पुणे-म्हाळुंगे-बालेवाडी येथील श्री शिव छत्रपती क्रिडा संकुलाचे गुगल मॅप वर “छत्रपती औरंगजेब आलमगीर स्पोर्ट्स कॉम्प्लेक्स” असे नाव बदलण्यात आल्याची धक्कादायक माहिती समोर आली आहे. याप्रकरणी गंभीर दखल घेत माजी नगरसेवक अमोल बालवडकर यांनी बाणेर पोलीस स्टेशन कडे धाव घेत संबंधीतांवर कारवाई करण्याची मागणी केली आहे.बालेवाडी म्हाळुंगे स्थित श्री शिवछत्रपती क्रिडा संकुलाच्या संदर्भात गुगल लोकेशन मॅपवर काही समाज कंटकांनी जाणून बुजून श्री. शिवछत्रपती क्रिडा संकुल ऐवजी “छत्रपती औरंगजेब आलमगीर स्पोर्ट्स कॉम्प्लेक्स” असे नाव बदलले आहे. अशी माहिती बालवडकर यांनी दिली.

या प्रकारामुळे समस्त शिवप्रेमी, खेळाडू, ग्रामस्त व नागरिक अत्यंत संतप्त झाले असून अशा या समाज कंटकांवर तातडीने कारवाई करण्यात यावी. गुगल ‘मॅप ला जाऊन अशा प्रकारे लोकेशन एडीट केले आहे. असे सांगत त्यांनी काही पुरावेदेखील सादर केले आहेत.या खोडसाळपणामुळे समाजामध्ये तेढ निर्माण करण्याचा प्रकार तंत्रज्ञानाचा चुकीचा उपयोग करून केला जात आहे. असा आरोपही त्यांनी यावेळी केला. तसेच, गुगल मॅपच्या एडीट पर्यायाचा वापर करून इंटरनेट वरील हॅकर्स इतरही अनेक असे गुन्हे करू शकतात तरी याला वेळीच आळा घालावा. असे बालवडकर यांनी म्हटले आहे.यासोबतच, गुन्हे हे शक्यतो Virtual Private Network वापरून केले जाते. तरी सदर प्रकरणातील गुन्हेगारांचा शोध घ्यावा. तरी सदर प्रकरणातील दोषींना तातडीने शोधुन अशा या समाज कंटकांवर तातडीने कारवाई करावी व संबंधित गुगल लोकेशन मॅपवरील नाव लवकरात लवकर बदलण्यात यावे. अशी मागणी बालवडकर यांनी केली आहे.

पुणे-मंगळवार पेठेतील भीमनगर कमानीजवळ आज (शनिवार) पहाटे गोळीबाराची घटना घडल्याने परिसरात खळबळ उडाली. रोहित माने (वय 32, रा. लोहियानगर) या सराईत गुन्हेगाराने गोळीबार केला असून, पोलिसांनी त्याला घटनास्थळीच अटक केली. या प्रकरणी त्याचा साथीदार कासीम अन्सारी यालाही ताब्यात घेण्यात आले आहे. दोघांकडून पिस्तूल आणि काडतूस जप्त करण्यात आले आहेत.

पोलिसांनी दिलेल्या माहितीनुसार, पहाटे पाचच्या सुमारास किरण केदारी,शाम गायकवाड,अश्पाक शेख, संतोष कांबळे, हे चौघेजण मंगळवार पेठेतील भीमनगर कमानीजवळ बोलत थांबले होते. त्यावेळी आरोपी दुचाकीवरून ये जा करत होते. त्यांना हटकले. त्याचा राग आरोपींना आला त्यातून त्यांनी या चौघांच्या दिशेने गोळीबार केला. मात्र सुदैवाने कोणाला गोळी लागली नाही. घटनेची माहिती मिळताच फरासखाना पोलिसांनी घटनास्थळी धाव घेऊन दोघा आरोपींना अटक केली.

गोळीबाराची माहिती मिळताच पोलिसांनी तातडीने घटनास्थळी धाव घेतली आणि रोहित माने याला अटक केली. काही वेळातच त्याचा साथीदार कासीम अन्सारी यालाही पकडण्यात आले. पोलिसांनी दोघांकडून एक देशी बनावटीचे पिस्तूल आणि काही काडतुसे हस्तगत केली आहेत.

