पुणे-कोरोनाच्या संकट काळात सभासदांचा नागरिकांशी सातत्याने संपर्क आहे. त्यामुळे ते वास्तवाला धरून बोलतात. सभासदांच्या ज्या काही सूचना आहेत, त्या प्रशासनाने गांभीर्याने घ्याव्यात, असे स्पष्ट आदेश महापौर मुरलीधर मोहोळ यांनी दिले.

मंगळवारी पुणे महापालिकेची ऑनलाइन सभा घेण्यात आली. त्यामध्ये नगरसेवकांनी आपल्या भावना व्यक्त केल्या.हडपसर मतदारसंघात 2 हजार 200 रुग्ण वाढले आहेत. येथे 3 क्वारंटाईन सेंटर सुरू करण्यात आले. मात्र, या केंद्रातील बाथरूम आणि टॉयलेटमध्ये पाणी नाही. आरोग्य प्रामुख्याने एकदाही भेट दिली नाही. राज्य शासनाने नियुक्त केलेले आयएएस अधिकारी सुद्धा आले नाहीत, अशा तक्रारी नगरसेवक योगेश ससाणे यांनी केल्या.

या प्रश्नी प्रशासनाचे लक्ष वेधण्यासाठी ससाणे यांनी अंगात फ्लेक्स घालून ‘हडपसर महापालिकेत आहे का ?’, असा सवाल उपस्थित केला. तर ही गंभीर बाब असल्याचे माजी महापौर प्रशांत जगताप यांनी सांगितले. त्यावर राजकारण करू नका, महापौर मार्ग काढतील, असे माजी सभागृह नेते श्रीनाथ भिमाले म्हणाले.ऑगस्टमध्ये 4 किंवा 5 तारखेला महापालिकेची सर्वसाधारण सभा घेऊ. समस्या संदर्भात चर्चा करू, असे आश्वासन महापौरांनी दिले.

कोरोनाच्या संकट काळात अजूनही रुग्णालये लोकांकडून पैसे घेतात. त्यावर आपण काय कारवाई करणार आहात, असा सवाल नगरसेवक अविनाश बागवे यांनी उपस्थित केला.

रुग्णांकडून किती पैसे घ्यावेत हे शासकीय परिपत्रक रद्दीत जमा करून, खाजगी हॉस्पिटलची मनमानी सुरू आहे. राज्य शासनाने दर ठरवून दिले आहेत, असे माजी उपमहापौर डॉ. सिद्धार्थ धेंडे यांनी सांगितले.

तर, नागरिकांशी नगरसेवकांचा सातत्याने संपर्क असतो. आजही अपूर्ण यंत्रणा आहे. क्वारांटाईन सेंटर, बिल, बेडस याची गंभीरपणे दखल घ्या. ऑगस्ट महिन्यात शासनाच्या आदेशानुसार सविस्तर चर्चा करून सभासदांना संधी देऊ, असे आश्वासन महापौरांनी दिले.

पुणे शहरात कोरोना झपाट्याने वाढत आहेत. नगरसेवकांनी काळजी घ्यावी, असे आवाहनही नेहमीप्रमाणे महापौरांनी केले.

बुलडाणा,  दि. 21 : जिल्ह्यात अलीकडच्या काळात कोरोना संसर्गग्रस्त रूग्णांचे प्रमाण वाढले आहे. संसर्गाची साखळी वाढत असल्याचे निदर्शनास येत आहे. अशा परिस्थितीत जिल्ह्यातील कोरोना संसर्गाची साखळी तोडण्यासाठी दि. २१ जुलै ते २१ ऑगस्ट २०२० च्या मध्यरात्री १२ वाजेपर्यंत संपूर्ण एक महिन्यासाठी लॉकडाऊन लागू करण्यात येत आहे.तसेच प्रत्येक शनिवार व रविवार या दिवशी औषधालय, दवाखाने व दुध वितरण, संकलन वगळून इतर सर्व बाबींवर बंदी घालण्यात येत असून या दोन्ही दिवशी संचारबंदी लागू राहणार आहे, असे आदेश जिल्हादंडाधिकारी सुमन चंद्रा यांनी आज दिले आहेत.   

तसेच सोमवार ते शुक्रवार या दिवशी संपूर्ण जिल्ह्यात सर्व उद्योग, व्यवसाय आदी सकाळी ९ ते दुपारी ३ वाजेपर्यंत सुरू असणार आहेत. त्याच दिवशी दुपारी ३ ते दुसऱ्या दिवशी सकाळी ९ वाजेपर्यंत दूध, वर्तमानपत्र वितरण आदी वगळता संपूर्ण जिल्ह्यात अत्यंत कडक कर्फ्यु लागू असणार आहे. तसेच १ जुलै २०२० च्या आदेशामध्ये ज्या बाबी बंद राहतील, असे नमूद केले आहे. त्या बाबी दिनांक ३१ जुलै २०२० पर्यंत तशाच बंद राहतील. दवाखाने, औषधालय, वैद्यकीय तसेच अत्यंत आवश्यक मानवी कामासाठी बाहेर पडणारे नागरिक, आंतर जिल्हा वाहतूक / पासधारक वाहने व माल वाहतुक सुरू राहील. शहराच्या हद्दीबाहेरील सर्व पेट्रोलपंप २४ तास सुरू राहतील.

