सभेत हिंदूंविरोधात अपशब्द काढल्यास सभा उधळून लावण्याचा इशारा शिवसेनेने दिला आहे.
पुण्यासह महाराष्ट्रातील धार्मिक ऐक्याला धक्का लागू नये, सामाजिक सलोखा बिघडू नये, या उद्देशानं वानवडी पोलिसांनी एमआयएमचे प्रमुख नेते असदुद्दीन ओवेसींच्या सभेला, मुस्लिम आरक्षण परिषदेला परवानगी नाकारली आहे. प्रक्षोभक, विखारी भाषणं करणाऱ्या ओवेसींनी हिंदू धर्माविरोधात चकारही काढल्यास त्यांची सभा उधण्याचा इशारा शिवसेनेनं दिल्यानंतर पोलिसांनी हा सावध पवित्रा घेतला आहे.
ऑल इंडिया मजलिस-ए-इत्तेहादूल मुसलमिन (एमआयएम) पक्षाचे प्रमुख असदुद्दीन ओवेसी हे ४ फेब्रुवारीला पुण्यात येणार होते. महाराष्ट्र कृती समिती आणि मूलनिवासी मुस्लिम मंचानं गोळीबार मैदानावर मुस्लिम आरक्षण परिषदेचं आयोजन केलं होतं आणि तिथे ओवेसींचं भाषण होणार होतं. आपल्या चिथावणीखोर वक्तव्यांसाठी, हिंदूविरोधी भाषणांसाठी ते ओळखले जात असल्यानं ही परिषद वादळी ठरू शकत होती. शिवसेनेनं शनिवारी ओवेसींना धमकावून तशी चा’हूल’ही दिली होती.
बुधवारी पुण्यात होणाऱ्या एमआयएमच्या सभेवरुन उद्धव ठाकरेंनी आक्रमक भूमिका घेतली आहे. पुण्यातील या सभेत हिंदूंविरोधात अपशब्द काढल्यास सभा उधळून लावा, असे आदेश उद्धव ठाकरेंनी शिवसेना नेत्यांना एका बैठकीत दिल्याचे समजते आहे. असदुद्दीन ओवेसी यांच्या एमआयएम पक्षाचे महाराष्ट्र विधानसभेच्या निवडणुकीत दोन आमदार निवडून आले आहेत. त्यामुळे आत्मविश्वास वाढलेल्या एमआयएमने महाराष्ट्रातील राजकारणात आपले पाय रोवण्यास सुरुवात केली आहे. विशेषत: मराठवाड्यात एमआयएमने ब-यापैकी लक्ष केंद्रित केले आहे. एमआयएमने आता आपला मोर्चा पुण्याकडे वळल्याने शिवसेना आक्रमक झाली आहे. हिंदू जनतेच्या भावना दुखावतील, असं जळजळीत मत ओवेसी मांडू शकतात. तसं झाल्यास आम्ही ते सहन करणार नाही. त्यांची आरक्षण परिषद आम्ही उधळून लावू आणि त्याला सर्वस्वी आयोजक जबाबदार असतील. त्यामुळे पोलिसांनी योग्य ती खबरदारी घ्यावी, असं खरमरीत निवेदन शिवसेना पुणे शहरप्रमुख विनायक निम्हण यांनी पोलीस आयुक्त सतीश माथूर यांना दिलं होतं. त्यावर, आरक्षणाचा विषय सामाजिक आहे, धार्मिक तेढ निर्माण करायचा आमचा उद्देश नाही, ओवेसींशिवायही अनेक मान्यवर या परिषदेत भाषणं करणार आहेत, असं सांगून आयोजकांनी सारवासारव करायचा प्रयत्न केला होता. परंतु, ओवेसींच्या भाषणामुळे कायदा-सुव्यवस्थेचा प्रश्न निर्माण होऊ शकतो, सामाजिक सलोखा बिघडू शकतो, असं नमूद करत वानवडी पोलिसांनी मुस्लिम आरक्षण परिषदेलाच परवानगी नाकारली आहे. हा ओवेसींसाठी मोठा झटकाच आहे. त्यांच्यावर पोलिसांचा विश्वास नसल्याचंच या निर्णयातून स्पष्ट होत असून त्यांच्या विखारी मनोवृत्तीलाच ही चपराक असल्याचं मानलं जातंय.

