मुंबई, दि. 7 : विधानसभा निवडणुकीसाठी अर्ज माघारी घेण्याच्या अखेरच्या दिवशी राज्यात 288 मतदारसंघात 1 हजार 504 उमेदवारांनी अर्ज माघारी घेतले असून एकूण 3 हजार 239 उमेदवार निवडणूक रिेंगणात आहेत. सर्वात जास्त 246 उमेदवार पुणे जिल्ह्यातून तर सर्वात कमी 23 उमेदवार सिंधुदूर्ग जिल्ह्यातून निवडणूक लढवणार असल्याची माहिती अतिरिक्त मुख्य निवडणूक अधिकारी दिलीप शिंदे, यांनी पत्रकारांशी संवाद साधताना दिली.

दरम्यान शनिवारी झालेल्या छाननीअंती 4 हजार 743 उमेदवारांचे अर्ज वैध ठरले होते. त्यातून 1 हजार 504 उमेदवारांनी अर्ज माघारी घेतले. नंदुरबार जिल्ह्यात 4 मतदारसंघात 26 उमेदवार निवडणूक रिंगणात आहेत. धुळे जिल्ह्यात 5 मतदारसंघात 38 उमेदवार, जळगाव जिल्ह्यात 11 मतदारसंघात 100 उमेदवार, बुलढाणा जिल्ह्यात 7 मतदारसंघात 59 उमेदवार, अकोला जिल्ह्यात 5 मतदारसंघात 68 उमेदवार, वाशिम जिल्ह्यात 3 मतदारसंघात 44 उमेदवार, अमरावती जिल्ह्यात 8 मतदारसंघात 109 उमेदवार, वर्धा जिल्ह्यात 4 मतदारसंघात 47 उमेदवार, नागपूर जिल्ह्यात 12 मतदारसंघात 146 उमेदवार, भंडारा जिल्ह्यात 3 मतदारसंघात 42 उमेदवार, गोंदीया जिल्ह्यात 4 मतदारसंघात 47 उमेदवार, गडचिरोली जिल्ह्यात 3 मतदारसंघात 38 उमेदवार, चंद्रपूर जिल्ह्यात 6 मतदारसंघात 71 उमेदवार, यवतमाळ जिल्ह्यात 7 मतदारसंघात 88 उमेदवार, नांदेड जिल्ह्यात 9 मतदारसंघात 135उमेदवार निवडणूक रिंगणात आहेत.

तर, हिंगोली जिल्ह्यात 3 मतदारसंघात 33 उमेदवार, परभणी जिल्ह्यात 4 मतदारसंघात 53 उमेदवार, जालना जिल्ह्यात 5 मतदारसंघात 79 उमेदवार, औरंगाबाद जिल्ह्यात 9 मतदारसंघात 128 उमेदवार, नाशिक जिल्ह्यात 15 मतदारसंघात 148 उमेदवार, पालघर जिल्ह्यात 6 मतदारसंघात 53 उमेदवार, ठाणे जिल्ह्यात 18 मतदारसंघात 214 उमेदवार, मुंबई उपनगर जिल्ह्यात 26 मतदारसंघात 244 उमेदवार, मुंबई शहर जिल्ह्यात 10 मतदारसंघात 89 उमेदवार, रायगड जिल्ह्यात 7 मतदारसंघात 78 उमेदवार, पुणे जिल्ह्यात 21 मतदारसंघात 246 उमेदवार, अहमदनगर जिल्ह्यात 12 मतदारसंघात 116 उमेदवार, बीड जिल्ह्यात 6 मतदारसंघात 115 उमेदवार, लातूर जिल्ह्यात 6 मतदारसंघात 79, उमेदवार, उस्मानाबाद जिल्ह्यात 4 मतदारसंघात 50 उमेदवार, सोलापूर जिल्ह्यात 11 मतदारसंघात 154 उमेदवार, सातारा जिल्ह्यात 8 मतदारसंघात 73 उमेदवार, रत्नागिरी जिल्ह्यात 5 मतदारसंघात 32 उमेदवार, सिंधुदूर्ग जिल्ह्यात 3 मतदारसंघात 23 उमेदवार, कोल्हापूर जिल्ह्यात 10 मतदारसंघात 106 उमेदवार, सांगली जिल्ह्यात 8 मतदारसंघात 68 उमेदवार निवडणूक रिंगणात असणार असल्याची माहितीही श्री. शिंदे यांनी दिली.

