पुणे- माहिती आणि प्रसारण मंत्रालय, फिल्म अँड टेलिव्हीजन इन्स्टिट्यूट ऑफ इंडिया (एफटीआयआय) यांच्या वतीने आयोजित तिसरा राष्ट्रीय विद्यार्थी चित्रपट पुरस्कार आणि विद्यार्थी चित्रपट महोत्सव २४ ते २८ फेब्रुवारीदरम्यान होणार आहे.

या महोत्सवात देशविदेशातील २२ संस्थांमधील ६६ चित्रपट स्पर्धा विभागासाठी निवडण्यात आले असून, महोत्सवात साडेतीनशेपेक्षा जास्त लघुपट बघण्याची संधी मिळणार आहे, अशी माहिती एफटीआयआयचे संचालक डी. जे. नारायण यांनी शनिवारी पत्रकार परिषदेत दिली.

चित्रपटाचा अभ्यास करणार्‍या विद्यार्थ्यांना प्रोत्साहन देण्याच्या उद्देशाने या महोत्सवाचे आयोजन केले जाते. मागील वर्षीचा महोत्सव सत्यजित रे एफटीआयआय कोलकाता येथे झाला होता.

याविषयी बोलताना नारायण म्हणाले, महोत्सवाचे उद््घाटन २४ फेब्रुवारीला अभिनेते शत्रुघ्न सिन्हा आणि दिग्दर्शक अदुर गोपालकृष्णन यांच्या हस्ते सायंकाळी ६ वाजता एफटीआयआय येथे होणार आहे. महोत्सवात एकूण ३७५ चित्रपट, लघुपट पाहण्याची संधी रसिकांना मिळणार आहे. एफटीआयआय प्रीव्ह्यू थिएटर, मेन थिएटर येथे चित्रपट दाखविले जाणार आहेत महोत्सवामध्ये २५ फेब्रुवारीला सायंकाळी ६ वाजता क्र.१ च्या स्टुडिओमध्ये सुफी कार्यक्रमाचे आयोजन करण्यात आले आहे. हा कार्यक्रम मदन गोपाल सिंग, प्रीतम घोशाल, दीपक कॅस्टेलिनो आणि गुरुमितसिंग खोखार सादर करतील. २७ फेब्रुवारीला सायं. ६ वाजता याच ठिकाणी ज्येष्ठ अभिनेते टॉम अल्टर हे एका बेन्जामिन ग्रुपबरोबर यादी हे नाटक सादर करणार आहेत.राष्ट्रीय विद्यार्थी चित्रपट महोत्सवाच्या निमित्ताने गुरूंचा सन्मान म्हणून यावर्षीपासून एफटीआयआयमध्ये विद्यार्थी घडविणार्‍या शिक्षकांचा जीवनगौरव पुरस्काराने सन्मान करण्यात येणार आहे. १९६२ ते नव्वदच्या दशकापर्यंत एफटीआयआयच्या विद्यार्थ्यांना सिनेमॅटोग्राफीचे प्रशिक्षण देणारे के. पी. आर. नायर आणि १९६७ पासून आजपर्यंत विद्यार्थ्यांना अभिनयाचे धडे देणार्‍या रोशन तनेजा यांना पहिला जीवनगौरव सन्मान प्रदान करण्यात येणार आहे.

पुणे- नागरी विकासाच्या विभागासमोर वाढत्या नागरीकरणाचे फार मोठे आव्हान आहे. आताची

प्रशासकीय सेवा ही ब्रिटीशकालीन आहे. शहरांच्या वाढत्या नागरीकरणाच्या समस्येबरोबरच,

सांडपाणी, घनकचरा अशी अनेक आव्हाने आहेत. या समस्यांची सोडवणूक करण्याकरीता

प्रशासकीय सेवेत मोठे बदल करणे आवश्यक आहे असे मत माजी मुख्यमंत्री पृथ्वीराज चव्हाण

यांनी व्यक्त केले.

