मुळशी तालुक्यात रिहे खोऱ्यातील गावांचा वीजपुरवठा सुरु

पुणे,  : मुळशी धरणातील तब्बल 38 हजार क्युसेस पाण्याचा मुळा नदीतून विसर्ग सुरु असताना प्रवाहाच्या उलट्या दिशेने जात महापुरातील रोहित्राचा वीजपुरवठा मुख्य वीजवाहिनीमधून बंद करून रिहे खोऱ्यातील 10 गावांचा वीजपुरवठा सुरळीत करण्याची कामगिरी करीत महावितरणच्या मुळशी येथील जिगरबाज अभियंते व कर्मचाऱ्यांनी महापुरातही ग्राहकसेवेच्या बांधिलकीचा प्रत्यय दिला.

याबाबत माहिती अशी, की पूरस्थितीमुळे मुळशी धरणातून मुळा नदीत पाण्याचा मोठ्या प्रमाणावर विसर्ग सुरु आहे. मुळशी तालुक्यातील घोटावडे पुलाजवळ असलेले रोहित्र पुराच्या पाण्यात बुडाल्याने पुढील धोका टाळण्यासाठी रिहे 22 केव्ही वाहिनीचा वीजपुरवठा महावितरणकडून रविवारी (दि. 4) दुपारी बंद करण्यात आला. परिणामी रिहे खोऱ्यामधील रिहे, शेळकेवाडी, घोटावडे, जवळ, कातरखडक, खांबवळी, पिंपोळी आदी 10 गावांचा वीजपुरवठा सुद्धा बंद झाला होता.

पूरस्थितीमुळे रिहे खोऱ्यातील गावांचा पौंड व पिरंगुट गावांशी संपर्क तुटला होता. दुर्गम भागात असलेल्या या गावांना वीजपुरवठा खंडित झाल्यामुळे अ़डचणींना तोंड द्यावे लागत होते. त्यामुळे मुळशी उपविभागाचे उपकार्यकारी अभियंता फुलचंद फड, सहाय्यक अभियंता बी. एस. वावरे व सहकाऱ्यांनी युद्धपातळीवरून पर्यायी व्यवस्थेतून या 10 गावांना वीजपुरवठा सुरु करण्याचे प्रयत्न सुरु केले. मात्र नदीच्या पुरामध्ये बुडालेल्या रोहित्राचा वीजपुरवठा मुख्य वीजवाहिनीपासून खंडित करणे व संभाव्य धोके टाळणे अतिशय आवश्यक होते. त्याशिवाय रिहे खोऱ्यातील गावांचा वीजपुरवठा पूर्ववत करणे शक्य नव्हते.

त्यानंतर रविवारी सायंकाळी महावितरणकडून मुळशी आपत्ती व्यवस्थापन पथकाच्या सहकार्यासाठी तहसीलदार श्री. अभय चव्हाण यांच्याशी संपर्क साधण्यात आला. त्यांना परिस्थितीची माहिती दिल्यानंतर महापुरात बोटीने जाऊन रोहित्राचा मुख्य वीजवाहिनीपासून वीजपुरवठा खंडित करण्याची मोहीम आखण्यात आली. सोमवारी (दि. 5) सकाळी 10 वाजता आपत्ती व्यवस्थापनाचे पथक बोटीसह सज्ज झाले. मुळा नदीत यावेळी 32 हजार क्युसेस पाणी प्रवाहित होत असताना तसेच प्रवाहाच्या उलट्या दिशेला रोहित्र असल्याने ही अतिशय प्रतिकूल परिस्थिती होती. मात्र महावितरणचे जनमित्र राहुल मालपोटे व शुभम ढिले यांनी हे आव्हान स्विकारले. आपत्ती व्यवस्थापनाच्या टीमसोबत बोटीने या दोघांनी महापुराचे सुमारे पाऊण किलोमीटर अंतर कापले. मुसळधार पाऊस सुरु असताना राहुल मालपोटे यांनी रोहित्राच्या खांबावर चढून मुख्य वीजवाहिनीपासून वीजपुरवठा खंडित केला. 10 गावांच्या वीजपुरवठ्यासाठी महत्वाची कामगिरी करून हे पथक सुरक्षितपणे परतले. त्यानंतर महावितरणच्या कर्मचाऱ्यांनी रिहे 22 केव्ही वाहिनीचा वीजपुरवठा सुरु केला व रिहे खोऱ्यातील गावे अवघ्या 24 तासांच्या आत पुन्हा प्रकाशमान झाले.

