पुणे-वैष्णवी हगवणे आत्महत्या प्रकरणातील फरार सासरा राजेंद्र हगवणे आणि दीर सुशील हगवणे हे सात दिवसांपासून फरार होते. पोलिसांनी आज सकाळी दोघांना स्वारगेट येथून ताब्यात घेतले. दुपारी त्यांना शिवाजी नगर न्यायालयात हजर करण्यात आले. यावेळी न्यायालयाने दोघांनाही 28 मे पर्यंत पोलिस कोठडी सुनावली आहे. दरम्यान, आरोपी पिता-पुत्राला न्यायालयात नेत असताना भाजप महिला आघाडीच्या कार्यकर्त्यांनी आरोपींच्या गाडीवर टोमॅटो फेकून संताप व्यक्त करण्यात आला.

वैष्णवी हगवणे हिचा हुंड्यासाठी सासरच्यांकडून छळ होत होता. हा जाच असह्य झाल्याने वैष्णवीने टोकाचे पाऊल उचलत आत्महत्या केली. याप्रकरणी सासरच्या मंडळींविरोधात गुन्हा दाखल करण्यात आला आहे. गुन्हा दाखल झाल्यानंतर वैष्णवीचा पती, नणंद आणि सासू यांना अटक करून न्यायालयात हजर केले होते. न्यायालयाने त्यांना 21 मेपर्यंत पोलिस कोठडी सुनावली आहे. तर सासरा राजेंद्र हगवणे आणि दीर सुशील हगवणे हे फरार झाले होते. पोलिसांनी आज सकाळी सासरा आणि दीर यांनी अटक केली. त्यांना न्यायालयात हजर केले असता न्यायाधीशांनी 28 मे पर्यंत पोलिस कोठडी सुनावली आहे.

वैष्णवी हगवणे आत्महत्या प्रकरणानंतर राज्यभरात संतापाची लाट उसळलेली आहे. पीडितेच्या कुटुंबाला न्याय मिळावा यासाठी अनेक संघटना आक्रमक झाल्या आहेत. त्यातच आज पुण्यातील शिवाजीनगर कोर्टाच्या बाहेर भाजप महिला आघाडीच्या कार्यकर्त्यांचा संताप व्यक्त करत आरोपींना फाशीची शिक्षा देण्याची मागणी करण्यात आली. आरोपी पिता-पुत्राला न्यायालयात नेत असताना भाजप महिला आघाडीच्या कार्यकर्त्यांनी त्यांच्या गाडीवर टोमॅटो फेकले.तसेच आरोपींना भाषी झालीच पाहिजे, अशी घोषणाबाजी केली होती.

दरम्यान, बावधन पोलिसांनी आज सकाळी यासंबंधी एक पत्रकार परिषद घेतली. या पत्रकार परिषदेत या प्रकरणी पत्रकारांच्या विविध प्रश्नांची उत्तरे मिळण्याची शक्यता होती. पण पोलिसांनी 2 मिनिटांतच आपली पीसी गुंडाळल्याने अनेक प्रश्न अनुत्तरीत राहिले. बावधन पोलिस म्हणाले, बावधन पोलिस ठाण्यात दाखल गुन्ह्याप्रकरणी वैष्णवी हगवणे यांच्या कुटुंबातील 3 जण अटकेत होते. उर्वरित 2 आरोपींच्या अटकेसाठी वरिष्ठांच्या मार्गदर्शनाखाली 6 पथके तैनात करण्यात आली होती. या पथकाने राजेंद्र हगवणे (वैष्णवीचे सासरे) व सुशील हगवणे (वैष्णवीचा दीर) यांना आज पहाटे पुणे स्वारगेट येथून अटक केली.

मिळालेल्या माहितीनुसार शशांक आणि वैष्णवीच्या लग्नाच्या वेळी तिच्या माहेरच्यांनी 51 तोळे सोनं, फॉर्च्युनर कार आणि चांदीची भांडी दिली होती. मात्र जमीन खरेदीसाठी दोन कोटी रुपये घेऊन ये या मागणीसाठी सासरचे लोकं तिचा छळ करत होते. तर शशांक तिच्या चारित्र्यावर संशय घेत होता, या सर्व गोष्टीला कंटाळून तिने आत्महत्या केल्याचे समजते. याप्रकरणी वैष्णवीचे सासरे राजेंद्र हगवणे, सासू, पती, दिर आणि नणंद यांच्यावर गुन्हा दाखल करण्यात आला आहे.

