पुणे,दि.21: कोरोना संसर्गाच्या परिस्थितीत अधिकाऱ्यांची 100 टक्के उपस्थिती करु नये, या मागणीबाबत मुख्यमंत्री उद्धव ठाकरे यांना देण्यासाठीचे निवेदन आज राजपत्रित अधिकारी महासंघाच्या पुणे जिल्हा समन्वय समितीच्या वतीने निवासी उपजिल्हाधिकारी डॉ. जयश्री कटारे यांच्याकडे सुपूर्द करण्यात आले.

यावेळी महासंघाचे राज्य सरचिटणीस विनायक लहाडे, जिल्हा कार्याध्यक्ष डॉ.जयश्री कटारे, सरचिटणीस विठ्ठल वाघमारे, विभागीय सहसचिव आर. टी. चव्हाण, माहिती सचिव तथा जिल्हा माहिती अधिकारी राजेंद्र सरग, माहिती सचिव तथा माहिती अधिकारी वृषाली पाटील, सदस्य तथा शाखा अभियंता मनोहर खाडे, तहसीलदार विवेक जाधव आदी मान्यवर उपस्थित होते.

कोरोनाचा संसर्ग वाढत असल्यामुळे शासकीय अधिकाऱ्यांची कार्यालयीन उपस्थिती 100 टक्के करु नये, अधिकारी, कर्मचाऱ्यांना आरोग्य सुविधा द्याव्यात, 50 लाख रुपयांचा विमा मंजूर करावा, करोना संसर्ग तातडीचा/ आकस्मिक आजार घोषित करुन त्याच्या संपूर्ण वैद्यकीय खर्चाची प्रतिपूर्ती द्यावी तसेच विलगीकरण/ अलगीकरणासाठी स्वतंत्र रजा मंजूर करावी आदी मागण्यांसाठी राजपत्रित अधिकारी महासंघाच्या वतीने राज्यातील सर्व जिल्हाधिकारी कार्यालयात आज निवेदन देण्यात आले. पुण्यात जिल्हाधिकारी डॉ. राजेश देशमुख यांच्या वतीने निवासी उपजिल्हाधिकारी डॉ.जयश्री कटारे यांनी निवेदन स्वीकारले.

पुणे विभागातील 2 लाख 90 हजार 59 कोरोना बाधित रुग्ण बरे होऊन घरी गेले,
विभागात कोरोना बाधित 3 लाख 79 हजार 673 रुग्ण
-विभागीय आयुक्त सौरभ राव
पुणे,दि.21 :- पुणे विभागातील 2 लाख 90 हजार 59 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 3 लाख 79 हजार 673 झाली आहे. तर ॲक्टीव रुग्ण संख्या 79 हजार 773 इतकी आहे. कोरोनाबाधीत एकुण 9 हजार 841 रुग्णांचा मृत्यू झाला असून मृत्यूचे प्रमाण 2.59 टक्के आहे. पुणे विभागामध्ये बऱ्या होणा-या रुग्णांचे प्रमाण 76.40 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 2 लाख 52 हजार 168 रुग्णांपैकी 2 लाख 3 हजार 507 रुग्ण बरे होवून घरी गेले आहेत. ॲक्टीव रुग्ण संख्या 43 हजार 74 आहे. कोरोनाबाधित एकूण 5 हजार 587 रुग्णांचा मृत्यू झाला आहे. मृत्यूचे प्रमाण 2.22 टक्के इतके आहे तर बरे होणा-या रुग्णांचे प्रमाण 80.70 टक्के आहे.
सातारा जिल्हा
सातारा जिल्हयातील कोरोना बाधीत एकूण 30 हजार 92 रुग्णांपैकी 20 हजार 250 रुग्ण बरे होवून घरी गेले आहेत. ॲक्टीव रुग्ण संख्या 8 हजार 976 आहे. कोरोनाबाधित एकूण 866 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 28 हजार 786 रुग्णांपैकी 19 हजार 898 रुग्ण बरे होवून घरी गेले आहेत. ॲक्टीव रुग्ण संख्या 7 हजार 859 आहे. कोरोनाबाधित एकूण 1 हजार 29 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 29 हजार 332 रुग्णांपैकी 18 हजार 590 रुग्ण बरे होवून घरी गेले आहेत. ॲक्टीव रुग्ण संख्या 9 हजार 640 आहे. कोरोनाबाधित एकूण 1 हजार 102 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 39 हजार 295 रुग्णांपैकी 27 हजार 814 रुग्ण बरे होवून घरी गेले आहेत. ॲक्टीव रुग्ण संख्या 10 हजार 224 आहे. कोरोनाबाधित एकूण 1 हजार 257 रुग्णांचा मृत्यू झाला आहे
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 6 हजार 689 ने वाढ झाली आहे. यामध्ये पुणे जिल्ह्यात 3 हजार 667, सातारा जिल्ह्यात 977 , सोलापूर जिल्ह्यात 584, सांगली जिल्ह्यात 811 तर कोल्हापूर जिल्ह्यात 650 अशी रुग्ण संख्येमध्ये वाढ झालेली आहे.
पुणे विभागातील सर्व्हेक्षण
आजपर्यत विभागामध्ये एकुण 16 लाख 50 हजार 318 नमून्याचा तपासणी अहवाल प्राप्त झाला. प्राप्त अहवालांपैकी 3 लाख 79 हजार 673 नमून्यांचा अहवाल सकारात्मक (पॉझिटिव्ह) आहे.
( टिप :- दि. 20 सप्टेंबर 2020 रोजी रात्री 9.00 वा. पर्यंतच्या आकडेवारीनुसार )

