अमरावती : जगामध्ये मराठी माणूस प्रत्येक क्षेत्रात यशाची पताका फडकावित आहे. अनेक देशांमध्ये विविध क्षेत्रात मराठी माणसाचे यश आपल्याला मराठीपणाचा अभिमान देत आहे. जग समृद्ध करणाऱ्या मराठी माणसाला राज्यात विविध क्षेत्रात काम करण्याची संधी आहे. राज्याची ही दालने जगातल्या मराठी माणसासाठी सदैव खुली आहेत. त्यामुळे निश्चितच भविष्यात राज्य अशा व्यक्तीमत्वांच्या सहकार्याने समृद्ध होईल, असा विश्वास मुख्यमंत्री देवेंद्र फडणवीस यांनी व्यक्त केला.

संत ज्ञानेश्वर सांस्कृतिक भवन येथे जागतिक मराठी अकादमीच्यावतीने ‘शोध मराठी मनाचा संमेलन 2016’ चे आयोजन करण्यात आले. या संमेलनाच्या उद्घाटनीय कार्यक्रमात मुख्यमंत्री बोलत होते. यावेळी माजी मुख्यमंत्री तथा माजी केंद्रीय गृहमंत्री सुशीलकुमार शिंदे, पालकमंत्री प्रवीण पोटे, गृह राज्यमंत्री डॉ. रणजित पाटील, खासदार आनंदराव अडसूळ, आमदार सर्वश्री डॉ. सुनील देशमुख, रवी राणा, डॉ. अनिल बोंडे, रमेश बुंदेले, वीरेंद्र जगताप, आमदार यशोमतीताई ठाकूर, महापौर श्रीमती रिना नंदा, मराठी अकादमीचे अध्यक्ष रामदास फुटाणे, ज्येष्ठ अभिनेते विक्रम गोखले, उपाध्यक्ष गिरीष गांधी, डॉ. विजय जोशी, गायिका वैशाली माडे, केसरी पाटील, मंदार जोगळेकर, किशोर रांगणीकर, दीपक गेडा, सतीष राणे, मोहन गोरे, माजी आमदार बी. टी देशमुख, विभागीय आयुक्त ज्ञानेश्वर राजूरकर, जिल्हाधिकारी किरण गित्ते, बबलू देशमुख आदी उपस्थित होते.

शोध मराठी मनाचा संमेलन अमरावतीकरांसाठी पर्वणी असल्याचे सांगत मुख्यमंत्री म्हणाले, अशा संमेलनांमधून तळागाळातून पुढे आलेल्या व्यक्तीमत्वांचे विचार उलगडतात. युवा पिढीने या संधीचा लाभ घेतला पाहिजे. समाजात एकेका क्षेत्रात काम करणाऱ्या व्यक्तींच्या भरवशावर देश चालत असतो. अशा व्यक्तीमत्वांचा उलगडा संमेलनाच्या माध्यमातून होत असतो. तळागाळातील लोकांमध्ये अनेक सुप्त गुण असतात. त्यांना वाव मिळत नाही. अशा व्यक्तींमधील गुणांचा शोध घेऊन त्यांना व्यासपीठ उपलब्ध करून देण्याचे काम शासन करीत आहे. ही मंडळी समाजाची ऐनकेन प्रकारे सेवाच करीत असतात.

भौतिक प्रगती झपाट्याने होत आहे. या प्रगतीमध्ये माणुसकी जपल्या गेली पाहिजे. भौतिक प्रगतीपेक्षा त्या देशाची, राज्याची बौद्धिक प्रगती किती आहे हे महत्त्वाचे ठरते. भौतिक संपदेपेक्षा बौद्धिक संपदा आवश्यक आहे. अशा राज्यातच निरपेक्ष, निकोप स्पर्धा वाढीस लागून सर्वसमावेशक प्रगती होत असते. तळागाळातून आलेले अनेक व्यक्तीमत्व समाजाच्या विविध क्षेत्रात आपल्या बळावर प्रगती करीत असतात. त्यामध्ये मराठी माणसांचा टक्का निश्चितच जास्त आहे. जगात मराठी माणूस अनेक क्षेत्रात मोठी जबाबदारी घेऊन काम करीत आहे. याचा राज्याला अभिमान आहे, असे गौरवोद्गारही मुख्यमंत्र्यांनी काढले.

