पुणे :

‘मोदी सरकारने निवडून आल्यावर अल्पसंख्यकांबाबत बाळगलेला दृष्टीकोन चुकीचा असून, चर्च वरील हल्ले, ननवरील हल्ले, मदर तेरेसांविषयी उद्गार यातून हा दृष्टीकोन व्यक्त होत आहे, अशी टीका ‘राष्ट्रवादी काँग्रेस’च्या खासदार अ‍ॅड. वंदना चव्हाण यांनी आज केली.

आज त्या ख्रिश्‍चन समुदायाच्या पुण्यात निघालेल्या मोर्चात सहभागी झाल्या. त्यानंतर पत्रकाद्वारे त्यांनी आपल्या या विषयावरच्या भावना व्यक्त केल्या.

मोदी सरकार सत्तेत आल्यावर जातीयवादी शक्तींना बळ मिळाले आहे. पंतप्रधान मोदींचा मूक पाठिंबा या शक्तींना असल्याचे चित्र दिसत आहे हे दुर्देवी आहे. अल्पसंख्यकांच्या विकासाबात सरकारकडून ज्या अपेक्षा आहेत, त्या पूर्ण होताना दिसत नाहीत. सर्वधर्म समभाव हे लोकशाहीतील महत्त्वपूर्ण मूल्य असून, त्याकडे हे सरकार दुर्लक्ष करीत आहे, हे चुकीचे आहे, असे खासदार अ‍ॅड. वंदना चव्हाण यांनी म्हटले आहे.

पुणे :

हिंजवडी – माण या माहिती-तंत्रज्ञान नगरीत असलेल्या भव्य विठ्ठल रुक्मिणी मंदिराचा पाचवा वर्धापन दिन गुरुवार, दि. 26 मार्च 2015 रोजी साजरा होत असून, यानिमित्त विठ्ठल रुक्मिणी मंदिर समितीने सोमनाथ महाराज चौधरी (आळंदी) यांना ‘वारकरी भूषण’ पुरस्कार जाहीर केला आहे.

26 मार्च रोजी सायंकाळी 7 वाजता होणार्‍या कार्यक्रमात ‘राष्ट्रीय समाज पक्षा’चे अध्यक्ष आमदार महादेव जानकर यांच्या हस्ते हा पुरस्कार देण्यात येणार आहे, अशी माहिती समितीच्या वतीने बाळूमावशी धुमाळ यांनी दिली.

विठ्ठल रुक्मिणी मंदिरामध्ये (माण (गवारेवाडी), बापूजीबुवा मंदिराजवळ, विठ्ठल रुखुमाई मंदिर, ता.मुळशी, जि.पुणे) वर्धापनदिनानिमित्त काकड आरती, होमहवन, हरिपाठ, महाप्रसाद, संगीत भजन कार्यक्रमांचे आयोजन केले आहे.

पुणे -विधानसभा निवडणुकीत उमेदवारी न दिल्यामुळे नाराज होऊन शिवसेनेत गेलेले रिपब्लिकन पक्षाचे माजी शहराध्यक्ष परशुराम वाडेकर पुन्हा स्वगृही परतणार आहेत.शिवसेनेत मानसन्मान मिळत नसल्याने ‘आरपीआय’चे राष्ट्रीय अध्यक्ष रामदास आठवले यांची भेट घेऊन वाडेकर यांनी पुन्हा पक्षात येण्याची इच्छा व्यक्त केली आहे. शिवसेनेत प्रवेश केला असला, तरी मी पहिल्यापासून मनाने ‘आरपीआय’मध्येच होतो. आंबेडकरी विचारांचा पगडा मनावर असल्याने शिवसेनेत मन लागत नव्हते. त्यामुळे पुन्हा ‘आरपीआय’मध्ये प्रवेश करण्याचा निर्णय घेतला आहे. पक्षाचे नेते रामदास आठवले यांच‌ी भेट घेऊन चर्चा करण्यात आली आहे. असे परशुराम वाडेकरयांनी स्पष्ट केले आहे
विधानसभेच्या निवडणुकीत शिवसेना आणि भाजपमध्ये फूट पडल्याने ‘आरपीआय’च्या स्थानिक नेत्यांसह कार्यकर्त्यांमध्ये संभ्रम निर्माण झाला होता. या निवडणुकीच्या काळात वाडेकर यांनी विधानसभेचे तिकीट मिळण्यासाठी ‘आरपीआय’ला सोडचिठ्ठी देऊन शिवसेनेत जाहीर प्रवेश करून सेनेच्या तिकिटावर निवडणूक लढवली होत‌ी. त्यामध्ये त्यांना दारुण पराभव स्वीकारावा लागला होता. निवडणुकीनंतर शिवसेनेच्या शहर कार्यकारिणीमध्ये त्यांना कोणतीही जबाबदारी देण्यात न आल्याने ते नाराज होते. त्यांनी पुन्हा आपल्या जुन्या घरी, ‘आरपीआय’मध्ये येण्याची इच्छा व्यक्त करत त्यांनी पक्षाचे अध्यक्ष आठवले यांची भेट घेतली.
आठवले यांनी त्यांना ‘कामाला लागा,’ अशा सूचनाही दिल्याचे विश्वसनीय सूत्रांनी सांगितले. मुंबई येथे जाऊन वाडेकर यांनी आठवले यांची भेट घेतली. त्या वेळी नगरसेविका चंद्रकांता सोनकांबळे, अशोक शिरोळे यांच्यासह अन्य पदाधिकारी उपस्थित होते.