आरोग्यमंत्री राजेश टोपे यांनी प्रत्यक्ष पाहणी करुन घेतला जम्बो कोविड रुग्णालयातील सोईसुविधांचा आढावा
पुणे दि. 21: कोरोना रुग्णांची वाढती रुग्णसंख्या विचारात घेऊन जम्बो रुग्णालयातील अति दक्षता विभागातील (आयसीयू) व कृत्रिम श्वसनयंत्रेयुक्त (व्हेंटिलेटर) तसेच ऑक्सिजनयुक्त वाढीव खाटा निर्मितीचे काम तसेच इतर सर्व आवश्यक त्या सुविधांचे काम सात दिवसात पूर्ण करण्याचे निर्देश आरोग्यमंत्री राजेश टोपे यांनी आज दिले.
शिवाजीनगर येथील शासकीय अभियांत्रिकी महाविद्यालयाच्या (सीओईपी) परिसरात कोरोनाबाधित रुग्णांवर उपचार करण्यासाठी उभारण्यात आलेल्या जम्बो कोविड रुग्णालयाची आरोग्यमंत्री राजेश टोपे यांनी प्रत्यक्ष पाहणी करुन रुग्णालयातील सोईसुविधांचा आढावा घेतला. यावेळी आमदार सिद्धार्थ शिरोळे, विभागीय आयुक्त सौरभ राव, जिल्हाधिकारी डॉ. राजेश देशमुख, पुणे महापालिका आयुक्त विक्रमकुमार, अतिरिक्त आयुक्त रुबल अग्रवाल, आरोग्य विभागाच्या संचालक डॉ. अर्चना पाटील, आरोग्य विभागाचे उपसंचालक डॉ. संजय देशमुख, जिल्हा शल्य चिकित्सक डॉ. अशोक नांदापुरकर, जिल्हा आरोग्य अधिकारी डॉ. भगवान पवार, डॉ. सुभाष साळुंखे तसेच संबंधित विभागांचे वरिष्ठ अधिकारी व पदाधिकारी उपस्थित होते.
आरोग्यमंत्री राजेश टोपे यांनी यांनी जम्बो रुग्णालयातील सोईसुविधांची पाहणी करुन रुग्णांशी संवाद साधून रुग्णालयाकडून सुरु असलेल्या उपचाराबाबत विचारपूस केली.
आरोग्यमंत्री राजेश टोपे म्हणाले, कोरोना संकटावर मात करण्यासाठी राज्य शासनाकडून विविध प्रतिबंधात्मक उपाययोजना राबविण्यात येत आहेत. कोरोनाबाधित रुग्णाला वेळेत उपचार मिळण्यासाठी पुण्यात जम्बो रुग्णालय उभारण्यात आले आहे, जम्बो रुग्णालयामध्ये सद्यस्थितीत उपलब्ध असलेल्या एकूण खाटांच्या क्षमतेत वाढ करण्यात यावी तसेच कोविडसोबतच इतर आजार असलेल्या रुग्णांवरही उपचार होण्यासाठी प्रत्येक आजारातील तज्ज्ञ डॉक्टर तसेच कोरोनासोबतच इतर आवश्यक औषधांचा पुरवठा करण्यात यावा. औषधांचा तुटवडा होणार नाही, त्यादृष्टीने नियोजन करण्याच्या सूचनाही त्यांनी यंत्रणेला दिल्या.
कोरोना आजारामध्ये सीटी स्कॅन तपासणी महत्त्वाची असल्याचे सांगतानाच या तपासणीसाठी जम्बो रुग्णालयात मोबाइल सीटी स्कॅन सुविधा उपलब्ध करून द्यावी तसेच राज्यात सर्व ठिकाणीच सीटी स्कॅन सुविधा उपलब्धतेबाबत निर्देश देण्यात आले असून सीटी स्कॅनचे दरही निश्चित करण्यात येतील. कोरोना उपचार सुविधा सुलभ होण्यासाठी हेल्पलाईन क्रमांकाबाबत अधिकाधिक जनजागृती करण्याचे निर्देशही त्यांनी यंत्रणेला दिले. जम्बो रुग्णालयात उपचार घेत असलेल्या रुग्णांशी व्हिडिओ कॉन्फरन्सिंगच्या माध्यमातून संपर्क करण्याच्या सुविधेचा लाभ नातेवाईक घेत आहेत. नातेवाईकाला रुग्णांशी व्हिडिओ कॉलद्वारे संवाद साधता येतो. या सुविधेबद्दल आरोग्यमंत्री टोपे यांनी समाधान व्यक्त केले.
पुणे महानगरपालिकेच्या अतिरिक्त आयुक्त रुबल अग्रवाल यांनी जम्बो रुग्णांलयातील सुविधेबाबत सादरीकरणाव्दारे माहिती दिली. यावेळी विविध यंत्रणेचे प्रमुख अधिकारी उपस्थित होते.