वैष्णवी शशांक हगवणे (वय 23) मुळशी तालुक्यातील भुकूमची होती. एफआयआरमध्ये म्हटले आहे की, वैष्णवीचा सासरच्या कुटुंबाने अमानुष छळ केला. तिच्यावर मानसिक अत्याचार करण्यात आला. ऑगस्ट 2023 मध्ये गरोदर असलेल्या वैष्णवीने पती शशांकला या बाबत माहिती दिली असता, त्याने तिच्या चारित्र्यावर संशय घेऊन ‘हे बाळ माझे नाही, दुसऱ्या कोणाचे असावे’ असे म्हटले. यावरून पती शशांक आणि सासरचे लोकांनी वैष्णवीला शारीरिक आणि मानसिक त्रास दिला, शशांकने तिला मारहाण केली. शिवीगाळ करत घरातून हाकलून देईन असे धमकावत तिला घरातून बाहेर काढले.

या प्रकरणाची राष्ट्रीय महिला आयोगाने गंभीर दखल घेतली असून, पोलिसांना निःपक्ष आणि तातडीने चौकशी करण्याचे आदेश दिले आहेत. आयोगाच्या अध्यक्षा विजया रहाटकर यांनी पोलिस महासंचालकांना तीन दिवसांत अहवाल सादर करण्यास सांगितले आहे.

पुणे–
वैद्यकीय अभ्यासक्रमाच्या (एमबीबीएस) तिसऱ्या वर्षाचे शिक्षण घेणाऱ्या एका विद्यार्थिनीवर सामूहिक बलात्कार झाल्याची संतापजनक घटना सांगलीत घडली आहे. पोलिसांनी या प्रकरणी 2 विद्यार्थ्यांसह त्यांच्या एका मित्राला बेड्या ठोकल्या आहेत. विनय विश्‍वेष पाटील (22, महिपती निवास, अंतरोळीकरनगर, भाग 1 सोलापूर शहर), सर्वज्ञ संतोष गायकवाड (20, एफ 605, सरगम, नांदेड सिटी, सिंहगड रोड, पुणे) व तन्मय सुकुमार पेडणेकर (21, 303 कासाली व्हिला, अभयनगर, सांगली) अशी अटक केलेल्या विद्यार्थ्यांची नावे आहेत. या तिघांनाही पुण्यातून अटक करण्यात आली आहे. या प्रकरणी आरोपींवर कठोर कारवाईची मागणी केली जात आहे.कोर्टाने या तिघांचीही 27 मेपर्यंत पोलिस कोठडीत रवानगी केली आहे.पोलिसांनी दिलेल्या माहितीनुसार, गत 18 मे रोजी ही घटना घडली. त्या दिवशी पीडित विद्यार्थिनी व आरोपी चित्रपट पाहण्यासाठी गेले होते. त्यानंतर आरोपी तिला आपल्या फ्लॅटवर घेऊन गेले. तिथे आरोपी विद्यार्थ्यांनीला थंड पेयाच्या माध्यमातून गुंगीचे औषध पाजले. त्यानंतर बेशुद्धावस्थेत तिघांनीही कथितपणे तिच्यावर आळीपाळीने सामूहिक बलात्कार केला. काहीवेळाने पीडिता शुद्धीत आली. तिने झाल्या प्रकाराचा आरोपींना जाब विचारला. त्यानंतर आरोपींनी तिला या प्रकाराची जाहीर वाच्यता केल्यास जिवे मारण्याची धमकी दिली.

