पूर्ण वेळ “संचालक” शोधण्यास अधिकारी हतबल..!!
मुंबई- आज एक महिना पूर्ण झाला तरी सांस्कृतिक कार्य संचालनालयाचा कारभार हाकण्यासाठी पूर्ण वेळ ” संचालक” सांस्कृतिक कार्य खात्यातील अधिकाऱ्यांना दुर्बिण लावून ही सापडेना, अशी परिस्थिती निर्माण झाली आहे. त्यामुळे पुन्हा एकदा संचालनालयामध्ये “हौशे, नवशे, गवसे”ची परंपरा कायम राहणार असल्याचे दिसते.
न. नि. पटेल हे सन २००० च्या दरम्यान संचालक पदावरून सेवानिवृत्त झाले. त्या नंतर अगदी हाताच्या बोटावर मोजण्याइतक्याच अधिकाऱ्यांनी संचालकपदाची जबाबदारी सांभाळतांना, कलावंतांचे हित जपले. त्यांच्यासाठी अनेक योजना मार्गी लावल्या. मात्र काही संचालक आणि सहसंचालक केवळ आपल्या वैयक्तिक स्वार्थापोटी या पदावर रुजू होतात, हे अनेक वेळा निदर्शनास आले आहे.
आपली मुलं मुंबईत शिकतात अन् अचानक मुंबई बाहेर बदली झाली की कौटुंबिक अडचण निर्माण होते. मुंबई बाहेर जाण्यापेक्षा कुठंच काही नाही तर सांस्कृतिक कार्य संचालनालयात काही महिने काम करायचे, अशी धारणा काही अधिकाऱ्यांची असते. अनेक अधिकारी संचालनालयामध्ये रुजू झाल्यावर मनासारखे केंव्हाही.. कुठेही कार्यक्रमाच्या नावाखाली वेगवेगळ्या ठिकाणी पर्यटन, भ्रमंती करण्याची संधी उपलब्ध होते म्हणून येतात. तर काही अधिकारी आपल्या मूळ खात्यांमध्ये वरिष्ठांशी जमत नाही किंवा अनेक अडचणींना सामोरे जावे लागते. म्हणून ती पीडा टाळण्यासाठी सांस्कृतिक कार्याची सुखासुखी सेवा करायला उत्सुक असतात. आतापर्यत असे खूप कमी संचालक आणि सह संचालक या सांस्कृतिक कार्य संचालनालयाला मिळाले आहेत की, खरोखर त्यांना कलेबद्दल आत्मीयता आहे किंवा लोककलावंतांसाठी काही तरी करावे, म्हणूनच जीव ओतून काम केले. याबद्दल त्यांचे अजूनही कलावंत नाव काढत आहेत. मात्र त्यापेक्षा अधिक या खात्याला केवळ “हौशे नवशे गवशे”अशा स्वरूपाचे संचालक आणि सहसंचालक मिळाले आहेत. असे अधिकारी कधी आले आणि कधी गेले, हे शेवट पर्यत कुणालाच कळत नाही.
श्रीमती स्वाती काळे ह्या दि. ११ जुलै २०१९ रोजी संचालक पदावरुन कार्यमुक्त झाल्या आहेत. सध्या या पदाचा कार्य पद”भार” सहसंचालक सांभाळत असून विधानसभेची आचारसंहिता लागण्यापूर्वी पूर्ण वेळ संचालक देण्याची मानसिकता संबंधित अधिकाऱ्यांची दिसत नाही. मात्र जर पूर्ण वेळ संचालक मिळाला नाही तर अनेक योजनांवर त्याचा परिणाम होण्याची शक्यता नाकारता येत नाही. मग याला जबाबदार कोण राहणार आहे ?
सांस्कृतिक कार्य खात्यातील काही अधिकारी ठरवून या पदावर पूर्ण वेळ संचालक येवू नयेत म्हणून प्रयत्न करीत असतात तर काही अधिकारी आपल्या दालनात बसून दुर्बिणीचे भिंग लावून नवीन संचालक पदाच्या व्यक्ती शोधत असतात.
सांस्कृतिक खात्यातील अशा अंतर्गत वादामुळे जर वेळीच पूर्ण वेळ संचालक मिळाला नाही, तर सध्या सांस्कृतिक कार्य खात्याची जबाबदारी सांभाळत असणारे मुख्यमंत्री, त्यांचे प्रधान सचिव भूषण गगराणी यांना शेवटी याकडे लक्ष घालावे लागणार आहे, हे स्पष्ट दिसते.

