पुणे : रायगड जिल्ह्यातील रोहा तालुक्याच्या तांबडी गावात अल्पवयीन मुलीवर बलात्कार करून तिची निर्घृण हत्या केल्याची संतापजनक घटना २६ जुलै रोजी घडली. या घटनेला दोन आठवडे उलटूनही अद्याप मुख्य आरोपीला अटक झालेली नाही. त्यामुळे राज्यातील मराठा संघटनानी आक्रमक पवित्रा घेतला आहे. कोपर्डी (नगर) पाठोपाठ तांबडीतील घटनेबाबतही सरकार आणि पोलिसांकडून दिरंगाई होत आहे. जलदगतीने तपास करून या घटनेतील मुख्य आरोपीस तातडीने अटक करावे, अन्यथा मंत्रालयास घेराव घालणार आहोत, असा इशारा मराठा संघटनानी बुधवारी पत्रकार परिषदेत दिला.

अखिल भारतीय मराठा महासंघ व मराठा क्रांती मोर्चाचा वतीने १८ ऑगस्ट २०२० रोजी मंत्रालयास घेराव घालणार असल्याचे स्पष्ट केले. शेतकरी मराठा महासंघाचे अध्यक्ष व मराठा क्रांती मोर्चाचे राज्य समन्वयक संभाजीराजे दहातोंडे पत्रकार परिषदेत बोलत होते. प्रसंगी राष्ट्रीय उपाध्यक्ष संतोष नानवटे, परशुराम कासोळे आदी उपस्थित होते. तेलंगणा सरकारप्रमाणे या घटनेतील आरोपींनाही थेट एन्काउंटर करून मारावे, असेही दहातोंडे म्हणाले.

संभाजीराजे दहातोंडे म्हणाले, “कोपर्डी बलात्कार प्रकरणातील नराधमांना फाशी होण्यात दिरंगाई होत आहे. त्यामुळे एकापाठोपाठ अशा घटना घडताहेत. तांबडी येथील नववीत शिकणाऱ्या मुलीवर झालेली बलात्कार आणि हत्येची घटना संतापजनक आहे. ही मुलगी उत्तम खेळाडू होती. तसेच ती विद्यमान सरपंचांची मुलगी होती. मात्र, गेल्या १५ दिवसांत मुख्यमंत्री, गृहमंत्री, पालकमंत्री यांनी नेमकी काय कारवाई केली किंवा त्या कुटुंबाला भेटून सांत्वन केले का, असा आमचा सवाल आहे. अभिनेता सुशांत सिंगच्या आत्महत्येच्या तपासाला जसे प्राधान्य दिले जात आहे, तसेच प्राधान्य महाराष्ट्राच्या या कन्येला न्याय मिळवून देण्यासाठी द्यावे.”

“या प्रकरणाला वाचा फोडण्यासाठी मराठा संघटनांच्या समन्वयकानी तांबडी येथे पीडितेच्या कुटुंबाला भेट देऊन सांत्वन केले. तसेच तपासकार्याचा आढावा घेतला. अशा घटनांमध्ये होत असलेल्या दिरंगाईमुळेच त्याची पुनरावृत्ती होत आहे. त्यामुळे या घटनेचा तपास लवकरात लवकर लावून न्यायालयात चार्जशीट दाखल करावे. या प्रकरणी सरकारने ऍड. उज्ज्वल निकम यांची विशेष सरकारी वकील म्हणून नेमणूक करून जलदगती न्यायालयात हा खटला चालवावा. कोपर्डी आणि तांबडी या दोन्ही घटनेतील पीडितांना त्वरित न्याय मिळवून द्यावा. अन्यथा मंत्रालयाला घेराव घालणार आहोत.

