पुणे-पर्वती कन्या या नावाने नवी ओळख लाभलेल्या नगरसेविका आणि पर्वती मतदार संघाच्या राष्ट्रवादी कॉंग्रेस आघाडी च्या उमेदवार अश्विनी नितीन कदम यांनी निवडणुकीच्या आपल्या प्रचारार्थ आज सकाळी गिरीधर भवन – ज्ञानदेव शाळा – समर्थ रामदास मंडळ – दत्त मंदिर – गजानन गॅरेज – ठाकरे कमान – एक दिल तरुण मंडळ – काळे सायकल मार्ट – व्हेईकल डेपो चौक – महाराष्ट्र मंडळ रस्ता – हुंडेकरी गॅरेज – राम मंदिर रस्ता – रांका हॉस्पिटल चौक – देवी मंदिर – झुंजार मंडळ – अरुणा आसेफ अली बाग – जागृती मंडळ – सौभाग्य मंगल कार्यालय – सातारा रस्ता – उत्सव हॉटेल चौक – नंदनवन हॉटेल – नानावटी मार्ग -अभय छाजेड यांचे  संपर्क कार्यालय अशा मार्गाने  प्रचार फेरी काढून  मतदारांशी संवाद साधला . पदयात्रेत घरोघरी महिलांनी औक्षण करून स्वागत केले. ज्येष्ठ नागरिकांचा वाढता पाठिंबा आणि सर्व धर्मीय समाज घटकांची सोबत हीच पर्वतीच्या सर्वांगीण विकासासाठी ऊर्जा असणार आहे. प्रचार दौऱ्यात महीलांची उपस्थिती लक्षणीय होती . त्याचप्रमाणे युवक – युवती , नागरिक यांच्यासह महाआघाडीचे सर्व पदाधिकारी कार्यकर्ते उपस्थित होते .

पुणे : आपल्या मतदार संघातील सामान्यातील सामान्य नागरिकांच्या भेटी घेत, त्यांच्या अपेक्षा जाणून घेत भारतीय जनता पक्ष, शिवसेना, आरपीआय (A), रासप, शिवसंग्राम, रयतक्रांती महायुतीचे शिवाजीनगर मतदार संघाचे अधिकृत उमेदवार सिद्धार्थ शिरोळे यांचा प्रचार सुरु आहे.

आजही चिखलवाडी, रेल्वे लाईन, ओरिएंट कॉम्प्लेक्स या ठिकाणी पदयात्रे मार्फत त्यांनी नागरिकांच्या गाठीभेटी घेऊन आशीर्वाद घेतले. या वेळी त्या भागातील अनेक प्रश्नांवर देखील त्यांनी नागरीकांशी संवाद साधला. या वेळी नगरसेवक विजय शेवाळे, अर्चना मुसळे, बंडू ढोरे, स्वाती लोखंडे, माजी महापौर सुरेश शेवाळे, अनिल भिसे, गणेश नायकरे, मधुकर मुसळे, सचिन वाडेकर, स्वामी नवले, उत्तम बहिरट, सोनाली भोसले, रिटा उपाध्याय, सुभाष बहिरट, सदाशिव मोरे, धनंजय दरे, अनिल तिळवणकर आदी सर्व पदाधिकारी उपस्थित होते.

पुणे : ज्येष्ठ कार्यकर्ते ,प्रमुख नागरिक ,आणि उत्साही युवक कार्यकर्ते यांच्या समवेत कसबा विधानसभा मतदारसंघातील कॉंग्रेस पक्षाचे उमेदवार अरविंद शिंदे यांच्या पदयात्रा कसबा पेठ आणि महात्मा फुले मंडई परिसरात बुधवारी काढण्यात आल्या .पेठांमधील पाणीप्रश्न सोडवावा अशी विनंती अनेक रहिवाशांनी शिंदे यांच्याकडे केली.