या काळात अत्यावश्यक असणाऱ्यांनीच बाहेर पडावे. विनाकारण कुणीही बाहेर फिरू नये. सर्वांनी चेहऱ्यावर मास्क किंवा स्वच्छ रूमाल वापरावा. चेहऱ्यावर काही बांधलेले नसल्यास दंड आकारण्यात येईल. सोशल डिस्टसिंगचे पालन करावे. अत्यावश्यक सेवा पुरविणाऱ्या व्यक्तींना आवश्यकतेनुसार संचार करण्यास मुभा राहील. मात्र ओळखपत्र सोबत ठेवणे अनिवार्य आहे. कोणत्याही परिस्थितीत दोन व्यक्तीमध्ये किमान तीन फुटाचे अंतर ठेवणे बंधनकारक आहे. जिल्ह्यामध्ये संचार करण्यास नागरिकांना मज्जाव करण्यात येत असल्यामुळे अत्यावश्यक सेवेसाठी इंसीडेंट कमांडर यांची परवानगी आवश्यक असणार आहे. उपविभागीय दंडाधिकारी यांनी परवानगी देण्याकरीता विविध कार्यालयांचे मदतीने पासेस देण्याची व्यवस्था करावयाची आहे. तसेच ज्या विभागाशी संबंधीत कामकाज असेल त्या विभागास पासेस देण्याची परवानगी असेल. शासकीय कर्मचारी यांना कार्यालयीन कामासाठी ओळखपत्रावर परिभ्रमणास मुभा असणार आहे.

विनाकारण फिरणाऱ्या नागरिकांवर पोलीस विभाग कार्यवाही करणार आहे. अत्यावश्यक सेवा व वस्तु देणाऱ्या वाहनांवर पासेस, स्टीकर्स वाहनावर लावणे आवश्यक आहे. या आदेशांचे उल्लंघन केल्यास भारतीय दंड संहिता १८६० चे कलम १८८ अन्वये, साथरोग अधिनियम १८९७ अंतर्गत व आपत्ती व्यवस्थापन कायदा २००५ अन्वये संबंधीतांवर कार्यवाही करण्यात येईल, असे आदेशात नमूद करण्यात आले आहे.

मुंबई, दि. 21 : गणेशखिंड उद्यान पुणे येथे महात्मा फुले कृषी विद्यापीठ राहुरीचे झोनल कृषी संशोधन केंद्र असून येथील 33.01 हेक्टर क्षेत्र व जळगाव शहरालगत लांडोरखोरी येथील 48.08 हेक्टर क्षेत्र जैविक वारसा क्षेत्र म्हणून घोषित करण्यात येणार असल्याची माहिती वनमंत्री संजय राठोड यांनी दिली.

वनमंत्री श्री.राठोड पुढे म्हणाले, राष्ट्रीय जैविक विविधता मंडळ चेन्नई यांचेकडून जैविक वारसा स्थळे घोषित करण्याबाबत राज्यांना मार्गदर्शक सूचना प्राप्त झाल्या आहेत.राज्यात नागपूर येथे जैविक विविधता मंडळ कार्यरत असून राज्यातील जैविक विविधतेबाबत ते कामकाज करीत आहे. यापूर्वी राज्यात ग्लोरी ऑफ आल्लापल्ली, गडचिरोली हे पहिले जैविक वारसा क्षेत्र घोषित करण्यात आले आहे. मुख्यमंत्री उद्धव ठाकरे यांच्या मान्यतेनंतर आता गणेशखिंड, पुणे व लांडोरखोरी, जळगाव हे नवीन जैविक वारसा क्षेत्र म्हणून घोषित केले जाईल, अशी माहितीही त्यांनी दिली.

गणेशखिंड, पुणे

गणेशखिंड उद्यान पुणे येथे पिकांच्या 49 जाती, फळांच्या 23 जाती उपलब्ध आहेत. या उद्यानात 35 विविध क्षेत्र असून तेथे विविध वृक्ष व फळझाडे आहेत. यापैकी काही वृक्ष हे 100 वर्ष जुने आहेत. गणेशखिंड पुणे या केंद्राने विविध पिके व फळे यांच्या नवीन 19 जाती विकसित केल्या आहेत. पेशव्यांच्या काळात या भागात आंब्याची बाग विकसित करण्यात आली होती. ब्रिटिशांच्या कारकीर्दीत गव्हर्नर जनरल सर जॉन माल्कम यांनी हे उद्यान विकसित केले. काही वर्षांनंतर जॉर्ज मार्शल वूड्रो यांनी 1873 मध्ये या बोटॅनिकल गार्डनची जबाबदारी स्वीकारली. पुढे राहुरी कृषी विद्यापीठाने या उद्यानाला स्वतःच्या कार्यक्षेत्रात सामावून घेतले आणि त्या पेशवेकालीन आंब्याच्या बागेचे आणि जुन्या झाडांचे संवर्धन केले आहे. उद्यानाच्या सर्व स्थित्यंतरांची कागदपत्रेही उपलब्ध आहेत.    

जैववैविध्याचा अनमोल ठेवा    

गणेशखिंड फळ संशोधन केंद्राच्या पेशवेकालीन आंब्याच्या बागेतील आंब्याची जात हा इतरत्र न आढळणारा जनुकीय ठेवा आहे. याशिवाय, या बागेत 165 प्रकारची जंगलात आढळणारी झाडे आहेत. यातील 48 वनस्पती औषधी आहेत. दुर्मिळ प्रकारातील बुरशी, सूक्ष्म जीवांच्याही नोंदी आहेत. विद्यापीठाने या बागेची जैवविविधता नोंदवही (बायोडायव्हर्सिटी रजिस्टर) तयार केली असून यात वनस्पतींबरोबरच सरपटणारे प्राणी, कासव, बेडूक, किडे आणि तेथील सर्व पिकांची सविस्तर माहिती त्यामध्ये आहे.

