पुणे, 29: आषाढी वारीची परंपरा जपण्यासाठी राज्यशासन सर्वतोपरी प्रयत्नशील असल्याचे सांगतानाच आषाढीवारीसाठी परवानगी देण्यात येणाऱ्या पादुका दशमीला श्री क्षेत्र पंढरपूर येथे पोहचविण्याचा निर्णय सर्वानुमते घेण्यात आला असल्याचे उपमुख्यमंत्री अजित पवार यांनी आज येथे सांगितले.
विभागीय आयुक्त कार्यालयात उपमुख्यमंत्री अजित पवार यांच्या उपस्थितीत झालेल्या बैठकीला आमदार सुनील शेळके, माजी आमदार उल्हास पवार, विभागीय आयुक्त डॉ. दीपक म्हैसेकर, पोलीस आयुक्त डॉ. के. व्यंकटेशम, संदीप बिष्णोई, जिल्हाधिकारी नवल किशोर राम, पोलीस अधीक्षक संदीप पाटील, निवासी उपजिल्हाधिकारी डॉ. जयश्री कटारे, देहू देवस्थानचे प्रमुख विश्वस्त मधुकर महाराज मोरे, आळंदी देवस्थानचे प्रमुख विश्वस्त ॲड विकास ढगे-पाटील, राजाभाऊ चोपदार, विशाल मोरे, माणिक मोरे, सोपानदेव देवस्थान सासवडचे गोपाळ गोसावी आदी उपस्थित होते.
उपमुख्यमंत्री अजित पवार म्हणाले, आषाढी वारीला अनेक वर्षाची परंपरा आहे, वारीची ही परंपरा खंडीत होऊ नये यासाठी राज्यशासन सर्वतोपरी प्रयत्नशील आहे. वारीची ही परंपरा अखंडीत ठेवण्यासाठी राज्यातील प्रमुख व सबंधित जिल्हाधिकारी व जिल्हा पोलीस अधीक्षक यांनी परवानगी दिलेल्या संस्थांनच्या पादुकांना राज्यशासनाच्यावतीने विमान, हेलिकॉप्टर किंवा बसने दशमीला पंढरपूर येथे पोहचविण्यात येईल. विमान तसेच हेलिकॉप्टर बाबत हवामानाचा अंदाज घेत याबाबतचा निर्णय राज्य सरकार राखून ठेवत आहे. याबाबतचा निर्णय घेतांना संबंधित संस्थानला विश्वासात घेऊन निर्णय घेण्यात येणार असल्याचे उपमुख्यमंत्री पवार यांनी स्पष्ट केले. आपल्यामुळे कोणालाही त्रास होणार नाही या संतांनी दिलेल्या शिकवणीचा आदर करुया, असे सांगून उपमुख्यमंत्री अजित पवार म्हणाले, आषाढी वारीसाठी आपण सर्वांनी शासनाकडे सकारात्मक भूमिका मांडली व शासनाच्या प्रत्येक निर्णयाचे स्वागत केले ही कौतुकास्पद बाब आहे. कोरोनाच्या प्रादुर्भावामूळे गेल्या अडीच महिन्यापासून सर्व धर्मीयांनी आपले धार्मिक कार्यक्रम घरात राहुनच साजरे केले आहेत. हाच आदर्श समोर ठेवून या वर्षीचा आषाढी वारीचा कार्यक्रम गर्दी न करता शासनाने दिलेल्या नियमावलीचे पालन करुन परंपरा कायम ठेवायची आहे. या सोहळ्यासाठी कोणतीही अडचण येणार नाही. याबाबतची सर्व ती खबरदारी राज्यशासन घेणार असल्याचे श्री.पवार यांनी सांगितले.
