पुणे :पुणे शहर राष्ट्रवादी कॉंग्रेस पक्षाच्या वतीने आज शहराध्यक्ष चेतन तुपे पाटील यांच्या नेतृत्वाखाली फसव्या सरकार विरोधात व वाढत्या बेरोजगारी विरोधात मोर्चा काढण्यात आला.
लाल महाल चौकापासून सुरूवात होउन या मोर्चाचा समारोप जिल्हाधिकारी कार्यालय येथे झाला. मोर्चामध्ये युवकांची संख्या लक्षणीय होती या मोर्चामध्ये युवकांनी सरकारचे लक्ष वेधण्यासाठी पकोडा सेंटर तसेच गाजराची हातगाडी व स्वतःच्या गळ्यात पदवी प्रमाणपत्रांचे हार घातले होते.
मोदीसरकार जवाब दो* ,मोदी सरकार जॉब दो या सरकारच करायच काय खाली डोक वर पाय, चोकीदार चोर है!
अशा घोषणांनी युवकांनी मोर्चा दणाणून टाकला.

या सरकारने युवकांना दरवर्षी २ कोटी रोजगार देतो अशी आश्वासने देउन फसविले आहे. नोटाबंदी च्या निर्णयामुळे या देशाच्या इतिहासात एवढी बेरोजगारी कधी आली नव्हती तेवढी बेरोजगारी आलेली आहे. युवकांना हे सरकार पदवीधर व्हा आणि पकोडे विका अस सांगतय , यांच्याकडे युवकांच्या रोजगारासाठी कोणताही कार्यक्रम नाही. या सरकारने देशातील कोणत्याही घटक असा ठेवला नाही की तो आंदोलन करत नाहीये, विद्यार्थी ,शेतकरी , विविध समाज ,डॉक्टर, वकील , साहित्यिक, विचारवंत, युवक समाजातील कोणत्याच घटकाच्या मागण्या या सरकारने पुर्ण केल्या नाहीत उलट त्यांचा आवाज दाबण्याच काम हे सरकार करीत आहे. भाजप सरकारने तरुणांची रोजगाराच्या नावाखाली फसवणूक केली. त्यामुळे तरुणांच्या मनात आक्रोश आहे आणि हा आक्रोश आज राष्ट्रवादीच्या माध्यमातून मांडण्यासाठी व या फसव्या सरकारच्या धोरणांच्या विरोधात निदर्शने करण्यासाठी तरुणाई मोठ्या प्रमाणावर रस्त्यावर आली आहे व हाच तरुण या फसव्या सरकारचा भरलेला पापाचा घडा फोडेल व यांना घरी पाठवेल असे बोलताना *शहराध्यक्ष चेतन तुपे पाटील म्हणाले.
जिल्हाध्यक्ष प्रदीप गारटकर म्हणाले की , युवकांना देशोधडीला लावण्याचे काम या सरकारने केलेले आहे ,NSSO च्या अहवालानुसार बेरोजगारी चे प्रमाण झपाट्याने वाढत आहे ,या सरकारकडे युवकांसाठी कोणताही कार्यक्रम नाही. यावेळी विरोधी पक्षनेते दिलीप बराटे , मा.आ.अशोक पवार,मा.आ. बापुसाहेब पठारे,मा.महापौर प्रशांत जगताप ,दता धनकवडे,सुरेश घुले,सुभाष जगताप,रवींद्र माळवदकर,जालिंदर कामठे,विशाल तांबे,बाबुराव चांदेरे,वनराज आंदेकर,अशोक कांबळे, गफुर पठाण,युवराज बेलदरे महिला जिल्हाध्यक्ष,वैशाली नागवडे युवक अध्यक्ष राकेश कामठे ,युवती अध्यक्ष मनाली भिलारे, विद्यार्थी अध्यक्ष रीशी परदेशी ,सामाजिक न्याय अध्यक्ष बापु डाकले,ओ बी सी अध्यक्ष संतोष नांगरे,नितीन कदम,विनायक हनमघर,गणेश नलावडे,भोलासिंग अरोरा,फहिम शेख,स्वप्निल दुधाणे,निलेश निकम,संतोष फरांदे,नारायण लोणकर, आबा कापरे, राजु साने,राष्ट्रवादी कॉंग्रेस पक्षाचे सर्व पदाधिकारी व कार्यकर्ते उपस्थित होते .

