पुणे दि.12:-पुणे जिल्ह्यामध्ये कोरोना विषाणूचा प्रादुर्भाव व वाढती रुग्णसंख्या विचारात घेता मेडीकल ऑक्सीजनचा पुरवठा सुरळीत होण्यासाठी व भविष्यातील वाढती मागणी लक्षात घेता एअर लिक्वीड इंडिया होल्डींग प्रा.लिमिटेड चाकण, ता. खेड या कंपनीस मेडीकल ऑक्सीजन उत्पादन सुरु करणे आवश्यक आहे. एअर लिक्वीड इंडिया होल्डींग प्रा.लिमिटेड चाकण कंपनीला विद्युत जोडणी करण्यासाठी परिसरातील इतर कंपन्यांचा विद्युत पुरवठा ठराविक कालावधीकरीता बंद करण्यात येणार असल्याचे आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष आयुष प्रसाद यांनी दिले आहेत.
एअर लिक्वीड या कंपनीस मेडीकल ऑक्सीजन उत्पादन सुरु करण्याकरीता एअर लिक्वीड इंडिया होल्डींग प्रा. लिमिटेड चाकण या कंपनीस विद्युत जोडणी करण्यासाठी 132 के.व्ही. चिंचवड- चाकण विद्युत वाहिनी, 220 के.व्ही. व्होकसवॅगन ते 220 के.व्ही. चाकण उपकेंद्र ही वाहिनी व 220 के.व्ही. चाकण उपकेंद्रामधून निघणारे सर्व 22 के.व्ही. व 132 के. व्ही. वाहिनीचा पुरवठा दिनांक 15 ऑगस्ट 2020 रोजी सकाळी 9 ते सायंकाळी 5 या कालावधीत बंद करण्यात येणार आहे.
पुणे जिल्हयात आपत्ती व्यवस्थापन कायदा तसेच भारतीय साथ रोग नियंत्रण अधिनियम 1897 अन्वये कोवीड-19 साथीच्या रोगाच्या नियंत्रणासाठी, कोरोना विषाणूचा प्रादुर्भाव व वाढती रुग्णसंख्या विचारात घेता मेडीकल ऑक्सीजनचा उत्पादन व पुरवठा सुरळीत होण्यासाठी व भविष्यातील वाढती मागणी लक्षात घेता एअर लिक्वीड इंडिया होल्डींग या कंपनीस मेडीकल ऑक्सीजन उत्पादन सुरु करणेकरीता हा आदेश पारीत करण्यात आला आहे.
मे.आयनॉक्स एअर प्रोडक्टस प्रा. लि. चाकण व मे टायोनिपॉन सॅनसो इंडिया प्रा. लि. चाकण यांच्या मेडीकल ऑक्सीजन उत्पादनावर देखील या विद्युत पुरवठा बंद कालावधीचा परिणाम होण्याची शक्यता आहे. त्यामुळे मे.आयनॉक्स एअर प्रोडक्टस प्रा. लि.चाकण व मे टायोनिपॉन सॅनसो इंडिया प्रा. लि. चाकण यांनी सध्या होत असलेला मेडीकल ऑक्सीजनचा पुरवठा दिनांक 15 ऑगस्ट 2020 रोजी व तद्नंतर देखील विनाअडथळा सुरळीत राहील, याची दक्षता घेण्याच्या सूचना या आदेशान्वये देण्यात आल्या आहेत. या दिवशी ज्या रुग्णालयांना ते मेडीकल ऑक्सीजनचा पुरवठा करतात, त्यांच्याशी मागणी बाबत समन्वय ठेवून आवश्यक तो मेडीकल ऑक्सीजनचा पुरवठा करावा. कोणत्याही परिस्थीतीत रुग्णांची गैरसोय होणार नाही याबाबतची जबाबदारी संबंधित कंपन्यांची राहिल.
एअर लिक्वीड इंडिया होल्डींग प्रा. लिमिटेड, चाकण ही कंपनी इतर राज्यात मेडीकल ऑक्सीजन चे उत्पादन करीत असल्याने त्यांनी बंद कालावधीमध्ये मेडीकल ऑक्सिजनचा पुरवठा सुरळीत सुरु राहण्यांकरीता आयनॉक्स एअर प्रोडक्टस चाकण व टायोनिपॉन चाकण यांच्याशी समन्वय साधून मेडीकल ऑक्सीजन पुरवठा करण्याची जबाबदारी एअर लिक्वीड इंडिया होल्डिंग, चाकण यांची राहील. त्यापुढे पुणे शहरातील व जिल्हयातील शासकीय रुग्णालये व इतर रुग्णालये यांना मेडीकल ऑक्सीजनचा पुरवठा नेहमीप्रमाणे सुरळीत राहील, याची जबाबदारी आयनॉक्स एअर प्रोडक्टस प्रा. लि. चाकण ता. खेड व टायोनिपॉन चाकण ता, खेड यांची राहील. एअर लिक्वीड इंडिया होल्डींग प्रा. लिमिटेड चाकण या कंपनीस विद्युत जोडणी करण्याकरीता दिलेल्या वेळेत काम पूर्ण करण्याची जबाबदारी महाराष्ट्र राज्य विद्युत पारेषण कंपनीची राहील.
या आदेशाचे उल्लंघन केल्यास आपत्ती व्यवस्थापन अधिनियम 2005 व भारतीय साथ रोग नियंत्रण नयम 1897 तसेच भारतीय दंड विधान 1860 चे कलम 188 प्रमाणे सर्व संबंधित दंडनिय कार्यवाहीस पात्र राहतील, असे आदेशात नमूद करण्यात आले आहे.