श्री. शिंदे म्हणाले, जगात यशाचा झेंडा फडकविणाऱ्या मराठी माणसांना एकसंघ ठेवण्याचे व दाखविण्याचे काम मराठी अकादमीने केले आहे. मराठी अकादमीची ही संमेलने म्हणजे चळवळच आहे. ही चळवळ अशीच सातत्याने पुढे सुरू राहिली पाहिजे.

श्री. पोटे म्हणाले, महाराष्ट्रात राहणारा प्रत्येक व्यक्ती हा मराठी आहे. मराठीचा अभिमान त्याला असला पाहिजे. मराठी अकादमीने सुरू केलेला हा उपक्रम मराठीला आणखी उच्च पातळीवर घेऊन जाणारा ठरणार आहे.

कार्यक्रमप्रसंगी खासदार आनंदराव अडसूळ, आमदार डॉ. सुनील देशमुख, ज्येष्ठ अभिनेते विक्रम गोखले यांनीही विचार व्यक्त केले. प्रास्ताविक जागतिक मराठी अकादमीचे अध्यक्ष रामदास फुटाणे यांनी केले. प्रास्ताविकात त्यांनी मराठी तरूणाने जगात कुठेही उभे राहण्याची क्षमता विकसित करण्याची अपेक्षा व्यक्त केली.

कार्यक्रमादरम्यान गायिका वैशाली माडे यांचा सत्कार करण्यात आला. समारोपप्रसंगी ज्येष्ठ कवी मंगेश पाडगांवकर व शेतकरी संघटनेचे शरद जोशी यांना श्रद्धांजली वाहण्यात आली. सूत्रसंचलन सोमेश्वर पुसदकर यांनी तर आभार प्रदर्शन निशान गांधी यांनी केले.

नवी दिल्ली : विद्यार्थ्यांना इयत्ता 5 वी आणि 8 वीची परीक्षा अनिवार्य करावी, निरंतर व सर्वसमावेशक मूल्यांकना(सीसीई)बाबत शिक्षकांना प्रशिक्षीत करण्यावर भर देण्यात यावा, आदी महत्त्वाच्या सूचना राज्याचे शालेय शिक्षणमंत्री विनोद तावडे यांनी येथे केल्या.

केंद्रीय शिक्षण सल्लागार मंडळांतर्गत शालेय शिक्षणाबाबत ‘विना अडथळा धोरणावर’(नो डिटेंशन पॉलिसी) फेरविचार करण्यासाठी स्थापन करण्यात आलेल्या विविध राज्यांच्या शिक्षणमंत्र्यांच्या उपसमितीच्या बैठकीत श्री. तावडे बोलत होते. केंद्रीय मनुष्यबळ विकास मंत्रालयाच्यावतीने आज इंडिया हॅबीटॅट येथे आयोजित करण्यात आलेल्या बैठकीच्या अध्यक्षस्थानी राजस्थानचे शिक्षणमंत्री वासुदेव देवनानी होते. मध्यप्रदेशचे शिक्षणमंत्री पारसचंद्र जैन, उत्तराखंडचे शिक्षणमंत्री मंत्रीप्रसाद निथानी, केंद्रीय मनुष्यबळ विकास मंत्रालयाच्या उपसचिव अनामिका सिंह यांच्यासह अन्य राज्यांचे प्रशासकीय अधिकारी उपस्थित होते.

केंद्राचे शिक्षणाबाबतचे ‘विना अडथळा धोरण’ अतिशय चांगले असून या धोरणाच्या अंमलबजावणीसाठी काही बदल राज्यांकडून मांडण्यात आले. महाराष्ट्राच्यावतीने सूचना मांडताना श्री. तावडे म्हणाले, केंद्र सरकारच्या धोरणाचा मुख्य उद्देश सार्थ होण्यासाठी शिक्षकांचे प्रशिक्षण होणे गरजेचे आहे. निरंतर व सर्वसमावेशक मूल्यांकनांतर्गत विद्यार्थ्यांचे कशा प्रकारे मूल्यांकन करण्यात यावे याची माहिती शिक्षकांना देण्यात आली पाहिजे. ‘डीएड’ आणि ‘बीएड’चे शिक्षण घेणाऱ्या विद्यार्थ्यांनाही, असे प्रशिक्षण अनिवार्य करण्यात यावे. शालेय विद्यार्थ्यांची इयत्ता 5 वी आणि 8 वीत परीक्षा घेण्यात यावी जर त्यात तो विद्यार्थी उत्तीर्ण न झाल्यास पुन्हा एक महिन्याने त्याची परीक्षा घेतली पाहिजे. ही परीक्षा तो उत्तीर्ण न झाल्यास त्याला पुढच्या वर्गात प्रवेश देण्यात येऊ नये त्यामुळे विद्यार्थी कच्चा राहणार नाही व शिक्षणाचा दर्जाही राखला जाईल, असे मत श्री. तावडे यांनी मांडले.

