मुंबई, दि. 8 : राज्यातील पूरग्रस्त भागातील नागरिकांना आरोग्य सेवा देण्यासाठी विभागामार्फत वैद्यकीय पथकांची संख्या वाढविण्यात आली असून सुमारे 325 वैद्यकीय पथके ठिकठिकाणी कार्यरत असल्याचे आरोग्य विभागाने सांगितले.

पूर परिस्थितीनंतर त्या भागात उद्‌भवणाऱ्या साथीच्या आजारांवर मात करण्यासाठी आरोग्य विभागामार्फत नागरिकांना प्रतिबंधात्मक उपाययोजनांसाठी आवाहन करण्यात येत आहे. विभागामार्फत पूरग्रस्त भागात वैद्यकीय पथक पाठविण्यात येत आहेत. त्यामध्ये वैद्यकीय अधिकारी व आरोग्य कर्मचारी असून मोठ्या लोकसंख्येच्या गावात पथकामध्ये दोन महिला कर्मचारी व दोन पुरुष कर्मचाऱ्यांचा समावेश आहे. छोट्या गावांसाठी पथकामध्ये एक महिला व एक पुरुष कर्मचारी ठेवण्यात आला आहे.

औषधोपचाराबरोबरच नागरिकांना निर्जंतुकीकरण केलेल्या पाण्याचा पुरवठा होण्याकरिता ब्लीचिंग पावडर, क्लोरीन टॅब्लेट्‌स, लिक्विड क्लोरीनचा वापर करण्याबाबत संबंधित यंत्रणेला सूचना द्याव्यात.

शहरी व ग्रामीण भागातील घरांमध्ये पाणी शिरल्यामुळे विस्थापित झालेल्या लोकांसाठी शाळा, मंगल कार्यालये, मंदिर आदी ठिकाणी वैद्यकीय पथकामार्फत आरोग्य तपासणी दररोज करावी. गावात सार्वजनिक स्वच्छता करणे, तुंबलेली गटारे साफ करणे, केर कचऱ्याची विल्हेवाट लावणे आदी बाबी ग्राम पंचायतीच्या सहकार्याने करुन घ्यावी, अशी सूचना आरोग्य विभागाने क्षेत्रीय अधिकाऱ्यांना दिल्या आहेत.

पाणी ओसरलेल्या गावात जंतूनाशकाची धुरळणी करावी. जेणेकरुन डास व इतर कीटकांचा प्रादुर्भाव वाढणार नाही. पूर परिस्थितीत पिण्याच्या पाण्याचे निर्जंतुकीकरण करणे काही गावात शक्य नसल्यास जिल्हाधिकाऱ्यांच्या सहकार्याने टँकरच्या सहाय्याने निर्जंतुकीकरण केलेल्या पिण्याच्या पाण्याचा पुरवठा करावा.

घरोघरी सर्वेक्षण करुन जलजन्य आजार अतिसार, गॅस्ट्रो, कावीळ,विषमज्वर तापाचे रुग्ण याबाबतचे सर्वेक्षण करावे. चोवीस तास नियंत्रण कक्ष कार्यरत राहिल याची दक्षता घेतानाच सर्व ठिकाणी औषधांचा साठा उपलब्ध राहील याबाबत नियोजन करावे. ब्लीचिंग पावडर, क्लोरीन टॅब्लेट्‌स, लिक्विड क्लोरीन व अत्यावश्यक औषधांची खरेदी जिल्हा परिषदेच्या निधीतून करण्यात यावी.

पुराच्या पाण्यातून चालत गेलेल्या नागरिकांना ताप आल्यास त्यांनी तातडीने प्राथमिक आरोग्य केंद्रात जावे किंवा गावात कार्यरत असलेल्या वैद्यकीय पथकाकडून आवश्यक उपचार करुन घ्यावेत.दोन महिन्याच्या आतील बालकांना अतिसाराची लागण झाल्यास तातडीने जवळच्या रुग्णालयात दाखल करावे. अशा सूचना देखील आरोग्य विभागाने दिल्या आहेत.

पूरग्रस्त भागात जास्तीच्या वैद्यकीय अधिकारी व कर्मचाऱ्यांची आवश्यकता भासल्यास पूर परिस्थिती नसलेल्या विभागातील वैद्यकीय अधिकारी व कर्मचारी यांची तात्पुरती नियुक्ती करण्यात येईल, असेही आरोग्य विभागामार्फत कळविण्यात आले आहे.