महावितरणच्या ग्राहकसेवेसाठी महापुरातही बांधिलकी दाखविणारे जिगरबाज अभियंते फुलचंद फड, बी. एस. वावरे, जनमित्र राहुल मालपोटे व शुभम ढिले यांना आपत्ती व्यवस्थापनाच्या पथकातील प्रमोद बलकवडे, ओंकार बलकवडे, सनी शिर्के, नागेश धनवे, गौरव धनवे, शुभम धनवे, विष्णू गोडांबे, अमोल खानेकर, भरत गुप्ता यांनी मोलाचे सहकार्य केले. या सर्वांचे प्रभारी प्रादेशिक संचालक श्री. सुनील पावडे यांनी कौतुक केले. तर पुणे परिमंडलाचे मुख्य अभियंता श्री. सचिन तालेवार, पुणे ग्रामीण मंडलचे अधीक्षक अभियंता श्री. राजेंद्र पवार यांनी प्रत्यक्ष मुळा नदीच्या ठिकाणी जाऊन महावितरणचे अभियंते व कर्मचाऱ्यांना शाबासकीची थाप दिली व कौतुक केले. मुळशीचे कार्यकारी अभियंता श्री. रवींद्र बुंदेले यांनी ही कामगिरी यशस्वी करण्यासाठी मार्गदर्शन केले.

पुणे  : पुणे जिल्हयात झालेल्या अतिवृष्टीमुळे  नद्यांना पूर आला आहे. त्यामुळे बहुतांश धरणातून विसर्ग सुरू आहे. नुकसान झालेल्या भागात पंचनामे करून अहवाल सादर करा, नुकसानग्रस्तांना शासनाच्या निकषाप्रमाणे मदत केली जाईल. आपत्तीच्या काळात जिल्हयातील सर्व यंत्रणांनी समन्वय  ठेवत सतर्क रहावे, असे निर्देश महसूल, सार्वजनिक बांधकाम मंत्री तथा पालकमंत्री चंद्रकांत (दादा) पाटील यांनी आज दिले.

पुणे जिल्हयात अतिवृष्टीमुळे निर्माण झालेल्या परिस्थितीची पाहणी करण्यासाठी पालकमंत्री श्री. पाटील पुणे जिल्हयाच्या दौ-यावर आले होते. बालेवाडी येथील श्री. शिवछत्रपती क्रिडा संकुल सभागृहात पूरस्थितीचा त्यांनी आढावा घेतला. त्यावेळी ते बोलत होते. यावेळी कामगार, पर्यावरण, मदत व पुनर्वसन ,भूकंप पुनर्वसन संजय (बाळा ) भेगडे, महापौर मुक्ता टिळक, पिंपरी चिंचवडचे महापौर राहुल जाधव,  सर्वश्री आमदार बाबुराव पाचरणे,  राहुल कुल, योगेश टिळेकर, लक्ष्मण जगताप, महेश लांडगे, विभागीय आयुक्त डॉ. दिपक म्हैसेकर, जिल्हाधिकारी नवल किशोर राम, पुणे मनपा आयुक्त सौरभ राव, पिंपरी चिंचवड आयुक्त श्रावण हर्डीकर, जिल्हा पोलिस अधिक्षक संदीप पाटील यांच्यासह सबंधित विभागाचे अधिकारी उपस्थित होते.

पालकमंत्री पाटील म्हणाले, पुणे जिल्हयातील बहुतांश धरणे भरली आहेत. धरणक्षेत्रात पाऊस सुरूच आहे, आणखी दोन दिवस सतर्कतेचा इशारा देण्यात आला आहे. त्यामुळे या कालावधीत धरणांचे सनियंत्रण करावे, आरोग्य विभागाने दक्ष राहावे, आवश्यक त्या लशीसह औषधांचा पुरेसा साठा ठेवावा, गरजेप्रमाणे औषधांची मागणी तातडीने नोंदवावी,  सार्वजनिक बांधकाम विभागाने रस्त्यांची तातडीने दुरूस्ती करावी, तसेच पुलांचे स्ट्रक्चरल ऑडिट करून त्यासंबंधिचा अहवाल सादर करावा. असुरक्षित रस्ते, पुल बंद करा, कोणतीही दुर्घटना होणार नाही, याबाबतची काळजी घ्यावी, पुणे जिल्हयात पुढील दोन दिवस पावसाचा जोर राहील, असा अंदाज वेध शाळेने वर्तविला आहे.  त्यामुळे नागरिकांनी प्रशासनाला सहकार्य करावे, प्रशासन वेळोवेळी करत असलेल्या आवाहनाला प्रतिसाद द्यावा, असे आवाहन पालकमंत्री  श्री. पाटील यांनी केले.