बाणेरच्या कोविड रुग्णालयाचीही केली पाहणी
बाणेर येथे उभारण्यात आलेल्या कोविड रुग्णालयातील सोईसुविधांचीही आरोग्यमंत्री टोपे यांनी पाहणी केली. यावेळी सहायक आयुक्त जयदीप पवार यांनी रुग्णालयातील सुविधेबाबत माहिती दिली. यावेळी आयुक्त विक्रम कुमार, नगरसेविका ज्योतीताई कळमकर, बाबुराव चांदेरे, अमोल बालवडकर उपस्थित होते. बाणेरच्या कोविड रुग्णालयातील ऑक्सिजन सुविधेसाठी लिक्विड मेडिकल ऑक्सिजनची टाकी, ऑक्सिजन सिलिंडर, मॅनिफोल्ड, शेड व कॉम्प्रेसर, व्हॅक्यूम पंपची व्यवस्था आदी सुविधांचीही पाहणी केली.

पुण्यातील कोरोनाच्या थैमानाला कोण जबाबदार ? असा अप्रत्यक्ष सवाल संसदेतही खा. बापटांनी उपस्थित करत पुण्यात आता केंद्र सरकारने लक्ष घातले पाहिजे अशी मागणी केली.
राज्य सरकारने दिलेले २० आय ए एस अधिकाऱ्यांमधील असमनव्यय -पुण्यातील परिस्थितीला जबाबदार असून त्यामुळे भीतीचे वातावरण तयार झाले आहे . ..आता केंद्राने टास्क फोर्स पाठवावा ….असे ते म्ह णाले

भाजपा चे पुण्यातील खासदार गिरीश बापट यांनी पुणे शहर व पुणे जिल्ह्यातील कोरोना परिस्थिती नियंत्रणात आणण्यासाठी काल संसदेत टास्क फोर्स पाठवण्याची, तसेच व्हेंटिलेटर, रुग्णवाहिका व ऑक्सिजन बेड कमी असून ते आवश्यक प्रमाणात त्वरीत मिळण्याबाबत केंद्रशासनाचे लक्ष वेधून मागणी केली.

