पुणे : ज्ञानोबा-तुकोबाच्या गजरात पालख्या पंढरपूरच्या दिशेने निघाल्या असून, लाखो वारकऱ्यांचा मेळा आळंदी आणि देहूतून पंढरीच्या वाटेवर चालत आहे. या वारकऱ्यांना पायी वारी दरम्यान उन्हापावसात निवारा मिळावा म्हणून फिनोलेक्स इंडस्ट्रीज लिमिटेड आणि मुकुल माधव फाऊंडेशनच्या वतीने वारी मार्गावर तीन कायमस्वरूपी शेड्स उभारले आहेत. यासोबतच इतर सामाजिक उपक्रमांचे लोकार्पण मुकुल माधव फाउंडेशनतर्फे करण्यात आले.

पिराची कुरोळी, लोणी काळभोर आणि वाखरी (पंढरपूर) येथे वारकऱ्यांच्या निवाऱ्यासाठी उभारण्यात आलेल्या या शेड्सचे उद्घाटन निवासी जिल्हाधिकारी अजित देशमुख यांच्या हस्ते नुकतेच करण्यात आले. यावेळी प्रांताधिकारी सचिन ढोले, गटविकास अधिकारी श्री घोडके, तहसीलदार, ग्रामविकास अधिकारी, ग्रामपंचायत सदस्य, यांच्यासह फिनोलेक्सचे उपाध्यक्ष बी. आर. मेहता, नितीन कुलकर्णी व मुकुल माधव फाउंडेशनचे पदाधिकारी उपस्थित होते. लोणी काळभोर येथील शेडचे उद्घाटन जिल्हा परिषदेचे उपमुख्याधिकारी संदीप कोहिनकार यांच्या हस्ते झाले. या शेड्समुळे वारकऱ्यांना रात्रीच्या वेळी झोपण्याची सोय होणार आहे. वारीनंतर या शेड्सचा उपयोग गावकऱ्यांना वर्षभर त्यांच्या कार्यक्रमासाठी करता येणार आहे. संबंधित ग्रामपंचायतीकडून त्याची देखभाल केली जाणार आहे.

त्याचबरोबर मुकुल माधव फाउंडेशनने सोलापूर येथील माधव वेल्फेअर फाउंडेशनच्या सहकार्याने २०१८ मध्ये जलसंधारण प्रकल्प सुरु केला होता. त्या प्रकल्पाचा लाभ माढा तालुक्यातील ३२ गावांना होणार आहे. सोलापूरमधील जिल्हा परिषद शाळेत शिक्षण घेणाऱ्या ९वी आणि १० वीतील शंभर विद्यार्थिनीना सायकलीचे वाटप करण्यात आले. या उपक्रमामुळे पालकांकडून आपल्या मुलींना शाळेत जाण्यासाठी प्रोत्साहन मिळत आहे. पुण्यातल्या वडगाव आनंद येथील विद्यार्थ्यांना जेवण्यासाठी स्वच्छ आणि सुरक्षित वातावरण मिळावे, यासाठी पक्के शेड उभारले आहे. रुग्णांसाठी केईएम रुग्णालयात मासिक मधुमेह तपासणी शिबिराचे आयोजन केले. त्यात २६ रुग्णांवर उपचार करण्यात आले.

…अन भरली आजीबाईंची शाळा 

पुण्यापासून २०० किमी अंतरावर असलेल्या ठाणे जिल्ह्यातील मुरबाड तालुक्यातील वडाची वाडी गावात आजीबाईची अनोखी शाळा भरली. ५० ज्येष्ठ नागरिक महिलांना साक्षर करण्यासाठी मुकुल माधव फाउंडेशनने हा पुढाकार घेतला असून, त्यात त्यांना अक्षर ओळख व मूलभूत शिक्षण दिले जाणार आहे. सगळ्या आजींना गणवेश दिल्यामुळे ही आजीबाईचा शाळा सर्वांचे लक्ष वेधत आहे. यासह खंडाळा प्राथमिक आरोग्य केंद्रात गर्भधारणेच्या काळात आपत्कालीन परिस्थिती कशी हाताळावी, याचे १२२ आशा व एएनएम नर्सेसना प्रशिक्षण देण्यात आले, असे मुकुल माधव फाउंडेशनच्या व्यवस्थापकीय विश्वस्त रितू प्रकाश छाब्रिया यांनी सांगितले.

