पुण्याचा युवा कलाकार आदित्य बीडकर हा ‘स्टार प्रवाह ‘ मराठी वाहिनीवर ‘ डॉ.बाबासाहेब आंबेडकर : महामानवाची गौरवगाथा’ या महामालिकेत डॉ.आंबेडकर यांचे ज्येष्ठ बंधूंच्या भूमिकेत बालपणीच्या सर्व प्रसंगात दिसणार आहे .
नितीन वैद्य यांच्या ‘दशमी क्रिएशन ‘ ची ही मालिका १८ मे २०१९ ( बुद्धजयंती )पासून छोट्या पडद्यावर दिसणार आहे . अजय मयेकर दिग्दर्शक आहेत.
लहानपणापासून प्रकाश पारखी यांचे नाट्यसंस्कार शिबिर ,अनेक स्पर्धा ,अभिनय ,शॉर्ट फिल्म , ग्रिप्स थिएटर ,स . प . कलामंडळ ,मौनांतर स्पर्धा, फिरोदिया ,पुरुषोत्तम करंडक गाजवून आदित्य इथपर्यंत अत्यंत मेहनतीने ,संघर्ष करीत स्वबळावर पोहोचला . निर्मिती सावंत यांच्यासमवेत ‘ निर्मल ग्राम ‘ अभियानावरील माहितीपटात फार पूर्वी त्याने अभिनय केला केला होता. इंडियन मॅजिक आय ‘ बरोबर जाहिरातीत त्याने काम केले आहे. समवयीन मित्र – मैत्रिणींसाठी त्याने स्वतःच अभिनय प्रशिक्षण शिबीर पण घेतले आहे.
प्रसिध्द युवा कलाकार अथर्व कर्वे, ऐश्वर्या तुपे यांच्याबरोबर ‘ स्वातंत्र्यवीरायण ‘ या व्यावसायिक नाटकातही त्याने भूमिका केली आहे.
स. प. महाविद्यालय ( पुणे ) येथे कला शाखेच्या पहिल्या वर्षाची परीक्षा सुरु असतानाच या मालिकेचे शूटींग सुरु झाले.
‘लाठी ‘ या संजय सूरकर दिग्दर्शित ,त्यांच्या अखेरच्या मराठी सिनेमात आदित्य मोठ्या पडद्यावर झळकला . मग अनेक वर्ष रंगभूमी वर वावरत राहिला . ‘भूमिका ‘ या व्यावसायिक नाटकाच्या अनेक प्रयोगात तो होता. आणि आता १८ मे २०१९ पासून दूरचित्रवाणीच्या छोट्या पडद्यावर झळकणार आहे !
आंबेडकरांचे ज्येष्ठ बंधूंची , बालपणीची भूमिका आदित्यने साकारली आहे. ते घरचा संघर्ष पाहून आक्रमक पणे परिस्थितीशी सामना करणारे, पण कला आवडणारे व्यक्तीमत्व होते. लहान वयातील डॉ.आंबेडकर यांना संघर्षाची दीक्षाच ते देतात. आंबेडकरांच्या बालपणातील महू, आंबवडे येथील प्रसंगात आदित्य आहे. हे चित्रीकरण भोर, मुंबई येथे झाले.
भारतीय इतिहासातील मोठया चरित्र नायकाच्या भावाची भूमिका करणे, हा आजवरच्या अभिनय प्रवासात जुळून आलेला सर्वात मोठा योग होता. मिलिंद अधिकारी, चिन्मयी सुमित या कलाकारांसमवेत काम करता आले.डॉ. आंबेडकरांच्या भूमिकेतील सागर देशमुख यांचा अभिनय शूटींग दरम्यान पाहता आला आणि टी.व्ही. वर आपण दिसणार आहोत,हेच मोठे समाधान आहे ‘ असे आदित्य बीडकर सांगतो !