पीडित विद्यार्थिनी मूळची कर्नाटकच्या बेळगावची आहे. घटनेनंतर ती परत आपल्या खोलीवर आली. तिने आपल्या आई-वडिलांना संपूर्ण प्रकार सांगितला. त्यानंतर त्यांनी तत्काळ पुण्यातील विश्रामबाग पोलिस ठाण्यात गुन्हा दाखल केला. त्यानंतर काही तासांतच तिन्ही आरोपींच्या मुसक्या आवळण्यात आल्या. पोलिसांनी सांगितले की, तिन्ही आरोपींचे वय 20 ते 22 वर्षांचे आहे. यापैकी 2 विद्यार्थी एमबीबीएसचे विद्यार्थी असून, ते पीडित विद्यार्थिनीसोबतच शिकतात. सध्या आरोपींविरोधात भारतीय न्याय संहितेच्या सामूहिक बलात्कारासह इतर कलमांतर्गत गुन्हा दाखल करण्यात आला आहे.

पुणे, दि. २३ मे २०२५: प्रशासनातील लोकाभिमुखतेसाठी मुख्यमंत्री मा. श्री. देवेंद्र फडणवीस यांनी जाहिर केलेल्या १०० दिवसांची कार्यालयीन सुधारणा अभियानात महावितरणच्या प्रादेशिक विभाग स्तरावर पुणे प्रादेशिक संचालक कार्यालयाने प्रथम क्रमांक मिळवला आहे. या अभियानाच्या दुसऱ्या टप्प्याचा निकाल जाहीर झाला. यात महावितरणच्या कोकण प्रादेशिक कार्यालयास द्वितीय तर नागपूर प्रादेशिक कार्यालयास तृतीय क्रमांक मिळाला आहे.

        महावितरणच्या कार्यालयांतील नागरिकांसाठी सेवा सुलभता, डिजिटल ग्राहक सेवा, कार्यालयीन सोयीसुविधा, तंत्रज्ञानाचा वापर, तक्रार निवारण, कामकाजातील सुधारणा व कार्यालयीन व्यवस्थापन आदी मुद्द्यांवर १०० दिवसांची कार्यालयीन सुधारणा अभियान राबविण्यात आले. यात महावितरणच्या प्रादेशिक विभागस्तरावर पुणे, कोकण व नागपूर प्रादेशिक विभाग कार्यालये सहभागी झाले होते. अभियानाच्या दुसऱ्या टप्प्यात भारतीय गुणवत्ता परिषदेच्या समितीकडून या कार्यालयांचे नुकतेच मूल्यांकन करण्यात आले. त्यात पुणे प्रादेशिक कार्यालयाने प्रथम क्रमांक पटकावला आहे.

श्री. भुजंग खंदारे, प्रादेशिक संचालक, पुणे – ‘कार्यालयीन सुधारणा अभियानात प्रथम क्रमांक पटकावला याचे समाधान आहे. सोबतच जबाबदारी देखील वाढली आहे. वीजग्राहक हेच महावितरणच्या कामकाजाचा केंद्रबिंदू आहेत. आता पुढील १५० दिवसांच्या कार्यालयीन सुधारणा अभियान अंतर्गत विविध ग्राहकाभिमुख सुधारणांना आणखी वेग देण्यात येईल’.

स्वानंद चॅरिटेबल ट्रस्टतर्फे आयोजन :  समाजातील विविध घटकातील मुलांची विनामूल्य मुंज
पुणे : स्वानंद चॅरिटेबल ट्रस्टतर्फे सकल हिंदू समाजातील ५५ पेक्षा अधिक बटूंच्या सामुदायिक व्रतबंध सोहळ्याचे आयोजन करण्यात आले आहे. समाजातील विविध घटकातील तसेच अनाथ मुलांचे संगोपन करणाऱ्या संस्थांमधील मुला-मुलींची मुंज यावेळी होणार आहे. बुधवार दिनांक २८ मे रोजी सकाळी ९ वाजता कर्वे रस्त्यावरील अश्वमेध मंगल कार्यालयात हा सकल हिंदू सामुदायिक व्रतबंध सोहळा पार पडणार आहे.

