पुणे विभागातील 3 लाख 21 हजार 393 कोरोना बाधित रुग्ण बरे होऊन घरी
विभागात कोरोना बाधित 4 लाख 9 हजार 377 रुग्ण
-विभागीय आयुक्त सौरभ राव

पुणे,दि.26 :- पुणे विभागातील 3 लाख 21 हजार 393 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 4 लाख 9 हजार 377 झाली आहे. तर ॲक्टीव रुग्ण संख्या 77 हजार 251 इतकी आहे. कोरोनाबाधीत एकुण 10 हजार 733 रुग्णांचा मृत्यू झाला असून मृत्यूचे प्रमाण 2.62 टक्के आहे. पुणे विभागामध्ये बऱ्या होणा-या रुग्णांचे प्रमाण 78.51 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 2 लाख 68 हजार 832 रुग्णांपैकी 2 लाख 20 हजार 695 रुग्ण बरे होवून घरी गेले आहेत. ॲक्टीव रुग्ण 42 हजार 121 आहेत. कोरोनाबाधित एकूण 6 हजार 16 रुग्णांचा मृत्यू झाला आहे. मृत्यूचे प्रमाण 2.24 टक्के इतके आहे तर बरे होणा-या रुग्णांचे प्रमाण 82.09 टक्के आहे.
सातारा जिल्हा
सातारा जिल्हयातील कोरोना बाधीत एकूण 33 हजार 987 रुग्णांपैकी 24 हजार 46 रुग्ण बरे होवून घरी गेले आहेत. ॲक्टीव रुग्ण संख्या 8 हजार 909 आहे. कोरोनाबाधित एकूण 1 हजार 32 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 31 हजार 289 रुग्णांपैकी 21 हजार 987 रुग्ण बरे होवून घरी गेले आहेत. ॲक्टीव रुग्ण संख्या 8 हजार 203 आहे. कोरोनाबाधित एकूण 1 हजार 99 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 32 हजार 832 रुग्णांपैकी 23 हजार 193 रुग्ण बरे होवून घरी गेले आहेत. ॲक्टीव रुग्ण संख्या 8 हजार 406 आहे. कोरोनाबाधित एकूण 1 हजार 233 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 42 हजार 437 रुग्णांपैकी 31 हजार 472 रुग्ण बरे होवून घरी गेले आहेत. ॲक्टीव रुग्ण संख्या 9 हजार 612 आहे. कोरोनाबाधित एकूण 1 हजार 353 रुग्णांचा मृत्यू झाला आहे
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 5 हजार 961 ने वाढ झाली आहे. यामध्ये पुणे जिल्ह्यात 3 हजार 628, सातारा जिल्ह्यात 915, सोलापूर जिल्ह्यात 502, सांगली जिल्ह्यात 607 तर कोल्हापूर जिल्ह्यात 309 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या रुग्णांमध्ये पुणे जिल्हयामध्ये 3695,सातारा जिल्हयामध्ये 831, सोलापूर जिल्हयामध्ये 396, सांगली जिल्हयामध्ये 827 व कोल्हापूर जिल्हयामध्ये 563 अशा रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 17 लाख 98 हजार 436 नमून्याचा तपासणी अहवाल प्राप्त झाला. प्राप्त अहवालांपैकी 4 लाख 9 हजार 377 नमून्यांचा अहवाल सकारात्मक (पॉझिटिव्ह) आहे.
( टिप :- दि. 25 सप्टेंबर 2020 रोजी रात्री 9.00 वा. पर्यंतच्या आकडेवारीनुसार )
*

पुणे- पुणे महापालिकेच्या कै.शिवशंकर पोटे दवाखान्यातून शासकीय दरामध्ये उत्तम आरोग्य सुविधा दिल्या जातात. या आरोग्य सुविधेमध्ये आता हेल्थ एटीएमचा समावेश झालेला आहे त्याचा लाभ प्रत्येक नागरिकांनी घ्यावा असं आवाहन पुणे महापालिकेचे आयुक्त श्री. विक्रम कुमार यांनी केलं. पुणे महानगरपालिकेच्या पद्मावती येथील कै. शिवशंकर पोटे दवाखान्यामध्ये विधान परिषदेचे आमदार अनंतराव गाडगीळ यांच्या आमदार निधीमधून हेल्थ एटीएम मशीन बसवण्यात आले आहे. या मशीनचे लोकार्पण महापालिका आयुक्त विक्रमकुमार

यांच्या हस्ते शनिवारी (दि. २६) करण्यात आले. त्यावेळी आयुक्त बोलत होते.

