भारतीय राजकारणावर नेमके पद्धतीने भाष्य करणारा शासन सिनेमा प्रेम, महत्वाकांक्षा या भावनां देखील मार्मिकरित्या मांडल्या आहेत. या सिनेमात  प्रेम आणि महत्त्वाकांक्षेच्या भावविश्वाची नाजूक गुंफण पाहायला मिळणार आहे. अभिनेता जितेंद्र जोशी आणि अभिनेत्री मनवा नाईक यांचे हळुवार फुलत जाणारे ‘प्रेम’ शासन मध्ये पाहायला मिळणार असून या चित्रपटाच्या निमित्ताने हि दोघे पहिल्यांदाच एकत्र काम करताना दिसतील.  राजकारणात येण्याचे स्वप्न बाळगणा-या तरुण युवकाची भूमिका जितेंद्र जोशीने साकारली असून मनवा नाईकने सिनेमात पत्रकाराच्या भूमिकेत दिसणार आहे. एका कंपनीच्या कामगार संघटनेचा प्रमुख असणा-या जितेंद्रची आणि मनवामध्ये खुलणारे प्रेम आणि वेळेनुरूप त्याचे बदलणारे महत्व सिनेमात अतिशय उत्तम पद्धतीने मांडले आहे. प्रेम आणि महत्वाकांक्षा याच्यातील यात नेमकं काय जिंकतं हे पाहण्यासाठी प्रेक्षकांना १५ जानेवारी पर्यंतची वाट हवी लागणार आहे. श्रेया फिल्म्सचे निर्माते शेखर पाठक यांची निर्मिती आणि प्रस्तुती असलेला शासन सिनेमा सामान्य माणसाच्या राजकारणातील मानसिकतेचा वेध घेतला आहे.  गजेंद्र अहिरे दिग्दर्शित शासन सिनेमात अभिनेता मकरंद अनासपुरे,  भरत जाधव, सिद्धार्थ जाधव, जितेंद्र जोशी, मनवा नाईक, अदिती भागवत,वृंदा गजेंद्र, विक्रम गोखले,मोहन जोशी, नागेश भोसले, डॉ . श्रीराम लागू, अमेय धारे,  किरण करमरकर  अशी तगडी स्टारकास्ट आपल्याला पाहायला मिळणार आहे.

गोड निरागस, सालस, देखणी अभिनेत्री अशी विशेषणं ऐकली की उर्मिला कानिटकर- कोठारे हिचं नाव चटकन तोंडी आल्या शिवाय रहात नाही. दुनियादारी सिनेमात साकारलेली मिनू काहीशी तशीच होती. मात्र प्यारवाली लव्ह स्टोरीने तिच्या चाहत्यांना जोरदार झटकाच दिला. तुफान, टॉमबॉईश नंदिनीने प्रेक्षकांची झोपचं उडवली. आता तर उर्मिला आपल्याला भन्नाट रुपात दिसणार आहे. इरॉस इंटरनॅशनल निर्मिती असलेला ‘गुरु’ सिनेमा २२ जानेवारी रोजी संपूर्ण महाराष्ट्रात प्रदर्शित होतोय. या सिनेमाचं दिग्दर्शन संजय जाधव करत असून या चित्रपटात उर्मिलाचा नुसताच वेगळा रोल नाहीये तर तिचा हटके मेक ओव्हर सुद्धा आपल्याला पाहायला मिळणार आहे. अंकुश चौधरीच्या ‘सनग्लासेस’ च्या स्टाईलची जशी सगळीकडे चर्चा आहे तशीच उर्मिला तिच्या जबरदस्त लुकमुळे रॉकऑन झालीये. तिने ‘गुरु’ सिनेमात साकारलेली ‘मँगो डॉली’ तिच्या चाहत्यांनी यापूर्वी नक्कीच पहिली नसेल. ‘गुरु’ मधील तिचा रावडी लुक तिने आत्तापर्यंत केलेल्या भूमिकांपैकी चाकोरी बाहेरचा असेल यात शंका नाही. तिच्या तोंडी असलेले गावरान संवाद, भडक रंगाच्या घागरा चोळीचा पेहराव आणि एकंदरच तिने वठवलेली भूमिका पाहून वाह ‘गुरु’ म्हणतच प्रेक्षक सिनेमागृहाबाहेर पडतील. म्हणण्याची मध्ये तिची चौकटीच्या बाहेर भूमिका असणार आहे.