राज्यातील कोणत्याही जिल्ह्यातून जिल्हाधिकारी तसेच जिल्हा पोलीस अधीक्षकांच्या परवानगी शिवाय कोणतीही पालखी किंवा दिंडी निघणार नसल्याचे सांगतानाच राज्यातील वारकरी संप्रदायाच्या सकारात्मक भुमिकेबद्दल त्यांनी आभार मानले. दुरदर्शन तसेच अन्य वृत्तवाहिन्यांवरुन आषाढी वारीचा आनंद घरबसल्या अनुभवता येणार आहे. वारकरी संप्रदाय व सर्वांनी पांडुरंगाचे दर्शन घरातूनच घ्यावे, असे आवाहन उपमुख्यमंत्री अजित पवार यांनी केले आहे.
विभागीय आयुक्त डॉ.दीपक म्हैसेकर प्रास्ताविक करतांना म्हणाले, आषाढी वारी पालखी सोहळयाबाबत आपण 15 मे रोजी बैठक घेतली. मात्र पंधरा दिवसात पालखी मार्गक्रमण करीत असलेल्या पुणे, सातारा, सोलापूर, या तीनही जिल्ह्यात रुग्ण संख्या वाढली आहे. पुढील कालावधीत रुग्णसंख्येत आणखी वाढ होण्याची शक्यता आहे. पंढरपूर येथेही रुग्ण आढळले आहेत. एकुणच पुणे विभागात सांगली जिल्ह्याचा अपवाद वगळता चारही जिल्ह्यात रुग्ण संख्या मोठ्या प्रमाणात आहे. त्यामुळे आषाढी वारी पालखी सोहळयाबाबत शासनानाच्या नियमांचे पालन होणे आवश्यक आहे.
राज्यशासनाने जो निर्णय घेतला आहे त्या निर्णयाचे वारकरी निश्चितपणे स्वागत करतील, असे श्री संत ज्ञानेश्वर महाराज संस्थान कमिटीचे प्रमुख विश्वस्त विकास ढगे-पाटील व देहू देवस्थानचे प्रमुख विश्वस्त मधुकर महाराज मोरे यांनी सांगितले.
सातारा जिल्ह्याचे पालकमंत्री बाळासाहेब पाटील व सोलापूर जिल्ह्याचे पालकमंत्री दत्तात्रय भरणे यांनी व्हिडीओ कॉन्फरसिंगव्दारे बैठकीत सहभाग घेतला. तसेच यावेळी संबंधित जिल्हाधिकारी, जिल्हा पोलीस अधीक्षक, श्री विठ्ठल रुक्मिणी देवस्थान समितीचे प्रमुख विश्वस्त यांनीही व्हिडीओ कॉन्फरसिंगव्दारे आषाढी वारीच्या आयोजनासंदर्भात आपली मते मांडली.
या बैठकीमध्ये पालखी सोहळ्याचे स्वरूप, सहभागी वारकरी, प्रशासकीय यंत्रणेबाबतच नियोजन, पंढरपूर येथील नियोजन तसेच विविध विषयावर सविस्तर चर्चा झाली. तसेच संस्थानच्या प्रमुख पदाधिका-यांनी केलेल्या सूचनांवर चर्चा करण्यात आली. यावेळी वारकरी संप्रदायातील मान्यवर उपस्थित होते.

