पुणे– पुणे महानगर प्रदेश विकास प्राधिकरणा(पीएमआरडीए)कडून पायाभूत सोई-सुविधा
निर्माण करण्याकरीता विविध प्रकल्प हाती घेण्यात आले आहेत. या विविध प्रकल्पांच्या
अंमलबजावणीकरिता निधी उभारणीचा स्त्रोत म्हणून प्राधिकरणाच्या जमीन संचयातील सुविधा भूखंड ई-
लिलाव (E-auction) पद्धतीने दीर्घ मुदतीच्या भाडेपट्ट्याने खाजगी विकसकांना देण्यासाठी
पीएमआरडीए कार्यालयाकडून भूखंडाचे जाहीर ई-लिलावाची प्रक्रिया केली जात आहे.
या ई-लिलाव प्रक्रियेद्वारे माण, बावधन बुद्रूक, अशा २ गावामधील एकूण ४ सुविधा भूखंडाची लिलाव
प्रक्रिया सुरु आहे. त्यापैकी बावधन बुद्रूक मधील २ सुविधा भूखंडास कमी निविदा प्राप्त झाल्यामुळे सदर
प्रक्रियेस द्वितीय मुदतवाढ देण्यात येत आहे.
सदर भूखंडाचा वापर त्याच्या अनुज्ञेय (Permission Uses) वापरासाठी आरक्षित करण्यात आलेला आहे.
त्यामध्ये ई-लिलाव प्रक्रियेद्वारे सदरच्या गावामध्ये शाळा, दवाखाने, क्रीडांगण, व्यायामशाळा,
पोस्ट कार्यालय, पार्किंग, कचरा व्यवस्थापन, जलशुद्धीकरण केंद्र व इतर सुविधा निर्माण करणेसाठी
जास्तीत जास्त नागरिकांनी सहभागी व्हावे असे याद्वारे आवाहन करण्यात येत आहे.
ई-लिलाव पद्धतीत समाविष्ट भूखंडाची किंमत व इतर सर्व सविस्तर माहिती पीएमआरडीएच्या वेबसाईट
https://pmrda.auctiontiger.net वर प्रसिद्ध करण्यात आली आहे. सदर वेबसाईटवर निविदाधारक
यांच्यासाठी दि.07 डिसेंबर २०१८ पासून नोंदणी करण्याची सुविधा उपलब्ध करून देण्यात आली आहे व
सदरच्या निविदा सादर करण्यास दि. 17 डिसेंबर २०१८ पर्यंत कागदपत्रे व शुल्क भरण्यासाठी मुदत
देण्यात आलेली आहे. सदर निविदेची ई-लिलाव प्रक्रिया (Live e-Auction) दि. २6 डिसेंबर २०१८ रोजी
सकाळी ११:०० ते सायकाळी ५:०० वा. पर्यंत करण्यात येणार आहे. तरी
https:pmrda.auctiontiger.net या वेबसाईट द्वारे ई-लिलाव पद्धतीमध्ये समाविष्ट भूखंडाची किंमत व
इतर सर्व सविस्तर माहिती उपलब्ध आहे.
उपरोक्त नमूद सुविधा भूखंड अनुज्ञेय (Permission Uses)वापरासाठी ई-लिलाव पद्धतीने दीर्घ मुदतीच्या
भाडेपट्ट्याने दिले जातील. सदर सुविधा भूखंडाच्या वापरामुळे संबंधित गावांचा जलद विकास होण्यास
मदत होईल व पायाभूत सोईसुविधा निर्माण होण्यास मदत होईल. सदर ई-लिलावामध्ये सहभागी होण्याचे
आवाहन महानगर आयुक्त किरण गित्ते यांनी केले आहे.

