पुणे- शहरातील ढासळती आरोग्य व्यवस्था आणि प्रशासनाचे अक्षम्य दुर्लक्ष होत असल्याने भीम आर्मी बहुजन एकता मिशनच्यावतीने ”  पुण्यातील आरोग्य यंत्रणेची अंतयात्रा आंदोलन ”  करण्यात आले . पुणे महापालिकेच्या प्रवेशद्वारावर हे आंदोलन करण्यात आले . हे आंदोलन भीम आर्मी बहुजन एकता मिशनचे महाराष्ट्र प्रदेशाध्यक्ष दत्ता पोळ यांच्या नेर्तृत्वाखाली करण्यात आले .

पुण्यातील आरोग्य व्यवस्था ढासळली असून कोरोना संसर्गावर नियंत्रण राखण्यास पुणे महापालिका प्रशासन अपयशी ठरले आहे . संपूर्ण देशभरात आपला सर्वांगीण विकास , आर्थिक प्रगती करीत पुणे नावारूपाला आले असताना आधुनिक आणि प्रगत असलेल्या पुण्यात कोरोनाचे सर्वाधिक रुग्ण असणे हि बाब अत्यन्त लाजिरवाणी आणि शरमेची आहे .

रोजच्या रोज कोरोनाचा संसर्ग वाढत असून त्यावर नियंत्रण करणे प्रशासनाकडून शक्य होत नाही . रुग्णांना बेड नाही , ऑक्सिजन मिळत नाही , पर्याप्त औषधोपचार नाही , तज्ञ व कुशल डॉकटर्स , कर्मचारी वर्ग नाही , खाजगी हॉस्पिटलची लूट सुरु आहे , रुग्णांना जेवणाची व्यवस्था योग्य नाही , मृत्यूचे प्रमाण प्रचंड आहे , जम्बो हॉस्पिटलमध्ये भ्रष्ट्राचार झाला असून संपूर्ण व्यवस्था विस्कळीत झाली आहे . यामुळे सामान्य नागरिकांचा आरोग्य यंत्रणेवरील विश्वास उडाला आहे . याविषयी आपण तात्काळ कार्यवाही करून आरोग्य यंत्रणेमध्ये सर्वोच्च सुधारणा कराव्यात व नागरिकांच्या रागाचा विस्फोट होण्याची शक्यता असून नागरिक रस्त्यावर येऊन आपला विरोध आणि निषेध व्यक्त करतील व प्रशासनास त्यांना नियंत्रण करणे शक्य होणार नाही , असे निवेदनात देण्यात आले .

या आंदोलनात  भीम आर्मी बहुजन एकता मिशनचे  पुणे जिल्हाध्यक्षा नीता आडसुळे , उपाध्यक्षा उषा राजगुरू , पुणे शहर कार्याध्यक्षा स्वाती गायकवाड , प्रदीप कांबळे , राहुल बनसोडे , मुकेश गायकवाड , भीमराव कांबळे , कन्हेय्या पाटोळे , जालिंदर वाघमारे , निरंजन कांबळे , मामा बनसोडे , नितेश निकम , बाळू गायकवाड , अमित गायकवाड , अश्रफ खान , आकाश गंडगुले आदी उपस्थित होते .

यावेळी पुणे महापालिका आयुक्त विक्रम कुमार यांनी सांगितले कि , आम्ही सक्षमपणे काम करू , यावर उपाय योजना म्हणून रोज ५० बेड वाढवीत आहोत . पुणे आसपास परिसरातून  रुग्ण येत असल्यामुळे पुण्यात पुणेकरांना बेड मिळणे अवघड होत आहे . यावरचआम्ही उपाय योजना करीत आहोत .

पुणे,दि.15: कोरोना विषाणूचा प्रादुर्भाव रोखण्यासाठी ‘माझे कुटुंब माझी जबाबदारी’ मोहीम महत्वपूर्ण आहे. लोकसहभागातून ही मोहीम यशस्वीपणे राबवून जिल्ह्यात कोरोनाचा संसर्ग रोखूया, असे आवाहन जिल्हाधिकारी डॉ. राजेश देशमुख यांनी केले.

