महाराष्ट्र गांधी स्मारक निधी आयोजित गांधी सप्ताह निमित्त आयोजन

पुणे :महाराष्ट्र गांधी स्मारक निधी आयोजित गांधी सप्ताह निमित्त ‘काश्मीरचे भवितव्य’ परिसंवादास शनिवारी चांगला प्रतिसाद मिळाला .

रतनाकर महाजन ( राजकीय विश्लेषक ),प्रा. डॉ.उल्हास बापट( जेष्ठ संविधानतज्ञ ),प्रा.परिमल माया सुधाकर ( आंतरराष्ट्रीय घडामोडींचे अभ्यासक ) सहभागी झाले . डॉ.कुमार सप्तर्षी ( अध्यक्ष महाराष्ट्र गांधी स्मारक निधी ) कार्यक्रमाचे अध्यक्षस्थानी होते .

शनिवार दि.५ ऑक्टो २०१९ रोजी सायं ६ वा. गांधीभवन कोथरूड पुणे येथे हा कार्यक्रम झाला

परिमल माया सुधाकर म्हणाले, ” आंतरराष्ट्रीय स्तरावरील पार्श्वभूमी मोदी सरकारच्या पथ्यावर पडली. पाकिस्तानची परिस्थिती खालावलेली आहे. मोठ्या देशांना मानवी अधिकाराचा कळवळा उरलेला नाही. ३७o रद्द केल्यावर चीन विरोधात गेला आहे.पाकिस्तान अंतर्गत इम्रान खानची परिस्थिती आता सदृढ झाली आहे.पाकव्याप्त काश्मीरमधून भारताला पाठिंबा उरलेला नाही. चीनच्या ताब्यातील काश्मीरचा भाग परत मिळण्याची शक्यता उरलेली नाही. मोदी सरकारची काश्मीर विषयक भूमिका ई स्रायलच्या पॅलेस्टाईनविषयक भूमिकेवर आधारित आहे. पण, ईस्रायल ला आदर्श ठेवण्यासारखे यश त्यांना पॅलेस्टाईनमध्ये मिळालेले नाही, हे लक्षात घेतले पाहीजे.

डॉ.रत्नाकर महाजन म्हणाले, ” काश्मीरप्रश्नी प्रधान प्रचारक आणि तडीपार यांनी काश्मीर प्रश्नी जगात स्वतःचं हसं करून घेतले आहे. काश्मीरच्या त्रिभाजनाचं संघ परिवाराचं जुनं स्वप्न होतं. आताची देशाची परिस्थिती असह्य आहे. कायद्याचा बडगा दाखवून कोणालाही गजाआड केले जात आहे. काश्मीरची परिस्थिती सुधारावी अशी मोदी -शहा दुकलीची इच्छा नाही. त्यामुळे ती सुधारणार नाही.आपण आपल्या पातळीवर काश्मीरींशी माणुसकीचे नाते जोडून ठेवावे, इतकेच आपल्या हातात आहे. ”

प्रा. उल्हास बापट म्हणाले, “अत्यंत कळीच्या प्रश्नावर सर्वोच्च न्यायालये वेळ काढूपणा करतात , हे अनाकलनीय आहे. सर्वोच्च न्यायालय न्यायमूर्तिना निवृत्तीनंतर लाभाचे पद स्वीकारण्यावर निर्बंध असते, तर देशाचे भले झाले असते.

३७० वे कलम हळूहळू संपलेलेच होते. ते रद्द करून कोणतीही क्रांती झालेली नाही, हे लक्षात घेतले पाहिजे. आरक्षणासारख्या अनेक तात्पुरत्या तरतुदी अजूनही घटनेत आहेत.३७०रद्द करणे ही प्रक्रिया कायद्याची चेष्टा आहे.कणखरपणा दाखवला तर सर्वोच्च न्यायालय हा निर्णय बेकायदेशीर ठरवण्याची शक्यता आहे. सर्वोच्च न्यायालयाचा सल्ला आधी घेतला असता तर ही संभाव्य नामुष्की टळली असती.