यावेळी माजी स्थायी समिती अध्यक्षा व नगरसेविका सौ.अश्विनीताई कदम, राष्ट्रवादी काँग्रेस पर्वती विधानसभा अध्यक्ष श्री. नितीन कदम, पुणे महापालिकेचे उपरोग्य प्रमुख डॉ. संजीव वावरे, माजी शिक्षण मंडळ उपाध्यक्ष श्री. नरेंद्र व्यवहारे, गणेश नलावडे, सुशांत ढमढेरे, अमोल ननावरे, तुषार नांदे, ऋषिकेश भुजबळ, शंकर सहाने, मयूर शिंदे, अमोल पालखे, अरुण ढावरे, संग्राम वाडकर, भरत सुराना, महेश गायकवाड, दिलीप पवार, अनिल हांडे, दिगंबर कोबल, अमित जगधने, राजभाऊ अवघडे आदी मान्यवर उपस्थित होते.

या मशीनद्वारे शासकीय दरामध्ये विविध प्रकारच्या २२ आरोग्य चाचण्या केल्या जाणार आहेत. वजन, उंची रक्तदाब, मधुमेह, शरीरातील ऑक्सिजन, बॉडी टेम्परेचर, पल्स, हिमोग्लोबिन, बीएमआय, बॉडी फॅट, बॉडी वॉटर, बॉन मास, स्केलेटन मसल्स, हेल्थ स्कोर इत्यादी चाचण्या करून दिल्या जाणार आहेत. त्याचा रिपोर्ट पाच मिनिटात उपलब्ध होऊन संबंधित व्यक्ती फिट आहे की अनफिट हे समजू शकणार आहे.

आयुक्त विक्रम कुमार म्हणाले, “अश्विनी कदम यांनी जास्तीतजास्त निधी उपलब्ध करून घेतल्यामुळे या दवाखान्यात सर्व अत्याधुनिक सुविधा उपलब्ध झाल्या आहेत. पुणे महानगरपालिका हा एक सागर आहे व त्यातून छोटे छोटे निधी उभे करताना अश्विनीताईंचा संघर्ष व घेतलेले कष्ट दिसून येतात. महापालिकेचे डॉक्टर्स देखील आज उत्तम सेवा देतात, त्यामुळे सर्वसामान्य नागरिकच नव्हे तर सर्व स्तरातील लोकांनी महापालिकेच्या आरोग्य सुविधेचा लाभ घेतला पाहिजे” या आरोग्य सुविधेमध्ये आता हेल्थ एटीएमचा समावेश झालेला आहे त्याचा लाभ प्रत्येक नागरिकांनी घ्यावा असं आवाहन आयुक्तांनी केलं.

यावेळी बोलताना सौ. अश्विनीताई कदम म्हणाल्या, ” हेल्थ एटीएम साठी निधी उपलब्ध करून दिल्याबद्दल सौ अश्विनीताईंनी आमदार अनंत गाडगीळ यांचे आभार. प्रत्येक नगरसेवकाला वाटते की आपल्या प्रभागातील नागरिकांसाठी सर्व प्रकारच्या चांगल्या सुविधा उपलब्ध असाव्यात. त्यातूनच महापालिकेच्या दवाखान्यात उत्तम आणि अत्याधुनिक आरोग्य सुविधा उपलब्ध व्हाव्यात या हेतूने पोटे दवाखान्यात पुणे महापालिकेच्या माध्यमातून कदम डायग्नोस्टिक सेंटर सुरु केले. शासकीय दरामध्ये सर्व प्रकारच्या चाचण्या या ठिकाणी करून दिल्या जातात. आज या दवाखान्यातील आरोग्य सुविधेचा लाभ केवळ गरीब किंवा मध्यमवर्गी नागरिक घेत नसून उच्च मध्यमवर्गीय देखील या दवाखान्याला भेट देतात. आज हेल्थ एटीएमच्या सुविधेमुळे प्रत्येकाला आपली सर्वप्रकारची आरोग्य चाचणी करून घेता येणार आहे ” भविष्यात महापालिकेच्या प्रत्येक दवाखान्यात अशा प्रकारचे मशीन उपलब्ध करून देण्याचा मानस असल्याचं नगरसेविका सौ. अश्विनीताई कदम यांनी सांगितलं.

