मुळशी- तालुक्यातील लवळे गावात असलेल्या जमिनीबाबत तक्रारदाराच्या बाजूने निकालपत्र देण्यासाठी एक कोटींची लाच मागितल्या प्रकरणी शनिवारी रात्री तहसीलदार सचिन डोंगरे याच्यासह पत्रकार किसन बाणेकर यांना अटक करण्यात आली. न्यायालयाने रविवारी दोघांना २ जानेवारीपर्यंत पोलीस कोठडीत ठेवण्याचे आदेश दिले.

तहसीलदार सचिन डोंगरे (वय ४२,रा. लेझी रॉक सोसायटी, बावधन )आणि पत्रकार किसन बाणेकर (वय ४०,रा. लवळे, ता. मुळशी) यांना रविवारी सायंकाळी शिवाजीनगर न्यायालयात लाचलुचपत प्रतिबंधक विभागाच्या पथकाने हजर केले. डोंगरे याच्या वतीने बाणेकर यांनी लाच स्वीकारली. डोंगरे यांनी ज्या कामासाठी लाच स्वीकारली होती, त्याबाबतची कागदपत्रे डोंगरे यांच्या कार्यालयात आहेत. कार्यालय बंद असून या कागदपत्रांच्या प्रती तपासून घ्यायच्या आहेत. डोंगरे याच्या बंगल्याची झडती घ्यायची आहे. त्याच्या बँकेतील लॉकरची तपासणी करायची आहे.  पत्रकार बाणेकर तहसील कार्यालयात दलाल म्हणून वावरत आहे. त्याची चौकशी करायची आहे. त्यामुळे दोघांना  पोलीस कोठडी देण्याची विनंती सरकार पक्षाकडून करण्यात आली. बचाव पक्षाकडून अ‍ॅड. हेमंत झंझाड, अ‍ॅड.नंदकुमार शिंदे, अ‍ॅड. विवेक भरगुडे, अ‍ॅड. कुमार पायगुडे  यांनी बाजू मांडली. न्यायालयाने डोंगरे आणि बाणेकर यांना २ जानेवारी पर्यंत पोलीस कोठडीत ठेवण्याचे आदेश दिले.

नेमके प्रकरण काय ?

या प्रकरणातील तक्रारदार ज्येष्ठ नागरिक आहेत. सध्या ते दौंड येथे वास्तव्यास आहेत. तक्रारदाराच्या पूर्वजांना  मुळशी तालुक्यात अनेक ठिकाणी इनामावर जमिनी मिळाल्या आहेत. तक्रारदार वारसदार आहे. त्यांची मुळशी तालुक्यातील लवळे येथे शेत जमीन आहे. नातेसंबंधातील एकाने वडिलोपार्जित जमिनीची फसवणूक करुन परस्पर विक्री केली होती. तक्रारदाराने वारसा नोंदीसाठी मुळशीतील तहसील कार्यालयात संपर्क साधला होता. याबाबतचे प्रकरण मंत्रालयात गेले होते. तेथील सचिवांनी या कागदपत्रांची पुन्हा छाननी करुन अहवाल देण्यासाठी हे प्रकरण तहसील सचिन डोंगरे यांच्याकडे पाठविले होते. तक्रारदाराने वेळोवेळी संपर्क साधून निकालपत्र देण्याची विनंती केली होती. निकालपत्र देण्यासाठी डोंगरे यांनी १ कोटी रुपयांची लाच मागितली होती. त्यानंतर तक्रारदाराने लाचलुचपत प्रतिबंधक विभागाकडे नुकतीच तक्रार केली. शनिवारी सायंकाळी लवासा रस्त्यावर डोंगरे याच्या वतीने पत्रकार बाणेकर यांनी लाच स्वीकारली.

तहसीलदाराची मोठी मालमत्ता

लाचखोर तहसीलदार सचिन डोंगरे याचा सोलापूर जिल्ह्य़ातील मोहोळ तालुक्यात असलेल्या पापडी गावात बंगला आहे. तसेच मोहोळ येथील एका बँकेत लॉकर आहे. करमाळा येथील बँकेत एक लॉकर असून त्याच्या चाव्या डोंगरे याच्याकडे आहेत. सोलापूर येथे एक बंगला आहे. त्याची झडती घेण्याचे काम सध्या लाचलुचपत प्रतिबंधक विभागाकडून सुरु आहे.