पुणेः धरण क्षेत्रात पावसाने हजेरी लावल्याने पुणे शहराला पाणीपुरवठा करणाऱ्या चार प्रमुख धरणांमध्ये १८.६३ अब्ज घनफूट (टीएमसी) पाणीसाठा झाला आहे. खडकवासला धरण हे सुमारे ९९.१६ टक्के भरले असून, पावसाचा जोर कायम राहिल्यास बुधवारी खडकवासला धरण हे सुमारे शंभर टक्के भरण्याची शक्यता जलसंपदा विभागाकडून वर्तविण्यात आली आहे.गेल्या दोन दिवसांपासून पावसाचे प्रमाण कमी झाले होते. मात्र, सोमवारी सायंकाळपासून मंगळवारी सकाळी आठ वाजेपर्यंत पावसाने हजेरी लावल्याने पाणी पातळीत वाढ झाली आहे. मात्र, दिवसभर तुरळक पाऊस होता.पानशेत ७०.७५ टक्के भरले तर वरसगाव ५८.२८ टक्के आणि टेमघर ४४ .९५ टक्के भरले आहे . पण गेल्या वर्षाच्या तुलनेत साडेदहा टीएमसी पाणी साठा अद्याप कमीच असल्याचे पाटबंधारे विभागाने स्पष्ट केले आहे. दरम्यान खडकवासल्यातून मुठा नदीत ४२८ क्युसेक पाण्याचा विसर्ग सुरु करण्यात आला आहे.

धरण                 टीएमसी         टक्के

खडकवासला      १.९६         ९९.१६%
पानशेत               ७.५३         ७०.७५%
वरसगाव             ७.४७          ५८.२८%
टेमघर                 १.६७          ४४.९५%

सध्याचा पाणीसाठा  – १८.६३ टीएमसी व ६३.९१  टक्के

मागील वर्षी धरणातील पाणीसाठा –  २९.१५ टीएमसी व १००टक्के

टेमघर धरण परिसरात रात्रभर सुमारे ४० मिलिमीटर, तर दिवसा सुमारे तीन मिलिमीटर पाऊस पडला. वरसगाव आणि पानशेत धरण क्षेत्रात रात्री प्रत्येकी २४ मिलिमीटर, तर दिवसा अनुक्रमे पाच आणि सहा मिलिमीटर पावसाची नोंद झाली. खडकवासला धरण क्षेत्रात रात्रभर सुमारे १७ मिलिमीटर पाऊस पडला. मात्र, दिवसभर अवघा दोन मिलिमीटर पाऊस झाला. चारही धरणे ही सुमारे ६३ .९१टक्के भरली असल्याची माहिती जलसंपदा विभागाकडून देण्यात आली.

टेमघर धरणात १.६४ टीएमसी, वरसगाव धरणामध्ये ७.४२ टीएमसी, पानशेत धरणामध्ये ७.४३ टीएमसी आणि खडकवासला धरणात १.९३ टीएमसी पाणीसाठा झाला आहे. गेल्या वर्षी या दिवशी चारही धरणे ही शंभर टक्के भरली होती. या धरणांमध्ये २९.१५ टीएमसी पाणीसाठा होता. यंदा १८.४२ टीएमसी पाणीसाठा झाला आहे.

पिंपरी चिंचवड परिसराला पाणीपुरवठा करणाऱ्या पवना धरण हे सुमारे ५२ टक्के भरले असून, ४.४५ टीएमसी पाणीसाठा झाला आहे.

जिल्ह्यातील अन्य धरणांपैकी गुंजवणी धरण क्षेत्रात २४ मिलिमीटर, निरा देवघर धरण परिसरात ३२ मिलिमीटर, भाटघर धरण क्षेत्रात २२ मिलिमीटर पाऊस नोंदविला गेला. गुंजवणी धरण सुमारे ८६ टक्के, नीरा देवघर धरण सुमारे ५६ टक्के, भाटघर धरण सुमारे ६९ टक्के भरले आहे. वीर धरण सुमारे ९४ टक्के, भामा आसखेड धरण हे सुमारे ५३ टक्के भरले असल्याचे जलसंपदा विभागाकडून स्पष्ट करण्यात आले.