                कॉंग्रेस ,राष्ट्रवादी कॉंग्रेस आणि मित्र पक्षाच्या आघाडीचे उमेदवार    अरविंद शिंदे यांच्या प्रचाराचा प्रारंभ सकाळी  दारूवाला पूल येथील श्री नागेश्वर मंदिरापासून करण्यात आला.ही पदयात्रा कमला नेहरू हॉस्पिटल,कागदीपुरा, कुंभार वाडा, पवळे चौक,अजंठा मंडळ,त्वष्टा कासार मंडळ ,मोटे मंगल कार्यालय,नवग्रह मंदिर,फणी आळी तालीम,मुजुमदार बोळ, ,शिंपी आळी, ,फडके हौद, व्यवहार आळी,झांबरे चावडी, गावकोस मारुती या मार्गाने काढण्यात आली. ठिकठिकाणी रहिवाशांनी   शिंदे यांचे स्वागत केले. कसब्यासह सर्व पेठांमधील पाणीप्रश्नात  लक्ष घालून ,तो सोडवावा अशी विनंती नागरिकांनी शिंदे यांना केली .

                या पदयात्रेत रोहित टिळक ,रवींद्र धंगेकर ,सदानंद शेट्टी, सुजाता शेट्टी,बुवा नलावडे,जयसिंग भोसले, विद्याताई भोकरे,अजित दरेकर,मुख्तार शेख,विजय खराडे,गणेश नलावडे,प्रवीण करपे,राजेंद्र खराडे,नरेश नलावडे ,मयूर भोकरे,योगेश भोकरे,शैलेश भोकरे,परवेज तांबोळी,विजय तिकोने,बबलू कोळी,गीता तारु,वनिता जगताप  आदी सहभागी झाले होते.

                महात्मा फुले मंडईतील  श्री शारदा -गजाननाचे  दर्शन घेऊन तसेच लोकमान्य टिळक आणि लोकनेते यशवंतरावजी चव्हाण यांच्या पुतळ्याला पुष्पहार अर्पण करून मंडई परिसरातील पदयात्रेला  अरविंद शिंदे यांनी प्रारंभ केला .मंडईतील भाजीविक्रेते ,छोटे व्यावसायिक यांच्या भेटी घेतल्या.

        या पदयात्रेत  रोहित टिळक ,डॉ सतीश देसाई,रवींद्र धंगेकर,कमलताई व्यवहारे,वनराज आंदेकर अजित दरेकर,बाळासाहेब मारणे ,बाळासाहेब अमराळे,सुनील खाटपे,राजेंद्र भणगे,संजय मते,अनिल सोंडकर,प्रवीण करपे,प्रकाश पवार,सुर्यकांत मारणे ,अविनाश ताकवले,तीलेश मोता,अजय दराडे, सोनाली मारणे ,भारती कोंडे,नीता राजपूत,मनीषा नेवसे ,बटूल अपा शेख,शशिकला बोरकर आदी सहभागी होते    

पुणे-महापालिकेतील महापौर मुक्ता टिळक ,स्थायी समिती अध्यक्ष  सुनिल कांबळे ,कॉंग्रेसचे गटनेते अरविंदशिंदे आणि नुकतेच विरोधीपक्षनेते पदाचा भार सोडलेले आणि राष्ट्रवादीचे शहराध्यक्ष पदावर विराजमान झालेले चेतन तुपे ,मनसेचे गटनेते वसंत मोरे आणि काही  नगरसेवक विधानसभा निवडणुकीच्या रिंगणात नशीब आजमवण्यासाठी उतरले आहेत. त्यांच्या जोडीला अन्य प्रमुख पक्षांचे शहराध्यक्ष निवडणुकीत उतरले असून  महापालिकेच्या  कारकीर्दीवरच या साऱ्या शिलेदारांचे भवितव्य अवलंबून राहील असे म्हणता यायला हवे .या शिवाय राज्य शासनाने या शहराच्या सुव्यवस्थेचा मुद्दा कसा हाताळला हि बाब हि ध्यानात घेतली जाण्याची शक्यता आहेच . देशात काश्मीरचा समावेश नेमका कधी  झाला ,पुलवामा हल्ला कसा झाला .. या अशा राष्ट्रीय मुद्द्यांना या निवडणुकीत स्थान मिळण्याऐवजी आपल्या कुटुंबाची आणि विशेषतः शहराची अवस्था यावर आता मतदान होईल असे वाटते आहे .