लांडोरखोरी, जळगाव

लांडोरखोरी जळगाव हे स्थळ मेहरून या गावात स्थित असून मेहरून जलाशयाच्या जवळ आहे.हे स्थळ राखीव वन क्षेत्रात असून जळगाव वन विभागाच्या अखत्यारीत आहे.याबाबत जळगाव नगरपालिकेचा संमती ठराव प्राप्त झाला आहे.या क्षेत्रावर बोरीची झाडे असून येथे विविध पक्षी व प्राण्यांचा अधिवास आहे.

मोरांचे अधिवास क्षेत्र

लांडोरखोरी हे क्षेत्र मोर या पक्षाचे अधिवास केंद्र आहे.लांडोरखोरी वनोद्यान हे 48.08 हेक्टर क्षेत्रावर जैवविविधतेने नैसर्गिक अधिवास क्षेत्र आहे. जळगाव वनविभागाने गेल्या पाच वर्षांपासून जाणीवपूर्वक प्रयत्न करून हिरवा पट्टा विकसित केला आहे. समृद्ध जैवविविधतेने संपन्न अशा खैर, नीम, अंजन, बोर, बाभूळ, काटेसावर, शेवगा, आपटा, हेंकळ या सारख्या 70 हून अधिक वनस्पतींच्या प्रजाती या ठिकाणी आहेत. तर रानडुकर, चिंकारा, निलगाय, ससा, मुंगुस, मोर सारख्या सस्तन प्राण्यांचा वावर, दगड पाल, साधी पाल, उद्यान सरडा, शामेलीयन, धामण, कवड्या, तस्कर सारख्या सरपटणाऱ्‍या प्राण्यांच्या 15 पेक्षा जास्त प्रजातीही येथे आहेत. तसेच चंडोल, कापशी, सोनपाठी सुतार, कोतवाल, युरोपियन चाष, शिक्रा इत्यादी स्थानिक व स्थलांतरीत पक्षांच्या 68 प्रजाती येथे आढळून येतात. या 48.08 हेक्टरपैकी 10 हेक्टरमध्ये हे वनोद्योन विकसित केले गेले आहे.

राज्यातील अधिकाधिक जैविक वारसा क्षेत्रे शोधून त्यांचे जतन व संवर्धन करण्यात यावे अशा सूचना मुख्यमंत्री उद्धव ठाकरे यांनी केल्या आहेत.अशा प्रकारे जैविक वारसा स्थळे निर्माण केल्याने या क्षेत्रातील प्राणी, पक्षी व वनस्पती संवर्धन योजना तयार करण्यात येऊन प्रजातीचे मूळ स्थळी संवर्धन व वंशवृद्धी करण्यात येते. म्हणून येणाऱ्या काळात राज्यात अशी अनेक ठिकाणे शोधून त्यांना जैविक वारसा स्थळे म्हणून घोषित करणार असल्याची माहितीही वनमंत्री संजय राठोड यांनी दिली.

मुंबई, दि. 21 : पर्यावरण विभागाच्या प्रधान सचिव म्हणून श्रीमती मनीषा म्हैसकर यांनी आज पदभार स्वीकारला. श्रीमती म्हैसकर या १९९२ साली भारतीय प्रशासकीय सेवेत रुजू झाल्या. त्यानंतर त्यांनी राज्यात विविध विभागात कामकाज केले आहे.

बदलत्या हवामानाची व पर्यावरणाची दखल घेण्याचे काम राज्याचा पर्यावरण विभाग विविध योजनांतून व उपक्रमांतून करीत असतो. पर्यावरण रक्षणात शासकीय उपाययोजना, पर्यावरण विषयक कायदे, व्यापक जनजागृती आणि सर्वसामान्य माणसाचा आग्रही सहभाग याकरीता पर्यावरण विभागाचे कामकाज अधिक गतीमान करण्यावर भर दिला जाईल, असे श्रीमती म्हैसकर यांनी यावेळी सांगितले. 

श्रीमती म्हैसकर यांनी शासनाच्या विविध विभागात काम करताना यापूर्वी राज्याच्या माहिती व जनसंपर्क महासंचालनालयाच्या महासंचालक म्हणून नावीन्यपूर्ण योजनांतून शासकीय कामकाजाच्या प्रसिद्धीला वेगळी दिशा दिली होती. विशेषत: लोकराज्य मासिकाचा वाचक वर्ग व लाखो प्रतिंचे वितरण हे त्यांचे महत्त्वपूर्ण योगदान ठरले.

गेली पाच वर्षे नगरविकास विभागाच्या प्रधान सचिव म्हणून काम करीत असताना केंद्रीय स्तरावर राज्याला सातत्याने अव्वल स्थानावर नेण्यात त्यांनी मोलाची भूमिका बजावली. त्यांचा यापूर्वीचा मुंबई महानगरपालिकेत साडेचार वर्षे अतिरिक्त आयुक्त म्हणून आरोग्य क्षेत्रातील कामाचा अनुभव लक्षात घेऊन मुंबई शहरातील कोविड 19 च्या वाढत्या रुग्णसंख्येवर नियंत्रण मिळविण्यासाठी नेमण्यात आलेल्या टास्क फोर्समध्ये त्यांची नियुक्ती करण्यात आली होती.

