पुणे-: पुण्यात गेल्या काही दिवसांपासून मुसळधार पाऊस कोसळतो आहे. कात्रज भागात हे प्रमाण अधिक आहे शुक्रवारी झालेल्या जोरदार पावसाने कात्रज तलाव काल भरून वाहू लागला. यामुळे कात्रज तळ्या शेजारी असलेल्या शेलारमळ्यात नाल्याचे पाणी घुसले. त्यात एक १८ महिन्यांचे बाळ पाण्यात वाहून चालले होते. परंतु, वडिलांनी स्वतःचा जीव धोक्यात घालून वाहून जात असलेल्या बाळाला वाचवले. सध्या भारती विद्यापीठ येथील दवाखान्यात या बाळाची जीवन- मरणाची लढाई सुरु आहे.
याविषयी अधिक माहिती अशी की, शेलार मळ्यातून वाहणाऱ्या नैसर्गिक नाल्यावर अतिक्रमणे,तसेच नाले सफाई न झाल्यामुळे नाल्याची रुंदी व खोली कमी झाली असल्यामुळे थोडाही पाऊस झाला की पाणी या भागात घुसते. गँबेल वाँल मुळे हा १२ मीटरचा ओढा जागेवर फक्त ४ मीटर राहिलेला आहे. कालच्या झालेल्या पावसाने सुमारे ४ फुट पाणी या भागात घुसले असल्याचे प्रत्यक्षदर्शी संदीप कोष्टी यांनी सांगितले.या पाण्यामध्ये संदेश भोरे हे १८ महिन्यांचे बाळ वाहून चाललेे होते. सतीश भोरे यांच्या बंगल्यामध्ये पाणी घुसल्यामुळे भोरे हे बाहेर असलेली आपली दुचाकी वाहुन जाऊ नये यासाठी पाण्यात उतरले,त्यांच्यापाठोपाठ संदेश देखील बाहेर आला आहे हे त्यांना माहीत नव्हते.रात्री ९.३० च्या सुमारास ही घटना घडली.संदेश वाहून जाऊ लागल्यामुळे तो ओरडला तेव्हा सतीश भोरे यांच्या लक्षात हा प्रकार आला.त्यांनी गाडी सोडुन आपल्या बाळाला वाचवण्यासाठी धाव घेतली.सुमारे १५ ते २० फुट हे बाळ वाहून गेले होते.नंतर त्याला तातडीने भारती विद्यापीठ येथे दाखल करण्यात आले आहे.नाका-तोंडात पाणी गेल्याने हा चिमुरडा जीवन-मरणाची लढाई लढत आहे.

नाले सफाईच्या नावाखाली कोटी रुपये उचलणारे ठेकेदार व त्यांच्यावर निरीक्षक म्हणून काम करणारे अधिकारी यांच्या अक्षम्य चुकीमुळे अनेकांना आपले प्राण धोक्यात घालावे लागत आहेत.

याविषयी ड्रेनेज विभागाच्या कनिष्ठ अभियंता स्वाती बिराजदार यांच्याशी संपर्क साधला असता त्यांनी सांगितले की, नाले सफाई झालेली आहे.गार्डन विभागाच्या अंतर्गत या नाल्यावर जेएन.आर.यु.योजनेमध्ये दोन्ही बाजूनी गँबेन वाॅल केल्यामुळे ओढ्याची लांबी कमी झालेली आहे.त्यामुळे नेहमीच पाणी शेलार मेळ्यात घुसत आहे.वॉलवर असलेल्या जाळीमुळे सर्व भिंत काढणे शक्य नाही.पुढील काळात शेलार मळ्यात पाणी जाऊ नये यासाठी उपाय योजना सुरु केल्या आहेत.

कोवीड-19 रुग्णालये आणि हेल्थ सेंटरमधील ऑक्सीजन पुरवठा सुरळीत ठेवण्यासाठी जिल्हास्तरीय समिती गठीत
– जिल्हाधिकारी डॉ. राजेश देशमुख

पुणे दि.12- कोवीड-19 रुग्णालये आणि कोवीड-19 हेल्थ सेंटरमधील ऑक्सीजन पुरवठा सुरळीत ठेवण्यासाठी जिल्हास्तरीय समिती गठीत करण्यात आली असल्याची माहिती जिल्हाधिकारी डॉ.राजेश देशमुख यांनी दिली.