‘माझे कुटुंब माझी जबाबदारी’ मोहिमेचा आज जिल्हाधिकारी डॉ. राजेश देशमुख यांच्या हस्ते शुभारंभ करण्यात आला. कार्यक्रमाला आमदार अशोक पवार व पंचायत समिती सदस्या कावेरी कुंजीर प्रमुख उपस्थित होत्या. यावेळी जिल्हा परिषदेचे मुख्य कार्यकारी अधिकारी आयुष प्रसाद, उपविभागीय अधिकारी सचिन बारावकर, उप मुख्य कार्यकारी अधिकारी संदीप कोहिणकर, जिल्हा शल्यचिकित्सक डॉ.अशोक नांदापूरकर, जिल्हा आरोग्य अधिकारी डॉ. भगवान पवार, गट विकास अधिकारी प्रशांत शिर्के, तालुका आरोग्य अधिकारी डॉ. सचिन खरात, कुंजीरवाडीच्या माजी सरपंच सुनीता धुमाळ आदी उपस्थित होते.

यावेळी आमदार अशोक पवार व जिल्हाधिकारी राजेश देशमुख यांनी कुंजीरवाडी येथील जिल्हा परिषदेच्या प्राथमिक शाळेत घेण्यात येणाऱ्या कोरोना रॅपिड अँटिजेन चाचणी केंद्राला भेट देवून माहिती घेतली आणि तपासणी मोहिमेत सहभागी अधिकारी, कर्मचारी व आशा वर्कर यांना मार्गदर्शन केले. तसेच गृहभेट देवून कोरोना लक्षणांबद्दल नागरिकांची विचारपूस करुन त्यांची प्राथमिक आरोग्य चाचणी घेतली.

जिल्हाधिकारी डॉ. देशमुख म्हणाले, जिल्ह्यातील कोरोना रुग्णांच्या उपचारासाठी चाचण्यांची क्षमता वाढवण्यात आली आहे. प्रतिबंधात्मक उपाययोजना करण्यात येत आहेत, तरीदेखील कोरोना बाधितांची संख्या वाढत आहे. कोविड-19 चा प्रादुर्भाव रोखण्यासाठी ‘माझे कुटुंब माझी जबाबदारी’ मोहीम शासनाने हाती घेतली आहे. ही मोहीम यशस्वी करणे ही सामूहिक जबाबदारी आहे. लोकप्रतिनिधी, स्वयंसेवी संस्था व नागरिकांच्या सहकार्यातून पुणे जिल्ह्यात ही मोहीम प्रभावीपणे राबवूया, असे डॉ.देशमुख यांनी सांगितले. शासनाचे सर्व विभाग याकामी सक्रिय असून या मोहिमेत नागरिकांनीही स्वतः हून सहभागी होऊन तपासणी करुन घ्यावी, असे आवाहन त्यांनी यावेळी केले.

आमदार अशोक पवार म्हणाले, कोणतेही अभियान व योजना यशस्वी होण्यासाठी लोकसहभाग महत्वाचा असतो. ‘माझे कुटुंब माझी जबाबदारी’ या अभियाना अंतर्गत घरोघरी तपासणी करण्यात येणार असल्यामुळे कोरोना बधितांना वेळेत उपचार मिळवून देणे शक्य होईल. नागरिक व रुग्णांच्या अडचणी सोडवण्यासाठी शासकीय यंत्रणा अहोरात्र झटत आहे. नागरिकांनीही मास्कचा वापर, हातांची स्वच्छता, सोशल डिस्टन्सिंग आदी खबरदारी घेवून कोरोनाला आळा घालावा.

मुख्य कार्यकारी अधिकारी आयुष प्रसाद यांनी मोहिमेची सविस्तर माहिती दिली. घरोघरी सर्वेक्षण करुन कुटुंबातील प्रत्येक व्यक्तीची प्राथमिक तपासणी करण्यात येणार आहे, असे सांगितले.

गट विकास अधिकारी प्रशांत शिर्के यांनी हवेली तालुक्यातील कोरोना परिस्थितीची व अभियानाची माहिती दिली. आभार दादा कुंजीर- पाटील यांनी मानले.