पुणे-इंग्रजी माध्यमातील शाळेत दुसऱ्या इयत्तेत शिकणाऱ्या विद्याार्थ्याचे दोरीने हात बांधून शिक्षा देण्याचा प्रकार उघडकीस आला आहे. या प्रकरणी पोलिसांकडून शाळेच्या प्राचार्यांसह वर्ग शिक्षिकेविरोधात गुन्हा दाखल करण्यात आला आहे. या प्रकरणात शालेय प्रशासनाला जाब विचारून आक्षेप घेणाऱ्या  क्रीडा शिक्षकाला कामावरून कमी करण्यात आले होते.

संबंधित मुलाच्या शिक्षेला आक्षेप घेतला म्हणून काढून टाकलेल्या शिक्षकाने, महिला व बाल विकास मंत्रालयाला मुलाला देण्यात आलेल्या शिक्षेचे छायाचित्र पाठविले होते. त्यानंतर मंत्रालयाकडून देण्यात आलेल्या आदेशानंतर पोलिसांनी चौकशी करून गुन्हा दाखल केला. या प्रकरणी कोंढवा भागातील मनसुखभाई कोठारी इंग्रजी माध्यमाच्या शाळेतील प्राचार्या प्रज्ञा गोखले आणि वर्ग शिक्षिका हबिबा यांच्या विरोधात गुन्हा दाखल करण्यात आला. शाळेतून कमी करण्यात आलेले क्रीडा शिक्षक अनिकेत सातव (वय २८, रा. सहकारनगर) यांनी याबाबत तक्रार दिली होती.

पोलिसांनी दिलेल्या माहितीनुसार, सातव हे कोंढवा भागातील मनसुखभाई कोठारी शाळेत क्रीडाशिक्षक होते. १ नोव्हेंबर २०१८ रोजी दुसरीच्या वर्गातील मुलांचा खेळाचा तास होता. मुले मैदानावर आली. तेव्हा एका मुलाचे हात दोरीने बांधण्यात आले होते. सातव यांनी मुलाच्या हाताला बांधलेली दोरी सोडली आणि त्याला वर्गात पाठविले. त्याच्याकडे विचारणा करण्यात आली. तेव्हा वर्गशिक्षिकेने हात बांधल्याचे मुलाने सातव यांना सांगितले. क्रीडा शिक्षक सातव पुन्हा वर्गात गेले. तेव्हा मुलाचे हात पुन्हा बांधण्यात आले होते. या घटनेनंतर सातव यांनी प्राचार्या गोखले यांच्याकडे विचारणा केली. तेव्हा मुलगा वर्गात त्रास देत असल्याने त्याचे हात बांधण्यात आले. या प्रकाराची कुठे वाच्यता करू नका, असे गोखले यांनी सातव यांना सांगितले.

या घटनेनंतर काही दिवसांनी सातव यांना कोणतेही कारण न देता शाळेतून कमी करण्यात आले. दरम्यान, सातव यांनी ५ फेब्रुवारी रोजी महिला आणि बाल विकास मंत्रालयाला या घटनेचे छायाचित्र इ-मेल केले. या प्रकरणाची गंभीर दखल घेऊन चौकशी करण्याचे आदेश मंत्रालयाकडून पोलिसांना देण्यात आले. कोंढवा पोलीस तसेच शिक्षण विभागातील अधिकाऱ्यांनी शाळेत जाऊन चौकशी केली. त्यानंतर या प्रकरणात गुन्हा दाखल करण्यात आला, अशी माहिती पोलीस उपनिरीक्षक विष्णू वाडकर यांनी दिली.