पुणे, दि.२९ : कोरोनाशी मुकाबला करीत रस्त्यांची कामेही गतीने पूर्ण करावयाची आहेत. कामे रेंगाळली नाही पाहिजेत. भूसंपादनाची कामे प्रलंबित राहू नये, असे निर्देश उपमुख्यमंत्री अजित पवार यांनी दिले.

राष्ट्रीय महामार्ग व पालखी मार्ग संदर्भातील भूसंपादन आढावा आणि सोलापूर – कोल्हापूर रस्ते महामार्गावरील मिरज बाह्यवळण रस्त्याबाबत आढावा बैठक घेण्यात आली, त्यावेळी ते बोलत होते.

विभागीय आयुक्त कार्यालयाच्या सभागृहात आयोजित बैठकीला विभागीय आयुक्त डॉ. दीपक म्हैसेकर, जिल्हाधिकारी नवल किशोर राम, राष्ट्रीय महामार्ग, राज्य रस्ते विकास महामंडळ व सार्वजनिक बांधकाम विभागाचे अधिकारी उपस्थित होते.

कोल्हापूर, सांगली, सोलापूर, सातारा येथील जिल्हाधिकारी व संबंधित अधिकाऱ्यांशी दूरदृष्य प्रणालीद्वारे उपमुख्यमंत्र्यांनी माहिती जाणून घेतली. तसेच अडचणी व लागणाऱ्या निधीबाबत चर्चा केली.

सातारा जिल्ह्यातील कराड – तासगांव रस्ता व पुलाचे काम लवकर करावे. सातारा – कोरेगांव – मसवड हा रस्ता महत्त्वाचा आहे. लोकांची सारखी मागणी असते, असे स्पष्ट करून उपमुख्यमंत्री श्री.पवार म्हणाले, कामासाठी येणाऱ्या कामगारांना परवानगी द्या. खंबाटकी घाटातील बोगद्याचेही काम त्वरित पूर्ण करावे.

सोलापूर शहरातील वाढती कोरोनाबाधितांची संख्या पाहता जिल्हा प्रशासनातील सर्व अधिकाऱ्यांनी समन्वयाने काम करण्याची गरज आहे,असे त्यांनी  यावेळी सांगितले.

टेंभुर्णी – पंढरपूर – मंगळवेढा – उमदी – विजापूर आणि अक्कलकोट – नळदुर्ग – तुळजापूर रस्त्यांच्या कामाचाही बैठकीत आढावा घेण्यात आला. माढा परिसरातील शेतकऱ्यांचे म्हणणे ऐकून घ्या,असे सांगितले.

पुणे जिल्ह्यातील आढावा घेताना संत तुकाराम महाराज व संत ज्ञानेश्वर महाराज पालखी मार्गाचे काम लवकर व्हावे. भूसंपादनातील त्रुटी दूर करा, मिळालेला निधी खर्च करा,असे सांगितले. नाशिक रोडवरील चाकण, राजगुरुनगर येथे वाहतूक कोंडी होते. तसेच वाघोली येथेही तिच परिस्थिती उद्भवते. तेव्हा तेथील रुंदीकरणाचे काम करावे, असे श्री.पवार यांनी सांगितले. पुणे ते शिक्रापूर रस्त्याचे काम सुरू असल्याची माहिती यावेळी देण्यात आली. चारही बायपासचे काम सुरू असले तरी ते पूर्ण होणे महत्त्वाचे आहे. चांदणी चौकातील रस्त्याचाही यावेळी आढावा घेण्यात आला.

पुणे: गुलटेकडी येथील श्री छत्रपती शिवाजी मार्केट यार्डातील फळे व भाजीपाला व कांदा-बटाटा विभाग येत्या ३१ मेपासून सुरू करण्याचा निर्णय गुरूवारी सर्व बाजार घटक व कृषी उत्पन्न बाजार समितीच्या बैठकीत घेतला. त्यामुळे गेल्या काही दिवसांपासून बंद असलेला मार्केट यार्डातील व्यापार पुन्हा सुरू होणार आहे. मात्र,त्यासाठी बाजार समितीच्या सर्व घटकांना अटी व नियमावलीचे पालन करावे लागणार आहेबाजार समितीने तयार केलेल्या नियोजनानुसार व बाजार समितीने दिलेल्या पर्यायानुसार संपूर्ण बाजारातील असलेल्या पाकळ्यांमध्ये एक बाजू एकादिवशी व दुसरी बाजू दुसऱ्यादिवशी अशा पद्धतीने फळे, भाजीपाला, व कांदा-बटाटा विभागातील सर्व आडत्यांना कामकाज करावे लागणार आहे. येत्या रविवारपासून (दि.३१ मे) बुधवारपर्यंत (दि.३ जून) याचपद्धतीने कामकाज करावे लागेल. तसेच बुधवारी दुपारी बाजारसमिती व आडते असोसिएशन यांची संयुक्त बैठक घेऊन या पद्धतीने व्यापार करताना येणाऱ्या अडचणींबाबत चर्चा केली जाईल. त्यानंतर पुढील कामकाजाची दिशा ठरविण्याचा निर्णय घेतला जाईल,असे आडते असोसिएशनचे अध्यक्ष विलास भूजबळ यांनी सांगितले.
खरेदीदार व्यापाऱ्यांना पहाटे मार्केटमध्ये सोडण्याचा निर्णय घेतलेला आहे. ज्यांनी बाजार समितीकडून परवाना घेतला नाही. त्यांनी त्वरित बाजार समितीकडे दोन दिवसाच्या आत त्यासाठी अर्ज करावा. आडत्यांसाठी केळी बाजार समोरील वाहनतळ व कै. अण्णासाहेब मगर यांच्या पुतळ्या शेजारील वाहन तळामध्ये दुचाकी व चारचाकी वाहने उभी करता येणार आहेत. सर्व आडत्यांनी आपल्या विभागातील गट प्रमुखांकडून स्वत:साठी त्याचप्रमाणे गाळ्यावरील मदतनीस व कामगार यांच्यासाठी ओळखपत्रे त्वरित करून घ्यावीत, असेही असे विलास भुजबळ यांनी सांगितले.