पुणे- महाविकास आघाडी सरकारच्या निर्मितीचा थरारक वेध घेण्यात आलेल्या ‘सारिपाट महाविकास आघाडीचा’ या लेखक विजय जगताप यांच्या पुस्तकाचे औपचारिक प्रकाशन ज्येष्ठ नेते शरद पवार यांनी आज पुण्यात केले.
राष्ट्रीय अध्यक्ष उद्योग कक्ष मराठा सेवा संघ प्रकाश जाधव, श्रीमती जनाबाई जाधव माजी नगरसेविका मुंबई महानगरपालिका, सचिन आडेकर ब्लॉक अध्यक्ष काँग्रेस (आय) पुणे, सामाजिक कार्यकर्ते ॲड. लक्ष्मण रानवडे आदी यावेळी उपस्थित होते.
देशातील सर्वात थरारक राजकीय नाट्यातून निर्माण झालेल्या सरकारच्या निर्मितीचा दस्ताऐवज म्हटलं जाईल असं पुस्तक म्हणजे “सारिपाट महाविकास आघाडीचा”याचा उल्लेख करता येईल.
२०१९ च्या विधानसभा निकालानंतर महाराष्ट्राच्या राजकारणात भूकंपाची मालिका निर्माण करून क्षणाक्षणाला उत्कंठा वाढवणारी घडलेली घटना म्हणजे सध्या राज्यात सत्तेवर असलेले महाविकास आघाडी सरकार होय.
नऊ महिन्यांपूर्वी शिवसेना, काँग्रेस व राष्ट्रवादी काॅग्रेस हे तीन पक्ष मिळून बनलेले सरकार कोणाच्या ध्यानीमनी नसताना अनपेक्षितरित्या सत्तेवर आलं. भारताच्या राजकीय इतिहासात आजपर्यंत कधीच एखादया राज्यात सत्ता स्थापन होताना भिन्न विचारधारेचे पक्ष एकत्र येऊन सरकार बनवत असताना इतक्या खेळया,कुरघोड्या, डाव, प्रतिडाव, रातोरात उठलेली राष्ट्रपती राजवट, भल्या पहाटे झालेला शपथविधी आणि या प्रश्नी राज्यपालांच्या निर्णयावर थेट सर्वोच्च न्यायालयात सुरू झालेली सत्ताधारी व विरोधकांमधील लढाई,माघारी नाट्य असा इतका दमछाक करणारा प्रवास कधी झाला नाही तो महाराष्ट्रात घडला.
लेखक विजय जगताप यांनी हा संपूर्ण ३६ दिवसांचा प्रवास ओघवत्या शब्दात जसं घडलं तसं अशा रूपात या पुस्तकात मांडला आहे.सरकार निर्मितीच्या घटना घडामोडींचा हा एक दस्ताऐवज ठरेल व राजकीय अभ्यासक,संशोधक व विविध पक्षांचे कार्यकर्ते यांना संदर्भमूल्य ठरेल असा हा सारा उत्कंठा वाढविणारा प्रवास या पुस्तकात शब्दचित्र झाला आहे. विशेषत: शिवसेना व भाजप एकत्र असताना व पुढे २०१४ च्या सत्ताकाळात त्यांच्यात कुरबूरी सुरू झाल्यानंतरचे सारे वाकयुध्द व त्यांचा संसार मोडेस्तोवरच्या सगळ्या घटना व आठवणी या पुस्तकात मांडण्यात आल्या आहेत. विधान परिषदेच्या उपसभापती डाॅ नीलम गो-हे यांची लाभलेली प्रस्तावना त्यांच्यातील अभ्यासू शैलीचा व निरपेक्ष सामाजिक कार्यकर्ता पदाची परिचय करून देते. सरकार बनत असताना कशा घडामोडी होतात याची सामान्य नागरिकांना फारशी माहिती नसते.परंतू राजकारण नेमकं कसं शिजतं ? काय उलथापालथी होतात ? हे सारं वास्तव या पुस्तकातून स्पष्ट होते. शरद पवार , अजित पवार यांच्या स्वभाव शैलीचा व राजकारणातील विशेषत: शरद पवार यांच्या बुध्दीचातुर्याचा व चाणक्यनितीची नव्याने ओळख या पुस्तकातून घडते.या सरकारच्या निर्मितीत संजय राऊत हे सूत्रधार कसे ठरले , उध्दव ठाकरे व शिवसेना याविषयी सोनिया गांधी यांच्या मनात व दिल्ली वर्तुळात नेमकी अढी का आहे? ती उलगडण्याचे काम शरद पवार यांनी कसे केले? ही सारी उत्तरे या पुस्तकात मिळतात.