पुणे महानगरपालिका व उपमहापौर आबा बागुल यांच्या पुढाकाराने बालगंधर्व रंगमंदिर येथे

‘लोकसखा’हा कृतज्ञता सोहळा पार पडला, त्यावेळी ते बोलत होते. १९५२ पासून ते आत्तापर्यंतच्या

पुणे महानगपालीकेत उपमहापौरपद भूषविलेल्या माजी उपमहापौरांचा विशेष सत्कार मानाचा फेटा,

शाल, मानपत्र, व त्यांचे रेखाचित्र प्रदान करून करण्यात आला. जुन्या काळातील उपमहापौर,

हयात नसलेल्यांचे कुटुंबीय याने भरलेले  व्यासपीठ, जेष्ठ नेत्यांनी जागविलेल्या आठवणी, प्रत्येक

उपमहापौराने आपल्या कारकिर्दीत केलेले पुण्याच्या विकासाठीचे योगदान अशा आठवणींना उजाळा

यानिमित्ताने दिला गेला आणि काळाच्या पडद्याआड गेलेल्या या माजीमहापौरांना व त्यांच्या

कुटुंबीयांनाही कृत्य-कृत्य झाल्यासारखे वाटले. यावेळी आत्तापर्यंतच्या सर्व उपमहापौरांची थोडक्यात

माहिती देणारी चित्रफित दाखविण्यात आली. माजी उपमहापौर दीपक मानकर यांच्या हस्ते सर्व

माजी उपमहापौरांच्यावतीने आबा बागुल यांचा सत्कार करण्यात आला. तसेच माजी उपमहापौरांची

रेखाचित्र तयार करणाऱ्या अभिनवच्या विद्यार्थ्यांचा विशेष सत्कार करण्यात आला.

राज्याचे अन्न व नागरी पुरवठामंत्री गिरीश बापट, जेष्ठ नेते उल्हास पवार, आमदार शरद

रणपिसे, आमदार दीप्ती चवधरी, माजी मंत्री चंद्रकांत छाजेड, माजी आमदार मोहन जोशी,

म्हाडाचे माजी अध्यक्ष अंकुश काकडे, उपमहापौर आबा बागुल, युवक कॉंग्रेसचे प्रदेशाध्यक्ष डॉ.

विश्वजित कदम तसेच माजी महापौर व त्यांचे कुटुंबीय मोठ्या संख्येने यावेळी उपस्थित होते.

पृथ्वीराज चव्हाण म्हणाले, महानगरपालिका हा लोकशाहीचा आत्मा आहे. नगरविकासाचे काम

यामाध्यमातूनच होत असते. विकासाचे नियोजन करणे, अर्थकारण, या सर्व गोष्टी याठिकाणी

केल्या जातात. ही कामे चांगल्या पद्धतीने करण्यासाठी जनता विश्वास टाकते व त्यामुळे

अनेकजन उपमहापौर पदापर्यंत पोहचले आहेत. प्रदूषण, वाहतुकीचे प्रश्न अशा इतरही समस्या

महानगरपालिकेसमोर आहेत. पुणे हे सांस्कृतिक शहर आहे. त्याचप्रमाणे शैक्षणिक व्यापारीकरण

व औद्योगीकरण मोठ्या प्रमाणावर झाले आहे. त्यामुळे मोठी  आव्हाने झपाट्याने वाढत आहेत.

त्याचा सामना करण्यासाठी चुका होवू न देणे ही सर्वांची जबाबदारी आहे.

पुण्याच्या विकासात आजपर्यंतच्या सर्व उपमहापौरांनी भर टाकली आहे.  प्रत्येक उपमहापौराने

पुणेकरांची व आपापल्या पक्षाची सेवा केली आहे. आताच्या पिढीला आठवण होईल असे काम

केले आहे. त्यांच्याप्रती कृतज्ञता व्यक्त करण्यासाठी व पदाला सन्मान देण्यासाठी असा सोहळा

करणे आवश्यक आहे असेही चव्हाण यांनी नमूद केले.

