पुणे-

कोरोना विषाणू बाधित  रुग्णांना कोणत्याही हॉस्पिटलमध्ये त्वरित वैद्यकीय उपचार सुरु होण्यासाठी हॉस्पिटलच्या   ओपीडीमध्ये देखील वैद्यकीय उपचार सुरु करण्याची गरज आहे. त्यासाठी कोणत्याही कोविड हॉस्पिटलमध्ये ओपीडी नसून हॉस्पिटल बाहेर मंडप उभारून ओपीडी सुरु करून तेथे डॉक्टर,नर्सेस व वॉर्डबॉय यासह व्हेंटिलेटर व ऑक्सिजनची सुविधा निर्माण करावी आणि रुग्नांना हॉस्पिटलमध्ये बेड उपलब्ध होईपर्यंत ओपीडीमध्येच त्वरित उपचार सुरु व्हावेत अशी मागणी काँग्रेस पक्षाचे गटनेते आबा बागुल यांनी केली. 
ते म्हणाले की , रुग्णांची संख्या वाढत आहे. मात्र मनपा,राज्य शासन आणि खासगी हॉस्पिटल्सची क्षमता कमी पडत आहे. अश्या वेळी हॉस्पिटलमध्ये  बेड मिळेपर्यंत कोरोना बाधित रुग्णांना तिष्ठत बसावे लागते.  व त्या मौल्यवान  वेळी वैद्यकीय  उपचार सुरु न झाल्यास तो रुग्ण दगावणायची भीती असते. नुकतेच  पुण्यात एक ५४ वर्षाची  महिला व एक तरुण पत्रकार पांडुरंग रायकर यांना वेळेत उपचार सुरु न झाल्यामुळे व हलगर्जीपणा झाल्यामुळे त्यांचा दुरदैवी मृत्यू झाल्याचे वृत्त प्रकाशित झाले आहे. अश्या अनेक केसेस आहेत त्यांना वेळेवर उपचार मिळत नाहीत त्यामुळे रुग्ण दगावतात त्याची कधीही गांभीर्याने दखल प्रशासनाने  घेतली नाही. त्यासाठीच हॉस्पिटल बाहेर ओपीडी उभारून त्यांचे त्वरित उपचार सुरु व्हावेत. व हॉस्पिटलमध्ये बेड उपलब्ध झाल्यावर रुग्नांना शिफ्ट करावे. रुग्ण व त्यांच्या नातेवाईकांना देखील याची कल्पना द्यावी. यामुळे वेळीच उपचार सुरु होऊन रुग्णांचे  प्राण वाचतील. सध्या त्या रुग्णांना कोणत्याही हॉस्पिटलमध्ये बेड उपलब्ध होत नसल्यास ओपीडीत तात्पुरते उपचार सुरु करून वैद्यकीय दिलासा देण्याची गरज आहे. काही तासानंतर हॉस्पिटलमध्ये बेड उपलब्ध झाल्यावर त्या रुग्णास शिफ्ट करणे शक्य असते. यासाठीच मनपा,राज्य शासन अथवा खासगी हॉस्पिटल मध्ये ओपीडी मधेच तातडीचे वैद्यकीय उपचार अश्या रुग्नांना  मिळण्याची व्यवस्था  व्हावी.कोणालाही रुग्णालयात जागा नाही म्हणून परत पाठवू नये त्यांचे उपचार ओपीडीत सुरु करून त्यांना हॉस्पिटलमध्ये जागा झाल्यावर शिफ्ट करावे.   वेळ प्रसंगी  हॉस्पिटल बाहेर तात्पुरता मंडप उभारून तेथेही ओपीडी सुरु करता येऊ शकेल . रुग्णांना वाचवण्यासाठी मौल्यवान वेळ वाया जाऊ नये यासाठीच प्रशासनाने  याचा विचार करावा व त्वरित कृती करावी. 