पुणे : महावितरणमधील कर्मचाऱ्यांना सोपविण्यात आलेल्या कामांचे योग्य नियोजन करून ते अधिक सुटसुटीतपणे व प्रभावीपणे करता यावे यासाठी मनुष्यबळ पुनर्रचना आराखडा तयार करण्यात आला आहे, अशी माहिती कार्यकारी संचालक श्री. श्रीकांत जलतारे यांनी दिली.

येथील महावितरणच्या प्रशासकीय इमारतीमध्ये नुकत्याच झालेल्या मनुष्यबळ पुर्नरचना संदर्भात संवाद कार्यक्रमात ते बोलत होते. यावेळी पुणे परिमंडलाचे मुख्य अभियंता श्री. सचिन तालेवार, अधीक्षक अभियंता श्री. सुंदर लटपटे, श्री. पंकज तगलपल्लेवार, श्री. राजेंद्र पवार, श्री. वादिराज जहागिरदार यांची प्रमुख उपस्थिती होती. या कार्यक्रमात कार्यकारी संचालक श्री. जलतारे यांनी मनुष्यबळ पुर्नरचना आराखड्याचे सादरीकरण केले व माहिती दिली.

कार्यकारी संचालक श्री. जलतारे म्हणाले, की सध्याच्या रचनेत महावितरणमध्ये एकाच कर्मचारी किंवा अधिकाऱ्याला निरनिराळी कामे करावी लागतात. त्यामुळे एक काम करताना दुसऱ्या कामात अनपेक्षित किंवा कोणताही हेतू नसताना उणिवा राहून जातात. काम अपूर्ण राहते. लांबणीवर जाते. सोबतच कंपनीचे उद्दिष्ट साध्य होत नाही. एकाचवेळी एकच व्यक्ती अनेक प्रकारचे काम करीत असताना प्रत्यक्ष व अप्रत्यक्ष त्याच्यावर मानसिक व शारीरिक ताण येतो. आरोग्यविषयक समस्या निर्माण होतात. या पार्श्वभूमिवर कर्मचारीहितासाठी कार्यात्मक पुनर्रचना करणे ही काळाची गरज होती. या पुनर्रचनेमध्ये बिलिंग, महसूल, देखभाल व दुरुस्ती ही कामे स्वतंत्रपणे करण्यात येणार आहे. पुनर्रचनेच्या आराखड्यातील सर्व कर्मचार्‍यांचे जॉब चार्ट तयार करण्यात आले आहेत. यासोबतच ग्रामीण भागातील उपविभाग अधिक बळकट करण्यात येणार आहेत. हे सर्व करीत असताना मंजूर पद व कर्मचारी संख्येत कोणतीही कपात होणार नाही. पदोन्नतीवर कोणताही परिणाम होणार नाही. ग्राहकांची वाढती संख्या तसेच भविष्यातील ग्राहकसेवा याचा सध्याच्या रचनेतील ताण कमी करण्यासाठी ही कार्यात्मक पुनर्रचना करण्यात येत आहे.

मुख्य अभियंता श्री. सचिन तालेवार म्हणाले, की क्षेत्रीय कर्मचाऱ्यांना सध्या अनेक प्रकारचे कामे करावे लागतात. परिणामी कामाचा तणाव निर्माण होतो व आरोग्यावरही परिणाम होतो ही बाब अनेक कर्मचारी संघटनांनी मुख्यालयाला निदर्शनास आणून दिली होती. त्याचाही प्रामुख्याने विचार करून या पुनर्रचनेत प्रत्येक कर्मचाऱ्यांना त्यांच्या कामांची जबाबदारी व कर्तव्ये नेमून देण्यात येणार आहेत. त्यामुळे प्रत्येक कर्मचाऱ्यास कामाचे योग्य नियोजन करणे सोयीचे होईल व त्याचा थेट फायदा वीजग्राहकांना होणार आहे.