यावेळी कोरोनाच्या काळामध्ये देखील आपला दवाखाना सुरु ठेऊन नागरिकांच्या आरोग्य सेवेसाठी कार्य करणारे खासगी वैद्यकीय व्यावसायिक डॉ. शैलजा राऊत, डॉ. पूजा मौर्य, डॉ. प्रियांका काकडे, डॉ. नितीन बोरा, डॉ. दत्तात्रेय बिक्कड यांचा आयुक्तांच्या हस्ते विशेष सत्कार करण्यात आला.

पुणे दि. 25 : केन्द्रिय दळणवळण मंत्रालयाने लोहगाव विमानतळावरील रिक्षांना प्रवासी वाहतूक करायला आणखी सहा महिन्यांची मुदतवाढ दिली आहे. खासदार गिरीश बापट यांनी नवीदिल्लीत संबधित मंत्र्यांशी गेल्या आठवड्यात चर्चा करून या रिक्षाचालकांना सहा महिन्यांची मुदतवाढ मिळवून दिली. या रिक्षाचालकांनी आज खासदार बापट यांचे लोहगाव विमानतळावर जंगी स्वागत केले. त्यांचा खास सत्कारही केला.

यावेळी बापट म्हणाले की,पुणे विमानतळावरील एल. व्ही. रिक्षा संघटना गेल्या अनेक वर्षांपासून प्रवाशांना सुविधा देत आहे. परंतु मुदत संपल्यामुळे त्यांना गेले काही दिवस प्रवासी वाहतूक करण्यास प्रतिबंध करण्यात आला होता. त्यामुळे जवळपास 180 रिक्षा धारकांचा व त्यावर अवलंबून असलेल्या कुटुंबाच्या उदरनिर्वाहाचा गंभीर प्रश्न निर्माण झाला होता. या सर्व रिक्षा धारकांनी मला वेळोवेळी कल्पना दिली होती. त्यानुसार नुकतीच दिल्ली येथे संसदेचे पावसाळी अधिवेशन सुरू असताना मी केंद्रीय विमानपतन मंत्री यांची समक्ष भेट घेतली. त्यांना सविस्तर माहिती दिली. त्यानुसार आज संघटनेला पुढील सहा महिन्यांसाठीपरवानगी देण्यात आली.
आज मी विमानतळावर आलो. तेथे या रिक्षाचालकांनी माझे मन भरून कौतुक व स्वागत केले. रिक्षाचालकांना मिळालेल्या परवानगीमुळे त्यांना त्यांच्या कुटुंबाचा उदरनिर्वाह करण्यास मोठी मदत होणार आहे. रिक्षाचालकांचा रोजी रोटीसह कर्जाच्या हप्त्याचा प्रश्न निर्माण झाला होता. त्यांना आता हातभार लागतो आहे याचा मला आनंद आहे.

पुणे- गेल्या २५ सप्टेंबर २०१९ रोजी पुणे शहरातील अंबिल ओढा परिसरातील आलेल्या पुरात ज्या 5नागरिकांचे प्राण गेलले त्यांना आज राष्ट्रवादी काँग्रेस पक्ष पर्वती विधानसभेच्या वतीने श्रद्धांजली वाहण्यात आली.
याप्रसंगी राष्ट्रवादी काँग्रेस पक्षाचे प्रवक्ते श्री अंकुश काकडे, नगरसेविका अश्विनी कदम, नितीन कदम,दिलीप अरूंदेकर, माजी नगरसेवक सुनील बिबवे संतोष नांगरे, रवी चौधरी, अमोल ननावरे, गौरी जाधव, तुषार नांदे,ऋषिकेश भुजबळ अमोल पालखे, नारायण गायकवाड, मंथन जागडे, नरेश बागुल, संग्राम वाडकर, साईल तांबोळी, प्रदीप शिवशरण इत्यादी उपस्थित होते.