राज्यमंत्री भेगडे यांनी मेट्रो प्रकल्पाचे काम सुरू आहे, त्या ठिकाणी पाण्याचा साठा होवून खोळंबा होणार नाही, याची प्रशासनाने दक्षता घ्यावी, अशी सूचना केली.

जिल्हाधिकारी श्री. राम म्हणाले, पुणे जिल्हयात 917.48 मिलीमीटर पाऊस झाला आहे. बारामती, इंदापूर, दौंड व पुरंदर वगळता उर्वरित सर्वच तालुक्यात अतिवृष्टीची परिस्थिती आहे. पुणे व पिंपरी चिंचवड शहरातून तीन मोठया नद्या वाहत आहेत, त्यामुळे योग्य दक्षता घेतली जात आहे. पुरस्थितीमुळे आतापर्यंत 3 हजार 343 कुटुंबाला स्थलांतरीत करण्यात आले असून यामध्ये 13 हजार 336 नागरिकांचा समावेश आहे. आपत्ती कालावधीत सर्व प्रशासकीय यंत्रणा सतर्क असून पूरबाधीत व्यक्तींचे पंचनामे करून नुकसान भरपाई त्यांच्या खात्यावर जमा करण्यात येईल, असे सांगून पुणे महानगरपालिका, पिंपरी चिंचवड महानगरपालिका आणि जिल्हा प्रशासन समन्वयाने काम करीत असल्याचे जिल्हाधिकारी श्री. राम यांनी सांगितले.

पुणे महानगरपालिकेचे आयुक्त सौरभ राव यांनी मनपार्फे करण्यात आलेल्या उपायायोजनांची माहिती दिली. भोजन, निवास व्यवस्था व स्वच्छता आदींची व्यवस्था करण्यात आल्याचे त्यांनी सांगितले.

यावेळी आपत्ती व्यवस्थापनाशी सबंधित सर्व विभागाचे प्रमुख अधिकारी उपस्थित होते.

लोणावळा, सांगवी व पिंपळेनिलख येथे भेट

लोणावळा येथे अतिवृष्टीमुळे झालेल्या दुर्घटनेत मयत झालेल्या व्यक्तींच्या नातेवाईकांची भेट घेऊन पालकमंत्री चंद्रकांत पाटील यांनी सांत्वन केले. यावेळी पुनर्वसन राज्य मंत्री संजय (बाळा) भेगडे, जिल्हाधिकारी नवल किशोर राम, जिल्हा परिषदेचे मुख्य कार्यकारी अधिकारी उदय जाधव, लोणावळ्याच्या नगराध्यक्ष सुरेखा जाधव, उपनगराध्यक्ष श्रीधर पुजारी, उप विभागीय अधिकारी संजय भागडे, लोणावळा नगर परिषदेचे मुख्याधिकारी सचिन पवार तसेच पाटबंधारे, सार्वजनिक बांधकाम विभागाचे अधिकारी व लोकप्रतिनिधी उपस्थित होते.

लोणावळ्यातील हनुमान टेकडी येथे भिंत पडून कुणाल अजय दोडके या 12 वर्षाच्या मुलाचे निधन झाले होते. भांगरवाडी येथे भिंत पडून जयप्रकाश जगन्नाथ नायडू (42 वर्षे) यांचे निधन झाले. पालकमंत्री श्री. पाटील यांनी त्यांच्या कुटुंबियांची भेट घेवून सांत्वन केले. तसेच कुटुंबियांना आर्थिक मदतीचा धनादेश यावेळी प्रदान केले. तत्पूर्वी, परमार हॉस्पिटलमध्ये जाऊन जखमी मुलगी नंदिनी अजय दोडके हिची भेट घेऊन विचारपूस केली. तसेच सांगवी व पिंपळेनिलख भागातील पूरबाधितांच्या भेटी घेवून तेथील परिस्थितीची माहिती घेतली.