पुणे-टीव्ही नाईन या वृत्तवाहिनीचे पत्रकार पांडुरंग रायकर यांच्या मृत्यूस कारणीभूत असलेल्या पुण्यातील जम्बो कोव्हीड सेंटर च्या व्यवस्थेच्या विरोधात पतित पावन संघटना पुणे शहर तर्फे सोशल डिस्टंसिंग चे भान राखून आंदोलन करण्यात आले त्या कोव्हीड सेंटर मध्ये रुग्णांची व्यवस्थित रित्या देखभाल होत नाही तेथील रेंगाळलेल्या व्यवस्था यामुळे रुग्णांच्या नातेवाईकांमध्ये असंतोष निर्माण झालेला आहे या सगळ्याला प्रशासन जबाबदार असून नागरिकांच्या होत असलेल्या गैरसोयी बद्दल प्रशासन जबाबदार आहे सदर ठिकाणी होणाऱ्या मृत्यूबाबत प्रशासनाने संबंधितांवर गुन्हा दाखल करावा अशी मागणी याठिकाणी करण्यात आली त्यावेळी पुणे शहराचे मनोज नायर,श्रीकांत शिळीमकर,गोकुळ शेलार,गुरु कोळी,स्वप्नील नाईक,विजय गावडे,अरविंद परदेशी,राजेंद्र बर्गे,रोहन मोहोळ व अक्षय बर्गे व यांच्यासह सर्व उपस्थित होते

णे दि .03 : – पुणे जिल्हयामध्ये कोरोना संसर्गाच्या पार्श्वभूमीवर करण्यात येणा-या उपाययोजनांची प्रत्यक्ष पाहणी करण्याकरीता जिल्हाधिकारी डॉ.राजेश देशमुख यांनी दौंड तालुक्याचा आज दौरा केला. दौंड तालुक्यामध्ये कोरोनाबाधित रुग्णांची संख्या वाढली असून कोरोना संसर्ग रोखण्यासाठी बाधितांचा वेळीच शोध घेवून त्यांचे अलगीकरण करणे गरजेचे असल्याचे सांगतानाच कोरोनावर मात करण्यासाठी सर्वांनी नियमांचे पालन केले पाहिजे. नियमभंग करणाऱ्या विरुद्ध कडक कारवाई करा, असे निर्देश जिल्हाधिकारी डॉ. राजेश देशमुख यांनी आज दिले.
जिल्हाधिकारी डॉ.राजेश देशमुख यांनी आज यवत ग्रामीण रुग्णालय व दौंड नगरपरिषद क्षेत्रातील प्रतिबंधित क्षेत्राची पाहणी तसेच राज्य राखीव पोलीस मुख्यालयामध्ये दौंड तालुक्यातील कोरोना प्रतिबंधक उपाययोजनांचा आढावा घेतला. यावेळी जिल्हा परिषदेचे मुख्य कार्यकारी अधिकारी आयुष प्रसाद, जिल्हा शल्य चिकित्सक डॉ.अशोक नांदापूरकर, जिल्हा आरोग्य अधिकारी डॉ.भगवान पवार, उपविभागीय अधिकारी प्रमोद गायकवाड, जिल्हा परिषदेचे उपमुख्य कार्यकारी अधिकारी संदीप कोहिनकर, गट विकास अधिकारी अमर माने, प्रभारी तहसिलदार एच.आर.म्हेत्रे आदि उपस्थित होते.
जिल्हाधिकारी डॉ.देशमुख म्हणाले की, अति जोखमीचे आजार असलेल्या व्यक्तींचा कोरोना विषाणू संसर्गापासून अधिक हानी होण्याची शक्यता असते. त्यामुळे तालुक्यातील नागरिकांची आरोग्य तपासणी करुन अतिजोखमीचे आजार तसेच प्रतिबंधित क्षेत्रातील बंधने पाळली जावीत, सुरक्षित अंतर, मास्कचा वापर आदीचा अवलंब होत नसल्यास कारवाई करुन शिस्त निर्माण करण्यासाठी प्रयत्न करावा, असे निर्देशही त्यांनी दिले, तसेच चेस दि व्हायरस या संकल्पनेप्रमाणे लक्षणे असणा-या व्यक्तींपर्यंत आरोग्य यंत्रणेने पोहचले पाहिजे, त्यामुळे संसर्गाची साखळी तुटण्यास मदत होईल. हीच संकल्पना आपण संपूर्ण जिल्हाभर राबवित असल्याचेही त्यांनी सांगितले.
जिल्हा परिषदेचे मुख्य कार्यकारी अधिकारी आयुष प्रसाद यांनी ग्रामीण भागात कोरोना संसर्ग
रोखण्यासाठी करण्यात येत असलेल्या उपाययोजना अधिक प्रभावीपणे राबवा तसेच कोरोनाबाधित व्यक्तीचा संपर्क शोधण्यावर अधिक भर द्या, अशा सूचना केल्या. यावेळी विविध विभागांचे प्रमुख अधिकारी उपस्थित होते