0000

नवी दिल्ली – कोरोना व्हायरसविरुद्धच्या लढ्यात ब्रिटनमधून आनंदाची वार्ता आहे. ऑक्सफर्ड विद्यापीठाची लस मनुष्यांवरील चाचणीच्या पहिल्या व दुसऱ्या टप्प्यात यशस्वी ठरली आहे. लॅन्सेट या वैद्यकीय नियतकालिकात सोमवारी प्रकाशित निकालांनुसार ही लस सुरक्षित आढळली. तिचा मनुष्यांवर धोकादायक दुष्परिणाम आढळला नाही. या लसीने कोरोनाला निष्क्रिय करणाऱ्या अँटिबॉडीजची मात्रा वाढवलीच, व्हायरसविरुद्ध लढणाऱ्या इम्यून टी-सेल्सचीही पातळी वाढवली. तथापि, संशोधकांनी सांगितले की, ही लस काेरोनाविरुद्ध प्रभावीपणे सुरक्षा करते की नाही याची खात्री होण्यासाठी तिसऱ्या टप्प्यातील चाचण्या गरजेच्या आहेत. ऑक्सफर्डच्या प्रो. सराह गिल्बर्ट म्हणाल्या, आम्हाला खूप काम करायचे आहे. तूर्त निकाल आशादायक आहेत.

ऑक्सफर्डने लस अॅस्ट्राजेनेका कंपनीसोबत तयार केली आहे. अॅस्ट्राजेनेकाने पुण्यातील सीरम इन्स्टिट्यूटशी उत्पादनाचा करार केलेला आहे. सीरम इन्स्टिट्यूटचे सीईआे अदर पूनावाला म्हणाले, ‘आम्ही आॅक्सफाेर्ड लसीवर काम करत आहोत. भारतात आॅगस्टपर्यंत मानवी चाचण्या होतील. लस २०२० च्या अखेरीस उपलब्ध होऊ शकते.

चिंपांझीच्या सर्दीला कारणीभूत व्हायरसपासून लस तयार केली आहे, तो व्हायरस कोरोनासारखाच आहे
या लसीचे नाव सीएचएडीआेएक्स १ एनसीआेव्ही-१९ असे आहे. चिंपांझीच्या सर्दीस कारणीभूत होणाऱ्या व्हायरसचे जेनेटिक इंजिनिअरिंग करून ही लस तयार केली आहे. हे कोरोना व्हायरससारखेच आहे. वैज्ञानिकांनी त्यात कोरोना व्हायरसच्या स्पाइक प्रोटीनचे जेनेटिक इंन्स्ट्रक्शनही टाकले आहेत. म्हणजेच ही लस कोरोना व्हायरससारखीच आहे. जेव्हा लस शरीरात जाते तेव्हा पेशी स्पाइक प्रोटीन तयार करतात. त्या इम्यून सिस्टिमला कोरोनाला ओळखून त्यांचा नायनाट करण्याचे प्रशिक्षण देतात.

भारत सरकारचे वैज्ञानिक सल्लागार म्हणाले : पुढे सर्व ठीक राहिले तर डिसेंबर ते जानेवारीपर्यंत आपल्यालाही लस मिळेल
ऑक्सफर्डच्या लसीमुळे भारतातही उत्साह आहे. देशाचे मुख्य वैज्ञानिक सल्लागार डॉ. प्रो. के. विजयराघवन म्हणाले, ‘सर्व काही ठीक राहिले तर डिसेंबर ते जानेवारीपर्यंत भारताला लस मिळेल. ऑक्सफर्डने सर्वात मोठा अडथळा पार केला आहे. महत्त्वाची बाब म्हणजे लसीचे गंभीर साइड इफेक्ट्स नाहीत. दुसऱ्या टप्प्यात मोठे दुष्परिणाम दिसले नसतील तिसऱ्या टप्प्यातील चाचण्यांसह लस लाँच केली जाऊ शकते. नियामक लसीला तत्काळ परवानगी देऊ शकतात. एआयमुळे रिस्क मॅनेजमेंटचा अचूक आकडा अल्पावधीतच मिळतो.
– दरम्यान, दिल्ली एम्समध्ये सोमवारी भारतात निर्मित पहिली कोरोना लस ‘कोवाक्सिन’ची मानवी चाचणी सुरू झाली. १०० पेक्षा जास्त स्वयंसेवकांना लसीचे डोस देण्यात आले आहेत.

अँटिबॉडी आणि टी-सेल्स नेमके करतात तरी काय?
अँटिबॉडीज राेगप्रतिकार क्षमतेचाच एक भाग आहेत. अँटिबॉडी या इम्यून सिस्टिमपासून निर्मित प्रोटीन आहेत, त्या व्हायरसच्या पृष्ठभागाला चिकटून त्याला निष्क्रिय करतात. टी- सेल्स हा पांढऱ्या पेशींचाच एक प्रकार आहे. त्या शरीरातील संक्रमित पेशींना शोधून नष्ट करतात.

१०७७ लोकांवर चाचण्या, ताप-डोकेदुखीचे साइड इफेक्ट
१८ ते ५५ वर्षे वयाेगटातील १०७७ लाेकांवर चाचण्या झाल्या. इंजेक्शन दिल्यानंतर १४ दिवसांत लाेकांतील टी-सेल्सचे प्रमाण अत्युच्च पातळीवर गेले. २८ दिवसांनी अँटिबॉडीही प्रचंड वाढल्या. लसीचे ताप व डोकेदुखी हे साइड इफेक्ट्स आहेत. मात्र ते साध्या पॅराासिटामॉलनेही बरे होतात.

