नवी दिल्ली: केंद्रीय वने व पर्यावरण तथा हवामानबदलमंत्री प्रकाश जावडेकर यांच्या अध्यक्षतेखाली झालेल्या राष्ट्रीय वन्यजीव मंडळाच्या बैठकीत आज महाराष्ट्रातील तीन जिल्ह्यातील महत्त्वपूर्ण 6 प्रकल्पांना मंजुरी देण्यात आली.

श्री. जावडेकर यांनी ही माहिती दिली असून या मंजुरीने आदिवासी व वन बांधवांना फायदा होईल तसेच पर्यावरणाचे रक्षण व विकास होणार असल्याच्या भावनाही व्यक्त केल्या.

कोल्हापूर जिल्ह्यातील सोनवडे-घोडगे हा कोल्हापूर व सिंधुदुर्ग या जिल्ह्यांना जोडणाऱ्या घाट रस्त्याला राष्ट्रीय वन्यजीव मंडळाची दुसऱ्या टप्प्याची मंजुरी प्रलंबित होती, आजच्या बैठकीत यास मंजुरी देण्यात आली. यासह अमरावती जिल्ह्यातील मेळघाट या वनाच्छादित व आदिवासीबहुल भागातील चौराकुंड-खोपण-खोलमार रोड पासिंगच्या कामासह करंजखेडा-हातरू-राजपूर-सेमाडोह या 16 किलोमीटर रोड पासिंगला मंजुरी देण्यात आली आहे. मेळघाट व्याघ्र प्रकल्पाच्या कोअर भागातून जाणाऱ्या या रस्त्यांचे काँक्रिटीकरण राष्ट्रीय वन्यजीव मंडळाच्या परवानगीअभावी अपूर्ण होते.

चंद्रपूर जिल्ह्यातील राजगड-पुगलर ट्रान्समिशन लाईन आणि निमगाव लघु पाटबंधाऱ्याच्या कामालाही आजच्या बैठकीत मंजुरी देण्यात आली.

या बैठकीत महाराष्ट्रासह आंध्र प्रदेश, उत्तराखंड आणि मध्य प्रदेशातील प्रकल्पांनाही मंजुरी देण्यात आली.

मुंबई: मुंबई शहर व उपनगराला पाणीपुरवठा करणाऱ्या तलावातील उपयुक्त साठ्यामध्ये आतापर्यंत सुमारे 50 टक्क्यापर्यंत वाढ झाली आहे. त्यामुळे बृहन्मुंबई महानगरपालिकेने गेल्या वर्षीपासून शहरात उपनगरामध्ये केलेली 10 टक्के पाणीकपात तसेच पाणीपुरवठ्याच्या वेळेतील कपात रद्द करावी, अशी सूचना नगरविकास राज्यमंत्री योगेश सागर यांनी केली आहे.

मुंबई शहर व उपनगराला पाणीपुरवठा करणाऱ्या तलावामध्ये गेल्या वर्षी पाणीसाठा कमी झाला होता. त्यामुळे मुंबई महानगरपालिकेने पाणी पुरवठ्यामध्ये 10 टक्के कपात केली होती. तसेच पाणीपुरवठ्याच्या वेळेतही 15 टक्के कपात केली आहे. त्यामुळे उपनगरातील नागरिकांना अडचणी निर्माण होत आहेत. पाणीकपात रद्द व्हावी, याविषयी नगरविकास राज्यमंत्री श्री. सागर यांनी वारंवार पाठपुरावा केला होता.