रोहित माने हा पूर्वीपासूनच पोलिसांच्या रडारवर असलेला गुन्हेगार असून, त्याच्यावर आर्म्स ॲक्ट, खुनाचा प्रयत्न, मारहाण यांसह गंभीर स्वरूपाचे गुन्हे नोंदवले गेले आहेत. सध्या गुन्हे शाखा आणि फरासखाना पोलिस ठाण्याचे अधिकारी या प्रकरणाचा तपास करत असून, या घटनेमुळे मंगळवार पेठ परिसरात भीतीचे वातावरण निर्माण झाले आहे. पुढील तपास सुरू आहे.

5 दिवसांपूर्वीच शिवसेनेच्या एकनाथ शिंदे गटाच्या युवासेना जिल्हाप्रमुख निलेश राजेंद्र घारेच्या वाहनावर गोळीबाराची घटना घडली होती. वारजे माळवाडी येथे गोळीबार केल्याने सदर परिसरात तणाव निर्माण झाला. दुचाकीवरून आलेल्या दोघा अज्ञातांनी घारे यांच्या चारचाकी कारवर मंगळवारी (20) रात्री 12वाजता फायरींग केले होते.

  आधार संस्थेच्या संस्थापक डॉ. नंदा शिवगुंडे यांचे मत ; वंचित विकास संस्थेतर्फे महाराष्ट्रातील कर्तृत्ववान महिलांचा ‘अभया सन्मान’ देऊन गौरव 
पुणे :  एक महिला शिकली, तर ती संपूर्ण कुटुंब सुशिक्षित करते. ती सक्षम झाली, तर तिला आत्महत्येसारखा पर्याय निवडण्याची वेळ येत नाही. फक्त मुलींना शिक्षण देऊन चालणार नाही, तर त्यांना स्वावलंबी देखील बनवले पाहिजे. यामुळे प्रत्येक स्त्री सक्षम बनेल, असे मत आधार संस्थेच्या संस्थापिका डॉ. नंदा शिवगुंडे यांनी व्यक्त केले.

वंचित विकास संस्थेतर्फे एकल महिलांचे संघटन करणे, आदिवासी निराधार महिलांचे सक्षमीकरण, तृतीयपंथीयांच्या सर्वांगीण विकासासाठी काम करणाऱ्या महाराष्ट्रातील कर्तृत्ववान महिलांना ‘अभया सन्मान’ देऊन गौरविण्यात आले. पुणे श्रमिक पत्रकार भवनच्या सभागृहात कार्यक्रमाचे आयोजन करण्यात आले. यावेळी वुमनिया पुणे च्या संस्थापिका प्रीती क्षीरसागर,  वंचित विकास संस्थेचे अध्यक्ष विजयकुमार मर्लेचा, संचालिका सुनीता जोगळेकर, मीना कुर्लेकर, मीनाक्षी नवले, देवयानी गोंगले, चैत्राली वाघ, तृप्ती फाटक आदी उपस्थित होत्या. 

बीड मधील केज तालुक्यातील एकल महिलांचे संघटन करणे, त्यांचे प्रश्न सोडवणे, संविधानीक मूल्य समाजात रुजविणे हे काम करणाऱ्या अनिता कांबळे, नागपूर मधील पांढराबोडी, रामनगर येथील आदिवासी निराधार महिला व आर्थिकदृष्ट्या दुर्बळ महिलांच्या सक्षमीकरणासाठी काम करणाऱ्या बबीता धुर्वे, पुण्यात तृतीयपंथीयांच्या सर्वांगीण विकासासाठी कार्य करणाऱ्या कादंबरी शेख आणि बीडमध्ये अस्तित्त्वाची लढाई लढणारी कार्यकर्ती रत्नमाला गायकवाड यांना अभया सन्मान देऊन गौरविण्यात आले. 

याशिवाय संगीता भरत काळे आणि वैष्णवी प्रसाद काळे यांचाही विशेष सन्मान करण्यात आला. ओल्या हळदीच्या अंगाने सीमेवर जाण्यासाठी हसतमुखाने निरोप देणाऱ्या भारतीय सैन्यदलातील प्रसाद काळे यांच्या पत्नी वैष्णवी प्रसाद काळे व त्यांच्यावर राष्ट्रभक्तीचे संस्कार करणाऱ्या आई संगीता भरत काळे या दोघींचाही आदर्श समाजापुढे ठेवावा म्हणून सर्व भारतीयांच्या वतीने त्यांचा सन्मान करण्यात आला. तसेच यावेळी ‘ग्राम परिवर्तन प्रबोधिनी’, मु. कटगुण, ता. खटाव, जि. सातारा या ग्रंथालयासाठी उपयुक्त पुस्तके भेट देण्यात आली. 