पुणे – अल्पवयीन मुलींचे लैंगिक शोषण करणाऱ्या आयएएस अधिकाऱ्याला न्यायालयात हजर करत असतानाच म न से च्या नगरसेविकांनी त्याच्या गळ्यात चपलांचा हार घातला. ही घटना आज (शुक्रवारी) दुपारी शिवाजीनगर कोर्टासमोर घडली.मिळालेल्या माहितीनुसार, अल्पवयीन मुलींचे लैंगिक शोषण केल्याप्रकरणी अटक करण्यात आलेल्या मारूती सावंत याला आज शिवाजीनगर कोर्टात हजर करण्यात येणार होते. दरम्यान न्यायालयात हजर करीत असताना महाराष्ट्र नवनिर्माण सेनेच्या नगरसेविका अस्मिता शिंदे, रुपाली पाटील, अर्चना कांबळे, संगीता तिकोने, युगंधरा चाकणकर, अनिता डाखवे, आशा साने यांनी निदर्शने केली. त्यावेळी अनिता डाखवे, आशा साने या नगरसेविकांनी त्याच्या गळ्यात चपलेचा हार घातला. याप्रकरणी त्यांना शिवाजीनगर पोलिसांनी अटक केली आहे.पोलिसांनी दिलेल्या माहितीनुसार, महाराष्ट्र राज्य कृषी शिक्षण संशोधन परिषदेचे व्यवसाथपकीय संचालक, समाज कल्याण विभागाचे माजी संचालक भारतीय प्रशासकीय सेवेतील (आयएएस) वरिष्ठ अधिकारी मारुती हरी सावंत (वय 58)  हे इयत्ता दुसरीत शिकणाऱ्या दोन, तसेच तिसरी आणि सातवीमध्ये असलेल्या प्रत्येकी एक अशा चार मुलींसोबत अश्‍लील चाळे करीत होते. सावंत याचे कुटुंबीय शिवाजीनगर येथे वास्तव्यास असून, ते गेल्या दोन वर्षांपासून सिंहगड रस्ता पोलिस ठाण्याच्या हद्दीत फ्लॅटमध्ये एकटेच राहतात. ते आठवड्यातून दोन दिवस येथील फ्लॅटवर येत होते. इमारतीच्या आवारात खेळणाऱ्या मुलींना कधी चॉकलेट, तर कधी पैशाचे आमिष दाखवून घरात बोलावत असे. त्यांना मोबाईल आणि संगणकावर अश्‍लील चित्रफित दाखवित असे. पीडित मुलींनी शाळेतील समुपदेशक महिलेस त्यांच्यासोबत होत असलेला प्रकार सांगितला. ही बाब भाजपचे नगरसेवक श्रीकांत जगताप यांना सांगितली. त्यानंतर त्यांनी पोलिस ठाण्यात जाऊन घडलेली घटना गंभीर असल्याचे लक्षात आणून दिले.सावंत हे पुण्यातील सिंहगड रस्त्यावरील हिंगणे परिसरात राहतात. त्यांच्या सदानिकेशेजारी असलेल्या तिसरी पाचवीच्या वर्गातील मुली खेळण्यासाठी इमारतीच्या पार्किंगमध्ये येत असत. या मुलींना चॉकलेट, खाऊचे आमिष दाखवून सावंत त्यांच्या घरात घेऊन जात असे. त्यानंतर मुलींना अश्लील फोटो चित्रफित दाखवून त्यांच्यासोबत अश्लील चाळे करत असल्याचे स्पष्ट झाले आहे, असे पुण्याचे पोलिस आयुक्त सतिश माथूर यांनी सांगितले. न्यायालयाने त्याला ३० मार्चपर्यंत पोलीस कोठडीत ठेवण्याचे आदेश दिले. चपलेचा हार घातल्याप्रकरणी अनिता डाखवे आणि आशा साने या नगरसेविकांना ताब्यात घेण्यात आले आहे.