पुणे दि. ६, छत्रपती शिवाजी महाराजांचा आदर्श व कर्तुत्वाची सर्वांनी आठवण ठेवून छत्रपती शिवाजी महाराज, छत्रपती शाहू महाराज, महात्मा फुले, डॉ. बाबासाहेब आंबेडकर या महापुरुषांची विचारधारा स्मरण करून सर्वांनी पुढे गेले पाहिजे, अशी अपेक्षा उपमुख्यमंत्री तथा जिल्ह्याचे पालकमंत्री अजित पवार यांनी व्यक्त केली.

छत्रपती शिवाजी महाराजांच्या ३५२ व्या श्री शिवराज्याभिषेक दिनानिमित्त जिल्हा परिषद येथे आयोजित कार्यक्रमात श्री पवार यांच्या हस्ते ‘शिवस्वराज्य’ गुढीचे पूजन करून गुढी उभारण्यात आली त्यावेळी ते बोलत होते. यावेळी प्र विभागीय आयुक्त कविता द्विवेदी, जिल्हा परिषदेचे मुख्य कार्यकारी अधिकारी गजानन पाटील, अतिरिक्त मुख्य कार्यकारी अधिकारी चंद्रकांत वाघमारे, प्रकल्प संचालक शालिनी कडू, उपमुख्य कार्यकारी अधिकारी श्रीकांत खरात आदी उपस्थित होते.

उपमुख्यमंत्री श्री पवार म्हणाले, छत्रपती शिवाजी महाराज, छत्रपती शाहू महाराज, महात्मा जोतिबा फुले, डॉ. बाबासाहेब आंबेडकर यांची विचार धारा सर्व जातीधर्माला न्याय देणारी असून सर्वांमध्ये जातीय सलोखा निर्माण करणारी आहे. ही विचारधारा राज्यातील, देशातील सर्वांमध्ये एकोपा ठेवणारी आहे या विचारांशिवाय आपण राज्य, देश पुढे नेऊ शकत नाही. या थोर महापुरुषांनी जी शिकवण आपल्या सर्वांना दिली आहे तिचे सर्वांनी सतत स्मरण करून पुढील वाटचाल केली पाहिजे, असेही श्री. पवार म्हणाले.

शिवराज्याभिषेकच्या दिवशी त्याकाळी घराघरांवर गुढ्या उभारण्यात आल्या होत्या. त्यामुळे आज आनंदाचे प्रतीक म्हणून सर्वत्र गुढी उभारली जाते. शिवराज्याभिषेकाच्या दिवशी महाराष्ट्रात, देशात पहिल्यांदाच रयतेचे राज्य सुरू झाले, ‘शिवस्वराज्य’ स्थापन झाले. मराठी साम्राज्याला पहिले राजे छत्रपती शिवाजी महाराजांच्या रूपाने मिळाले. मराठी राज्य स्थापना झाल्याचा हा दिवस सर्वांसाठी अभिमानाचा, स्वाभिमानाचा,आनंदाचा दिवस आहे. ६ जून हा ‘शिवस्वराज्य दिवस ‘म्हणून साजरा करण्याचा निर्णय राज्य शासनाने घेतला आहे. त्याची अंमलबजावणी राज्यात सर्वत्र होत आहे. असे त्यांनी सांगितले.

सन २०१९-२० या काळात कोरोना सारखे संकट, आजार अचानक जगात व देशात आले त्या काळात अनेकांना आपला जीव गमवावा लागला आपले जीवाभावाचे सहकारी आपल्याला सोडून गेले या संकटात जिल्हा परिषद मधील व त्यांच्याशी संबंधित असलेल्या ४२ अधिकारी,कर्मचाऱ्यांना स्वतःचा जीव गमवावा लागला या सर्वांची आठवण राहावी म्हणून,या ४२ सहकाऱ्यांची नावे असलेल्या फलकाचे
उपमुख्यमंत्री श्री. पवार यांच्या हस्ते
अनावरण करण्यात आले.