गिरीश बापट म्हणाले, महानगरपालिकेतील राजकारणात रुसवे, फुगवे, मान, अपमान, खुन्नस

अशा सर्व गोष्टी असतात. परंतु त्याही पलीकडे जावून प्रत्येकाने एकमेकांना प्रेम दिले हे पुणे

महानगरपालिकेचे वैशिष्ट्य आहे. पक्षाची भूमिका मांडताना सभागृहात एकमेकांशी भांडत असलो

तरी नंतर कौटुंबिक वातावरण असते हा पुण्याचा सांस्कृतिक ठेवा आहे. राज्यात किंवा देशात

अशा प्रकारचे वातावरण बघयला मिळणार नाही. जास्तीत जास्त चांगले काम करणारा उपमहापौर

म्हणून उदाहरण द्यायचे झाल्यास आबा बागुल यांचेच उदाहरण द्यावे लागेल असे सांगून गिरीश

बापट म्हणाले, आबा बागुल यांनी सर्व माजी उपमहापौरांना एकत्र आणण्याचे कठीण काम केले

आहे. त्यामुळे आजचा हा सोहळा आगळावेगळा सोहळा आहे.

उल्हास पवार यांनी आपल्या भाषणात अनेक महापौरांच्या काळातील किस्से, प्रत्येकाच्या

व्यक्तिमत्वाची वैशिष्ट्ये, त्यांची काम करण्याची हातोटी याच्या आठवनींना उजाळा दिला.

डॉ. सतीश देसाई यांनी आपले मनोगत व्यक्त करताना, पुण्याच्या सार्वजनिक इतिहासात अशा

प्रकारचा हा पहिला कार्यक्रम असल्याचे सांगून आबा बागुल यांचे कौतुक केले.

दीपक मानकर म्हणाले, उपमहापौर हा केवळ आभार मानण्यासाठी नको. त्याला त्याची भूमिका

स्पष्ट मांडता आली पाहिजे. मुख्यमंत्री, उपमुख्यमंत्री यांची निवड ज्या पद्धतीने केली जाते त्या

पद्धतीने दिलेल्या योगदानाची व कार्याची दिशा घेवून महापौर व उपमहापौर पदाची निवड

व्हायला पाहिजे असे मत त्यांनी व्यक्त केले.

आबा बागुल आपल्या स्वागतपर भाषणात म्हणाले, पुण्याच्या विकासात आजपर्यंत ज्या

उपमहापौरांनी योगदान दिले त्यांची उर्जा पुन्हा एकदा एकत्रित करावी हा या सोहळ्यामागचा हेतू

आहे. राष्ट्रपती, उपराष्ट्रपती ही पदे जशी घटनात्मक पदे  आहेत. तशीच महापौर व उपमहापौर हे

पडे आहेत. दोन्ही पदांना निवडून यावे लागते.त्यामुळे उपमहापौर पदही तितकेच महत्वाचे असून

त्याला अधिकार मिळणे आवश्यक आहे. पुण्यामध्ये पहिले  महापौर बाबुराव सणस यांचा पुतळा

आहे. त्याचप्रमाणे पहिले महापौर बापूसाहेब पारगे यांचा पुतळा उभारण्याचा संकल्प आबा बागुल

यांनी यावेळी  व्यक्त केला.

कार्यक्रमाचे सूत्रसंचालन सुधीर गाडगीळ यांनी तर आभार प्रदर्शन माजी नगरसेवक गोपाल तिवारी

यांनी केले.

पुणे :

‘भारती विद्यापीठाच्या इन्स्टिट्यूट ऑफ मॅनेजमेंट अ‍ॅण्ड आंत्रप्रुनरशीप डेव्हलपमेंट’ (आयएमईडी)च्या आंतरराष्ट्रीय सांस्कृतिक महोत्सव ‘एक्सप्रेशन 2015’ ची सांगता नुकतीच झाली. महोत्सवातील स्पर्धांमध्ये 45 महाविद्यालयातील 150 संघातून एकूण 1800 विद्यार्थी सहभागी झाले होते. भारती विद्यापीठ विश्‍वविद्यालयाच्या व्यवस्थापन शाखेचे अधिष्ठाता डॉ. सचिन वेर्णेकर यांच्या हस्ते ‘एक्सप्रेशन 2015’ महोत्सवातील विजेत्यांना पारितोषिके देण्यात आली.