पुणे :भारतीय विद्या भवन -इन्फोसिस फाऊंडेशन तर्फे सांस्कृतिक प्रसार उपक्रमांतर्गत युवा कलाकार सुखद मुंडे यांच्या ‘मृदंग ‘ या सोलो (एकल ) वादनाच्या कार्यक्रमाला शनिवारी सायंकाळी पुणेकर रसिकांनी चांगला प्रतिसाद दिला .

अभिनय रवंदे यांनी त्यांना लेहरा साथ दिली. .सरदार नातू सभागृह ,भारतीय विद्या भवन ,सेनापती बापट रस्ता येथे शनिवार २९ डिसेंबर रोजी सायंकाळी साडेपाच वाजता हा कार्यक्रम झाला. भारतीय विद्या भवन चे मानद सचिव नंदकुमार काकिर्डे यांनी स्वागत केले . यादवराज फड यांनी प्रास्ताविक केले. कार्यक्रमाचे सूत्रसंचालन माधुरी कुलकर्णी यांनी केले.

सुखद मुंडे यांचे यावेळी पखवाजवादन देखील झाले.यात त्यांनी प्रथम १२ मात्रांचा चौताल वाजवला.पं.सुखद मुंडे यांनी घराणेदार पखावज वादन केले त्यामधे पं.मानिकजी मुंडे यांच्या काही घराणेदार बंदिशी ,रेले ,पंचदेव स्तूती परण, असे सादरीकरण केले .’धीरधीर’ हा रेला पखावजवर वाजून रसिकांना मंत्रमुग्ध केले.

बंडातात्या क-हाडकर म्हणाले उपस्थित होते . ते म्हणाले , ‘वारकरी संगीतावर , अभंगावर फिल्मी संगीताचे आक्रमण होते ही चिंतेची गोष्ट आहे.
अभंगांना फिल्मी वा नाट्यपदांच्या चाली लावणे या भ्रष्ट पद्धतिंना अटकाव करण्यासाठी सात्विक आणि शुद्ध प्रयत्न आवश्यक आहे. आजकाल अभंग गाणारे आणि भजन गाणारेही अभ्यासाचा अभाव असल्याने अभंग , भजन गायनात शब्द भलते गातात,चालही भ्रष्ट करतात आणि अर्थ ही बदलतात

भारतीय संस्कृति व वारकरी संगीताची परंपरा जपण्याचे काम भारतीय विद्या भवन नेहमी करत आले आहे मूळ संगीत टिकणे, व संस्कृति जपण्यासाठी भारतीय विद्या भवन नेहमी पुढाकार घेते असे मत नंदकुमार काकिर्डे यांनी व्यक्त केले.