अरिहंत ग्रुपतर्फे शहरातील विविध भागात ब्लँकेट्सचे वाटप

पुणे : शहरातील तापमानाचा पारा खाली उतरला तशी थंडी वाढू लागली. शहरातील विविध ठिकाणी रस्त्याच्या कडेला पदपथावर झोपणाऱ्या बेघरांना थंडीमध्ये उबदार ब्लँकेट्सचे वाटप अरिहंत ग्रुपच्या वतीने करण्यात आले. मागील पाच वर्षांपासून अरिहंत ग्रुपतर्फे शहरातील बेघर लोकांना थंडीच्या दिवसात उबदार कपडे व ब्लँकेट्चे वाटप केले जाते.

अरिहंत ग्रुपमध्ये लहान मुलेही सदस्य आहेत. नवीन पिढीत सामाजिक जाणिव वाढण्याच्या दृष्टीकोनातून लहान मुलांना अशाप्रकारच्या सामाजिक उपक्रमात सहभागी करुन घेतले जाते. पालकांसमवेत मुले या उपक्रमात सहभागी झाली होती. पुण्यातील मार्केटयार्ड, स्वारगेट, ससून, रेल्वे स्टेशन, पुणे कॅम्प आदी परिसरातील बेघर नागरिकांना ब्लँकेट्सचे वाटप करण्यात आले.

या उपक्रमात अरिहंत ग्रुपचे संस्थापक अभय जैन, सहसंस्थापक निलेश नहार व सिद्धार्थ कटारिया, यश राठोड, तन्मय मेहता, तनय मेहता, विशाल जैन, वर्षा सोळंकी, जया ओसवाल, अंजना भंडारी, अंजना सोळंकी, आकाश निबजिया, ऋषभ गांधी, साहिल देसर्डा ,अरिहंतच्या ग्रुपचे सर्व लहान मुले आणि पालक आदी मोठ्या संख्येने सहभागी झाले होते.

उघड्यावर नागरिक झोपलेले आढळून आल्यास कृपया त्याठिकाणचे लोकेशन आणि फोटो 9850600511 या व्हाट्सअप नंबरवर पाठविल्यास पुढील २४ तासात त्याठिकाणी आम्ही पोहचून गरजुंना  सहाय्य करणार आहोत, असे अरिहंत ग्रुपचे अभय जैन व सिद्धार्थ कटारिया यांनी सांगितले.

काही दिवसापूर्वी पाटील इस्टेट याठिकाणी भीषण आग लागली होती. त्या ठिकाणच्या बाधित गरजू नागरिकांना देखील ब्लँकेट्सचे वाटप केले होते. ससून हॉस्पिटल मध्ये उपचारासाठी बाहेरील गावावरून येणाऱ्या गरजू लोकांना देखील अरिहंत ग्रुप ने सहकार्य केले आहे.

पुणे- – अजय तांबट मित्र परिवारातर्फे सणस मैदानावर आयोजित केलेल्या नामदार राज्यस्तरीय निमंत्रित कबड्डी स्पर्धेत महिला गटात पुण्याच्या राजमाता जिजाऊ संघ आणि सुवर्णयुग संघाने आज शुक्रवारी झालेल्या स्पर्धेत प्रतिस्पर्ध्यांवर मात करीत एकतर्फी विजय मिळवले . पुरुष गटात मात्र पुण्याच्या सतेज संघ व महाराष्ट्र संघाला पराभव स्वीकारावा लागला .
महिलांच्या अ गटात राजमाता जिजाऊ संघाने पालघर येथील कुर्लाई क्रीडा संघाचा ४९ — ३२ असा पराभव केला . मानसी सावंत आणि स्नेहल शिंदे यांनी राजमाता जिजाऊ संघाच्या विजयात मोलाचा वाटा उचलला . दोघीनी आज आपल्या खेळाचे चांगले दर्शन घडवत चान्गल्या चढाई केल्या.. तर कुर्लाई संघाच्या फरहान शेख हिने उत्कृष्ट खेळ केला.
ब गटात सुवर्णयुग मंडळ , पुणे या संघाने मातृभूमी संघ, पुणे यांचा ५०-१८ असा पराभव केला . ऐश्वर्या काळे हिने सुवर्णयुगसाठी उत्कृष्ट खेळ केला . तर श्रीजना योगी हिने मातृभूमी संघाकडून चांगली कामगिरी केली .
पुरुष गटात ब गटात ओम क्रीडा मंडळ, ठाणे यांनी महाराष्ट्र क्रीडा मंडळ, पुणे ४९-२४ अशी मात केली . ओम क्रीडा मंडळाकडून अभिजित पाटील आणि प्रशांत जाधव यांनी उत्कृष्ट चढाई व पकडी केल्या तर महाराष्ट्र मंडळाकडून अमरजित चव्हाण आणि अमोल सूर्यवंशी यांनी उत्कृष्ट खेळ करत संघाचा पराभव टाळण्याचा प्रयत्न केला .
ब गटात अत्यंत चुरशीच्या झालेल्या सामन्यात कोल्हापूर येथील शाहूपूर सडोली संघाने पुण्याच्या बलाढ्य सतेज संघाचा २४-१७ असा पराभव केला . शाहुपूर सडोली संघाकडून अक्षय पाटील व अमित पाटील यांनी चांगला खेळ केला . तर , आत्माराम कदम आणि निलेश काळभरे यांनी चांगला खेळ करीत खेळात चुरस निर्माण केली . परंतु ते संघाचा पराभव टाळू शकले नाही .