कोल्हापूर – राजर्षी शाहूंनी देशाला एकसंध राहण्याचा संदेश दिला आहे. आज संकट मोठं आहे आपण एकत्र या संकटाला तोंड देऊ असा दिलासा राष्ट्रवादी काँग्रेसचे राष्ट्रीय अध्यक्ष शरद पवार यांनी पुरग्रस्तांना दिला. देशाचा 73 वा स्वातंत्र्य दिन राष्ट्रवादी काँग्रेसचे राष्ट्रीय अध्यक्ष शरद पवार यांनी कोल्हापूर येथील पूरग्रस्तांसोबत साजरा केला. तसेच पीडितांची विचारपूस केली. यावेळी स्थानिक महिलांनी शरद पवारांना राखी देखील बांधली.

महापुराचा मोठा फटका कोल्हापूर शहराला आणि आजूबाजूच्या अनेक गावांना बसला आहे. आज मुस्लिम बोर्डींग, नेहरू हायस्कूल येथे काही पूरग्रस्त कुटुंब आहेत. या कुटुंबातील भगिनी व बांधवांसह आजचा स्वातंत्र्य दिन साजरा केला. झेंडावंदन जेथे झाले त्या मैदानातील उपस्थित भगिनींनी शरद पवार यांना राखी बांधून आपली आस्था आणि आपुलकी व्यक्त केली. एवढंच नाही तर आसपासच्या लोकांनी यथाशक्ती येथे मदतही दिली.

मुख्यमंत्री देवेंद्र फडणवीस यांचा महाराष्ट्र दुष्काळमुक्त करण्याचा निर्धार

मुंबई, दि. 15 : कोकणातून समुद्रात वाहून जाणारे पाणी गोदावरी खोऱ्यामध्ये आणून मराठवाडा व उत्तर महाराष्ट्र; तसेच वैनगंगेतून वाहून जाणारे पाणी वैनगंगा- नळगंगा बोगद्याच्या माध्यमातून पूर्व आणि पश्चिम विदर्भाला  देऊन दुष्काळमुक्त करण्याचा राज्य  शासनाचा प्रयत्न सुरु  असल्याचे सांगून  मुख्यमंत्री देवेंद्र फडणवीस यांनी महाराष्ट्राला दुष्काळाच्या फेऱ्यातून मुक्त करण्याचा निर्धार आज स्वातंत्र्यदिनी पुन्हा व्यक्त केला.भारतीय स्वातंत्र्याच्या 72 व्या वर्धापनदिनानिमित्त मंत्रालयात झालेल्या मुख्य शासकीय समारंभात मुख्यमंत्र्यांच्या हस्ते ध्वजारोहण करण्यात आले. त्यावेळी ते बोलत होते.

           राज्य शासनाने जलयुक्त शिवारच्या माध्यमातून राज्याला जलपरिपूर्ण करण्याचा प्रयत्न गेल्या पाच वर्षात केला, असे सांगून मुख्यमंत्री म्हणाले की, असे असताना गेल्या तीन चार वर्षात कमी पावसामुळे काही भागात दुष्काळाचे संकट अनुभवले आहे. त्यावर मात करण्यासाठी  कोकणातून समुद्रात वाहून जाणारे 167 टीएमसी पाणी गोदावरी खोऱ्यात वळवून मराठवाडा आणि उत्तर महाराष्ट्र दुष्काळमुक्त करण्यात येईल. तसेच वैनगंगा नदीचे तेलंगणात जाणारे पाणी वैनगंगा- नळगंगा योजनेत 480कि.मी.चा बोगदा तयार करून पूर्व विदर्भ आणि पश्चिम विदर्भात आणण्याचा प्रयत्न आहे. यासोबतच पश्चिम महाराष्ट्रातील दुष्काळी भागातील सर्व अपूर्ण सिंचन प्रकल्प केंद्र सरकारच्या निधीतून गतिमानतेने पूर्ण करुन संपूर्ण महाराष्ट्र दुष्काळाच्या संकटातून बाहेर काढण्याचा संकल्प असल्याचेही त्यांनी सांगितले.