सर्वाधिक उमेदवार नांदेड दक्षिण मध्ये तर सर्वात कमी चिपळूण मतदारसंघात

सर्वात कमी 3 उमेदवार रत्नागिरी जिल्ह्यातील चिपळूण मतदार संघात तर नांदेड दक्षिण विधानसभा मतदारसंघात सर्वाधिक 38 उमेदवार निवडणूक रिंगणात आहेत. नांदेड दक्षिण, बीड, औरंगाबाद पूर्व, जालना या चार मतदारसंघात 31 पेक्षा अधिक उमेदवार रिंगणात असल्याने एका ईव्हीएमसाठी 3 बॅलेट युनिटची (बीयु) आवश्यकता राहणार असून कंट्रोल युनिट (सीयु) एकच लागणार आहे. अकोट, रिसोड, धामणगाव रेल्वे, बडनेरा, अमरावती, नागपूर दक्षिण पश्चिम, नागपूर दक्षिण, साकोली, गोंदिया, गडचिरोली, वणी, नांदेड उत्तर, वैजापूर, नाशिक पश्चिम, कल्याण पश्चिम, अंबरनाथ, उल्हासनगर, बेलापूर, पिंपरी, पुणे कॅन्टोन्मेंट, नेवासा, गेवराई, माजलगाव, परळी, लातूर शहर, तुळजापूर, सोलापूर शहर मध्य, पंढरपूर, सांगोला, हातकणंगले अशा 30 मतदारसंघांमध्ये 15 पेक्षा अधिक उमेदवार असल्याने दोन बॅलेट युनिट लागणार आहेत. राज्यात ईव्हीएमच्या अत्युच्च उमेदवारसंख्येच्या मर्यादेपेक्षा कमी उमेदवारांची संख्या असल्याने कुठेही मतपत्रिकेवर (बॅलेटपेपर) मतदान घ्यावे लागणार नाही.

नांदेड जिल्ह्यातील भोकर मतदार संघात सर्वाधिक 91 उमेदवारांचे अर्ज वैध ठरले होते. त्यामधून अर्जमाघारीनंतर केवळ 7 उमेदवार निवडणूक रिंगणात आहेत.

आचारसंहिता लागू झाल्यापासून राज्यात 11 कोटी 39 लाख रुपयांची रोकड, 12 कोटी 47 लाख रुपयांची दारु, 15 कोटी 29 लाख रुपये किमतीचे मादक पदार्थ आणि 8 कोटी 87 लाख रुपये किमतीचे सोने, चांदी व अन्य मौलवान दागिणे असा सुमारे 48 कोटी 2 लाख रुपयांचा मुद्देमाल जप्त करण्यात आला आहे.

राज्यात विविध कलमांखाली 442 प्रकरणांमध्ये कार्यवाही करण्यात आली आहे. यामध्ये भा.दं.वि.अंतर्गत विविध कलमांखाली 102, लोक प्रतिनिधीत्व अधिनियमाखाली 15, अंमली पदार्थ विषयक एनपीडीएस अधिनियमांतर्गत 72, मुंबई पोलीस कायद्याअंतर्गत 228 तर मालमत्तेचे विद्रुपीकरण कायद्याअंतर्गत 25 प्रकरणांचा समावेश आहे, अशीही माहिती श्री. शिंदे यांनी दिली.