पुणे :
  रोटरी क्लब ऑफ पुणे सनराईजच्या अध्यक्षपदी  भरत पाटील यांची निवड करण्यात आली. यावेळी सेक्रेटरीपदी डॉ सिमरन जेठवानी तर खजिनदारपदी  होमी वाडिया यांची निवड करण्यात आली. मावळते अध्यक्ष ब्रिग्रेडियर डॉ अमरजीत सिंह यांच्याकडून त्यांनी सूत्रे स्वीकारली.
 ऑनलाईन झालेल्या या कार्यक्रमास प्रमुख पाहुणे म्हणून प्रांतपाल रश्मी कुलकर्णी व सहाय्यक प्रांतपाल पल्लवी साबळे आदी उपस्थित होते.१२ ओगस्ट २०२० रोजी हा कार्यक्रम पार पडला.

पुणे-मागील काही महिन्यांपासून रखडलेली भारतीय जनता पार्टीची जम्बो पुणे शहर कार्यकारिणी बुधवारी जाहीर करण्यात आली.यामध्ये तब्बल 12 जणांची उपाध्यक्ष पदावर निवड करण्यात आली आहे. विशेष म्हणजे या कार्यकारिणीत भाजपचे माजी सहयोगी खासदार संजय काकडे यांच्या समर्थकांना मानाचे स्थान देण्यात आले आहे.

2017 च्या महापालिका निवडणुकीपासून काकडे यांच्या समर्थकांना स्थान मिळत नसल्याची ओरड सुरू होती.

पुणे शहर भाजपचे अध्यक्ष जगदीश मुळीक यांनी आज सर्वांना निवडीचे पत्र पाठविले आहे.

नगरसेवक हरिदास चरवड, माजी नगरसेवक दिनेश धाडवे, नगरसेविका मानसी देशपांडे, भूषण तुपे, संतोष राजगुरू, योगेश बाचल, गणेश कळमकर, सुनील मारणे, श्रीपाद ढेकणे, दिलीप काळोखे, डॉ. संदीप बुटाला, रमेश काळे यांची उपाध्यक्षपदी निवड करण्यात आली आहे.

राजेश पांडे यांची सरचिटणीस-संघटन, तर गणेश घोष, राजेश येनपुरे, दीपक नागपुरे, दीपक पोटे यांची सरचिटणीसपदी, नगरसेविका गायत्री खडके, प्रशांत हरसुले, चंद्रकांत पोटे, माजी नगरसेवक किरण बारटक्के, मंगला ढोरे, कोमल शेंडकर, हरीश निकम, संदीप लोणकर, अनिता तलाठी, सुनील माने, निलेश कोंढाळकर यांची चिटणीसपदी निवड करण्यात आली आहे.