यावेळी प्रा.अनिल केसकर (अ‍ॅकॅडमिक्स सिम्बायोसिस इंटरनॅशनल विद्यापीठाचे अधिष्ठाता) , सौ.केसकर, डॉ.ए.एम.गुरव (व्यवस्थापन विभागाचे अधिष्ठाता, शिवाजी विद्यापीठ) आदी मान्यवर उपस्थित होते.

या महोत्सवाचे उद्घाटन ‘सायबर सेल’चे पुणे पोलिस उपायुक्त डॉ. संजय शिंदे आणि प्रकाश लिमये यांनी केले होेते. महोत्सवाला हेमंत अभ्यंकर, डॉ. भारत भूषण संकाय, माजी पोलीस अधिकारी प्रकाश लिमये, प्रभात कुमार, बलजित, श्री. महादे उपस्थित होेते.

महोत्सवाचे तांत्रिक, व्यवस्थापन, ललित कला आणि सादरीकरण या चार विभागात विभाजन करण्यात आले होते . या महोत्सवाला पी.एन.जी., पुणे फुटबॉल क्लब, बिग बझार, मदर्स रेसीपी, बँक ऑफ महाराष्ट्र, 1960 रेस्टॉरंट, डायनॅमिक्स पार्लर यांचे सहकार्य लाभले होते.

डॉ. शिंदे यांनी पहिल्या दिवसाच्या सत्रात राष्ट्रीय मालमत्ता, पायाभूत सुविधांचे ‘सायबर वॉर’मुळे नुकसान होत असेल, तर त्यापासून देशाला वाचविणे कसे आवश्यक आहे याबाबत मार्गदर्शन केले. तसेच डॉ. सचिन वेर्णेकर यांनी विद्यार्थ्यांना व्यवस्थापनशास्त्र संस्थांनी ग्रामीण भागात, अविकसित भागात उद्योजकता वाढवून शाश्‍वत विकासाकडे वाटचाल करावी, असे आवाहन केले.

या महोत्सवात सांस्कृतिक स्पर्धा, पोस्टर मेकिंग, फॅशन शो, फेस पेंटींग, रांगोळी, मेहंदी, अ‍ॅड मॅड शो असे कार्यक्रम आयोजित करण्यात आले होते.

महोत्सवाचे विनय थापलिया, छबी, अरूणवा दत्ता, नेहा जसपाल, केतन यांनी संयोजन केले.

पुणे :

‘भारतातील प्रगती दरडोई उत्पन्नामधून प्रतीत होत आहे. भारतीय कंपन्या जगात पुढे जाऊ शकतील अशी परिस्थिती निर्माण झाली आहे. अशा परिस्थितीत भारतातील विद्यार्थी, उद्योजक आणि मध्यमवर्गाने जागतिक भान ठेऊन सकारात्मक आणि नावीन्यपूर्ण व्यवसाय संकल्पनांवर भर द्यावा’ असे आवाहन ‘सँडविक एशिया लि.’चे कार्पोरेट सल्लागार डॉ.संजय बसू यांनी शुक्रवारी केले.

‘चेकमेट -15’ या 7 व्या आंतरराष्ट्रीय परिषदेचे आयोजन ‘अल्लाना इन्स्टिट्यूट ऑफ मॅनेजमेंट सायन्सेस’ तर्फे  करण्यात आले आहे. या परिषदेच्या उद्घाटन समारंभात ते बोलत होते. ‘महाराष्ट्र कॉस्मॉपॉलिटन एज्युकेशन सोसायटी’चे अध्यक्ष पी.ए.इनामदार हे अध्यक्षस्थानी होते.

