पुणे, दि. 18 : राज्यातील सततच्या दुष्काळी व नापिकीच्या परिस्थितीमुळे बाधित झालेल्या शेतकऱ्यांच्या जीवनात समृध्दी निर्माण करण्यासाठी राज्य शासनाने छत्रपती शिवाजी महाराज शेतकरी सन्मान योजना -2017 जाहीर केली आहे. या योजनेला 22 सप्टेंबर 2017 पर्यंत शासनाने मुदतवाढ दिली आहे. पुणे जिल्हयातील ज्या शेतकऱ्यांनी अद्याप अर्ज भरलेले नाहीत, त्यांनी जवळच्या महा ई–सेवा केंद्रावर किंवा  ‘आपले सरकार’ या संकेत स्थळावर आपले अर्ज ऑनलाईन पध्दतीने  भरुन घ्यावेत, असे आवाहन  जिल्हाधिकारी सौरभ राव यांनी पुणे जिल्हास्तरीय अंमलबजावणी व नियंत्रण समितीच्या बैठकी दरम्यान केले.

 योजनेच्या अंमलबजावणीसाठी शासनाकडून मार्गदर्शक सुचना प्राप्त झाल्या आहेत. त्यानुसार योजनेच्या अंमलबजावणीसाठी जिल्हा, उपविभाग व  तालुकास्तरावर समिती गठीत करण्यात आलेली आहे. पुणे जिल्हा स्तरावरील जिल्हा स्तरीय अंमलबजावणी व नियंत्रण समितीची बैठक जिल्हाधिकारी सौरभ राव यांच्या अध्यक्षतेखाली घेण्यात आली. यावेळी लाभार्थी शेतकऱ्यांच्या ऑनलाईन अर्ज नोंदणीची प्रगती व योजनेच्या अंमलबजावणीचा सविस्तर आढावा श्री. राव यांनी घेतला.

या  योजने अंतर्गत लाभार्थ्यांची माहिती, वित्तीय संस्थांनी आपले सरकार पोर्टलवर तात्काळ भरावयाची आहे. राष्ट्रियीकृत बँकेच्या लाभार्थी शेतकऱ्यांनी आपले खाते असलेल्या राष्ट्रीयीकृत बँकेच्या शाखेमध्ये व जिल्हा मध्यवर्ती सहकारी बँकेच्या लाभार्थी अर्जदारांनी संबंधित विविध कार्यकारी सेवा सहकारी संस्थामध्ये आपल्या  आधार कार्डाची छायांकित प्रत त्वरीत सादर करावी, असेही आवाहन श्री राव यांनी केले.

पुणे – पारंपारिक हस्तकला करणार्या कारागिरांस प्रोत्साहित करण्यासाठी हॅन्ड्स ऑफ इंडिया ने  आपले भव्य वस्त्र प्रदर्शन पुन्हा एकदा टिळक स्मारक मंदिर येथे भरवले आहे. हे प्रदर्शन गुरवार २१ सप्टेंबर ते  ते रविवार २४ सप्टेंबर सकाळी ९.३० ते रात्री ८.३० पर्यंत सुरू राहील.

२०१० पासुन  वायुसेना अधिकारी आणि  सॉफ्टवेअर आर्किटेक्ट अश्या दोन बहीणी ह्यासाठी कार्य करत आहेत. ह्या दोघी संपूर्ण भारतातील घरगुती फर्निचर तयार करणारे आणि विणकाम, हाताने भरतकाम करणार्या गरजू कलाकारांच्या गटांसाठी कार्यरत आहेत. हातमाग, हस्तकला, हस्त-भरतकाम यांच्याकडे लक्ष वेधण्यासाठी तसेच छोट्या-छोट्या खेड्यांतील गरीब व गरजू  मात्र कलेने समृद्ध अशा लोकांच्या हाताला काम मिळवून द्यावे हा ह्या संस्थेचा प्रमुख उद्देश आहे.

त्याचसोबत बदलत्या काळात लोप पावत चाललेली भारताची ही अद्वितीय कला टिकवून ठेवण्याचे हॅन्ड्स ऑफ इंडियाचे प्रयत्न आहेत. आज यंत्रणेच्या मोठ्या वापरामुळे  हस्तकला हळूहळू लोप पावत चालल्या आहे ह्या कलांना टिकवुन ठेवण्याचे कार्य हॅन्ड्स अॉफ इंडिया करतो.

