पुणे : शहरी व ग्रामीण भागातील सार्वजनिक ठिकाणी किंवा घरे, इमारतींच्या परिसरात असलेल्या वीजयंत्रणेजवळ असलेला कचरा जाळण्यामुळे किंवा कचऱ्याने पेट घेतल्यामुळे वीजयंत्रणेला धोका निर्माण होत आहे. त्यामुळे वीजयंत्रणेजवळ कचरा टाकू किंवा जाळू नका असे आवाहन महावितरणने केले आहे.

शहरी व ग्रामीण भागात अनेक ठिकाणी वीजवाहिन्या, फिडर पीलर, रोहित्र, डिस्ट्रीब्यूशन बॉक्स, डीपी आदी वीजयंत्रणेजवळील उघड्यावर असलेल्या जागेत घरातील कचरा टाकण्यात येत असल्याचे दिसून येत आहे. मुंढवा येथे वीजयंत्रणेजवळ टाकलेल्या कचऱ्याने पेट घेतल्यामुळे अग्निशामक दलाला पाचारण करावे लागले होते. वीजयंत्रणेजवळ साठवलेला कचरा पेटविल्याने किंवा इतर कारणांमुळे कचरा जळाल्याने जवळच असलेल्या विजेच्या भूमिगत केबल व इतर वीजयंत्रणा आगीमुळे नादुरुस्त झाल्याच्या घटना यापूर्वी घडल्या आहेत. ओव्हरहेड वीजतारांखाली असलेल्या कचऱ्याचा ढिगारा पेटविल्यामुळे किंवा त्यास आग लागल्यामुळे वीजतारा वितळून वीज खंडित होण्याचा धोका आहे. अशा घटनांमुळे वीजपुरवठा खंडित होण्याचे प्रकार होत आहेत.

महावितरणकडून सार्वजनिक ठिकाणी असलेल्या रोहित्रांना संरक्षक जाळ्या, कपाऊंड लावलेले आहे. परंतु अनेक ठिकाणी कंपाऊंडच्या आतमध्ये कचरा व शिळे खाद्यपदार्थ टाकण्यात येत असल्याचे दिसून येत आहे. खाद्यपदार्थामुळे छोटे प्राणी तेथे येतात व वीजयंत्रणेच्या संपर्कात आल्यावर वीजपुरवठा खंडित होतो किंवा प्राण्याचा नाहक जीवही जातो. नागरिकांनी सार्वजनिक ठिकाणी असलेल्या रोहित्रांसह वीजयंत्रणेपासून सावध व सतर्क राहावे तसेच वीजयंत्रणेच्या परिसरात किंवा कपाऊंडमध्ये ओला व सुका कचरा टाकण्याचे टाळावे. नागरिकांनी उघड्यावर असलेल्या वीजयंत्रणेला धोका निर्माण होईल अशा ठिकाणी कचरा टाकू नये किंवा साठवलेला कचरा जाळू नये. अशा घटनांतून वीजयंत्रणेला आग लागल्याचे किंवा संभाव्य धोका असल्याचे दिसताच टोल फ्री असलेल्या 1912 किंवा 18001023435 किंवा 18002333435 या क्रमांकावर माहिती द्यावी, असे आवाहन महावितरणने केले आहे.

कात्रज-कोंढवा रस्त्याचे मुख्यमंत्री फडणवीस यांच्या हस्ते भूमिपूजन

पुणे, दि. 1 – पुणे महाराष्ट्रातील एक महत्त्वाचे शहर आहे. शहराचे चित्र पालटण्यासाठी केंद्र व राज्य शासनाने अनेक प्रकल्प आणले आहेत. पुण्याला जगातील एक सर्वोत्तम शहर बनवण्यासाठी सर्वार्थाने प्रयत्न सुरू आहेत, असे प्रतिपादन मुख्यमंत्री देवेंद्र फडणवीस यांनी आज केले.