कार्यक्रमात सुरुवातीला छत्रपती शिवाजी महाराज यांच्या पुतळ्यास उपमुख्यमंत्री श्री. पवार यांनी पुष्पहार अर्पण करुन वंदन केले. त्यानंतर यांच्या हस्ते जिल्हा परिषदेमधील कोविड योद्धा स्मारकाचे व डिजिटल प्रणालीचे उद्घाटन झाले. कार्यक्रमानंतर जिल्हा परिषदेमध्ये सुरु असलेल्या हिरकणी कक्षाची उपमुख्यमंत्री श्री. पवार यांनी यावेळी पाहणी केली.

कार्यक्रमाला जिल्हा परिषदेतील विविध विभागाचे विभाग प्रमुख, कर्मचारी उपस्थित होते.

प्रदेशाध्यक्ष सुनिल तटकरे यांच्याकडून सर्व कार्यकर्त्यांना आणि नागरिकांना आग्रहाचे निमंत्रण

पुणे | ६ जून २०२५ : राष्ट्रवादी काँग्रेस पार्टी (अजित पवार गट) यंदा आपला २६ वा वर्धापन दिन पुण्यातील बालेवाडी येथे मोठ्या उत्साहात आणि भव्य कार्यक्रमाच्या स्वरूपात साजरा करणार आहे. याबाबत माहिती देताना पक्षाचे प्रदेशाध्यक्ष खा. सुनिल तटकरे यांनी पत्रकार परिषदेत सर्व पत्रकार बांधवांबरोबरच कार्यकर्ते, पदाधिकारी आणि नागरिकांना कार्यक्रमासाठी आग्रहाचे निमंत्रण दिले.

या वर्धापन दिनानिमित्त होणाऱ्या कार्यक्रमाला राष्ट्रवादी काँग्रेसचे राष्ट्रीय अध्यक्ष व राज्याचे उपमुख्यमंत्री मा. ना. अजितदादा पवार, पक्षाचे वरिष्ठ नेते, आमदार, खासदार, माजी आमदार-खासदार, विविध आघाड्यांचे पदाधिकारी व हजारो कार्यकर्ते उपस्थित राहणार आहेत. विधानसभेच्या निवडणुकीनंतर होणारा हा पहिला वर्धापन दिन असल्याने सर्वत्र उत्साहाचे वातावरण आहे, असे तटकरे यांनी सांगितले.

शिवराज्याभिषेक दिनानिमित्त शिवप्रतिमेला अभिवादन व समाजोपयोगी उपक्रम

३५२ व्या शिवराज्याभिषेक दिनाचे औचित्य साधून, तटकरे यांनी पुण्यातील बालेवाडी येथे छत्रपती शिवाजी महाराजांच्या पुतळ्याला पुष्पहार अर्पण करून अभिवादन केले. त्यानंतर पुणे शहर राष्ट्रवादी महिला काँग्रेसच्या कार्याध्यक्ष पूनम विशाल विधाते यांच्या पुढाकाराने मुलींना शालेय साहित्य वाटप करण्यात आले.

या पत्रकार परिषदेस आणि उपक्रमांसाठी प्रदेश सरचिटणीस व कोषाध्यक्ष शिवाजीराव गर्जे, आ. चेतन तुपे, प्रमुख प्रवक्ते आनंद परांजपे, महिला प्रदेशाध्यक्षा रुपाली चाकणकर, युवक प्रदेशाध्यक्ष सूरज चव्हाण, सहकोषाध्यक्ष संजय बोरगे, प्रदेश प्रवक्ते संजय तटकरे, सुरेश घुले, योगेश बहेल, राजलक्ष्मी भोसले, माजी आमदार सुनील टिंगरे, माजी आमदार विलास लांडे, सुभाष जगताप, प्रदीप देशमुख, प्रमोद हिंदुराव यांच्यासह अनेक मान्यवर पदाधिकारी उपस्थित होते.

विधानसभा निवडणुकीत घवघवीत यश

नुकत्याच पार पडलेल्या विधानसभा निवडणुकीत पक्षाने घड्याळ चिन्हावर ७ जागा जिंकत भक्कम कामगिरी केली. यामुळे राज्यभरात पक्षाबाबत जनतेचा विश्वास वाढला असून कार्यकर्त्यांमध्येही नवचैतन्य निर्माण झाले आहे. “राज्याच्या कानाकोपऱ्यातील प्रत्येक कार्यकर्त्याच्या मनात सध्या प्रचंड उत्साह आहे,” असे मत यावेळी मा. तटकरे यांनी व्यक्त केले.