पुणे : – भाजपचे प्रदेशाध्यक्ष चंद्रकांत पाटील यांनी भाजपची प्रदेश कार्यकारिणी जाहीर केली. यानंतर भाजपच्या प्रदेश कार्यरणीच्या सदस्यांमध्ये पुण्यातील नगरसेवक राजेंद्र यशवंत शिळीमकर यांची निमंत्रित सदस्य म्हणून निवड करण्यात आली आहे. भाजपचे प्रदेशाध्यक्ष चंद्रकांत पाटील यांनी शिळीमकर यांची निवड केली असून त्यांना निवडीचे पत्र देण्यात आले आहे.
शिळीमकर यांना देण्यात आलेल्या पत्रामध्ये नजीकच्या काळात पक्षाचे काम देण्यात येईल असे आश्वासन देण्यात आले आहे. भाजपचे प्रदेशाध्यक्ष चंद्रकांत पाटील यांनी सोपवलेल्या या जबाबदारीवर राजेंद्र शिळीमकर यांनी आभार मानले आहेत. दिलेली जबाबदारी योग्य पद्धतीने निभावून, पक्ष वाढीसाठी नेहमीच प्रयत्न करेन, अशी प्रतिक्रिया राजेंद्र शिळीमकर यांनी दिली आहे.

पुणे : पुण्यात कोरोना पॉझिटिव्ह रुग्णांची संख्या वाढत असताना खाजगी रुग्णालयांकडून प्रचंड बिल लावून नागरिकांची लूट सुरू आहे. यामध्ये जिल्हा प्रशासनाने आतापर्यंत 83 प्रकरणात खासगी रुग्णालयांना नोटीसा देण्यात आल्या असून, बिलांची तांत्रिक तपासणी करुन पुढील कारवाई करण्यात येईल असे विभागीय आयुक्त सौरभ राव यांनी पत्रकार परिषदेत सांगितले.
याबाबत राव यांनी सांगितले की, खासगी रुग्णालयांकडून कोरोना रुग्णांकडून अधिकचे बील घेतले जात असल्याच्या तक्रारी येत आहेत. यासाठीच प्रशासनाने 8 उपजिल्हाधिकारी , 28 ऑडिटर आणि 4 डॉक्टर यांची समिती स्थापन केली आहे. ही समिती दीड लाखांपेक्षा अधिक बील रुग्णाला दिल्यास एक तासाच्या आत या बिलाची तपासणी करून योग्या आहे किंवा आक्षेप असतील तर तसे स्पष्ट करेल. त्यानंतरच संबंधित रुग्णांने बील पेड करायचे आहे. यात आतापर्यंत या समितीकडे 83 तक्रारी आल्या असून, 11 प्रकरणात स्पष्टीकरण दिले आहे. या सर्व प्रकरणांची तांत्रिक तपासणी करुन दोषी आढळून येणाऱ्या रुग्णालयांवर कारवाई करण्यात येणार असल्याचे राव यांनी सांगितले.