अध्यक्षस्थानावरुन बोलताना डॉ.कुमार सप्तर्षी म्हणाले, ” काश्मीरींना सर्वसमावेशक कश्मीरीयतची सार्वभौमता हवी आहे,यात चुकीचे काही नाही. पण भाजपला घटनेचा प्राण असलेले नागरिकत्व नष्ट करायचे आहे. सर्वांना जुन्या प्रजेच्या काळात न्यायचे आहे. काश्मीर ही त्यासाठीची प्रयोगशाळा म्हणून वापरली जात आहे. ”

संदीप बर्वे यांनी सूत्रसंचालन केले.

पु णे,  : विधानसभा निवडणुकीत मोठ्या रकमेच्या आर्थिक व्यवहारांवर लक्ष ठेवा, अशा सूचना निवडणूक विशेष खर्च निरीक्षक बी. मुरलीकुमार यांनी दिल्या.
विशेष खर्च निरीक्षक बी. मुरलीकुमार यांच्या अध्यक्षतेखाली निवडणूक खर्च विषयीचे विविध विभाग प्रमुख व पथक प्रमुख यांची आढावा बैठक जिल्हाधिकारी कार्यालयाच्या सभागृहात झाली, त्यावेळी ते बोलत होते. बैठकीला विभागीय आयुक्त डॉ. दिपक म्हैसेकर, निवडणूक निरीक्षक चंदरशेखर, जिल्हाधिकारी नवल किशोर राम, पोलीस आयुक्त डॉ. के. व्यंकटेशम, विशेष पोलीस महानिरिक्षक सुहास वारके, जिल्हा पोलीस अधीक्षक संदीप पाटील, पिंपरी-चिंचवडचे अतिरिक्त पोलीस आयुक्त रामनाथ पोकळे, निवडणूक खर्च व्यवस्थापन विभागाचे समन्वय अधिकारी अजित रेळेकर, सी-व्हिजीलचे समन्वय अधिकारी सुरेश जाधव, निवासी उपजिल्हाधिकारी डॉ.जयश्री कटारे, उप जिल्हाधिकारी सुधीर जोशी, उप जिल्हा निवडणूक अधिकारी मृणालिनी सावंत, माहिती उपसंचालक मोहन राठोड आदी उपस्थित होते.
बी. मुरलीकुमार म्हणाले, विधानसभा निवडणूक कामकाजातील सर्व पथकांनी अचूक व काटेकोर कामकाज करावे, तसेच दैनंदिन माहिती निवडणूक निर्णय अधिकारी यांना सादर करावी. बैठकीमध्ये भरारी पथके, स्थिर संनिरीक्षण पथके (एसएसटी), छायाचित्रण संनियंत्रण पथक, छायाचित्रण निरीक्षण पथक अशा विविध पथकांनी आतापर्यंत आचारसंहिता अंमलबजावणी व निवडणूक खर्च विषयक तक्रारीबाबत केलेल्या कार्यवाहीचा आढावा घेतला. विधानसभा निवडणुकीमध्ये पैशाचा गैरवापर रोखण्यासाठी सर्व यंत्रणांनी सतर्क राहावे, असे निर्देश बी. मुरलीकुमार यांनी दिले.
मतदारांवर प्रभाव टाकण्यासाठी वापरण्यात येणारे पैसे व दारुच्या वापराला आळा घालावा यासाठी बेकायदा दारु आणि रोकड वाहतुकीवर लक्ष ठेवावे, अशा सूचना त्यांनी संबंधित विभागांना दिल्या. पथकांनी संशयित वाहनांची तपासणी करुन अवैधरित्या वाहतूक होत असलेली रोकड, मद्य, मादक पदार्थ व तत्सम बाबी जप्त करुन संबंधितांविरुध्द योग्य ती कारवाई करावी. उमेदवारांचा निवडणूक खर्च आणि बेकायदा पैशाचा वापर याची तपासणी काटेकोरपणे करावी, असेही त्यांनी सांगितले.
विभागीय आयुक्त डॉ. दिपक म्हैसेकर म्हणाले, आचारसंहितेची अंमलबजावणी प्रभावीपणे करण्यासाठी सर्व विभागांनी सतर्क राहून काम करावे. यावेळी जिल्हाधिकारी नवल किशोर राम यांनी निवडणुकीच्या कामकाजासाठी स्थापन करण्यात आलेल्या विविध विभागांची व पथकांची माहिती सादरीकरणाद्वारे दिली. सर्व विभागप्रमुखांनी आपापल्या विभागांच्या कामकाजाची माहिती यावेळी दिली. निवडणूक आचारसंहिता कालावधीत प्रचारासाठी वापरण्यात येणाऱ्या जाहिरातींना परवानगी देणे व त्यावर नियंत्रण ठेवण्यासाठी स्थापन करण्यात आलेल्या माध्यम प्रमाणीकरण व संनियंत्रण समितीच्या कामकाजाची माहिती जिल्हा माहिती अधिकारी राजेंद्र सरग यांनी दिली.
बैठकीला निवडणूक खर्च व्यवस्थापन विभाग, उत्पादन शुल्क विभाग व महसूल व पोलीस प्रशासन, सहकार विभाग, अग्रणी बँकेचे अधिकारी, पेड न्यूज व प्रसार माध्यम विभाग, माध्यम प्रमाणीकरण व सनियंत्रण समिती, आचारसंहिता कक्ष अशा विविध विभागाचे व पथकाचे अधिकारी व कर्मचारी उपस्थित होते.