म्हणतात ना, घर भक्कम तर गाव भक्कम ,गाव भक्कम ,तर शहर आणि शहर तर राज्य आणि राज्य भक्कम तर देश भक्कम … सुरुवात आपल्या घरापासून होते . त्यामुळे आपले कुटुंब त्यात येणाऱ्या अडचणी ,आपले शहर तिथे असलेल्या सोयी सुविधा या गोष्टीवर मतदानाचा आता भर राहील असे वाटते आहे. आणि या सर्व गोष्टी महापालिकेच्या कारभाराशी प्रथमतः निगडीत केल्या जावू शकतात .स्मार्ट सिटी च्या नावाखाली एकीकडे पारितोषिके घेत मार्केटिंग चा फंडा तर राबविला पण म्हणतात ना हातच्या कंकणाला आरसा कशाला त्याप्रमाणे शहरा ची बकाल अवस्था लपून राहू शकली नाही . या पावसाळ्यात आपल्या शहराला क्षणार्धात होत्याचे नव्हते करणारा कारभार पालिकेने कसा हाकलेला आहे ते दाखवून दिलेले आहेच .दुसरीकडे महापालिकेने अधिकृत  नौकर भरती टाळून बेरोजगार तरुणांची चालविलेली ठेकेदार पद्धतीवरील पिळवणूक आणि फसवणूक ,निसर्गाने जलसंपदा मुबलक उपलब्ध करून दिलेली असताना वर्षानुवर्षे कारभार हाकणारी महापालिका त्यावर सातत्याने फेल होत असल्याचे वास्तव .राजकरणी आणि बिल्डर ,आणि प्रशासन अशा त्रिकुटाने पुण्यातील निसर्गावर  केलेल्या वर्षानुवर्षे अतिक्रमणाने काय उपद्रव होवू शकतो हे या पावसाळ्याने दाखवून दिलेले आहेच . रस्त्यावर वाहतुकीला विनाकरण पोलिसी यंत्रणेकडून  ,आणि पालिकेच्या कारभाराने येणारे अडथळे आता बोचू लागले आहेत .

भारतीय जनता पक्ष, काँग्रेस, राष्ट्रवादी आणि महाराष्ट्र नवनिर्माण सेना या चारही प्रमुख पक्षांनी नगरसेवक आणि पदाधिकाऱ्यांना विधानसभा निवडणुकीसाठी उमेदवारी दिली आहे. सत्ताधारी भाजपचे पालिकेतील तीन आणि शहर स्तरावरील आणखी एक असे चार प्रमुख पदाधिकारी निवडणूक लढविणार आहेत. महापौर मुक्ता टिळक आणि कॉंग्रेसचे गटनेते अरविंद शिंदे,शिवसेनेचे नगरसेवक विशाल धनवडे कसबा पेठेतून, स्थायी समिती अध्यक्ष सुनील कांबळे पुणे कँटोन्मेंटमधून; चेतन तुपे ,वसंत मोरे हडपसर मधून लढत आहेत .  त्यांच्यासह ‘राष्ट्रवादी’चे सचिन दोडके, सुनील टिंगरे  हे आणखी तीन नगरसेवक महापालिकेतून विधिमंडळात जाण्याचे स्वप्न घेऊन निवडणूक लढविण्यासाठी रिंगणात उतरले आहेत.या सर्व पार्श्वभूमीवर पुणे शहराचे स्वरूप आणि ते सुव्यवस्थित राखण्यासाठी महापालिकेने राबविलेला कारभार हाच मुद्दा या निवडणुकीत महत्वाचा मानला गेला पाहिजे असे अनेकांना वाटते आहे . ‘आम्ही सारे भाऊ मिळून मिसळून खावू खाऊ’हि अँटीचेम्बर मधील कार्यपद्धती ठेवणाऱ्यांच्या आणि अँटीचेम्बर बाहेरील सार्वजनिक  जीवनात  रंगमंच बनवून त्यावर एकमेकांचे विरोधक असल्याचा आभासी अभिनय करणाऱ्या नेत्यांच्या अभिनयाला मतदार निश्चित आता भुलणार नाही असे म्हणता येणार आहे

पुणे- विधानसभा निवडणुकीचे बिगुल वाजले आहे. सर्व पक्षांनी आपल्या प्रचार सभा सुरू केल्या आहेत. मनसेनेही पुण्यातून आपल्या प्रचाराचा नारळ फोडण्याचे ठरवले होते. पण, आता राज यांच्या सभेवर पावसामुळे विघ्न आले आहे. पुण्यात सध्या जोरदार पाऊस पडत असल्याने नातू बागेतील मैदानावर होणारी राज ठाकरेंची सभा अखेर रद्द करण्यात आली आहे.

