पुणे-

ई-बस खरेदी प्रक्रियेची संपूर्ण माहिती गोपनीय ठेवण्यात येत असून वारंवार मागणी केल्यानंतरही माहिती देण्यात येत नाही. ‘पीएमपी’च्या कार्यालयात गेल्यानंतर संबंधित अधिकारी त्यांच्या कार्यालयातून पळ काढत असल्याने खरेदी प्रक्रियेबाबत संशय वाढल्याचा आरोप काँग्रेसचे गटनेते अरविंद शिंदे यांनी केला आहे. दरम्यान, काँग्रेस-राष्ट्रवादी काँग्रेसच्या नगरसेवकांनी बुधवारी दुपारी ‘पीएमपी’च्या कार्यालयात ठिय्या मांडून खरेदी प्रक्रियेच्या कागदपत्रांची मागणी केली.’पीएमपी’कडून ई-बस खरेदीची प्रक्रिया अत्यंत गोपनीय ठेवण्यात येत असून अधिकाऱ्यांवर दबाब आणण्यात येत असल्याची टीकाही शिंदे यांनी केली. ही माहिती मिळावी म्हणून शिंदे, अविनाश बागवे, अजित दरेकर, रफिक शेख, भय्यासाहेब जाधव आणि चाँदबी नदाफ आदींनी ‘पीएमपी’च्या कार्यालयात ठिय्या मांडला होता.

‘पीएमपी’ने २५ ई-बस खरेदी करण्याचा निर्णय घेतला असून त्या २६ जानेवारीपर्यंत ‘पीएमपी’च्या ताफ्यात दाखल करण्याचा चंग भाजपच्या पदाधिकाऱ्यांनी बांधला आहे. ई-बस खरेदीमुळे पीएमपीचे करोडो रुपयांचे नुकसान होणार असल्याचा दावा काँग्रेसने केला आहे. पीएमपीचे तत्कालीन अध्यक्ष तुकाराम मुंढे यांनी ई-बस खरेदीबाबत अनेक आक्षेप नोंदविले होते. त्या आक्षेपांचे काय झाले, असा प्रश्न उपस्थित करून काँग्रेसकडून आक्षेपांची माहिती ‘पीएमपी’ने द्यावी, अशी वारंवार मागणी करण्यात येत आहे.

‘पीएमपी’कडून एखादी माहिती मिळावी यासाठी नगरसेवक म्हणून माहिती अधिकारात माहिती मागविण्याची वेळ येत असेल तर, सत्ताधाऱ्यांनी गांभीर्याने विचार करावा. यामध्ये कुठलाही गोंधळ नसेल तर पारदर्शकपणे ही माहिती तत्काळ सर्वसामान्यांसाठी खुली करणे अपेक्षित आहे. मात्र, तसे होत नसल्याने याबाबत संशयाचे धुके दाट झाले असल्याची टीका शिंदे यांनी केली. शिंदे यांनी पाठविलेल्या पत्रात ई-बस खरेदी निविदा प्रक्रिया राबविण्यात येत असून, त्यामधून मोठ्या प्रमाणात ‘पीएमपी’चे नुकसान होणार असल्याचा दावा केला आहे. तसेच, तत्कालीन अध्यक्ष मुंढे यांच्या काळात देखील ही प्रक्रिया सुरू करण्यात आली होती. त्यांनी या प्रकरणी काढलेले आक्षेप, टिपणी तसेच या प्रक्रियेची संपूर्ण फाइलची एक प्रक तातडीने मिळावी, अशी विनंती केली आहे.

पुणे -शहर पोलीस व सीरत कमिटी यांच्या सहकार्याने ईद ए मिलादुन्नबी निमित्त शहरात प्रथम सकाळी मिरवणूक  ” नो डी जे व लाऊडस्पिकर ”  या संकल्पनेने शांततेत काढली . या आवाहनास पोलीस बांधवांचे विशेष सहकार्य लाभल्याबद्दल सीरत कमिटीच्यावतीने पुणे शहर पोलीस आयुक्त के व्यंकटेशम यांचा  शाल व पुष्पगुछ देउन सत्कार करण्यात आला  .

यावेळी पुणे शहर सह पोलीस आयुक्त शिवाजी बोडखे , पोलीस उपायुक्त अशोक मोराळे , सहाय्यक पोलीस आयुक्त रविंद्र रसाळ , पोलीस निरीक्षक सर्जेराव बाबर , इस्माईल शेख ,  सीरत कमिटीचे अध्यक्ष मौलाना गुलाम अहमद खान , सरचिटणीस रफीउद्दीन शेख , सिराज बागवान , असिफ शेख , हाफिज एजाज , वस्ताद आतिक खान , उस्मान तांबोळी , कासम शेख , लुकमान खान , हाजी नदाफ , इसहाक चावीवाले , अहमद सय्यद , अतिक मोमीन , हाफिज इद्रिस , सादिक लूकडे , आयाज शेख , नदीम मुजावर , रेहान शेख , मुख्तार शेख व मेहबूब शेख आदी मान्यवर उपस्थित होते .