पुणे-भाजपची एक हाथी सत्ता महापालिकेत आल्यापासून टेंडर वाढीव दराने येण्याचे प्रकार काही थांबता थांबेनात असे दिसते आहे .शहर सुधारणा समितीच्या मंजुरी शिवाय ,स्थायी समितीने घाई घाई ने मंजूर करवून तात्काळ मुख्य सभेत पाठवून तात्काळ मुख्य सभेचीही मान्यता घेण्यात आलेल्या एचसीएमटी आर मार्गाची निविदा तब्बल 44 % अधिक दराने आल्याचे वृत्त आहे.

वाहतुकीच्या कोंडीवर उपाययोजनेसाठी शहराच्या मध्यवर्ती भागात उभारण्यात येणार्‍या ३६ कि.मी.चा इलेव्हेटेड रिंगरोड अर्थात एचसीएमटीआरच्या निविदा आज उघडण्यात आल्या. यासाठी दोन निविदा आल्या असून त्यापैकी सर्वात कमी रकमेची निविदा ही सुमारे ४४ टक्के अधिक आहे. समान पाणी पुरवठा योजना, जायका नदी सुधार योजनेप्रमाणेच एचसीएमटीआर योजनेची निविदाही तब्बल ४४ टक्के अधिक दराने आली आहे. मोठ्या प्रकल्पांच्या निविदा सातत्याने चढ्या दराने येत असल्याने यामागे कोणाचा वरदहस्त आहे, अशी चर्चा सुरू असून एवढ्या चढया दराने आलेली एचसीएमटीआरची निविदाही वादाच्या भोवर्‍यात अडकण्याची शक्यता आहे. महापालिकेच्या १९८७ च्या विकास आराखड्यामध्ये एचसीएमटीआर मार्गाची आखणी करण्यात आली आहे. शहरातील उपनगरे उन्नत मार्गाच्या सहाय्याने जोडण्यात येणार असून यावर बीआरटी प्रकल्पही राबविण्यात येणार आहे. सुमारे ३६ कि.मी. मार्गिकेवर वाहने उतरण्यासाठी आणि मार्गावर जाण्यासाठी २९ ठिकाणी रॅम्पही उभारण्यात येणार आहेत.

या कामासाठी ५ हजार १९२ कोटी रुपयांचे एस्टीमेट तयार करण्यात आले असून जागतिक स्तरावर निविदाही मागविण्यात आल्या होत्या. दरम्यान दीड महिन्यांपुर्वीच दोन निविदा प्राप्त झाल्या असून प्रशासनाच्यावतीने या निविदांची तांत्रिक छाननी करण्यात येत होती. या दोन्ही निविदा भारतीय आणि चीनी कंपनीचे कोलॅब्रेशन केलेल्या संयुक्त कंपन्यांनी भरल्या आहेत. त्यापैकी गावर आणि एका चायनीज कंपनीने ७ हजार ५२५ कोटी रुपयांची निविदा भरली असून वेलस्पन अदानी या भारतीय कंपनीने एका चायनीज कंपनीसोबत कोलॅब्रेशन करून ७ हजार ९६६ कोटी रुपयांची निविदा भरली आहे.