अरविंद शिंदे यांनी केलेले सर्व आरोप चुकीचे -पाटलांचा दावा

पुणे- आंबील ओढ्याला सीमाभिंत घालण्यासाठी महापालिकेने आणि स्थायी समितीने मान्यता दिलेल्या सावी इन्फ्रास्ट्रक्चर चे विकास पाटील यांनी कॉंग्रेसचे ज्येष्ठ नगरसेवक आणि माजी गट नेते यांनी केलेल्या सर्व आरोपांचे खंडन केले . काल मायमराठी ला आलेल्या शिंदे यांच्या पत्रकार परिषदेतील मुद्दे त्यांनी खोडून काढण्याचा प्रयत्न ‘माय मराठी ‘कडे केला . ते म्हणाले ,’ मला इम्पोर्ट झालेला किंवा केलेला ठेकेदार म्हणणे हे साफ चुकीचे आहे. गेल्या वीस वर्षापासून मी पुणे महानगरपालिकेच्यासल्लागार व बांधकामाशी निगडीत आहे यासंदर्भात कागदोपत्री पुरावे उपलब्ध आहेत.पूर्वी मी महापालिकेची कामे केली आहेत . आणि पी डब्ल्यू डी, एम आय डीसी ,एम एस आर डीसी ,नॅशनल हायवे ची कामे केलीत . चाकण येथे आपण ६ मीटर रुंदीची ३० मीटर उंचीची सीमा भिंत एका कंपनीला बाधून दिली आहे. खास तंत्रज्ञान वापरून आपण कामे करत असल्याने इस्टीमेट करताना आपणास या तंत्राचे सादरीकरण करण्यास बोलाविले होते ते आपण महापालिकेत उपस्थित राहून केले आहे.
सदरच्या निविदेत बांधकामाचे मोजमाप हे स्क्वेअर मीटर पद्धतीने नमूद केलेले आहे.
संरक्षक भिंतीच्या बांधकामाची निविदा काढतांना सर्वांना निविदा प्रक्रियेत सहभागी होण्याची
संधी मिळावी यात पारंपरिक पद्धतीने देखील ठेकेदार त्यांची निविदा सादर करू शकतात व नवीन
तंत्रज्ञान यांनादेखील निविदा स्पर्धेत भाग घेता यावा यासाठी स्क्वेअर मीटर पद्धतीने निविदा
काढण्यात आली.अशाप्रकारे सन 2016 साली निविदा क्रमांक 253, ठेकेदार : पाटील कन्स्ट्रक्शन अँड इन्फ्रास्ट्रक्चर लिमिटेड यांनादेखील संरक्षक भिंतीचे बांधकाम व त्याचे मोजमाप हे स्क्वेअर मीटर
पद्धतीने दिलेले असून तसे पुणे महानगरपालिकेने मंजूर केलेले आहे.तसेच सन 2016 साली निविदा क्रमांक 254 अन्वये ठेकेदार एस ए इन्फ्रा यांनादेखील संरक्षक भिंतीचे बांधकाम व त्याचे मोजमाप हे स्क्वेअर मीटर पद्धतीने दिले असून तसे पुणे महानगरपालिकेने मंजूर केलेले आहे
सदरच्या निविदेतील जॉइंट व्हेंचर विषयीचा खुलासा करताना ते म्हणाले,’ निविदेत जॉइंट व्हेंचर करण्यास परवानगी दिलेली आहे. सदरची परवानगी ही महानगरपालिकेच्या फायद्यासाठी व शासकीय नियमानुसार असून यासंदर्भात ठेकेदार म्हणून आम्ही योग्य ती शासकीय कायदेशीर पूर्तता केलेली आहे.
संरक्षक भिंतीच्या कामासाठीच्या अनुभवाविषयी बोलताना ते म्हणाले ,’आमच्या कंपनीला तीस वर्षाचा अनुभव असून गेल्या वीस वर्षापासून संरक्षक भिंतीच्या बांधकामाचा सरकारी व खाजगी क्षेत्रातील खूप मोठा अनुभव आहे त्यासंदर्भात आवश्यक ते प्रमाणपत्र त्यांनी निविदे सोबत सादर केलेले असून त्याची चौकशी झालेली आहे.
खूप वर्षानंतर, पुणे महानगरपालिकेच्या मोठ्या रकमेच्या निविदा प्रक्रियेत अत्यंत पारदर्शकपणे
व महानगरपालिकेच्या फायद्याच्या दृष्टीने सदरील निविदा प्रक्रिया ही राबवलेली असून यामध्ये
पुणे महानगरपालिकेची कोट्यावधी रुपयाची बचत होणार आहे.हे काम आम्ही ठेकेदारी पद्धतीने न घेता डिझाइन बिल्ड ह्या पद्धतीने घेतलेले आहे.

या कामासाठी आम्ही पुणे महानगरपालिकेच्या संपर्कात गेल्या एक वर्षापासून होतो. गेल्या वीस वर्षापासून आम्ही संरक्षक भिंतीचे बांधकाम, व त्याचा आराखडा तयार करणे व बांधकामाचे
नियोजन करून बांधकाम करून देणे ह्या व्यवसायात आहोत.सन 1999 -2000 साली आम्ही हे नवीन तंत्रज्ञान विकसित केलेले असून सदरच्या तंत्रज्ञानाने संरक्षण भिंतीच्या बांधकाम खर्चात 20 ते 25 टक्के एवढी बचत होत असून वेळेत व गुणवत्तेत खूप मोठ्या प्रमाणात फायदा होत आहे.
या नवीन तंत्रज्ञानाचा वापर हा पुणे महानगरपालिकेत जवळपास अठरा ते वीस वर्षांपूर्वी केलेला
असून अशा प्रकारे केलेले अनेक बांधकामे, त्याचे दाखले माझ्याकडे उपलब्ध आहेत.
सदरच्या नवीन तंत्रज्ञानाचे पेटंट घेतले असून याचा वापर हा बांधकाम क्षेत्रात खूप मोठ्या प्रमाणात
पैशाची बचत, वेळेची बचत व उत्कृष्ट गुणवत्ता यासाठी होत आहे. या सीमा भिंतीचे अत्यंत उत्कृष्ट दर्जाचे काम आम्ही करून दाखवू असा दावाही त्यांनी मायमराठी कडे केला आहे. ते म्हणाले ३० वर्षापासून माझे मित्र असलेल्या राजेश पांडे यांना शुभेच्छ्या देणारे होर्डींग्ज मी लावले हे खरे आहे पण त्याचा अर्थ ,संबध या टेंडर शी जोडणे चुकीचे आहे .असेही ते म्हणाले.