राज्यात मतदार नोंदणी तसेच मतदार यादी अचूक होण्याच्या दृष्टिकोनातून जुलै महिन्यात विशेष पुनरिक्षण कार्यक्रम राबविण्यात आला होता. त्यामध्ये प्रारूप मतदार याद्यातील त्रुटी दूर करण्यासाठी दावे आणि हरकती दाखल करण्याची संधी सर्वांना उपलब्ध करून देण्यात आली होती. तसेच या मतदार याद्यातील त्रुटी दाखवून देण्यासाठी मतदान केंद्रस्तरीय अधिकाऱ्यांना (बीएलओ) मदत करण्यास राजकीय पक्षांना मतदान केंद्रस्तरीय प्रतिनिधी (बीएलए) नेमण्याबाबत आवाहन करण्यात आले होते. त्यानुसार 1 लाख 10 हजार बीएलए नेमण्यात आले होते. या बीएलएच्या साहाय्याने मतदार यादी जास्तीत जास्त अचूक करण्याचा प्रयत्न करण्यात आला आहे, अशी माहिती सहमुख्य निवडणूक अधिकारी अनिल वळवी यांनी एका प्रश्नाला उत्तर देताना यावेळी दिली.

‘भांडवलशाहीची गांधीवादी समीक्षा ‘ व्याख्यानाला चांगला प्रतिसाद

पुणे :
” गांधीजींचे  अर्थशास्त्र हे गरिबीचे अर्थशास्त्र अशी केली जाणारी  टीका  योग्य नाही ,गांधीजींचे  अर्थशास्त्र हे खऱ्या समानतेचं  होते ”  असे प्रतिपादन अभ्यासक डॉ क्रांती रेडकर यांनी केले.
महाराष्ट्र गांधी स्मारक निधी आयोजित गांधी सप्ताह निमित्त ” भांडवलशाहीची गांधीवादी समीक्षा ” या विषयावरील  व्याख्यानात त्या बोलत होत्या .कार्यक्रमाचे अध्यक्षस्थानी  डॉ.कुमार सप्तर्षी (अध्यक्ष महाराष्ट्र गांधी स्मारक निधी) हे होते
कुटीर उद्योग वाढून उत्पादनाचे विकेंद्रीकरण करणे आणि मोठ्या उद्योगांशी त्यांची स्पर्धा होऊ देऊ नये, याकडे राज्य संस्थांनी लक्ष देणे गरजेचे आहे, अशी गांधीजिंची भूमिका होती,असे मत  डॉ.चैत्रा रेडकर यांनी  मांडले.आंतरराष्ट्रीय मागणीनुसार उत्पादन न करता स्थानिक गरजा आणि मागणीनुसार उत्पादन करून मग जादा उत्पादन झाल्यास निर्यात करणे हा योग्य मार्ग आहे.पूर्वी च्या जातीव्यवस्थेत मर्यादीत विकासाची शक्यता होती, वडिलोपार्जीत कौशल्य शिकून तोच धंदा करणे यात त्याचा व कुटुंबाचा विकासाला मर्यादा पडत.त्यामुळे जाती निर्मूलन होत नाही तोवर विकास होण्याची शक्यता कमी असे.
डॉ रेडकर पुढे म्हणाल्या ,’ गांधीवादी अर्थशास्त्राचा विचार हा मुख्यता त्यांच्या ग्रामोद्योग  ट्रस्टी शिप म्हणजे विश्वस्त संकल्पनेवर अधारित आहे, राज्यसंस्थांनी देशाचा कारभार हा एक प्रामाणिक विश्वस्त बनून पाहिला पाहिजे, अशी गांधींची भूमिका होती .गांधींना प्रातिनिधीक लोकशाहीची अपेक्षा व संकल्पना होती, पण आज लोकांनी प्रतिनिधी म्हणून निवडून दिलेले नेते एकदा निवडून गेले की मनाचा कारभार करतात, हम करेसो कायदा अशा तऱ्हेची नेत्यांची  दादागिरी  जनतेला सोसावी लागते. एकदा निवडून दिले की नेत्यावर जनतेचा कंट्रोल राहात नाही.ही लोकशाहीची आणि गांधीजींना अपेक्षित असलेल्या विश्वस्त संकल्पनेची मर्यादा आहे,.
गांधींबरोबर राहून सी ए असणारे अर्थ तज्ञ पी सी कुमारप्पा यांनी गांधींच्या अर्थ नितीचा, विचारांचा जवळून  अभ्यास केला, त्यावर लेखन केले.त्यांच्या मते कोणत्याही समाजाचा विकासाचा आराखडा समाज सापेक्ष असायला हवा, एकच आराखडा सर्वांना लागू करणे योग्य नाही, त्यामुळे विषमता वाढीस लागेल,असेही रेडकर म्हणाल्या
याच कार्यक्रमात  नरेश बदनोरे लिखित ‘आपले बापू’ या पुस्तकाचे प्रकाशन झाले .प्रास्तविक अन्वर राजन यांनी केले .सूत्र संचालन संदीप बर्वे यांनी केले.