हॅन्ड्स अॉफ इंडियामध्ये १० प्रकारच्या हाताने केलेले भरतकाम पहावयास मिळते ज्यामध्ये  पंजाबमधील फुलकारी, चिकण, उत्तर प्रदेशातील पत्तीवर्क आणि आरी, पश्चिम बंगालमधील कांथा आणि इंग्लीश कढ़ाई, बिहारमधील सुजनी, कश्मीरची सुझनी व कर्नाटकाची कसुटी आसेल.

 हे प्रदर्शन २१ सप्टेंबर २०१७ पासून सुरू होईल आणि २४ सप्टेंबर २०१७ पर्यंत राहील. हे टिळक स्मारक मंदिर, टिळक रोड, सदाशिव पेठ पुणे येथे होईल.

पुणे : ‘सूर्यदत्ता ग्रुप ऑफ इन्स्टिट्यूट्स’साठी नुकताच अभिमानाचा आणखी एक क्षण उजाडला. या समूहातील ‘सूर्यदत्ता इन्स्टिट्यूट ऑफ डिझाईन (पुणे)’ या संस्थेला तिने बजावलेल्या लक्षणीय कामगिरीबद्दल ‘द रायझिंग लीडरशिप ॲवॉर्ड फॉर द बेस्ट इंटेरियर अँड फॅशन डिझाईन इन्स्टिट्यूट इन महाराष्ट्र’ पुरस्कार देऊन गौरवण्यात आले. हा ‘रायझिंग लीडरशिप ॲवॉर्ड्स’ पुरस्कार वितरणाचा शानदार सोहळा नुकताच गोव्यात झाला. प्रसिद्ध बॉलिवूड अभिनेत्री करिष्मा कपूर ही या समारंभातील प्रमुख व सन्माननीय पाहुणी होती. तिच्या हस्ते विजेत्यांना पुरस्कार प्रमाणपत्र व मानचिन्ह देण्यात आले. विजेत्यांमध्ये भारतभरातील व्यवसाय क्षेत्रे व सेवा क्षेत्रांचा समावेश होता.

यासंदर्भात ‘सूर्यदत्ता ग्रुप ऑफ इन्स्टिट्यूट्स’चे अध्यक्ष प्रा. डॉ. संजय बी. चोरडिया म्हणाले, “आमच्या कामगिरीसाठी गौरवले जाणे, हा आमच्या संस्थेसाठी खरोखर मोठा सन्मान आहे. ‘सूर्यदत्ता ग्रुप’मध्ये आम्ही नेहमीच आमच्या विद्यार्थ्यांना गुणवत्ता, जागतिक दर्जाचे शिक्षण आणि कल्याणकारी विकास मिळवून देण्यासाठी कसोशीने प्रयत्न करतो.” ‘सूर्यदत्ता इन्स्टिट्यूट ऑफ डिझाईन’ फॅशन डिझाईन, फॅशन ॲडमिनीस्ट्रेशन आदी क्षेत्रांत युजीसी मान्यताप्राप्त डिप्लोमा, डिग्री व मास्टर्स डिग्री अभ्यासक्रम देते.

‘द रायझिंग लीडरशिप ॲवॉर्ड्स’ हे पुरस्कार ‘एपीएस रिसर्च अँड मीडिया’ कंपनीतर्फे घेतल्या गेलेल्या व्यापक बाजार संशोधन अभ्यासावर, तसेच जनमत सर्वेक्षणांवर आधारित होते. ही मल्टी–प्लॅटफॉर्म कंपनी माध्यम व संशोधन सेवांत कुशल अनुभवी आहे. समाज उभारणीत महान योगदान देणाऱ्या भारताच्या सर्वोत्तम व्यवसाय व सेवा नेत्यांचा सन्मान करण्याच्या हेतूने हे पुरस्कार दिले जातात आणि त्यातून विजेत्यांतील सर्वोत्कृष्टतेला गौरव, प्रेरणा आणि प्रोत्साहन मिळते.

 पुणे-  ईदगाह ट्रस्टच्यावतीने शीख बांधवानी माणुसकीच्या नात्याने बर्मा येथे मुस्लिम बांधवांना केलेल्या मदतीबद्दल ज्ञानी अमरजितसिंग , हरभजन सिंग , मनजितसिंग  विरदी , नेपालसिंग  कल्याणी , अमरजितसिंग परिहार , देवेंद्रर सिंग , इंद्रजितसिंग ऑबेराय याना शाल व पुष्पगुछ देउन आभार मानण्यात आले .