.‘व्यवस्थापनातील प्रभावी आणि नाविन्यपूर्ण पद्धती’ या विषयावरील ‘चेकमेट 15’ ही दोन दिवसीय परिषद शुक्रवार दि. 20 फेब्रुवारी व शनिवार 21 फेब्रुवारी 2015 रोजी सकाळी 9 ते सायंकाळी 5 वाजेपर्यंत ‘महाराष्ट्र कॉस्मॉपॉलिटन एज्युकेशन सोसायटी’च्या ऑडिटोरियम (आझम कॅम्पस ) येथे सुरु आहे. ‘अल्लाना इन्स्टिट्यूट ऑफ मॅनेजमेंट सायन्सेस’ चे संचालक डॉ. आर. गणेसन यांनी प्रास्ताविक केले. यावेळी व्यासपीठावर डॉ.रोशन काझी, प्रा.जावेद खान उपस्थित होते. भाग्यश्री चव्हाण यांनी सूत्रसंचालन केले.

डॉ.बसू म्हणाले, ‘बाजारपेठेच्या गरजेनुसार नावीन्यपूर्ण कल्पना जन्माला येतात आणि बाजारपेठेला उपयुक्त वाटल्या तरच त्यांना वाव मिळतो. हे लक्षात घेतले तर भारतातील प्रबळ अशा उद्योजक, मध्यमवर्ग आणि विद्यार्थ्यांना जागतिकस्तरावर चमकण्यासाठी सकारात्मक दृष्टीकोण ठेऊन नावीन्यपूर्ण कल्पनांचा पाठपुरावा केला पाहिजे. भारतातील खासगी क्षेत्र जागतिक स्पर्धेत उतरले असून अग्रस्थानी आहे. भारतीय बहुराष्ट्रीय कंपन्या चांगली कामगिरी नोंदवत आहेत, असेही त्यांनी सांगितले.

अध्यक्षस्थानावरून बोलताना पी.ए.इनामदार म्हणाले, ‘भारतीय व्यवस्थापनशास्त्र विद्यार्थ्यांच्या प्रगतीत पैसा हा अडथळा नाही तर कष्ट करण्याची प्रवृत्ती, प्रामाणिकपणा आणि संशोधक वृत्ती मात्र प्रगतीसाठी आवश्यक आहे.’

‘सँडविक एशिया लि.’चे कार्पोरेट सल्लागार डॉ. संजय बसू हे या आंतरराष्ट्रीय परिषदेचे प्रमुख पाहुणे म्हणून उपस्थित होते.

प्रा.एस. रंगनाथन, दीपक नंदा, किरण भट, अपूर्व नागपाल, तरुण मालविया, अमित अगरवाल, डॉ.दीपक मल्होत्रा, डॉ.रणजीव मानराव, झुबीन पूनावाला, संदीप दवे, पंकज कुमार हे वक्ते परिषदेत मार्गदर्शक म्हणून उपस्थित आहेत.

तर विविध चर्चासत्रांना डॉ. प्रशांत गुंडावार, डॉ.डी.बी.भारती, डॉ.ए.यू.खान, डॉ.सचिन कदम, डॉ. अमोल गोजे, डॉ.ए.बी.राव हे अध्यक्षस्थान भूषवित आहेत.

पुणे :