मुंबई, दि. 3 :- पुण्याचे माजी महापौर, राष्ट्रवादी काँग्रेसचे ज्येष्ठ नेते दत्तात्रय गोविंद तथा दत्ता एकबोटे यांच्या निधनाबद्दल उपमुख्यमंत्री अजित पवार यांनी दु:ख व्यक्त केलं असून समाजवादी विचारांवर निष्ठा ठेवून वंचित, उपेक्षित, कष्टकरी जनतेच्या हक्कासाठी संघर्ष करणारं नेतृत्व आज काळाच्या पडद्याआड गेलं आहे. पुण्याच्या जडणघडणीतील त्यांचं योगदान सदैव स्मरणात राहील, अशा शब्दात उपमुख्यमंत्री अजित पवार यांनी त्यांना श्रद्धांजली वाहिली.

इंदापूर तालुक्यातील कोरोना प्रतिबंधात्मक उपाययोजनांचा घेतला आढावा
पुणे दि.3 : – कोरोनाचा संसर्ग रोखण्यासाठी सर्व यंत्रणांमधील समन्वय महत्वाचा असून मृत्यूदर कमी करणे, कोरोना निदानासाठीच्या चाचण्यांची संख्या वाढवून बाधित रुग्णांवर वेळेत उपचार करणे तसेच इतर आजार असणा-या व्यक्ती, ज्येष्ठ नागरीक यांना वेळीच ओळखून त्यांची आरोग्य तपासणी व उपचार करा, अशा सूचना सार्वजनिक बांधकाम ( सार्वजनिक उपक्रम वगळून) मृद व जलसंधारण, पदुम, वने, सामान्य प्रशासन विभागाचे राज्यमंत्री दत्तात्रय भरणे यांनी आज प्रशासनाला दिल्या. कोरोना बाधित रुग्णांवर उपचार करण्यासाठी आवश्यक त्या सुविधा उपलब्ध आहेत. घाबरु नका शासन आपल्या पाठिशी आहे, असा विश्वासही त्यांनी दिला.
इंदापूर येथील शासकीय विश्रामगृहातील सभागृहात राज्यमंत्री श्री.भरणे, जिल्हाधिकारी डॉ.राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद यांनी एकत्रित इंदापूर तालुक्यातील कोरोना प्रतिबंधात्मक उपाययोजनांचा आढावा घेतला, यावेळी जिल्हा शल्य चिकित्सक डॉ.अशोक नांदापूरकर, जिल्हा आरोग्य अधिकारी डॉ.भगवान पवार, प्रांताधिकारी दादासाहेब कांबळे, तहसिलदार सोनाली मेटकरी आदी उपस्थित होते.
राज्यमंत्री भरणे म्हणाले,कोरोनावर मात करण्यासाठी सर्वांनी नियमांचे पालन केले पाहिजे. प्रतिबंधित क्षेत्रात नियमांचे काटेकोरपणे पालन आवश्यक आहे. कोरोनाबाधित रुग्णांच्या संपर्क शोध मोहिमेला गती देणे आवश्यक असून सुरक्षित अंतर, मास्कचा वापर याबाबत खबरदारी घ्यावी असे आवाहनही त्यांनी केले.