शालेयस्तरावर विद्यार्थ्यांची गळती कमी करण्यासाठी केंद्र सरकारने शिक्षणाबाबत ‘विना अडथळा धोरणाचा’ फेरविचार करण्यासाठी बोलविलेल्या या बैठकीत विविध राज्यांच्या शिक्षणमंत्र्यांनी सूचना मांडल्या. विद्यार्थ्यांची गळती कमी करताना त्यांना गुणवत्तापूर्ण शिक्षण देण्याकडे कानाडोळा करून चालणार नाही. विद्यार्थ्यांची पहिली ते चौथी दरवर्षी परीक्षा घेण्यात यावी. त्याला पुढल्या वर्गात प्रवेश द्यावा. मात्र, 5 वी व 8 वीत विद्यार्थ्यांना परीक्षा अनिवार्य करण्यात यावी, शिक्षकांना प्रशिक्षण देण्यात यावे आदी मुद्यांवर बैठकीत चर्चा झाली. पुढील आठवड्यात विविध राज्यांच्या शिक्षण मंत्र्यांचा समावेश असलेली ही उपसमिती आपला अहवाल केंद्रीय मनुष्यबळ विकास मंत्रालयाकडे सोपविणार आहे.

मुंबई, दि. 30 : ज्येष्ठ कवी महाराष्ट्र भूषण मंगेश पाडगावकर यांच्या निधनाने
शब्द आणि भावनांच्या माध्यमातून मराठी रसिकांच्या ह्रदयावर अधिराज्य गाजवणारा जादुगार काळाच्या पडद्याआड गेला आहे, अशा शब्दात आमदार दिलीप वळसे- पाटील  यांनी श्रद्धांजली अर्पण केली आहे.

            श्री. वळसे – पाटील आपल्या शोकसंदेशात म्हणतात, साध्या शब्दात जीवनाचे सौंदर्य मांडणारे श्री. पाडगावकर हे प्रेम भावना कवितेतून व्यक्त करतांना तरुणाईच्याच भावनांना थेट  हात घालत.
प्रेम, जीवन त्याचप्रमाणे समाजातील प्रत्येकासाठी श्री . पाडगांवकर विचार करत होते. त्यांच्या कवितेनं प्रस्थापित व्यवस्थेविरोधातही कठोर प्रहार केले. सत्तरीच्या दशकातील त्यांची सलाम ही कविता हा त्यांच्यातल्या विद्रोही कविचा अविष्कार होता.
‘या जन्मावर , या जगण्यावर , शतदा प्रेम करावे, असे सांगणारे श्री.  पाडगांवकर हे आयुष्यभर कविता,  साहित्याची सेवा करत राहिले. अशा या शब्द आणि भावनांचा जादुगार काळाच्या पडद्याआड गेल्याने मराठी साहित्याचे अगणित नुकसान झाले आहे. अशा या कविवर्याला माझी भावपूर्ण श्रद्धांजली.

पुणे- 89 वे अखिल भारतीय मराठी साहित्य संमेलन 15 ते 18 जानेवारी दरम्यान पिंपरीतील हिंदुस्थान अॅण्टीबायोटिक्स (एचए) मैदानावर भरणार आहे. संमेलनाचे उद्‌घाटन 16 जानेवारी रोजी माजी केंद्रीय कृषी मंत्री आणि राष्ट्रवादीचे अध्यक्ष शरद पवार यांच्या हस्ते सकाळी दहा वाजता होणार असल्याची माहिती संमेलनाचे स्वागताध्यक्ष पी. डी. पाटील यांनी आज  पत्रकार परिषदेमध्ये दिली.