पुणे : “कोणत्याही क्षेत्रात काम करताना आव्हाने येतात. उद्योग उभारताना तर अनेक आव्हानांचा सामना करावा लागतो. अपयशाला सामोरे जावे लागते. पण या परिस्थितीतून सकारात्मक मार्ग काढीत जिद्दीने उभे राहणारच यशस्वी उद्योजक बनतात. त्यामुळे मराठी माणसाने हिम्मतीने उद्योग उभारावेत,” असे मत युनिव्हर्सल कन्स्ट्रक्शनचे व्यवस्थापकीय संचालक रणजित मोरे यांनी व्यक्त केले.

मराठी आंत्रप्रेन्युर्स नेटवर्क फोरमच्या चौथ्या वर्धापन दिनानिमित्त आयोजित आदर्श उद्योजक-उद्योजिका पुरस्कार वितरण सोहळ्यात मोरे बोलत होते. घोले रस्त्यावरील नेहरू सांस्कृतिक सभागृहात झालेल्या या कार्यक्रमासाठी शारंगधर फार्माचे डॉ. जयंत अभ्यंकर, फोरमचे राजेश जोशी, सुरेंद्र कुलकर्णी, नंदकुमार तळेकर, वृषभनाथ कोंडेकर आदी उपस्थित होते. यावेळी सेवा क्षेत्रातील जीवन हेंद्रे, उत्पादन क्षेत्रातील प्रकाश दीक्षित, कृषी उद्योगातील उत्तम हुकरे यांना आदर्श उद्योजक, तर उत्पादन क्षेत्रातील उज्ज्वला गोसावी व खाद्य क्षेत्रातील प्राजक्ता पाठक यांना आदर्श उद्योजिका पुरस्काराने सन्मानित करण्यात आले.

रणजित मोरे म्हणाले, “मराठी माणूस प्रामाणिक असतो. तो ग्राहकाला कधी फसवण्याचा विचार करत नाहीत. जोखीम घेण्याची तयारी आपल्याकडे असली पाहिजे. प्रत्येकवेळी यश मिळेल, असे नाही. अपयश आले तरी खचून न जाता पुन्हा जोमाने उभा राहिले पाहिजे. महाराष्ट्रात उद्योगासाठी मोठा वाव आहे. आपण मार्केटचा अभ्यास करून त्यानुसार उद्योग विस्तार करायला हवा.”

डॉ. जयंत अभ्यंकर म्हणाले, “आपल्यातील क्षमता ओळखून त्यानुसार क्षेत्रनिवड केली पाहिजे. त्यात नाविन्यपूर्ण काम उभारता आले पाहिजे. उद्योगाच्या यशासाठी पैसे, विश्वास आणि कामावरची श्रद्धा या तीन गोष्टी महत्वाच्या असतात. अपयशातून मार्ग काढत पुढे गेले पाहिजे.”

प्राजक्ता पाठक म्हणाल्या, आमच्यासारख्या उद्योगांना दाद दिली तर आमचाही काम करण्यासाठी उत्साह वाढतो. हे यश केवळ माझे नाही तर माझ्या कर्मचाऱ्यांचे आहे. उत्तम डुकरे म्हणाले, माझ्या उद्योगाची आईची साथ मोलाची आहे. उज्ज्वला गोसावी म्हणाल्या, हा पुरस्कार मी माझे वडील, आई आणि माझ्या जीवनसाथीला अर्पण करते. माझ्या कर्मचाऱ्यांना त्यांच्या साथ साठी धन्यवाद देते. प्रकाश दीक्षित म्हणाले, विविध उद्योजकांना एका छताखाली जमल्यामुळे एकमेकांना फायदा होईल. जीवन हेंद्रे म्हणाले, कुटुंबाची साथ मिळाली आणि सकारात्मक दृष्टीने काम करता आले, तर यश मिळते.