कोरोनाच्या जम्बो सेंटर ला स्थायीकडून ७५ कोटी उपलब्ध

गणेश मूर्ती पाण्यात विरघळणारी पावडर खरेदीसाठी ३४ लाख तरतूद

पुणे – मागीलवर्षी सप्टेंबरमध्ये आलेल्या पूरामध्ये उध्वस्त झालेल्या आंबिल ओढ्यातील सिमाभिंती बांधण्याच्या तीन निविदांना आज स्थायी समितीच्या बैठकीमध्ये एकमताने मंजुरी देण्यात आली, अशी माहिती स्थायी समिती अध्यक्ष हेमंत रासने यांनी दिली.कॉंग्रेसच्या अरविंद शिंदे यांचा विरोध असतानाही कॉंग्रेससह सर्वांनी एकमताने या निविदांना मंजुरी दिली .या शिवाय कोरोनारूग्णा वर उपचारासाठी उभारण्यात येणाऱ्या जम्बो सेंटर साठी ७५ कोटी रुपये देण्याच्या प्रस्तावाला आणि गणेश विसर्जनासाठी मूर्ती पाण्यात विरघळणारी पावडर खरेदी करण्यासाठी ३४ लाखाच्या खरेदीला स्थायी समितीने आज मान्यता दिली . हे सर्व विषय बैठकीत आयत्या वेळी मांडून मंजुरी देण्यात आली .

मागीलवर्षी आंबिल ओढ्याला आलेल्या महापुरामुळे अनेकठिकाणच्या पुलांचे तसेच ओढ्याच्या सीमाभिंती पडून शेजारील सोसायट्यांमध्ये पाणी शिरले होते. या पूरामध्ये जिवितहानी सोबतच मोठ्याप्रमाणावर वित्तहानीही झाली होती. यानंतर ओढ्यावरील पुल दुरूस्ती तसेच सिमाभिंतींचे कामही हाती घेण्याचा निर्णय झाला होता. पहिल्या टप्प्यात ओढ्यातील सर्व राडारोडा आणि गाळ काढून खोलीकरणाचे काम करण्यात आले आहे. तर सीमाभिंतीच्या कामाच्या तीन निविदांना स्थायी समितीने आज मान्यता दिली.

या तीन निविदांपैकी के.के. मार्केट ते पदमावती पूल व गजानन महाराज चौक ते वैकुंठाजवळ ओढा ज्याठिकाणी मुठा नदीला मिळतो तेथपर्यंतच्या कामाची ६ कोटी १८ लाख रुपयांची मे. सावी इफ्रास्ट्रक्चर्स ऍन्ड प्रॉपर्टीज प्रा. लि.ची १५.०३ टक्के कमी दराची निविदा मंजूर करण्यात आली. याच कंपनीने पेशवे तलाव ते पदमजी पार्क व पदमावती पूल व गजानन महाराज चौक दरम्यान महापालिका मिळकतींच्या सीमाभिंती बांधण्याची १५.०३ टक्के कमी दराने भरलेली ८ कोटी ९४ लाख रुपयांची निविदा मंजूर करण्यात आली. तर पदमजा पार्क ते के.के. मार्केट आणि कात्रज स्मशानभुमी दरम्यान महापालिकेच्या मिळकतींच्या सिमाभिंती बांधण्याची १८.५१ टक्के या सर्वात कमी दराने आलेली मे. साई सिद्धी इफ्रास्टक्चर कंपनीची एक कोटी ७७ लाख रुपयांची निविदा मंजूर करण्यात आली, अशी माहीती स्थायी समिती अध्यक्ष हेमंत रासने यांनी दिली.