प्रीती क्षीरसागर म्हणाल्या, मी केवळ महिलांसाठी सोशल मिडीयाच्या माध्यमातून खूप काम केले आहे. परंतु आज प्रत्यक्ष महाराष्ट्रातील वेगवेगळ्या भागातील अनेक अडचणींना सामोरे जात सक्षमपणे उभे राहणाऱ्या प्रत्येकीचे कौतुक वाटते, असेही त्यांनी सांगितले.  

सन्मानाला उत्तर देताना कादंबरी शेख म्हणाल्या,  माणूस जन्माला एकटा येतो आणि एकटाच जातो; पण जीवनाच्या प्रवासात त्याला कुटुंबाची साथ लाभली, तर त्याचा सर्वांगीण विकास शक्य होतो. मात्र, एकल पालकांच्या मनातील एकटेपणाची भावना तेव्हाच संपते, जेव्हा अशा संस्था त्यांच्या पाठीशी कुटुंबाप्रमाणे उभ्या राहतात. आज बहुतांशी संवाद फक्त आभासी माध्यमांतूनच होताना दिसतो. अशा परिस्थितीत या कार्यक्रमासारख्या उपक्रमांतून प्रत्यक्ष भेटीगाठी, संवाद आणि माणुसकीची जाणीव निर्माण होते. माणसाने माणसाकडे माणुसकीच्या नजरेने पाहिलं पाहिजे. 

मीना कुर्लेकर म्हणाल्या, स्त्री जर स्वतंत्र विचार करायला शिकली, निर्भीड बनली, तर शिक्षण असून किंवा नसो ती खंबीर बनेल. स्वतः चे निर्णय स्वतः घ्यायला शिकली तसेच स्वतः विचार करायला शिकली, तर स्त्री आत्महत्या होणार नाहीत, असेही त्यांनी सांगितले. तृप्ती फाटक यांनी सूत्रसंचालन केले.  

पुणे-

रामदरा डोंगरावर ट्रेकिंगसाठी गेलेली तीन अल्पवयीन भावंडे माघारी येताना रस्ता चुकून डोंगरावर अडकले, पावसाने जोर धरला होता. पोलीस फोनद्वारे मुलांशी संपर्क करण्याचा प्रयत्न करीत होते. मात्र फोन स्वीच ऑफ लागत होता. या परिस्थितीत पोलिसांनी डोक्यावर पावसाची रिमझिम झेलत, रात्रीच्या अंधारात टोर्चच्या सहाय्याने झाडी झुडपातून वाट करीत डोंगरावर निघाले होते. मुलांना आवाज देत डोंगर चढत होते. डोंगरावर दोन तास शोध घेतल्यानंतर रात्री नऊ वाजण्याच्या सुमारास मुले डोंगरावर मिळून आले.

लोणी काळभोर (ता. हवेली) ग्रामपंचायत हद्दीत डोंगरावर हा प्रसंग काल घडला ,शुक्रवारी (ता.23) सायंकाळी सात वाजण्याच्या सुमारास याबाबतची माहिती समजताच लोणी काळभोर पोलिसांनी तातडीने भर पावसात मुलांचा शोध घेऊन दोन तासांच्या अथक प्रयत्नानंतर मुलांची सुखरूप सुटका केली .

अनुष्का जीवन पवार (वय-16), नैतिक जीवन पवार (वय-14), व आर्यन गणेश गवानदे (वय-16, रा. गुजरात) अशी रस्ता चुकलेल्या मुलांची नावे आहेत. मिळालेल्या माहितीनुसार अनुष्का पवार व नैतिक पवार हे दोघे नात्याने सख्ये बहिण भाऊ आहेत. तर आर्थन गवानदे हा त्यांचा मावसभाऊ आहे. तिन्ही मुले ही सुट्ट्यांमध्ये त्याचे लोणी काळभोर येथील नातेवाईक नेहा भानुदास थोरात (वय-24, रा. जॉयनेस्ट सोसायटी, लोणी काळभोर) व उरुळी कांचन येथील सुनिल दत्तात्रय कांचन (वय – ३१) यांच्याकडे आले होते.