पुणे- श्री गणेशात्सवानिमित्त प्रतिवर्षी श्री गणेश मूर्ती विक्री स्टॉल्सना बहुतांश फुटपाथवर जागा देण्यात येते . तथापि कोरोना संसर्गाच्या पार्श्वभूमीवर श्री गणेश मूर्ती विक्री स्टॉलसाठी रस्ता अथवा पदपथांवर यावर्षी परवानगी देण्यात येणार नाही .असे महापौर कार्यालयातून प्रसिद्धीस दिलेल्या संदेशात म्हटले आहे.

यंदाचे वर्षी श्री गणेश मूर्ती विक्री व्यावसायिकांना फक्त पुणे महानगरपालिका क्रीडांगणांवर स्टॉलसाठी परवानगी दिली जाणार आहे . फक्त या वर्षासाठी पुणे महानगरपालिका क्रीडांगणांवरील श्री गणेश मूर्ती विक्री स्टॉलसाठी अनामत रक्कम रु . ५००० / – व प्रतिदिन भाडे रक्कम रु . ५०० / – आकारण्यात यावे तसेच पुणे महानगरपालिका शाळांच्या वर्गखोल्या देखील श्री गणेश मूर्ती विक्रेत्यांसाठी विनामूल्य उपलब्ध करुन देणेत याव्यात अशा सूचना महापौर यांनी पुणे मनपा प्रशासनास दिल्या आहेत .असे या संदेशात म्हटले आहे .

पुणे, दि. 12 : जलदगतीने विस्तारीत होणाऱया वाघोली परिसरातील वीजग्राहकांना दर्जेदार व अखंडित वीजपुरवठा देण्यासाठी महावितरणकडून वीज वितरण यंत्रणेच्या विविध कामांसाठी 12 कोटी 67 लाख रुपयांचा निधी मंजूर करण्यात आला असून कंत्राटदारांकडून कामे देखील सुरु झाली आहेत. या कामांमुळे वीज वितरण यंत्रणेचा कायापालट होणार आहे. तसेच जुनाट यंत्रणाही बदलण्यात येत आहे. दरम्यान, ग्राहकांशी सतत संवाद साधून अडचणी समजून घेत देखभाल व दुरुस्तीची कामे करण्यात आली आहे. त्यामुळे या परिसरात तांत्रिक बिघाडांमुळे वीजपुरवठा खंडित होण्याचे प्रमाण देखील कमी झाले आहे.

      मुळशी विभाग अंतर्गत वाघोली शाखे अंतर्गत सुमारे 60 हजार वीजग्राहक आहेत. महावितरणकडून लोणीकंद उपकेंद्रातील एकूण 22 वीजवाहिन्यांद्वारे वाघोली परिसरात वीजपुरवठा केला जातो. गेल्या दोन वर्षांपासून विविध कारणांमुळे तसेच वाढत्या नागरीकरणामुळे वीज वितरण यंत्रणेवर ताण येत असल्याने महावितरणकडून वीजयंत्रणेचे सक्षमीकरण तसेच देखभाल व दुरुस्तीचे कामे नियमितपणे करण्यात येत आहे. या परिसरातील वीजग्राहकांशी सातत्याने संवाद साधून तक्रारींचे निवारण करण्यासोबतच स्थानिक वीजयंत्रणेत बदल व सुधारणा करण्यात येत आहे. परिणामी तांत्रिक बिघाडामुळे वीजपुरवठा खंडित होण्याचे प्रमाण सद्यस्थितीत कमी झाले आहे.

सुरळीत वीजपुरवठ्यासाठी महावितरणकडून लोणीकंद उपकेंद्र ते पूर्वरंग सोसायटीमधील पूर्वरंग उपकेंद्रापर्यंत 42 किलोमीटरच्या चार उच्चदाब भूमिगत वीजवाहिन्यांचे काम सुरु केले होते. वीजयंत्रणेवरील ताण कमी होण्यासोबतच सुरळीत वीजपुरवठ्यासह पर्यायी स्वरुपाचा वीजपुरवठा वाघोली परिसराला उपलब्ध होणार होता. मात्र काही अडचणी व राईट ऑफ वेमुळे हे काम अद्याप पूर्ण होऊ शकलेले नाही. या चारही भूमिगत वाहिन्या कार्यान्वित झाल्यास संपूर्ण वाघोली परिसराला मोठा फायदा होणार आहे.

