दिवाळी म्हणजे, प्रकाशाचा, दिव्यांचा आणि आनंदाचा सण आहे. सगळेच जण अत्यंत उत्साहाने हा सण साजरा करतात. दिवाळीचा आनंद साजरा करण्यसाठी यावेळी ‘झी युवा’ वाहिनीचे कलाकार सुद्धा एकत्र आले आहेत. सण साजरा करण्यात कुठलीही कसर या सर्वांनी सोडलेली नाही. सर्व कलाकारांनी मिळून दणक्यात हा दिवाळीचा सण साजरा केला आहे. नेहमीच्या व्यस्त कार्यक्रमातून वेळ काढून सर्वांनी दिवाळीचा आनंद लुटला.

नेहमी चित्रीकरणात व्यस्त असलेल्या कलाकारांना प्रत्येक सण कुटुंबासोबत साजरा करणे शक्य होत नाही. पण यंदा, ‘झी युवा’ वाहिनीने या कलाकारांना दिवाळी साजरी करण्याची संधी दिली आहे. वाहिनीच्या संपूर्ण ‘कुटुंबाने’ सेटवर एकत्र येऊन दिवाळी साजरी केली. ‘तू अशी जवळी रहा’, ‘ऑलमोस्ट सुफळ संपूर्ण’, ‘साजणा’, ‘प्रेम, पॉयजन, पंगा’ या सगळ्याच मालिकेतील कलाकारांनी एकत्र येऊन फराळाचा आनंद लुटला. भरपूर गप्पांसह, घरच्यांसाठी दिवाळीत काय काय विशेष करणार आहेत याविषयी सुद्धा कलाकारांनी चर्चा केली. शूटिंगमधून मिळालेल्या सुट्टीत घरी जाऊन दिवाळीच्या कामात हातभार लावणार असल्याचं सगळ्याच कलाकारांचं म्हणणं आहे. शरयू सोनावणे घरी खास कंदील करायला मदत करणार आहे. दामले कुटुंबाने नवे घर घेतले आहे; नव्या घरात आपल्या खरेदीचा वाटा काय असेल हेदेखील निखिलने या गप्पांमध्ये सांगितले. गप्पांसोबतच या कलाकारांचा अंताक्षरीचा डाव सुद्धा रंगला. कलाकारांनी आपल्या मालिकांची शीर्षकगीतं म्हणत हा आनंद वाढवला. दिवाळीच्या दिवसात सुट्टी मिळाली असल्याने दोन महिन्यानंतर घरी जात असल्याचा आनंद गौरीच्या चेहऱ्यावर दिसत होता. फराळातील पदार्थांपैकी, बनवण्यासाठी सगळ्यात कठीण असल्याने अनारसे आवडत असल्याचं अभिजितने सांगितलं. आईबाबांना दिवाळीत खास सरप्राईज देणार असल्याचं पूजाने सांगितलं आहे. दिवाळीचा माहोल सेटवर साजरा होत असताना, सर्व कलाकारांनी करण बेंद्रे याला वाढदिवसाच्या शुभेच्छा सुद्धा दिल्या.

यंदाची दिवाळी साजरी करण्यासाठी तितिक्षा तावडे आणि सिद्दार्थ बोडके यांचे काही खास प्लॅन्स आहेत.या दोघांनी सर्वांना दिवाळीच्या शुभेच्छा दिल्या. इतरांना त्रास होणार नाही अशाप्रकारे दिवाळी साजरी करण्याचं आवाहन सगळ्यांना केलं. शिवाय त्यांच्या प्लॅन्सबद्दल बोलताना हे दोघे म्हणाले;

“झी युवाच्या कटुंबासोबत दिवाळी साजरी केली जाणार आहे. तसंच ‘तू अशी जवळी राहा’ मालिकेच्या सेटवर सुद्धा दिवाळीचा आनंद लुटण्याची संधी यंदा मिळणार आहे. दिवाळीसाठी मोठी सुट्टी मिळणार असल्याने मी घरी सुद्धा जाणार आहे. त्यामुळे यंदा तीनवेळा दिवाळी साजरी करायला मिळणार असल्याने मी खूप खुश आहे.”

-तितिक्षा तावडे

“झी युवा सोबत दिवाळी साजरी करण्याचं हे दुसरं वर्ष आहे. सेटवर दिवाळीचा माहोल आणि मिळणार असलेली मोठी सुट्टी या दोन्ही गोष्टींमुळे मला खूप आनंद झालेला आहे. मागच्या वर्षी दिवाळीत घरी जायला मिळालं नव्हतं, पण यंदा मोठी सुट्टी असल्याने मी घरी जाऊ खूप धमाल करणार आहे. यंदा तीनवेळा दिवाळी साजरी करायची असल्याने उत्सुकता खूप उत्सुकता लागून राहिली आहे.”

-सिद्धार्थ बोडके

‘झी युवा’ वाहिनीवरील  ‘प्रेम पॉयजन पंगा’ या मिलकेतून पहिल्यांदाच मराठी टेलिव्हिजनवर इच्छाधारी नागीण दिसणार आहे. ही निराळी भूमिका साकारणारी अभिनेत्री शरयू सोनावणे तिच्या या भूमिकेविषयी आणि मालिकेबद्दल काय सांगतेय, ते बघूया;

१.’प्रेम, पॉयजन, पंगा’ या मालिकेसाठी तुझी निवड कशी झाली?