मुंबई, दि. 8 : सांगली जिल्ह्यातील पलूस तालुक्यातील ब्रह्मनाळ गावात पूरग्रस्तांना घेऊन जाणारी बोट उलटून झालेल्या दुर्घटनेबद्दल राज्यपाल चे.विद्यासागर राव यांनी तीव्र दुःख व्यक्त केले आहे.

सांगली जिल्ह्यात अतिवृष्टीने थैमान घातले असताना ब्रह्मनाळ गावात पूरग्रस्तांना घेऊन जाणारी बोट उलटून झालेल्या दुर्घटनेत अनेक निरपराध लोकांना प्राण गमवावे लागले, हे समजून अतिशय वाईट वाटले. सांगलीसह सातारा व कोल्हापूर येथे पूरपरिस्थितीमुळे आणखी काही लोकांना प्राण गमवावे लागले हे दु:खद आहे. सर्व मृत व्यक्तींच्या आप्तेष्टांना मी आपल्या शोकसंवेदना कळवतो, असे राज्यपालांनी आपल्या संदेशात म्हटले आहे.

नवी दिल्ली-जम्मू-काश्मीरला विशेष राज्याचा दर्जा देणारे कलम ३७० रद्द केल्यानंतर पंतप्रधान नरेंद्र मोदी यांनी आज राष्ट्राला संबोधित केले. यावेळी त्यांनी कलम ३७० रद्द करणे का आवश्यक होते ते सांगताना जम्मू-काश्मीर आणि लडाख या दोन नव्या केंद्रशासित प्रदेशाच्या विकासाची रुपरेखा मांडली. यावेळी त्यांनी पाकिस्तानकडून जी आक्रमक भाषा सुरु आहे किंवा त्यांनी जे काही निर्णय घेतले आहेत त्यावर काहीही भाष्य केले नाही.

ते म्हणाले की, एका देश म्हणून, एक कुटुंब म्हणून, तुम्ही-आम्ही एक ऐतिहासिक निर्णय घेतला. एक अशी व्यवस्था ज्यामुळे जम्मू-काश्मीर आणि लडाखमधील नागरिक त्यांच्या अधिकारांपासून वंचित राहीले होते. यामुळे त्यांचा विकास थांबला होता, अशी व्यवस्था आम्ही मोडून काढली आहे. “जे स्वप्न पटेलांचे होते, आंबेडकरांचे होते, श्यामाप्रसाद मुखर्जी, अटलजी आणि कोट्यावधी देशवासियांचे होते, ते स्वप्न आता पूर्ण झाले आहे. जम्मू-काश्मीर आणि लडाखमध्ये एका नव्या युगाची सुरुवात झाली आहे. देशातील सर्व नागरिकांना समान हक्क मिळायला हवेत. मी काश्मीर, लडाख आणि देशातील प्रत्येक नागरिकांना मनातून शुभेच्छा देतो.

ते पुढे म्हणाले- “काही गोष्टी वेळेनुसार इतक्या मिसळतात की, त्या आपल्या मनात घर करुन बसतात. कलम 370 बद्दल असेच झाले होते. त्याने जम्मू-काश्मीर आणि लडाखमध्ये जे नुकसान होत होते, त्याची चर्चाच होत नव्हती. विशेष म्हणजे कलम 370 ने काश्मीरच्या लोकांना काय फायदा झाला, असे विचारल्यावर कोणालाही याचे उत्तर देता येत नव्हते.”

“370 आणि 35ए ने जम्मू-काश्मीरला फुटीरदावाद, दहशदवाद, घराणेशाही आणि भ्रष्टाचाराशिवाय काहीच दिले नाही. या दोन्ही कलमांचा पाकिस्तानने देशाविरुद्ध लोकांच्या भावना भडकवण्यसाठी उपयोग केला. यामुळे मागील 3 दशकात 42 हजार लोक मारले गेले. जम्मू-काश्मीर आणि लडाखचा विकास इतर राज्यांप्रमाणे झालाच नाही. आता तेथील लोकांचे वर्तमान तर सुधरेलच शिवाय भविष्यही उज्वल असेल.”

“या प्रक्रियेतून जाऊन जो कायदा बनतो, त्याने संपूर्ण देशातील लोकांचे चांगले होते. अशी कल्पनाच करवत नाही की, एखादा कायदा बनवला आणि तो एखाद्या राज्यात लागूच होत नाही. आतापर्यंतच्या सरकार सांगूच शकत नव्हत्या की, एखादा कायदा बनला आणि तो त्या राज्यात लागू होत आहे का नाही. जो कायदा संपूर्ण देशासाठी बनत होता, त्याच्या फायद्यापासून जम्मू-काश्मीरचे नागरिक वंचित राहायचे.”