पुणेकरांना भामा-आसखेडचे पाणी देण्यास भाजप कटिबद्ध
भाजपचे शहराध्यक्ष जगदीश मुळीक यांची ग्वाही
राज्यात भाजपची सत्ता असताना पाच वर्षांत भामा-आसखेड पाणी प्रकल्पाचे ९५ टक्के काम पूर्ण करण्यात आले, मात्र राष्ट्रवादी कॉंग‘ेसमधील अंतर्गत वादामुळे ही योजना पूर्ण होण्यास विलंब होत असून गेल्या वर्षभरात उर्वरीत ५ टक्के काम करण्यात सरकारला अपयश आले आहे. मात्र पुणेकरांना भामा-आसखेडचे पाणी देण्यास भाजप कटिबद्ध असून, त्यासाठी सर्वतोपरी पाठपुरावा करणार असल्याची ग्वाही भाजपचे शहराध्यक्ष माजी आमदार जगदीश मुळीक यांनी दिली.
मुळीक म्हणाले, ‘राष्ट्रवादीचे खेडचे आमदार दिलीप मोहिते यांनी पुणे आणि पिंपरीला भामा-आसखेडचे पाणी देणार नाही अशी सरळसरळ धमकी दिली आहे. भामा-आसखेड योजनेबाबत राष्ट्रवादी कॉंग‘ेस पक्षात एकवाक्यता नाही. स्थानिक आमदार केवळ बैठका घेण्याचा ङ्गार्स करीत आहेत. प्रत्यक्षात प्रकल्प पूर्ण करण्याच्या उद्देशाने कोणतीही ठोस पावले उचलली जात नाहीत. खरं तर आत्तापर्यंत पुणे-नगर रस्त्यावरील नागरिकांना भामा-आसखेडचे पाणी मिळाले असते. परंतु नियोजनाचा अभाव आणि स्थानिक आमदारांच्या राजकीय उदासिनतेमुळे प्रकल्प पूर्ण करण्यात अपयश आले आहे.’
मुळीक पुढे म्हणाले, ‘वडगावशेरी, चंदननगर, कळस, धानोरी, विश्रांतवाडी, येरवडा या शहराच्या पूर्व भागातील पाणीप्रश्‍न सोडविण्यासाठी सात वर्षांपासून भामा-आसखेडचे योजनेचे काम सुरू आहे. या प्रकल्पाची क्षमता २०० एमएलडी इतकी आहे. योजनेचा खर्च सुमारे ४१८ कोटी रुपये आहे. महापालिकेत भाजपची सत्ता आल्यानंतर योजनेला आवश्यक असणारा महापालिकेच्या वाट्याचा निधी उपलब्ध करून दिला. त्यामुळे योजनेला गती आली. मात्र योजनेतील प्रकल्पग‘स्त शेतकर्‍यांना नुकसानभरपाई देण्याचा प्रश्‍न राज्यातील महाआघाडी सरकारला अपयश येत आहे. त्यामुळे प्रकल्पाला विलंब होत आहे.’