कोरोनाची परिस्थिती व सोशल डिस्टिंक्शन राखून या पुस्तकाचे औपचारिक प्रकाशन आज करण्यात आले.

• महापौर मुरलीधर मोहोळ यांच्या हस्ते लोकार्पण

पुणे : COEP मैदानावरील जम्बो कोविड सेंटर येथे रुग्णालय माहिती व्यवस्थापन प्रणाली स्थापित करून त्याचा उपयोग करण्यात येत आहे. महापौर मुरलीधर मोहोळ यांच्या हस्ते या प्रणालीचे औपचारिक लोकार्पण करण्यात आले. यावेळी विभागीय आयुक्त सौरभ राव, पुणे मनपा आयुक्त विक्रम कुमार, अतिरिक्त मनपा आयुक्त व जम्बो कोविड रुग्णालयाच्या कार्यकारी अध्यक्षा रुबल अग्रवाल व इतर अधिकारी उपस्थित होते.

जम्बो सेंटरचे प्रभावी व्यवस्थापन करण्याच्या दृष्टीने पुणे महापालिका प्रशासनाने पाऊले उचलली आहेत. येथे अधिक संख्येने बेड सुसज्ज करावेत जेणेकरून करोना विषाणूचा वाढता प्रादुर्भाव रोखण्यासाठी साह्य होईल, अशा सूचना महापौर मुरलीधर मोहोळ यांनी दिल्या.

तसेच, शहरातील आरोग्य व्यवस्थेवरील ताण कमी करण्यासाठी जम्बो सेंटर लवकरात लवकर पूर्ण क्षमतेने कार्यान्वित करावे, असे विभागीय आयुक्त सौरभ राव यांनी सांगितले.
पुणे महापालिकेकडून पूर्ण सहकार्य करण्यात येत असून, आवश्यक ते सर्व साह्य करण्यात येत आहे, असे आयुक्त विक्रम कुमार यांनी सांगितले.

येथील माहिती व्यवस्थापन प्रणालीमुळे रुग्णांना दाखल करून घेतल्यापासून ते डिस्चार्ज पर्यंतच्या सविस्तर नोंदी ठेवल्या जातात. या व्यवस्थेसाठी कमांड रुम तयार केली आहे. यापूर्वी अशी माहिती उपलब्ध होत नव्हती त्यामुळे ही व्यवस्था करण्यात आली आहे. आयसीयू, व इतर वॉर्डमधील रुग्णांवर प्रत्यक्ष होणारे उपचार, त्यांच्या प्रकृतीची स्थिती यांची माहिती येथील स्क्रीनवर डॉक्टरांना व व्यवस्थापनाला पाहता येईल, असे रुबल अग्रवाल यांनी सांगितले. तसेच, रुग्णांचा तपशील अंतर्गत डॅशबोर्डवर अपडेट केला जाणार आहे.

पुणे : जम्बो कोविड रुग्णालयातील व्हिडिओ कॉल सुविधेमुळे रुग्णांशी थेट संवाद साधून विचारपूस करता येत असल्याने नातेवाईक समाधान व्यक्त करीत आहेत. आतापर्यंत 200+ व्हिडिओ कॉलद्वारे रुग्णांच्या नातेवाईकांनी या सुविधेचा लाभ घेतला आहे. व्हिडिओ संवाद साधताना काही रुग्णांचे नातेवाईक भावुक होतात, तर अनेकजणांच्या मनातील शंका, भीती दूर होते, ते बोलल्यावर शांत होतात. या सुविधेमुळे नातेवाईकांना दिलासा मिळत आहे.

करोना विषाणूचा वाढता प्रादुर्भाव लक्षात घेऊन जम्बो कोविड रुग्णालयातील बेडची संख्या व यंत्रणेची क्षमता वेगाने वाढविण्यासोबतच येथे व्हिडिओ कॉलची सुविधा उपलब्ध करावी अशा सूचना महापौर मुरलीधर मोहोळ यांनी केल्या होत्या. त्यानुसार ही सुविधा सुरू करण्यात आली आहे.