श्री. सागर म्हणाले की, यंदा जून व जुलै महिन्यात पडलेल्या पावसामुळे तलावातील उपयुक्त जलसाठा साधारणपणे 50 टक्क्यापर्यंत झाला आहे. अद्याप सप्टेंबरपर्यंत सुमारे 57 दिवस पावसाचे आहेत. या काळात समाधानकारक पाऊस पडल्यास पाणीसाठ्यात वाढ होईल. गेल्या वर्षी पाणीटंचाईमुळे महानगरपालिकेने पाणीपुरवठ्यात कपात केली होती. मुंबईतील विशेषतः उपनगरातील नागरिकांना या कपातीचा त्रास होत आहे. यंदाच्या पुरेशा साठ्यामुळे महानगरपालिकेने केलेली ही कपात तातडीने रद्द करून पूर्वीप्रमाणे पाणीपुरवठा करावा आणि उपनगरातील नागरिकांना दिलासा द्यावा, अशी मागणीही त्यांनी यावेळी केली.

मुंबई : भंडारा येथे धानाच्या तणसापासून इथेनॉल आणि सीएनजी निर्मिती च्या प्रकल्प उभारणीसंदर्भात नुकतीच मुख्यमंत्री देवेंद्र फडणवीस यांच्या अध्यक्षतेखाली बैठक पार पडली. लवकरच हे दोन्ही प्रकल्प उभारणीचे काम सुरु होणार असल्याची माहिती भंडारा आणि गोंदिया जिल्ह्याचे पालकमंत्री तथा राज्यमंत्री डॉ. परिणय फुके यांनी मंत्रालयात आयोजित पत्रकार परिषदेत दिली.

डॉ. फुके यांनी पत्रकार परिषदेत सांगितले, मकरधोकडा येथे जमीन उपलब्ध करून देण्याबाबत निर्णय घेण्यात आला असून याबाबत आवश्यक ती कार्यवाही जिल्हाधिकारी यांच्यामार्फत केली जाणार आहे. महाराष्ट्र औद्योगिक विकास महामंडळ अर्थात एमआयडीसी यासाठी सर्व सहकार्य करणार आहे. या प्रकल्पामुळे बायो इथेनॉल निर्मिती होणार असून मोठ्या प्रमाणात रोजगार निर्मिती होईल. याशिवाय या परिसरातील धान उत्पादक शेतकऱ्यांना मोठा फायदा होणार आहे.

अशाच पद्धतीचे भारतात 12 प्रकल्प उभारण्यात येत असून त्यापैकी 4 प्रकल्प कार्यान्वित होत आहेत. या प्रकल्पासाठी जनावरांचा चारा वगळून मोठ्या प्रमाणात तणस उपलब्ध आहे. 3.84 लाख टन तणस भंडारा जिल्ह्यात तर गोंदिया जिल्ह्यात 3.46 लाख टन तणस उपलब्ध आहे. हे सर्व जाळले जात असून आता त्यापासून इथेनॉल व गॅसची निर्मिती होणार आहे. या प्रकल्पासाठी अत्याधुनिक असे तंत्रज्ञान भारत पेट्रोलियम उपलब्ध करून देणार आहे. सद्यस्थितीत भारतात एकूण पेट्रोल व डिझेलमध्ये मिश्रण करण्यास 1 टक्कासुद्धा इथेनॉल उपलब्ध नाही त्यामुळे अशा प्रकल्पाची देशाला गरज आहे अशी माहिती डॉ. फुके यांनी यावेळी दिली.

आदिवासी विकास विभागाची माहिती मिळण्यासाठी डॅशबोर्ड तयार करणे, आदिवासी विद्यार्थ्यांना विमा कवच उपलब्ध करुन देणे, वन परिक्षेत्रात राहणाऱ्यांसाठी रोजगार प्रशिक्षण कार्यक्रम तयार करणे, वन्यजीव संरक्षणासाठी उपाययोजना करणे, गोरेवाडा प्राणी संग्रहालयाच्या पहिल्या टप्प्याचे काम 15 ऑगस्टपूर्वी पूर्ण करणे अशी विविध कामांना गती देण्यात येत असल्याची माहिती डॉ. फुके यांनी पत्रकार परिषदेत दिली.