पुणे-आगामी वर्षातील लोकसभा सार्वत्रिक निवडणूक 2019 च्या पुर्वतयारीचा भाग म्हणून भारत निवडणूक आयोगाने दिलेल्या सूचनेनुसार जनतेमध्ये , मतदारांमध्ये ईव्हीएम व व्हीव्हीपॅट मशीन आणि निवडणूक प्रक्रियेबाबत विश्वासार्हता निर्माण करण्यासाठी जनजागृती करण्याचे आदेश दिलेले आहेत. त्या अनुषंगाने जिल्हाधिकारी नवल किशोर राम ,यांनी आज दि. 29/12/2018 रोजी जिल्हाधिकारी कार्यालय पुणे येथे सर्व  खासदार ,. आमदार व मान्यता प्राप्त राजकीय पक्ष प्रतिनिधींची बैठक आयोजित केली होती. सदर बैठकीमध्ये आगामी लोकसभा सार्वत्रिक निवडणूकीमध्ये वापरण्यात येणाऱ्या ईव्हीएम व व्हीव्हीपॅट मशीन बाबत माहिती देऊन त्याचे प्रात्यक्षिक बैठकीमध्ये दाखविण्यात आले. यावेळी ईव्हीएम व व्हीव्हीपॅट मशीन द्वारे होत असलेली निवडणूक प्रक्रिया विश्वासार्ह असून आता मतदाराला आपण केलेले मतदान त्याच उमेदवाराला झाले असल्याबाबत व्हीव्हीपॅट मशीनमध्ये सात सेंकदासाठी संबंधीत उमेदवाराचे नाव व चिन्ह स्लिपद्वारे दिसून येणार असून सदरची स्लिप व्हीव्हीपॅट मशीनमध्ये पडणार असल्यामुळे यात अधिक पारदर्शकता आलेली आहे. याबाबतची सविस्तर माहिती व शंकांचे निरसन बैठकीमध्ये करण्यात आले. यावेळी उपस्थित राजकीय प्रतिनिधी यांनी याबाबत माहिती प्राप्त करुन घेऊन व त्यांना असलेल्या शंका विचारुन शंकांचे निरसन करुन घेतले तसेच प्रत्यक्ष मशीन वर मतदान करुन पाहिले.
पुणे जिल्हयात ईव्हीएम व व्हीव्हीपॅट मशीनबाबतची जनजागरुकता मोहिमेचा प्रारंभ जिल्हाधिकारी नवल किशोर राम यांच्या हस्ते जिल्हाधिकारी कार्यालयात करण्यात आला. दि.29/12/2018 पासून 211 खडकवासला मतदार संघ व दि.04/01/2019 पासून इतर विधानसभा मतदार संघामध्ये या जनजागरुकता मोहिमेस सुरुवात करण्यात येत आहे. सदरची मोहिम 1 महिना ते 45 दिवसांच्या कालावधीपर्यंत सुरु राहणार आहे. यावेळी सदरची मशीन मतदान केंद्रस्थळावर व इतर मोक्याच्या ठिकाणी मोबाईल व्हॅन द्वारे प्रात्यक्षिके दाखविण्यात येणार आहे. या प्रात्यक्षिकाचा मतदारांनी जास्तीत जास्त लाभ घ्यावा असे आवाहन जिल्हाधिकारी यांनी केले आहे.
ईव्हीएम व व्हीव्हीपॅट मशीन ही मतदाराला त्याने केलेल्या मतदानाची पडताळणी दाखविणारे, मतदानाबद्दल विश्वासार्हता निर्माण करणारी यंत्रणा आहे. या बाबतची जनजागृती मोहीम अत्यंत सूक्ष्मपणे व काटेकोरपणे राबविण्यात यावी. ईव्हीएम व व्हीव्हीपॅट मशीनबाबत मतदारामध्ये कोणत्याही प्रकारची साशंकता आणि संभ्रम राहणार नाही यासाठी मोहिम कालावधी मध्ये योग्य प्रकारे प्रात्यक्षिक दाखवून त्यांच्या शंकाचे निरसन करण्याच्या सूचना उपस्थित अधिकारी कर्मचारी यांना मा. जिल्हाधिकारी यांनी दिल्या. तसेच, या जनजागरुकता मोहिमेची माहिती जास्तीत जास्त ग्रामस्थांपर्यत पोहचविण्यासाठी याची योग्य प्रकारे प्रसार व प्रसिध्दी करण्याचे तसेच, ग्रामीण भागामध्ये या कार्यक्रमाची दवंडी देऊन पुर्व प्रसिध्दी करण्याचे निर्देश जिल्हाधिकारी यांनी कर्मचाऱ्यांना दिलेले आहेत. तसेच, याची सरपंच, पंचायत समिती सदस्य, जिल्हा परिषद सदस्य, नगरसेवक व अन्य लोकप्रतिनिधी यांना याबाबतची पुर्वकल्पना द्यावी. व त्यांना या प्रात्याक्षिकाच्या वेळी उपस्थित राहण्याची विनंती करण्यात यावी अशा सूचना देण्यात आल्या. सदर बैठकीस आमदार श्री. बाबूराव पाचर्णे, राष्ट्रवादी कॉग्रेस सरचिटणीस मोहनसिंग राजपाल, आमदार आढळराव पाटील यांचे प्रतिनिधी  प्रकाश मरकळे, आमदार लांडगे यांचे प्रतिनिधी सचिन फोडके, , खासदार  श्रीरंग बारणे यांचे प्रतिनिधी अविनाश सकपाळ, श्री.अरुण गायकवाड, सचिव पुणे शहर कॉग्रेस , कु.कांदबरी साळवी, भा.ज.पा. कसबा अध्यक्ष युवती आघाडी, प्रवीण करपे, कॉग्रेस कसबा अध्यक्ष , श्री. दिलीप वाल्हेकर, हवेली ता. राष्ट्रवादी कॉग्रेस, व इतर प्रतिनिधी उपस्थित होते.
पुणे जिल्हयात एकुण 7666 मतदान केंद्र असून या जनजागृती मोहिमेमध्ये मतदार संघामध्ये वापरण्यात येणाऱ्या ईव्हीएम व व्हीव्हीपॅट मशीनचे क्रमांक कोणते आहेत याची माहिती उपस्थितांना देण्यात आली. यासाठी प्रत्येक मतदार संघामध्ये दोन मोबाईल व्हॅनद्वारे याची प्रात्याक्षिके दाखविण्यात येणार आहेत.
आगामी लोकसभा निवडणूकीची पुर्वतयारी म्हणून लोकसभा निवडणूकीसाठी विविध समित्यांची स्थापना करण्यात आलेली असून या समित्यांच्या समन्वय/ नोडल अधिकारी यांची बैठक मा. जिल्हाधिकारी यांच्या कार्यालयात घेण्यात आली. या बैठकीमध्ये निवडणूकीच्या अनुषंगाने आवश्यकती पुर्वतयारी करण्याच्या सूचना सर्व संबंधीत नोडल अधिकारी यांना देण्यात आल्या. याबैठकीसाठी श्रीमती. नयना गुंडे, अध्यक्ष व व्यवस्थापकीय संचालक, पीएमपीएमएल , पुणे , . सुभाष डूंबरे, अतिरिक्त आयुक्त,  महेश आव्हाड, अप्पर जिल्हाधिकारी , श्.प्रवीण देवरे, अप्पर जिल्हाधिकारी, श्रीमती. नयना गुरव, अप्पर जिल्हाधिकारी नोंदणी व मुद्रांक विभाग, पुणे , व इतर अधिकारी उपस्थित होते. सदर बैठकीमध्ये आगामी लोकसभा निवडणूक 2019 च्या पुर्वतयारीबाबत उप जिल्हा निवडणूक अधिकारी श्रीमती. मोनिका सिंह यांनी माहिती दिली.