या सोहळ्यात सहभागी होणाऱ्या प्रत्येक बटूसाठी वस्त्रे, पूजा साहित्य, भोजन व अन्य आवश्यक सामग्री ट्रस्टच्या वतीने विनामूल्य पुरवण्यात येणार आहे. बदलत्या काळात शिक्षण आणि जीवनशैलीत अनेक बदल झाले असले, तरी भारतीय हिंदू संस्कृतीतील मूलभूत संस्कारांची गरज अजूनही तितकीच महत्त्वाची आहे. त्यापैकीच एक म्हणजे व्रतबंध संस्कार ज्ञानार्जनाच्या प्रवासाची सुरुवात करणारा एक पवित्र टप्पा आहे. या संस्काराचे समाजव्यापी महत्त्व ओळखून स्वातंत्र्यवीर सावरकर यांनी रत्नागिरीत आपल्या कार्यकाळात सर्व हिंदू समाजासाठी सामुदायिक व्रतबंध सोहळ्याची संकल्पना मांडली होती. सावरकरांनी मालवणला तथाकथित  १५० अस्पृश्यांच्या मुंजी लावल्या होत्या आणि त्यांना स्वतः जानवं घातली होती. त्यांच्या या विचारातून प्रेरणा घेऊन स्वानंद चॅरिटेबल ट्रस्ट मागील चार वर्षे हा उपक्रम सातत्याने राबवत आहे.  एकूण १५ हून अधिक समाजातील मुले आणि मुलींनी स्वेच्छेने या संस्कारासाठी नाव नोंदणी केली आहे.

व्रतबंधाचा कार्यक्रम संपूर्ण शास्त्रोक्त पद्धतीने साग्रसंगीत करण्यात येणार आहे. सोहळ्याची सुरुवात गणेश पूजनाने होईल. त्यानंतर पारंपरिक पद्धतीने चौलकर्म, मातृभोजन, व्रतबंधन हे विधी पार पडणार आहेत. यानंतर भिक्षावळ मिरवणूक देखील काढण्यात येणार आहे.

पुणे, दि. २३: गेल्या काही दिवसांपासून मान्सूनपूर्व पाऊस मोठ्या प्रमाणात होत आहे. तसेच आगामी मान्सूनमधील पावसाचा अंदाज पाहता पिंपरी चिंचवड महानगरपालिकेसोबत सर्वच संबंधित विभागांनी समन्वय ठेऊन आपत्तीवर मात करण्यासाठी काम करावे. आपत्तीबाधित नागरिकांना दिलासा देण्यासाठी सर्व सुविधा पुरविण्याचे नियोजन करावे, असे निर्देश विधानसभा उपाध्यक्ष अण्णा बनसोडे यांनी दिले.

पिंपरी- चिंचवड महानगरपालिकेत आयोजित मान्सूनपूर्व आढावा बैठकीत ते बोलत होते. यावेळी मनपा आयुक्त शेखर सिंह, अतिरिक्त पोलीस आयुक्त सारंग आव्हाड, पोलीस उपायुक्त बापू बांगर, उपजिल्हाधिकारी नामदेव टिळेकर आदी यावेळी उपस्थित होते.

आगामी काळातही सरासरीइतका किंवा त्यापेक्षा जास्त राहण्याची हवामान विभागाची माहिती पाहता महानगरपालिकेने कोणत्याही आपत्तीला सामोरे जाण्यासाठी पूर्वतयारी करावी. नालेसफाईची उर्वरित कामे गतीने पूर्ण करावीत. पावसादरम्यान ज्या ठिकाणी पाणी साचते असे नागरी भाग व झोपडपट्ट्यांची माहिती महानगरपालिकेकडे असते. आपत्तीकाळात व पूरस्थितीमध्ये बाधितांना सुरक्षित जागी हलविण्यासाठी निवारा केंद्रांची व्यवस्था करावी.

निवारा केंद्रात नागरिकांना हलवण्याबाबतचे योग्य नियोजन करावे. त्या ठिकाणी हलविण्यात येणाऱ्या नागरिकांना अन्न, निवास व्यवस्थेसह अंथरून पांघरून आदी सोई- सुविधा व्यवस्थितपणे मिळाल्या पाहिजेत. भविष्यात या नागरिकांच्या कायमस्वरुपी पुनर्वसनासाठी झोपडपट्टी पुनर्वसन प्रकल्पांना गती देणे आवश्यक आहे, असेही ते म्हणाले.