आता अरविंद शिंदे काय भूमिका घेणार याकडे लक्ष

दरम्यान, मे. सावी इफ्रास्ट्रक्चर्स ऍन्ड प्रॉपर्टीज प्रा.लि. ही कंपनी अपात्र असताना तिला पात्र करण्यासाठी अधिकार्‍यांच्या एस्टीमेट कमिटीने जाणीवपूर्वक अटीशर्ती तयार केल्या आहेत. प्रथमच सीमाभिंतीच्या कामाचे घनफुटांऐवजी चौरस फुटांवर एस्टीमेट करण्यात आले आहे. एका भाजप पदाधिकार्‍याच्या दबावाखाली अतिरिक्त आयुक्त डॉ. शांतनु गोयल यांनी असा चुकीचा प्रस्ताव मान्यतेसाठी स्थायी समितीपुढे ठेवला आहे. हा प्रस्ताव मंजूर केल्यास नगरविकास विभागाकडे तसेच लाचलुचपत प्रतिबंधक विभागाकडे तक्रार करणार असल्याचा इशारा कॉंग्रेसचे नगरसेवक अरविंद शिंदे यांनी सोमवारी पत्रकार परिषद घेउन दिला होता. यानंतरही स्थायी समितीमध्ये एकमताने हा प्रस्ताव मंजूर झाल्याने शिंदे काय भुमिका घेतात याकडे लक्ष लागले आहे.

जंबो हॉस्पीटलसाठी 75 कोटी रुपयांच्या खर्चास ‘स्थायी’ समितीची मान्यता

 राज्य शासनाच्यावतीने कोरोनावरील उपचारासाठी सुरू करण्यात येत असलेल्या तीन जंबो कोविड रुग्णालयासाठी पुणे महापालिकेच्या हिश्श्याचे ७५ कोटी रुपये देण्याचा प्रस्ताव मंजूर करण्यात आला. तसेच कोरोना बाधित रुग्णाच्या संपर्कात आलेल्यांची तातडीने तपासणी करण्यासाठी आणखी एक लाख अँन्टीजेन किटस् खरेदी करण्याचा निर्णय आज स्थायी समितीच्या बैठकीमध्ये मंजूर करण्यात आल्याची माहिती रासने यांनी दिली.

कोरोना बाधितांची संख्या वाढण्याची शक्यता गृहीत धरून राज्य शासनाने उपचारासाठी तीन जंबो कोविड हॉस्पीटल उभारण्याचा निर्णय घेतला आहे. पुणे आणि पिंपरी चिंचवड शहरामध्ये उभारण्यात येणार्‍या या कोविड हॉस्पीटल उभारणीची जबाबदारी पीएमआरडीए कडे देण्यात आली आहे. या तीनही हॉस्पीटलसाठी साधारण २६० कोटी रुपये खर्च येणार आहे. यासाठी दोन्ही महापालिका २५ टक्के निधी देणार आहे. पुणे शहरातील सीओईपी महाविद्यालयाच्या आवारात उभारण्यात येणार्‍या हॉस्पीटलचे काम सुरूही झाले आहे. ठेकेदाराला या कामाची आगाउ रक्कम देण्यासाठी पुणे महापालिकेने ५० कोटी रुपये निधी पीएमआरडीकडे वर्ग करण्याचा प्रस्ताव आज मंजुरीसाठी स्थायी समितीपुढे ठेवण्यात आला होता.

यासोबतच सीओईपी महाविद्यालयाच्या आवारात उभारण्यात येणार्‍या कोविड हॉस्पीटलसाठी आवश्यक साधनसामुग्री, औषधे, प्रयोगाशाळा तपासण्या, एक्स रे, कपडे, धुलाई, जैववैद्यकीय कचरा व्यवस्थापन आदी बाबींच्या निविदा महापालिकेकडून राबविण्यासाठी २५ कोटी रुपयांचा निधीच्या खर्चासही आज स्थायी समितीमध्ये मान्यता देण्यात आली असल्याची माहिती रासने यांनी दिली.