  पुणे कॅम्पभागातील गोळीबार मैदानावर ईदगाह मैदानावर ईदगाह ट्रस्टच्यावतीने या प्रार्थनेचे  आयोजन केले होते .त्यावेळी हा कार्यक्रम झाला . म्यानमार मधील बर्मा येथे येथे मुस्लिम बांधवांवर होणाऱ्या हल्ले होत असताना शीख बांधवानी त्याठिकाणी अन्नदान करून मोठी मदत केली . त्यामुळे मुस्लिम बांधवानी शीख बांधवांचे आभार मानले .  यावेळी जामा मस्जिदचे मौलाना अय्युब अश्ररफी यांच्या मार्गदर्शनाखाली हि सामूहिक प्रार्थना झाली . यावेळी मौलाना कलिमुद्दीन यांनी देखील प्रार्थना केली .

  यावेळी ईदगाह ट्रस्टचे विश्वस्त झैनुल काझी ,  मुस्ताक अलबुशरा , अमीन शेख , अहमद सय्यद , मोहम्मद हुसेन शेख , सरफराज शरीफ , मोइननुद्दीन शेख , वाहिद बियाबानी , अझीम गुडाकूवाला , इसाक चावीवाले , मुस्ताक पटेल , साजिद सय्यद , मुनावर खान , जावेद खान , सादिक लूकडे , ऍड. अयाज शेख व मोठ्या संख्येने मुस्लिम बांधव सहभागी झाले होते . या कार्यक्रमाचे सूत्रसंचालन इकबाल अन्सारी यांनी केले .

पुणे- येथील जिल्‍हा माहिती अधिकारी तथा व्‍यंगचित्रकार राजेंद्र सरग यांना ‘दिवा प्रतिष्‍ठान’ चा सर्वोत्‍कृष्‍ट व्‍यंगचित्रकाराचा पुरस्‍कार ज्‍येष्‍ठ साहित्यिक रामदास फुटाणे यांच्‍या हस्‍ते प्रदान करण्‍यात आला. महाराष्‍ट्र साहित्‍य परिषदेत आयोजित कार्यक्रमास ज्‍येष्‍ठ साहित्यिक ल.म. कडू, उद्योजक भारत देसडला, प्रतिष्‍ठानचे अध्‍यक्ष विजय पाध्‍ये, कार्यवाह शिवाजी धुरी, चंद्रकांत शेवाळे, अरुण जाखडे, मसापचे कार्याध्‍यक्ष प्रा. मिलींद जोशी, भारतभूषण पाटकर, महेंद्र देशपांडे, ह.ल. निपुणगे, ज्ञानेश्‍वर जराड, सुनील गायकवाड, सुभाष खुटवड,  स्‍नेहसुधा कुलकर्णी, अंजली पोतदार, नसीर शेख, डॉ. अरविंद संगमनेरकर, डॉ. सतीश देसाई, ज्‍येष्‍ठ व्‍यंगचित्रकार प्रभाकर झळके, विश्‍वास सूर्यवंशी, सन्‍ना मोरे आदींसह इतर मान्‍यवर उपस्थित होते. याच कार्यक्रमात सर्वोत्‍कृष्‍ट  वाचकाचा प्रथम पुरस्‍कार रागिनी पुंडलिक (पुणे), द्वितीय पुरस्‍कार कल्‍पना चिंतामणराव मार्कंडेय (औरंगाबाद) आणि तृतीय पुरस्‍कार सौरभ साबळे (मलकापूर कराड) यांना प्रदान करण्‍यात आला.  ‘दिवा प्रतिष्‍ठान’ ही  दिवाळी अंकांच्‍या संपादकांची संघटना आहे. या संघटनेच्‍यावतीने दरवर्षी वाचक स्‍पर्धेचे आयोजन करण्‍यात येते.       