“देशातील इतर राज्यातील मुलांना शिक्षणाचा अधिकार आहे, पण जम्मू-काश्मीरची मुले वंचित आहेत. काय गुन्हा आहे त्या मुलांचा ? इतर राज्यातील मुलींना जे अधिकार मिळतात, ते काश्मीरच्या मुलींना मिळत नव्हते. दलितांवर होणाऱ्या अन्यायाविरुद्ध देशात कडक कायदा लागू आहे, पण तेथील नागरिकांसाठी नव्हता. अल्पसंख्यांकाच्या हक्कासाठी देशात मायनॉरिटी अॅक्ट लागू आहे, पण जम्मू-काश्मीरमध्ये नव्हता. मजुरांसाठी किमान वेतन कायदा  लागू आहे, पण तेथील मजूरांसाठी फक्त कागदावरच कायदा होता.”

“कलम 370 रद्द झाल्यानंतर त्याच्या नकारात्मक परिणामांमधून जम्मू-काश्मीर लवकरच बाहेर येईल. नवीन सरकारमध्ये तेथील कर्मचाऱ्यांना सर्व सुविधा मिळतील. हेल्थ स्कीम, रेंट अलाउंस, मुलांसाठी शिक्षणासाठी अलाउंसही मिळेल. हे आतापर्यंत काश्मीरच्या कर्मचाऱ्यांना मिळत नव्हता. आता या सुविधा तत्काळ लागून करुन पोलिस, आणि इतर कर्मचारी तसेच, त्यांच्या कुटुंबीयांना मिळतील. लवकरच जम्मू-काश्मीर आणि लडाखमधील रिक्त जागांना भरण्याचे काम केले जाईल. स्थानीक तरुणांना रोजगाराच्या संधी मिळलीत. पब्लिक आणि प्रायव्हेट सेक्टर कंपन्यांमध्येही रोजगार उपलब्ध होतील.”

https://www.facebook.com/MyMarathiNews/videos/376820266570404/

सांगली – सांगलीच्या ब्राम्हनाळ येथे पुरस्थितीत सुरु असलेल्या बचाव कार्यादरम्यान 25 ते 30 जणांना घेऊन जाणारी बोट उलटली. या दुर्घटनेत 9 जणांचा मृत्यू झाला असून इतर बेपत्ता आहेत. मृतांचा आकडा वाढण्याची भीती वर्तवण्यात येत आहे. ब्रह्मनाळ (तालुका पलूस जि. सांगली) येथे ग्रामपंचायतची बोट उलटून झालेल्या दुर्घटनेत आतापर्यंत 9 जणांचे मृतदेह हाती आले. तर 15 जणांना वाचवण्यात यश आले आहे. सोबतच, आणखी 3 जणांना बुड़ाल्याची शक्यता असून 3 जणांचा काहीच पत्ता नाही. NDRF TEAM घटनास्थळी पोहोचली असून शोधकार्य आणि बचावकार्य सुरू आहे.

या बोटमध्ये एकूण 30 लोक होते, अशी माहिती जिल्हा प्रशासनाकडून देण्यात आली. मुख्यमंत्र्यांनी पत्रकार परिषदेत दिलेल्या माहितीनुसार, बचावकार्य सुरू असताना जवळपास 30 जणांना एक बोट घेऊन जात होती. याचवेळी बोटच्या इंजिनमध्ये झाडाची तुटलेली फांदी अडकली. याच फांदीमुळे इंजिनमध्ये बिघाड आला आणि बोट बुडाली. या घटनेतील मृतांच्या वारसांना प्रत्येकी 5 लाख रुपयांची मदत मुख्यमंत्री देवेंद्र फडणवीस यांनी जाहीर केली आहे. त्यांनी कोल्हापूरच्या दौऱ्यात पत्रकार परिषदेत ही माहिती दिली.

मुंबई, दि. 8 : राज्यातील कोल्हापूर, सांगली व सातारा जिल्ह्यात निर्माण झालेल्या पूरपरिस्थितीवर नियंत्रण राखण्याबरोबरच पूरग्रस्त नागरिकांना राज्य सरकारकडून सर्व प्रकारची मदत दिली जात असून या प्रयत्नांना केंद्र सरकारकडून तत्परतेने मदत केली जाईल, असे केंद्रीय गृहमंत्री अमित शहा यांनी दूरध्वनीद्वारे मुख्यमंत्री देवेंद्र फडणवीस यांना आश्वस्त केले आहे. केंद्र सरकार संपूर्ण परिस्थितीवर बारकाईने लक्ष ठेवून असल्याची माहितीही गृहमंत्र्यांनी मुख्यमंत्र्यांना दिली.