यावेळी उपस्थित सर्व संवर्गातील कर्मचारी, अधिकाऱ्यांनी आराखड्याबाबत काही मते, बदल सूचविले. प्राप्त झालेल्या सर्व सूचना व मागण्यांची यावेळी नोंद करून घेण्यात आली. यावेळी सहाय्यक महाव्यवस्थापक (मानव संसाधन) श्री. अशोक केदारे (मुंबई), श्री. राजेंद्र म्हकांळे (पुणे), सहाय्यक महाव्यवस्थापक (वित्त व लेखा) सौ. माधुरी राऊत, उपमुख्य औद्योगिक संबंध अधिकारी श्री. रामगोपाल अहिर आदींसह अभियंते, अधिकारी, कर्मचारी मोठ्या संख्येत उपस्थित होते.

पुणे-रथसप्तमीचे औचित्य साधून दरवर्षीप्रमाणे प्रशालेत यंदाही सुर्यनमस्कार घेण्यात आले. सर्व विद्यार्थी व शिक्षक यात सहभागी झाले होते. प्रत्येकाने ध्यानमंत्रांसह सुर्यनमस्कार घातले. विद्यार्थ्यांना सुर्यनमस्कार घालण्याचे ङ्गायदे सांगण्यात आले. सुदृढ आरोग्यासाठी सुर्यनमस्कार करणे हितावह असते याचा अनुभव विद्यार्थ्यांना देण्यात आला.
माननीय मु‘याध्यापिका सौ. लिना तलाढी यांनी विद्यार्थ्यांना योगासने, सुर्यनमस्कार, प्राणायाम यांची माहीती दिली. विद्यार्थ्यांमध्ये आरोग्याबाबत जागरूकता निर्माण करण्यासाठी हा कार्यक‘म उपयुक्त ठरला. या कार्यक‘मासाठी शारीरिक शिक्षक श्री. सुभाष निंबाळकर यांनी विशेष प्रयत्न केले.

पुणे : वसंतदादा पाटील कॉलेज ऑफ आर्किटेक्चरमध्ये (पीव्हीपीसीओए) वास्तुकलेच्या विविध डिझाईन्स, लँडस्केप व विविध प्रयोगांचे प्रदर्शन विद्यार्थ्यांनी आयोजित केले आहे. जगभरातील नवीन तंत्रज्ञान व अभ्यास आत्मसात व्हावा आणि त्यातून भारतातील वास्तुकलेला नवे आयाम प्राप्त होण्यासाठी त्याचा फायदा व्हावा यासाठी विद्यार्थ्यांनी अभ्यासपूर्वक हे प्रदर्शन भरविले असून ते वर्षभर सुरु राहणार आहे. महाविद्यालयात सांस्कृतिक महोत्सवाचे आयोजन करण्यात आले आहे.

वसंतदादा पाटील कॉलेज ऑफ आर्किटेक्चरमधील सांस्कृतिक महोत्सव व प्रदर्शनाचे उद्घाटन वास्तुविशारद व साहित्यिक माधव हुंडेकर यांच्या हस्ते झाले. याप्रसंगी उपाध्यक्ष इंद्रकुमार छाजेड, सचिव जितेंद्र पितळिया, सामाजिक कार्यकर्ते युवराज शहा, संचालक प्रा. प्रसन्न देसाई, विकास भंडारी, शैक्षणिक समन्वयक प्रा. शेखर गरूड आदी मान्यवर उपस्थित होते.

विद्यार्थ्यांना काळानुरुप ज्ञान आत्मसात करण्यासाठीची अद्ययावत व्यवस्था उपलब्ध करण्याचे काम वसंतदादा पाटील कॉलेजमध्ये होत आहे. त्यामुळे याठिकाणच्या विद्यार्थ्यांची व्हिजन चांगली तयार होताना दिसते आहे. भारतीय वास्तुकलेला नवीन पैलु पाडण्यात या महाविद्यालयाचे विद्यार्थी अग्रेसर राहतील, असा विश्वास युवराज शहा यांनी व्यक्त केला.

वास्तुकलेतील आधुनिकता आणि प्राचीनता याचा संगम साधून वास्तुकलेला वेगळ्याच रुपात आत्मसात करण्याचा प्रयत्न महाविद्यालयात येणाऱ्या काळात केला जाणार आहे, असे जितेंद्र पितळिया यांनी सांगितले.