यापैकी गावर कंपनीची निविदा कमी दराची असल्याने नियमाप्रमाणे त्यांनाच काम मिळण्याची शक्यता आहे. परंतू या कंपनीची निविदा ही एस्टीमेट कॉस्टपेक्षा तब्बल ४४ टक्के अधिक दराने आलेली आहे. त्यामुळे अनेकांचे डोळे विस्फारले आहेत. महापालिकेने मागील काही वर्षांपासून २० टक्क्यांहुन अधिक अथवा १५ टक्के कमी दराने निविदा आल्यास फेरनिविदा काढण्याची नियम केला आहे.

त्यामुळे ४४ टक्के दराने आलेली निविदा स्वीकारली जाणार नाही, असे वरकरणी तरी दिसते. मात्र, हा एकमेव प्रकल्प सत्ताधारी भाजपने पुढे केलेला असल्याने या प्रकल्पाचे भूसंपादन, निविदा प्रक्रिया आदी कामासाठी महापालिकेने सल्लागार नेमला असून अधिकार्‍यांची स्वतंत्र टीमही तयार केली आहे. एवढेच नव्हे तर विधानसभा निवडणुकीची आचारसंहिता लागण्यापुर्वी एचसीएमटीआर प्रकल्पाच्या मार्गीकेत ११ ठिकाणी बदल करण्यात आले असून त्याला सर्वसाधारण सभेची मंजुरीही घेतली आहे. परंतू निविदा या चढ्या दराने आल्याची कुणकुण अगोदर पासूनच विरोधी पक्षाला लागल्याने त्यांनी महापालिका आयुक्तांना पत्र देवून चढया दराच्या निविदा स्वीकारू नयेत, अशीच यापुर्वीच मागणी केली आहे.

नेमके विधानसभा निवडणुकीची आचारसंहिता लागू असताना प्रशासनाने या निविदा उघडल्याने सत्ताधार्‍यांची चांगलीच पंचाईत होणार आहे. तर समान पाणी पुरवठा योजना, जायका नदीसुधार योजना आणि कात्रज कोंढवा रस्त्याच्या निविदा अशाच चढ्या दराने आल्यानंतरही सत्ताधार्‍यांनी त्या मंजुरीसाठी ठेवल्यानंतर विरोधकांनी तसेच शहरातील स्वंयसेवी संस्थांनी या निविदांना जोरदार विरोध केला होता. अखेर सत्ताधार्‍यांना समान पाणी पुरवठा योजना आणि कात्रज कोंढवा रस्त्यांच्या फेरनिविदा काढाव्या लागल्या. यामुळे या दोन्ही योजनांचे मिळून सुमारे ११०० कोटी रुपये वाचले.

तर नदीसुधार योजनेच्या ५० ते ७५ टक्के दराने आलेल्या निविदा तपासणीसाठी केंद्रीय समितीकडे पाठवाव्या लागल्या आहेत. या पार्श्‍वभूमीवर निवडणुकीनंतर सत्ताधारी चढ्या दराने आलेल्या एचसीएमटीआर मार्गाच्या चढ्या दराने आलेल्या निविदांबाबत काय निर्णय घेणार? याची उत्सुकता वाढली आहे.