महायुती सरकारचा घटक म्हणून सकारात्मक वाटचाल

राष्ट्रवादी काँग्रेस पक्ष सध्या महायुती सरकारचा महत्त्वाचा भाग आहे. या सरकारमध्ये भाजपाचे मुख्यमंत्री देवेंद्र फडणवीस, राष्ट्रवादी काँग्रेस पार्टीचे उपमुख्यमंत्री अजितदादा पवार आणि शिवसेनेचे उपमुख्यमंत्री एकनाथ शिंदे कार्यरत आहेत. प्रत्येक पक्षाचा स्वतंत्र जाहीरनामा असून, राष्ट्रवादी काँग्रेसनेही आपले धोरण पारदर्शकतेने लोकांसमोर मांडले आहे.

कार्यकर्त्यांसाठी प्रेरणादायी आणि आत्मविश्वास वाढवणारा कार्यक्रम

या वर्धापन दिनानिमित्त पक्षाच्या आतापर्यंतच्या कामगिरीचे सिंहावलोकन करण्यात येणार असून, आगामी स्थानिक स्वराज्य संस्थांच्या निवडणुकांसाठी दिशादर्शनदेखील होणार आहे. पक्षाचे भविष्यातील ध्येय धोरण जनतेपुढे मांडले जाणार आहे.

महाराष्ट्रातील १३ कोटी जनतेच्या अपेक्षा लक्षात घेता, राष्ट्रवादी काँग्रेस पक्ष समाजाभिमुख, पारदर्शक व विकासात्मक कारभार करण्यास कटिबद्ध आहे. वर्धापन दिनाच्या निमित्ताने पक्षाचे एकजूट आणि जनतेप्रती असलेली जबाबदारी अधोरेखित केली जाणार आहे, असेही मा. तटकरे यांनी सांगितले.

पुणे-

कुठल्याही प्रकारच्या सेलिब्रिटी अथवा मान्यवर व्यक्तींना न बोलावता पहलगाम हल्यात शहीद झालेल्या जगदाळे कुटुंबीय, गणबोटे कुटुंबीय, हुंडाबळी प्रकरणातील बळी ठरलेली स्मृतीशेष वैष्णवी हगवने यांच्या कुटुंबातील सदस्य या सर्वांच्या हस्ते छत्रपती शिवरायांना अभिषेक करण्यात आला. राजर्षी शाहू महाराजांनी स्थापन केलेल्या कोल्हापूर येथील श्री शिवाजी वैदिक विद्यालयातून अभ्यास करून महंत कैलास वडघुले कुमारी स्वरा धुमाळ यांनी राज्याभिषेक विधी संपन्न झाला. या प्रसंगी शस्त्र पूजन, धान्य पूजन, फळांचे पूजन, जगद्गुरु संत तुकाराम महाराज्यांच्या गाथेचे पूजन, छत्रपती शिवरायांच्या नित्य वापरात वापरत असलेल्या कवड्याच्या माळीचे पूजन, शिवमुद्रेचे पूजन करण्यात आले. या प्रसंगी शिल्पकार सौ.सुप्रिया शेखर शिंदे, ॲड.प्राजक्ता मोरे, पत्रकार चंद्रकांत फुंदे यांना शिवसन्मान पुरस्काराने सन्मानित करण्यात आले. आखिल भारतीय शिवजन्मोत्सव समितीचे विकास पासलकर यांनी प्रास्ताविक केले पासलकर म्हणाले व्यवस्थेच्या बळी ठरलेल्या या कुटुंबातील सदस्यांचे बलिदान व्यर्थ जाणार नाही, आम्ही तुमच्या पाठीशी आहोत हा संदेश शिवराज्याभिषकाच्या निमित्ताने देण्याचा प्रयत्न आम्ही आखिल भारतीय शिवजन्मोत्सव समितीच्या माध्यमातून करत आहोत. शिवराजाभिषेकासाठी मोहन जोशी, माधव जगताप, संदीप कदम, राजेंद्र डुबल, संदीप खलाटे, निलेश निकम, मारुतराव सातपुते, रमेश गुजर तसेच मोठ्या संख्येने शिवप्रेमी उपस्थित होते.
कार्यक्रमाच्या यशस्वितेसाठी निलेश इंगवले, अक्षय रणपिसे, सचिन जोशी, मंदार बहिरट, रोहित ढमाले, युवराज ढवळे यांनी परिश्रम घेतले
सूत्र संचालन विराज तावरे यांनी केले तर प्रशांत धुमाळ यांनी आभार मानले.