पुणे– भारतात जैन समाजाची लोकसंख्या कमी असून, त्यामुळे केंद्रसरकारतर्फे यापूर्वी करण्यात आलेली जनगणना पुन्हा करण्यासाठी आपला प्रयत्न असल्याचे राष्ट्रीय अल्पसंख्याक आयोगाचे सदस्य आणि अखिल भारतीय श्री जैन श्वेतांबर मूर्तिपूजक युवक महासंघाचे आंतरराष्ट्रीय चेअरमन श्री सुनील सिघी यांनी आज रविवारी आपल्या भाषणात सांगितले.
अखिल भारतीय श्री जैन श्वेतांबर युवक महासंघाची आज रविवारी नेहरू स्टेडियम जवळील दादावादी जैन मंदिराच्या अहिंसा भवन मध्ये राष्ट्रीय पातळीवरील बैठक आयोजित करण्यात आली होती. या बैठकीस देशभरातील जैन समाजातील विविध मंदिरे, व अन्य संस्थाचे पदाधिकारी, विश्वस्त , पुणे शहरातील जैन मंदिरे व संस्थांचे पदाधिकारी उपस्थित होते. या बैठकीपूर्वी युवक महासंघाच्या पुणे शाखेचे अध्यक्ष श्री सतीश शहा व पुन्हा हॉस्पिटलचे संचालक श्री देविचंद जैन यांच्या हस्ते श्री सिनघी यांचा पुणेरी पगडी, माळ, मानपत्र देऊन खास सन्मान करण्यात आला. याप्रसंगी प्रसिद्ध वकील एस . के . जैन, ओमप्रकाश रांका , अचल जैन, राष्ट्रीय अध्यक्ष हरिशभाई सहा, संपत जैन, सुनील जैन , विनोद बलदोटा , आदी मान्यवर उपस्थित होते.
श्री. सुनील सीनघी यावेळी म्हणाले कि, केंद्रसरकारतर्फे यापूर्वी २०१४ मध्ये जनगणना करण्यात आली. त्यावेळी जैन समाजाची लोकसंख्या कमी असल्याचे आढळले. त्यामागे काही कारणे आहेत. आता आपल्याला पुन्हा जनगणना करावी लागणार आहे. जैन समाज एक पुढारलेला समाज आहे. परंतु याही समाजात अनेक गरीब लोक आहेत. त्यांच्याही अनेक समस्या आहेत. या समस्या सोडविण्यासाठी प्रयत्न चालू आहेत. त्यासाठी आपण लवकरच देशभर केंद्र सरकार व अल्पसंख्याक आयोगातर्फे अनेक गावे व शहरामध्ये जनसुनवाई घेणार आहे या जनसुनवाईत अतिक्रमणे, वाहतूक, शिक्षण सामाजिक आदी समस्या दूर करण्याविषयी प्रयत्न केले जाणार आहेत. पुण्यात हि घेतली जाणार आहे. .
अल्पसंख्याक आयोगातर्फे विविध योजना राबविल्या जात आहेत. त्याचा प्रसार करून लाभार्थीना लाभ कसा घेता येईल याची माहिती त्यांनी आपल्या भाषणात दिली.
श्री सतीश शाह यांनी प्रास्ताविक केले. संपत जैन यांनी सूत्रसंचालन केले. सचिव ललित गुंदेचा यांनी उपस्थितांचे आभार मानले.

पुणे-१७ सप्टेंबर रोजी ‘जागतिक वाहन चालक दिना’ निमित्त सामाजिक बांधिलकीतुन काम करणाऱ्या सारथी सेवा संघा तर्फे कोथरूड, पुणे येथे ‘आदर्श वाहन चालक’ पुरस्कारांचे वितरण करण्यात आले. या कार्यक्रमास अध्यक्ष स्थानी पोलीस निरिक्षक, वाहतूक शाखा सौ. प्रतिभा जोशी तर प्रमुख पाहुणे म्हणून महाराष्ट्र राज्य मोटार ड्रायविंग स्कूल असोसिएशन चे अध्यक्ष श्री. राजू घाटोळे, चित्रपट निर्माते श्री. सुमित पोफळे, प्रोफे. सौ. गीता रायबागकर, सारथी सेवा संघ चे अध्यक्ष श्री. रमेश सुतार आदी मान्यवर उपस्थित होते. श्री. अनिकेत निकम यांनी कार्यक्रमाचे सूत्रसंचालन केले. श्री. राजेश्वर चन्ने यांनी आभार मानले.

पुणे– पंतप्रधान श्री नरेंद्र मोदी ह्यांच्या ६७ व्या वाढदिवसाचे औचित्य साधून बेटी बचावो बेटी पढावो च्या पुणे शहर अध्यक्षा उषा वाचपे ह्यांच्या वतीने जंगली महाराज रस्ता येथे राबविण्यात आलेल्या स्वच्छता अभियानात खासदार अनिल शिरोळे सहभागी झाले होते. ह्या प्रसंगी पश्चिम महाराष्ट्र संघटन मंत्री रवी अनासपूरे, श्याम सातपुते आदि उपस्थित होते. मार्केट यार्ड येथील शिवाजी पुतळा येथे शहर भा ज प झोपडपट्टी आघाडी च्या मार्फत स्वच्छता अभियान राबविण्यात आले. ह्या अभियानात पालिका गटनेते श्रीनाथ भीमाले, किरण वैष्णव, संग्रामसिंह टाक , जीवन माने, सागर टाक आदि सहभागी झाले होते.