‘इंडिया बिझनेस लिटरेचर फेस्टिवल’चे उद्घाटन

पुणे : “यशस्वी उद्द्योजक बनण्यासाठी महत्त्वकांक्षा आणि ज्ञान या गोष्टी आवश्यक आहेत. स्टार्टअप इंडियामुळे  व्यवसाय करत नोकऱ्या निर्माण करण्याकडे तरुणांचा, विद्यार्थ्यांचा कल वाढला आहे. उद्योजकता विकसनासाठी निरनिराळे कार्यक्रम, धोरण राबविले जात आहे. नवउद्योजकांना आर्थिक साह्यदेखील देण्यात येत आहे. तरुणांनी मोठ्या प्रमाणात उद्योग व्यवसायाकडे वळावे हा या मागील उद्देश आहे. चांगले आणि सकस ‘बिझनेस लिटरेचर’ उपलब्ध झाले, तर उद्योजकतेला चालना मिळेल. त्यासाठी इंडिया बिझनेस लिटरेचर फेस्टिवल यासारखे उपक्रम विद्यार्थ्यांना व्यावसायिकतेकडे वळण्यासाठी उपयुक्त ठरतील,” असे प्रतिपादन ज्येष्ठ शास्त्रज्ञ डॉ. रघुनाथ माशेलकर यांनी केले.

आयसीएफएआय बिझनेस स्कुल, इन्स्टिट्यूट फॉर जनरेटिव्ह लीडरशिप, होप फाउंडेशनचे आयस्क्वेअरआयटी इंजिनिअरिंग कॉलेज आणि बीडब्ल्यू बिझनेसवर्ल्ड यांच्या संयुक्त विद्यमाने आयोजित दुसऱ्या इंडिया बिझनेस लिटरेचर फेस्टिवलचे (आयबीएलएफ) उद्घाटन डॉ. रघुनाथ माशेलकर यांच्या हस्ते झाले. शिवाजीनगर येथील शासकीय अभियांत्रिकी महाविद्यालयाच्या (सीओईपी) मिनी ऑडिटोरियममध्ये झालेल्या कार्यक्रमावेळी ‘केपीआयटी’चे सहसंस्थापक रवी पंडित, उद्योजक डॉ. गणेश नटराजन, ‘बिझनेस वर्ल्ड’चे डॉ. अनुराग बत्रा,  आयसीएफएआय बिझनेस स्कुलच्या संचालिका प्रा. ज्योती टिळक , होप फाउंडेशन अँड रिसर्च सेंटरच्या अध्यक्षा अरुणा कटारा, फेस्टिवलचे संयोजक आणि लेखक समीर दुआ, होप फाउंडेशनच्या अध्यक्षा अरुणा कटारा, ‘सीओईपी’चे संचालक डॉ. भारतकुमार अहुजा उपस्थित होते.

उद्योजकता विषयावर लिहलेल्या साहित्यावर २० लेखकांनी फेस्टिवलमध्ये चर्चा केली. ‘टेडएक्स’च्या धर्तीवर आयोजित या फेस्टिवलमध्ये प्रत्येकी लेखकाने १८ मिनिटात आपले मनोगत मांडले. त्यामध्ये नॅसकॉमचे माजी अध्यक्ष किरण कर्णिक, डॉ. शिरीष जोबळे, लेखक आर. गोपालकृष्णन, किशोर चक्रवर्ती, जयराम ईश्वरन, अपर्णा राजे, अवार्ड विनिंग व्हायरल व्हिडीओ मार्केटर आशिष चोप्रा, टूलटेक ग्लोबल इंजिनिअरिंगचे संस्थापक अतुल खन्ना, एस. पी. जैन इन्स्टिट्यूट ऑफ मॅनेजमेंट अँड रिसर्च अधिष्ठाता डॉ. रंजन बॅनर्जी, लेखक-पत्रकार पवन लाल, जाहिरात दिग्दर्शक प्रल्हाद कक्कर, लेखक-संपादक शशांक शहा, मानसोपचारतज्ज्ञ सैलजा मनाचा, लेखक नरेंद्र गोईदानी, लेखक-वकील मुक्ता महाजनी आदींचा समावेश होता.