सुत्रसंचालन ज्ञानेश्वर जाधवर, प्रास्ताविक वृषभनाथ कोंडेकर, मानपत्र वाचन जाई देशपांडे यांनी केले. आभार ऍड. राजश्री माने यांनी मानले.

पुणे :

राष्ट्रवादी काँग्रेसच्या प्रदेश समन्वयक पदावर कोथरुड ( पुणे ) येथील युवा कार्यकर्ते सुहास उभे यांची नियुक्ती करण्यात आली आहे. राष्ट्रवादी काँग्रेसचे प्रदेशाध्यक्ष जयंत पाटील यांनी सुहास उभे यांना नियुक्तीचे पत्र दिले. सुहास उभे यांच्याकडे पक्षाच्या विविध आघाड्या आणि सेल ( विभाग ) यांच्या समन्वयाची जबाबदारी देण्यात आली आहे.

सुहास उभे यांना यापूर्वी राष्ट्रवादी युवक काॅंग्रेसचे राष्ट्रीय सरचिटणीस म्हणून काम करण्याचा अनुभव आहे.

‘ पक्षाध्यक्ष शरद पवार यांनी युवकांना संधी देण्याची भूमिका घेतली असून त्यामुळे संधी मिळाली . राष्ट्रवादी युवक काॅंग्रेस
संघटनेत संपूर्ण महाराष्ट्रातील असलेला जनसंपर्क पाहून अजितदादा पवार व खा . सुप्रियाताई सुळे यांनी माझी निवड केली. पक्षातील आघाड्या आणी विभाग सक्षम करणे, संवाद -उपक्रम वाढवणे आणि त्यातून पक्षाचा जनाधार वाढविण्यासाठी कार्यरत राहणार आहे, ‘ असे सुहास उभे यांनी सांगीतले.