पुणे :”भोवताली बोलणारी माणसे जास्त आहेत ,आणि कृतिशीलतेची कमतरता आहे ,अशा वातावरणात कृतिशील होऊन सकारात्मक बदलासाठी प्रत्येकाने काम करून ‘सकारात्मक बदलाचे दूत ‘ व्हावे ” ,असा संदेश अखिल भारतीय मराठी साहित्य संमेलनाचे अध्यक्ष डॉ . लक्ष्मीकांत देशमुख यांनी विद्यार्थ्यांना  आणि सामाजिक कार्यकर्त्याना दिला .

‘महाराष्ट्र कॉस्मॉपॉलिटन एज्युकेशन सोसायटी’ आणि ‘प्रबोधन माध्यम’ यांच्या संयुक्त विद्यमाने देण्यात येणारे ‘डॉ.पी.ए.इनामदार सामाजिक कृतज्ञता सन्मान २०१८’  आज डॉ . लक्ष्मीकांत देशमुख यांच्या हस्ते विविध क्षेत्रातील  मान्यवरांना  संस्थेच्या असेम्ब्ली हॉल मध्ये झालेल्या शानदार कार्यक्रमात देण्यात आले . त्यावेळी प्रमुख पाहुणे या नात्याने डॉ . देशमुख बोलत होते . गतीमान प्रशासनाचे प्रयोग करणारे शिवकुमार डिगे (माजी धर्मादाय आयुक्त, मुंबई उच्च न्यायालयाचे  निबंधक -रजिस्ट्रार ,मुंबई  ),अन्वर राजन (सचिव ,महाराष्ट्र गांधी स्मारक निधी ,सामाजिक चळवळीतील ज्येष्ठ कार्यकर्ते ,पुणे ),  डॉ . सुमंत पांडे (कार्यकारी संचालक ,जलसाक्षरता केंद्र ,यशदा ,पुणे ), ,संजय यादवराव (संस्थापक ,कोकण भूमी प्रतिष्ठान,मुंबई  ), डॉ. जे . बी . गारडे  ( दंत शल्य चिकित्सक,पुणे ) यांना  ‘डॉ.पी.ए.इनामदार सामाजिक कृतज्ञता सन्मान २०१८’ ने गौरविण्यात आले . शिवकुमार डिगे या कार्यक्रमाला येऊ शकले नाहीत .