पुणे : जम्मू-काश्मीरला विशेष दर्जा देणारे कलम ३७० हटविण्याच्या, तसेच जम्मू-काश्मीरच्या पुनर्रचनेच्या निर्णयाचे स्वागत रिपब्लिकन पार्टी ऑफ इंडियाकडून (A) पेढे वाटून करण्यात आले. केंद्र सरकारने उचलेले हे धाडसी पाऊल असून, यामुळे काश्मिरी जनता खऱ्या अर्थाने डॉ. बाबासाहेब आंबेडकरांनी दिलेल्या भारतीय संविधानाच्या अखत्यारीत येईल आणि तेथील जनतेचा विकास होईल, असा आशावाद व्यक्त करीत रिपब्लिकन पक्षाच्या पदाधिकाऱ्यांनी, कार्यकर्त्यानी जिल्हाधिकारी कार्यालय येथे आनंदोत्सव साजरा केला.

यावेळी उपमहापौर डॉ. सिद्धार्थ धेंडे, रिपब्लिकन पार्टी ऑफ इंडिया (A) पुणे शहर अध्यक्ष अशोक कांबळे, प्रदेश सचिव बाळासाहेब जानराव, पश्चिम युवक आघाडीचे अध्यक्ष परशुराम वाडेकर, मातंग आघाडीचे प्रदेशअध्यक्ष हनुमंत साठे, अल्पसंख्याक आघाडीचे अध्यक्ष ऍड. अयुब शेख, संपर्कप्रमुख अशोक शिरोळे, शैलेंद्र चव्हाण, कार्याध्यक्ष बसवराज गायकवाड, संजय सोनावणे, सचिव महिपाल वाघमारे, बाबुराव घाडगे आदी उपस्थित होते.

डॉ. सिद्धार्थ धेंडे म्हणाले, “केंद्र सरकारने घेतलेला हा निर्णय ऐतिहासिक आहे. जम्मू-काश्मीर, लडाख यांना वेगळे करून तेथील नागरिकांना स्वायत्तता देण्याचा प्रयत्न सरकारने केला आहे. काश्मीर भारताचा अविभाज्य घटक असून, तो यापुढेही भारताचा भाग राहणार आहे, हे दाखवून देणारा हा निर्णय आहे. आता तेथे उद्योगधंदे, शैक्षणिक संस्था, कंपन्या आणि पायाभूत सुविधा उभ्या राहतील. पुणे शहराच्या वतीने या निर्णयाचे स्वागत करून पंतप्रधान नरेंद्र मोदी, गृहमंत्री अमित शहा यांना धन्यवाद देतो.”

बाळासाहेब जानराव म्हणाले, “या निर्णयामुळे जम्मू काश्मीरच्या लोकांना न्याय मिळेल. इतर राज्यातील लोकांप्रमाणे त्यांनाही उद्योग, व्यवसायाच्या संधी समान प्रमाणात मिळतील. त्यांचा विकास होईल. रिपब्लिकन पक्षाच्या वतीने केंद्र सरकारचे अभिनंदन करतो.” ऍड. अयुब शेख म्हणाले, “या ऐतिहासिक निर्णयाचे स्वागत करतो. या धाडसी निर्णयामुळे जम्मू-काश्मीर, लडाखचा विकास होईल. तेथील तरुणांना रोजगार मिळतील. नरेंद्र मोदी यांनी ‘सबका साथ, सबका विकास आणि सबका विश्वास’ या संकल्पाला सत्यात आणले आहे.”

पुणे : पुणे जिल्ह्यात गेल्या १०-१२ दिवसांपासून पडत असलेल्या मुसळधार पावसामुळे जनजीवन विस्कळीत झाले आहे. जिल्ह्यातील सर्वच धरणे तुडुंब भरले असून, त्यातून मोठ्या प्रमाणात विसर्ग करण्यात येत आहे. परिणामी नद्यांना पूर आला असून, पाणी नागरी वस्त्या, झोपडपट्यांमध्ये शिरले आहे. परिणामी हजारो नागरिकांचे अतोनात हाल होत असून, अनेकजण अंगावरच्या कपड्यांनिशी विस्थापित झाले आहे. या पूरग्रस्तांना प्रशासनाने तातडीची मदत करावी, अशा मागणीचे निवेदन रिपब्लिकन पार्टी ऑफ इंडियाच्या (A) वतीने देण्यात आले.