वाघोली परिसरातील नागरीकरण व विजेची वाढती मागणी पाहता महावितरणने एसएसएमआर (system strengthening under metro region) योजनेतून 12 कोटी 67 लाख रुपयांच्या विविध कामांना मंजुरी दिली आहे. त्याची कामेही युद्धपातळीवर सुरु झालेली आहेत. यामध्ये नवीन रिंग मेन युनिट, एबी स्विच, फिडर पिलर्स बसविणे, नवीन वितरण रोहित्र, रोहित्रांची क्षमतावाढ, 15 किलोमीटर नवीन भूमिगत वाहिनी, 35 किलोमीटर वीजतारा बदलणे आदी 25 प्रकारचे कामे करण्यात येत आहेत. यासोबतच यंदाच्या मान्सूनपूर्व देखभाल व दुरुस्तीच्या कामामध्ये रोहित्रांतील तेलाची पातळी वाढविणे, गंजलेले व सडलेले वीजखांब बदलणे, वाकलेले वीजखांब सरळ करणे, सुरक्षिततेसाठी वीजवाहिन्यांना स्पेसर्स किंवा पीव्हीसी स्पेसर्स बसविणे, लोंबकळणाऱ्या वीजतारांचे झोल काढणे, वितरण रोहित्रांना अर्थिंग करणे, डिस्ट्रीब्यूशन बॉक्सची दुरुस्ती तसेच क्लिनिंग व झाकणे लावणे, नवीन किटकॅट बसविणे, झाडाच्या फांद्या तोडणे, पीन व डिस्क इन्सूलेटर बदलणे, नादुरुस्त सर्व्हीस वायर बदलणे, रोहित्रांच्या केबल बदलणे इत्यादी कामे करण्यात आलेली आहेत. त्यामुळे वाघोली परिसरात तांत्रिक बिघाडामुळे वीजपुरवठा खंडित होण्याचे अत्यल्प झाले आहे.

जेड रेसिडेंसीमध्ये 10 दिवसांत एकूण 77 मिनिटे वीज खंडित – वाघोली येथील 900 घरांच्या जेड रेसिडेंसीमध्ये एकूण 9 स्वतंत्र इमारती आहेत. त्यातील काही इमारतीमधील रहिवाशांनी वारंवार वीजपुरवठा खंडित झाल्याची तक्रार विविध माध्यमांद्वारे केली आहे. मात्र वस्तुस्थिती पडताळून पाहिली असता गेल्या 10 दिवसांमध्ये विविध वेळेत झालेल्या खंडित वीजपुरवठ्याचा एकूण कालावधी 77 मिनिटांपेक्षा अधिक आढळून आला नाही. त्यातही 10 मिनिटांपेक्षा अधिक कालावधीपर्यंत वीजपुरवठा खंडित नव्हता. वादळ, पाऊस, झाडे, फांद्या पडणे व इतर विविध कारणांमुळे वीजपुरवठा खंडित झाल्यास या इमारतींना पर्यायी व्यवस्थेतून वीजपुरवठा करण्यात येतो. त्यासाठी तांत्रिक उपाय करण्यास 5 ते 10 मिनिटांचा कालावधी आवश्यक आहे. विशेष म्हणजे जेड रेसीडेंसीमधील काही इमारतींकडे कॉमन मीटरच्या वीजबिलांची 52 लाख रुपयांची थकबाकी होती. सद्यस्थितीतही काही इमारतींकडे  फेब्रुवारीपासून 19 लाख रुपयांची थकबाकी आहे. मात्र महावितरणने कोविड प्रादुर्भावामुळे वीजपुरवठा खंडित करण्याची कारवाई केली नाही.