पुणे, २४ जून: “वारी ही सदैव माणसाला चैतन्य प्रदान करीत असते. पालखीच्या माध्यमातून धर्म व संस्कृती शिकविली जातेे. समाजात पुढील पिढी टिकवायची असेल तर त्यांना वारीचे संस्कार देणे गरजेचे आहे. वारी ही आम्हाला आई-वडिलांची सेवा करण्याचे संस्कार शिकविते. म्हणून वारी ही संस्कारांची शिदोरी आहे.” असे अनमोल विचार देहू येथील संत साहित्याचे गाढे अभ्यासक ह.भ.प.श्री. विठ्ठल महाराज कोळोखे यांनी मांडले.
विश्‍वशांती केंद्र (आळंदी), माईर्स एमआयटी, पुणे व श्री क्षेत्र आळंदी-देहू परिसर विकास समिती यांच्या संयुक्त विद्यमाने श्री संत ज्ञानेश्‍वर-तुकाराम ज्ञानतीर्थ, विश्‍वरूप दर्शन मंच, श्री क्षेत्र आळंदी येथे पालखी सोहळा प्रस्थान असते. त्या निमित्ताने युनेस्को अध्यासन अंतर्गत लोकशाही, मानवाधिकार, शांती व सहिष्णुतेसाठीचा लोकशिक्षणाचा अभिनव उपक्रमाचे आयोजन करण्यात आले आहे. या कार्यक्रमाच्या उद्घाटन प्रसंगी व पहिले पुष्ण गुंफताना ते बोलत होते.
याप्रसंगी विश्‍वशांती केंद्र (आळंदी), माईर्स एमआयटी, पुणेचे संस्थापक अध्यक्ष प्रा.डॉ. विश्‍वनाथ दा. कराड, सौ. उर्मिला विश्‍वनाथ कराड, सौ. उषा विश्‍वनाथ कराड, श्रीक्षेत्र आळंदी देहू परिसर विकास समितीच्या समन्वयक प्रा. स्वाती कराड-चाटे, बाळासाहेब रावडे, ह.भ.प. डॉ.सुदाम महाराज पानेगावकर, बाळासाहेब काळोखे, तुकाराम काळोखे, रमेश काळोखे, ह.भ.प. शालीग्राम खंदारे, ह.भ.प. नलावडे महाराज हे उपस्थित होते.
ह.भ.प.श्री. विठ्ठल महाराज कोळोखे म्हणाले “मानवाने जीवन का जगावे हे कळण्यासाठी अध्यात्म असते. या अध्यात्मातील ओंकाराच्या माध्यमातून सदैव ऊर्जा प्राप्त होत असते. तसेच यातील शब्द संपत्ती ही भाव निर्माण करते आणि त्यातूनच परमार्थाकडे जाता येते. मानवाला जशी संगत असेल त्यावर जीवनाच्या बर्‍याच गोष्टी आधारित असतात. त्यामुळे संगत ही साधू संतांची ठेवल्यास जीवनात सदैव सकारात्मक ऊर्जा प्राप्त होते.”
“संत तुकाराम महाराजांनी या समाजाला शहाणे करण्यासाठी स्वतःचा अनुभव सांगितला. परंतू त्याचा हवा तेवढा परिणाम झाला नाही. तसेच १७ व्या शतकात मराठी भाषा लोप पावत चालली होती त्यावेळेस संत तुकाराम महाराजांनी ‘गाथा’ मराठी भाषेत लिहून ही भाषा टिकविली. शिक्षणापेक्षा भक्ती श्रेष्ठ आहे हे त्यांनी सांगितले. संत तुकाराम यांनी अध्यात्म क्षेत्रात केलेल्या कार्याला पाहुन संपूर्ण जगातील महान व्यक्ती प्रभावित झाले होते.
तसेच, राष्ट्रपिता महात्मा गांधी यांनी सुध्दा तुकाराम महाराजांच्या अभंगाचे निरूपण केले आहे. त्याच प्रमाणे डॉ. बाबासाहेब आंबेडकर, लोकमान्य टिळक, महात्मा ज्योतिबा फुले यांच्या सारखे जगभरातील लाखो लोक त्याच्यापासून प्रभावित झाले होते. १८५७ साली मुंबई विद्यापीठाचे पहिले कुलगुरू अलेक्झांडर यांनी गाथा समजून घेऊन पहिली गाथा प्रकाशित केली. १८७९ मध्ये नेल्सन यांनी संत तुकाराम यांच्यावर ग्रंथ लिहिला.”
प्रा.डॉ. विश्‍वनाथ दा. कराड म्हणाले. “वारकरी संप्रदायाच्या माध्यमातून आळंदी व देहूचे नाव संपूर्ण जगात कोरले गेले आहे. संत ज्ञानेश्‍वर माऊली व जगद्गुरू तुकाराम महाराज यांनी संपूर्ण मानव जातीला सुख, समाधान आणि शांतीचा संदेश दिला आहे. कसे जगावे आणि जगू नये याबाबतचे मार्गदर्शन ज्ञानेश्‍वरी सारख्या ग्रंथातून मानवजातीला दिले आहे.
यानंतर जालना येथील ह.भ.प. डॉ. सुदाममहाराज पानेगांवकर यांचे सुश्राव्य असे कीर्तन झाले. तसेच, संगीत अलंकार ह.भ. प. श्रीकृष्ण गरड गुरुजी व संगीत विशारद श्री. अनिरूध्दजी कारकर यांचा भक्तीस्वरगंध हा अभंगवाणीचा कार्यक्रम संपन्न झाला.
वरील कार्यक्रमाचा इंद्रायणीच्या दोन्हीही तीरावरील लाखो वारकर्‍यांनी अध्यात्मिक अनुभूतीचा लाभ घेतला.