कोणतीही जीवितहानी होऊ नये म्हणून सर्व ती दक्षता घेण्यात यावी. नागरिकांची घरे, इतर मालमत्ता आदींचे नुकसान झाल्यास महसूल विभागाने तात्काळ पंचनामे करावेत तसेच बाधितांना १०० टक्के मदत मिळेल याची दक्षता घ्यावी.

धरणातून सोडण्यात येणाऱ्या पाण्याबाबत जलसंपदा विभागाने पुरेशी आधीच माहिती द्यावी. आपत्ती काळात पावसाचे, पूरस्थितीच्या इशाऱ्यांवर लक्ष ठेऊन ते नागरिकांपर्यंत पोहोचविण्यासाठी प्रभावीपणे काम करावे. वाहतुकीसाठी पर्यायी मार्गांची तयारी करावी. वाहतूक कोंडी होणार नाही आणि रहदारी सुरळीत राहील यासाठी पोलीस प्रशासनाने काम करावे. मनपा हद्दीतील सीसीटीव्ही कॅमेरे सुरू राहतील याची काळजी घ्यावी. बचाव कार्यासाठी एनडीआरएफ पथकाच्या सतत संपर्कात रहावे. तसेच बोटी, मदत साठा आदी तयार ठेवावे, असेही ते म्हणाले.

शहरातून पवना, मुळा आणि इंद्रायणी नद्या वाहतात. या नद्यांच्या लगतच्या झोपडपट्ट्यात पुराचे पाणी येऊ नये म्हणून नदी सुधार प्रकल्पांना गती देणे आवश्यक असून भविष्यात सीमाभिंतींचे काम हाती घेणे गरजेचे आहे, आदी सूचनाही त्यांनी दिल्या.

आयुक्त श्री. सिंह यांनी संगणकीय सादरीकरणाद्वारे माहिती दिली. महानगरपालिकेचा पूर नियंत्रण कक्ष, जलसंपदा विभागाचा कक्ष, आपत्ती व्यवस्थापन कक्ष १ जूनपासून २४ तास ७ तास तत्त्वावर कार्यान्वित करण्यात येणार आहे. वाहतुकीसाठी पर्यायी मार्ग, अग्निशमन बाबत फायर क्रू अशी नवीन संकल्पना सुरू केली आहे. हवामान विभागाचा इशारा नागरिकांपर्यंत पोहोचविण्याची व्यवस्था केली आहे. तात्पुरते निवारा केंद्र निश्चित केली असून असून तेथे आवश्यक त्या सुविधा, अन्न, निवास व्यवस्थेसाठी अंथरूण, पांघरूण पुरविण्याचे नियोजन केले आहे. पूरपरिस्थिती असलेल्या काळात तेथील रहिवाशांना बाहेर काढण्यासाठी स्थानिक लोकप्रतींनी सहकार्य करावे, असे आवाहन मनपा आयुक्त श्री. सिंह यांनी केले.

आपत्ती व्यवस्थापनासाठी १ हजार कोटी रुपयांची मागणी केली असून त्यापैकी राज्य आपत्ती व्यवस्थापन निधीतून ५७० कोटी रुपये पवना नदी पूर शमन उपाययोजनांसाठी मिळावे म्हणून प्रस्ताव पाठविला आहे. यातून नैसर्गिक नाल्यांचे पुनुरूज्जीवन, पुराच्या धोका कमी करणे, नागरिकांच्या जीविताचे, मालमत्ता तसेच पायाभूत सुविधांचे संरक्षण, पर्जन्यजल वाहिन्या, सांडपाणी वाहिन्यांची सुधारणा करणे तसेच आदी समग्र पूरनियंत्रण उपाययोजना राबविण्यात येणार आहेत, असेही ते म्हणाले.

यावेळी अतिरिक्त पोलीस आयुक्त श्री. आव्हाड, उपायुक्त श्री. बांगर यांनी पोलीस विभागाच्यावतीने वाहतुकीच्या अनुषंगाने, पर्यायी मार्ग तसेच अन्य नियोजनाची माहिती दिली.

जलसंपदा विभागाने त्यांचेकडील पूरनियंत्रण कक्ष, पाणी सोडण्याबाबतचे नियोजन कसे करण्यात येते याची माहिती दिली. जिल्हा आपत्ती व्यवस्थापन विभागाच्यावतीने नागरिकांच्या जीविताचे रक्षणाच्या अनुषंगाने करण्यात येणारी कार्यवाही व नियोजन आदींची माहिती दिली.