यंदाच्या वर्षी सीरत कमिटीच्या आवाहनाला प्रतिसाद देउन अनेक तरुणांनी व मंडळांनी डी जेचा वापर करण्याऐवजी त्यावर होणाऱ्या खर्चातून लहान मुलांना खाऊ वाटप , फळे , पाणी वाटप केले. काही तरुणांनी नागरिकांसाठी मोफत आरोग्य शिबीर आयोजित केली . अल कुरेश यंग सर्कलच्यावतीने बाराशे किलो मोतीचूर लाडूवाटप केले . तसेच सफाई कामगारांना मिठाई वाटप करण्यात आले . आय टी शेख मित्र परिवाराच्यावतीने प्रथमच रक्तदान शिबीर आयोजित करण्यात आले . डी  जे , महागडी सजावट यावर लाखो रुपये खर्च करण्यापेक्षा लोकपयोगी काम करणे म्हणजेच पैगंबर यांच्या शिकवणुकीचे व संदेशाचे पालन करणे होय , असे सीरत कमिटीचे सदस्य वस्ताद आतिक खान  यांनी सांगितले . 

पुणे : बांधकाम व्यावसायिकाकडून १ लाख रुपयांची लाच घेणाऱ्या प्राप्तिकर विभागातील अधिकाऱ्याला केंद्रीय गुन्हे अन्वेषण विभागाच्या (सीबीआय, एसीबी) पथकाने मंगळवारी सायंकाळी सॅलसबरी पार्क भागातील प्राप्तिकर विभागाच्या कार्यालयात सापळा रचून पकडले.
गुलटेकडी येथील बोधी टॉवर्स इमारतीत प्राप्तिकर विभागाचे कार्यालय आहे.
शहरातील एका बांधकाम व्यावसायिकाच्या कंपनीवर असलेला कर काही प्रमाणात कमी करायचा होता. याबाबत त्याने प्राप्तिकर विभागातील अधिकाऱ्याशी संपर्क साधला होता. कर कमी करून देणे तसेच बांधकाम व्यावसायिकाला सहकार्य करण्यासाठी प्राप्तिकर विभागातील अधिकाऱ्याने त्याच्याकडे १ लाख रुपयांची लाच मागितली होती. त्यानंतर बांधकाम व्यावसायिकाने केंद्रीय गुन्हे अन्वेषण विभागाच्या लाचलुचपत प्रतिबंधक विभागाकडे तक्रार नोंदविली.
मंगळवारी रात्री बोधी टॉवर्स इमारतीतील प्राप्तिकर विभागाच्या कार्यालयात सापळा लावून अधिकाऱ्याला पकडले. या प्रकरणी रात्री उशिरापर्यंत सीबीआयकडून गुन्हा दाखल करण्याचे काम सुरू होते.

पुणे : बांधकाम परवानगी व नकाशे मंजूर करण्यासाठी महापालिका अधिकाऱ्यांना लाच द्यावी लागते असे सांगून ३० हजार रुपये स्वीकारणाऱ्या एजंटला लाचलुचपत प्रतिबंधक विभागाने मंगळवारी सापळा रचून पकडले. सुवेद शिवराम दुडये (वय ३२, रा. गंगाधाम, गोकुळनगर, कोंढवा) असे त्याचे नाव आहे. बिबवेवाडीतील ढेरे असोसिएटस येथे तो कामाला आहे.

याबाबतची माहिती अशी, महापालिकेचे अधिकारी बांधकाम परवानग्या व नकाशे मंजूर करण्यासाठी स्वत: लाच न स्वीकारताना एजंटामार्फत पैसे घेत असल्याची माहिती लाचलुचपत प्रतिबंधक विभागाकडे आली होती. तक्रारदार यांचे कोंढव्यातील टिळेकरनगर येथील जागेवर बांधकाम परवानगी व नकाशा मंजूर करण्यासाठी त्यांनी ढेरे असोशिएसमध्ये नोकरी असणारे सुवेद दुडये यांच्याकडे आवश्यक कागदपत्रे सादर केली होती.

दुडये यांनी मंजुरीसाठी महापालिका अधिकाऱ्यांना ३० हजार रुपयांची लाच द्यावी लागेल, असे सांगितले. तक्रारदार यांनी लाचलुचपत प्रतिबंधक विभागाकडे तक्रार दिली. त्याची पडताळणी केल्यावर दुडये हे महापालिका अधिकाऱ्यांसाठीच लाच मागत असल्याचे स्पष्ट झाले. त्यानंतर मंगळवारी ढेरे असोसिएटस येथे उपअधीक्षक दत्तात्रय भापकर, कांचन जाधव व त्यांच्या सहकाऱ्यांनी सापळा रचण्यात आला. तक्रारदाराकडून ३० हजार रुपये स्वीकारताना दुडये याला पकडण्यात आले.