 महाराष्ट्र साहित्य परिषदेमध्ये झालेल्या पत्रकार परिषदेला अखिल भारतीय मराठी साहित्य मंडळाच्या अध्यक्षा डॉ. माधवी वैद्य, कोषाध्यक्ष सुनील महाजन यांच्यासह महामंडळाचे पदाधिकारी उपस्थित होते. यावेळी प्रथम ज्येष्ठ कवी मंगेश पाडगावकर यांना श्रद्धांजली वाहण्यात आली.

 माधवी वैद्य यांनी संमेलनाचा कार्यक्रम जाहीर केला. 15 जानेवारी रोजी दुपारी दोन वाजता ग्रंथदिंडी निघणार असून दिंडीचे पूजन सिक्कीमचे राज्यपाल श्रीनिवास पाटील यांच्या हस्ते होणार आहे. यावेळी ज्ञानेश्वर मुळे, गिरीश प्रमुणे आणि डॉ. रामचंद्र देखणे हे प्रमुख पाहुणे म्हणून उपस्थित राहणार आहेत. त्याच दिवशी दुपारी पावणेपाच वाजता डॉ. माधवी वैद्य आणि पी. डी. पाटील यांच्या हस्ते ध्वजवंदन होणार आहे. सायंकाळी पाच वाजता ग्रंथप्रदर्शनाचे 88 व्या साहित्य संमेलनाचे अध्यक्ष डॉ. सदानंद मोरे यांच्या हस्ते उद्‌घाटन होणार असून माजी संमेलनाध्यक्षांचा सत्कारही यावेळी करण्यात येणार आहे.

 संमेलनाचे उद्‌घाटन 16 जानेवारीला शरद पवार यांच्या हस्ते होणार आहे. यावेळी मुख्यमंत्री देवेंद्र फडणवीस, संमेलनाचे अध्यक्ष डॉ. श्रीपाल सबनीस, डॉ. डी. वाय. पाटील, ज्येष्ठ गीतकार गुलझाल, पालकमंत्री गिरीश बापट, सदानंद मोरे, पिंपरी-चिंचवडच्या महापौर शकुंतला धराडे यांच्यासह ज्ञानपीठ पुरस्कार विजेते सत्यव्रत शास्त्री, रेहमान राही, केदारनाथ सिंह, सीताकांत महापात्र हे उपस्थित राहणार आहेत.

 संमेलनामध्ये विविध विषयांवरील 11 परिसंवादांचे आयोजन करण्यात आले आहे. त्यामध्ये उद्योगनगरीत संमेलन भरत असल्यामुळे ‘मराठी साहित्यातील उद्योगजगताचे चित्र आणि महाराष्ट्रातील उद्योजक’ या विशेष परिसंवादाचे आयोजन करण्यात आले आहे. याशिवाय अभिजात कथावाचन, कथाकथन, निमंत्रितांचे कविसंमेलन, ज्ञानपीठ पुरस्कार सन्मानीत लेखकांशी संवाद, बहुभाजिक कविसंमेलन, ज्येष्ठ गायिका आशा भोसले संगीत रजनी, तरुणांसाठी खास चेतन भगत यांच्याशी संवाद, मुलांसाठी मामाच्या गावाला जाऊया या कार्यक्रम आदी कार्यक्रमांचे आयोजन करण्यात आले आहे.

 तसेच संमेलनाध्यक्ष डॉ. श्रीपाल सबनीस यांच्यासह गुलझार, शरद पवार, ज्येष्ठ शास्त्रज्ञ रघुनाथ माशेलकर यांच्या मुलाखती होणार असून उपस्थितांना संदीप वासलेकर, ज्ञानेश्वर मुळे, श्रीनिवास दैठणकर, अच्युत गोडबोले यांच्याशी संवाद साधता येणार आहे.

 संमेलनाचा समारोप 18 जानेवारी रोजी सायंकाळी पाच वाजता केंद्रीय रस्ते वाहतूक व जहाजबांधणी मंत्री नितीन गडकरी, राज्याचे शालेय शिक्षण आणि सांस्कृतिक कार्य मंत्री विनोद तावडे आणि ज्येष्ठ कवी व गीतकार जावेद अख्तर यांच्या उपस्थितीत होणार आहे. समारोप समारंभानंतर अशोक हांडे निर्मित मंगलगाणी-दंगलगाणी कार्यक्रम होणार आहे.