महानगरपालिकेतील उपायुक्तांनी त्यांच्या हद्दीतील नियोजनाची माहिती दिली. त्याचबरोबर विविध विभागांच्या अधिकाऱ्यांनी सादरीकरण केले.

पुणे : नवीन घेतलेला फ्लॅट पाहण्यासाठी बाल मैत्रिणीने बोलवल्याने तो गेला. परंतु या मैत्रिणीने पती आणि इतरांच्या सहाय्याने त्याला मारहाण करुन बाथरुममध्ये डांबुन ठेवले. खंडणी उकळण्यासाठी त्याच्या मोबाईलवरुन मेसेज केला. कोंढवा पोलिसांना याची माहिती मिळताच पोलिसांनी त्यांचा शोध घेऊन चार तासात या तरुणाची सुटका करुन चौघांना गजाआड केले.

प्रवीण जगन्नाथ लोणकर (वय ३९, रा. कोंढवा खुर्द) अशी सुटका केलेल्या तरुणाचे नाव आहे. सोनल ऊर्फ सोनी कापरे ऊर्फ कटके (वय ३५, रा. सनश्री सनटेक सोसायटी, एनआयबीएम रोड, कोंढवा खुर्द), अतुल दिनकर रायकर (वय ३८), रॉबीन ऊर्फ रवी मंडल (वय २४, रा. कोंढवा खुर्द) आणि सुरेश ऊर्फ कुरेश कुमारस्वामी हान (वय ३१, रा. कोंढवा खुर्द) अशी अटक केलेल्यांची नावे आहेत.पोलिसांनी दिलेल्या माहितीनुसार, कोंढव्यातील प्रवीण लोणकर यांना त्यांची बालपणीची मैत्रीण सोनल ऊर्फ सोनी रायकर हिने मंंगळवारी सायंकाळी तिचा एनआयबीएम रोडवरील फ्लॅट पाहण्यासाठी व चहासाठी बोलावले़ लोणकर घरी जाताच त्यांच्या डोळयात मिरची पुड टाकून जखमी केले. त्यावेळी तिचा पती अतुल रायकर व इतर साथीदार हे फ्लॅटच्या बाहेर दबा धरुन बसले होते. त्यांच्या मदतीने सोनी हिने प्रवीण लोणकर यांना मारहाण करुन त्यांच्या तोंडात बोहा कोंबला. त्याचे हातपाय दोरीने बांधुन त्यांना बाथरुमध्ये डांबुन ठेवले. त्यांच्याकडून एटीएम कार्ड व मोबाईल काढून घेतला. त्यांच्या मोबाईलवरुन त्यांच्या पत्नीच्या मोबाईलवर मेसेज केला की, ‘‘घरातील दागिने व पैसे काढून ठेव. मी एकाला आपल्या घरी ते घेऊन येण्यासाठी पाठवत आहे’’ हा मेसेज पाहून त्यांच्या पत्नीला शंका आली. त्यांनी व्हिडिओ कॉल करण्यास सांगितले. परंतु, व्हिडिओ कॉल आला नाही. काहीतरी गडबड असल्याची शंका त्यांना आली. त्यांनी पोलिसांकडे धाव घेतली. यावेळी रात्र गस्तीवर असलेल्या सहायक पोलीस निरीक्षक सुकेशिनी जाधव यांना ही माहिती मिळाली. त्यांनी तत्काळ वरिष्ठ पोलीस निरीक्षक विनय पाटणकर व पोलीस निरीक्षक (गुन्हे) रौफ शेख यांना कळविले. त्यांनी घटनेचे गांभीर्य ओळखून तत्काळ दखल घेऊन लोणकर यांचा शोध घेण्याच्या सूचना दिल्या.