कोरोना प्रतिबंधासाठी आपल्याकडे सोपविण्यात आलेली जबाबदारी प्रत्येकाने व्यवस्थितपणे पार पाडावी. कोरोना संसर्गाला रोखण्यासाठी सर्व मिळून प्रयत्न करु या, असे सांगून इंदापूर तालुक्यात कोरोना प्रतिबंधात्मक उपाययोजनांमध्ये कोणत्याही प्रकारची कमतरता भासणार नाही यासाठी आपण सातत्याने पाठपुरावा करणार असल्याचे त्यांनी सांगितले.
जिल्हाधिकारी डॉ.देशमुख म्हणाले, इंदापूर तालुक्यातील ग्रामीण भागात कोरोनाबाधित रुग्णांची संख्या वाढते आहे. कोरोना संसर्ग रोखण्यासाठी प्रत्येक बाबीचे सूक्ष्म नियोजन आवश्यक आहे. कोरोनाबाधित व्यक्तीच्या संपर्कातील अधिकाधिक व्यक्तींचा शोध घेवून शासनाच्या नियमांचे काटेकोर पालन होणे आवश्यक आहे. ‘ चेस दि व्हायरस ‘ संकल्पना प्रभावीपणे राबविण्याचे निर्देश देताना जिल्हाधिकारी डॉ.देशमुख म्हणाले, ज्येष्ठ नागरीक, इतर आजार असलेले नागरीक यांची सातत्याने आरोग्य तपासणी करावी, आरोग्य यंत्रणेसाठी आवश्यक मनुष्यबळ उपलब्ध करुन देण्यात आले आहे. तसेच मृत्यूदर शून्यावर आणण्यासाठी टास्क फोर्समार्फत प्रशिक्षण देण्यात आले आहे.
इंदापूर तालुक्यातील कोरोनाबाधित रुग्णांची वाढती संख्या लक्षात घेत बेड उपलब्धतेचे नियोजन करण्यात आले आहे. कोविड केअर सेंटर्सची संख्या वाढविण्यात येणार असून कोरोना प्रतिबंधासाठी आवश्यक साधनसामग्रीसाठी निधी उपलब्ध करुन देण्यात आला आहे. कोरोना संसर्ग रोखण्यासाठी सुरक्षित अंतर, मास्क, सॅनिटायझर्सचा वापर यासह शासनाच्या मार्गदर्शक सूचनांचे पालन करुन प्रशासनाला सहकार्य करावे, असे आवाहनही त्यांनी केले.
जिल्हा परिषदेचे मुख्य कार्यकारी अधिकारी आयुष प्रसाद म्हणाले, ग्रामीण भागात सर्व्हेक्षणावर अधिक भर देणे आवश्यक आहे. यामध्ये सर्दी, ताप, खोकला व लक्षणे असलेल्या रुग्णांची तातडीने आरोग्य तपासणी करा, तसेच महात्मा फुले जनआरोग्य योजनेचा लाभ समाजातील शेवटच्या घटकांपर्यंत पोहचला पाहिजे यादृष्टीने कार्यवाही करावी,असे निर्देश त्यांनी संबंधितांना दिले.
यावेळी विविध यंत्रणांचे प्रमुख अधिकारी उपस्थित होते.