आपत्ती व्यवस्थापन कायदा 2005 मधील कलम 25 अन्वये जिल्हा आपत्ती व्यवस्थापन प्राधिकरणाची स्थापना करण्यात आली आहे. जिल्हाधिकारी हे या प्राधिकरणाचे पदसिद्ध अध्यक्ष असून राज्य शासनाने कोरोना विषाणूचा प्रादुर्भाव रोखण्यासाठी राज्यात साथरोग प्रतिबंधात्मक कायदा 1897 दिनांक 13/03/2020 पासून लागू केला आहे.
राज्यात तसेच जिल्ह्यात मागील काही दिवसांपासून कोवीड-19 रुग्णांना पुरेसा ऑक्सीजन उपलब्ध होत नसल्याच्या तक्रारी प्राप्त होत आहेत. राज्यात पुरेसे ऑक्सीजनचे उत्पादन होऊनसुध्दा वितरण योग्य प्रकारे होत नसल्यामुळे काही ठिकाणी तात्पुरता तुटवडा होत असल्याची शक्यता आहे. भविष्यात कोवीड-19 रुग्णसंख्येत वाढ होईल आणि ऑक्सीजनची गरज वाढेल ही बाब लक्षात घेता ऑक्सीजन पुरवठा सुरळीत होण्याचे दृष्टीने सूचना निर्गमित करण्यात आल्या आहेत. तसेच जिल्हाधिकारी यांनी जिल्हास्तरावर समिती गठीत केली आहे. पुणे जिल्हयात कोरोना विषाणू ( कोवीड १९) चा प्रादुर्भाव रोखण्यासाठी रुग्णालयांना ऑक्सिजन पुरवठा अखंडितपणे सुरु राहण्याकरीता ऑक्सीजन पुरवठा संनियंत्रणासाठी जिल्हास्तरावर अधिकाऱ्यांची जिल्हास्तरीय समिती गठीत करण्यात आली आहे.
निवासी उपजिल्हाधिकारी, पुणे यांनी जिल्हाधिकारी कार्यालयाशी समन्वय साधून नियोजन करणे
सहाय्यक आयुक्त, अन्न व औषध प्रशासन विभाग, पुणे यांनी उत्पादकांशी समन्वय व बॉटलींग प्लॅंटमधून वाटपाचे नियोजन करणे.
महाव्यवस्थापक, जिल्हा उद्योग केंद्र, पुणे यांनी उत्पादनात वाढ व उत्पादकांशी समन्वय साधणे.
प्रादेशिक परिवहन अधिकारी, पुणे व पिंपरी यांनी वाहतूक-टॅंकर समन्वय राहण्याबाबतचे नियोजन करणे.
जिल्हा शल्य चिकित्सक यांनी जिल्ह्यातील कोविड-19 रुग्णांना औषधोपचार करणाऱ्या सर्व सार्वजनिक आरोग्य विभाग, वैद्यकीय शिक्षण विभाग, महानगरपालिका आणि खाजगी रुग्णालयांना प्रतिदिन लागणाऱ्या ऑक्सीजनची माहिती रुग्णालयानुसार संकलित करावी आणि निवासी उपजिल्हाधिकारी, पुणे यांना द्यावी.
जिल्हा आरोग्य अधिकारी, जिल्हा परिषद, पुणे यांनी जिल्हयातील कोविड-19 रुग्णांना औषधोपचार करणाऱ्या सर्व सार्वजनिक आरोग्य विभाग, वैद्यकीय शिक्षण विभाग, महानगरपालिका, आणि खाजगी रुग्णालयांना प्रतिदिन लागणाऱ्या ऑक्सीजनची मागणी नोंदविणे.
जिल्हास्तरीय समितीची कार्ये

1. समितीने दैनंदिन ऑक्सीजनची गरज व ती पुरविणाऱ्या बॉटलिंग प्लांट्स बल्क सप्लायर्स
   यांच्या सतत संपर्कात राहून प्रत्येक रुग्णालयात वेळेत ऑक्सीजन प्राप्त होईल, याची दक्षता घ्यावी.
   जिल्हास्तरावर आपत्ती व्यवस्थापनांतर्गत पावसाळयासाठी स्थापन करण्यात आलेल्या कंट्रोल रुमला ऑक्सीजन पुरवठयाची जबाबदारी देण्यात येत आहे आणि कंट्रोल रुम दिनांक 31/12/2020 पर्यंत सुरु ठेवण्यात येत आहे. कंट्रोल रुमचा वापर ऑक्सिजन पुरवठ्याशी संबंधित अडचणी सोडवणूक करण्यासाठी करावा.
   पुणे जिल्हा आपत्ती व्यवस्थापन कंट्रोल रुम दुरध्वनी क्र. 020-26123371 वर संपर्क साधावा. या कंट्रोल रुमला
   काही अडचण असल्यास त्यांनी एफडीए कंट्रोल रुम दूरध्वनी क्र. 022-26592364 व टोल फ्री क्र. 1800222 365 संपर्क साधावा. यानुसार समितीने कार्यवाही करुन कोणत्याही रुग्णालयात ऑक्सीजन पुरवठा खंडीत होणार नाही, याची
   दक्षता घ्यावी, असेही जिल्हा आपत्ती व्यवस्थापन प्राधिकरणाचे अध्यक्ष तथा जिल्हाधिकारी डॉ.देशमुख यांनी आपल्या आदेशात म्हटले आहे.