आगामी विधानसभा निवडणुकीच्या पार्श्वभूमीवर सर्व पक्षांकडून प्रचार सभा आणि रॅली काढल्या जात आहेत. या दरम्यान मनसेची पहिली सभा पुण्यात आयोजित केली होती. पण, काल पुण्यात रात्री झालेल्या जोरदार पावसामुळे नातू बागेतील मैदानावर पाणीच पाणी पाहण्यास मिळाले. त्यानंतर कार्यकर्त्यांनी मैदानावरील बाहेर काढण्याचा प्रयत्न केला. दिवसभर पाऊस पडला नाही, त्यामुळे सभा होईल असे सांगितले जात होते. पण, दुपारनंतर झालेल्या जोरदार पावसामुळे मैदानात परत पाणी साचले आणि अखेर राज ठाकरेंची सभा रद्द करण्यात आली.

मैदान सुकवण्यासाठी वाळू आणि माती टाकली. पण पावसाने या सर्व मेहनतीवर पाणी फिरवले आहे. हवामान खात्याने आज संध्याकाळी सुद्धा पावसाची शक्यता वर्तवली होती आणि तसेच घडले. त्यामुळे अखेर ही सभा रद्द झाली आहे. आजची सभा रद्द झाली असली तरी उद्या गोरेगाव आणि बांद्रा येथे दोन सभा होतील.

पुणे- : महाराष्ट्रात रेरा कायद्याची अंमलबजावणी होण्यापूर्वी ज्या गृहप्रकल्पांना पूर्णत्त्वाचा दाखला किंवा भोगवटा प्रमाणपत्र (ओसी) प्राप्त झाले आहे त्यांची रेरा कायद्याअंतर्गत नोंदणी करणे आतापर्यंत आवश्यक नव्हते. मात्र महसूल विभागाने नुकत्याच जारी केलेल्या एका परिपत्रकानुसार ही नोंदणी अनिवार्य करण्यात आली आहे. दिवाळी तोंडावर आली असताना काढण्यात आलेल्या या नव्या परिपत्रकामुळे घरांची खरेदी-विक्री अडचणीत आली असून मुहूर्त साधून सदनिका खरेदी करणा-या ग्राहकांना त्याचा फटका बसणार आहे.

या पार्श्वभूमीवर विकसकांची संघटना असलेल्या ‘क्रेडाई पुणे मेट्रो’ने राज्याचे नोंदणी महानिरीक्षक व मुद्रांक नियंत्रक अनिल कवडे आणि महारेराचे अध्यक्ष गौतम चॅटर्जी यांना पत्र पाठवून या तरतुदींबद्दल स्पष्टता आणली जावी अशी विनंती केली आहे.

रेरा कायद्याच्या अंमलबजावणीपूर्वी पूर्णत्त्वाचा दाखला वा भोगवटा प्रमाणपत्र मिळालेल्या प्रकल्पांना आता विक्री करार नोंदणी करायची असेल तरीही मूळ प्रकल्पाची तेव्हाच्या परिस्थितीनुसार रेरा नोंदणी नसल्यामुळे या सदनिकांच्या विक्री व्यवहारांना खीळ बसली आहे.  हीच समस्या रेरा येण्यापूर्वीच्या भूखंड विकसन प्रकल्पांच्या बाबतीतही उद्भवली आहे. याबरोबरच रेरा कायद्याच्या सेक्शन क्रमांक ३ (२) अनुसार ज्या गृहप्रकल्पांचे क्षेत्रफळ ५०० चौरस मीटरपेक्षा कमी आहे, तसेच गृहप्रकल्पात ८ पेक्षा कमी सदनिका आहेत, त्यांच्यासाठी अद्याप रेरा नोंदणी गरजेची नव्हती. ती आता अनिवार्य झाली आहे. याशिवाय सदनिका व भूखंडांच्या पुर्नविक्रीत विकसक हा कागदोपत्री भागीदार नसेल तर त्याला नोंदणी अनिवार्य नसावी, असे क्रेडाई पुणे मेट्रोने म्हटले आहे.