पुणे-महापालिकेचे माजी महापौर दत्तात्रय गोविंद तथा दत्ता एकबोटे यांचे मध्यरात्री सव्वा बाराच्या दरम्यान कोरोनाने ससून रुग्णालयात निधन झाले. ते ८४ वर्षाचे होते. त्यांच्यामागे पत्नी, दोन मुली आणि नातू आहे.माजी महापौर असलेल्या एकबोटे यांनाही कोरोना चे उपचारासाठी संघर्ष करावा लागल्याचे समोर आल्याने पुण्यातील आरोग्य सुविधांबाबत आ वासून पुढे असलेल्या प्रश्नापुढे साऱ्यांनीच नांग्या टाकल्याचे चित्र समोर येते आहे.
गरीबांचे लढाऊ नेते अशी ओळख असलेले एकबोटे हे समाजवादी विचारांचे होते. समाजवादी पक्ष, जनता पक्ष आणि त्यानंतर राष्ट्रवादी काँग्रेसमध्ये राज्य उपाध्यक्ष म्हणून काम केले. कष्टकऱ्याचेसाठी त्यांनी अनेकदा आंदोलने केली आणि तुरुंगवासही भोगला. आणीबाणीतही हे स्थानबद्ध होते. गोल्फ क्लब आणि खराडी इथे विडी कामगारांसाठीची शेकडो घरे त्यांनी उभारली. राणाप्रताप उद्यानात त्यांच्या पुढाकाराने एसेम जोशी यांचा पूर्णाकृती पुतळा त्यांनी उभारला. महात्मा फुले पेठेतून ते निवडून येत.
नुकतेच त्यांच्यात ज्येष्ठ मुलीचे आणि तरुण मुलाचे कोरोनाने निधन झाले आहे. एकबोटे यांना कोरोना झालाय हे समजताच त्यांनी अनेक रुग्णालयाशी संपर्क साधला पण त्यांना कुठेच जागा उपलब्ध झाली नाही अखेर त्यांनी ससून रुग्णालयात दाखल व्हावे लागले. तिथेही त्यांना योग्य उपचार मिळत नव्हता. माजी नगरसेविका मीनाक्षी ज्ञानेश्वर काडगी यांनी गिरीश बापट, अजित पवार यांच्याशी संपर्क साधला त्यानंतर सुविधा उपलब्ध झाल्या आणि गांभीर्याने उपचार केले गेले. निधनानंतरही त्यांच्या अंत्यसंस्कारात अडचणी निर्माण झाल्या. निधनानंतर त्यांचं पार्थिव प्रथम कैलास स्मशानभूमीत नेण्यात आले. तिथे जागा नसल्याने त्यांना येरवडा इथं नेण्यात आले. आणि त्यानंतर कोरेगाव पार्क स्मशानभूमीत अंत्यसंस्कार करण्यात आले.