अन प्रभारी आरोग्यप्रमुखांना काढण्याची सुरु भाजपची तयारी

पुणे : कोरोनासोबत मुकाबला करीत दिवसरात्र काम करणाऱ्या आरोग्य विभागातील अधिकारी व कर्मचाऱ्यांनाही आता आरोग्याच्या समस्या भेडसावू लागल्या आहेत. महापालिकेच्या आरोग्य विभागाचे दोन्हीही आरोग्य प्रमुख तब्येत बरी नसल्याने रजेवर गेले आहेत. ऐन कोरोना काळात हा विभागच जायबंदी होत असल्याचे दिसत आहे.
राज्य शासनाने महापालिकेच्या मदतीकरिता आरोग्य प्रमुख म्हणून पाठविलेल्या डॉ. नितीन बिलोलीकर हे मागील 15 दिवसांपेक्षा अधिक काळापासून रजेवर गेलेले आहेत.पालिकेत हजर झाल्यानंतर सुरुवातीचे काही दिवस काम केलेल्या बिलोलीकर यांनी काही बैठकांनाही हजेरी लावली होती. परंतू, त्यांना कामाचा ताण जाणवू लागला होता. काही दिवसांनी त्यांची तब्येत बिघडली. उपचारांसाठी ते रजेवर गेले.
दरम्यान, दोन वर्षांपासून पालिकेचे आरोग्य प्रमुख असलेले डॉ. रामचंद्र हंकारे हे सुद्धा कामाच्या ताणामुळे अधूनमधून आजारी पडत होते. गेल्या आठवड्यापासून त्यांना बरे वाटत नव्हते. त्याही स्थितीत ते कामावर येत होते. परंतू, दोन दिवसात त्यांना खुपच जास्त अशक्तपणा आला. तब्येत आणखी बिघडू नये याकरिता त्यांनी रजा टाकली असून पुढील आठवडाभर ते रजेवर आहेत.
दोन्हीही आरोग्य प्रमुख रजेवर आहेत. त्यामुळे आरोग्य प्रमुख पदाचा तात्पुरता पदभार सहायक आरोग्य प्रमुख डॉ. अंजली साबणे यांच्याकडे सोपविण्यात आला आहे. आरोग्य प्रमुख रजेवर असले तरी सर्व कामे व्यवस्थित आणि नेहमीप्रमाणे सुरु असल्याचे साबणे यांनी सांगितले.

मात्र साबणे या काम करत नाहीत असे कारण देत त्यांच्यावर ही कारवाई करण्याचा प्रस्ताव स्थायी समिति पुढे ठेवण्यात आला आहे.

पुणे महापालिकेचा गजब कारभार

पुणे : पुण्याला पाणी पुरवठा करणारी चारही धरणे ‘फुल्ल’ झालेली असूनही धनकवड़ी आणि दक्षिण पुण्यातील काही भागात पावसाळ्यात देखीलपाणी कपात सुरुच आहे. गेली असंख्य वर्षे पालिकेत येवू न ही या भागांना रोज सकाळी 3 तास पाणी पुरवठा होत आला आहे अशा स्थितीत गेल्या 2 वर्षापासून दर सोमवारी पाणी पुरवठा बंद ठेवण्यात येतो आहे. या पुढे हीआठवड्यातून एक दिवस पाणी कपात करण्याचा निर्णय पालिकेच्या पाणी पुरवठा विभागाने कायम ठेवला असून पाणी वितरण व्यवस्थेतील त्रुटींमुळे हा निर्णय घेण्यात आल्याचे अधिकाऱ्यांचे म्हणणे आहे.