दरम्यान, अनुष्का, नैतिक व आर्यन यांचा रामदरा येथे ट्रेकिंगसाठी जाण्याचा प्लान ठरला. त्यानुषंगाने तिघेही रामदरा डोंगरावर ट्रेकिंगसाठी शुक्रवारी (ता.23) दुपारी तीन वाजण्याच्या सुमारास गेले होते. डोंगरावर दोन तीन तास झाल्यानंतर अचानक पाऊस सुरु झाला. त्यातच अंधार पडायला लागला होता. डोंगरावरून घाईघाईने उतरताना त्यांचा रस्ता चुकला आणि तिन्ही मुले डोंगरावर अडकले.त्यानंतर मुलांनी रामदरा डोंगरावर रस्ता चुकून अडकल्याची माहिती पुणे शहर पोलिसांच्या कंट्रोल रूमला शुक्रवारी सायंकाळी सात वाजण्याच्या सुमारास दिली. या घटनेची माहिती मिळताच, लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी पोलीस उपनिरीक्षक पूजा माळी, पोलीस अंमलदार मयुर बोरातके, वैभव खोत, प्रदीप गाडे व सोनवणे यांचे एक पथक तयार करून घटनास्थळी पाठवून दिले.पोलीस घटनास्थळी दाखल झाले तेव्हा पावसाने जोर धरला होता. पोलीस फोनद्वारे मुलांशी संपर्क करण्याचा प्रयत्न करीत होते. मात्र फोन स्वीच ऑफ लागत होता. या परिस्थितीत पोलिसांनी डोक्यावर पावसाची रिमझिम झेलत, रात्रीच्या अंधारात टोर्चच्या सहाय्याने झाडी झुडपातून वाट करीत डोंगरावर निघाले होते. मुलांना आवाज देत डोंगर चढत होते. डोंगरावर दोन तास शोध घेतल्यानंतर रात्री नऊ वाजण्याच्या सुमारास मुले डोंगरावर मिळून आले.

लोणी काळभोर पोलिसांनी तिन्ही मुलांना सुखरूप लोणी काळभोर पोलीस ठाण्यात आणले. त्यानंतर पोलिसांनी मुलांच्या पालकांना पोलीस ठाण्यात बोलाविले. तिन्ही मुलांना सुखरूप पालकांच्याकडे स्वाधीन केले.

…………भारतीय विद्या भवन आणि इन्फोसिस फाउंडेशन यांचे आयोजन

पुणे:

भारतीय विद्या भवन व इन्फोसिस फाउंडेशन यांच्या सांस्कृतिक प्रसार कार्यक्रमांतर्गत आयोजित ‘आविष्कार क्रिएशन्स, पुणे’ प्रस्तुत ‘राम गान’ या कार्यक्रमात रसिकांनी रामायणातील विविध प्रसंगांचा काव्य, गायन आणि चित्ररूपात आनंद घेतला.२४ मे २०२५ रोजी सायंकाळी साडे पाच वाजता भारतीय विद्या भवन, सेनापती बापट रस्ता येथे हा कार्यक्रम झाला.

बंदिशकार व चित्रकार भाग्यश्री गोडबोले यांनी रामायणातील निवडक प्रसंगांवर रचना केलेल्या रागाधारी बंदिशींचे गायन आणि त्यावर आधारित त्यांच्याच चित्रांचे दृकश्राव्य प्रदर्शन सादर करून रसिकांना एक अद्वितीय अनुभव दिला. या कार्यक्रमात पं.अमोल निसळ, डॉ.सानिका गोरेगावकर,सावनी दातार, श्वेता कुलकर्णी आणि भाग्यश्री गोडबोले यांनी विविध रागांवर आधारित गायन सादर केले. कार्यक्रमाचे निवेदन डॉ. सुनील देवधर यांनी केले.

अमित जोशी (तबला), शुभदा आठवले (संवादिनी) आणि अंजली सिंगडे-राव (व्हायोलिन) यांनी उत्कृष्ट साथसंगत केली.भारतीय विद्या भवन पुणे केंद्र समितीचे सदस्य ग्रुप कॅप्टन सुहास फाटक, डॉ.जयश्री फिरोदिया, मोठ्या प्रमाणावर श्रोतु वर्ग उपस्थित होता. भारतीय विद्या भवनचे मानद सचिव नंदकुमार काकीर्डे यांनी प्रास्ताविक करून कलाकारांचा सत्कार केला.कार्यक्रमात सहभागी रसिकांनी सादरीकरणाची एकात्मता आणि कलात्मक सादरीकरणाची प्रशंसा केली.भारतीय विद्या भवन आणि इन्फोसिस फाउंडेशन यांच्या सांस्कृतिक प्रसार उपक्रमातील हा २४५ वा कार्यक्रम होता.प्रवेश विनामूल्य होता.या कार्यक्रमाला रसिकांची उत्स्फूर्त उपस्थिती लाभली.