जगभरामध्ये तयार होत असलेल्या लसींची स्थिती
लस टप्पे
– आॅक्सफर्ड विद्यापीठ 2*
– वुहान इन्स्टिट्यूट 2
– कॅन सिनाे बायाेलाॅजिक्स 2
– माॅर्डेना 2
– इन्स्टिट्यूट आॅफ मेडिकल बायाेलाॅजी 2
– सिनाेव्हॅक 2
– बायाेएनटेक 1**
– इम्पीरियल काॅलेज लंडन 1
– नाेव्हाव्हॅक्स 1
* मानवी चाचणीचा दुसरा आणि तिसरा टप्प्पा एकाच वेळी सुरू आहे.
**पहिला, दुसरा आणि तिसरा टप्पा एकाच वेळी सुरू आहे.

मुंबई, दि. २० : – ‘मुंबईसारख्या लोकसंख्येची मोठी घनता असलेल्या शहराकडे सगळ्या जगाचे लक्ष लागून राहिले होते. आपण प्रयत्नपूर्वक या विषाणूचा संसर्ग रोखला आहे. त्याची दखल जागतिक आरोग्य संघटनेनेही घेतली आहे. वॉशिंग्टन पोस्टनेही कौतुक केले आहे. पण आता आपली आणखी कसोटी आहे. त्यामुळे गाफील न राहता कोरोनाच्या रुग्णसंख्येचा आलेख कमी करण्यासाठी सर्व यंत्रणांना सतर्क करा, असे निर्देश मुख्यमंत्री उद्धव ठाकरे यांनी आज येथे दिले.

मुंबईतील कोरोना विषाणूचा प्रतिबंध तसेच पावसाळ्यात उद्भवणाऱ्या समस्यांबाबत मुख्यमंत्री श्री. ठाकरे यांनी दूरदृश्य प्रणालीद्वारे आढावा घेतला. या बैठकीस परिवहन व संसदीय कार्यमंत्री अनिल परब, मुख्य सचिव संजय कुमार, मुख्यमंत्र्यांचे प्रधान सल्लागार अजोय मेहता, महापालिकेचे आयुक्त आय. एस चहल, मुख्यमंत्र्यांचे अपर मुख्य सचिव आशिष कुमार सिंह , मुख्यमंत्र्यांचे प्रधान सचिव विकास खारगे, महापालिकेचे अतिरिक्त आयुक्त अश्विनी भिडे, संजीय जयस्वाल, पी. वेलारसू, सुरेश काकाणी, उपायुक्त तसेच वॉर्डनिहाय सहायक आयुक्त विविध विभागांचे प्रमुख अधिकारी तसेच वैद्यकीय तसेच आरोग्य यंत्रणांचे प्रमुख, काही रुग्णालयांचे वैद्यकीय अधिकारी आदी उपस्थित होते.

मुख्यमंत्री श्री. ठाकरे म्हणाले, मुंबईची परिस्थिती तुम्ही सर्वांनी अहोरात्र मेहनतीने काबूत ठेवली आहे. या कामाची दखल डब्लूएचओ आणि वाश्गिंटन पोस्टने घेतली आहे. आपण कोणतीही माहिती लपवत नाही, याचे कौतुक वाश्गिंटन पोस्टने केले. या कौतुकास्पद परिस्थितीतही आता आपली कसोटी आहे. जगभर जे निरीक्षण आहे, त्यामध्ये आता दुसऱी लाट येईल असे म्हटले जाते. त्यामुळे

आपले प्रयत्न आणखी तीव्रतेने आणि प्रभावीपणे राबवा. दुसरी लाट तेव्हाच येते ज्यावेळी आपण गाफील राहतो. पण आणखी सतर्क राहूया. रुग्ण संख्येचा हा आलेख कमी होईल यासाठी प्रय़त्न करूया. रुग्णाला कमीत कमी अंतरावर उपचारासाठी जावे लागेल अशा सुविधा वाढवायच्या आहेत. सुरवातीला कोरोना शहरात होता. पण आता प्रसार ग्रामीण भागातही होऊ लागला आहे. राज्याच्या अन्य भागातही या सुविधांबाबत सूचना देण्यात आल्या आहेत. हळूहळू आपण मुंबई खुली करतो आहोत. त्यासाठी कुणाचा दबाव घेण्यापेक्षा आपण नागरिकांच्या जीवांशी बांधिल आहोत, अशा पद्धतीने काम करत आहोत. आपल्याला या सर्व गोष्टी काटेकोरपणे करायच्या आहेत. मुंबईला तुम्हा सर्वांच्या अनुभवातून पूर्वपदावर आणायचे आहे. त्यासाठी यंत्रणांना आणखी सतर्क करा. व्हॅक्सिन येईपर्यंत आरोग्य सुविधांच्या दृष्टीने आणखी काही गोष्टी साध्य करण्याचे प्रयत्न आहेत असेही मुख्यमंत्र्यांनी सांगितले.

मुंबईतील नालेसफाई आणि पावसाळ्यातील साथीचे आजार रोखण्याच्या दृष्टीनेही मुख्यमंत्र्यांनी निर्देश दिले. ते म्हणाले, नाले सफाई वर्षोनुवर्ष करतो. पण साफ झालेला नाला पुन्हा काही दिवसांत कचऱ्याने भरतो. आता कोरोनाच्या निमित्ताने आपल्या टीम बाहेर आहेतच. त्यांच्याकडून या कचरा टाकण्यावर लक्ष ठेवा. मुंबईतील मोडकळीस आलेल्या इमारतींकडेही लक्ष देण्याची गरज आहे. त्याठिकाणच्या नागरिकांचे स्थलांतर आदी अनुषंगिक सुविधा वेळेत उपलब्ध व्हाव्यात याची काळजी घ्या.