पालिकेच्या वडगाव जलशुध्दीकरणातून पाणीपुरवठा होणाऱ्या भागात आठवड्यातून एक दिवस पाणी सोडले जात नाही. या निर्णयामुळे सिंहगड रस्त्याचा बहुतांश भाग, सहकारनगर, धनकवडी, भारती विद्यापीठ परिसर, कात्रज गाव, पद्मावतीनगर, आंबेगावासह (खु) परिसरातील पाणी पुरवठा बाधित होत आला आहे.गेल्या 2 वर्षा पासून वडगाव जलशुध्दीकरण प्रकल्पांतर्गत पाणीकपात केली जात आहे. याबाबत रहिवाशांच्या तक्रारी वाढू लागल्या आहेत.

पुढील महिना-सव्वामहिना अशा प्रकारे पाणी पुरविले जाईल. त्यानंतर तो पूर्ववत होईल, असे पाणीपुरवठा विभागाचे प्रमुख अनिरुध्द पावसकर यांनी सांगितले. खडकवासला धरण साखळीतील धरणे शंभर टक्के भरली आहेत. पुणेकरांना रोज पुरेशा दाबाने पाणी मिळण्याची आशा आहे.
या परिसरांमधील पाणी पुरवठ्यासाठी 1 कोटी 30 लाख लिटर क्षमतेच्या दोन टाक्यांचे बांधकाम पूर्ण झाले आहे. या टाक्यांद्वारे पाणीपुरवठा करण्याची चाचणी घेण्यात येणार आहे. येत्या 1 ऑक्टोबरपासून या पाणीपुवठा सुरळीत होईल, असे पावसकर यांनी सांगितले असले तरी त्यावर विश्वास ठेवण्यासाठी कोणी राजी होताना दिसत नाही.

सेवा कार्यात नागरिकांचा उत्स्फूर्त सहभाग स्पृहणीय – नगरसेविका मंजुश्री खर्डेकर

रोटरी क्लब ऑफ पुणे कर्वेनगर आणि प्रगती इंडस्ट्रियल इस्टेट आयोजित रक्तदान शिबिरात 75 बाटल्या रक्त संकलित.

पुणे- एरंडवणा येथील प्रगती इंडस्ट्रियल इस्टेट मधील छोटे कारखानदार,उद्योजक व त्यांच्या कर्मचाऱ्यांनी एकत्र येउन रोटरी क्लबच्या सहकार्याने रक्तदान शिबीर आयोजित करुन समाजापुढे एक आदर्श निर्माण केला आहे.कोरोनाच्या संकटकाळी रक्तदान करणारे हे माझ्या दृष्टीने देवदूत असून त्यांच्या ह्या कार्याबद्दल समाज त्यांचा कायम कृतज्ञ राहील असे गौरवोद्गार महापौर मुरलीधर मोहोळ यांनी काढले.रक्तदान शिबिरात रक्तदान करणाऱ्या दात्यांना महापौरांच्या हस्ते प्रमाणपत्र देण्यात आले.यावेळी नगरसेविका मंजुश्री खर्डेकर,संयोजक दीपक नानिवडेकर,चेतन धारिया, क्रिएटिव्ह फौंडेशनचे अध्यक्ष संदीप खर्डेकर,रोटरी क्लब ऑफ कर्वेनगरच्या प्रेसिडेंट आकांक्षा पुराणिक,राजेश कुलकर्णी,प्रसन्न उमराणी,दिनेश गणेशवाडे,विवेक जोशी व इतर मान्यवर उपस्थित होते.
कोरोनाचे संकट गडद होत असताना विविध सेवाकार्यात नागरिकांचा उत्स्फूर्त सहभाग स्पृहणीय असून पुणेकर एकमेका सहाय्य करु अवघे धरु सुपंथ या उक्तीप्रमाणे कृती करत आहेत असे नगरसेविका मंजुश्री खर्डेकर म्हणाल्या.
वृत्तपत्रात रक्ताची टंचाई असल्याचे वाचनात आले व त्यामुळे अनेक रुग्णांना त्रास होत असल्याचे निदर्शनास आल्यामुळे तातडीने रक्तदान शिबीर आयोजित केल्याचे उद्योजक दीपक नानिवडेकर,राजेश कुलकर्णी यांनी सांगितले.तसेच या कार्यात रोटरी क्लब ऑफ कर्वेनगर व प्रगती इंडस्ट्रियल कॉम्प्लेक्स यांनी सहकार्य केल्याबद्दल त्यांनी त्यांच्या प्रती कृतज्ञता ही व्यक्त केली.
जनकल्याण रक्तपेढीच्या सहकार्याने आयोजित शिबिरात 75 बाटल्या रक्त संकलित करण्यात आले.