कराड (प्रतिनिधी) – महाराष्ट्रातील वृत्तपत्रांची निकोप वाढ व्हावी यासाठी महाराष्ट्र शासनाने जाहिरात धोरण निश्चित केले आहे. दरम्यान यामधील बहुतांश अटी व शर्ती लघु व मध्यम वृत्तपत्रांसाठी जाचक असल्याने यामध्ये सुधारणा करून शुद्धीपत्रक प्रसिद्ध करावे यासाठी शासनस्तरावर प्रयत्न सुरू असल्याची माहिती असोसिएशन ऑफ स्मॉल अँड मिडीयम न्यूज पेपर्स ऑफ इंडियाचे महाराष्ट्र प्रदेशाध्यक्ष अाप्पासाहेब पाटील यांनी दिली.

लघु व मध्यम वृत्तपत्रांचे प्रश्न, समस्या जाणून घेण्यासाठी कराडमधील विश्रामगृहामध्ये आयोजित केलेल्या बैठकीमध्ये त्यांनी ही माहिती दिली. यावेळी निवृत्त जिल्हा माहिती अधिकारी रंगराव शिंपुकडे, संघटन सचिव गोरख तावरे, खंडू इंगळे, अजित भिलारे, कृष्णत घाडगे, संतोष शिंदे, उध्दव बाबर, शामराव अहिवळे, रघुनाथ कुंभार, विश्चासराव पानवळ, शंकर शिंदे, प्रकाश पिसाळ, धनंजय सिंहासने उपस्थित होते.

नव्याने जाहीर झालेल्या शासकीय संदेश प्रसारण धोरण २०१८ मध्ये सुधारित नियमावली पुन्हा प्रसिद्ध करावी यासाठी हरकती, दुरुस्ती व सूचना असणारे निवेदन मुख्यमंत्री देवेंद्र फडणवीस, माहिती व जनसंपर्क महासंचालनालयाचे महासंचालक ब्रिजेश सिंह यांना देण्यात आले आहे. महाराष्ट्र राज्यात शासनामार्फत सर्व स्तरावरून देण्यात येणाऱ्या जाहिरातीच्या वितरणात सुसूत्रता यावी, त्यात स्वेच्छाधिकाराला कोणत्याही पातळीवर वाव राहु नये, वितरण पारदर्शक असावे. सर्व वर्गातील वृत्तपत्रांची निकोप वाढ होऊन त्या सर्वांना न्याय मिळेल अशा प्रकारचे जाहिरात धोरण असावे. यासाठी असोसिएशन ऑफ स्मॉल अँड मिडीयम न्यूज पेपर्स ऑफ इंडिया या संघटनेच्या माध्यमातुन प्रयत्न केला जात आहे असे ही प्रदेशाध्यक्ष अाप्पासाहेब पाटील यांनी सांगितले.

लघु व मध्यम वृत्तपत्रांबरोबरच जिल्हास्तरावरील दैनिक व साप्ताहिक शासनाच्या योजनांना ठळक प्रसिद्धी देत असतात. याचा विचार करून शासकीय संदेश प्रसारण धोरणाबाबत घेतलेल्या हरकती, दुरुस्ती व सूचनांचा सकारात्मक विचार शासनाने करावा अशी मागणी रंगराव शिंपुकडे यांनी केली. संघटितपणे संपादकांनी एकत्रितपणे राहुन वृत्तपत्र वाढीसाठी आणि आपल्या हक्काच्या जाहिराती मिळवण्यासाठी सहकार्य करावे असे आवाहन नवनियुक्त जिल्हाध्यक्ष खंडु इंगळे यांनी केले.

सर्व उपस्थित संपादकांनी शासकिय जाहिराती जादा प्रमाणात कशा मिळवाव्यात ? शासकिय धोरण काय आहे ? संघटना देशात व राज्यात कशा पद्धतीने काम करते ? अशा विविध प्रश्नाबरोबर वृत्तपत्र प्रसिद्ध करताना येणाऱ्या अडचणी मांडल्या. अप्पासाहेब पाटील यांनी सर्व संपादकांना सविस्तर माहिती दिली. प्रदेशाध्यक्ष आप्पासाहेब पाटील यांचे स्वागत खंडू इंगळे यांनी तर रंगराव शिंपुकडे यांचे स्वागत उद्धव बाबर, कृष्णात घाडगे यांनी केले. प्रास्ताविक व स्वागत गोरख तावरे यांनी केले. तर शेवटी आभार शंकर शिंदे यांनी मानले.