अ‍ॅड.आशिष शेलार यांची पुणे बाल पुस्तक जत्रेला भेट

पुणे, दि. २४: ‘पुणे बाल पुस्तक जत्रा’ सारख्या उपक्रमातून बालमनावर चांगले संस्कार होत असल्याने पुढील वर्षांपासून बाल पुस्तक जत्रेत सांस्कृतिक कार्य विभागातर्फे विविध सांस्कृतिक कार्यक्रम आयोजित करण्यात येतील, असे प्रतिपादन राज्याचे सांस्कृतिक कार्य मंत्री अ‍ॅड.आशिष शेलार यांनी केले.

राष्ट्रीय पुस्तक न्यास, पुणे महानगर पालिका, पुणे पुस्तक महोत्सव संवाद यांच्या संयुक्त विद्यमाने गणेश कला क्रीडा मंच येथे आयोजित ‘पुणे बाल पुस्तक जत्रा २०२५’ ला अ‍ॅड.आशिष शेलार यांनी भेट दिली. याप्रसंगी ते बोलत होते. कार्यक्रमाला आमदार हेमंत रासने, महापालिका उपायुक्त पृथ्वीराज संचालक तथा पुणे पुस्तक महोत्सवाचे मुख्य संयोजक राजेश पांडे, धीरज घाटे, संवाद संस्थेचे संस्थापक संचालक सुनील महाजन, चिंटूकार चारूहास पंडीत आदी उपस्थित होते.

अ‍ॅड.शेलार म्हणाले, कृत्रिम बुद्धिमत्ता, ओटीटी प्लॅटफॉर्म आणि इंटरनेटच्या युगात लहान मुलांच्या संवेदना जागृत रहाव्यात, त्यांच्यावर चांगले संस्कार व्हावेत आणि त्यांच्या गुणांचा विकास व्हावा यासाठी अशा उपक्रमांचे आयोजन गरजेचे आहे. त्यामुळे सांस्कृतिक विभाग या बाल पुस्तक जत्रेचा अधिकृत सहयोगी होईल, राज्यात बालसंस्काराचे एक मॉडेल म्हणून हा उपक्रम ओळखला जाईल.

पुणे बाल पुस्तक जत्रेच्या आयोजनाबद्दल आयोजकांचे कौतुक करतांना ते म्हणाले, आज कुटुंब व्यवस्था मोडकळीस आली असतांना समाजासमोरच्या आव्हानांना सामोरे जाण्यासाठी असे आयोजन उपयुक्त आहे. कृत्रिम बुद्धिमत्तेला वास्तविक बुद्धिमत्तेची जोड दिल्याशिवाय प्रगती साधता येत नाही. मुलांमध्ये अशी बुद्धिमत्ता निर्माण करण्याची क्षमता बाल पुस्तक जत्रेत आहे. बालकांसाठी पुस्तके, खेळ, सांस्कृतिक देवाण घेवाण आणि इतिहासाची माहिती असे सर्व एकाच ठिकाणी पहिल्यानंतर उपक्रमाचे महत्व कळते आणि हे सर्व वातावरण आजच्या परिस्थितीच्या पार्श्वभूमीवर अविश्वसनीय वाटते, अशा शब्दात अ‍ॅड.शेलार यांनी आयोजनाबद्दल समाधान व्यक्त केले.

महापालिका उपायुक्त पृथ्वीराज म्हणाले, पुणे महानगरपालिका स्थापनेचे ७५ वे वर्ष असल्याने विविध सांस्कृतिक कार्यक्रम आयोजित करण्यात येत आहेत. बाल पुस्तक जत्रेला पहिल्याच वर्षी मिळालेला प्रतिसाद पाहता दरवर्षी हे आयोजन करण्यासाठी सहकार्य करण्यात येईल. राष्ट्रीय पुस्तक न्यासासाठी जागा महापालिकेने उपलब्ध करून दिली असून पुण्याला पुस्तकाची राजधानी करण्याचा प्रयत्न असल्याचे त्यांनी सांगितले.