येथे उपचार सुरू असलेल्या करोना रुग्णांची स्थिती त्यांच्या नातेवाईकांना पाहता यावी व त्यांच्याशी बोलता यावे यासाठी ही सुविधा सुरू करण्यात आली.
टॅब्लेट फोनद्वारे व्हिडिओ कॉन्फरन्सिंगच्या माध्यमातून संपर्क यंत्रणा सज्ज करण्यात आली आहे. याद्वारे महापौर व अधिकाऱ्यांनी काही नातेवाईकांसह संबंधित रुग्णांशीही व्हिडिओ कॉलने संवाद साधला. दिवसातून एकदा एका नातेवाईकाला रुग्णाशी व्हिडिओ कॉलद्वारे संवाद साधता यावा यासाठी महापौर मुरलीधर मोहोळ यांनी पाठपुरावा केला. त्यानुसार टॅबची व्यवस्था महापालिकेने केली आहे.

आपल्यावर व्यवस्थित उपचार होत आहेत का, काळजी घेतली जाते का, येथील व्यवस्थेत कोणत्या सुधारणा करणे अपेक्षित आहे अशी विचारपूस करताना महापौरांनी रुग्णांना धीर दिला.

पुणे- भारतीय संस्कृतीत पेहरावाला फार महत्व आहे. विविध प्रकारच्या पेहरावातून ही संस्कृती समृद्ध होत गेली आहे. फॅशन डिझाईन ही पोशाख, पेहराव आणि जीवशैलीच्या साहित्य रचनेला वाहिलेली एक कला आहे. ही कला सांस्कृतिक आणि सामाजिक प्रभावाखाली असून, स्थलकालानुसार विकसीत होत गेली आहे. प्राचीन भारतीय राजेशाही परंपरेतून ही फॅशन डिझाईनची उत्पादने आल्याचे आपल्याला पाहायला मिळते. आज हे क्षेत्र अधिकच व्यापक होत गेले आहे. या क्षेत्रात करिअर करून आपल्यातील सर्जनशीलता आणि प्रतिभा दाखवण्याची संधी आपल्याला आहे.फॅशन डिझाईनिंग आजच्या काळात सर्वात आकर्षक, मोहक, भावणारा आणि उत्सुकता वाढवणारा असा करिअरचा पर्याय आहे. जर आपल्याकडे सर्जनशीलता, शैलीची जाण आणि कल्पकता असेल तर हे क्षेत्र आपली वाट पाहत आहे. एका बाजूला लोकांच्या सर्जनात्मक आणि भौतिक गरजा भागविण्याचे, तर दुसऱ्या बाजूला प्रतिभावान लोकांना ग्लॅमर, यश, प्रसिद्धी आणि चांगले उत्पन्न देण्याची क्षमता फॅशन इंडस्ट्रीमध्ये आहे.
फॅशन डिझाईनिंगमधील एक नावाजलेली संस्था म्हणजे सूर्यदत्ता इन्स्टिट्यूट ऑफ फॅशन टेक्नॉलॉजी. इथे बॅचलर ऑफ सायन्स इन फॅशन डिझाईन, डिप्लोमा इन फॅशन टेक्नॉलॉजी असे दोन अभ्यासक्रम उपलब्ध आहेत. दहावी उत्तीर्ण कोणताही विद्यार्थी डिप्लोमासाठी प्रवेश घेऊ शकतो. डिप्लोमा इन फॅशन डिझाईन हा अभ्यासक्रम महाराष्ट्र राज्य व्यवसाय शिक्षण परीक्षा मंडळाशी संलग्न आहे. डिप्लोमा इन फॅशन टेक्नॉलॉजी किंवा बारावी उत्तीर्ण विद्यार्थी बीएस्सीसाठी प्रवेश घेऊन शकतो. हा अभ्यासक्रम सावित्रीबाई फुले पुणे विद्यापीठाशी संलग्नित आहे. या पाच वर्षाच्या कालावधीत विद्यार्थ्यांना फॅशन इल्लूस्ट्रेशन, पॅटर्नमेकिंग, कन्स्ट्रक्शन, कपड्यांची ओळख, फॅशन मार्केटिंग अँड कम्युनिकेशन, टेक्स्टाईल्स अँड क्वालिटी अशुरन्स, फॅशन रिटेलिंग, सर्फेस ऑर्नामेंटेशन, कॅड, हिस्टरी ऑफ फॅशन, ट्रॅडिशनल टेक्स्टाईल, ड्रेपिंग आदी गोष्टी शिकता येणार आहेत.