नवी दिल्ली – आम आदमी पक्षाने निवडणुक प्रचारासाठी भारतीय जनता पक्षाच्या मुख्यमंत्रीपदाच्या उमेदवार किरण बेदी यांचा फोटो वापरल्याने आचारसंहितेचा भंग झाला असून याप्रकरणी निवडणूक आयोगाने आपचे राष्ट्रीय सचिव पंकज गुप्ता यांना कारणे दाखवा नोटीस बजावली आहे.
दिल्लीच्या मुख्य निवडणूक अधिकाऱ्यांनी गुप्ता यांना याप्रकरणी सोमवारी संध्याकाळी 6 वाजेपर्यंत खुलासा कळविण्यास सांगितले आहे. याप्रकाराची दखल घेतली नाही तर कारवाई करण्याचा इशाराही दिला आहे. भारतीय जनता पक्षाचे सतिश उपाध्याय यांनी किरण बेदी यांची परवानगी न घेता छायाचित्र प्रसाराकरिता वापरल्याची तक्रार आयोगाकडे केली होती. तसेच जाहीरातीमध्ये बेदी यांना “अवसरवादी‘ संधीसाधू म्हटले होते. दरम्यान याप्रकरणी शनिवारपर्यंत सार्वजनिक ठिकाणचे 1763 होर्डिंग हटविण्यात आले असून 138 तक्रारी दाखल करून घेण्यात आल्या होत्या. शनिवारी आचारसंहितेच्या भंगप्रकरणी विविध ठिकाणांहून एकूण 22,069 जणांना ताब्यात घेण्यात आले आहे. तर हत्यारांचे 598 परवाने जप्त करण्यात आले असून बेकायदेशीरित्या बाळगण्यात आलेली 28 हत्यारे आणि 1107 काडतुसे जप्त करण्यात आली आहेत.

पुणे- खबरदार , देशद्रोही वक्तव्ये कराल ; हिंदुविरोधी चकार शब्द काढाल तर हा हिंदुस्तान आहे पाकिस्तान नाही अशा स्पष्ट शब्दात पुण्यातील शिवसेनेने ओवेसी ला इशारा दिला आहे त्या अनुषंगाने आपल्या भडकाऊ भाषणांसाठीच ओळखले जाणारे एमआयएमचे (ऑल इंडिया मजलिस-ए-इत्तेहादुल मुसलमिन) नेते असदुद्दीन ओवेसी यांची पुण्यात होणारी सभा उधळण्याची धमकी शिवसेनेनं दिल्यानं राजकीय वातावरण तापलं आहे. ओवेसींनी हिंदूविरोधी चकार जरी काढला, तरी आम्ही तो सहन करणार नाही, त्याचे तीव्र पडसाद उमटतील, असा पवित्रा शिवसेनेनं जाहीर केलाय आणि विशेष म्हणजे याबाबत पुण्याच्या पोलीस आयुक्तांना शिवसेना शहराध्यक्ष विनायक निम्हण यांनी पत्र देवून अगोदरच सूचित केल्याचे वृत्त आहे
महाराष्ट्र कृती समिती आणि मुलनिवासी मुस्लिम मंचानं येत्या ४ फेब्रुवारीला पुण्याच्या गोळीबार मैदानावर मुस्लिम आरक्षण परिषद आयोजित केली आहे. त्यासाठी त्यांनी अनेक मान्यवरांना आमंत्रित केलं असून त्यात एमआयएमचे प्रमुख असदुद्दीन ओवेसी यांचाही समावेश आहे. मुस्लिम आरक्षण या विषयावर ते आपलं मत मांडणार आहेत. त्यामुळे पुण्यात सगळ्यांचेच कान टवकारले आहेत. चिथावणीखोर भाषणं करून हिंदू-मुस्लिमांमध्ये तेढ निर्माण करण्याचाच प्रयत्न ओवेसींनी अनेकदा केला आहे. हिंदूंना लक्ष्य करून मुस्लिमांना भडकवणारी भाषा ते सतत करताना दिसतात. त्यामुळे मुस्लिम आरक्षणावरचं त्यांचं भाषणही जहाल असू शकतं. हे ओळखूनच शिवसेना आक्रमक झाली आहे.
हिंदू जनतेच्या भावना दुखावतील, असं जळजळीत मत ओवेसी मांडू शकतात. तसं झाल्यास आम्ही ते सहन करणार नाही. त्यांची आरक्षण परिषद आम्ही उधळून लावू आणि त्याला सर्वस्वी आयोजक जबाबदार असतील. त्यामुळे पोलिसांनी योग्य ती खबरदारी घ्यावी, असं खरमरीत निवेदन शिवसेना पुणे शहरप्रमुख विनायक निम्हण यांनी पोलीस आयुक्त सतीश माथूर यांना दिलंय. त्याची दखल घेऊन, ओवेसींच्या सभेदरम्यान शहरातील कायदा-सुव्यवस्था बिघडू नये, यादृष्टीनं पोलिसांनीही पूर्ण तयारी केली आहे.
दरम्यान, मुस्लिम आरक्षण परिषदेचा कार्यक्रम हा राजकीय विषय नसून तिथे एकट्या ओवेसींचंच भाषण होणार नसल्याचं आयोजकांनी नमूद केलंय. न्या. बी जे कोळसे पाटील हे या परिषदेतील प्रमुख वक्ते आहेत, तर आम आदमी पार्टी, रिपब्लिक युवा मोर्चा, छावा युवा संघटनेच्या नेत्यांनाही आमंत्रित करण्यात आल्याचं त्यांनी सांगितलं. आरक्षणाचा विषय सामाजिक आहे, धार्मिक तेढ निर्माण करायचा आमचा उद्देश नाही, असंही त्यांनी स्पष्ट केलं. तसं असलं तरी, ओवेसींचा शब्द न् शब्द शिवसेना कान देऊन ऐकणार आहे आणि तो न पटल्यास आपल्या ‘स्टाइल’नं उत्तर देणार आहे. त्यामुळे पुण्यातील राजकीय वातावरणात तणाव जाणवतोय.