आणखी १ लाख अँन्टीजेन कीटस्ची खरेदी

कोरोनाबाधीत रुग्णांच्या संपर्कात आलेल्या संशयितांची तातडीने तपासणी करून संसर्ग रोखण्यासाठी महापालिकेेने मागील महिन्यांत एक लाख अँटीजेन कीटस् खरेदी केल्या आहेत. अँटीजेन किटस्द्वारे करण्यात येत असलेल्या तपासणीचा अहवाल अर्धा तासात प्राप्त होत असल्याने मागील महिन्याभरामध्ये संसर्ग झालेले रुग्ण शोधण्यात मदत झाली. परंतू या कीटस् संपत आल्याने आरोग्य विभागाने आणखी १ लाख किटस् खरेदीसाठी निविदा अल्पमुदतीची निविदा राबविली होती. या निविदेला मान्यता देण्यात आली आहे. यासाठी ४ कोटी ५९ लाख रुपये खर्च येणार आहे, अशी माहिती हेमंत रासने यांनी दिली

पुणे : सुर्यदत्ता ग्रुपच्या एज्यु-सोशियो कनेक्ट इनिशिएटिव्ह अंतर्गत दिवंगत रत्नाबाई आणि बन्सीलाल चोरडिया यांच्या प्रेरणेने आणि आशीर्वादाने सुर्यदत्ता एज्युकेशन फौंडेशनच्या वतीने ‘असेट बँक’ उभारण्यात आल्या आहेत. सूर्यदत्ता स्कुल ऑफ इंटरनॅशनल हॉटेल मॅनेजमेंट अंतर्गत सुर्यदत्ता फुड बँक, सूर्यदत्ता इन्स्टिट्यूट ऑफ फॅशन टेक्नॉलॉजी अंतर्गत सुर्यदत्ता क्लोदिंग बँक, सूर्यदत्ता इन्स्टिट्यूट ऑफ डिझाईन अंतर्गत सुर्यदत्ता प्रॉडक्ट्स बँक, सूर्यदत्ता इन्स्टिट्यूट ऑफ रिसर्च अँड इनोव्हेशन सेंटर अंतर्गत सुर्यदत्ता नॉलेज बँक आणि सूर्यदत्ता इन्स्टिट्यूट ऑफ बिझनेस मॅनेजमेंट, सूर्यदत्ता इन्स्टिटयूट ऑफ मॅनेजमेंट अँड मास कम्युनिकेशन, सूर्यदत्ता इन्स्टिट्यूट ऑफ बिझनेस मॅनेजमेंट अँड टेक्नॉलॉजी आणि सूर्यदत्ता कॉलेज ऑफ मॅनेजमेंट इन्फर्मेशन रिसर्च अँड टेक्नॉलॉजी या संस्थांच्या अंतर्गत सूर्यदत्ता बिझनेस बँक अशा पाच बँकांचा यात समावेश आहे. या बँकांमार्फत अर्थात इन्स्टिट्यूटमार्फत विविध प्रकारचे कार्यक्रम राबविण्यात येणार आहेत. समाजातील गरजू, होतकरू, आर्थिक मागास वर्गातील लोकांना, शेतकर्‍यांना, सैन्यदलातील सदस्यांना, नोकरदारांना, दिव्यांग मुलांसाठी महत्वपूर्ण ठरणार आहे, अशी माहिती सुर्यदत्ता ग्रुपच्या उपाध्यक्षा व सचिव सुषमा चोरडिया यांनी दिली आहे. येत्या १५ ऑगस्ट रोजी ७४ व्या स्वातंत्र्यदिनाच्या निमित्ताने हा सामाजिक उपक्रम सुरु होत आहे.
सुषमा चोरडिया म्हणाल्या, “सुर्यदत्ता ग्रुपचे संस्थापक अध्यक्ष प्रा. डॉ. संजय चोरडिया यांच्या संकल्पनेतून या असेट बँकांची निर्मिती झाली आहे. कोअर टीममध्ये प्रा. डॉ. शैलेश कासंडे, डॉ. विजयालक्ष्मी, डॉ. शेफाली जोशी, उल्हास चौधरी, अजित शिंदे, मंदार दिवाने, रेणुका घोसपुरकर, मोनिका कर्वे, स्नेहल नवलाखा, डॉ. राम चंद्र आदींचा समावेश असणार आहे. सुर्यदत्ता फुड बँकेच्या माध्यमातून स्वयंसेवी