कलाकृतींच्या विक्रीतून येणाऱ्या पैशांतील 50 टक्के रक्कम दुष्काळग्रस्त शेतकऱ्यांच्या मुलांच्या शिक्षणासाठी देणार

शरद पवारांच्या वाढदिवसानिमित्त शरद कला क्रीडा प्रतिष्ठान पुणे आणि अक्षय शिंदे फाउंडेशन यांच्या वतीने या अनोख्या कार्यक्रमाचे आयोजन

पुणे : राष्ट्रवादी काँग्रेसचे संस्थापक अध्यक्ष, ज्येष्ठ नेते आणि माजी केंद्रीय मंत्री शरद पवार यांच्या वाढदिवसानिमित्त 12 चित्रकार व शिल्पकार त्यांच्या कलाकृतीतून शुभेच्छा देऊन मानवंदना देणार आहेत. तसेच, या कलाकृतींच्या विक्रीतून येणाऱ्या पैशांतील 50 टक्के रक्कम दुष्काळग्रस्त शेतकऱ्यांच्या मुलांच्या शिक्षणासाठी देण्यात येणार आहे, अशी माहिती चित्रकार श्रीकांत कदम, चित्रकार प्रा. सतीश काळे व अक्षय शिंदे फाउंडेशनचे अध्यक्ष आर. एन. शिंदे यांनी आज पत्रकार परिषेदत दिली.

शरद कला क्रीडा प्रतिष्ठान पुणे आणि अक्षय शिंदे फाउंडेशनच्या यांच्या वतीने या कार्यक्रमाचे आयोजन करण्यात आले आहे. येत्या बुधवारी (12 डिसेंबर) बालगंधर्व रंगमंदिर येथे या कार्यक्रमाचे सकाळी 11 वाजता उद्घाटन होणार असून, कलाकारांनी तयार केलेल्या कलाकृती 14 डिसेंबरपर्यंत बालगंधर्व रंगमंदिर कलादालन येथे नागरिकांना पाहण्यासाठी ठेवण्यात येणार आहेत. 10 व 11 डिसेंबर रोजी हे कलाकार बालगंधर्व रंगमंदिर येथे त्यांची कलाकृती साकारणार आहेत. 12 ते 14 डिसेंबर दरम्यान या कलाकृतींचे प्रदर्शन नागरिकांसाठी खुले राहणार आहे.

या उपक्रमासाठी श्रीकांत कदम, प्रा. सतीश काळे, तुकाराम जाधव, बाळासाहेब अभंग, प्रा. संतोष शिर्के, जितेंद्र सुतार, प्रशांत बंगाळ, सयाजी वाघमारे, दीपक वानखेडे, प्रा. मंगेश शिंदे, राम खरटमल व बापुसाहेब झांजे हे कलाकार त्यांची कलाकृती साकारणार आहेत.