निवासी जिल्हाधिकारी जयश्री कटारे यांनी हे निवेदन स्वीकारत तातडीने आदेश देऊन पंचनामे करण्यास सुरुवात केली आहे. रिपब्लिकन पक्षाच्या वतीने निवासी जिल्हाधिकाऱ्यांना भेटलेल्या शिष्टमंडळात पुण्याचे उपमहापौर डॉ. सिद्धार्थ धेंडे, रिपब्लिकन पार्टी ऑफ इंडिया (A) पुणे शहर अध्यक्ष अशोक कांबळे, प्रदेश सचिव बाळासाहेब जानराव, पश्चिम युवक आघाडीचे अध्यक्ष परशुराम वाडेकर, मातंग आघाडीचे प्रदेशअध्यक्ष हनुमंत साठे, अल्पसंख्याक आघाडीचे अध्यक्ष ऍड. अयुब शेख, संपर्कप्रमुख अशोक शिरोळे, शैलेंद्र चव्हाण, कार्याध्यक्ष बसवराज गायकवाड, संजय सोनावणे, सचिव महिपाल वाघमारे, बाबुराव घाडगे आदी उपस्थित होते.

मुसळधार पडत असलेल्या पावसामुळे नागरिकांची दाणादाण उडाली असून, सरकारी शाळा, धार्मिक स्थळे, समाज मंदिरे अशा ठिकाणी आश्रय घेतला आहे. शहरातील येरवडा, शांतीनगर, आदर्शनगर, इंदिरानगर, बोपोडी, औंध, कामगार पुतळा, पाटील इस्टेस्ट, म्हात्रे पूल, सिंहगड रास्ता, एरंडवणा, ताडीवाला रस्ता यासह नदी काठाच्या अनेक भागातील घरांमध्ये पाणी घुसले आहे. जवळपास ४-५ हजार नागरिक विस्थापित झाले आहेत. प्रशासनाने अद्यापही म्हणावी तशी दखल घेतली नसून, आपद्ग्रस्त नागरिकांना मदत मिळालेली नाही. प्रशासनाने त्वरित पाहणी करून आपद्ग्रस्तांना नागरी सुविधा व जीवनावश्यक वस्तू उपलब्ध करून द्याव्यात, तसेच ५० हजार ते एक लाखापर्यंत आर्थिक मदत द्यावी, अशी मागणी निवेदनात करण्यात आली आहे.

-विभागीय आयुक्त डॉ. दिपक म्हैसेकर

-मदत व पुनर्वसनासाठी एन.डी.आर.एफ चे पथक

पुणे : मागील चार दिवसांपासून सतत कोसळणाऱ्या पावसामुळे पुणे विभागातील पुणे, सांगली, कोल्हापूर व सातारा या जिल्हयातील नद्या दुथडी भरुन वाहत असून बहुतांशी भागास पुराचे स्वरुप प्राप्त झाले आहे. पुरामुळे बाधित पुणे विभागातील ४ हजार ७१२ कुटुंबातील १८ हजार ६७० नागरिकांना आतापर्यंत सुरक्षित ठिकाणी हलविण्यात आले आहे. पूर परिस्थितीत मदत व पुनर्वसनासाठी पुणे, सांगली, कोल्हापूर या जिल्ह्यात एनडीआरएफ चे पथक दाखल झाले आहे, अशी माहिती पुणे विभागीय आयुक्‍त डॉ. दिपक म्हैसेकर यांनी दिली.

सतत कोसळणारा पाऊस आणि धरणातून सोडण्यात येणाऱ्या विसर्गामुळे नद्यांना पुराचे स्वरुप आले आहे. पुणे जिल्हयातील पवना, इंद्रायणी, मुळा, मुठा या नद्या दुथडी भरुन वाहत आहेत. कोल्हापूर जिल्ह्यातील पंचगंगा, वारणा, कृष्णा यासोबतच अन्य सर्व नद्यांना पुर आला आहे. सांगली जिल्ह्यातील कृष्णा, कोयना तर सातारा जिल्हयातील कृष्णा, कोयना, तारळी, उरमोडी या नद्यांना पूर आला आहे. पुणे महसूल विभागात आतापर्यंत १२५.४० टक्‍के पाऊस झाला असून सर्वाधिक पाऊस सांगली जिल्ह्यात १९९.२० टक्के झाला आहे. पुणे जिल्ह्यात १५८ टक्के, कोल्हापूर जिल्ह्यात ९९ टक्‍के तर सातारा जिल्ह्यात १५९ टक्‍के तसेच सोलापूर जिल्ह्यात ७८ टक्के पावसाची नोंद झाली आहे. पूर परिस्थितीबाबत प्रशासन दक्ष असून संबंधित सर्व विभाग सतर्क राहून कार्यरत आहेत.