संस्था, रोजंदारीवरील मजूर, रस्त्यावर राहणारे नागरिक यांच्यासह गरजूंना अन्न पुरवले जाणार आहे. सुर्यदत्ताच्या पदाधिकाऱ्यांचे, संबंधितांचे जन्मदिवस, तसेच विविध महत्वपूर्ण दिवसांचे औचित्य साधून हे अन्नदान होणार आहे. तसेच गरजूना जीवनावश्यक साहित्य दिले जाणार आहे. क्लोदिंग बँकेमार्फत वापरायोग्य कपड्यांचे संकलन, तसेच नवीन कपडे घेऊन गरजू लोकांना पुरविण्यात येणार आहेत. आलेले कपडे स्वच्छ धुऊन, विद्यार्थी व शिक्षकांकडून त्याचे रफ़ू-अल्ट्रेशन करून ते वितरित केले जाणार आहेत. ज्यांना गरज आहे, अशा लोकांना या कपड्यांचे वाटप केले जाईल. नवीन आणि वापरलेले अशा दोन्ही प्रकारचे कपडे गरजूंपर्यंत पोहोचवले जाणार आहेत. अनाथ आश्रम, महिला आश्रम, वृद्धाश्रमात राहणार्‍या गरजुंना याची मदत होणार आहे. नेहमीच्या वापरातील, उबदार कपडे आपण देऊ शकाल.”
“सुर्यदत्ता प्रॉडक्ट बंकेच्या माध्यमातून सर्व प्रकारच्या पुनर्वापर होऊ शकेल, अशा उत्पादनांचे संकलन केले जाईल. त्यात आवश्यक त्या दुरुस्त्या करून गरजूना ते दिले जाणार आहेत. तसेच शालेय साहित्य, जसे कि वह्या, पुस्तके, पेन, पेन्सिल्स, रबर, कंपास आदिंचा समावेश असेल. शिवाय, अवांतर वाचनाची पुस्तके आदी साहित्य समाजातील गरजू विद्यार्थ्यांना हे साहित्य वाटप केले जाणार आहे. सुर्यदत्ता नॉलेज बँकेमधून ज्ञानदानाचे कार्य होणार आहे. ऑनलाईन आणि ऑफलाईन स्वरुपात विविध गोष्टींचे ज्ञान दिले जाणार आहे. त्यामध्ये भारतीय संस्कृती मूल्ये, चालू घडामोडींची माहिती, प्रश्नोत्तरे, प्राथमिक शिक्षण अशा स्वरुपात हे ज्ञानदान होणार आहे. बिझनेस बँकेच्या माध्यमातून स्टार्टअप आणि छोट्या उद्योगांना प्रोत्साहन देण्यास नवोद्योजकांना माहिती आणि इतर सहाय्य पुरवले जाणार आहे. स्टार्टअपसाठी प्रेरित करण्याचा उद्देश यामागे असून, सुर्यदत्ता परिवारातील प्राध्यापक, विद्यार्थी किंवा इतर कर्मचारी हे काम करतील. यामुळे विद्यार्थ्यांना उद्योजकतेकडे वळण्यासोबतच देशातील ‘एसएमई’ चालना मिळेल,” असेही चोरडिया यांनी नमूद केले. तसेच अधिक माहितीसाठी 9763266829 या क्रमांकावर किंवा sgiassetbk@suryadatta.edu.in या ईमेलवर संपर्क करण्याचे आवाहनही त्यांनी केले.
मुलांमध्ये चांगले गुण रुजावेत. त्यांच्यात उद्योजकतेविषयी, करिअरविषयी नवीन कल्पना रुजाव्यात, उपलब्ध स्रोतांपासून नवीन ध्येये सध्या करावीत, या उद्देशाने हा उपक्रम महत्वाचा ठरणार आहे. या बँक विद्यार्थ्यांसाठी रिसोर्सेसचा खजिना असेल, त्यामुळे जास्तीत जास्त विद्यार्थ्यांनी याच्याशी आपल्याला जोडून घ्यावे, असे प्रा. डॉ. संजय चोरडिया यांनी नमूद केले.