पाटणा-

विधानसभा निवडणुकीच्या पार्श्वभूमीवर पक्षाच्या प्रचारासाठी बिहारमध्ये दाखल झालेले भाजपचे अध्यक्ष अमित शहा यांना शुक्रवारी अनपेक्षित प्रसंगाला सामोरे जावे लागले. पाटणा येथील गेस्ट हाऊसच्या लिफ्टमध्ये अमित शहा आपल्या सहकाऱयांसोबत अडकले होते. तब्बल ४० मिनिटांनंतर त्यांना सुरक्षित बाहेर काढण्यात आले. विधानसभा निवडणुकांमुळे बिहारमधील वातावरण सध्या तापले आहे. लोकसभा निवडणुकीतील भाजपच्या वारूला रोखण्यासाठी नितीश, लालूप्रसाद यांची एकजूट होण्यास सुरूवात झाली आहे. तर भाजपसाठी देखील ही प्रतिष्ठेची लढाई असणार आहे. त्यामुळे भाजपची रणनिती आखण्यासाठी अमित शहा बिहारमध्ये दाखल झाले होते. पाटणा येथे भाजपच्या स्थानिक नेत्यांसोबत त्यांनी बैठक घेतली. रात्री उशीरा बैठक संपल्याने ते पाटणा येथील गेस्ट हाऊसवर थांबले. तेथील लिफ्टमधून जात असताना लिफ्ट बंद पडली आणि शहा आपल्या सहकाऱयांसोबत लिफ्टमध्ये अडकले. लिफ्ट दुरूस्त होऊन ते सुखरूप बाहेर येण्यासाठी ४० मिनिटांचा कालावधी गेला. आपत्कालीन परिस्थिती हाताळण्यासाठी तेथे संबंधित व्यक्ती देखील उपस्थित नव्हता. लिफ्टचे दरवाजे पूर्णपणे बंद असल्याने आत मोबाईलला नेटवर्क देखील नव्हते. त्यामुळे आत अडकलेल्यांशी संपर्क देखील साधता येत नव्हता, असे भाजपचे बिहार प्रदेशाध्यक्ष मंगल पांडे यांनी सांगितले. लिफ्ट सुरू करण्याच्या प्रयत्नांना अर्धा तास ओलांडून गेला तरी यश येत नव्हते अखेर अमित शहा यांच्या झेड प्लस सुरक्षा व्यवस्थेतील सीआरपीएफच्या जवानांनी लिफ्टचे दरवाजे तोडून शहा यांना सुखरुप बाहेर काढले.

बारामती -सुधीर फडकेंचा ‘गीतरामायण ‘वारसा अलौकिक आणि अभिमानाने मिरवण्याची बाब आहे असे सांगत हा वारसा पुढे नेणाऱ्या फडके यांचे सुपुत्र श्रीधर फडके यांच्याबद्दल राष्ट्रवादीचे अध्यक्ष , ज्येष्ठ नेते शरद पवार यांनी गौरवोद्गार काढले

पाहू यात शरद पवार यांनी नेमके काय म्हटले आहे त्यांच्याच शब्दात …

गीतरामायण या अजरामर कलाकृतीचा हिरक महोत्सव काल विद्या प्रतिष्ठानच्या गदिमा सभागृहात पार पडला. ग. दि. माडगूळकर यांनी रचलेले आणि सुधीर फडके यांनी संगीतबद्ध करून स्वतः गायलेले गीतरामायण ही एक अजरामर कलाकृती आहे. ग. दि. माडगूळकर यांच्या नावाने असेलेलं सभागृह हे विद्या प्रतिष्ठानचे सांस्कृतिक केंद्र आहे. सुधीर फडके यांचे सुपुत्र श्रीधर फडके यांनी आपल्या सुमधूर आवाजात गीतरामायण सादर केले. सुधीर फडके यांची पुढची पिढी हा वारसा पुढे नेतेय याचा मला आनंद होत आहे.

मी शिक्षण घेत असताना माझे मॅट्रिकला असतानाचे मुख्याध्यापक श्रीधर गोगटे, हे सुद्धा या कार्यक्रमाला आवर्जून उपस्थित होते. याचाही मला आत्यंतिक आनंद झाला. गोगटे सरांबरोबर बोलताना आपोआपच त्यावेळच्या आठवणींना उजाळा देता आला. जवळजवळ चार पिढ्यांनी एकत्र बसून गीतरामायणाचा आस्वाद घेतला, ही गोष्टही तितकीच अभूतपूर्व.