खासदार मेधा कुलकर्णी यांच्या पुढाकाराने शनिवारवाड्याची पाहणी, वृक्षारोपण

पुणे: “मध्यकालीन भारताच्या इतिहासात योगदान असलेल्या शनिवारवाड्याचे स्थान महत्वाचे आहे. ही वास्तू पुण्याची, पेशवाईची ओळख आहे. दरवर्षी लाखो पर्यटक शनिवारवाड्याला भेट देतात. इथे येणाऱ्या पर्यटकांना शनिवारवाड्याचा भव्यदिव्य अनुभव देण्यासाठी पुरातत्व विभागाच्या नियमांच्या अधीन राहून आधुनिक तंत्रज्ञानाच्या साहाय्याने अधिक समृद्ध करण्यासाठी प्रयत्नशील आहे,” असे प्रतिपादन केंद्रीय पर्यटन व सांस्कृतिक मंत्री गजेंद्र सिंह शेखावत यांनी गुरुवारी केले.

पुण्याचे वैभव, ऐतिहासिक वारसास्थळ असलेल्या शनिवारवाड्याला गजेंद्रसिंह शेखावत यांनी भेट देऊन पाहणी केली. राज्यसभा खासदार प्रा. डॉ. मेधा कुलकर्णी यांच्या पुढाकाराने या भेटीचे आयोजन केले होते. प्रसंगी शेखावत यांच्या हस्ते बहुभाषिक स्मार्ट डिजिटल ऑडिओ गाईड ऍपचे उद्घाटन, तसेच, शनिवारवाड्याच्या परिसरात वृक्षारोपण करण्यात आले. यावेळी पुरातत्व विभागाच्या संचालक श्रीलक्ष्मी, पेशव्यांचे वंशज पुष्कर पेशवा, शनिवारवाडा संवर्धनासाठी कार्यरत किरण कलमदानी, उदय कुलकर्णी, पल्लवी गोखले, इतिहास अभ्यासक डॉ. गणेश राऊत आदी उपस्थित होते.

गजेंद्रसिंह शेखावत म्हणाले, “छत्रपती शिवाजी महाराज यांच्या हिंदवी स्वराज्यानंतर पेशवाई आणि पुण्याचे योगदान व त्याचा नावलौकिक देशभरात आहे. त्यामुळे ही केवळ एक ऐतिहासिक वास्तू नसून, समृद्ध इतिहासाचा अनमोल ठेवा आहे. पर्यटकांना येथील इतिहास सहजपणे समजून घेता यावा, पर्यटन अधिक सुकर व्हावे, यासाठी प्रा. डॉ. मेधा कुलकर्णी यांच्यासह इतर इतिहास अभ्यासकांनी व शनिवारवाडा संवर्धन कार्यात योगदान देणाऱ्या लोकांनी माझ्याकडे काही प्रस्ताव दिले आहेत. शनिवारवाड्याचे विविध पैलू, त्याचे महत्व समजून घेतले. त्यावर विचार करून, पुरातत्व विभागाशी समन्वय साधून येथे सोयीसुविधा उभारण्यासाठी प्रयत्न करेन. आज उद्घाटन झालेल्या ऑडिओ गाईडमुळे पर्यटकांना शनिवारवाड्याचा इतिहास ध्वनिस्वरूपात समजून घेता येईल.”