अतिशय हुशार आणि सर्जनशील असलेल्या ही नवीन युवापिढी त्यांच्यातील सर्जनशीलतेला वाव देण्यासाठी आणि फॅशन जगतात आपले स्थान निर्माण करण्यासाठी फॅशन इन्स्टियूटमध्ये प्रवेश घेण्यात रुची दाखवत आहेत. या युवकांमध्ये अतिशय नाविन्यपूर्ण आणि प्रतिभाशैली असल्याने ट्रेंडस अनुकरण करण्यापेक्षा ट्रेंड निर्माण करणारे बनत आहेत. अनेक नवीन डिझायनर्स अनुभवासाठी करिअर म्हणून काम करतात. या क्षेत्रात करिअरच्या मोठ्या संधी आहेत. परंतु, अनेकजण या क्षेत्रात टिकून राहण्यासाठी त्यांच्यातील सर्जनशीलता आणि व्यवस्थापकीय कौशल्य यांचा मेळ घालणे आवश्यक ठरते. फॅशन डिझाईनिंग हे करिअर हे केवळ ग्लॅमरस लोकांना भेटणे किंवा श्रीमंत आणि प्रसिद्ध व्यक्तींशी संवाद करण्यापुरतेच मर्यादित नाही, तर जीवनशैलीच्या बाबतीत काटेकोर असलेल्या लोकांना आपल्या कल्पकतेतून समाधान देण्याचे काम करते. फॅशन डिझाइनमधील करिअर शैलीची भावना बाळगण्याचा विचार करणार्‍या मनाच्या सर्जनशील प्रतिभास प्रोत्साहित करते. या क्षेत्रातील महत्वाचा भाग आहे तो म्हणजे, कपड्यांचे डिझाईन, स्केचिंग, कापड कापणी, तुकड्याचे एकत्रित शिवणकाम आणि अंतिमतः विक्री आदींचा समावेश आहे. विविध शैलीची लोकप्रियता व विपणन आणि उत्पादनांना फॅशन शो आणि फॅशन लिखाणाच्या माध्यमातून होते. या दिवसांत फॅशनचे वाढत असलेले महत्व, कपड्यांत वैविध्य आणि स्थानिक बाजारात उत्पादनांची उपलब्धी यामुळे फॅशन डिझायनरला आणखीनच समृद्ध होणे शक्य होत आहे. आपल्या विशिष्ट भरतकाम पद्धती, सुंदर आणि श्रीमंत शिल्प, हातमाग फॅब्रिक्स, देहाती पोत आणि चमकदार रंगांसह जागतिक बाजारपेठेतील प्रमुख स्थान मिळवण्याचा फायदा भारत घेत आहे. भारतीय फॅशन डिझायनर्सनी भारतीय वसाहतींसाठी जागतिक बाजारपेठ तयार करण्यात मोलाचे योगदान दिले आहे.
काही फॅशन डिझायनर्स फ्रीलांस म्हणून काम करत आहेत. काहीजण व्यक्तिगत पातळीवर काम करत आहेत. किंवा डिझाइनर कपडे बनवून दुकाने किंवा कपडे उत्पादकांना पुरवले जातात. काही लोक फॅशन कंपनीसाठी काम करतात, तर काहीजण कंपनीचे डिझाईन करतात. काहीजण स्वतःचे फॅशन दुकान काढून त्यांच्या कल्पक आणि सुंदर डिझाईनची विक्री करतात. काही लोक निर्यात कंपन्यात, कापड गिरण्यात, बुटीक्समध्ये, कपड्यांच्या दुकानात, लेदर कंपन्यात पदवीचे शिक्षण पूर्ण झाल्यावर काम करतात.
राष्ट्रीय आणि आंतरराष्ट्रीय पातळीवरील करिअरच्या संधी : फॅशन डिझाइनर, फॅशन कोऑर्डिनेटर, फॅशन इलस्ट्रेटर, फॅब्रिक टेक्नॉलॉजिस्ट, फॅशन कन्सल्टन्ट, फॅशन जर्नालिस्ट, फ्रीलान्स डिझाइनर, फॅशन स्टायलिस्ट, प्राध्यापक, बुटीक ओनर, कॉस्ट्यूम डिझाइनर, फॅशन इव्हेन्ट कोऑर्डिनेटर, फॅशन कोरिओग्राफर, फॅशन कटर, ब्रँड स्टोअर मॅनेजर, फॅशन फोटोग्राफर, फॅशन एडिटर, व्हिज्युअल मर्चंटायझर, ज्वेलरी डिझायनर, अपरेल डिझाइनर, ऍक्सेसरीज डिझाइनर, सेल्स असोसिएट, पब्लिक रिलेशन्स स्पेशालिस्ट, इन्व्हेंटरी प्लॅनर, रिटेल बायर, ग्राफिक डिझाइनर, टेक्स्टाईल डिझाइनर, क्रिएटिव्ह डिझाइनर, क्वालिटी अश्युअरन्स मॅनेजर आदी पदांवर काम करण्याची संधी उपलब्ध आहे.
सूर्यदत्ता ग्रुप ऑफ इन्स्टिटयूटने लंडन अकॅडमी ऑफ प्रोफेशनल ट्रेनिंग (एलएपीटी) यांच्याशी सामंजस्य करार केला आहे. त्याद्वारे गेली १५ वर्षे प्रमाणपत्र दिले जाते. लंडन अकॅडमी ऑफ प्रोफेशनल ट्रेनिंग ही जागतिक स्तरावर नामांकित संस्था असून, १८० देशांत कार्यरत आहे. ही एक स्वतंत्र संस्था आहे, जी स्टँडर्ड्स आणि गुणवत्तेचे मूल्यांकन करण्यासाठी सल्ला व मार्गदर्शन करते. सूर्यदत्ता ग्रुप ऑफ इन्स्टिटयूट एक दर्जेदार आणि नामांकित संस्था असून, अनेक प्रसिद्ध संस्थांशी संलग्नित आहे. डिप्लोमाचे प्रमाणपत्र व इतर प्रमाणपत्र अभ्यासक्रमांसाठी सूर्यदत्ताने ‘एलएपीटी’शी करार केला आहे.