नवी दिल्ली- दिल्लीतील निवडणुकीच्या महाभारतात आम आदमी पार्टीचे(आप) संयोजक अरविंद केजरीवाल यांच्यावर प्रचारकी हल्ल्यासाठी बनविलेल्या व्यंगचित्राने भाजपाची अडचण वाढविली आहे. या व्यंगचित्रात ज्येष्ठ सामाजिक कार्यकर्ते अण्णा हजारे यांच्या प्रतिमेला पुष्पहार घातलेला असल्याने वाद पेटला आहे. ‘आप’ने या मुद्द्यावरून लक्ष्य बनविताच भाजपाला उत्तर देणे अवघड झाले आहे. केजरीवाल मुुलांच्या डोक्यावर हात ठेवत शपथ घेत असतानाच काँग्रेसशी हातमिळवणी करीत असल्याचे दाखविण्यात आले आहे. अण्णांच्या प्रतिमेला हार दाखवत भाजपाने जणू त्यांची हत्या केली असून, त्याबद्दल भाजपाने माफी मागावी, अशी मागणी केजरीवाल यांनी केली
भाजपने दिल्ली विधानसभा निवडणुकीच्या जाहिरातीत आम आदमी पक्षाचे नेते अरविंद केजरीवाल यांना लक्ष्य बनविताना एका जाहिरातीत समाजसेवक अण्णा हजारे यांच्या छायाचित्राला चक्क हार घातल्याने भाजप पुन्हा वादाच्या भोवऱ्यात अडकला आहे.
भाजपने एका निवडणूक जाहिरातीत केजरीवाल हे मुलांच्या डोक्‍यावर हात ठेवून शपथ घेत आहेत असे दाखविले आहे. त्यांच्या बाजूला एका स्त्रीचे चित्र असून, तिच्या डोक्‍यावरील टोपीवर कॉंग्रेस असे लिहिले आहे. मागे अण्णांचे छायाचित्र असून, त्याला दिवंगत नेत्यांना घालतात तसा हार घातलेला दाखविला आहे. “सत्तेसाठी मी मुलांची खोटी शपथ घेईन व तरीही रात्रंदिवस प्रामाणिकपणाचा डांगोरा पिटेन‘ असे केजरीवाल म्हणताना यात दाखविले गेले आहेत.

मुंबई -काँग्रेस नेते नारायण राणे यांना कोकणात आणखी एक धक्का बसला असून राणेंचे कट्टर समर्थक आणि कुडाळमधील प्रमुख पदाधिकारी संजय पडते शिवसेनेच्या गळाला लागले आहेत. पडते मातोश्री निवासस्थानी दाखल झाले असून ते शिवसेनेत प्रवेश करणार असल्याचे सांगण्यात आले.

पुण्यातील राणेसमर्थक माजी आमदार विनायक निम्हण यांनी तीन दिवसांपूर्वीच शिवसेनेत प्रवेश केला असताना आज राणे यांच्या भात्यातून आणखी एक तीर निसटला आहे. कोकणातील बदललेले वारे लक्षात घेऊन सिंधुदुर्ग जिल्हा परिषदेचे माजी अध्यक्ष संजय पडते यांनी स्वगृही म्हणजेच शिवसेनेत परतण्याचा निर्णय घेतला आहे.

संजय पडते आपल्या समर्थकांसह आज शिवसेना पक्षप्रमुख उद्धव ठाकरे यांची भेट घेऊन शिवसेनेत प्रवेश करत आहेत. पडतेंचा शिवसेना प्रवेश राणे यांची अस्वस्थता वाढवणाराच ठरणार आहे. पडते हे राणे यांची सावलीच मानले जात होते. राणे यांनी शिवसेना सोडली तेव्हापासून पडते राणेंसोबत होते. मात्र, गेल्या काही महिन्यांपासून विशेषत: लोकसभा निवडणुकीतील नीलेश राणे यांचा पराभव आणि विधानसभा निवडणुकीतील नारायण राणे यांच्या पराभवाने वातावरण बिनसलं होतं. राणे यांच्या दोन्ही मुलांच्या कार्यपद्धतीवर पडते हे नाराज होते. त्यातूनच त्यांनी राणेंचा आश्रय सोडण्याचा निर्णय घेतल्याचेही सांगण्यात येत आहे.