डॉ. रघुनाथ माशेलकर म्हणाले, “बिजनेस लिटरेचर फेस्टिव्हलची कल्पना पुण्यात आली ही आनंदाची गोष्ट आहे. हा विचार देशभर पसरेल. बेडूकउडी न घेता हनुमान उडी घेण्याची आपली मानसिकता हवी. धीरूभाई आंबानी सारखे आदर्श आपल्यासमोर आहेत. उद्योगक्षेत्रात संकुचीत दृष्टी न ठेवता उत्तुंग उडी घेण्याचे स्वप्न बाळगले पाहिजे. येत्या काळात भारत हा विज्ञान-तंत्रज्ञान क्षेत्रात जगात सर्वात पुढे असेल. या क्षेत्राबाबत आपल्या लोकांमध्ये जगरूकता निर्माण झाली आहे. ‘चंद्रयान-२’ मोहिमेवर सर्व भारतीयांचे लक्ष होते.  लोकांचा उत्साह आणि त्यांचा सहभाग उल्लेखनीय आहे. शासनस्तरावर चांगले धोरणात्मक निर्णय घेतले जात आहेत. याचा फायदा नव्या पिढीतील तरुणांना उद्योगात येण्यासाठी नक्की होईल.”

रवी पंडित म्हणाले,”तंत्रज्ञान, धोरण, लोकसहभाग आणि आर्थिक नियोजन या चार गोष्टींचा मेळ घातला, तर ऊर्जा, पर्यावरण आणि रोजगारनिर्मिती या गोष्टीसाध्य होतील. शाश्वत ऊर्जेचा वापर करून पर्यावरण करण्यासह त्यातून रोजगार निर्मिती करण्यावर उद्योगांनी भर दिला पाहिजे. त्यासाठी शासनाकडून प्रोत्साहन मिळावे. गेल्या काही वर्षात पर्यावरणाचा ऱ्हास होत आहे. घनकचऱ्याची समस्या सोडविण्यासाठी या चार गोष्टींचा उपयोग होईल. देशातील आव्हाने दूर करण्यासाठी आपल्या सर्वांचा सहभाग आणि संवेदनशीलता महत्वाची आहे.”

डॉ. गणेश नटराजन म्हणाले, “उद्योग जगतात सातत्याने नवनवीन बदल होत आहेत. उद्योजकांनी या सतत होणाऱ्या बदलांचा स्वीकार करावा. ‘नॉलेज मॅनेजमेंट’ या पुस्तकात उद्योग क्षेत्रातला माझा प्रवास लिहला आहे. उद्योजकांनी नोकऱ्या देताना समोरच्या व्यक्तीमधील क्षमता, विश्वसनीयता,  गुणवत्ता पाहावी. त्यानुसार काम द्यावे. तसेच डिजिटल इंडियाच्या जगातील आव्हाने समजून वाटचाल करावी.”

डॉ. अनुराग बत्रा म्हणाले, “उद्योजक बनण्याच्या प्रक्रियेत परिस्थिती तुम्हाला खूप गोष्टी शिकवून जाते. सतत नवीन काहीतरी शिकत राहणे गरजेचे आहे. तसेच डोळसपणा जागरूकता, उत्सुकता, सातत्य हे गुण असणे आवश्यक आहेत. संधीची वाट बघण्यापेक्षा संधी निर्माण करण्याचा प्रयत्न करणे गरजेचे असते. व्यवसाय वृद्धीसाठी नवनव्या माध्यमांचा वापर आपण केला पाहिजे.”

ज्योती टिळक म्हणाल्या, “तरुणांनी साहित्यातील यशोगाथा वाचाव्यात. त्यातून आपल्याला प्रेरणा मिळते. शिक्षण पद्धतीतील बदल आत्मसात करत प्रत्यक्ष अनुभव घेण्यावर भर दिला पाहिजे. उद्योजकता या विषयावरील शैक्षणिक पुस्तकांसोबत अवांतर पुस्तकांचे वाचन करावे. प्राध्यापकांनी अद्ययावत ज्ञान व प्रत्यक्ष अनुभवावर आधारीत अध्यापन करावे.”

समीर दुआ म्हणाले, “धर्माचा खरा अर्थ आपण समजून घ्यायला हवा. मनुष्य हा विविध चिंतांनी ग्रासलेला असतो. तो आंनद, समाधनाच्या शोधात असतो. माणसाने आपला आतला आवाज ऐकायला हवा. अपयाशाची भीती बाळगण्यापेक्षा सतत प्रयत्नशील राहावे. आपल्या जबाबदाऱ्या ओळखून त्याला न्याय देण्याचा प्रयत्न आपण केला पाहिजे.”