• आरोग्य मंत्री राजेश टोपे यांची ससून रुग्णालयास भेट

पुणे दि.20:- ससून रुग्णालयातील कोरोना रुग्णांवर उपचार होण्याच्या दृष्टीने रुग्णालय प्रशासनाने सुक्ष्म नियोजन करावे, असे सांगून कोविड रुग्णांच्या उपचारासाठी डॉक्टरांची कमतरता भासू नये यासाठी येथील रिक्त पदे भरण्याची प्रक्रिया गतीने पूर्ण करावी, असे निर्देश राज्याचे सार्वजनिक आरोग्य व कुटूंब कल्याण मंत्री राजेश टोपे यांनी दिले.
पुण्यातील ससून सर्वोपचार रुग्णालयाला आज आरोग्य मंत्री राजेश टोपे यांनी भेट देऊन कोरोनाच्या रुग्णांना देण्यात येत असलेल्या सोयी-सुविधांची माहिती घेतली. यावेळी आरोग्य विभागाचे सल्लागार डॉ.सुभाष साळुंखे, विभागीय आयुक्त सौरभ राव, जमाबंदी आयुक्त तथा ससूनचे विशेष कार्य अधिकारी एस.चोक्कलिंगम, उपमुख्यमंत्री यांचे विशेष कार्य अधिकारी कौस्तुभ बुटाला, जिल्हाधिकारी डॉ.राजेश देशमुख, पुणे महानगरपालिका आयुक्त विक्रम कुमार, ससून रुग्णालयाचे अधिष्ठाता डॉ.मुरलीधर तांबे, जिल्हा शल्यचिकित्सक डॉ. अशोक नांदापूरकर, सार्वजनिक बांधकाम विभागाचे उप कार्यकारी अभियंता अमोल पवार, आरोग्य विभागाचे उपसंचालक डॉ.संजय देशमुख, जिल्हा आरोग्य अधिकारी डॉ.भगवान पवार, ससूनचे वैद्यकीय अधीक्षक डॉ.अजय तावरे आदींची प्रमुख उपस्थिती होती.
ससूनच्या कोविड रुग्णालयासंदर्भात माहिती घेताना आरोग्य मंत्री श्री. टोपे म्हणाले, जिल्ह्यात कोविड-19 बाधितांना तातडीने उपचार मिळण्यासाठी ससून बरोबरच सर्व खाजगी रुग्णालयांनी ऑक्सीजन व व्हेंटीलेटरयुक्त बेडची संख्या वाढवावी. तसेच खाजगी रुग्णालयांनी 80 टक्के बेड कोरोना रुग्णांसाठी उपलब्ध करुन देणे आवश्यक आहे. ससून रुग्णालयाला ऑक्सीजनचा तुटवडा भासू नये यासाठी ऑक्सीजनची टाकी बसवावी तसेच या अनुषंगाने सुरु असणारी कामे जलदगतीने पूर्ण करावीत. राज्यातील इतर जिल्हयांमधील तसेच पुण्यातील अन्य रुग्णालयातील रुग्णांना ‘टेलिमेडिसीनव्दारे’ उपचार करण्यासाठी ससूनच्या डॉक्टरांनी पुढाकार घ्यावा. कोविडच्या चाचण्या लवकरात लवकर होण्यासाठीचे किट माफक दरात पुरविण्यासाठी या कंपन्यांच्या प्रतिनिधींशी चर्चा करुन प्रयत्न केले जातील असे त्यांनी सांगितले.
कोरोनाच्या रुग्णांना आरोग्याच्या सेवा-सुविधा चांगल्या प्रकारे मिळवून देण्यासाठी राज्य शासन प्रयत्नशील असून ससून रुग्णालयाला आवश्यक औषधांचा साठा व साधन सामग्री उपलब्ध करुन देण्यात येईल. कोरोनाचा वाढत जाणारा संसर्ग रोखण्यासाठी नागरिकांनीही दक्षता घेणे आवश्यक असल्याचे सांगून कोरोनाची साखळी तोडण्यासाठी मास्क व सॅनिटायझरचा वापर तसेच सामाजिक अंतर राखावे, असे आवाहन आरोग्यमंत्री श्री. टोपे यांनी केले.
वैद्यकीय सल्लागार डॉ.सुभाष साळुंखे यांनी रुग्णांवरील उपचारासाठी बेड व्यवस्थापन आवश्यक असल्याचे सांगितले.
विभागीय आयुक्त सौरभ राव यांनी ‘माझे कुटुंब, माझी जबाबदारी’ मोहिमेव्दारे घरोघरी सर्वेक्षणावर भर देवून नागरिकांना तात्काळ उपचार मिळवून देण्यासाठी प्रयत्न करण्यात येत असल्याचे सांगितले.
जिल्हाधिकारी डॉ.राजेश देशमुख यांनी खाजगी रुग्णालयांच्या अवाजवी शुल्क नियंत्रणासाठी जिल्हा प्रशासनाच्या वतीने करण्यात येत असलेल्या कार्यवाहीबाबत माहिती दिली.
ससूनचे विशेष कार्य अधिकारी एस.चोक्कलिंगम व अधिष्ठाता डॉ.मुरलीधर तांबे यांनी ससून रुग्णालयातील उपलब्ध बेड, मनुष्यबळ, वैद्यकीय अधिकारी यांचे डयुटी नियोजन, दैनंदिन भरती होणारे कोविड व नॉन कोविड रुग्ण व देण्यात येणाऱ्या सेवा सुविधांची माहिती दिली. उपस्थित सर्व वैद्यकीय अधिकाऱ्यांनी उपचारपध्दतीबाबत माहिती देवून सूचना केल्या.

पुणे- घटस्थापनेस अवघे 27 दिवस राहिले असताना आणि कोरोना संसर्गात वाढ होत असताना स्वाभाविकच गणेशोत्सवाप्रमाणे नवरात्राच्या काळातही सण साजरा करण्यावर बंधन येणार हे स्पष्ट आहे. मात्र, त्यासंदर्भातील नियमावली त्वरित तयार करावी, अशी मागणी कोथरूड नवरात्र महोत्सव संस्थापक अध्यक्ष संदीप खर्डेकर यांनी पुणे विभागीय आयुक्त सौरभ राव यांच्याकडे केली आहे.

सालाबादप्रमाणे आम्हाला आमच्या देवीची मूर्ती रंगविण्यापासून मूर्ती घडविण्यापर्यंतचे सर्व कार्य आत्तापासूनच करावयाचे असते. तसेच गणेशोत्सव मंडळांप्रमाणे बऱ्याच नवरात्र मंडळांचे मंदिर नसते – बंगाली व गुजराती बांधव ही या काळात मोठ्या प्रमाणावर नवरात्र साजरी करत असतात.