सातारा (जिमाका) : पिंपोडे ब्रुद्रुकच्या ग्रामस्थांनी खास करुन जनकल्याण समितीच्या माध्यमातून जलक्रांती करुन टंचाईला मुक्ती दिली आहे. त्याच धर्तीवर घीगेवाडी येथेही जलक्रांती करण्यासाठी ग्रामस्थांनी पुढे यावे, असे आवाहन जिल्हाधिकारी अश्विन मुद्गल यांनी केले.
जिल्हाधिकारी श्री. मुद्गल यांनी काल कोरेगाव तालुक्यातील पिंपोडे ब्रुद्रुक येथे जलयुक्त शिवार अभियानांतर्गत झालेल्या कामांची पाहणी अचानकपणे केली. यावेळी बंधाऱ्यात झालेल्या पाणीसाठा पाहून त्यांनी आनंद व्यक्त केला. घिगेवाडी येथेही नारळ मागवून घेत तेथील ब्रिटीशकालीन बंधाऱ्याचे पुनर्जीवन करण्याच्या कामाचा शुभारंभ श्री. मुद्गल यांनी केला. यावेळी सरपंच मच्छिंद्र केंजळे, जनकल्याण समितीचे विजयराव पंडीत, डॉ. अविनाश पोळ, यांत्रिकी विभागाचे प्रकाश भोसले, मंडल अधिकारी उमेश डोईफोडे, भास्कर घिगे, बाळसाहेब घिगे, शामराव साळुंखे, लालासाहेब निकम, उद्धव निकम आदी उपस्थित होते.
जलयुक्त शिवार अभियानांतर्गत कोरेगाव तालुक्यातील पिंपोडे बुद्रुक येथे ब्रिटीशकालीन बंधाऱ्याची दुरुस्ती व त्याचबरोबर खोलीकरण आणि रुंदीकरण करण्यात आले. आहे. सध्या या बंधाऱ्यामध्ये मोठा पाणीसाठा झालेला आहे. या कामाची पहाणी श्री. मुद्गल यांनी काल अचानकपणे भेट देऊन केली. यावेळी आनंद व्यक्त करुन ते म्हणाले, ब्रिटीशकालीन असणाऱ्या बंधारा दुरुस्तीचे काम पिंपोडे ग्रामस्थ, जनकल्याण समिती यांनी हाती घेतले. अत्यंत सुंदर पद्धतीने हे काम झालेले आहे. या बंधाऱ्यामध्ये 600 ते 700 मिटर किमान पाणीसाठा सध्या झालेला आहे. यामुळे गावातील विहिरी, विंधन विहिरी या पुनर्जीवीत झाल्या आहेत. याचे सर्व श्रेय पिंपोडे बुद्रुक ग्रामस्थांना जाते. या ग्रामस्थांनी केलेल्या जलक्रांतीमुळे गावात असणाऱ्या टंचाईला आता मुक्ती मिळणार आहे.
यानंतर त्यांनी घिगेवाडी येथे असणाऱ्या ब्रिटीशकालीन बंधाऱ्याची पाहणी केली आणि या बंधाऱ्याच्या दरुस्तीचे तसेच खोलीकरण, रुंदीकरणाचे आदेश यांत्रिकी विभागाला दिले. या ठिकाणी नारळ मागवून घेत या बंधाऱ्याच्या पुनर्जीवन कामाचा शुभारंभही तात्काळ करुन ग्रामस्थांना सुखद धक्का दिला. या कामामुळे घिगेवाडीसह वाघोली परिसरातील भूजल पातळी वाढण्यासाठी निश्चिपणे मदत होणार आहे. या प्रसंगी सुनील निकम, रणजीत निकम, सूर्यकांत निकम, राजेंद्र निकम, आदीनाथ सावंत, संभाजी लेंभे, बाळासाहेब कदम, प्रमोद खराडे, शरद लेंभे आदीसह ग्रामस्थ उपस्थित होते.

पुणे – ‘दाभोलकर- पानसरेंचा खून झाला, महाराष्ट्राची लाज गेली‘, अशी घोषणा देऊन अंद्धश्रद्धा निर्मूलन समितीच्या (अंनिस) कार्यकर्त्यांनी गुरुवारी अभिवादन फेरी काढली. महाराष्ट्रभर दाभोलकरांच्या स्मृतीला उजाळा देत वेगवेगळ्या स्वरुपाची अभियाने विविध शहरात गावांमधून राबविण्यातआली वर्धा, नंदुरबार,धुळे,औरंगाबाद, अह्मदनगर, बीड़, सोलापूर, जळगाव,नाशिक, लातूर,उस्मानाबाद,नांदेड, कोल्हापुर,सातारा  इतर अनेक ठिकाणी आंदोलन,मोर्चे, कार्यक्रम  घेण्यात आले सगळीकडून एकाच सूर होता’ कधी पकडणार दाभोळकर-पानसरे यांचे मारेकरी … कोण आहेत सूत्रधार ?