पुणे- केंद्रीय प्रदूषण नियंत्रण मंडळाने केलेल्या सर्वेक्षणानुसार  देशातील ३०२ प्रदूषित नदींपैकी मुळा-मुठा नदी आहे. नदीचे प्रदूषण कमी करण्यासाठी सांडपाण्यावर प्रक्रिया करणारा अत्यंत महत्वाच्या प्रकल्प म्हणून जायका प्रकल्पास मंजूरी देण्यात आली. जायका प्रकल्पाने केंद्र सरकारबरोबर १३ जानेवारी २०१६ रोजी दिल्लीत करार करून पुण्यातील मुळा- मुठा नदीपात्रातील प्रदूषण हटविण्यासाठी आणि शहरात निर्माण होणाऱ्या सांडपाण्यावर प्रक्रिया करण्यासाठी ८४१ कोटी रुपयांचे अनुदान मंजूर केले. परुंतू मुळा- मुठा नदीचे रूप पालटवून टाकणारा आणि प्रदूषण कमी करणारा महत्त्वाकांक्षी जायका प्रकल्प पुन्हा एकदा निविदांच्या प्रक्रियेत अडकला आहे. हा महापालिकेतील सत्ताधारी भारतीय जनता पक्षाचा नाकर्तेपणा असून पुणेकरांसाठी दुर्देवाची बाब आहे असे मत खा. वंदना चव्हाण यांनी व्यक्त केले.

या प्रकल्पातंर्गत शहरात ११३ किलोमीटरच्या सांडपाणी वाहिन्या नव्याने टाकण्यात येणार आहेत. तसेच ११ सांडपाणी प्रक्रिया प्रकल्प केंद्र उभारले जाणार आहेत. त्या शिवाय २४ स्वच्छतागृहांची उभारणी, नागरीकांचा सहभाग, जनजागृती अभियान, सांडपाणी संदर्भात जीआयएस मॅपिंग आदी गोष्टीचा समावेश आहे. पहिल्या टप्प्यात सहा सांडपाणी प्रक्रिया प्रकल्प उभारणे आणि दहा वर्षांसाठी त्यांची देखभाल दुरुस्ती करण्यासाठी महापालिकेने सुमारे दीड वर्षांपूर्वी निविदा मागविल्या परंतु त्या अडकल्या आहेत व महापालिकेने नव्याने निविदा काढण्याचे आदेश दिले आहेत. यावरून स्पष्ट होत आहे की, सत्ताधारी भाजपा प्रशासन, सल्लागार समिती व जायका यांच्यात समन्वय साधण्यात अयशस्वी ठरत आहे. परिणामी शहारतील मुळा-मुठा नदीचे प्रदूषण कमी करण्यासाठी सांडपाण्यावर प्रक्रिया करणारा या अत्यंत महत्वाच्या प्रकल्पाच्या अंमलबजावणीत दिरंगाई होत असल्याची खंत खा. वंदना चव्हाण यांनी व्यक्त केली.