            देशासाठी आजचा अनोखा स्वातंत्र्य दिवस आहे. दिल्लीच्या लाल किल्ल्यावर प्रधानमंत्री नरेंद्र मोदी तिरंगा फडकावत असतानाच जम्मू, श्रीनगर तसेच लडाख मध्येही डौलाने आणि अत्यंत मुक्त वातावरणात फडकावला जात आहे. त्याबद्दल मुख्यमंत्र्यांनी प्रधानमंत्री, देशाचे गृहमंत्री आणि संसदेचे अभिनंदन केले.

           राज्याला गेल्या पाच वर्षात सर्वच क्षेत्रात अग्रेसर करु शकलो. देशातील सर्वात भक्कम अशी राज्याची अर्थव्यवस्था आहे. औद्योगिक गुंतवणुकीमध्ये राज्य अग्रेसर असून देशातील एकूण थेट परकीय गुंतवणुकीपैकी 50 टक्के गुंतवूणक एकट्या महाराष्ट्रात येते. देशाला 5 ट्रिलीयन डॉलरची अर्थव्यवस्था बनविण्याचे प्रधानमंत्री श्री. मोदी यांचे स्वप्न साकार करण्यासाठी राज्य खंबीर पावले टाकत असून त्यामध्ये राज्याची 1 ट्रिलियन डॉलरची अर्थव्यवस्था बनवून आपला सहभाग नोंदविल, असा विश्वास त्यांनी व्यक्त केला.

           राज्य शासनाने गेल्या पाच वर्षात शेती क्षेत्रात सुमारे 1.5 लाख कोटी रुपयांची गूंतवणूक केली. सुमारे 50 हजार कोटी रुपयांचा थेट लाभ शेतकऱ्यांच्या खात्यावर देण्यात आला. सामाजिक न्यायाच्या क्षेत्रात अनुसुचित जाती, जनजाती आदी सर्व वंचितांपर्यंत विकासाच्या योजना पोहोचविण्यासाठी प्रयत्न केले आहेत. भारतरत्न डॉ.बाबासाहेब आंबेडकर यांचे सामाजिक समतेचे स्वप्न पूर्ण करण्यासाठी प्रयत्न केले आहेत. छत्रपती शिवाजी महाराजांनी दिलेल्या राज्यकारभाराच्या सूत्रानुसार कार्य करण्यात येत आहे. त्याचबरोबर प्रधानमंत्री श्री. मोदी यांनी दिलेल्या सबका साथ सबका विकास आणि सबका विश्वास या त्रिसूत्रीच्या आधारावर पुढील वाटचाल करण्यात येईल.

           शिक्षण, उद्योग आदी सर्वच क्षेत्रात राज्याने उत्कृष्ट कामगिरी केली आहे. मराठा आरक्षण, धनगर समाजासाठी विविध प्रकारच्या सोयी, इतर मागासवर्गीयांसाठी विविध प्रकारच्या योजना कार्यान्वित करणे तसेच खुल्या प्रवर्गातील गरिबांसाठी योजना आदी माध्यमातून समाजाच्या सर्व घटकांपर्यंत विकास पोहोचविण्याचा प्रयत्न केला जात आहे. यापुढेही सर्वांना सोबत घेऊन राज्याची प्रगतीची वाटचाल सुरू राहील, असा विश्वासही त्यांनी यावेळी  दिला.

         मनोगतानंतर मुख्यमंत्री श्री. फडणवीस यांनी मंत्रालयातील छत्रपती शिवाजी महाराजांच्या प्रतिमेस तसेच राजमाता जिजाऊ यांच्या पुतळ्यास पुष्प अर्पण करुन अभिवादन केले.