महसूल विभागाच्या नवीन परिपत्रकामुळे सदनिकांच्या विक्री व्यवहारांत संदिग्धता निर्माण झाली असून त्यामुळे विकसक आणि ग्राहक या दोघांनाही समस्या भेडसावत आहेत, त्यामुळे या परिपत्रकाबाबत लवकरात लवकर स्पष्टता आणली जावी, अशी विनंती क्रेडाई पुणे मेट्रोने पत्राद्वारे केली आहे.

क्रेडाई पुणे मेट्रोचे अध्यक्ष सुहास मर्चंट म्हणाले, ‘‘अनधिकृत बांधकामांना आळा घालणे आवश्यक असून त्यासाठी शासन करत असलेल्या प्रयत्नांना आमचा पाठिंबाच आहे. परंतु या परिपत्रकामुळे ऐेन सणासुदीच्या काळात सदनिकांच्या खरेदी-विक्री व्यवहारांना फटका बसतो आहे. प्रामाणिक विकसक आणि ग्राहक यात भरडले जात असल्यामुळे या तरतुदींचा पुर्नविचार होणे आवश्यक आहे.’’

पुणे : ‘मला जाऊ द्या ना घरी आता वाजले की बारा’ यासारखी ठसकेबाज लावणी, ‘मॉ तुझे सलाम’सारखे देशभक्ती जागविणारे गीत, ‘बाहो मे चले आ’सारखे रोमँटिक गीत या आणि अशा भावनाप्रधान गाण्यांच्या सादरीकरणाने नवीन पिढीतील गायक-वादकांनी संगीतरजनी फुलवली. पुणे नवरात्र महोत्सव समिती, फिनोलेक्स इंडस्ट्रीज आणि मुकुल माधव फौंडेशनतर्फे आयोजित २५ व्या पुणे नवरात्र महोत्सवात युवा गायक आणि कलाकारांनी ‘संगीतरजनी’ या विशेष कार्यक्रमात कलाकारांनी आपल्या अप्रतिम अदाकारीने रसिकांना मंत्रमुग्ध केले. महोत्सवाचे संयोजक आबा बागूल, जयश्री बागूल, घनःश्याम सावंत, नंदकुमार बानगुडे, नंदकुमार कोंढाळकर, रमेश भंडारी, अमित बागुल, विकी खन्ना यांच्यासह इतर मान्यवर उपस्थित होते.

अभिषेक सराफ, वेदा नेरुरकर आणि क्रिशा चिटणीस यांनी आपल्या सुमधूर गायनाने नवीन आणि जुन्या हिंदी-मराठी गीतांचे सादरीकरण केले. आरजे बंड्या आणि आरजे सानिका यांच्या खुमासदार निवेदनाने कार्यक्रमात रंगत आणली. तुषार दिक्षित, ओंकार पाटणकर (किबोर्ड), गौरव जोशी (बेस गिटार), संकेत नाशिककर (लिट गिटार), सागर साळुंके (बासरी), अभिषेक भुरुक (ड्रम्स), यांनी साथसंगत केली. ‘दुर्गे दुर्गट भारी’ या देवीच्या आरतीने आणि ‘मोरया मोरया’ या गणेशवंदनेने कार्यक्रमाची सुरुवात झाली. ‘कजरा मोहब्बतवाला’, ‘आओ हुजुर तुमको’, ‘सितारो मे ले चलू’ यांसारख्या हिंदी गीतांसह ‘डिपाडी डिपांग’, ‘अश्विनी ये ना’, ‘जीव रंगला’ अशा मराठी गीतांनी रसिकांच्या मनाला भुरळ घातली.