मला ऑडिशनसाठी बोलावलं गेलं आणि मी तिथे गेले. साधारणपणे ४-५ ओळींचं स्क्रिप्ट असेल अशी माझी अपेक्षा होती. पण जवळपास २० ओळींचं स्क्रिप्ट बघून आधी मला भीती वाटली होती. एवढं पाठांतर करणं मला कठीण वाटत होतं. पण, वाचायला सुरुवात केल्यावर त्यातलं वेगळेपण मला जाणवलं. ही व्यक्तिरेखा फार वेगळी असल्याचं लक्षात आल्यामुळे मी योग्यप्रकारे मेहनत घेतली. या मेहनतीचं फळ मला मिळालं आणि ही वेगळी भूमिका करण्याची संधी मला मिळाली. अर्थात, मॉक शूट झाल्यावर सुद्धा अंतिम निर्णय कळेपर्यंत मनात धाकधूक होतीच. अंतिम निर्णय केल्यानंतर मात्र शूट कधी सुरु होईल याची उत्सुकता लागून राहिली होती.

२. तुझ्या व्यक्तिरेखेबद्दल थोडक्यात सांग. 

जुई भोळे असं माझ्या भूमिकेचं नाव आहे. एकुलती एक असल्याने घरात सगळ्यांचीच फार लाडकी आहे. मजामस्ती करणं, आपल्या आवडीनिवडी जपणं याची तिला आवड आहे. सेल्फीक्वीन, टिकटॉकची आवड असलेली अशी ही मुलगी सोशल मीडियावर नितांत प्रेम करते. सोशल मीडियावर ती खूप प्रसिद्ध सुद्धा आहे. मित्रमंडळींच्यात असतानाही आपली वेगळी छाप पडण्याची कला तिच्याकडे आहे. लहान मुलांची आवड असल्याने त्यांच्याशी खेळणं, त्यांना शिकवणं, या गोष्टी ती करत असते. थोडक्यात सांगायचं झालं, तर आयुष्य मजेत जगणारी बिनधास्त अशी तरुण म्हणजे ‘प्रेम पॉयजन पंगा’मधील जुई!!!

३. इच्छाधारी नागीण मराठी मालिकेत पहिल्यांदाच पाहायला मिळणार आहे. ही व्यक्तिरेखा तू साकारते आहेस. त्याविषयी काय सांगशील?

‘इच्छाधारी’ नागीण या शब्दातच एक गम्मत आहे. जुई आपलं छान आयुष्य जगात असताना अचानक ती नागीण होते, त्यामुळे तिला दुहेरी जीवन जगावं लागणार आहे. आपल्या इच्छा पूर्ण करत असताना, इच्छाधारी नागीण असल्याचं भान जुईला ठेवावं लागतं. अर्थात, ती जरी नागीण असली, तरी कुणाचाही बदल घेण्यासाठी ती आलेली नाही. सगळयांना समजून घेणं, सगळ्यांच्यात मिळून मिसळून राहणं या गोष्टी तिला हव्या आहेत. मराठी टेलिव्हिजनवर पहिल्यांदाच नागीण अवतरणार आहे, हे जितकं खरं आहे, तितकंच ही नागीण वेगळी आहे यातही तथ्य आहे. ही निराळी भूमिका साकारताना मला सुद्धा खूप मजा येतेय. ही भूमिका सगळ्यांना आवडेल याची खात्री आहे.

४. ही भूमिका साकारण्यासाठी काही खास मेहनत घ्यावी लागली का?

जुई ही एक बिनधास्त मुलगी आहे. तिला सेल्फीक्वीन म्हणावं, इतकी तिला सेल्फीजची आवड आहे. पण, अचानक ती नागीण असल्याचं तिला लक्षात येतं. नागीण झाल्यानंतरची जुई साकारत असताना, ‘स’चा उच्चार लांबवण्याची गरज पडत आहे. यासाठी मेहनत घ्यावी लागते. इच्छाधारी नागिणीला, चंद्रप्रकाश, आग वगैरे गोष्टींपासून धोका असतो. त्यामुळे, हे पात्र साकारत असताना त्यानुसार अभिनय करण्याची गरज पडते. या गोष्टी आव्हानात्मक आहेत. अर्थातच, हे आव्हान पेलायची इच्छा सुद्धा ‘इच्छाधारी’ नागीण साकारन्यासाठी माझ्याकडे आहे.

५. मालिकेचे प्रोमोज बघितल्यानंतर, चाहत्यांच्या प्रतिक्रिया नेमक्या कशा होत्या?

प्रोमो पहिल्यांनंतर अनेकांनी मला फोन केले. प्रत्येकाने ज्याचा-त्याचा अंदाज बांधला होता. काही जणांना मी रोबोट वाटले, तर काहींनी मी भूत आहे असं सांगितलं. अनेकांना असंच वाटलं असताना, काहींनी मात्र नागीण असल्याचा योग्य अंदाज बांधला होता. हे पात्र रोबोट आहे असं समजलेल्या अनेकांनी मला ते साकारण्यासाठी मी काय करावं याबद्दल सल्ले दिले होते. पण, एकूणच या सगळ्या फोनकॉल्समधून मालिकेविषयी प्रेक्षकांना खूप उत्सुकता असल्याचं दिसून आलं आहे.