महाविद्यालयात विद्यार्थ्यांमधील अंगभूत कौशल्यांना वाव देण्यासाठी प्रयत्न केले जातात. प्रात्यक्षिकांद्वारे ज्ञान आत्मसात करण्यावर भर दिला जातो. त्यातूनच हे प्रदर्शन भरविले असून ते वर्षभर सुरु राहणार आहे, असे प्रा. प्रसन्न देसाई यांनी सांगितले.

पुणे-जलसंपदा विभागाचे मुख्य अभियंता ता. ना. मुंडे यांची राज्य सरकारने औरंगाबाद येथे बदली केली असून, त्यांच्याजागी जल व सिंचन विभागाचे मुख्य लेखापरीक्षक राजेंद्रकुमार मोहिते यांची नियुक्ती करण्यात आली आहे. पाण्यावरून जलसंपदा विभाग आणि पुणे महापालिका यांच्यात सुरू असलेल्या वादात मुंडे यांनी घेतलेल्या भूमिकेमुळे त्यांची बदली करण्यात आल्याची चर्चा आहे.

मुंडे यांची मोहिते यांच्या जागेवर बदली करण्यात आली असून, या ठिकाणी तत्काळ हजर राहण्याचे आदेश राज्य सरकारने दिले आहेत. राज्य सरकारने मंगळवारी याबाबतचा अध्यादेश काढला आहे. मुंडे यांनी महाराष्ट्र जलसंपत्ती नियमन प्राधिकरणाच्या आदेशाचा आधार घेऊन पुणे महापालिकेला ८.१६ अब्ज घनफूट (टीएमसी) पाणी घ्यावे लागेल, अशी भूमिका घेतली होती. त्यावरून जलसंपदा आणि पुणे महापालिका यांच्यात वाद उफाळून आला होता. ही कोंडी फोडण्यासाठी राज्य सरकारने अखेर मुंडे यांची बदली करण्याचा मार्ग स्वीकारला आहे.

राज्य सरकारने बदली झालेल्या संबंधित अधिकाऱ्यांबाबत आदेशात सूचना केल्या आहेत. त्यानुसार सरकारच्या पूर्वपरवानगीशिवाय कोणत्याही कारणास्तव रजा मंजूर करू नये. मूळ कार्यालयाने बदली झालेल्या अधिकाऱ्याचे कोणत्याही प्रकारचे अर्ज स्वीकारू नयेत. असे अर्ज प्राप्त झाल्यास ते संबंधित अधिकाऱ्यास मूळ पत्त्यावर परत करावेत. बदली झालेल्या अधिकाऱ्याने रजेचे अर्ज पाठविल्यास त्या अर्जाची दखल घेण्यात येणार नसल्याचे आदेशात स्पष्ट केले आहे.

या बदलीच्या विरोधात कोणत्याही प्रकारचा दबाव आणून बदली रद्द करण्याचा प्रयत्न झाल्यास ही कृती महाराष्ट्र नागरी सेवा (वर्तणूक) नियमाचे उल्लंघन करणारी असल्याने ती गैरवर्तणूक समजून त्यांच्याविरुद्ध शिस्तभंगाची कारवाई करण्यात येईल, असेही राज्य सरकारने आदेशात म्हटले आहे.

पुणे

महापालिकेचे अतिरिक्त आयुक्त राजेंद्र निंबाळकर यांना झालेली मारहाण तसेच त्यांच्यावर केलेल्या दडपशाहीच्या निषेधार्थ स्थायी समितीची मंगळवारी होणारी नियोजित सभा तहकूब करण्याचा निर्णय सत्ताधारी भारतीय जनता पक्षाने घेतला. विरोधी पक्षाचे नगरसेवक तसेच त्यांच्या कार्यकर्त्यांकडून निंबाळकर यांना मारहाण झाल्याप्रकरणी सत्ताधारी भाजपने प्रशासनाच्या बाजूने उभे राहत तहकुबी मांडली.