आगामी सण वार आणि उत्सवाच्या काळात कोरोनाच्या अनुषंगाने दक्षता घेण्याचे आणि त्याबाबत वेळोवेळी नागरिकांपर्यंत मार्गदर्शक सूचना वेळेत पोहोचविण्याचे निर्देशही मुख्यमंत्री श्री. ठाकरे यांनी दिले.

मुंबईतील गणेशोत्सव त्यातील सार्वजनिक तसेच कौटुंबिक उत्सव, गणेशाचे आगमन आणि विसर्जन व्यवस्था तसेच कोकणात गणेशोत्सवासाठी जाऊन येणारे नागरिक यांच्यापर्यंत मार्गदर्शक सूचना, वस्तुस्थितीची माहिती वेळेत पोहोचविण्यात यावेत, असेही मुख्यमंत्र्यांनी सांगितले.

बैठकीच्या समारोपात मुख्यमंत्र्यांनी अधिकाऱ्यांच्या अहोरात्र मेहनतीचे कौतुक करतानाच, जीवावर बेतणारी मेहनत करत आहात. निश्चिंत राहू नका. पण हे काम करतानाही स्वतःची सुद्धा काळजी घ्या. मास्क आणि वैयक्तिक आरोग्याची काळजी घ्या, त्याबाबतही गाफील राहू नका, असे आवाहनही केले.

महापालिका आयुक्त श्री. चहल म्हणाले की, गेल्या काही दिवसांत मुंबईतील ८३१ प्रतिबंधित क्षेत्र १५३ ने कमी करण्यात यश आले आहे. सील इमारतींची संख्या कमी करण्यावरही लक्ष केंद्रित करणार आहोत. रुग्णांना बेड उपलब्ध करून देण्यासाठी एमएमआरडीए आणि महापालिका एकत्र येऊन समन्वयाने डॅशबोर्ड प्रणाली उपलब्ध करून देणार आहोत. धारावीतील बरे झालेल्या काही रुग्णांची पुढच्या पाच दिवसात तपासणी करणार आहोत. त्यातील प्लाझ्मा दान करण्यासाठी वैद्यकीयदृष्ट्या सक्षम अशांकडून शिबिरात प्लाझ्मा घेण्यात येणार आहे. त्यासाठी हे शिबीर देशात एक वेगळा उपक्रम ठरेल. मोठा प्रादुर्भाव असलेल्या क्षेत्रात अँटीजेन चाचण्यांची संख्या वाढविण्यावरही भर देण्यात येणार असल्याचेही त्यांनी सांगितले.

पावसाळ्यात उद्भवणाऱ्या मलेरिया, डेंग्यू आणि लेप्टोस्पायरोसिस यांना रोखण्यासाठी करण्यात येणाऱ्या उपाययोजनांची माहिती देण्यात आली. जिथे रुग्ण आढळून येतात, तेथे एकत्रित जाऊन डासांची उत्पत्ती रोखण्यासाठी उपाययोजनांवर भर देण्यात येत असल्याची तसेच २२४ प्रभागात फवारणी सुरु आहे. टाक्यांच्या निर्जंतुकीकरणावर भर देण्यात येत आहे.

महापालिकेच्या रस्त्यांबाबतच्या तक्रारींची प्रणाली अन्य यंत्रणांशी संलग्न करून खड्डे बुजविण्याच्या कामांमध्ये एकसूत्रीपणा आणण्यात आल्याची माहितीही यावेळी देण्यात आली.

बैठकीत कोरोना प्रतिबंधाबाबत झोपडपट्टी आणि सोसायट्यांच्या क्षेत्रातील परिस्थिती आणि उपाययोजनांची माहिती वॉर्डनिहाय सादर करण्यात आली.

राज्यात आतापर्यंत पावणेदोन लाख रुग्ण बरे होऊन घरी – आरोग्यमंत्री राजेश टोपे

मुंबई, : राज्यात गेल्या २० दिवसात कोरोनाचे ८४ हजार ११८ रुग्ण बरे झाले आहेत. याकाळात दिवसाला सरासरी ४२०० रुग्ण बरे झाल्याने त्यांना घरी सोडण्यात आले आहे. आज ५४६० रुग्ण बरे होऊन घरी गेले आहेत. रुग्ण बरे होण्याचे प्रमाण ५४.९२ टक्के असून आतापर्यत एकूण संख्या १ लाख ७५ हजार २९ झाली आहे. दरम्यान, आज कोरोनाच्या ८२४० नवीन रुग्णांचे निदान झाले असून सध्या राज्यात १ लाख ३१ हजार ३३४ रुग्णांवर (ॲक्टिव्ह) उपचार सुरू आहेत, अशी माहिती आरोग्यमंत्री राजेश टोपे यांनी आज दिली.

आजपर्यंत पाठविण्यात आलेल्या १६ लाख ६६७ नमुन्यांपैकी ३ लाख १८ हजार ६९५ नमुने पॉझिटिव्ह (१९.११ टक्के) आले आहेत. राज्यात ७ लाख ६५ हजार ७८१ लोक होम क्वारंटाईनमध्ये आहेत. सध्या ४५ हजार ४३४ लोक संस्थात्मक क्वारंटाईनमध्ये आहेत.

राज्यात आज १७६ करोना बाधित रुग्णांच्या मृत्यूंची नोंद झाली असून सध्या राज्यातील मृत्यूदर ३.७७ टक्के एवढा आहे.