          यावेळी सामाजिक न्याय राज्यमंत्री अविनाश महातेकर, उच्च न्यायालयाचे मुख्य न्यायमूर्ती प्रदीप नंद्रजोग, मुंबईचे महापौर विश्वनाथ महाडेश्वर, राज्याचे मुख्य सचिव अजोय मेहता, कार्यक्रमाला प्रमुख अतिथी म्हणून न्यूझीलंडचे महावाणिज्यदूत आणि व्यापार आयुक्त तथा मुंबईतील सर्व महावाणिज्यदूत कार्यालय गटाचे प्रमुख राल्फ हायस् यांची उपस्थिती होती. यावेळी आमदार सर्वश्री राज पुरोहित, मंगलप्रभात लोढा, विनायक मेटे, अबू आझमी, महाराष्ट्र गृहनिर्माण विकास महामंडळाचे सहअध्यक्ष राजेंद्र मिरगणे, राज्य निवडणूक आयुक्त जे. एस. सहारिया, लोकायुक्त एम. एल. तहलियानी, मुख्य राजशिष्टाचार अधिकारी नंद कुमार, पोलीस महासंचालक सुबोध जायसवाल, तिन्ही सैन्यदलाचे प्रमुख अधिकारी, मंत्रालयीन विभागांचे अपर मुख्य सचिव, प्रधान सचिव, सचिव आदी उपस्थित होते.

मुंबई – ज्येष्ठ अभिनेत्री विद्या सिन्हा यांचे 71 व्या वर्षी निधन झाले. नुकतेच त्यांना जुहू येथील एका खासगी रुग्णालयात उपचारासाठी दाखल करण्यात आले होते. त्यांची प्रकृती अतिशय चिंताजनक असल्याने डॉक्टरांनी वेळीच त्यांना व्हेंटिलेटरवर ठेवण्याचा निर्णय घेतला. परंतु, गुरुवारी त्यांच्या निधनाचे वृत्त समोर आले आहे. ‘रजनीगंधा’ आणि ‘छोटी सी बात’ या चित्रपटांसह 70 आणि 80 चे दशक त्यांनी गाजवले होते. सोबतच, 2011 मध्ये त्यांनी सलमान खानच्या बॉडीगार्ड या चित्रपटातही काम केले होते. गेल्या काही वर्षांपासून हिंदी टीव्ही सिरियल्समध्ये काम करण्यास त्यांनी सुरुवात केली होती. त्या ‘कुल्फी कुमार बाजेवाला’ या शोमध्ये आजींची भूमिका साकारत होत्या.ज्येष्ठ अभिनेत्री विद्या यांचे हृदय आणि फुफ्फुसांचा विकार होता. त्यांची प्रकृती बुधवारी अचानक बिघडल्याने त्यांना रुग्णालयात दाखल करण्यात आले होते. काही दिवसांपूर्वीच डॉक्टरांनी त्यांना अँजिओग्राफीचा सल्ला देखील दिला होता. परंतु, दुर्लक्ष केल्याने त्यांची प्रकृती खालावली आणि त्यांना व्हेंटिलेटरवर ठेवावे लागले. या दरम्यानही त्यांची परिस्थिती आणखी वाइट झाली आणि गुरुवारी त्यांनी अखेरचा श्वास घेतला. त्यांच्या पहिल्या चित्रपटाला फारसा प्रतिसाद मिळाला नव्हता. यानंतर रजनीगंधा, छोटी सी बात, किरायेदार आणि अशा संख्य चित्रपटांमुळे त्या 70 च्या दशकातील स्टार म्हणून समोर आल्या. यानंतर 80 च्या दशकातच त्यांनी बॉलीवूडला रामराम ठोकला. गेल्या काही वर्षांपासून त्या हिंदी सीरियल्समध्ये काम करत होत्या. काव्यांजली, कुबूल है, चंद्र नंदिनी, कुल्फी कुमार बाजेवाला यामध्ये त्यांनी महत्वाच्या भूमिका साकारल्या होत्या.