पुणे – मुळा, मुठा व पवना या नदया पुणे शहरातून जात असल्यामुळे शहरात पूर परिस्थिती निर्माण झाली आहे. पुणे जिल्ह्यातील सुमारे २ हजार ४०५ कुटुंबातील ८ हजार ८४२ नागरिकांना सुरक्षित ठिकाणी हलविण्यात आले आहे. पुणे व पिंपरी-चिंचवड परिसरातील जुनी सांगवी, दापोडी, रहाटणी, वाकड, रावेत, पिंपरी या परिसरातील काही भाग बाधीत झाला आहे. पुणे जिल्ह्यातील खडकवासला, वरसगाव, पानशेत, पवना, निरा-देवघर, चासकमान, मुळशी या धरणातून पाण्याचा विसर्ग सुरु आहे. नदयांच्या काठावरील नागरिकांना सतर्कतेचा इशारा देण्‍यात आला आहे.

सातारा – सातारा जिल्ह्यातील २२६ कुटुंबांतील ९२१ लोकांना सुरक्षित स्थळी हलविण्यात आले आहे. सातारा जिल्ह्यामधील कृष्णा व कोयना नद्यांना पूर आला असून या दोन्ही नदीकाठच्या लोकांना सतर्कतेचा इशारा देण्‍यात आला आहे. कोयना धरणातून १ लाख ३ हजार ६०० क्युसेक्सने पाण्याचा विसर्ग चालू आहे. सातारा जिल्ह्यातील सातारा-लोणंद, जुना सातारा-पुणे, तारगाव-नांदगाव रोड, पाटण-मुळगाव, कराड-तांबवे, उंब्रज- मसूर, वाई- मांढरदेव आदी मार्ग पुरामुळे बंद झाले आहेत. नागरिकांनी पर्यायी मार्गाचा वापर करावा, अशा सूचना देण्‍यात आल्‍या आहेत.

सांगली —कृष्णा व कोयना नदीला आलेल्या पुरामुळे सांगली व मिरज शहरामध्ये पूर परिस्थिती निर्माण झालेली आहे. सांगली जिल्हयातील ९१४ कुटुंबातील ३ हजार ९०७ लोकांना सुरक्षित स्थळी हलविले आहे.

कोल्हापूर — कोल्हापूर जिल्ह्यातील सर्वच नद्या दुतर्फा वाहत असून पंचगंगा नदीने धोक्याची पातळी ओलांडली आहे. पुराने बाधित कोल्हापूर जिल्ह्यातील १ हजार १६७ कुटुंबातील ५ हजार नागरिकांना सुरक्षित स्थळी हलविण्यात आले आहे, असेही डॉ. म्हैसेकर यांनी सांगितले.

सोलापूर –सोलापूर जिल्हयामध्ये पर्जन्यमान कमी आहे. पुणे जिल्हयातील जवळ जवळ सर्व धरणातून पाण्याचा विसर्ग सुरु झाल्यामुळे उजनी धरणाचा पाणी साठा ७३ टक्‍क्‍यांपर्यंत पर्यंत गेला आहे. सोलापूर जिल्हयातील इंद्रायणी नदी किना-यावर राहणा-या नागरिकांना सतर्क राहण्‍याच्या सूचना देण्‍यात आल्या आहेत.

पावसाचा जोर वाढत असल्यामुळे नागरिकांनी आवश्यकता असेल तरच घराबाहेर पडावे, असे आवाहन डॉ. दिपक म्हैसेकर यांनी केले आहे.