राज्यात नोंद झालेले १७६ मृत्यू हे मुंबई मनपा-४१, ठाणे-५, नवी मुंबई मनपा-११, कल्याण-डोंबिवली मनपा-११, उल्हासनगर मनपा-६,वसई-विरार मनपा-२, रायगड-४,पनवेल-२,नाशिक मनपा-२, धुळे मनपा-१, जळगाव-१८, जळगाव मनपा-३, पुणे-९, पुणे मनपा-२२, पिंपरी-चिंचवड मनपा-११,सोलापूर-१, सोलापूर मनपा-४, सातारा-२, कोल्हापूर-४, सांगली-४,औरंगाबाद मनपा-३, जालना-१,लातूर-२, नांदेड मनपा-२, अमरावती-१, अमरावती मनपा-१, बुलढाणा-२, वर्धा-१ या जिल्हा आणि मनपा क्षेत्रातील तर इतर राज्य १ अशी नोंद आहे.

राज्यातील जिल्हानिहाय ॲक्टिव्ह रुग्णांचा तपशील  

मुंबई: बाधित रुग्ण- (१,०२,४२३), बरे झालेले रुग्ण- (७२,६४८), मृत्यू- (५७५५), इतर कारणांमुळे झालेले मृत्यू-(२९२), ॲक्टिव्ह रुग्ण- (२३,७२८)

ठाणे: बाधित रुग्ण- (७६,७४९), बरे झालेले रुग्ण- (३६,६७६), मृत्यू- (२०६९), इतर कारणांमुळे झालेले मृत्यू-(१), ॲक्टिव्ह रुग्ण- (३८,००३)

पालघर: बाधित रुग्ण- (१२,२६३), बरे झालेले रुग्ण- (६५८३), मृत्यू- (२४८), इतर कारणांमुळे झालेले मृत्यू-(०), ॲक्टिव्ह रुग्ण- (५४३२)

रायगड: बाधित रुग्ण- (११,८३५), बरे झालेले रुग्ण-(६३२१), मृत्यू- (२३०), इतर कारणांमुळे झालेले मृत्यू-(२), ॲक्टिव्ह रुग्ण- (५२८२)

रत्नागिरी:  बाधित रुग्ण- (१२०२), बरे झालेले रुग्ण- (७२५), मृत्यू- (४२), इतर कारणांमुळे झालेले मृत्यू-(०), ॲक्टिव्ह रुग्ण- (४३५)

सिंधुदुर्ग: बाधित रुग्ण- (२८४), बरे झालेले रुग्ण- (२३८), मृत्यू- (५), इतर कारणांमुळे झालेले मृत्यू-(०), ॲक्टिव्ह रुग्ण- (४१)

पुणे: बाधित रुग्ण- (५७,०२४), बरे झालेले रुग्ण- (२०,३११), मृत्यू- (१४०१), इतर कारणांमुळे झालेले मृत्यू-(०), ॲक्टिव्ह रुग्ण- (३५,३१२)

सातारा:  बाधित रुग्ण- (२४२६), बरे झालेले रुग्ण- (१३१८), मृत्यू- (८२), इतर कारणांमुळे झालेले मृत्यू-(१), ॲक्टिव्ह रुग्ण- (१०२५)

सांगली: बाधित रुग्ण- (९६५), बरे झालेले रुग्ण- (५०५), मृत्यू- (३१), इतर कारणांमुळे झालेले मृत्यू-(०), ॲक्टिव्ह रुग्ण- (४२९)

कोल्हापूर: बाधित रुग्ण- (२२५०), बरे झालेले रुग्ण- (९५०), मृत्यू- (३४), इतर कारणांमुळे झालेले मृत्यू-(०), ॲक्टिव्ह रुग्ण- (१२६६)

सोलापूर: बाधित रुग्ण- (५८३६), बरे झालेले रुग्ण- (२६८३), मृत्यू- (३८९), इतर कारणांमुळे झालेले मृत्यू-(१), ॲक्टिव्ह रुग्ण- (२७६३)

नाशिक: बाधित रुग्ण- (९९२१), बरे झालेले रुग्ण- (५३८६), मृत्यू- (३६९), इतर कारणांमुळे झालेले मृत्यू-(०), ॲक्टिव्ह रुग्ण- (४१६६)

अहमदनगर: बाधित रुग्ण- (१६६६), बरे झालेले रुग्ण- (८२८), मृत्यू- (३५), इतर कारणांमुळे झालेले मृत्यू-(०), ॲक्टिव्ह रुग्ण- (८०३)

जळगाव: बाधित रुग्ण- (७७२३), बरे झालेले रुग्ण- (५०३१), मृत्यू- (४१४), इतर कारणांमुळे झालेले मृत्यू-(०), ॲक्टिव्ह रुग्ण- (२२७८)

नंदूरबार: बाधित रुग्ण- (३९७), बरे झालेले रुग्ण- (१९५), मृत्यू- (१७), इतर कारणांमुळे झालेले मृत्यू-(०), ॲक्टिव्ह रुग्ण- (१८५)

धुळे: बाधित रुग्ण- (१९८९), बरे झालेले रुग्ण- (१२८२), मृत्यू- (८४), इतर कारणांमुळे झालेले मृत्यू-(२), ॲक्टिव्ह रुग्ण- (६२१)

औरंगाबाद: बाधित रुग्ण- (१०,०३६), बरे झालेले रुग्ण- (५४४९), मृत्यू- (३७२), इतर कारणांमुळे झालेले मृत्यू-(०), ॲक्टिव्ह रुग्ण- (४२१५)