शिवजयंतीनिमित्त महापौर दत्तात्रय धनकवडे, उपमहापौर आबा बागुल व महापालिका आयुक्त कुणाल कुमार यांनी सकाळी प्रथम पुण्याचे ग्रामदैवत कसबा गणपती व तांबडी जोगेश्‍वरीमातेचे पूजन केले. त्यानंतर शहरातील विविध ठिकाणी असणार्‍या शिवाजी महाराज यांच्या पुतळ्यांना पुष्पहार अर्पण करण्यात आला. महापौर आणि उपमहापौरांनी एसएसपीएमएस शाळेतील व लालमहाल येथील राजमाता आणि शिवाजी महाराज यांचा पुतळा, कोथरूड येथील अश्‍वारूढ पुतळ्यास, तसेच सभागृहाजवळील त्यांच्या छायाचित्रास पुष्पहार अर्पण करून अभिवादन केले. शिवजयंती उत्सवानिमित्त लाल महाल येथे शिवजयंतीच्या पूर्वसंध्येला शाहिरी पोवाड्यांचा कार्यक्रम झाला.
पुणे शहर राष्ट्रवादी काँग्रेसच्या वतीने शिवाजी महाराजांच्या प्रतिमेला अभिवादन केले. पक्ष कार्यालयात सामाजिक कार्यकर्ते शफी मामू शेख यांच्याहस्ते शिवरायांच्या प्रतिमेस पुष्पहार अर्पण करण्यात आला. खासदार अँड़ वंदना चव्हाण यांच्या अध्यक्षतेखाली हा कार्यक्रम पार पडला. याप्रसंगी आनंद रिठे, शंकर शिंदे, शालिनी जगताप, समीर निकम, संजय लाड, आनंद कारंडे, सुरेश पवार, बाळासाहेब आहेर, दिनेश खैरे, योगेश वराडे, अविनाश वेल्हाळ आदी मान्यवर उपस्थित होते.
कॉंग्रेस भवन येथील शिवाजी महाराजांच्या पुतळ्यास शहराध्यक्ष अभय छाजेड यांच्याहस्ते पुष्पहार अर्पण करण्यात आला. यावेळी नीता राजपूत, सचिन आडेकर, राजेंद्र भुतडा, श्ांकर राठोड, उमेश कंधारे, रामचंद्र भुवड, अतुल कारले, शशी बिबले, रविंद्र म्हसकर, राजू गायकवाड उपस्थित होते. पुणे महिला काँग्रेसच्या अध्यक्षा सोनाली मारणे यांनी महाराजांना पुष्पहार अर्पण केला. यावेळी सीमा सावंत, स्वाती कथलकर, गीता गारू, जया पारख, आरती गायकवाड आदी महिला बहुसंख्येने उपस्थित होत्या.शिवजयंतीनिमित्त गुरुवारी महापौर दत्तात्रय धनकवडे यांनी शिवरायांच्या अश्‍वारुढ पुतळ्याला पुष्पहार अर्पण करुन अभिवादन केले.शुक्रवार, २0 फेब्रुवारी २0१५पुणेशिवसंग्राम पुणे शहर व जिल्हा यांच्या विद्यमाने शिवप्रतिमेची मिरवणूक काढण्यात आली. महात्मा जोतिबा फुले यांनी सर्वांत प्रथम १८७४ साली शिवाजी महाराजांच्या प्रतिमेची मिरवणूक हिराबागेतून सुरू केली, त्याच ठिकाणाहून यंदाच्या मिरवणुकीचा प्रारंभ झाला. यावेळी तुषार काकडे, शिवराज मोरे, रविंद्र भोसले, स्वप्नील खडके, भोलाशेठ वांजळे, सचिन कांबळे, तानाजी गंभीरे, सागर फाटक, संजय ढोले यांनी परिश्रम घेतले.
कोथरूड ब्लॉक काँग्रेस कमिटी व अखिल वनाज कॉर्नर दहीहंडी उत्सव समितीच्या वतीने शिवजयंतीचे आयोजन करण्यात आले होते. अखिल भारतीय मराठा महासंघातर्फे नगरसेवक राजेंद्र शिळीमकर यांच्या हस्ते मार्केट यार्ड परिसरातील महाराजांच्या पुतळ्यास पुष्पहार अर्पण करण्यात आला. प्रमुख पाहुणे युवराज बेलदरे-पाटील होते. नामदेव मानकर, अनिल मारणे, मीना जाधव, युवराज दिसले उपस्थित होते.
सावित्रीबाई फुले पुणे विद्यापीठात कुलगुरू डॉ. वासुदेव गाडे यांच्या उपस्थितीत शिवजयंती साजरी करण्यात आली. बीसीयुडीचे संचालक डॉ. व्ही. बी. गायकवाड यांनी व्याख्यान आयोजित केले होते. रिपब्लिकन पार्टी ऑफ इंडिया आठवले गटातर्फे लाल महाल येथील शिवाजी महाराजांच्या पुतळ्यास लीगल सेलच्या अध्यक्षा डॉ. चित्रा जानगुडे यांच्याहस्ते पुष्पहार अर्पण करण्यात आला. यावेळी महेश शिंदे, अशोक शिरोळे, शैलेंद्र चव्हाण, वसंत बनसोडे, शांतिनाथ चव्हाण, हलिमा शेख, बंडू वाघमारे उपस्थित होते. शिवछत्रपती प्रतिष्ठान व टुडेज यूथ यांच्या संयुक्त विद्यमाने पारंपरिक पद्धतीने शिवजयंती साजरी करण्यात आली. किल्ले सिंहगड ते किरकीटवाडी अशी शिवज्योतीची मिरवणूक महिलांच्या हस्ते काढण्यात आली. यावेळी मशाल पेटवण्याचा मान महिलांनाच देण्यात आला होता. पारंपरिक वेशभूषेतील महिलांनी ढोल-ताशांच्या गजरात मिरवणुकीमध्ये सहभाग घेतला. मिरवणुकीच्या समारोपाच्या वेळी उपस्थित महिलांनी पाळणा गाऊन शिवजन्मोत्सव साजरा केला.महाराष्ट्र कॉस्मॉपॉलिटन एज्युकेशन सोसायटीमधील २९ शैक्षणिक संस्थांच्या दहा हजार अल्पसंख्याक विद्यार्थ्यांनी आज सकाळी शिवजयंतीनिमित्त भव्य मिरवणूक काढून शिवाजी महाराजांना मानवंदना दिली. मिरवणुकीचे उद््घाटन पुणे शहर जिल्हा काँग्रेस कमिटीचे अध्यक्ष अँड़ अभय छाजेड, संभाजी ब्रिगेडचे संस्थापक-अध्यक्ष पुरुषोत्तम खेडेकर, एम.सी.ई. सोसायटीचे अध्यक्ष पी. ए. इनामदार, डॉ. एन. वाय. काझी यांच्या उपस्थितीत झाले.
यावेळी एस. ए. इनामदार, अझीम गुडाकुवाला, मजिद उस्मान दाऊद, खालिद अन्सारी, अरीफ सय्यद, शराफत पानसरे, वाहिद बियाबानी, बद्रुद्दीन शेख, प्रा. डॉ. व्ही. एन. जगताप, डॉ. किरण भिसे, डॉ. शैला बूटवाला, मुमताज सय्यद, दानीश शेख, तसेच सर्व शैक्षणिक संस्थांचे प्राचार्य व पदाधिकारी मोठय़ा संख्येने सहभागी झाले होते.
मिरवणुकीमध्ये संस्थेच्या कला महाविद्यालयाने सादर केलेला छत्रपती शिवाजी महाराजांचा शिवनेरी किल्ल्यावरील जन्मोत्सवाचा देखावा विशेष आकर्षण ठरला. दरबार बँडची दोन पथके, ढोल-ताशा, इंग्रजी माध्यम शाळेचे बँजो पथक सहभागी झाले होते. या उपक्रमांचे यंदाचे बारावे वर्ष आहे. मिरवणुकीचे नेतृत्व संस्थेचे सचिव लतिफ मगदूम यांनी केले.