बॉलिवूड अभिनेता आर. माधवन आगामी स्पोर्टस बेस्ड सिनेमासाठी  कसून तयारी करत असून लवकरच तो प्रेक्षकांना नव्या अवतारात दिसणार आहे. बॉलिवूडमध्ये सध्या खेळांवर आधारित सिनेमांचा ट्रेन्ड असून विविध खेळांवर आधारित अनेक सिनेमे येत आहेत. यातील बरेचसे सिनेमे हे खेळांडूंच्या जीवनावर बेतलेले आहेत. क्रिड’ सिनेमातून  सॅल्वेस्टर स्टॅलनने रॉकी सीरीज मध्ये पदार्पण कार्नर आहे. ‘क्रिड’ सिनेमात सॅल्वेस्टर स्टॅलनने साकारलेल्या प्रशिक्षकाची भूमिका केली आहे तर साल खडूस मध्ये माधवन प्रशिक्षकाची भूमिका साकारणार आहे. बॉलिवूडमधील प्रसिद्ध फिल्ममेकर राजकुमार हिरानी यांचा हा सिनेमा असून दोघेही या सिनेमासाठी चांगलेच उत्साहित आहेत. माधवनने यापूर्वी चॉकलेट बॉयच्या भूमिका साकारल्या आहेत. मात्र आता त्याला नव्या सिनेमात आव्हानात्मक भूमिका साकारण्याची संधी मिळाली आहे. माधवनसोबत या सिनेमात भारतीय बॉक्‍सिंग चॅम्पियन रितीका सिंग ही प्रमुख भूमिकेत दिसणार आहे.

मुंबई – काही वर्षांपूर्वी शिवसेना नेत्या आमदार नीलम गोह्रे यांनी विधानपरिषदेत विदर्भातील एका सवेंदनशिल समस्येवर प्रश्न उपस्थित केला होता, जो अद्यापही सुटलेला नाही, त्याची दाहकता लक्षात घेता, लेखक- दिग्दर्शक राजू मेश्राम यांनी, सौ. राधा बिडकर निर्मित झरी या चित्रपटाचे लेखन आणि दिग्दर्शन केले असून, नुकतेच झरी या चित्रपटाचे पोस्टर अनावरण महाराष्ट्राचे अर्थमंत्री सुधीर मुनगंटीवार, महसुल राज्यमंत्री संजय राठोड, उद्योग राज्यमंत्री प्रवीण पोटे, आमदार नीलम गोह्रे, जोगेन्द्र कवाडे, राजेन्द्र गवई, आ.बळीराम सिरस्कर, आ.विनोद बंब, आ.रमेश शेंडगे, आ.नरसय्या अडाम, आ.लक्ष्मण तायडे, आ.सुभाष ठाकरे, माजी मुख्य सचिव जे.पी.डांगे व अभिनेते अनंत जोग. मिलिंद शिंदे, तुकाराम बिडकर, निशा परुळेकर, नम्रता गायकवाड आणि अनिकेत केळकर यांच्या उपस्थितीत मोठ्या जल्लोषात संपन्न झाले.