राज्यातील कोल्हापूर, सांगली आणि सातारा जिल्ह्यात निर्माण झालेल्या पूरपरिस्थितीचा आढावा घेण्यासाठी मुख्यमंत्री श्री. फडणवीस या जिल्ह्यांच्या दौऱ्यावर आहेत. मुख्यमंत्र्यांनी यावेळी पूरस्थितीचे हवाई सर्वेक्षण आणि पूरग्रस्त भागाची पाहणी करून पूरग्रस्तांना दिल्या जाणाऱ्या मदतीच्या ठिकाणांना भेट दिली. तसेच पूरग्रस्तांच्या निवारा शिबिरामध्ये जाऊन त्यांनी पूरग्रस्तांशी संवाद साधला. यावेळी मुख्यमंत्र्यांसोबत महसूलमंत्री चंद्रकांत पाटील,जलसंपदा व वैद्यकीय शिक्षण मंत्री गिरीश महाजन, आरोग्यमंत्री एकनाथ शिंदे आदी उपस्थित होते. पूरस्थितीवर नियंत्रण राखण्याबरोबरच पूरग्रस्तांना मदत करण्यासाठी आवश्यक असणाऱ्या सर्व उपाययोजनांना गती देण्यासंबंधी मुख्यमंत्र्यांनी संबंधित स्थानिक यंत्रणांना निर्देश दिले.

कर्नाटकातील आलमट्टी धरणाच्या फुगवट्यामुळे सांगली जिल्ह्यामध्ये वाढलेली पुराच्या पाण्याची पातळी कमी करण्यासाठी या धरणातून पाण्याचा विसर्ग करण्याची विनंती श्री. फडणवीस यांनी कर्नाटकचे मुख्यमंत्री बी.एस. येडीयुरप्पा यांनी केली आहे. त्यानुसार आलमट्टी धरणातून पाच लाख क्युसेक्स पाणी सोडण्याचे श्री. येडीयुरप्पा यांनी मान्य केल्याचे मुख्यमंत्र्यांनी सांगितले.

पूरग्रस्तांच्या मदतीसाठी राष्ट्रीय आपत्ती निवारण दल (एनडीआरएफ), राज्य आपत्ती निवारण दल (एसडीआरएफ),भारतीय हवाई दल, नौदल, कोस्टल गार्ड आदी संस्थांचे चमू कार्यरत आहेत. कोल्हापूर परिसरात एकूण 22 मदत पथके कार्यरत असून त्यामध्ये एनडीआरफ-5, नेव्ही-14, कोस्टगार्ड-1, आर्मी कॉलम -1,एसडीआरएफ-1 आदींचा समावेश आहे. तसेच सांगलीमध्ये एकूण 11 पथके कार्यरत असून त्यामध्ये एनडीआरएफ-8, कोस्टगार्ड-2 आणि आर्मी-1 आदींचा समावेश आहे. त्याचप्रमाणे मदतकार्यासाठी आणखी पथके मागविण्यात आली असून पाच पथके पुण्यापर्यंत पोहोचली असून कोल्हापूर व सांगलीकडे येण्यास प्रत्येकी दोन पथके मार्गस्थ झाली आहेत. तसेच त्यातील एक पथक पुण्यात कार्यरत आहे.  कोस्टगार्डची आणखी दोन पथके कोल्हापूरमध्ये आणि नौदलाची पाच व एसडीआरएफची दोन पथके सांगलीमध्ये पोहोचत आहेत. गतिमान बचाव कार्यासाठी आणखी पाच एनडीआरएफ टीम मागविण्यात आल्या असल्याची माहितीही मुख्यमंत्र्यांनी दिली आहे.

पूरग्रस्तांच्या मदतीसाठी विशेष रेल्वे गाडी

कोल्हापूर आणि सांगली परिसरात झालेल्या अतिवृष्टीमुळे रस्ते वाहतूक विस्कळीत झाली आहे. या पार्श्वभूमीवर रेल्वे विभागाकडून मिरज आणि कराड दरम्यान विशेष रेल्वे चालवण्यात येणार असल्याचे रेल्वेमंत्री पीयुष गोयल यांनी मुख्यमंत्र्यांना कळविले आहे