पुणे विभागातील 1 लाख 84 हजार 382 कोरोना बाधित रुग्ण बरे होऊन घरी गेले,
विभागात कोरोना बाधित 2 लाख 50 हजार 650 रुग्ण
-विभागीय आयुक्त सौरभ राव
पुणे,दि.03 :- पुणे विभागातील 1 लाख 84 हजार 382 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 2 लाख 50 हजार 650 झाली आहे. तर ॲक्टीव रुग्ण संख्या 59 हजार 596 इतकी आहे. कोरोनाबाधीत एकुण 6 हजार 672 रुग्णांचा मृत्यू झाला असून मृत्यूचे प्रमाण 2.66 टक्के आहे. पुणे विभागामध्ये बऱ्या होणा-या रुग्णांचे प्रमाण 73.56 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 1 लाख 77 हजार 282 रुग्णांपैकी 1 लाख 37 हजार 638 रुग्ण बरे होवून घरी गेले आहेत. ॲक्टीव रुग्ण संख्या 35 हजार 498 आहे. कोरोनाबाधित एकूण 4 हजार 146 रुग्णांचा मृत्यू झाला आहे. मृत्यूचे प्रमाण 2.34 टक्के इतके आहे तर बरे होणा-या रुग्णांचे प्रमाण 77.64 टक्के आहे.
सातारा जिल्हा
सातारा जिल्हयातील कोरोना बाधीत एकूण 15 हजार 247 रुग्णांपैकी 8 हजार 151 रुग्ण बरे होवून घरी गेले आहेत. ॲक्टीव रुग्ण संख्या 6 हजार 666 आहे. कोरोनाबाधित एकूण 430 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 18 हजार 882 रुग्णांपैकी 14 हजार 242 रुग्ण बरे होवून घरी गेले आहेत. ॲक्टीव रुग्ण संख्या 3 हजार 871 आहे. कोरोनाबाधित एकूण 769 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 13 हजार 897 रुग्णांपैकी 7 हजार 927 रुग्ण बरे होवून घरी गेले आहेत. ॲक्टीव रुग्ण संख्या 5 हजार 428 आहे. कोरोनाबाधित एकूण 542 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 25 हजार 342 रुग्णांपैकी 16 हजार 424 रुग्ण बरे होवून घरी गेले आहेत. ॲक्टीव रुग्ण संख्या 8 हजार 133 आहे. कोरोनाबाधित एकूण 785 रुग्णांचा मृत्यू झाला आहे
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 6 हजार 151 ने वाढ झाली आहे. यामध्ये पुणे जिल्ह्यात 3 हजार 535, सातारा जिल्ह्यात 589 , सोलापूर जिल्ह्यात 456 , सांगली जिल्ह्यात 735 तर कोल्हापूर जिल्ह्यात 836 अशी रुग्ण संख्येमध्ये वाढ झालेली आहे.
पुणे विभागातील सर्व्हेक्षण
आजपर्यत विभागामध्ये एकुण 11 लाख 81 हजार 138 नमून्याचा तपासणी अहवाल प्राप्त झाला. प्राप्त अहवालांपैकी 2 लाख 50 हजार 650 नमून्यांचा अहवाल सकारात्मक (पॉझिटिव्ह) आहे.
( टिप :- दि. 2 सप्टेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे : निवासी सोय असलेल्या हॉटेल आणि लॉज यांना शंभर टक्के क्षमतेसह, तर खासगी कार्यालयात तीस टक्के कर्मचारी उपस्थितीत ठेवून व्यवसाय सुरू करण्यास पुणे महापालिकेकडून बुधवारी (ता.२) परवानगी देण्यात आली. मात्र शहरातील शाळा, कॉलेज, खासगी क्‍लासेस, रेस्टॉरंन्ट (हॉटेल), चित्रपटगृहे जलतरण तलाव, व्यायामशाळा या मात्र तीस सप्टेंबरपर्यंत खुली करण्यास परवानगी देण्यात आलेली नाही.केंद्र आणि राज्य सरकारकडून अनलॉक-4 ची नियमावली जाहीर करण्यात आली होती.त्यामध्ये हॉटेलसह सर्व सुविधा सुरू करण्यास परवानगी देण्यात आली होती. परंतु त्याबाबतचे आदेश पुणे महापालिकेकडून काढण्यात आलेले नव्हते. त्यामुळे पुणे शहरात या सर्व गोष्टी कधी सुरू होणार यांची चौकशी होत होती. अखेर बुधवारी सायंकाळी महापालिका आयुक्त विक्रम कुमार यांनी पुणे शहरासाठी अनलॉक-4 नियमावली जाहीर करण्यात आली.

हे सुरू राहणार
– निवासाची सोय असलेले हॉटेल व लॉज यांना शंभर टक्के परवानगी
– खासगी आस्थापना कार्यालयात तीस टक्के कर्मचारी वर्गासह सुरू करण्यास परवानगी
– आंतरजिल्हा वाहतुकीसाठी निर्बंध नाही, वाहतुकीसाठी ई-पासची गरज नाही.
– पीएमपी बसला प्रवासी वाहतुकीसाठी परवानगी
– शॉपिंग मॉल मधील थिएटर वगळून सुरू ठेवण्यास मान्यता
– रेस्टॉरंट (हॉटेल) मधून पार्सल सेवा सुरू ठेवता येणार
– सर्व प्रकाराचे मैदानी खेळ, व्यायाम यांना परवानगी
– ब्युटी पार्लर, केशकर्तनालय