पुण्यात डॉ. नरेंद्र दाभोलकर यांच्या द्वितीय स्मृतिदिनानिमित्त काढलेल्या या फेरीची सुरवात ज्येष्ठ विचारवंत एन. डी. पाटील, अभिनेत्री सोनाली कुलकर्णी, पत्रकार निखिल वागळे, दिग्दर्शक नागराज मंजुळे, मुक्ता दाभोलकर, हमीद दाभोलकर यांच्या उपस्थितीत झाली.
अंनिसच्या कलाकारांनी फेरीच्या सुरवातीस “सॉक्रेटिस ते दाभोलकर, पानसरे व्हाया तुकाराम‘ हे रिंगणनाट्य सादर करून विवेकवादाचा जागर केला. विठ्ठल रामजी शिंदे पूल येथून महापालिका, शनिवारवाडा, लक्ष्मी रस्ता, शास्त्री रस्ता ते म्हात्रे पुलामार्गे निघालेल्या फेरीची मनोहर मंगल कार्यालय येथे सांगता झाली.
डॉ. दाभोलकर यांच्या खुनाला दोन वर्षे पूर्ण होऊनदेखील आरोपींना पकडण्यात पोलिस अपयशी ठरले आहेत. याचा उपस्थितांनी निषेध केला. “शाहू, फुले, आंबेडकर आम्ही सारे दाभोलकर‘, “लडेंगे, जितेंगे‘ “कितना दम है तेरी गोली में, देखा है, देखेंगे‘, आदी घोषणा देऊन कार्यकर्त्यांनी परिसर दणाणून सोडला. हमीद दाभोलकर म्हणाले, “शेवटपर्यंत लोकशाही मार्गाने हा लढा सुरू राहील. पोलिसांकडून खुनाच्या तपासात दिरंगाई होत असून, महाराष्ट्रातील जनता संतप्त आहे. त्यांना यामागील सरकारची भूमिका पटलेली नाही. त्यामुळेच या लढ्याला तरुणाईचा मोठा प्रतिसाद मिळत असून, येत्या काळात सनदशीर मार्गाने हा लढा अधिक जोमाने पुढे नेऊ.‘‘

नवी दिल्ली : महाराष्ट्र सदन व महाराष्ट्र परिचय केंद्रात आज सदभावना दिन साजरा करण्यात आला. कोपरनिकस मार्ग स्थित महाराष्ट्र सदनातील सभागृहात आयोजित कार्यक्रमात निवासी आयुक्त तथा सचिव आभा शुक्ला यांनी उपस्थित अधिकारी व कर्मचाऱ्यांना सदभावना प्रतिज्ञा दिली.

यावेळी श्रीमती शुक्ला यांनी माजी पंतप्रधान स्व. राजीव गांधी यांच्या प्रतिमेस अभिवादन केले. राजशिष्टाचार तथा गुंतवणूक आयुक्त लोकेश चंद्र, अपर निवासी आयुक्त समीर सहाय, सहायक निवासी आयुक्त डॉ. किरण कुलकर्णी, अभिलाष कुमार, संजय आघाव आणि अजीतसिंह नेगी यांच्यासह महाराष्ट्र सदन तथा महाराष्ट्र परिचय केंद्राच्या कर्मचाऱ्यांनी स्व. राजीव गांधी यांना आदरांजली वाहिली.

महाराष्ट्र परिचय केंद्रात सदभावना दिनाची प्रतिज्ञा

महाराष्ट्र परिचय केंद्रात सदभावना दिन साजरा करण्यात आला. परिचय केंद्राचे उपसंचालक दयानंद कांबळे यांनी उपस्थित अधिकारी व कर्मचाऱ्यांना सदभावना प्रतिज्ञा दिली. श्री.कांबळे यांनी यावेळी स्व. राजीव गांधी यांना पुष्पहार अर्पण करून अभिवादन केले. माहिती अधिकारी अंजु निमसरकर-कांबळे यांच्यासह उपस्थित कर्मचाऱ्यांनी स्व. राजीव गांधी यांना आदरांजली वाहिली.

अमरावती : माजी पंतप्रधान भारतरत्न राजीव गांधी यांची जयंती सद्भावना दिन म्हणून साजरी करण्यात येते. यानिमीत्त विभागीय आयुक्त ज्ञानेश्वर राजूरकर यांनी आज राजीव गांधी यांच्या प्रतिमेस पुष्पहार अर्पण करून अभिवादन केले.

विभागीय आयुक्त कार्यालयात आयोजित करण्यात आलेल्या सदभावना दिनाच्या कार्यक्रमास प्र. अपर आयुक्त रवींद्र ठाकरे, प्र. उपायुक्त (सामान्य) ओमप्रकाश अग्रवाल, उपायुक्त (पुरवठा) रमेश मावस्कर, सहाय्यक आयुक्त जे. बी. अपाले, नगर रचनाकार दीपक नागेकर, सहाय्यक नगर रचनाकर, संजय नाकोड, विभागीय आयुक्तांचे स्वीय सहाय्यक महेंद्र गायकवाड आदी उपस्थित होते.

याप्रसंगी विभागीय आयुक्त यांच्या अध्यक्षतेखाली सदभावना दिवस प्रतिज्ञेचे सामूहिक वाचन करण्यात आले. यानंतर सर्व उपस्थित अधिकारी, कर्मचाऱ्यांनी राजीव गांधी यांच्या प्रतिमेस पुष्प वाहून आदरांजली वाहिली.