पुणे :
राज्याच्या साखर आयुक्त कार्यालयात विषाणूनाशक कोरोना किलर उपकरण बसविण्यात आले आहे.इलेक्ट्रॉनिक्स इंजिनियर असलेल्या भाऊसाहेब जंजिरे यांच्या इंडोटेक इंडस्ट्रीयल सोल्युशन्स प्रा.लि (पुणे) या कंपनीने ‘आयनायझेशन’ च्या तत्वावर तयार केलेल्या ‘कोरोना किलर’ विषाणूनाशक उपकरणाचे प्रात्यक्षिक आज बुधवार दि १२ ऑगस्ट रोजी शिवाजीनगर येथील साखर आयुक्त कार्यालयात दाखविण्यात आले.प्रात्यक्षिकानंतर हे उपकरण  कार्यालयात बसविण्यात आले.भाऊसाहेब जंजिरे यांनी पत्रकाद्वारे ही माहिती दिली .  ‘कोरोना मुळे अनेक उद्योगांप्रमाणे साखर उद्योगही अडचणीत आला आहे.साखर कारखान्यांमधील दैनंदिन कामकाजावर परिणाम झाला आहे.अशा पार्श्वभूमीवर विषाणू,बुरशी आणि बॅक्टेरिया नाशक इलेक्ट्रॉनिक उपकरणे साखर कारखान्यांना उपयुक्त ठरतील.साखर कारखान्यांना,संबंधित कार्यालये आणि आस्थापनांना या उपकरणांमुळे निर्धोकपणे दैनंदिन कामकाज करता येईल.’ असे साखर आयुक्त शेखर गायकवाड यांनी सांगितले. 
 आयसीएमआर ,राष्ट्रीय विषाणु संशोधन संस्था ,नायडू हॉस्पिटल यांनी ‘कोरोना किलर ‘ विषाणू नाशक   इलेक्ट्रॉनिक उपकरणाला दिलेली  कार्यक्षमता प्रमाणपत्र यावेळी साखर आयुक्तांना  देण्यात आली .    
भाऊसाहेब जंजिरे  म्हणाले ,’हे इलेक्ट्रॉनिक उपकरण अत्यंत चांगल्या पद्धतीने काळाची गरज ओळखून तयार केलेले  आहे. आवश्यक परीक्षण संस्थांची प्रमाणपत्रे असल्याने   हे उपकरण सगळीकडे लावणे शक्य  आहे . ज्या हॉस्पिटलमध्ये कोविड -१९ चे रुग्ण  आहेत, त्या हॉस्पिटलमध्ये ,सेंटरमध्ये डिसन्फेक्ट करण्यासाठी हे उपकरण अत्यंत महत्त्वाचे  काम करीत आहे .’ 
 आयनायझेशन च्या माध्यमातून कोरोना व्हायरस च्या आवरणास नष्ट करून व्यक्तीचे कोरोना विषाणू पासून रक्षण करणाऱ्या ‘कोरोना किलर ‘ या इलेक्ट्रॉनिक उपकरणास इंडियन कौन्सिल ऑफ मेडिकल रिसर्च ( आयसीएमआर ),नॅशनल इन्स्टिट्यूट ऑफ व्हायरॉलॉजी तर्फे  जुलै २०२० मध्ये कार्यक्षमता प्रमाणपत्र  देण्यात आले  आहे .पुण्यातील इंडोटेक इंडस्ट्रियल सोल्युशन्स प्रा.लि .या कंपनीने संशोधित केलेले आणि  अशा स्वरूपाची मान्यता मिळवणारे हे पहिले उपकरण आहे .  
‘कोरोना किलर ‘ हे फक्त विजेवर चालणारे आणि साबण किंवा सॅनिटायझर न लागणारे हे इलेक्ट्रॉनिक उपकरण आहे . ते कोणत्याही बंद परिसरात वापरता येते . घर ,हॉस्पिटल ,शाळा ,हॉस्पिटल ,गाड्या ,विमान, प्रयोगशाळा ,क्वारंटाईन सेंटर ,कारखाने ,मंदिरे अशा कोणत्याही ठिकाण ते वापरता येते .  या इलेक्ट्रॉनिक उपकरणास इंडियन कौन्सिल ऑफ मेडिकल रिसर्च ( आयसीएमआर ),नॅशनल इन्स्टिट्यूट ऑफ व्हायरॉलॉजी तर्फे मान्यता देण्यात आली आहे . तसेच पुण्यातील नायडू रुग्णालयानेही यशस्वी वापराचे प्रमाणपत्र दिले आहे. कोविड रुग्णाचे मास्क ,हातमोजे ,बेडशीट आणि इतर वस्तूंचे निर्जंतुकीकरण करण्यास देखील हे उपकरण उपयोगी ठरते. 