पुणे : शेतकऱ्यांना पिकविम्याचे पैसे त्वरित मिळावेत, या मागणीसाठी शिवसेनेच्या वतीने आज (सोमवारी) ओरिएंटल इन्शुरन्स कंपनीवर मोर्चा काढण्यात आला. तेथील अधिकाऱ्यांकडे कोणत्याही प्रकारची कागदपत्रे आणि माहिती नसल्याचे आढळून आले. त्यामुळे शिवसेना नेत्यांनीच त्यांना कागदपत्रे पुरवून पिकविम्याचे पैसे देण्याबाबत जाब विचारला. तब्बल २ लाख शेतकऱ्यांनी जवळपास ६०० कोटीची रक्कम विमा कंपनीकडे आली असूनही, ते शेतकऱ्यांना ती देत नाहीत. याउलट विम्याचे पैसे मागायला आलेल्या शेतकऱ्यांना उद्धटपणे बोलून त्यांना हाकलून दिले जात आहे. सादर कंपनीला पैसे न दिल्यामुळे आयआरडीएनेही दंड केलेला आहे. त्यामुळे शिवसेनेच्या शिष्टमंडळाने अधिकाऱ्यांना समस्यांचे गांभीर्य समजावून सांगण्याचा प्रयत्न केला आहे. पुढील सात दिवसात सर्व शेतकऱ्यांना थकीत रक्कम मिळेल, असे आश्वासन ओरिएंटल इन्शुरन्सकडून मिळाले असल्याचे पुणे जिल्हा शिवसेना संपर्कप्रमुख बाळा कदम यांनी सांगितले आहे. या मोर्चामध्ये रवींद्र मिर्लेकर, माजी आमदार चंद्रकांत मोकाटे महादेव बाबर,शहर समन्वयक आनंद दवे यांच्यासह अनेक नगरसेवक व कार्यकर्ते मोठ्या संख्येने सहभागी झाले होते.

पुणे -धरण क्षेत्रात झालेल्या दमदार पावसामुळे पुणे जिल्ह्यातील धरणे भरली आहेत. धरणातील पाण्याचा विसर्ग सुरु असल्याने नद्यांना महापूर आला आहे. पुढील काही तास हवामान खात्याने अतिवृष्टीचा अंदाज व्यक्त केला असून नागरिकांनी सतर्कता बाळगून प्रशासनाला सहकार्य करावे. असे आवाहन खासदार गिरीश बापट यांनी केले आहे. बापट म्हणाले की,  गेले काही दिवस धरणक्षेत्रात झालेल्या दमदार पावसामुळे जिल्ह्याला पाणीपुरवठा करणारी सर्व धरणे शंभर टक्के भरली असल्याने पाण्याचा विसर्ग वाढवावा लागत आहे.  शेवटची माहिती माझ्याकडे आली तेव्हा खडकवासला धरणातून 45474 क्युसेक्स पाण्याचा विसर्ग करण्यात येत आहे. पाण्याचा प्रचंड प्रवाह असल्याने नदी पात्रालगत असलेल्या पाटील इस्टेट, मंगळवार पेठ, विश्रांतवाडी,शांतीनगर वसाहतीमध्ये पाणी शिरल्यामुळे जवळपास एक हजार बाधित कुटुंबांना अग्नीशमन विभागाच्या कर्मचाऱ्यांनी शाळा, समाज मंदिर अशा सुरक्षित ठिकाणी हलविले आहे. अशी माहिती मला प्राप्त झाली आहे.सध्या संसदेचे अधिवेशन सुरु असून बापट दिल्ली येथे आहेत. तरीही परिस्थितीवर लक्ष ठेऊन महापालिका पदाधिकारी,स्थानिक लोकप्रतिनिधी व प्रशासकीय अधिकाऱ्यांकडून माहिती घेत आहे.  या आपत्कालीन स्थितीमध्ये नागरिकांना प्रशासनाच्या  वतीने सर्वतोपरी मदत केली जात आहे. मात्र नागरिकांनीही प्रशासनाला सहकार्य करावे. आवश्यकता नसल्यास नागरिकांनी घराबाहेर पडू नये. नद्यांची पाणी पातळी जास्त आहे. कोणत्याही क्षणी पाणी पातळी वाढण्याची शक्यता असल्याने पूर पाहण्यासाठी गेलेल्या नागरिकांनी पाण्याजवळ न जाता सुरक्षितता बाळगावी. असे आवाहन बापट यांनी या प्रसिद्धी  माध्यमातून केले आहे.