“ही संरक्षित वास्तू असल्याने इथे सुधारणा करण्यावर बरीच बंधने आहेत. मूळ साच्यामध्ये फेरबदल करता येत नाही. यासह अन्य काही अडचणी असल्याने ऐतिहासिक संरक्षित वास्तूंमध्ये पर्यटकांना आवश्यक सोयीसुविधा तयार करण्यात अडचणी येतात. तरीही यातून मार्ग काढून या पर्यटनस्थळाचा अनुभव चांगल्या पद्धतीने कसा घेता येईल, यावर उपाययोजना करणार आहोत. संरक्षित वास्तूच्या १०० मीटर परिसरात कोणतेही बांधकाम करता येत नाही, तर २०० मीटर परिसरात काही काम करायचे असल्यास कायद्याने परवानगी घेणे आवश्यक आहे. त्यामुळे शक्य होईल, त्या सुविधा उपलब्ध करून देऊ,” असेही त्यांनी नमूद केले.

प्रा. डॉ. मेधा कुलकर्णी म्हणाल्या, “भारताच्या इतिहासात पुण्याला आणि शनिवारवाड्याला अनन्यसाधारण महत्व आहे. पेशवा बाजीराव यांच्यासह पेशवाईतील इतर अनेकांचा जाज्वल्य इतिहास येथे येणाऱ्या पर्यटकांना माहिती व्हावा, शनिवारवाड्याचे वैभव काय होते, हे प्रतिकृतीच्या माध्यमातून का होईना, पर्यटकांना दाखवण्यासाठी उभारण्याची गरज आहे. त्यासाठी मंत्री महोदय, तसेच पुरातत्व विभागाकडे पाठपुरावा करत आहे. गणपती महाल, मूळ सात मजली शनिवारवाडा व अन्य प्रसंग, छायाचित्रांचे दालन अशा गोष्टी येथे उभारण्यासाठी प्रयत्नशील राहणार आहे.”

आम आदमी पार्टी चे युवक शहरध्यक्ष रविराज काळे यांच्या पुढाकाराने आणि पिंपरी चिंचवड महानगरपालिकेच्या सहकार्यातून वृक्षारोपण उपक्रम उत्साहात पार…..

पिंपरी चिंचवड – जागतिक पर्यावरण दिनानिमित्त पिंपळे निलख परिसरात हरित क्रांतीची प्रेरणादायी सुरुवात करण्यात आली. “वृक्ष रुपी हिरवी ओळख” या संकल्पनेतून आम आदमी पार्टीचे युवक शहराध्यक्ष रविराज काळे यांच्या पुढाकाराने व पिंपरी चिंचवड महानगरपालिकेच्या उद्यान विभागाच्या सहकार्यातून वृक्षारोपण उपक्रम पार पडला.

या उपक्रमात पिंपरी चिंचवड महानगरपालिका उद्यान विभागाचे सहाय्यक आयुक्त उमेश ढाकणे, उद्यान अधिक्षक योगेश वाळूंज,सहाय्यक उद्यान अधिक्षक राजेश वसावे, सामाजिक कार्यकर्ते सुरेश गायकवाड, उद्यान सहाय्यक अनिल गायकवाड, तसेच पिंपळे निलख व विशालनगर परिसरातील नागरिक मोठ्या संख्येने सहभागी झाले होते.

या उपक्रमात विविध प्रकारचे स्थानिक वृक्ष लावून परिसराला हिरवेगार आणि प्रदूषणमुक्त करण्याचा संकल्प करण्यात आला. नागरिकांचा सहभाग आणि सकारात्मक प्रतिसाद पाहता, हा उपक्रम भविष्यात आणखी मोठ्या प्रमाणात राबविण्याचा निर्धार व्यक्त करण्यात आला.

रविराज काळे यांनी यावेळी सांगितले की, “हिरवे पर्यावरण ही काळाची गरज आहे. प्रत्येक नागरिकाने किमान एक तरी झाड लावण्याचा आणि त्याची जबाबदारी स्वीकारण्याचा संकल्प केला पाहिजे.”

या उपक्रमामुळे पिंपळे निलखमध्ये एक नवे हरित पर्व सुरू झाले असून, हीच झाडं उद्याच्या हरित भविष्यासाठी आधारस्तंभ ठरणार आहेत.