पुणे, दिनांक 23-क्रीडा क्षेत्रातील दिव्‍यांग खेळाडूंना ग्रॅव्‍हीटी फीटनेस क्लबने दत्तक घेऊन एक चांगला पायंडा पाडला आहे. या खेळाडूंच्‍या करियरला त्‍यामुळे एक नवी दिशा मिळेल, असा विश्‍वास व्‍यक्‍त करुन हा एक हृदयस्पर्शी उपक्रम असल्‍याचे गौरवोद्गार मुख्यमंत्री श्री.देवेंद्र फडणवीस यांनी काढले.

बिबवेवाडी परिसरात आयोजित कार्यक्रमात ते बोलत होते. ग्रॅव्हिटी फीटनेस क्लबच्यावतीने क्रीडा क्षेत्रातील 21 दिव्यांग व्यक्‍ती दत्तक घेण्यात आल्या असून त्यांचा सत्कार मुख्यमंत्री श्री. फडणवीस यांच्या हस्ते झाला.

यावेळी ज्‍येष्‍ठ विधीज्ञ उज्‍ज्‍वल निकम, माजी राज्यमंत्री दिलीप कांबळे, सुधीर कुलकर्णी, आमदार माधुरी मिसाळ, मिहीर कुलकर्णी, संजय मोरे आदींची उपस्थिती होती.

मुख्‍यमंत्री म्‍हणाले, व्यक्ती शरीराने दिव्यांग नसतो, तो मनाने असतो. तो मनाने दिव्यांग होतो तेव्हाच खरा दिव्यांग असतो. मनात उमेद, उभारी, हिंमत, ताकद असली तर दिव्यांग व्यक्ती कुठल्याही उंचीपर्यंत जाऊ शकतात. स्वामी विवेकानंद यांनी तरुणांना मंदिरात जाण्याऐवजी फुटबॉलच्या मैदानात जाण्याचा सल्ला होता. स्‍वामी विवेकानंद म्‍हणाले होते, कालीमातेची पूजा करतांना ताजी व टवटवीत फुले वापरली जातात, कोमेजलेली फुले आपण वापरत नाही, तसेच मातृभूमीच्‍या स्‍वातंत्र्यासाठी सुदृढ शरीर असलेली तरुणाईच उपयोगी आहे. चांगले शरीर व चांगले मन ईश्वराला आवडते, तसेच मातृभूमीलाही चांगले मन व चांगले शरीर असलेली तरुणाई आवडते. ग्रॅव्हिटी क्लबने दिव्यांगाना आवश्यक सुविधांनी परिपूर्ण असलेला क्लब खुला केला असून त्याचा फायदा होईल आणि नवीन खेळाडूंची टीम तयार होईल, असा विश्वास मुख्यमंत्री श्री. फडणवीस यांनी व्यक्त केला.

जेष्ठ विधिज्ञ उज्ज्वल निकम यांनी ग्रॅव्हिटी क्लब आणि त्यांचे प्रमुख मिहीर कुलकर्णी यांचे कौतुक केले. समाजासाठी काहीतरी करावे ही भावना कुलकर्णी यांनी जपली आहे. शारिरीक स्वास्थ्य उत्तम असेल तर मानसिक स्वास्थ्य उत्तम असते. सुदृढ शरीर असलेल्‍या मनात सकारात्मक विचार येतात. आजही मी कोठेही असलो तरी एक तास व्‍यायाम करतो, हे त्‍यांनी आवर्जून सांगितले. शारीरिक संपत्तीचा फायदा होतो, असेही ते म्हणाले

मिहिर कुलकर्णी यांनी प्रास्‍ताविक केले. माजी राज्यमंत्री दिलीप कांबळे, इंडियन बॉडी बिल्‍डींग अॅण्‍ड फीटनेस असोसिएशनचे संजय मोरे यांची यावेळी शुभेच्‍छापर भाषणे झाली. कार्यक्रमात योगेश मेहेर, प्रतीक मोहिते, सुनील मुलाह, अक्षय शेजवळ, सूर्यकांत दुगावले, जय भवर, अमोल कचरे, नवनाथ भोगडे, प्रियंका कुदळे, रवी वाघ या दिव्‍यांग खेळाडूंचा सत्‍कार करण्‍यात आला.

0000