एमआयटी डब्ल्यूपीयूत ऑनलाईन दुसरी राष्ट्रीय माध्यम व पत्रकारिता परिषदेचा समारोप

पुणे:“राजकारणामुळे देशातील सामाजिक, आर्थिक आणि राजकारणाचे क्षेत्र खूपच प्रभावीत झाले आहे. एकीकडे सर्वोच्च न्यायालय, निवडणूक आयोग, सीबीआय आणि पार्लमेंटला सुध्दा त्यांच्या अधिकारांचा पूर्ण वापर करतांना विचार करावा लागतो. अशा जात्यामध्ये माध्यमे कसे सुटू शकतील, हा एक प्रश्न निर्माण झाला आहे. माध्यमांकडून ज्या प्रकारे रिर्पोटिंग होत आहे त्यात शांती शोधणे अवघड आहे.” असे मत ज्येष्ठ पत्रकार पुण्यप्रसून बाजपेयी यांनी मांडले.
एमआयटी वर्ल्ड पीस युनिव्हर्सिटी, पुणेतर्फे आयोजित करण्यात आलेल्या चार दिवसीय ऑनलाईन, “दुसरी राष्ट्रीय माध्यम व पत्रकारिता परिषदेच्या” समारोप प्रसंगी प्रमुख पाहुणे म्हणून ते बोलत होते. या परिषदेचा प्रमुख विषय जगात शांतता प्रस्थापित करण्यासाठी प्रसार माध्यमांची भूमिका हा होता.
यावेळी ज्येष्ठ पत्रकार आशितोष, अरूणाचल प्रदेशचे माजी राज्यपाल व सुप्रसिद्ध लेखक तथागत रॉय, विवेकांनद इंटरनेशनल फाउंडेशनचे अध्यक्ष आणि तुघलकचे संपादक स्वामीनाथन गुरूमुर्ती, ले. जनरल अरविंदर सिंग लाम्बा (पीव्हीएसएम, व्हीएसएम) आणि यूएस येथील इन्फीनेटी फाउंडेशनचे संस्थापक व लेखक राजीव मल्होत्रा हे सन्माननीय पाहुणे म्हणून उपस्थित होते.
तसेच, एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड, कार्याध्यक्ष राहुल विश्वनाथ कराड, कुलगुरू डॉ. एन.टी.राव, प्र-कुलगुरू डॉ. आर.एम.चिटणीस, प्र कुलगुरू प्रा. डी.पी. आपटे व लिबरल आर्ट, फाइन आर्ट आणि मिडिया अ‍ॅण्ड जर्नालिझम स्कूलच्या अधिष्ठाता प्रा.डॉ. अनुराधा पराशर हे उपस्थित होते.
पुण्यप्रसून वाजपेयी म्हणाले,“ सध्याच्या काळात पत्रकार संस्था ज्या प्रकारे काम करीत आहेत. त्यासाठी पंतप्रधान मोदी यांच्या जवळचे संबंध असणे गरजेचे झाले आहे. समजा तुम्हाला वृत्तपत्र काढायचे असेल तर आरएनआयशी जवळीक हवी. ही झळ जवळपास देशातील सर्वच क्षेत्रात पोहचत आहे. टाटा कंपनीला मोठा नुकसान होत आहे, परंतू अंबानी आणि अडानी यांच्या सर्व कंपन्या फायद्यात आहे. त्याचप्रमाणे माध्यमांमध्ये सुद्धा असे घडतांना दिसत आहे.”
“ देशाला या सर्व गोष्टींपासून वाचवायचे असेल तर प्रशासन आणि पत्रकारांना समोर येणे गरजेचे आहे. तसेच, देशाला शिक्षित करावे लागेल. कारण विरोधी पार्टीचे नेते पार्लमेंटमध्ये गप्प बसलेले आहेत. मुख्य प्रवाहाचे संपादक देशात आज आपल्या कुवतीनुसार काही चांगले काम करतांनाही दिसत आहे. सध्याच्या काळात संपूर्ण जग हे भारतातील पर्यावरण, न्यूक्लियर मुद्दा आणि हुकुमशाही सत्तेकडे आ वासून पाहत आहेत आणि आम्ही ते भोगत आहोत. सध्या या देशात कोल्ड वॉर सुरू आहे, ते थांबविण्यासाठी माध्यमांनांच कठोर भूमिका घेऊन कार्य करावे लागेल.”