प्रास्ताविकात राजेश पांडे म्हणाले, महाराष्ट्रातील बाल पुस्तक जत्रेचा हा पहिलाच प्रयोग असून अडीच दिवसात २५ हजार मुलांनी भेट दिली. मुले जत्रेचा आनंद लुटत आहेत.राज्य शासनाचे सहकार्य असल्याने अशा कार्यक्रमांचे कार्यक्रम शक्य होते.

प्रारंभी मंत्री अ‍ॅड.शेलार यांनी प्रदर्शनातील विविध स्टॉलला भेट दिली. मुलांचे खेळ पाहतानाच स्वत: त्यांनी विटी-दांडू हाती घेऊन खेळाचा आनंद घेतला. त्यांच्या हस्ते विविध बाल पुस्तकांचे प्रकाशन करण्यात आले. या पुस्तकाचे प्रकाशन करण्यात आले.

पुणे-

आगामी पुणे महानगरपालिकेच्या पार्श्वभूमीवर राष्ट्रवादी काँग्रेस पक्ष शरदचंद्र पवार पक्षाची कोर कमिटी बैठक राष्ट्रवादी काँग्रेस भवन पुणे येथे संपन्न झाली.

आगामी महानगरपालिका निवडणुकी संदर्भात प्रामुख्याने आघाडी बाबत शहरातील सद्यपरिस्थितीचा आढावा घेत सकारात्मक चर्चा झाली, प्रशासनाकडून केल्या जाणाऱ्या प्रभाग रचनेसंदर्भात निर्माण होणाऱ्या संभाव्य तक्रारींबाबत स्थायी समितीचे माजी अध्यक्ष विशाल तांबे यांच्याकडे जबाबदारी देण्यात आली आहे, पालिकेत यापूर्वी सत्ताधारी असलेल्या भारतीय जनता पार्टीने नियोजनबद्ध विकास न करता शहरात केलेल्या चुकीच्या कामामुळे आज शहराची झालेली वाताहत मोठ्या प्रमाणात वाहतूक कोंडी पावसाळ्यात शहरातील अनेक भागांमध्ये शासनाचे पाणी यातून होणारे नुकसान पर्यावरणासंदर्भात हाती घेण्यात आलेले चुकीचे प्रकल्प या सर्व चुकीच्या कामांची माहिती सर्वसामान्य पुणेकरांपर्यंत पक्ष पोहोचवणार आहे तसेच पक्षाची शहरातील संघटनात्मक बांधणी मजबूत असून पक्षाच्या सर्व सेलला निवडणुकीसाठी तयार ठेवण्याचे देखील या बैठकीत ठरविण्यात आले आहे.

यांसह वेगवेगळ्या विषयांवर या कोअर कमिटीच्या बैठकीदरम्यान चर्चा झाली.
या बैठकीसाठी शहराध्यक्ष प्रशांत जगताप, माजी खासदार वंदना चव्हाण, माजी आमदार जगन्नाथ शेवाळे, माजी आमदार जयदेव गायकवाड, आमदार बापूसाहेब पठारे, माजी आमदार कमल ढोले पाटील, ज्येष्ठ नेते अंकुश काकडे, रवींद्र माळवदकर, विशाल तांबे ,अश्विनी कदम, श्रीकांत पाटील ,सचिन दोडके ,भगवानराव साळुंखे ,डॉ.सुनील जगताप, पंडित कांबळे ,प्रकाश म्हस्के आदी नेते तथा पदाधिकारी उपस्थित होते.

सोमेश्वर फाऊंडेशनच्या आयोजित पुणे आयडॉल स्पर्धेचा समारोप

‘व्हाईस ऑफ चॉइस’ पुरस्काराने डॉ. विनय थोरात, शिवानी पांढरे, निलेश निकम, अॅड. शितल कुलकर्णी यांचा सन्मान

पुणे : संगीत म्हणजे आनंदाचा एक मेळा.कोणतेही संगीत ऐकल्यावर लगेच आपल्या मनावर त्याचा परिणाम होतो. एक नवचैतन्य निर्माण होते. गाण्याचा छंद जोपासून अनेक पुणेकरांनी राष्ट्रीय स्तरावरील स्पर्धांमध्ये आपला ठसा उमटविला आहे. पुणेकरांच्या गायनाच्या छंदाला गेली 23 वर्ष सोमेश्वर फाऊंडेशन मार्फत सनी निम्हण प्रेरणा देत आहेत. याबद्दल समाधान आहे, अशी भावना राज्याचे कृषिमंत्री माणिकराव कोकाटे यांनी व्यक्त केली.