महापौर मुक्ता टिळक यांच्या दालनात सोमवारी दुपारी झालेल्या आंदोलना दरम्यान निंबाळकर यांना मारहाण तसेच त्यांना अपशब्द वापरण्यात आले होते. या पार्श्वभूमीवर काँग्रेसचे गटनेते अरविंद शिंदे आणि रवींद्र धंगेकर यांच्यासह १५ ते १७ कार्यकर्त्यांच्या विरोधात गुन्हा दाखल करण्यात आला आहे. महापालिकेतील अधिकारी-कर्मचाऱ्यांनी सभांना उपस्थित न राहण्याचा निर्णय घेत आंदोलनाची भूमिका घेतली आहे. त्यामुळे मंगळवारी होणारी स्थायी समितीची सभा तहकूब करावी लागणार होती. मात्र, सत्ताधारी भाजपने मारहाणीच्या घटनेचा निषेध करत नियोजित सभा तहकूब करण्याचा निर्णय घेतला. त्याचवेळी काँग्रेस-राष्ट्रवादी काँग्रेसच्या सदस्यांनी निंबाळकर यांनी नगरसेवकांची लायकी काढली म्हणून अपमान केल्याने सभा तहकूब करावी, अशी मागणी केली. या वेळी सत्ताधाऱ्यांनी गडबडीत मारहाणीचा निषेध करून सभा तहकूब केली.

पुणे :-  माहिती व जनसंपर्क महासंचालनालयातर्फे प्रकाशित करण्यात येणाऱ्या  लोकराज्य मासिकाच्या फेब्रुवारी,2019 च्या अंकाचे विमोचन राज्याचे नोंदणी महानिरीक्षक आणि मुद्रांक नियंत्रक अनिल कवडे यांच्याहस्ते येथील नवीन प्रशासकीय भवन येथे आज झाले. यावेळी माहिती उपसंचालक मोहन राठोड, जिल्हा माहिती अधिकारी राजेंद्र सरग, नोंदणी विभागाचे राजेंद्र हिंगणे, सहायक संचालक श्रीमती वृषाली पाटील, माहिती सहायक जयंत कर्पे उपस्थित होते.

नागरिकांच्या सोईसाठी नोंदणी व मुद्रांक विभागातर्फे विविध योजना डिजीटल तंत्रज्ञानाद्वारे ऑनलाईन पध्दतीने राबविण्यात येत आहेत. यामुळे दस्त नोंदणीची कामे सुलभ होणार असल्याने नागरिकांनी या सेवांचा लाभ घ्यावा, असे आवाहन नोंदणी महानिरीक्षक अनिल कवडे यांनी याप्रसंगी केले. नोंदणी विभागातर्फे राबविण्यात येणाऱ्या ई-सेवांविषयी नागरिकांना प्रोत्साहित करण्यात येणार असल्याची माहिती त्यांनी यावेळी दिली.

शासनाच्या विविध योजनांची माहिती तसेच स्पर्धा परीक्षेच्या तयारीसाठी लोकराज्य उपयुक्त असल्यामुळे विद्यार्थी व अभ्यागतांनी वार्षिक वर्गणी भरुन अंक प्राप्त करण्याचे आवाहन माहिती उपसंचालक मोहन राठोड यांनी यावेळी केले. सुरक्षित कागदपत्रे-सुरक्षित समाज,गाळमुक्त धरण, गाळयुक्त शिवार, स्वच्छता हीच सेवा, नवे तंत्र-गतिमान विकास, शेती विकासाचा डिजीटल अध्याय यासह अन्य विषयांवर या अंकामध्ये माहिती प्रसिध्द करण्यात आली आहे.

शासनाचे मुखपत्र असलेले लोकराज्य हे मासिक शहरातील तसेच जिल्ह्यातील बुकस्टॉलवर उपलब्ध आहे. लोकराज्य मासिकाच्या वार्षिक वर्गणीसाठी जिल्हा माहिती कार्यालय,  तळ मजला, नवीन मध्यवर्ती इमारत, पुणे दूरध्वनी क्रमांक 020-26121307 येथे वार्षिक वर्गणी भरुन लोकराज्यचा अंक घरपोच पोस्टाद्वारे पाठविण्याची सुविधा उपलब्ध आहे.