पुणे : “शहर स्वच्छ आणि सुंदर ठेवण्याची जबाबदारी आपल्या प्रत्येकावर आहे. आपल्याला स्वराज्य उभारणीत छत्रपतींचा मावळा होता आले नाही की स्वातंत्र्यलढ्यात योगदान देता आले नाही. पण आपण काळाची गरज आणि आपली जबाबदारी ओळखून प्रत्येकाने स्वच्छतासैनिक आणि स्वच्छतामित्र बनावे,” असे आवाहन घनकचरा विभागाचे सहआयुक्त ज्ञानेश्वर मोळक यांनी पुणेकरांना केले. अभिरुची परिसराची वाटचाल शून्यकचरा निर्मितीकडे होत आहे, ही आनांदाची बाब आल्याचेही त्यांनी नमूद केले.

माय अर्थ फाउंडेशन व अभिरुची मॉलच्या संयुक्त विद्यमाने ‘कचरा व्यवस्थापन व निर्मूलन’ या विषयावर आयोजित चर्चासत्रात मोळक बोलत होते. सिंहगड रस्त्यावरील अभिरुची मॉल येथे सॅनिटरी नॅपकीन डिस्पोजल इन्सिलेटरचे उद्घाटनही करण्यात आले. यावेळी पुनावाला वेस्ट मॅनेजमेंटचे मल्हार करवंदे, आरोग्य अधिकारी केतकी घाडगे, ‘बोला गारबेज’चे विशाल ठिगळे, ‘अभिरुची’चे यशोधन भिडे, कचरा व्यवस्थापन सल्लागार ललित राठी, माय अर्थ फाउंडेशनचे अध्यक्ष अनंत घरत, एन्व्हार्यमेंट क्लब ऑफ इंडियाचे निलेश इनामदार आदी उपस्थित होते. या कचऱ्याचे व्यवस्थापन ‘बोलाजी सर्व्हिसेस’ करणार आहे.

ज्ञानेश्वर मोळक म्हणाले, “महापालिका आज अनेक उपक्रम राबवत आहे. शहरातील कचरा शहरातच जिरवण्यासाठी विविध प्रकल्प हाती घेण्यात आले आहेत. १४०० मेट्रीक टन कचऱ्यावर प्रक्रिया होत असल्याने शहरालगतच्या परिसरात कचरा टाकण्याचे थांबले आहे. सोसायट्यांमध्ये कंपोस्ट खत, रेन वाटर हार्वेस्टिंग, सोलर एनर्जीसाठी प्रोत्साहन दिले जात आहे. प्लास्टिकमुक्त शहरासाठी प्रयत्न सुरु आहेत. त्याकरिता सामाजिक प्रबोधनाबरोबरच दंडात्मक कारवाईचा पर्यायही वापरला जात आहे. कोणत्याही उपक्रमाच्या यशासाठी नागरी सहभाग महत्वाचा आहे.” कचरा उचलण्याची जबाबदारी पालिकेची आणि कचरा करण्याचे माझा हक्कच आहे, ही मानसिकता पुणेकरांनी बदलावी, असेही आवाहन मोळक यांनी केले.

मल्हार करवंदे म्हणाले, “शहर स्वच्छ आणि सुंदर ठेवण्यासाठी आपण प्रत्येकाने पुढाकार घ्यावा. रस्ते स्वच्छ ठेवण्यासाठी आदर पुनावाला फाउंडेशनच्या प्रयत्नातून काम सुरु आहे. असाच प्रयत्न इतर संस्थानी करावा. शहराच्या सुंदरतेची आणि पर्यावरण रक्षणासाठी काही कल्पना, तंत्रज्ञान असल्यास आदर पुनावाला फाउंडेशन त्यामध्ये सहकार्य करण्यास तयार आहे.” कचरा व्यवस्थापन व पर्यावरण संवर्धन क्षेत्रात काम करणाऱ्या इतर मान्यवरांनीही आपली मते मांडली. अनंत घरत यांनी सूत्रसंचालन केले. यशोधन भिडे यांनी प्रास्ताविक केले. ललित राठी यांनी आभार मानले. यावेळी उपस्थितांनी स्वच्छतेची शपथ घेतली.