कार्यसम्राट आमदार स्व. विनायक निम्हण यांनी गायक कलाकारांना दिलेले मानाचे व्यासपीठ म्हणजे सोमेश्वर फाऊंडेशन आयोजित पुणे आयडॉल स्पर्धा. या स्पर्धेची महाअंतिम फेरी आज बालगंधर्व रंगमंदिर, पुणे येथे संपन्न झाली.यावेळी कृषिमंत्री कोकाटे बोलत होते. यावेळी राज्याचे उच्च व तंत्रशिक्षण मंत्री चंद्रकांत पाटील, भाजपचे पुणे शहाराध्यक्ष धीरज घाटे, संयोजक सनी विनायक निम्हण आदि मान्यवर उपस्थित होते. पुणे आयडॉल स्पर्धेच्या निमित्ताने दरवर्षी विविध क्षेत्रात कार्यरत असलेल्या व गायन कला जोपासणाऱ्या व्यक्तींचा ‘व्हाईस ऑफ चॉइस’ पुरस्काराने सन्मान करण्यात येतो, यंदा डॉ. विनय थोरात, शिवानी पांढरे, निलेश निकम, अॅड. शितल कुलकर्णी यांना मान्यवरांच्या हस्ते सन्मानित करण्यात आले.

पुढे बोलताना कृषीमंत्री कोकाटे म्हणाले, पुणे आयडॉलच्या माध्यमातून पुणे शहरातील नवोदित गायकांना व्यासपीठ उपलब्ध करून देण्याची इच्छा दिवंगत नेते विनायकराव निम्हण यांची होती. त्यानुसार गेली अनेक वर्ष ही स्पर्धा सुरू आहे.

चंद्रकांत पाटील म्हणाले, एखादा उपक्रम सुरु करणे सोपे असते. मात्र तो सातत्याने आणि तेव्हढ्याच दिमाखात सुरू ठेवणे कठीण आहे. परंतु स्वर्गीय आमदार विनायक निम्हण यांनी पुणे आयडॉल ही स्पर्धा सुरू केली अन् गेल्या 23 वर्षांपासून ही अशीच सुरू आहे. सनी निम्हण यांनी त्यांचा सामाजिक आणि राजकीय वारसा दोन्ही घेतला आहे. या स्पर्धेत पुणे शहरात व्यतिरिक्त इतर शहर आणि राज्यातून देखील स्पर्धक आलेले आहेत. यातच या स्पर्धेचे यश आहे.

धीरज घाटे म्हणाले, सांस्कृतिक नगरी असलेल्या पुणे शहरात नेहमीच सांस्कृतिक कार्यक्रमाची रेलचेल असते. येथे गेली 23 वर्ष ही स्पर्धा सुरू आहे, हे कौतुकास्पद आहे.

प्रास्ताविक पर भाषणात सनी निम्हण म्हणाले, पुणे आयडॉल या स्पर्धेच्या अंतिम फेरीत 725 स्पर्धकांमधून 18 स्पर्धक निवडण्यात आले. त्यांची निवड करताना परीक्षकांचाच कस लागला आहे. पुणे आयडॉल ही केवळ स्पर्धा नसून आपले गायन कौशल्य सादर करण्याचे एक महत्वाचे व्यासपीठ बनले आहे.

पुणे आयडॉल स्पर्धेतील चारही गटाच्या प्रथम विजेत्यास 15 हजार रुपये, स्मृतिचिन्ह आणि सन्मानपत्र तर द्वितीय क्रमांकाच्या विजेत्यांना प्रत्येकी 10 हजार रुपये, स्मृतिचिन्ह, सन्मानपत्र प्रदान करण्यात आले.

अमित मुरकुटे, हेमंत कांबळे, अनिकेत कपोते, वनमाला कांबळे, संजय माजिरे, गणेश शेलार, संजय तरडे आदि कार्यकर्ते स्पर्धेच्या यशासाठी परिश्रम घेतले. कार्यक्रमाचे परीक्षण ज्येष्ठ गायक राजेश दातार, गायक जितेंद्र भुरुक आणि मंजुश्री ओक यांनी केले.