शरद पवार हे भारतीय राजकारण, समाजकारण, अर्थकारण व ग्रामीण तसेच शहर विकासाच्या क्षेत्रातील अग्रगण्य व सर्वांनाच आदरणीय असे व्यक्तिमत्व आहे. याच कारणास्तव त्यांच्याप्रती आदरभाव व्यक्त करण्याबरोबरच वैशिष्ट्यपूर्ण पद्धतीने हे कलाकार त्यांच्या कलाकृतींच्या माध्यमातून शरद पवार यांना वाढदिवसाच्या शुभेच्छा देणार आहेत.

पुणे  :  लहान मुलं हे देशाचे भविष्य आहे. त्यांचे आरोग्य सुदृढ राहिले पाहिजे, त्यासाठी सकस आहार व योग्य व्यायाम गरजेचा आहे. असे मत अन्न व औषध प्रशासन मंत्री गिरीश बापट यांनी शुक्रवारी व्यक्त केले. बालगंधर्व रंगमंदिरात  आयोजित केलेल्या “स्वास्थ भारत’ कार्यक्रमात ते बोलत होते.

अन्न व औषध प्रशासन विभागाचे पुणे विभागीय आयुक्त सुरेश देशमुख, महापालिका आरोग्य अधिकारी अंजली साबणे, अन्न प्रशासन विभागाचे अतिरिक्त आयुक्त संजय शिंदे, पल्लवी भाईटे, वि.म. जावडेकर, संशोधक डॉ. नाईकनवरे, आहार तज्ञ अनुजा किणीकर, अन्न अमृत फौंडेशन इस्कॉनचे सुरेश भोसले यांच्यासह मान्यवर उपस्थित होते. सूत्रसंचालन अदिती कुलकर्णी यांनी केले.

बापट म्हणाले, देशातील अबाल वृद्ध सुदृढ राहावेत, यासाठी पंतप्रधान नरेंद्र मोदी यांनी ‘ Eat Right India’ ही संकल्पना मांडली.  भारतीय अन्न व मानके प्राधिकरणाने ही संकल्पना उचलून धरली. त्यातून एक लोकचळवळ उभी राहिली . ही चळवळ सामान्यांपर्यंत पोहचवण्यासाठी “ स्वास्थ भारत यात्रा” आयोजित करण्यात आली आहे. मधुमेह, हृदयरोग, रक्तदाब यासारख्या आजाराने रोगप्रतिकारक शक्ती कमी होते. हे लक्षात घेऊन बालकांना असे आजार होऊ नयेत अशी काळजी आपण घेतली पाहिजे.  मुलांना सकस आहार दिला पाहिजे. त्यांना मैदानावर  खेळू दिलं पाहिजे. .तेल, मीठ आणि साखर यांचे अतिसेवन आरोग्यास हानिकारक आहे.हे समजावून सांगण्यासाठी  पालकांचे प्रबोधन व्हायला हवे. या यात्रेमधून असे प्रबोधन होणार आहे. अशा प्रयत्नातून नक्कीच भावी पिढी सदृढ होऊन नरेंद्र मोदींचे स्वस्थ भारत हे स्वप्न पूर्णत्वास जाईल.

महात्मा गांधी यांच्या १५० वी जयंती तसेच जागतिक अन्न दिनाच्या निमित्ताने (१६ ऑक्टोबर ) देशातील ६ शहरांमधून या यात्रेला सुरुवात झाली. २७ जानेवारी पर्यंत ही यात्रा देशातील सर्व शहरात पोहोचणार आहे.  पुणे शहरात गुरुवारी (दि. ६) ही यात्रा दाखल झाली. यानिमित्ताने आज शहरात विविध ठिकाणी  कार्यक्रम आयोजित करण्यांत आले होते.  यांनिमित्ताने सकाळी शनिवारवाड्यापासून काढलेल्या प्रभात फेरींध्ये सुमारे १००० शालेय विद्यार्थ्यानी सहभाग घेतला होता. मुख्य कार्यक्रम बालगंधर्व रंगमंदिर येथे आयोजित करण्यात आला होता.