पुणे-” शालेय वयात घडलेल्या चांगल्या संस्कारामुळेच आम्हाला आमच्या जीवनाचे ध्येय यशस्वी गाठता आले त्यामुळे ‘अभिनव प्रशाळेतील शिक्षक, त्यावेळचे विद्यार्थी यांचे आम्ही कायमचे ऋणी आहोत” अशा शब्दात आंतरराष्ट्रीय बुद्धिबळपटू ग्रॅन्डमास्टर अभिजित कुंटे आणि एव्हरेस्ट शिखर दोन वेळा सर करणारे किशोर धनकुडे यांनी आपल्या भावना शनिवारी (१६ सप्टेंबर) येथे पार पडलेल्या ‘आम्ही अभिनवकर’ च्या वार्षिक स्नेहमेळाव्यात बोलताना व्यक्त केल्या. सुप्रसिद्ध निवेदक आणि अभिनव प्रशालेचे माजी पालक श्री आनंद देशमुख यांच्या हस्ते ‘आम्ही अभिनवकर’ संघटनेतर्फे दिला जाणारा ‘अभिनव-रत्न’ पुरस्कार यंदा अभिजित कुंटे आणि किशोर धनकुडे यांना प्रदान करण्यात आला. त्याप्रसंगी अभिनव प्रशाळेबाबत कृतज्ञता व्यक्त करताना कुंटे आणि धनकुडे बोलत होते.  ग्रॅन्डमास्टर अभिजित कुंटे यांनी बुद्धिबळ स्पर्धेतील यश मिळविताना तसेच किशोर धनकुडे यांनी एव्हरेस्ट शिखर दोन वेळा सर करताना आपले जे प्रेरणादायी अनुभव सांगितले त्याला या मेळाव्यास जमलेल्या ‘अभिनव’च्या माजी विद्यार्थ्यांनी टाळ्यांच्या प्रचंड गजरात उत्फुर्त प्रतिसाद दिला.
                     याप्रसंगी आनंद देशमुख यांनी आपल्या अध्यक्षीय भाषणात, ”अभिनव ही केवळ शाळा नाही तर एक सुंदर कुटुंब आहे आणि या कुटुंबातील प्रत्येक व्यक्ती ही दुसऱ्याच्या मदतीला येते त्यामुळेच प्रगतीमधील अडसर सहज दूर होतात असे सांगितले. अभिनव प्रशाळेतील शिक्षक हे संस्काराचे स्तंभ आहेत त्यामुळेच अभिनवचे विद्यार्थी आज सर्व क्षेत्रात आपल्या कर्तृत्वाचा ठसा उमटवीत आहेत असे त्यांनी अभिमानाने सांगितले. याच कार्यक्रमात आनंद देशमुख यांच्या हस्ते, ‘अभिनव’च्या माजी शिक्षिका स्मिता देशपांडे आणि सुलोचना भोई यांना ‘कृतज्ञता पुरस्कार’ देऊन गौरविण्यात आले.  तसेच ‘अभिनव’च्या माजी विद्यार्थिनी नगरसेविका श्रद्धा प्रभुणे-पाठक, अभिनव प्रशालेचे गुणवंत विद्यार्थी आणि एकांकिका स्पर्धेत ‘जय-विजय करंडक’ पटकावणाऱ्या अभिनवच्या माजी विद्यार्थी संघाचाही यावेळी सन्मान करण्यात आला.
           प्रारंभी ‘आम्ही अभिनवकर’ संघटनेचे अध्यक्ष पितांबर पाटील यांनी प्रास्ताविक केले. शिरीष पुराणिक यांनी आभार मानले. श्री अभिजित देशपांडे आणि ईश्वरी तांबे यांनी सूत्रसंचालन केले. या स्नेहमेळाव्यास तुषार हळबे, मृणाल खर्चे आदी पदाधिकाऱ्यांसह संघटनेचे सुमारे अडीचशे प्रतिनिधी उपस्थित होते.