कराड (प्रतिनिधी) – सातारा जिल्ह्यातील शासकीय कार्यालये, स्थानिक स्वराज्य संस्था, शासन पुरस्कृत सहकारी संस्था यांच्याकडून वितरित होणाऱ्या जाहिराती वृत्तपत्रांना शासकीय नियमानुसार समप्रमाणात दिल्या गेल्या पाहिजेत, सातारा जिल्ह्यातील वृत्तपत्रांचे प्रश्न सोडविण्यासाठी प्रयत्न करणार असल्याचे असोसिएशन ऑफ स्मॉल अँड मिडीयम न्यूज पेपर्स ऑफ इंडियाचे नवनियुक्त सातारा जिल्हाध्यक्ष खंडु इंगळे यांनी मत व्यक्त केले.

असोसिएशन ऑफ स्मॉल अँड मिडीयम न्यूज पेपर्स ऑफ इंडिया या संघटनेची सातारा जिल्हा कार्यकारणीची बैठक नुकतीच कराड येथे शासकिय विश्रामगृहात संघटनेचे प्रदेशाध्यक्ष आप्पासाहेब पाटील, निवृत्त जिल्हा माहिती अधिकारी रंगराव शिंपुकडे, संघटन सचिव गोरख तावरे यांच्या उपस्थितीत पार पडली. यावेळी सातारा जिल्हा कार्यकारणी जाहीर करण्यात आली आहे.

असोसिएशन ऑफ स्मॉल अँड मिडीयम न्यूज पेपर्स ऑफ इंडियाच्या सातारा जिल्हा अध्यक्षपदी खंडू इंगळे (कराड), कार्याध्यक्ष अजित भिलारे (सातारा), उपाध्यक्ष कृष्णत घाडगे (वाई), सचिव संतोष शिंदे (कराड ), समन्वयक उध्दव बाबर (सातारा) प्रदेशाध्यक्ष अप्पासाहेब पाटील यांनी प्रत्येक पदाधिकार्याला नियुक्तीपत्र दिले. गोरख तावरे (कराड), बापूसाहेब जाधव (सातारा), अनिल देसाई (सातारा), शामराव अहिवळे (फलटण) यांना सल्लागार म्हणून काम करण्याची विनंती करण्यात येणार आहे. तर दैनिक व साप्ताहिकांच्या संपादकांना कार्यकारिणी सदस्य म्हणून नियुक्त केले जाणार आहे.

असोसिएशन ऑफ स्मॉल अँड मिडीयम न्यूज पेपर्स ऑफ इंडिया ही देशपातळीवर वृत्तपत्रांच्या प्रश्नांसाठी काम करणारी संघटना आहे. केंद्र शासनाच्या माहिती व प्रसारण मंत्रालय अंतर्गत असणाऱ्या प्रेस कौन्सिल ऑफ इंडिया व आरएनआय यावर प्रतिनिधीत्व करणारी ही संघटना आहे. असोसिएशन ऑफ स्मॉल अँड मिडीयम न्यूज पेपर्स ऑफ इंडियाच्या सातारा जिल्ह्यातील बैठकीसाठी शामराव अहिवळे (फलटण ), रघुनाथ कुंभार (सातारा), विश्चासराव पानवळ (उंब्रज), कृष्णात घाडगे (वाई) उद्धव बाबर (सातारा), अजित भिलारे (सातारा), शंकर शिंदे (कराड), प्रकाश पिसाळ (कराड), संतोष शिंदे (कराड), धनंजय सिंहासने (कराड) उपस्थित होते.