तथागत रॉय म्हणाले,“ देशातील शांतीसाठी माध्यमांची भूमिका ही अत्यंत महत्वाची आहे. रोजच्या घटनांंची सत्य माहिती समाजापर्यंत पोहचविण्याचे कार्य त्यांनी करावे. तसेच, संकटाच्या काळात तटस्थ भूमिका पार पाडावी. चीन आणि पाकिस्तान या देशांची समस्या ही अवघड आहे. त्यामुळे मिडियाने सुदधा यांच्या संदर्भातील योग्य बातम्या दयावे.”
आशितोष म्हणाले,“ आरोग्य, आर्थिक चक्र आणि राष्ट्रीय सुरक्षा या तीन गोष्टी सध्याच्या काळात संपूर्ण जगात सुरू आहे. त्यामुळे माध्यमांनी आपली महत्वाची भूमिका पार पाडावी. परंतू गेल्या तीन महिन्यांपासून चीनचा वाद, देशातील आर्थिक स्थिती आणि वाढती बेरोजगारी सारखे विषयांवर माध्यमात चर्चा होतांना दिसत नाही. हे लज्जास्पद आहे. पत्रकारितेला काय झाले हे कळत नाही. लोकशाहीचा चौथा स्तंभ असलेल्या माध्यमांनी आपले योग्य कर्तव्य पार पाडावे. देशाच्या पंतप्रधानांना प्रश्न विचारण्याची हिम्मत पत्रकारांनी ठेवावी.”
राजीव मल्होत्रा म्हणाले,“भारतीय माध्यमांनी संपूर्ण जगासमोर देशाची संस्कृती आणि चांगल्या राजकारणाचे दर्शन घडवावे. माध्यमांनी आपली वैचारिक पातळी वाढविण्यावर जोर द्यावा. कारण जागतिक स्तरावर पाहिले तर अलझझीरा, बीबीसी सारख्या माध्यमांसमोर आमची तुलनाच होऊ शकत नाही. देशातील माध्यमांमध्ये खळबळजनक, भावनीक, गंभीर विचारशीलता आणि शोध पत्रकारिता दिसत नाही, ही चिंताजनक बाब आहे. त्यांच प्रमाणे आंतरराष्ट्रीय स्तरावरील पत्रकारिताही दिसत नाही. अशा वेळेस पत्रकारांना पूर्ण पणे विकसित व्हावे लागेल. त्यासाठी अभ्यास, संशोधन आणि तपस्या करावी.”
ले. जनरल अरविंदर सिंग लाम्बा म्हणाले,“ माध्यमे हे एक शस्त्र असल्याने पत्रकारतेची भूमिका ही अत्यंत महत्वाची आहे. 1965 च्या लढाईच्या वेळेस पत्रकार आणि माध्यमांनी चांगली भूमिका बजावली होती. आंतरराष्ट्रीय संबंधांना अधिक मजबूती देण्यासाठी मुख्य प्रवाहातील वृत्तपत्र आणि मॅगझिन यांचे महत्व अनन्यसाधारण असते. माध्यमांनी प्रपोगंडा पसरू नये, तर ज्ञानाचा विकास करा. देशाच्या विकासाठी माध्यम आणि पत्रकारिता ही अत्यंत महत्वाची भूमिका बजावू शकतात.”
डॉ. विश्वनाथ दा कराड म्हणाले,“ कोरोना व्हायरसमुळे जगात भितीचे वातावरण निर्माण झाले असून गेल्या 6 महिण्यांपासून लोक घरात बंद आहे. अशा वेळेस सकारात्मक मानसिकता ठेवेणे गरजेचे आहे. या काळात माध्यमांची भूमिका महत्वाची आहे. 21 व्या शतकात भारत विश्व गुरू कसा बनेल या वर माध्यमांची आपली भूमिका मांडायला सुरूवात करावी.”
स्वामिनाथन गुरूमुर्ती यांनी समयोचित विचार व्यक्त केले.
प्रा. डॉ. आर.एम.चिटणीस यांनी स्वागतपर भाषण केले तसेच, प्रा. गौतम बापट यांनी सूत्रसचालन केले.  प्रा.डॉ. अनुराधा पराशर यांनी आभार मानले.