पुणे विभागातील 1 लाख 1 हजार 636 कोरोना बाधित रुग्ण बरे होऊन घरी गेले;
विभागात कोरोना बाधित 1 लाख 46 हजार 340 रुग्ण
-विभागीय आयुक्त सौरभ राव

पुणे,दि.12 :- पुणे विभागातील 1 लाख 1 हजार 636 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 1 लाख 46 हजार 340 झाली आहे. तर ॲक्टीव रुग्ण संख्या 40 हजार 906 इतकी आहे. कोरोनाबाधीत एकुण 3 हजार 798 रुग्णांचा मृत्यू झाला असून मृत्यूचे प्रमाण 2.60 टक्के आहे. पुणे विभागामध्ये बऱ्या होणा-या रुग्णांचे प्रमाण 69.45 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा
पुणे जिल्हयातील कोरोना बाधीत एकूण 1 लाख 12 हजार 131 रुग्णांपैकी 84 हजार 645 रुग्ण बरे होवून घरी गेले आहेत. ॲक्टीव रुग्ण संख्या 24 हजार 934 आहे. कोरोनाबाधित एकूण 2 हजार 552 रुग्णांचा मृत्यू झाला आहे. मृत्यूचे प्रमाण 2.28 टक्के इतके आहे तर बरे होणा-या रुग्णांचे प्रमाण 75.49 टक्के आहे.
सातारा जिल्हा
सातारा जिल्हयातील कोरोना बाधीत एकूण 5 हजार 939 रुग्णांपैकी 2 हजार 806 रुग्ण बरे होवून घरी गेले आहेत. ॲक्टीव रुग्ण संख्या 2 हजार 941 आहे. कोरोनाबाधित एकूण 192 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 11 हजार 647 रुग्णांपैकी 7 हजार 626 रुग्ण बरे होवून घरी गेले आहेत. ॲक्टीव रुग्ण संख्या 3 हजार 449 आहे. कोरोनाबाधित एकूण 572 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 4 हजार 902 रुग्णांपैकी 1 हजार 692 रुग्ण बरे होवून घरी गेले आहेत. ॲक्टीव रुग्ण संख्या 3 हजार 51 आहे. कोरोनाबाधित एकूण 159 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 11 हजार 721 रुग्णांपैकी 4 हजार 867 रुग्ण बरे होवून घरी गेले आहेत. ॲक्टीव रुग्ण संख्या 6 हजार 531 आहे. कोरोनाबाधित एकूण 323 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 3 हजार 561 ने वाढ झाली आहे. यामध्ये पुणे जिल्ह्यात 2 हजार 44 , सातारा जिल्ह्यात 174, सोलापूर जिल्ह्यात 323, सांगली जिल्ह्यात 126 तर कोल्हापूर जिल्ह्यात 894 अशी रुग्ण संख्येमध्ये वाढ झालेली आहे.
पुणे विभागातील सर्व्हेक्षण
आजपर्यत विभागामध्ये एकुण 7 लाख 28 हजार 942 नमून्याचा तपासणी अहवाल प्राप्त झाला. प्राप्त अहवालांपैकी 1 लाख 46 हजार 340 नमून्यांचा अहवाल सकारात्मक (पॉझिटिव्ह) आहे.
( टिप :- दि. 11 ऑगस्ट 2020 रोजी रात्री 9.00 वा. पर्यंतच्या आकडेवारीनुसार )

:महापौरसाहेब इंग्रज बनायचा प्रयत्न करू नका …मनसे चे शहराध्यक्ष अजय शिंदे आक्रमक

: गणेश विसर्जना वर लादलेली अघोषित बंदी आम्ही मानणार नाही विसर्जन घाटावरच करणार….
पुणे-घरातल्या घरातच गणपती कसा बुडवायचा ? असा प्रश्न कॉंग्रेसचे गटनेते आबा बागुल यांनी उपस्थित केल्यानंतर आता मनसे ने घरीच विसर्जन या महापौरांच्या कल्पनेवर टीकेची झोड उठविली आहे . हव्या त्या ,योग्य उपाययोजना सुचवा, सोशल डिस्टन्सं बंधनकारक करा , दरवर्षी प्रमाणे  मनपासेवकाच्या माध्यमातून विसर्जन योजना राबवा , अगदी गरज असेल तर आम्हाला ही सहभागी करून घ्या पण गणेश विसर्जनावर अघोषित बंदी लादू नका , घरातच विसर्जन करा हि एकूणच गणेश विसर्जनावर अघोषित बंदी आहे अशी भूमिका घेत महापौरांना मनसे ने आव्हान दिले आहे.