पुणे दि. 28: कोरोनाच्या वाढत्या संसर्गाच्या पार्श्वभूमीवर महानगरपालिकेने शिवछत्रपती क्रीडा संकुल म्हाळुंगे-बालेवाडी येथे उभारण्यात आलेल्या कोविड-19 च्या केंद्राला विभागीय आयुक्त डॉ. दीपक म्हैसेकर यांनी आज भेट देवून पाहणी केली. पुढील काळात कोरोनाचे रुग्ण वाढल्यास या केंद्राचा कशाप्रकारे उपयोग होऊ शकतो या कामाची माहिती जाणून घेत त्यांनी कोविड केंद्रावर लागणाऱ्या खाटा, सी.सी.टी.व्ही. व आवश्यक त्या वैद्यकीय सोयी-सुविधांबाबत सूचनाही केल्या. तसेच तेथील विविध ठिकाणांचीही माहिती घेतली.
यावेळी कोथरुड बावधन क्षेत्रीय कार्यालयाचे अतिरिक्त आयुक्त शंतनु गोयल, सहायक आयुक्त संदीप कदम, पुणे जिल्हा परिषदेचे अतिरिक्त मुख्य कार्यकारी अधिकारी भारत शेंडगे, जिल्हा हिवताप अधिकारी डॉ.अजय बेंद्रे, आरोग्य विभागाचे डॉ.शिवाजी विधाटे व महानगरपालिकेचे अधिकारी, कर्मचारी उपस्थित होते.

पुणे दि. 28: कोरोना संसर्गाच्या पार्श्वभूमीवर मुंबई -पुणे महामार्गावरील तळेगाव टोल नाका व खंडाळा येथील वन विश्रामगृहा समोरील तपासणी केंद्र येथे विभागीय आयुक्त डॉ. दीपक म्हैसेकर यांनी भेट देवून तेथील पल्स ऑक्सी मिटर, थर्मल स्कॅनर मशीनव्दारे ये-जा करणाऱ्या वाहनांतील नागरिकांच्या तपासणी नोंदणी रजिस्टरची पाहणी करुन तेथील कर्मचाऱ्यांकडून माहिती जाणून घेतली . तसेच तपासणी करतांना कोणकोणती खबरदारी घेणे आवश्यक आहे. याबाबत आवश्यक त्या सूचनाही डॉ.म्हैसेकर यांनी केल्या.
यावेळी पोलीस अधीक्षक संदीप पाटील, वरिष्ठ पोलीस अधिकारी, नवनीत कुमार कॉवत, कोथरुड बावधन क्षेत्रीय कार्यालयाचे अतिरिक्त आयुक्त शंतनु गोयल, सहायक आयुक्त संदीप कदम, सहायक पोलीस निरीक्षक वैभव स्वामी, पुणे जिल्हा परिषदेचे अतिरिक्त मुख्य कार्यकारी अधिकारी भारत शेंडगे, जिल्हा हिवताप अधिकारी डॉ.अजय बेंद्रे, मावळचे तहसिलदार श्री. बर्गे, पोलीस अधिकारी, कर्मचारी उपस्थित होते.