पुणे- गेली ६ महिने महापालिकेची मुख्य सभा प्रत्यक्षात न घेता स्वतःवर सर्व जबाबदारी घेऊन प्रश्नाच्या खांद्याला खांदा लाऊन कोरोना निर्मुलनासाठी सदैव सज्ज राहिल्याचे दिसत आलेले महापौर आज सहा महिने झाल्यावरही उपमुख्यमंत्री अजित पवार यांच्या पाशी कळवळले , जणू ..म्हणाले .. अहो दादा ,अजूनही बेड , ऑक्सिजन ,व्हेंटिलेटर साठी सामान्य नागरिकांना अनंत अडचणींचा सामना करावा लागतो आहे. काही दिवसापूर्वीच मनसे च्या मोरेंनी शव वाहिकेसाठी महापालिकेची मोटार फोडली होती .

पुणे शहरातील सरकारी आणि खासगी रुग्णालयात सामान्य नागरिकांना ऑक्सिजन आणि व्हेंटिलेटर बेड्स मिळण्यात अडचणींचा सामना करावा लागत असून त्यासाठी सरकारी आणि खासगी रुग्णालयातील बेड्सची माहिती आणि उपलब्धता एकाच छत्राखाली आणून बेड मिळण्यासाठी केंद्रीय पद्धतीचा अवलंब करावा, अशी मागणी उपमुख्यमंत्री अजित पवार यांच्या बैठकीत केल्याची माहिती महापौर मुरलीधर मोहोळ यांनी दिली. या संदर्भात तातडीने कार्यवाही होण्याची शक्यता असून यामुळे पुणेकरांना दिलासा मिळणार आहे.

कोरोना संसर्ग आढावा बैठकीत उपमुख्यमंत्री अजित पवार यांच्या अध्यक्षतेखाली पार पडली, त्यावेळी महापौर मोहोळ यांनी ही मागणी केली आहे. यावेळी विविध विभागांचे प्रशासकीय अधिकारी, पोलीस अधिकारी उपस्थित होते.

कोरोना रुग्णांची संख्या वाढल्याने ऑक्सिजन आणि व्हेंटिलेटर बेड्सची मागणीही वाढत असून सर्वसामान्य रुग्णांना बेड मिळवण्यासाठी अडचणींचा सामना करावा लागत आहे. याबाबत महापौर मोहोळ म्हणाले, ‘रुग्णांचा बेड्स उपलब्ध होण्यासाठी तातडीने केंद्रीय पद्धतीचा अवलंब करण्याची गरज आहे. ही पद्धत अवलंबल्यास रुग्णांना खाटा उपलब्ध होऊ शकतील.’

‘पुणे शहरात दररोज ६ हजार पेक्षा जास्त चाचण्या होत असल्या तरी त्यात सरकारी संस्थांकडून होणाऱ्या आरटी-पीसीआर चाचण्यांची संख्या तुलनेने कमी असून यावर तातडीने कार्यवाही करणे गरजेचे आहे. यासाठी आरटी-पीसीआर चाचण्यांची क्षमता वाढवावी. यामुळे संसर्ग आटोक्यात आणण्यात मदत होऊ शकेल’ असेही महापौर मोहोळ म्हणाले.

संसर्गाच्या अंदाजकडे महापौरांनी वेधले लक्ष !

कोरोना संसर्गाच्या सुरुवातीपासूनच्या काळात नजीकच्या काळातील अंदाज बांधून रुग्णसंख्या आणि संभाव्य बेड्सची माहिती बैठकीत उपलब्ध केली जात होती. त्या आधारावर नियोजन करणे सहज शक्य होते. मात्र गेल्या तीन बैठकांमध्ये ही माहिती सादर होत नसल्याने महापौर मोहोळ यांनी समोर आणले. विशेष म्हणजे जम्बो रुग्णालयाची निर्मिती याच अंदाजाच्या आधारावर करण्यात आली होती.

‘जम्बो’ आणि बाणेर केंद्र पूर्ण क्षमतेने लवकर लवकर सुरु करा : महापौर

‘जम्बो’चा गाडा आता रुळावर येत असला तरी नियोजित क्षमतेनुसार जम्बो आणि बाणेर केंद्राचे ऑक्सिजन आणि व्हेंटिलेटर बेड्स कमीत कमी कालावधीत उपलब्ध करा, अशीही सूचना महापौर मोहोळ यांनी बैठकीत केली. जम्बो आणि बाणेरचे केंद्र पूर्ण क्षमतेने सुरु झाल्यास पुणेकरांना मोठा दिलासा मिळणार आहे.