पुणे आयडॉलचे विजेते

लिटिल चॅम्प

1. भार्गव जाधव
2. परी तेलंग

युवा आयडॉल

1 अभितांश श्रीवास्तव
2 नीव कनानी

जनरल आयडॉल

1 पियुष भोंडे
2 निखिल गर्गे

ओल्ड इज गोल्ड

1 सुनील यादव
2 मनोज मोरे

ग्रीन सोल्यूशनतर्फे खरमाळे दाम्पत्याला जीवन गौरव पुरस्कार प्रदान
पुणे : प्लास्टिकचा अनिर्बंध वापर रोखणे ही आजच्या काळाची गरज आहे. पर्यावरण रक्षण ही देशसेवा समजून कार्य केले तरच भविष्यात मानव जीवंत राहू शकेल, असे प्रतिपादन माजी सैनिक, वॉटरमॅन, पर्यावरणवादी, सामाजिक चळवळीतील कार्यकर्ते रमेश खरमाळे यांनी केले.
ग्रीन सोल्यूशनच्या 13व्या वर्धापन दिनानिमित्त पर्यावरण क्षेत्रातील कार्याची दखल घेऊन रमेश खरमाळे व स्वाती खरमाळे यांचा जीवनगौरव पुरस्कार देऊन सन्मान करण्यात आला. त्या वेळी सत्काराला उत्तर देताना खरमाळे बोलत होते. रागा पॅलेस येथे कार्यक्रमाचे आयोजन करण्यात आले होते. शाळ, श्रीफळ आणि मानचिन्ह असे पुरस्काराचे स्वरूप होते. ग्रीन सोल्यूशनचे मॅनेजिंग डायरेक्टर सागर अहिवळे, आरती भोसले-अहिवळे, प्रसिद्ध लेखक शरद तांदळे, महाराष्ट्र प्रदूषण नियंत्रण मंडळाचे माजी सहसंचालक डॉ. विद्यानंद मोटघरे, सीओईपीचे सहअधिष्ठाता डॉ. संदीप मेश्राम, शिवाजी विद्यापीठाच्या पर्यावरण शास्त्र विषयाचे माजी विभागप्रमुख प्रा. डॉ. प्रकाश राऊत यांची प्रमुख उपस्थिती होती.
ग्रीन सोल्यूशन पर्यावरण क्षेत्रात करीत असलेल्या कार्याचा गौरव करून रमेश खरमाळे म्हणाले, शहरापेक्षा ग्रामीण भागातील प्लास्टिकचा प्रश्न गंभीर आहे. यातून वीषयुक्त अन्नधान्याची निर्मिती होत आहे. जनावरांच्या आरोग्यासही धोका निर्माण होत आहे. प्रदूषणात वाढ झाल्यामुळे कार्बन उत्सर्जनही मोठ्या प्रमाणात होत असून त्यातूनच तापमानवाढीच्या जागतिक संकटाला सामोरे जावे लागत आहे. या करिता प्रत्येकाने झाडे लावून पर्यावरण वाचविण्याची गरज आहे.
शरद तांदळे म्हणाले, पर्यावरण रक्षण हे आता फक्त सामाजिक कार्य राहिले नसून या क्षेत्रातही उद्योग व्यवसायाच्या संधी मोठ्या प्रमाणात उपलब्ध आहेत. डॉ. विद्यानंद मोटघरे म्हणाले, पर्यावरण रक्षणासाठी ग्रीन सोल्यूशनने छोटी छोटी पावले उचलत जागतिक स्तरापर्यंत कार्य करावे.
डॉ. प्रकाश राऊत म्हणाले, माझ्या विद्यार्थ्यांनी ग्रीन सोल्यूशनच्या माध्यमातून पर्यावरणाच्या क्षेत्रात केलेली कामगिरी अभिमानास्पद आहे. पर्यावरण रक्षणाचा संदेश देत ही संस्था अखंडितपणे कार्य करीत आहे.
प्रास्ताविकात आरती भोसले-अहिवळे यांनी ग्रीन सोल्यूशनच्या कार्याविषयी माहिती देत अदम्य इच्छाशक्ती, कष्ट आणि जिद्द या जोरावर वाटचाल सुरू असल्याचे त्यांनी सांगितले. आगामी योजनांविषयी सागर अहिवळे यांनी अवगत केले. यशोधन रामटेके, डॉ. गणेश कदम यांनी मनोगत व्यक्त केले.