पुणे विभागातील 3 लाख 15 हजार 81 कोरोना बाधित रुग्ण बरे होऊन घरी
विभागात 4 लाख 3 हजार 416 रुग्ण कोरोना बाधित-विभागीय आयुक्त सौरभ राव पुणे,दि.25 :- पुणे विभागातील 3 लाख 15 हजार 81 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 4 लाख 3 हजार 416 झाली आहे. तर ॲक्टीव रुग्ण संख्या 77 हजार 778 इतकी आहे. कोरोनाबाधीत एकुण 10 हजार 557 रुग्णांचा मृत्यू झाला असून मृत्यूचे प्रमाण 2.62 टक्के आहे. पुणे विभागामध्ये बऱ्या होणा-या रुग्णांचे प्रमाण 78.10 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा
पुणे जिल्हयातील कोरोना बाधीत एकूण 2 लाख 65 हजार 204 रुग्णांपैकी 2 लाख 17 हजार रुग्ण बरे होवून घरी गेले आहेत. ॲक्टीव रुग्ण 42 हजार 283 आहेत. कोरोनाबाधित एकूण 5 हजार 921 रुग्णांचा मृत्यू झाला आहे. मृत्यूचे प्रमाण 2.23 टक्के इतके आहे तर बरे होणा-या रुग्णांचे प्रमाण 81.82 टक्के आहे.
सातारा जिल्हा
सातारा जिल्हयातील कोरोना बाधीत एकूण 33 हजार 72 रुग्णांपैकी 23 हजार 215 रुग्ण बरे होवून घरी गेले आहेत. ॲक्टीव रुग्ण संख्या 8 हजार 857 आहे. कोरोनाबाधित एकूण एक हजार रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 30 हजार 787 रुग्णांपैकी 21 हजार 591 रुग्ण बरे होवून घरी गेले आहेत. ॲक्टीव रुग्ण संख्या 8 हजार 103 आहे. कोरोनाबाधित एकूण 1 हजार 93 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 32 हजार 225 रुग्णांपैकी 22 हजार 366 रुग्ण बरे होवून घरी गेले आहेत. ॲक्टीव रुग्ण संख्या 8 हजार 652 आहे. कोरोनाबाधित एकूण 1 हजार 207 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 42 हजार 128 रुग्णांपैकी 30 हजार 909 रुग्ण बरे होवून घरी गेले आहेत. ॲक्टीव रुग्ण संख्या 9 हजार 883 आहे. कोरोनाबाधित एकूण 1 हजार 336 रुग्णांचा मृत्यू झाला आहे
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 6 हजार 702 ने वाढ झाली आहे. यामध्ये पुणे जिल्ह्यात 3 हजार 521, सातारा जिल्ह्यात 850 , सोलापूर जिल्ह्यात 557, सांगली जिल्ह्यात 685 तर कोल्हापूर जिल्ह्यात 1 हजार 89 अशी रुग्ण संख्येमध्ये वाढ झालेली आहे.
पुणे विभागातील सर्व्हेक्षण
आजपर्यत विभागामध्ये एकुण 17 लाख 72 हजार 876 नमून्याचा तपासणी अहवाल प्राप्त झाला. प्राप्त अहवालांपैकी 4 लाख 3 हजार 416 नमून्यांचा अहवाल सकारात्मक (पॉझिटिव्ह) आहे.
( टिप :- दि. 24 सप्टेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे,दि. 25 : उपमुख्यमंत्री तथा जिल्ह्याचे पालकमंत्री अजित पवार यांच्या उपस्थितीत आज 14 व्या वित्त आयोगा अंतर्गत खरेदी केलेल्या रुग्णवाहिकांचे लोकार्पण करण्यात आले. पुणे जिल्हयातील प्राथमिक आरोग्य केंद्राच्या माध्यमातून या रुगणवाहिका सेवेत दाखल होत आहेत.