हिंदवी स्वराज्याचे संस्थापक छत्रपती शिवाजी महाराज यांचे सुपुत्र छत्रपती संभाजी महाराज यांचा वादळी जीवनपट उलगडून सांगणारे छावा हे नवीन नाटक येत्या 1 मार्च रोजी रंगमंचावर येत आहे. गणेश कला, क्रीडा, मंच येथे सकाळी 10.30 वाजता या नाटकाचा शुभारंभ पार पडणार आहे. अशी माहिती शिवसुर्य परिवाराचे संस्थापक अध्यक्ष रामदास हरगुडे यांनी  दिली.
छ.संभाजी ही प्रमुख भूमिका साकारणारे डॉ.अमोल कोल्हे, ज्येष्ठ कलाकार रवी पटवर्धन, ;लेखक, दिग्दर्शक महेंद्र महाडिक, गायिका किर्ती पाठक, सत्यशिल दाभाडे आदी मान्यवर उपस्थित होते. याप्रसंगी शिवसुर्य परिवार निर्मित, राजदीप प्रॉडक्‍शन प्रस्तूत छावा या दोन अंकी ऐतिहासिक नाटकाच्या ध्वनीफितीचे प्रकाशन करण्यात आले. सात्विक ठकार यांनी हे गीतलेखन केले असून देवेंद्र भोमे यांनी संगीत दिले आहे.
शंभुराजांच्या प्रेरणादायी इतिहासाला तेवत ठेवण्याच्या उदेशाने सुरु करण्यात आलेल्या या नाटकाच्या पहिल्या प्रयोगाचे उदघटन खासदार उदयनराजे भोसले, युवराज संभाजीराजे छत्रपती यांच्या हस्ते होणार आहे. यावेळी पालकमंत्री गिरीश बापट, केंद्रीय पर्यावरणमंत्री प्रकाश जावडेकर, जलसंपदा राज्यमंत्री विजय शिवतारे, सामाजिक न्यायमंत्री दिलीप कांबळे, खासदार अनिल शिरोळे, सुप्रिया सुळे, शिवाजीराव आढळराव पाटील, आदी उपस्थित राहणार आहेत.
छत्रपती शिवाजी महाराजांच्या भूमिकेनंतर आता संभाजीराजांच्या भूमिकेत काम करताना वाटलेल्या बदलाविषयी बोलताना डॉ.कोल्हे म्हणाले की, छत्रपती शिवाजी व संभाजी या दोन्ही भूमिका प्रचंड आव्हानात्मक आहे. आवाज, शरीरयष्टी, संवाद, देहबोली, हालचाल, यासाजया गोष्टींमध्ये त’ावत आढळते. तरुणांनी एका युथ आयकॉनला सामोरे ठेवून वाटचाल करण्यासाठी संभाजीराजांचे विचार प्रत्येक तरुणापर्यंत पोहचविणे गरजेचे वाटते.छावा च्या निमिताने नाटयगृहात सादर होणाऱ्या नाटकात प्रथमच दुमजली किल्ल्‌याची व जहाजाची प्रतिकृती तयार करण्यात आल्याचे डॉ. कोल्हे यांनी सांगीतले. 