सुरेश नाईक  स्पेस एज्युकेशन सेंटर चा अनोखा उपक्रम–शालेय विद्यार्थ्यांना मिळणार अंतरिक्ष विज्ञानाचे धडे

पुण्यातील एक सुप्रसिद्ध ज्येष्ठ स्पेस शास्त्रज्ञ व इस्रो माजी समूह संचालक सुरेश नाईक, तसेच सुहास पुणेकर, व्यवस्थापकीय संचालक ‘पुणेकर एज्युकेशनल इनिटिविव्ह’ यांच्या संयुक्त विद्यमाने चळवळीची सुरुवात करीत आहेत. ज्यायोगे स्पेस टेक्नॉलॉजी शिक्षणाला प्रचंड प्रेरणा मिळेल. तसेच याद्वारे विद्यार्थ्यांच्या कल्पनाशक्तीला देशव्यापी व्यासपीठ मिळेल. या चळवळीचा भाग म्हणून जगविख्यात संस्था इस्रोने पुण्यात १५,१६ व १७ फेब्रुवारी २०१९ रोजी अंतरिक्ष प्रदर्शनाचे आयोजन केले आहे.

या उपक्रमाचे सह-प्रायोजक कॉलेज ऑफ इंजिनियरिंग आहे ज्यांच्या विद्यार्थ्यांनी इस्रो मदतीने स्वयं नामक उपग्रहाचे प्रक्षेपण केले आहे. इस्रोचे प्रदर्शन इस्रो स्पेस प्रदर्शनातील ठळक वैशिष्ट्यांमध्ये इसरो चे उपग्रह आणि त्यांच्या अनुप्रयोगांशी संबंधित पोस्टर्सचा एक संच समाविष्ट आहे. ज्यामध्ये  चंद्रयान / मंगळ  मिशन यांचा समावेश असेल.

या प्रदर्शनात इस्रो प्रक्षेपण केलेल्या सर्व उपग्रहांचे मॉडेल्स तसेच चांद्रयान व मंगळयान अभियानची क्षणचित्रे देखील या प्रदर्शनात पाहायला मिळतील. याशिवाय इस्रोचे विविध रॉकेट्स व सध्या अंतराळात असलेल्या उपग्रहांचे मॉडेल देखील या प्रदर्शनात असतील. या प्रदर्शनाच्या वेळी इस्रोचे वेब पोर्टल भुवन व त्यांची वेबसाईट याचे प्रात्यक्षिक केले जाईल. हे प्रदर्शन केवळ इस्रोचे कार्य पोस्टर्स, मॉडेल्स व व्हिडिओच्या माध्यमातून जाणून घेण्या इतके मर्यादित नसून यावेळी विद्यार्थ्यांना इस्रोच्या संशोधकांशी भेटण्याची संधी मिळणार आहे. विद्यार्थ्यांसाठी ही एक अविस्मरणीय संधी असेल.

अंमलबजावणीची कमी किंमत, डिझाइनची सोपी तयारी, डिझाईनचा साधेपणा तसेच स्पेस टेक्नॉलॉजी सारख्या रोमांचक विषयाची साथ यामुळे ‘सुरेश नाईक कबसॅट वर्कशॉप’ ही विद्यार्थ्यांसाठी अंतरिक्ष विज्ञान अनुभवण्याची नामी संधी आहे. पुणेकर एज्युकेशनल इनिशिएटिव्ह प्रा ली व सुरेश नाईक स्पेस एज्युकेशन सेंटर स्पेस एज्युकेशन क्षेत्रात दोन दिवसीय उपक्रमात उपग्रहाचे डिझाईन, बांधणी व प्रक्षेपण यांची सविस्तर माहिती शालेय विद्यार्थ्यांना देण्यात येणार आहे.

पुण्यातील शाळेत जुलै २०१८ मध्ये प्रथम यशस्वी क्यूबसॅट कार्यशाळा आयोजित केली गेली. तेव्हापासून पुणे आणि लोणावळा  येथील विविध शाळांमधील ८०० हून अधिक विद्यार्थ्यांनी या रोमांचक कार्यशाळेत उत्साहाने भाग घेतला आहे. उल्लेखनीय आहे की पुण्याजवळील गावातील शालेय विद्यार्थ्यांना देखील या अत्यंत मनोरंजक शैक्षणिक मोहिमेद्वारे अंतरिक्ष तंत्रज्ञानाची माहिती मिळाली आहे.