हे बंद राहणार
– शाळा, कॉलेज, कोचिंग क्‍लासेस
– चित्रपटगृहे, व्यायामशाळा, धार्मिक स्थळे
– रेस्टॉरंन्ट, जलतरण तलाव, बागा
– नाट्यगृह, सभागृह, बार
– सर्व प्रकारचे सार्वजनिक कार्यक्रम
– साठ वर्षांवरील आणि दहा वर्षांच्या आतील मुले यांना विनाकारण बाहेर पडण्यास बंदी
– मास्क वापरणे बंधनकारक

पुणे : शहर आणि पिंपरी-चिंचवडमध्ये गेल्या पाच महिन्यांपासून बंद पडलेली पीएमपीची प्रवाशांसाठीची वाहतूक सेवा गुरुवारपासून (ता.3) दोन्ही शहरांत सकाळी सहा वाजल्यापासून सुरू होणार आहे. पहिल्या टप्प्यात पीएमपीच्या 421 बस एकूण 190 मार्गांवर धावतील. प्रवाशांसाठी प्रत्येक बसमध्ये सॅनिटायझर उपलब्ध असेल. 65 वर्षांवरील प्रवाशांना बसमध्ये प्रवेश करण्यास बंदी असेल.कोरोनाच्या लॉकडाउनमुळे पीएमपीची प्रवासी वाहतूक 18 मार्चपासून टप्प्याटप्प्याने बंद झाली होती

बस प्रवासासाठी सूचना
– 10 वर्षांखालील मुले आणि 65 वर्षांवरील नागरिकांना बसमध्ये प्रवेश नसेल.
– बसमध्ये फक्त 22 प्रवासी असतील.
– प्रवाशांना मास्कशिवाय बसमध्ये प्रवेश मिळणार नाही.

दोन्ही शहरांतील अत्यावश्‍यक सेवांमधील कर्मचाऱ्यांसाठी 25 मार्चपासून फक्त वाहतूक सुरू आहे. मात्र, लॉकडाउन शिथिल झाल्यावर विमान, रेल्वे, एसटी, रिक्षा आणि कॅब वाहतूक सुरू झाली आहे. परंतु, पीएमपीला वाहतूक सुरू करण्यासाठी परवानगी मिळत नव्हती.

या पार्श्‍वभूमीवर महापौर मुरलीधर मोहोळ यांनी पुढाकार घेतल्यावर 20 ऑगस्ट रोजी दोन्ही महापालिकेच्या पदाधिकाऱ्यांची बैठक झाली. त्यात 3 सप्टेंबरपासून वाहतूक सुरू करण्याचे ठरले. दोन्ही महापालिकांडून या बाबतचे अधिकृत पत्र मिळाल्यावर वाहतूक सुरू करण्यासाठी पीएमपीचे अध्यक्ष आणि व्यवस्थापकीय संचालक राजेंद्र जगताप यांनी बुधवारी प्रशासनाला सूचना दिल्या.प्रत्येक बस दिवसातून दोन वेळा सॅनिटाईज करण्यात येईल. तसेच शहरातील प्रमुख स्थानकांवर प्रवाशांना उभे राहण्यासाठी मार्किंग करण्यात आले आहे. तेथेच प्रवाशांनी उभे राहवे, असे आवाहन प्रशासनाने केले आहे. स्वारगेट, महात्मा गांधी स्थानक, हडपसर, डेक्कन जिमखाना, पुणे स्टेशन, पुणे मनपा, विश्रांतवाडी, वाघोली, कात्रज, वारजे माळवाडी, निगडी, चिंचवड गाव, पिंपळे गुरव, भोसरी, सांगवी, पिंपरी चौक येथील पास केंद्र रविवार वगळता सकाळी सात ते दुपारी दोन दरम्यान उघडी राहतील, असे पीएमपीचे वाहतूक व्यवस्थापक अनंत वाघमारे यांनी स्पष्ट केले आहे.