मुंबई, दि. २८ : सध्या लॉकडाऊनच्या काळात २७ मे २०२० पासून सर्व सोशल मीडियावर एक मेसेज फिरत आहे की, “मुंबई व पुणे शहरांमध्ये कोरोना महामारीचा वाढता प्रादुर्भाव कमी करण्यासाठी व लॉकडाऊनच्या नियमांचे कडक शिस्तीने पालन करण्याच्या हेतूने या दोन शहरांमध्ये लष्कराला पाचारण करण्यात येणार आहे. तसेच या काळात फक्त जीवनावश्यक वस्तूंची दुकाने मर्यादित काळापुरती चालू राहतील”. कृपया या आशयाचा मजकूर असणाऱ्या कोणत्याही मेसजवर विश्वास ठेवू नये व हा मेसेज फॉरवर्ड देखील करू नये. त्यातील मजकूर हा खोटा असून या शहरांमध्ये लष्कराला पाचारण करण्यात येणार नाही.

महाराष्ट्र सायबरतर्फे सर्वांना आवाहन करण्यात येते की, सर्व नागरिकांनी शासनाकडून अधिकृतपणे प्रसारित केलेल्या माहितीची नोंद घ्यावी. तसेच कोणत्याही माहितीची खातरजमा न करता व त्याची सत्यता न पडताळता मेसेज फॉरवर्ड करणे किंवा चुकीची माहिती व अफवा पसरविणे कायद्याने गुन्हा आहे.  असे खोटे मेसेज पाठविणाऱ्यांविरुद्ध पोलीस कडक कायदेशीर कारवाई करतील. अशी कृती करणे हा एक सामाजिक गुन्हा देखील आहे. अशा प्रकारचे मेसेज पाठविणाऱ्या व्यक्ती आपली समाजातील विश्वासाहर्ता गमावून बसतील व त्यांनी एखादी खरी माहिती पाठविली तरी देखील त्यांच्यावर विश्वास ठेवला जाणार नाही.

महाराष्ट्र सायबर सर्व नागरिकांना विनंती करते की, विशेष करून जे व्हाट्सॲप ग्रुप्सचे ऍडमिन्स किंवा ग्रुप निर्माता आहेत त्यांनी, आपल्या ग्रुपवर अशा आशयाचे मेसेज येणार नाहीत याची काळजी घ्या.

केंद्र व राज्य सरकार वेळोवेळी जे नियम व आदेश प्रसिद्ध करतील त्याचे पालन करा व गरज नसल्यास कृपया घराच्या बाहेर पडू नका, असे आवाहन महाराष्ट्र सायबर विभागातर्फे करण्यात येत आहे.

पुणे, दिनांक 28– पुणे जिल्ह्यातील कोरोनाबाधीत रुग्णांची संख्या 6879 झाली असली तरी 3661 कोरोनाबाधीत रुग्ण बरे होऊन घरी गेले असल्याची माहिती विभागीय आयुक्तो डॉ. दीपक म्हैसेकर यांनी दिली.अॅक्टीव्ह रुग्ण संख्या 2912 असून पुणे जिल्हयात कोरोनाबाधीत एकूण 306 रुग्णांचा मृत्यू झाला आहे तसेच 180 रुग्ण गंभीर असून उर्वरीत निरीक्षणाखाली असल्यायचेही त्यां0नी सांगितले. विभागातील कोरोनाबाधीत रुग्णांची संख्या 8521 झाली आहे.विभागातील 4179 कोरोनाबाधीत रुग्ण बरे होऊन घरी गेले आहेत. अॅक्टीव रुग्ण संख्या 3949 आहे. विभागात कोरोनाबाधीत एकूण 393 रुग्णांचा मृत्यू झाला आहे. तसेच 187 रुग्ण गंभीर असून उर्वरीत निरीक्षणाखाली आहेत.
कालच्या बाधीत रूग्णसंख्येच्या तुलनेत आज विभागात बाधीत रूग्णाच्या संख्येमध्ये एकूण 399 ने वाढ झाली आहे. त्यामध्ये पुणे जिल्हयात 275, सातारा जिल्हयात 28, सोलापूर जिल्ह्यात 42, सांगली जिल्हयात 10 तर कोल्हापूर जिल्हयात44अशी रुग्णसंख्येमध्ये वाढ झालेली आहे.आजपर्यंत विभागामध्ये एकूण 80303 नमूने तपासणीसाठी पाठविण्याात आले होते, त्यापैकी 74562 चा अहवाल प्राप्त आहे. 5741 नमुन्यांचा अहवाल प्रतीक्षेत आहे. प्राप्त अहवालांपैकी 65925 नमुन्यांचा अहवाल निगेटीव्ह असून 8521 चा अहवाल पॉझिटिव्ह आहे.
वंदेभारत मिशन अंतर्गत परदेशातून आलेले नागरिक:
विभागामध्येश फेज 1 मध्ये परदेशातून 457 व्यक्तीचे आगमन झालेले असून फेज 2 मध्ये परदेशातून एकूण 185व्यक्तींचे असे एकूण 642 व्यक्तींचे आगमन झालेले आहे. या सर्वांचे संस्थात्मक विलगीकरण करण्यात आलेले असल्याीची माहितीही विभागीय आयुक्तक डॉ. म्हैमसेकर यांनी दिली.