या प्रकरणातून अनेक प्रश्‍न उपस्थित होतात. मुळात हा प्रकल्प जानेवारी २०२२ मध्ये पूर्ण होणे अपेक्षित होते. आता निविदा प्रक्रियेलाच एवढा वेळ लागला तर, प्रकल्पाचे काम सुरू कधी होणार आणि तो मार्गी कधी लागणार ? केंद्र सरकारने ८४१ कोटी रुपयांचा निधी पुणे महापालिकेला उपलब्ध करून दिला तरी, कामे सुरू करण्यासाठीची प्रक्रिया वेगाने राबविण्यासाठी महापालिकेकडून  पुढाकार घेण्यात आला नाही. त्यामुळे हे अनुदान परत जाण्याची भीती शहरापुढे आहे. जायका प्रकल्प उभारण्यासाठीच्या निविदांवरून केंद्र सरकारच्या जलशक्ती मंत्रालयाने महापालिकेच्या कारभारावर प्रश्न उपस्थितीत केला आहे. वास्तविक केंद्रात आणि महापालिकेत भाजपचेच सरकार आहे. तरीही त्यांच्यातील विसंवादामुळे पुण्याचे नुकसान होत आहे. स्मार्ट सिटीच्या बाबतीतही हेच दिसून आले. यातून असे स्पष्ट दिसते की शहराच्या विकासासाठी कोणते विकास प्रकल्प महत्त्वाचे आहेत, त्यांचा पाठपुरावा केला पाहिजे आणि त्यासाठीचे ‘व्हिजन ‘ही ठरवणे गरजेचे आहे. झालेली दिरंगाई दूर करून प्रकल्पाची अंमलबजावणी लवकरात लवकर वेगाने करण्यासाठी खा. वंदना चव्हाण यांनी पत्राद्वारे आयुक्तांना विंनती केली आहे.

पुणे- राष्ट्रवादी कॉंग्रेसच्या कोव्हीड-१९ सहाय्यता कक्षाचे वनराज्य मंत्री दत्तात्रेय भरणे यांच्या हस्ते आज उद्घाटन करण्यात आले.

यावेळी पुणे मनपा विरोधी पक्षनेत्या दीपाली धुमाळ, पर्वती विधानसभा अध्यक्ष.नितीन कदम, दिलीप अरुंदेकर, नगरसेवक प्रिया गदादे पाटील, सुभाष जगताप , शिवाजी गदादे पाटील, सुनील बिबवे, आनंद बाफना, संतोष नांगरे, मृणालिनी वाणी, अमोल ननावरे, शिल्पा भोसले, श्वेता होनराव कामठे, डॉ. सुनीता मोरे , अशोक राठी, आदी पदाधिकारी उपस्थित होते.

कोरोना विरुद्धच्या लढाईसाठी शरद पवार यांनी आग्रही पुढाकार घेतला आहे. व अजित पवार यांच्या सूचनेनुसार व खासदार.वंदना चव्हाण व शहराध्यक्ष आमदार चेतन तुपे यांच्या मार्गदर्शनाखाली नागरिकांच्या साहय्यासाठी व कोविड विषाणूचा सामना करण्यासाठी राष्ट्रवादी पार्टी तर्फे NCP कोव्हिड ब्रिगेड’ उभारन्यात
आले आहे.
यासाठी पुणे शहरात विविध ठिकाणी नागरीकांसाठी NCP Pune City Covid-19 Help Desk सुरू करण्यात आले. यामार्फत कोविड हॉस्पिटलची अद्ययावत माहिती, टेस्टींगच्या सोयी, ॲम्ब्युलन्स, समुपदेशन केंद्र , इतर वैद्यकीय सोयी आदींची माहीती देण्याची व्यवस्था करण्यात आली आहे.या ठिकाणी नागरिकांना आव्हान करण्यात येते की आपणास covid संदर्भात अडीअडचणी असल्यास सदर ठिकाणी माहितीसाठी संपर्क करावा.