जालना: बाधित रुग्ण- (१४६१), बरे झालेले रुग्ण- (६६४), मृत्यू- (५६), इतर कारणांमुळे झालेले मृत्यू-(०), ॲक्टिव्ह रुग्ण- (७४१)

बीड: बाधित रुग्ण- (३३९), बरे झालेले रुग्ण- (१६७), मृत्यू- (८), इतर कारणांमुळे झालेले मृत्यू-(०),ॲक्टिव्ह रुग्ण- (१६४)

लातूर: बाधित रुग्ण- (११०८), बरे झालेले रुग्ण- (४९६), मृत्यू- (५३), इतर कारणांमुळे झालेले मृत्यू-(०), ॲक्टिव्ह रुग्ण- (५५९)

परभणी: बाधित रुग्ण- (३७१), बरे झालेले रुग्ण- (१६४), मृत्यू- (८), इतर कारणांमुळे झालेले मृत्यू-(०), ॲक्टिव्ह रुग्ण- (१९९)

हिंगोली: बाधित रुग्ण- (४३५), बरे झालेले रुग्ण- (३०६), मृत्यू- (३), इतर कारणांमुळे झालेले मृत्यू-(०), ॲक्टिव्ह रुग्ण- (१२६)

नांदेड: बाधित रुग्ण- (८९३), बरे झालेले रुग्ण (४२१), मृत्यू- (३५), इतर कारणांमुळे झालेले मृत्यू-(०), ॲक्टिव्ह रुग्ण- (४३७)

उस्मानाबाद: बाधित रुग्ण- (५००), बरे झालेले रुग्ण- (३३४), मृत्यू- (२५), इतर कारणांमुळे झालेले मृत्यू-(०), ॲक्टिव्ह रुग्ण- (१४१)

अमरावती: बाधित रुग्ण- (१२८०), बरे झालेले रुग्ण- (८५६), मृत्यू- (४७), इतर कारणांमुळे झालेले मृत्यू-(०), ॲक्टिव्ह रुग्ण- (३७७)

अकोला: बाधित रुग्ण- (२११०), बरे झालेले रुग्ण- (१६६५), मृत्यू- (९८), इतर कारणांमुळे झालेले मृत्यू-(१), ॲक्टिव्ह रुग्ण- (३४६)

वाशिम: बाधित रुग्ण- (३६२), बरे झालेले रुग्ण- (१५८), मृत्यू- (७), इतर कारणांमुळे झालेले मृत्यू-(०), ॲक्टिव्ह रुग्ण- (१९७)

बुलढाणा: बाधित रुग्ण- (५२५), बरे झालेले रुग्ण- (२२७), मृत्यू- (२४), इतर कारणांमुळे झालेले मृत्यू-(०), ॲक्टिव्ह रुग्ण- (२७४)

यवतमाळ: बाधित रुग्ण- (५५६), बरे झालेले रुग्ण- (३७८), मृत्यू- (१७), इतर कारणांमुळे झालेले मृत्यू-(०), ॲक्टिव्ह रुग्ण- (१६१)

नागपूर: बाधित रुग्ण- (२५८२), बरे झालेले रुग्ण- (१४६०), मृत्यू- (३१), इतर कारणांमुळे झालेले मृत्यू-(१), ॲक्टिव्ह रुग्ण- (१०९०)

वर्धा: बाधित रुग्ण- (७२), बरे झालेले रुग्ण- (३९), मृत्यू- (२), इतर कारणांमुळे झालेले मृत्यू-(१), ॲक्टिव्ह रुग्ण- (३०)

भंडारा: बाधित रुग्ण- (१८७), बरे झालेले रुग्ण- (१०६), मृत्यू- (२), इतर कारणांमुळे झालेले मृत्यू-(०), ॲक्टिव्ह रुग्ण- (७९)

गोंदिया: बाधित रुग्ण- (२३०), बरे झालेले रुग्ण- (१९६), मृत्यू- (३), इतर कारणांमुळे झालेले मृत्यू-(०), ॲक्टिव्ह रुग्ण- (३१)

चंद्रपूर:  बाधित रुग्ण- (२४१), बरे झालेले रुग्ण- (१४८), मृत्यू- (०), इतर कारणांमुळे झालेले मृत्यू-(०), ॲक्टिव्ह रुग्ण- (९३)

गडचिरोली: बाधित रुग्ण- (१९४), बरे झालेले रुग्ण- (११५), मृत्यू- (१), इतर कारणांमुळे झालेले मृत्यू-(०), ॲक्टिव्ह रुग्ण- (७८)

इतर राज्ये: बाधित रुग्ण- (२६०), बरे झालेले रुग्ण- (०), मृत्यू- (३३), इतर कारणांमुळे झालेले मृत्यू-(०), ॲक्टिव्ह रुग्ण- (२२७)

एकूण: बाधित रुग्ण-(३,१८,६९५) बरे झालेले रुग्ण-(१,७५,०२९), मृत्यू- (१२,०३०), इतर कारणांमुळे झालेले मृत्यू-(३०२),ॲक्टिव्ह रुग्ण-(१,३१,३३४)

 (टीप:ही माहिती केंद्र सरकारच्या आयसीएमआर पोर्टलवर मान्यताप्राप्त प्रयोगशाळांनी भरलेल्या कोरोनाबाधित रुग्णांच्या आकडेवारीनुसार तयार करण्यात आलेली आहे. प्रयोगशाळा अहवाल छाननी आणि त्यानुसार उपलब्ध होणारी आकडेवारी ही सातत्याने चालणारी प्रक्रिया असल्याने राज्याच्या एकूण आकडेवारीमध्ये बदल होऊ शकतो.)