यावेळी अर्थमंत्री सुधीर मुनगंटीवार म्हणाले की, खरोखरच झरी चित्रपट हा कौतुकास पात्र आहे कारण, गल्लाभरु व विनोदीपटांच्या लाटेत विदर्भातील सवेंदनशील विषयावर हा चित्रपट भाष्य करणारा आहे. महसुल राज्यमंत्री संजय राठोड यावेळी म्हणाले की, आज भारत स्वतंत्र होवुन इतकी वर्ष झाली तरी दुर्गम भागात मूलभूत सोयींचा अभाव आहे आणि या विषयावर असलेला झरी चित्रपट सर्वानाच प्रेरणा देणारा ठरेल यात शंका नाही. उद्योग राज्यमंत्री प्रवीण पोटे म्हणाले की, झरी चित्रपटातील लोकेशन, व्हराडी भाषा आणि विदर्भातील जटिल समस्या यांचा योग्य मिलाफ साधत लेखक- दिग्दर्शकाने चित्रपट माध्यमाचा प्रभावी आणि सुयोग्य वापर करत एका वास्तववादी आणि विदारक अशा सत्याचा परिचय समाजाला करून दिला आहे.

लेखक- दिग्दर्शक राजू मेश्राम यावेळी म्हणाले की, आजही भारतात असे अनेक दुर्गम क्षेत्र आहेत, जिथल्या लोकांना आपल्या अस्तित्वासाठी संघर्ष करावा लागतो आहे, गरीबी, अज्ञान, सुख सोयींचा अभाव व व्यवस्थेच्या नाकरतेपणामुळे दुर्गम भागातील लोक मुख्य प्रवाहात येऊच शकले नाहीत, त्यांचे शारीरिक शोषण करणारा वर्ग अस्तित्वात आहे, त्यांच्या स्त्रीयांचा भोग घेउन त्यांना कुमारी माता म्हणुन लाजिरवाणे जीणे जगण्यास भाग पाडत आहेत, परंतु परिस्थिती परिवर्तनशील असते, जेव्हा गुलाम पेटून उठतो, तेव्हाच गुलामगिरी भस्म होते या वास्तवाची जाणीव त्यांना होते व झरी च्या प्रतिनिधिक रुपात… एका क्रांतीला सुरुवात होते.

‘वजीर ‘ या आगामी हिंदी सिनेमाचे पहिले गाणे काल मुंबईतील सबर्बन थिएटर मध्ये  सादर करण्यात आले यावेळी विनोद चोप्रा , फरहान अख्तर , आदिती राव , सोनू निगम , श्रेय घोशाल , आदी उपस्थित होते ..पहा फोटो

पुणे  :  पुणे फिल्म फाउंडेशन आणि महाराष्ट्र शासन यांच्या संयुक्त विद्यमाने होणारा पुणे आंतरराष्ट्रीय चित्रपट महोत्सव यंदा १४ ते २१ जानेवारी २०१६ दरम्यान होणार असल्याची माहिती महोत्सवाचे अध्यक्ष व संचालक डॉ. जब्बार पटेल यांनी आज घेतलेल्या पत्रकार परिषदेत दिली. महोत्सवाचे हे १४ वे वर्ष असून यंदाच्या महोत्सवासाठी प्राथमिक निवड प्रक्रिया प्रवेशासाठी १०४ पेक्षा जास्त देशातील तब्बल ९८६ चित्रपटांनी आपला सहभाग नोंदविला आहे.

ज्येष्ठ चित्रपट अभ्यासक आणि पुणे आंतरराष्ट्रीय चित्रपट महोत्सवाचे क्रिएटिव्ह डिरेक्टर समर नखाते, पुणे आंतरराष्ट्रीय चित्रपट महोत्सवाचे सचिव रवी गुप्ता, खजिनदार राजेंद्र केळशीकर, एन.एफ.ए.आय चे संचालक प्रकाश मगदूम आणि डि. एस. के. एन्टरटेनमेंट चे मुख्य कार्यकारी अधिकारी सत्यजित कुमार आदी मान्यवर यावेळी उपस्थित होते.