प्रवीण यांच्या मोबाईलच्या तांत्रिक विश्लेषणावरून सहायक पोलिस निरीक्षक मोहसीन पठाण, सुकेशिनी जाधव, राकेश जाधव यांच्यासह तपास पथकाचे अंमलदार लक्ष्मण होळकर, सुरज शुक्ला यांनी त्यांचा शोध घेतला. त्यानुसार एनआयबीएम रोडवरील सनश्री सनटेक सोसायटीतील एका फ्लॅट मधून डांबून ठेवलेल्या प्रवीण लोणकर यांची सुटका केली. आरोपींविरोधात खंडणी, अपहरण केल्याप्रकरणी गुन्हा दाखल करून अटक करण्यात आली असून, न्यायालयाने त्यांची रवानगी पोलिस कोठडीत केली आहे.

सदरची कामगिरी ही अपर पोलीस आयुक्त, पुर्वे प्रादेशिक विभाग, मनोज पाटील , पोलीस उप-आयुक्त परि.०५ डॉ. राजकुमार शिंदे सहा. पोलीस आयुक्त, वानवडी विभाग, धन्यकुमार गोडसे, यांच्या मार्गदर्शन व सुचनाप्रमाणे वरिष्ठ पोलीस निरीक्षक, विनय पाटणकर, पोलीस निरीक्षक (गुन्हे) रौफ शेख, पोलीस निरीक्षक (गुन्हे) नवनाथ जगताप, सहा. पोलीस निरीक्षक मोहसिण पठाण, सहा. पोलीस निरीक्षक राकेश जाधव, सहा. पोलीस निरीक्षक सुकेशिनी जाधव, पोलीस उप-निरीक्षक रविंद्र गावडे, व पोलीस अंमलदार लक्ष्मण होळकर, सुरज शुक्ला यांनी केली आहे.

वैष्णवीची आत्महत्या ( की हत्या ) बाळ पळविणे, बाळाला अज्ञाताच्या हाती ताब्यात देणे, मयुरी चा छळ करणारे ह्या सर्वांना संघटित गुन्हेगारी ची कलमे लावून मोका लावावा – संदीप खर्डेकर

पुणे–वैष्णवी हगवणेच्या शरीरावरील जखमा बघता ही हत्या का आत्महत्या असा संशय निर्माण होत असून या प्रकरणी पोलिसांनी सखोल तपास करावा. तसेच मोठी सून मयुरी हिची तक्रार असताना देखील कारवाईत हलगर्जीपणा करणाऱ्या पोलिसांवरही कारवाई करावी, अशी मागणी भाजपचे प्रदेश प्रवक्ते संदीप खर्डेकर यांनी मुख्यमंत्री व गृहमंत्री देवेंद्रजी फडणवीस यांच्याकडे एका निवेदनाद्वारे केली आहे.

राजेंद्र हगवणे यांच्या मोठ्या सुनेच्या तक्रारीवर योग्य कारवाई न झाल्याने स्थानिक पोलिसांबाबत जनतेच्या मनात संशय आहे. त्यामुळे या प्रकरणाचा तपास सीआयडी किंवा अन्य यंत्रणेकडे सोपवावा. सासरच्या छळामुळे आत्महत्या केलेल्या सर्व भगिनींना खरी श्रद्धांजली अर्पण करायची असेल तर आरोपी कुटुंबावर सामाजिक बहिष्कार घालणे ही शिक्षा सर्वोत्तम असेल. त्यांच्या राहत्या घराच्या परिसरातील नागरिकांनी, गावकऱ्यांनी, नातेवाईकांनी अशी क्रूर कृत्य करणाऱ्यांवर बहिष्काराचे अस्त्र वापरावे. तसेच यापुढे हुंडाबळीच्या प्रकरणात मुलीच्या सासरच्यांना “मकोका” लावण्याची तरतूद केल्यास जरब बसेल व असे प्रकार घडणार नाहीत. किंबहुना असे गैरप्रकार करणारे दहा वेळा विचार करतील, असेही संदीप खर्डेकर यांनी म्हटले आहे.

हुंड्यापायी विवाहितेचा अशाप्रकारे अमानुष छळ करणे चुकीची बाब आहे. त्यामुळे हगवणे कुटुंबातील सर्व नराधमांना कठोरतम शिक्षा व्हावी यासाठी सर्वतोपरी प्रयत्न करावेत आणि खटला फास्ट ट्रॅक न्यायालयात चालवावा, अशी मागणी देखील त्यांनी केली आहे.