येथील कात्रज-कोंढवा रस्त्याचे भूमिपूजन मुख्यमंत्री देवेंद्र फडणवीस यांच्या हस्ते करण्यात आले. याप्रसंगी आयोजित कार्यक्रमात ते बोलत होते. यावेळी पुणे जिल्ह्याचे पालकमंत्री गिरीश बापट, सहकारमंत्री सुभाष देशमुख, सामाजिक न्याय राज्यमंत्री दिलीप कांबळे, पुण्याच्या महापौर मुक्ता टिळक, खासदार अनिल शिरोळे, आमदार भीमराव तापकीर, आमदार योगेश टिळेकर, आमदार जगदीश मुळीक, आमदार माधुरी मिसाळ, पुणे महानगरपालिकेचे सभागृह नेते श्रीनाथ भिमाले, स्थायी समिती अध्यक्ष योगेश मुळीक, पुणे महानगरपालिका आयुक्त सौरभ राव आदी मान्यवर उपस्थित होते.

मुख्यमंत्री देवेंद्र फडणवीस म्हणाले, कात्रज-कोंढवा रस्त्याचे नियोजन अतिशय चांगल्या प्रकारे करण्यात आले आहे. हा रस्ता बनवल्यानंतर तो शहरातील सर्वांगसुंदर रस्ता म्हणून ओळखला जाईल. स्थानिक आमदार योगेश टिळेकर यांनी  या रस्त्याकरिता प्रचंड संघर्ष व सातत्याने पाठपुरावा केला. त्यास महानगरपालिकेने सकारात्मक प्रतिसाद देत रस्त्याचे काम करण्यास मान्यता दिली आहे. पुणे शहरात अनेक महत्त्वाचे प्रकल्प सुरू आहेत. स्वारगेट मल्टीमॉडेल हब, आऊटर रिंग रोड, रस्त्यांचे जाळे, नदीसुधार प्रकल्प, कचरा नियोजन व पाणीपुरवठा यामुळे शहराची एक आंतरराष्ट्रीय ओळख निर्माण होण्यास मदत होणार आहे.

महापौर मुक्ता टिळक म्हणाल्या, पुणे शहरातील सर्वात मोठा व भव्य रस्ता म्हणून कात्रज-कोंढवा रस्ता तयार करण्यात येत आहे. यामुळे सातारा, सोलापूर, अहमदनगर तसेच मुंबई रस्त्यावरील वाहतूक कोंडी सुटण्यास मदत होईल. शहरातील सर्व नागरिकांचे समाधान होईल, अशा स्वरुपात रस्ता बनवला जाणार आहे.

आमदार योगेश टिळेकर यांनी रस्त्याच्या कामास मान्यता दिल्याबद्दल राज्य शासन तसेच पुणे महानगरपालिकेचे आभार मानले. ते म्हणाले, पुणे शहरातील सर्वात जास्त जड वाहतूक कात्रज-कोंढवा रस्त्यावर वळवण्यात आली आहे. त्यामुळे याठिकाणी मोठ्या प्रमाणावर वाहतूक कोंडी होते. रस्ता पूर्ण झाल्यानंतर शाळकरी मुले, महिला व ज्येष्ठ नागरिकांची चांगली सोय होईल.या कार्यक्रमास पुणे महानगरपालिकेचे अधिकारी, स्थानिक लोकप्रतिनिधी, कात्रज-कोंढवा परिसरातील रहिवासी, शाळकरी मुले मोठ्या प्रमाणावर उपस्थित होते.

रस्त्याचे वैशिष्ट्ये –

कात्रज-कोंढवा 84 मी. डीपी रस्ता राजस सोसायटी ते खडी मशीन चौक ते पिसोळीगाव पुणे मनपा हद्दीपर्यंत विकसित करण्यात येणार आहे. कामाचा कालावधी36 महिन्यांचा आहे. अंदाजपत्रकीय किंमत 192.44 कोटी अधिक वस्तू व सेवा कर व स्वीकृत निविदा रक्कम 149.52 कोटी अधिक वस्तू व कर इतकी आहे.  रस्त्याची एकूण लांबी 3.43 कि. मी तर रूंदी 84 मीटर आहे. या रस्त्यामुळे सातारा रोड व पुणे-सोलापूरवरील वाहतुकीत सुधारणा होणार आहे. चांदणी चौक,वारजे माळवाडी , वडगाव, कात्रज तसेच साता-य़ाकडून सोलापूर व अहमदनगरकडे जाणा-या वाहतुकीस थेट व जलद पर्याय  उपलब्ध होणार असून त्यामुळे कात्रज ते स्वारगेट व स्वारगेट ते हडपसर या रस्त्यावरील वाहतुकीचा ताण कमी होईल. वाहतुकीच्या वेळेत व इंधनात बचत होईल. पर्यायाने, प्रदूषणात घट होईल. अपघाताचे प्रमाण कमी होईल.