या कालावधीत मांडव घालणे, मूर्तीची प्रतिष्ठापना, विसर्जन व स्वागत मिरवणूक, यज्ञ, दैनंदिन पूजा आरती, गरबा व सांस्कृतिक कार्यक्रम व विविध मंदिरात होणारे कार्यक्रम या सगळ्या बाबतीत स्पष्ट आदेश व मार्गदर्शन अपेक्षित आहे.

शासकीय पातळीवर विचार विनिमय करुन त्वरित परिपत्रक काढावे. कोरोनाच्या संकटकाळी आम्ही नियमांनुसार आणि सामान्य पुणेकरांना त्रास होणार नाही अश्याच पद्धतीने नवरात्रोत्सव साजरा करण्यास कटिबद्ध आहोत, असेही संदीप खर्डेकर यांनी दिलेल्या निवेदनात म्हटले आहे.

पुणे -शहरात कोरोना विषाणूचा प्रादुर्भाव मोठ्या प्रमाणावर वाढत असल्याने रोज दोन हजार पाॅझीटिव्ह रूग्ण आढळत आहेत. महानगरपालिकेने अनेक ठिकाणी कोरोना स्वॅब टेस्ट व अ‍ॅन्टीजेन रॅपिड टेस्ट सेंटर सुरू केले आहेत. याचबरोबर काही खाजगी दवाखान्यात व लॅबमध्ये सुध्दा या टेस्टची व्यवस्था कलेली आहे. परंतु, खाजगी दवाखान्यात व लॅबमध्ये टेस्ट केली जातात, त्याचे रिपोर्ट वेळेत मिळत नाही. त्यावर कोणाचेही नियंत्रण नसल्याचा आरोप विरोधी पक्षनेत्या दीपाली धुमाळ यांनी केला आहे.

तीन-चार दिवसांनी रिपोर्ट येतात, जोपर्यंत रिपोर्ट येत नाही, तोपर्यंत रूग्ण जर पाॅझीटिव्ह आढळला तर तो त्यांच्या कुटुंबात व आजुबाजुच्या परिसरात फिरत असतो.

त्यामुळे बाकीच्यांना सुध्दा कोरोनाची लागण होण्याची शक्यता असते. यासाठी त्वरित किमान एक दिवसात रिपोर्ट येणे गरजेचे आहे, असे धुमाळ म्हणाल्या.

खाजगी लॅबमध्ये टेस्ट केल्यानंतर सोसायटीमधील व भागातील नागरिकांनी टेस्ट केलेल्या असतील तर त्या टेस्ट केलेल्या नागरिकांची पूर्ण माहिती मनपाचे संबंधित अधिकारी व खात्याला देणे आवश्यक आहे. तशी माहिती दिली जात नाही, अशी तक्रार धुमाळ यांनी केली आहे.

कोरोना चाचण्यांबाबत माहिती मिळाल्यास संबंधित आरोग्य विभागाचे अधिकारी व कर्मचारी त्या भागात अथवा सोसायटीची खबरदारी म्हणून कार्यवाही करतील. मात्र, तशी माहिती खाजगी लॅब मनपाला देत नाही. काही रूग्ण सुध्दा ही माहिती देत नाही. यासाठी कडक धोरण राबविणे गरजेचे आहे. व तशा प्रकारचे आदेश काढणे आवश्यक आहे, असे धुमाळ म्हणाल्या.

वेळेत रिपोर्ट न दिल्याने जर एखाद्या रूग्णाला त्रास झाला तर रिपोर्ट नसल्याने मनपा दवाखान्यात किंवा खाजगी दवाखान्यात उपचार करताना त्या रूग्णांना कोवीड की नाॅन कोवीड अशा प्रकारची संभ्रमावस्था निर्माण होते. अशा परिस्थितीत योग्य उपचार न मिळाल्याने काही वेळेस सदर रूग्णाला आपले प्राण गमवावे लागते, असे अनेकदा घडले आहे. या परिस्थितीला जबाबदार कोण, असा प्रश्न प्रश्न धुमाळ यांनी उपस्थित केला आहे.

खाजगी दवाखाने व लॅबवर मनपाचे नियंत्रण व लक्ष असणे गरजेचे आहे. खाजगी लॅब वेळेत व योग्य रिपोर्ट देत नसतील तर त्यांच्यावर कडक कारवाई करावी, अशी मागणीही दिपाली धुमाळ यांनी केली आहे.