आज जगाला दहशतवादाची झळ बसत असताना केवळ ‘खेळ’ आणि ‘चित्रपट’ ही दोन अशी माध्यमे आहेत की ज्याद्वारे टोकाचे शत्रुत्व असलेले देशही एकत्र येऊ शकतात. त्यामुळे सलोखा वाढविण्याच्या दृष्टीनेच ‘स्पोर्टस् अॅण्ड सिनेमा ब्रिंग द वर्ल्ड टुगेदर’ असा यावर्षीच्या पुणे आंतरराष्ट्रीय चित्रपट महोत्सवाचा विषय आहे. या महोत्सवा दरम्यान जगभरातील अनेक देशांचे २०० हून अधिक चित्रपट पाहण्याची संधी प्रेक्षकांना मिळणार आहे.

महोत्सवादरम्यान एकून १५ विभागांपेक्षा जास्त विभागात चित्रपट दाखविण्यात येणार आहेत. ज्यामध्ये उद्घाटनपर चित्रपट, पुरस्कार्थींचे चित्रपट, आंतरराष्ट्रीय चित्रपट स्पर्धात्मक विभाग, मराठी चित्रपट स्पर्धात्मक विभाग, फोक्सवॅगन आंतरराष्ट्रीय विद्यार्थी चित्रपट स्पर्धात्मक विभाग, महाराष्ट्र पर्यटन विकास महामंडळ लघुपट स्पर्धात्मक विभाग (कोकण बीचेस आणि स्कुबा डायव्हिंग, वाईल्ड लाईफ ऑफ विदर्भ – ताडोबा आणि औरंगाबाद एक पर्यटन स्थळ – बिवी का मकबरा), जागतिक चित्रपट, देश विशेष (कंट्री फोकस), विभिन्न देशांतील लक्षणीय चित्रपट (कॅलिडोस्कोप), खेळ व चित्रपट, मनुष्याचे अंतरंग (ह्युमन माईंडस्), साहित्य आणि चित्रपट, डीएसके अॅनिमेशन चित्रपट, बदलत्या महाराष्ट्रावरील लघुपट, सिंहावलोकन (रेट्रोस्पेक्टिव्ह), भारतीय चित्रपट, आजचे मराठी चित्रपट (मराठी सिनेमा टुडे), फिल्म्स् डिव्हिजन माहितीपट, जेम्स फ्रॉम नॅशनल फिल्म्स् अर्काईव्ह्स् ऑफ इंडिया (एन.एफ.ए.आय), ट्रीब्युट, आशिया खंडामधील मधील चित्रपट अशा विभागांचा समावेश असेल.

यावेळी बोलताना डॉ. जब्बार पटेल म्हणाले, “मागील वर्षीप्रमाणे याही वर्षी पुणे आणि पिंपरी- चिंचवड शहरामध्ये ७ वेगवेगळ्या ठिकाणी या महोत्सवातील चित्रपट प्रेक्षकांना पाहता येणार आहेत. यामध्ये कोथरूड सिटी प्राईड, सातारा रस्ता सिटी प्राईड, आर डेक्कन सिटी प्राईड, मंगला मल्टीप्लेक्स, कॅम्प मधील आयनॉक्स, राष्ट्रीय चित्रपट संग्रहालय यांच्या बरोबर पिंपरी-चिंचवड येथील दोन स्क्रीन्सचा समावेश असेल.’’

महोत्सवाच्या निमित्ताने आयोजित करण्यात येणारे विजय तेंडुलकर स्मृती व्याख्यान, मराठी चित्रपटांशी निगडीत विषयांवरील परिसंवाद आणि मिडीया सेंटरमध्ये होणारी दररोजची भारतीय व परदेशी मान्यवरांची मनोगते, मुलाखती ही नित्याची वैशिष्ट्ये याही वर्षी असणार आहेत.