 पुणे – पुणे पोलीस आयुक्त कार्यक्षेत्रात ध्वनी प्रदुषण नियंत्रणासाठी संनियंत्रण समिती स्थापन करण्यात आली आहे. या समितीमधील अध्यक्ष व सदस्य यांचा तपशिल पुढीलप्रमाणे आहे.

सर्व संबंधितांनी यांची नोंद घ्यावी असे, पोलीस उपआयुक्त, विशेष शाखा-1, पुणे शहर यांनी कळविले आहे.

पुणे : “शहराच्या पायाभूत सुविधांच्या उभारणीत अभियंत्यांचे योगदान मोलाचे आहे. पाण्याचे वाटप, रस्त्यांचे नियोजन, देखण्या इमारती आणि इतर अनेक गोष्टींचे ते शिल्पकार असतात. मात्र, बऱ्याचदा विभागांतर्गत समन्वयाचा अभाव दिसतो. परिणामी कामांना विलंब होतो. त्यामुळे अभियंत्यांनी नवनिर्मितीबरोबरच ‘सोशल इंजिनिअरिंग’ शिकावे व अधिकारी-अभियंत्यांनी एकदिलाने काम करावे,” असे प्रतिपादन पुणे महानगर पालिकेचे अतिरिक्त महापालिका आयुक्त राजेंद्र निंबाळकर यांनी दिला.

आॅनलाईन खरेदी न करण्याची घेतली सामुहीक शपथ

पुणे- आॅनलाईन खरेदी-विक्रीला टक्कर देण्यासाठी पुणे जिल्हा रिटेल व्यापारी संघाच्या वतीने एका अभिनव उपक्रमाला सुरूवात करण्यात आली आहे. या उपक्रमांतर्गत संघटनेच्या सदस्य असलेल्या विक्रेत्याकडून माल खरेदी करणाऱ्या ग्राहकाला माॅल पेक्षाही कमी दराने वस्तू उपलब्ध करुन देण्यात येणार असल्याची घोषणा पुणे जिल्हा रिटेल व्यापारी संघाचे अध्यक्ष सचिन निवंगुणे यांनी आज केली.

दिवसेंदिवस आॅनलाईन खरेदीच्या माध्यमातून ग्राहकांची फसवणूक होत असल्याची अनेक प्रकरणे उघडकीस आली आहेत. अनेकदा आपण एक वस्तू आॅनलाईन आॅर्डर करतो मात्र प्रत्यक्षात ग्राहकाला वेगळीच वस्तू मिळत असल्याच्या घटना घडल्या आहेत. अशा घटनामुळे आर्थिक आणि मानसिक त्रासाचा सामना ग्राहकांना करावा लागतो. त्यामुळे ग्राहकांच्या प्रति बांधिलकी जपत रिटेल व्यापारी संघटनेच्या माध्यमातून हा उपक्रम हाती घेण्यात आला आहे.

यावेळ आॅनलाईन खरेदी करणार नाही अशी सामूहीक शपथ देखील रिटेल व्यापाऱ्यांनी घेतली. या प्रसंगी संघटनेचे उपाध्यक्ष सोमाराम राठोड, सुनील गेहलोत, नवनाथ सोमसे आदी पदाधिकारी उपस्थित होते. संघटनेच्या माध्यमातून विक्री करणाऱ्या दुकानातून ग्राहकांनी माल खरेदी केल्यानंतर ग्राहकांना चांगल्या प्रकारे नफा मिळणार आहे. यासाठी एकत्र खरेदी सारखे उपक्रम राबविण्यात येणार असल्याचे देखील संघाच्या वतीने सांगण्यात आलं आहे.