किशोर धारिया (पश्चिम घाटातील पर्यावरणस्नेही पर्यटन ),राजेंद्र आवटे (ग्रामीण भागातील उद्योग संधी निर्माण ),संजय भंडारी (इलेक्ट्रॉनिक वेस्ट रिसायकलिंग )  यांना त्यांच्या योगदानाबद्दल  ‘डॉ. पी.ए. इनामदार सामाजिक कृतज्ञता  दशकपूर्ती सन्मान’ गौरवाने सन्मानित करण्यात आले .
‘महाराष्ट्र कॉस्मॉपॉलिटन एज्युकेशन सोसायटी’  च्या गुणवंत सहकाऱ्यांसाठी असलेल्या  ‘डॉ. पी. ए. इनामदार कार्यक्षमता व गुणवत्ता सन्मान’ ने  डॉ . शैला बूटवाला (प्राचार्य,आबेदा इनामदार वरिष्ठ महाविद्यालय )आणि  जुलेखा शेख (ऑफिस सुप्रीटेंडेंट ,आबेदा इनामदार वरिष्ठ महाविद्यालय ) यांना गौरविण्यात आले .   ‘डॉ.पी.ए.इनामदार सामाजिक कृतज्ञता सन्मान २०१८’ चे वितरण अ . भा . मराठी साहित्य संमेलनाचे माजी अध्यक्ष डॉ . लक्ष्मीकांत देशमुख यांच्या हस्ते झाले . ‘महाराष्ट्र कॉस्मॉपॉलिटन एज्युकेशन सोसायटी’ (आझम कॅम्पस)च्या असेंब्ली हॉलमध्ये दिनांक २८ डिसेंबर रोजी सकाळी ११ वाजता हा कार्यक्रम झाला . संयोजन समितीचे अध्यक्ष दीपक बीडकर यांनी  प्रास्ताविक केले .रुमाना शेख यांनी सूत्रसंचालन केले .  लतीफ मगदूम यांनी आभार मानले .

‘महाराष्ट्र कॉस्मापॉलिटन एज्युकेशन सोसायटी’चे अध्यक्ष डॉ.पी.ए.इनामदार यांच्या वाढदिवसादिवशी  हा सन्मान सोहळा आयोजित केला जातो .  यावर्षी डॉ . पी.ए.इनामदार यांचा ७४ वा वाढदिवस होता . सन्मानाचे  दशकपूर्ती वर्ष होते .  सन्मानचिन्ह ,शाल ,पुष्पगुच्छ ,रोख रक्कम  असे या सन्मानाचे स्वरूप होते .डॉ . लक्ष्मीकांत देशमुख म्हणाले ,” महाराष्ट्र कॉस्मोपॉलिटन एज्युकेशन सोसायटीचा परिसर हा व्यवस्थेने नाकारलेल्याना उत्तम शिक्षण देणारा कॅम्पस आहे . भारत कसा असावा याचे हे प्रारूप आहे . डॉ . पी . ए . इनामदार हे सर सय्यद खान यांची शिक्षण परंपरा चालवत आहेत .ते शिक्षणाचा वसा घेतलेले द्रष्टे व्यक्तिमत्व आहे .  भोवताली बोलणारी माणसे जास्त आहेत ,आणि कृतिशीलतेची कमतरता आहे ,अशा वातावरणात कृतिशील होऊन सकारात्मक बदलासाठी प्रत्येकाने काम करून ‘सकारात्मक बदलाचे दूत ‘ व्हावे . मुस्लिम मागासांसाठी अजून शिक्षण संस्था आणि  डॉ . पी . ए . इनामदार यांच्यासारख्या नेतृत्वाची गरज आहे ‘ . महाराष्ट्र हा कार्यकर्त्यांचे मोहोळ आहे ,आणि अशा कृतिशील कार्यकर्त्यांचा गौरव करणारे आहेत ,याची खात्री या कार्यक्रमाने पटली,असेही त्यांनी सांगितले  .