पुणे-आज दि. ०५/०६/२०२५ रोजी जागतिक पर्यावरण दिनाचे औचित्य साधून सदर ठिकाणी पुणे महानगरपालिकेमार्फत वृक्ष रोपणाच्या कार्यक्रमाचे अयोजन करण्यात आले होते यावेळी महापालिका आयुक्त नवल किशोर राम, अति. महापालिका आयुक्त (इस्टेट) पृथ्वीराज बी.पी. उपस्थित होते.

पुणे शहरातून मुळा, मुठा व मुळा मुठा नदीचा एकात्मिक पद्धतीने विकास करणे करीता पुणे महानगरपालिकेच्या नदी पुनरुज्जीवनप्रकल्प राबविणेत येत आहे. पुणे शहरातून वाहणाऱ्या मुळा, मुठा व मुळा-मुठा या नद्यांची एकूण लांबी ४४.४० कि. मी. आहे.
संगमवाडी ते बंडगार्डन पूल (स्ट्रेच-९) या ३.७ कि.मी. लांबीचे काम व बंडगार्डन पूल ते मुंडवा पूल (स्ट्रेच-१० व ११) या ५.३ कि.मी. असे एकूण ९.० कि.मी. पर्यंत काम प्रगती पथावर आहे.
स्ट्रेच -९ मध्ये शादलबाबा दर्गा ते गणेश घाट या दरम्यान ३०० मी. नदीकाठ सुधारणेच्या प्रकल्पाचे काम पुर्ण झाले असून, स्ट्रेच-१० व ११ मध्ये कोरेगांव पार्क येथे ८०० मी. लांबीचे काम अंतिम टप्प्यात आहे.
संगमवाडी ते बंडगार्डन पूल (स्ट्रेच-९) व बंडगार्डन पूल ते मुंढवा पूल (स्ट्रेच-१० व ११) मध्ये प्रामुख्याने सुभाबूळ, कुभाबूळ व काटेरीबाभूळ, विलायती चिंच प्रजातीमधील झाडे काढून सदर ठिकाणी विदेशी प्रजाती ऐवजी स्वदेशी रोपे नियोजन बध्द पध्दतीने लावण्यात येणार आहे.
नवीन लागवड करण्यात येणाऱ्या झाडांची नावे पुढील प्रमाणे :-
करंज, मेढसिंगी, कांचन, कदंम्ब, साग, मुचकुंद, रक्तरोहिडा, पिंपळ, कैलासपती, बकुळ, काळाकुडा, पानजांभूळ इ. फुले येणारी झाडे.
आंबा, जांभूळ, गुलार, पुत्रवंति, भोकर, खिरणी, अर्जुन, आसन, चिरंजी इ. फळझाडे जी पक्षांसाठी उपयोगी आहेत.
घोळ, अर्जुन, आंबा, खिरणी इ. पक्षांना घरटी बांधण्यासाठी उपयुक्त अशी झाडे.
लिंब, कदम्ब, जांभूळ, आंबा, बड इ. मोठी झाडे सावलीसाठी लावण्यात येत आहेत .नदी पुनरुज्जीवन प्रकल्पा अंतर्गत सुमारे १० ते १५ फुट उंचीची १२५० रोपे लावण्यात आली आहेत. तसेच सदर १२५० रोपांपैकी ८५० रोपे वन विभागाच्या जागेमध्ये, १५० रोपे येरवडा जेल या ठिकाणी व उर्वरीत २५० रोपे संगमवाडी पूल ते कल्याणीनगर पूल दरम्यान नदी सुधार प्रकल्पामधील Promenade, Gabion याठिकाणी लावणेत आलेली आहे.
यापूर्वी देखील पुणे महानगरपालिकेमार्फत स्वदेशी ५००० रोपांची लागवड आजमिती पर्यंत केलेली आहे. यापैकी ४००० झाडे संरक्षण विभागाच्या जागेमध्ये, ५०० आड़े आर्मी स्पोर्ट विभागाच्या जागेमध्ये व उर्वरीत आहे नदी सुधार प्रकल्पामधील Promenade, Gabion याठिकाणी लावणेत आलेली आहेत.