अंतरिक्ष विज्ञान, उपग्रह, इलेक्ट्रॉनिक्स आणि एम्बेडेड सिस्टीम्सचे मूलभूत ज्ञान  विद्यार्थ्यांच्या गटांना  अनुभवी प्रशिक्षकांच्या मार्गदर्शना  मूलभूत ज्ञान प्रदान करण्याच्या उद्देशाने कार्यशाळेचे आयोजन करण्यात आले होते. हे मिशन आदर्शपणे शाळेच्या विद्यार्थ्यांना वास्तविक उपग्रह विकासासाठी प्रथम चरण-प्रशिक्षण प्रदान करण्यासाठी डिझाइन केलेले आहे. म्हणूनच “CubSat” नाव आहे.

या इच्छुक विद्यार्थ्यांना विशेषत: तयार केलेले संक्षिप्त अभ्यासक्रम दिले जाते ज्यावर प्रवेश परीक्षा (एमसीक्यू) आयोजित केली जाते. कामगिरीवर आधारित विद्यार्थ्यांची निवड केली जाते. सहावी ते आठवी आणि नववी  ते बारावी  च्या विद्यार्थ्यांसाठी स्वतंत्र परीक्षा घेण्यात येते. या नाविन्यपूर्ण कार्यशाळेत ३५० वजनाच्या पॅराशूट ने सुसज्ज अशा उपग्रहाची बांधणी ५ विद्यार्थ्यांच्या गटांमध्ये केली जाते.

विद्यार्थी वर्कशॉपचा भाग म्हणून पॅराशूट आणि ग्राउंड स्टेशन देखील तयार करतात. विशेषतः डिझाइन केलेले किट विद्यार्थ्यांना सर्व भाग, साहित्य आणि साधने प्रदान करते. एकत्रीकरणानंतर, प्रक्षेपणापूर्वीच विद्यार्थी  या प्रणालीचे परीक्षण करतात . या नाट्यपूर्ण मोहिमेची समाप्ती क्यूबॅट्सचे प्रक्षेपण करून होते. स्वतः तयार केला क्युब-सॅट १५ ते २० मीटर वर ड्रोनच्या साहाय्याने बघताना विद्यार्थ्यांना अतिशय आनंद होत असतो. हा उपग्रह पॅराशूट च्या मदतीने ड्रोन पासून वेगळा होतो व तो वातावरणातील तापमान यासारखी माहिती विद्यार्थ्यांनी तयार केलेल्या स्टेशन वर पाठवतो.

गेल्या दोन दशकांपासून देशभरातील विद्यार्थ्यांमध्ये ‘स्पेस सायन्स लोकप्रिय करण्यासाठी क्रुसेडर’ म्हणून ओळखले गेलेले माजी इसरो अंतरिक्ष शास्त्रज्ञ आणि स्पेस सोसायटीचे सध्याचे चेअरमन सुरेश नाईक यांनी या अभियानाचे मार्गदर्शन केले आहे. श्री  सुभाष पुणेकर, अध्यक्ष पुणेकर एज्युकेशनल इनिशिएटिव्ह्ज प्रा. लि. यांनी महाराष्ट्र आणि देशातील इतर भागांच्या हजारो शाळांतील विद्यार्थ्यांना हा अत्यंत मनोरंजक आणि प्रेरणादायी शैक्षणिक मोहिम घेण्याची योजना केली आहे आणि आकर्षक स्पेस टेक्नॉलॉजीबद्दल माहिती पसरविण्याच्या क्षेत्रात क्रांती सुरू केली आहे.

१५ फेब्रुवारीला एसएसईसी आणि पीईआयची तिसरा उपक्रम गणेश कला आणि क्रीडा मंचच्या प्रेक्षागृहांमध्ये होणार आहे.