महोत्सवात जागतिक स्पर्धात्मक विभागात महाराष्ट्र शासनाच्या वतीने ‘प्रभात उत्कृष्ट आंतरराष्ट्रीय चित्रपट’ (१० लाख रुपये), ‘प्रभात उत्कृष्ट आंतरराष्ट्रीय चित्रपट दिग्दर्शक’ पुरस्कार (५ लाख), मराठी आंतरराष्ट्रीय स्पर्धात्मक विभागात ‘संत तुकाराम आंतरराष्ट्रीय उत्कृष्ट मराठी चित्रपट’ (रोख पुरस्कार ५ लाख रुपये) व अखिल भारतीय मराठी चित्रपट महामंडळाच्या वतीने उत्कृष्ट दिग्दर्शक, उत्कृष्ट अभिनय, उत्कृष्ट पटकथा व उत्कृष्ट छायांकन यासाठी प्रत्येकी रु. २५ हजार असे रोख पुरस्कारही दिले जाणार आहेत.

फोक्सवॅगन आंतरराष्ट्रीय विद्यार्थी चित्रपट स्पर्धा विभागात सर्वोत्कृष्ट चित्रपटासाठी १००० अमेरिकन डॉलर्स, उत्कृष्ट दिग्दर्शक, पटकथा, छायांकन, ध्वनीमुद्रण यासाठी प्रत्येकी ५०० अमेरिकन डॉलर्स तर सर्वोत्कृष्ट अॅनिमेशन चित्रपटास (भारत) १००० अमेरिकन डॉलर्स आणि सर्वोत्कृष्ट अॅनिमेशन चित्रपट (आंतरराष्ट्रीय) १००० अमेरिकन डॉलर्स अशी पारितोषिके देण्यात येणार आहेत.

‘महाराष्ट्र पर्यटन विकास महामंडळ लघुपट स्पर्धा’ पुरस्कार या विभागात कोकण बीचेस आणि स्कुबा डायव्हिंग, वाईल्ड लाईफ ऑफ विदर्भ – ताडोबा आणि औरंगाबाद, एक पर्यटन स्थळ –बिवी का मकबरा या तीनही विभागासाठी प्रथम क्रमांकास रुपये १ लाख २५ हजार तर द्वितीय क्रमांकासाठी रुपये ७५ हजार अशी पारितोषिके देण्यात येणार आहेत.

याशिवाय एफटीआयआयच्या शेवटच्या वर्षांतील विद्यार्थ्याला उत्कृष्ट दिग्दर्शनासाठी मारिया प्रोशस्कोवा संस्थेतर्फे ‘पिफ स्पेशल अॅवॉर्ड’ (२५ हजार रुपये रोख) ही देण्यात येईल.

अधिकृत ओळखपत्र असलेल्या फिल्म क्लब सभासद आणि ज्येष्ठ नागरिकांसाठी ‘पिफ’च्या कॅटलॉगची किंमत रुपये ५०० असून इतर इच्छुकांसाठी ही किंमत रुपये ७०० इतकी असेल याची कृपया नोंद घ्यावी.

या महोत्सवात सहभागी होण्यासाठी प्रातिनिधिक नोंदणी प्रक्रिया सुरू झाली असून इच्छुकांना आजपासून (४ डिसेंबर) www.piffindia.com या संकेतस्थळावर नोंदणी करता येईल. संकेतस्थळावर नोंदणी झाल्यानंतर मिळालेल्या नोदंणी क्रमांकासोबत इच्छुकांना वरील ठिकाणांवर जाऊन स्पॉट रजिस्ट्रेशनही करावे लागेल हेही महत्वाचे. हे स्पॉट रजिस्ट्रेशन २९ डिसेंबरपासून सुरू होईल, असेही रवी गुप्ता यांनी सांगितले.

महाराष्ट्र इंस्टिट्युट  ऑफ टेक्नॉलॉजी (एमआयटी), सिंबायोसिस आंतरराष्ट्रीय विद्यापीठ, भारती विद्यापीठ, डीएसके सपइन्फोकॉम संस्था आणि सावित्रीबाई फुले पुणे विद्यापीठ यांचे विशेष सहकार्य यावर्षीच्या महोत्सवास प्राप्त होणार आहे.