या संदर्भात मनसे चे शहराध्यक्ष अजय शिंदे यांनी महापौरांना दिलेल्या पत्रकात म्हटले आहे कि,
जगावर करोना संकट आहे तसच ते देशावर ही आहे आणि महाराष्ट्रावर ही आहे.आणि महाराष्ट्रात विशेषतः पुण्यात तो  फक्त देवदेवतांच्या मागे लागला आहे की काय अशी परिस्थिती निर्माण झाली आहे असे मनपाच्या निर्णया वरून वाटत आहे. काल परवा आपण पुणेकरांना गणपतीमूर्ती च्या साईज ठरवून देत गणेशाच्या मुर्ती घरातच विसर्जीत करायचं बंधन घातले.इंग्रजांच्या काळात ही अशीच बंधन घालण्यात येत होती.
सार्वजनिक गणेशोत्सव साजरा करू नका हे आवाहन पुणेकरांनी स्वीकारलं गणेश मूर्ती देवळातच बसवण्याची तयारी ही सुरू झाली त्यात ही खरतर काही ठिकाणी अडचणी आहेत अनेक सार्वजनिक गणेश मंडळाच्या गणेश मुर्ती ना देवळं नाही त्या कुठे ठेवायच्या हा प्रश्न आहेच  मा .चंद्रकांतदादानी देखील या संदर्भातील मागणी केली आहे. आणि अशा परिस्थितीत मांडवाची मागणी रास्त आहे.
आता प्रश्न गणेश विसर्जनाचा तर गणेश विसर्जनाला या वर्षी तरी कोणी मिरवणुका काढणार नाही घरगुती गणपतीच विसर्जन हे प्रत्येक घरातील जास्तीत जास्त ४ मंडळी कडून होत आणि सगळ्याच घरातील गणपती एकाच दिवशी आणि एकच वेळी विसर्जित होत नाही
1 दिवस दीड दिवस पाच दिवस सात दिवस गौरीगणपती दहा दिवस आणि अनंत चतुर्थी ला विसर्जित होणारे असे विविध दिवशी विसर्जित होणारे गणपती असतात आणि पुण्यात अश्याच स्वरूपात विसर्जन होते. आणि ते एकाच ठिकाणी होते असं ही नाही  पुण्यातील प्रत्येक क्षेत्रिय कार्यालयातील हद्दीत हे विसर्जन होते.या प्रत्येक विसर्जन ठिकाणी चेंगराचेंगरी झाल्याची आणि गर्दी मुळे पोलिसी कारवाई झाल्याची नोंद ही कुठेच नाही. मग घरीच विसर्जनाच आणि गणेश मूर्तीच्या उंचीचा बंधन का ?तुम्ही कोण आहात आमच्या धार्मिक बाबी मध्ये हस्तक्षेप करणारे ?
आणि ती ही गरज नसताना आहो बालाजी पासून ओंकारेश्वर पर्यंत सगळी मंदिर उघडली . तुम्ही सगळे मॉल उघडले राज्यसरकरच्या कृपेने अगदी पोलीस बंदोबस्तात वाईन शॉप उघडली त्या ठिकाणी गर्दी होत नाही का मटणाच्या दुकाना बाहेर चार चार किलोमीटरच्या रांगा लागल्या रस्त्यावर गर्दी आहे आणि देवांना का बंधन घालता? बंधन घालता आणि घाटावर विद्युत रोषणाई करता दोन अडीच कोटींची टेंडर कशा साठी काढता नक्की साधायच काय आहे.म्हणजे विद्युत विभागाचे टेंडर काढणार लोकांन वर बंधन घालून केमिकल खरेदी करणार  हे नक्की कोणा साठी चर्चा अशी आहे की मध्यवस्तीतील एका विद्यमान लोकप्रतिनिधी च्या नातेवाईका साठी हा खटाटोप गेल्या 3 वर्षा पासून सुरू आहे . असे या पत्रकात म्हटले आहे . सोबत पत्र येथे पहा.