पुणे-  शहरात आतापर्यंत तब्बल १७८ रुग्णांना याची लागण झाली असून, १६ जण अत्यवस्थ आहेत. आज शहरात हडपसर भागातील अमित दाभाडे (वय ३५) तर घोरपडी येथील किशोर बोराटे (वय ५५) यांचा स्वाइन फ्लूने मृत्यू झाला.

गेल्या दीड महिन्यात शहरात स्वाइन फ्लूने तब्बल २0 बळी गेले आहेत. पुण्यासह राज्यातही स्वाइन फ्लूचा संसर्ग वाढू लागला आहे. गुरुवारी राज्यात स्वाइन फ्लूचे १0९ नवीन रुग्ण आढळले आहेत. राज्यात आतापर्यंत ८३ जणांचा मृत्यू झाला आहे. नागपूर येथे स्वाइन फ्लूचे सर्वांत जास्त २२ बळी गेले आहेत. पुणे शहरात आतापर्यंत तब्बल १७८ जणांना याची लागण झाली असून, १६ जण अत्यवस्थ आहेत. महापालिकेतर्फे आतापर्यंत चार हजारांहून अधिक टॅमिफ्लूच्या गोळ्या देण्यात आल्या आहेत. शहरात टॅमिफ्लूच्या गोळ्यांचा पुरेसा साठा असल्याची माहिती पालिकेचे आरोग्य विभागप्रमुख एस. टी. परदेशी यांनी दिली. स्वाइन फ्लूचा प्रतिकार करण्यासाठी ‘त्रिगुणी ही लस सीरम इन्स्टिट्यूटतर्फे गेल्यावर्षी विकसित करण्यात आली होती. या लसीची मुदत संपल्याने डिसेंबरमध्ये सुमारे दीड लाख डोस नष्ट करण्यात आले; पण आता त्याची मागणी वाढली आहे. त्यामुळे पुढील १५-२0 नवीन बॅचमध्ये उत्पादन करण्यात येणार आहे, असेही सीरम इन्स्टिट्यूटतर्फे कळविण्यात आले आहे.