परप्रांतीय व्यक्तींसाठी रेल्वेची सुविधा :
पुणे विभागातून दि. 28 मे 2020 पर्यंत मध्यप्रदेशासाठी -15, उत्तरप्रदेशासाठी -61, उत्तराखंडासाठी -2, तमिळनाडूसाठी -2, राजस्थानसाठी 5, बिहारसाठी -36, हिमाचल प्रदेशसाठी 1, झारखंडसाठी -8, छत्तीसगडसाठी-5,जम्मू-कश्मीरसाठी 1, मणीपूरसाठी 1, आसामसाठी 1, ओरीसासाठी 2 व पश्चिम बंगालसाठी 8 अशा एकूण 148रेल्वे रवाना झालेल्या आहेत. यामधून 1 लक्ष 98 हजार 136 प्रवासी रवाना करण्यात आलेले आहेत.

अन्न धान्य वितरण :-
पुणे विभागातील स्वस्त धान्य दुकानांची संख्या 9095 असून आज रोजी 9091 सुरु आहेत. (ऑनलाईननुसार)
स्वस्त धान्य दुकानांमधून पंतप्रधान गरीब कल्याण योजनेचे माहे मे 2020 साठी धान्यवाटप सुरु झाले असून 89.18 टक्के धान्यवाटप झालेले आहे, अशी माहिती विभागीय आयुक्त डॉ. दीपक म्हैसेकर यांनी सांगितली.
दि. 27 मे 2020 रोजी विभागात एकूण 206 शिवभोजन केंद्र असून सर्व सरु आहेत. यामध्ये 21101 गरजूंनी लाभ घेतला आहे.
एपीएल केशरी कार्डधारकांसाठी मे 2020 साठी 40401 मे. टन नियतन मंजूर झालेले आहे. त्यापैकी 40401 मे. टन (100 टक्के) धान्याची उचल झालेली आहे व 29818.99 मे. टन (73.81 टक्के) धान्य वाटप आजतागायत झालेले आहे, असेही त्यांनी सांगितले.

पुणे-ज्येष्ठ नगरसेवक आणि कॉंग्रेसचे नेते आबा बागुल यांना हि महापालिकेच्या वतीने वाटण्यात येणाऱ्या अन्न धान्याच्या कीट साठी अधिकाऱ्यांना फैलावर घ्यावे लागले होते . आज अखेरीस महानगरपालिकेशी पाठपुरवठा करून, प्रतिबंधित भागात पुणे महानगरपालिकेचे धान्यांचे किट उपलब्ध करून घेण्यात आले . आज शिवदर्शन भागात रेशन किट वाटप करण्यात आले आहे.स्वतः बागुल आणि त्यांच्या कार्यकर्त्यांनी यात लक्ष घालून गरजूंना ते मिळते कि नाही हे पाहून वाटप करवून घेतले. 3 ते 4 दिवसांनी पुणे महानगर पालिकेकडून शाहू वसाहत येथे 600 धान्यांच्या किटचे वाटप करण्यात येणार आहे नागरीकांनी सहकार्य करावे.