पुणे-पुणे महानगर प्रदेश विकास प्राधिकरण (पीएमआरडीए) च्या हवेली तालुक्यातील वाढीव
वाघोली नळ पाणीपुरवठा योजेनेच्या न्यूनतम २२.६८ कोटी रुपयाच्या योजनेस
मुंबई, मंत्रालय येथे झालेल्या बैठकीत कार्यकारी समितीची मान्यता मिळाली आहे.
सदर बैठकीस यु.पी.एस.मदान, अपर मुख्य सचिव (वित्त) तथा अध्यक्ष, कार्यकारी समिती, (पु.म.प्र.वि.प्रा.),
संजयकुमार, भा.प्र.से.अपर मुख्य सचिव, गृहनिर्माण विभाग, किरण गित्ते, भा.प्र.से.महानगर आयुक्त तथा मुख्य
कार्यकारी अधिकारी (पु.म.प्र.वि.प्रा.), सतीशकुमार खडके, मुख्य कार्यकारी अधिकारी (पिं.चिं.न.वि.प्रा.),
कविता व्दिवेदी, अतिरिक्त आयुक्त तथा अतिरिक्त मुख्य कार्यकारी अधिकारी (प्रशासन) (पु.म.प्र.वि.प्रा.) सचिव
आदी उपस्थित होते.
वाघोली शहर पुण्याच्या जवळ असल्यामुळे वाघोली क्षेत्राची झपाट्याने वाढ होत आहे. नवीन गृहप्रकल्पे
विकसित झाल्यामुळे अस्तित्वातील पाणी पुरवठा योजना कमी पडू लागली आहे. त्यामुळे सदरील योजनेला
जोडून नव्याने योजना तयार करण्याची ग्रामपंचायत वाघोली यांनी मागणी केलेली होती. त्यानुषंगाने मौजे
वाघोली ता. हवेली जि. पुणे या गावासाठी पाणीपुरवठा ग्रामपंचायत वाघोली मार्फत राबविण्यात येणार आहे.
अस्तित्वातील योजनेतून सध्या २.२ MLD पाणी पुरवठा पिण्याची मागणी १२ तास उपसा गृहीतधरून
केलेली आहे. २०११ साली ही योजना तयार करण्यात आलेली आहे. अस्तित्वातील गावातील विहिरीवर अशुद्ध
पाणी पंपिंग मशिनरी बदलून त्यासाठी वेगळी दाबनलिका टाकून ०.५ MLD पाणी साठा वाढविण्याचे काम
प्रस्तावित केले आहे. नवीन योजनेचा उद्भव भीमानदीवर वढू बंधा-याच्या वरच्या बाजूस आहे. ही योजना
१,३३,००० लोकसंख्येसाठी ९० ली./माणसी/दिन गृहीत धरून संकल्पित केलेली आहे. मे.अन्वी कन्सट्रक्शन
या कंपनीला न्यूनतम आर्थिक देकारानुसार सध्या हे काम मिळालेले आहे.
महानगर आयुक्त किरण गित्ते म्हणाले की, ‘वाढीव वाघोली पाणी पुरवठा योजनेमुळे नक्कीच वाढती लोकसंख्या
व गृहप्रकल्पे लक्षात घेता नागरिकांना भविष्यात पाणी टंचाई जाणवणार नाही. सध्याच्या योजनेमध्ये इनटेक
वेल, कनेक्टिंग पाईप, जॅकवेल, पंप हाऊस, अशुद्ध पाणी ऊर्ध्वनलिका ३५० मि.मी व्यासाची आहे.
जलशुद्धीकरण केंद्र ५ दशलक्ष लिटर क्षमतेचे उपलब्ध आहे. सदरील योजनेचा खर्च रु.२२.६८ कोटी अपेक्षित
आहे.