पुणे : निवडणुकीच्या धामधुमीत राष्ट्रीय स्वयंसेवक संघाच्या संभाजी भागाच्या वतीने आयोजित शस्त्र पूजन कार्यक्रमाला, कोथरूड मतदारसंघातील उमेदवार व भाजप प्रदेशाध्यक्ष चंद्रकांत दादा पाटील यांनी संघाच्या गणवेशात एन्ट्री करत शस्त्रपूजन करून संघ परंपरा जोपासली.

चंद्रकांतदादा यांनी विशेष उपस्थिती लावत संघ गणवेशात पारंपरिक पद्धतीने शस्त्रपूजन करून संघाच्या कार्यक्रमाला हजेरी लावली. या वेळी प्रमुख वक्ते म्हणून राष्ट्रीय स्वयंसेवक संघाचे अखिल भारतीय समरसता गतीविधी मंडळ सदस्य रमेश आढाव, रमेश पांडव, सुधीर जवळेकर ,संदीप खरडेकर, मुरलीधर माहोळ तसेच संभाजी भाग कार्यवाहक उपस्थित होते.

आठवणींना मिळाला उजाळा
राष्ट्रीय स्वयंसेवक संघ आणि भारतीय जनता पार्टी यांचा अतिशय प्रामाणिक सेवक म्हणून चंद्रकांत दादा पाटील यांचा लौकिक आहे. त्याचीच प्रचिती आज या कार्यक्रमाच्या निमित्ताने पुन्हा पहायला मिळाली. कोथरूडमध्ये एमआयटी संस्थेच्या मैदानावर विजयादशमी व शस्त्रपूजन उत्सव संपन्न झाला. या कार्यक्रमात चंद्रकांतदादा   शिस्तबद्ध स्वयंसेवकाप्रमाणे सहभागी होताना पाहून, अनेकांच्या भुवया उंचावल्या. पण, पुण्यात  पाटील यांनी संघाचे काम केले आहे. तीन दशकांहून अधिक काळ पुण्यातील कार्य वाटचालीतील आठवणींना या वेळी उजाळा देण्यात आला.

विजयादशमी हा अवघ्या भारतवर्षांचा मोठा उत्सव. १९२५ मध्ये विजयादशमीच्याच दिवशी केशव बळीराम हेडगेवार यांनी राष्ट्रीय स्वयंसेवक संघाची स्थापना केली होती. तेव्हापासून राष्ट्रीय स्वयंसेवक संघातर्फे हा दिवस संघस्थापना दिवस म्हणून साजरा केला जातो. विजयादशमीच्या दिवशी शस्त्र पूजनाचे विशेष महत्त्व आहे. या दिवशी घरोघरी तसेच सार्वजनिकरित्या शक्तीरूपी दुर्गा, कालीमाता यांच्या पूजेसोबत शस्त्रांचे पूजन करण्याची परंपरा हिंदू धर्मात आहे. हा उत्सव देशाचे सरंक्षण व कायद्याचे रक्षण या कामात शस्त्रांचे वापर करणाऱ्याकरिता विशेष आहे. संकटसमयी शस्त्र आपल्या प्राणांचे रक्षण करतात या विश्‍वासाने शस्त्रांचे पूजन केले जाते.