प्रास्ताविकात अरुणा कटारा म्हणाल्या, “उद्योग क्षेत्राची ओळख वडील प्रकाश छाब्रिया यांच्यामुळे झाली. इथे सतत नवीन गोष्टी समजून घ्याव्या लागतात. या क्षेत्रात साहित्यनिर्मिती व्हावी आणि भावी पिढीला त्याचा लाभ व्हावा, या उद्देशाने हे लिटरेचर फेस्टिवल भरवत आहोत.” डॉ. भारतकुमार अहुजा यांनी स्वागत करताना अशा फेस्टिवलच्या आयोजनामागील महत्व विशद केले. प्रा. वैदही बॅनर्जी यांनी सूत्रसंचालन केले.

पुणे : ‘जाने क्यु लोग मोहब्बत किया करते है’, ‘कस्मे वादे प्यार नफा सब’, ‘ख्वाब हो तुम या कोई हसी हो’, ‘मेरे सपनो कि राणी कब आएगी तु’ अशा हिंदी चित्रपटसृष्टीमध्ये एव्हरग्रीन ठरलेल्या गाण्यांचे आपल्या सुमधूर गायनातून सादरीकरण करित युवा गायक आणि कलाकारांनी रसिकांसमोर संगीताचा संवर्णकाळ उलगडला. पुणे नवरात्र महोत्सव समिती, फिनोलेक्स इंडस्ट्रीज आणि मुकुल माधव फौंडेशनतर्फे आयोजित २५ व्या पुणे नवरात्र महोत्सवात युवा गायक आणि कलाकारांनी सूर पालवी प्रस्तुत सिल्वहर ज्सुबिली या संगीतमय कार्यक्रमातून आपल्या अप्रतिम अदाकारीने कार्यक्रमात रंगत आणली. महोत्सवाचे संयोजक आबा बागूल, जयश्री बागूल, घनःश्याम सावंत, नंदकुमार बानगुडे, नंदकुमार कोंढाळकर, रमेश भंडारी, अमित बागुल, विकी खन्ना यांच्यासह इतर मान्यवर उपस्थित होते. किशोर सरपोतदार आणि अजित कुमठेकर यांच्या हस्ते कलाकारांचा सत्कार करण्यात आला.

अभिषेक मारटकर यांनी कोहिनूर या चित्रपटातील ‘मधुबन मे राधिका नाचे रे’ या गाण्याने कार्यक्रमाची अप्रतिम सुरुवात केली. त्यानंतर सामी सौदागर यांनी ‘कस्मे वादे प्यार वफा सब’ या गाण्यातून मेलडीचा प्रत्यय दिला. पल्लवी पत्की यांनी गायलेल्या ‘जाने क्यू लोग मोहब्बत किया करते है’ या गाण्याने रसिकांना ताल धरायला लावला. अभिषेक मारटकर, समीर सौदागर, पल्लवी पत्की, मकरंद पाटणकर, संतोष गायकवाड, सय्यद राज यांनी गायलेल्या गाण्यांना रसिकांनी उत्स्फूर्त प्रतिसाद दिला. रशिद शेचा (किबोर्ड), मिहिर भडकमकर, (किबोर्ड), अंकुश बोर्डे (ढोलक), विजय मूर्ती (गिटार), महेश रिसवडकर (गिटार), मनोज मोरे (ड्रम), रोहित साने (तबला), संजय हिवराळे (ऑक्टोपॅड) यांनी गायकांना साथउसंगत केली. महेश अचिंतलावार यांनी कार्यक्रमाचे निावेदन केले. ‘कह दो के तुम हो मेरी वरना’, ‘है अगर दुश्मन’, ‘परदा है परदा’, ‘तुझे देखा तो ये जाना सनम’, ‘सोचेंगे तुम्हे प्यार कर के नही’ या नवीन आणि जुन्या गाण्यांच्या सादरीकरणाने रसिकांना संगीताच्या सुवर्णकाळाची आठवण करुन दिली.