विधानभवन प्रांगणात आज उपमुख्यमंत्री अजित पवार यांच्या उपस्थितीत झालेल्या या कार्यक्रमाला राज्य उत्पादन शुल्क मंत्री दिलीप वळसे-पाटील, सार्वजनिक बांधकाम ( सार्वजनिक उपक्रम वगळून) मृद व जलसंधारण, पदुम, वने, सामान्य प्रशासन विभागाचे राज्यमंत्री दत्तात्रय भरणे, जिल्हा परिषद अध्यक्षा निर्मला पानसरे, आ. चेतन तुपे, जिल्हा परिषदेचे मुख्य कार्यकारी अधिकारी आयुष प्रसाद, जिल्हा आरोग्य अधिकारी डॉ. भगवान पवार, यांच्यासह तसेच संबंधित विभागांचे वरिष्ठ अधिकारी व पदाधिकारी उपस्थित होते.उपमुख्यमंत्री अजित पवार म्हणाले, पुणे जिल्हा परिषदेने संकटाच्या काळात कायम मदतीसाठी पुढाकार घेतला आहे. कोरोनाच्या संकटातही रुग्णवाहिका देवून ग्रामीण भागातील रुग्णांना सुविधा उपलब्ध करून दिली आहे. कोरोनाच्या संसर्गाचे गांभीर्य लक्षात घेऊन नागरिकांनीही आपली जबाबदारी ओळखून मास्कचा वापर, सुरक्षित अंतर व स्वच्छता या त्रिसूत्रीचा अवलंब करावा. ‘माझे कुटुंब, माझी जबाबदारी’ मोहिमे अंतर्गत घरोघरी आरोग्य तपासणी केली जाणार आहे, यासाठी प्रत्येकाने सहकार्य करावे, असे आवाहनही त्यांनी केले. यावेळी जिल्हयातील निवडक सरपंच उपस्थित होते.

पुणे,दि. 25 : कोरोनाबाधित रुग्णांवर उपचारासाठी रूग्णालयांनी आकारावयाच्या दरासंबंधी यापूर्वीच शासनाकडून जाहीर करण्यात आले आहे. त्यामुळे कुठल्याही रूग्णालयाने त्याहून जादा दर आकारू नये. असा प्रकार झाल्याचे आढळताच संबंधितांवर कठोर कारवाई करण्यात येईल, तसेच औषधांचाही काळाबाजार करणा-यांवरही कारवाई करण्यात येईल असा इशारा उपमुख्यमंत्री तथा जिल्ह्याचे पालकमंत्री अजित पवार यांनी आज दिला. माझे कुटुंब,माझी जबाबदारी मोहिमे अंतर्गत कोरोनाचे निदान होवून वेळेत उपचार करणे सुलभ होणार असल्याने ही मोहित अत्यंत प्रभावीपणे राबवा, असे निर्देशही त्यांनी दिले.
विधानभवन सभागृहात आज उपमुख्यमंत्री अजित पवार यांनी पुणे, पिंपरी चिंचवड महानगरासह जिल्हयातील कोरोना परिस्थितीचा आणि उपाययोजनांचा आढावा घेतला. बैठकीला राज्य उत्पादन शुल्क मंत्री दिलीप वळसे-पाटील, सार्वजनिक बांधकाम ( सार्वजनिक उपक्रम वगळून) मृद व जलसंधारण, पदुम, वने, सामान्य प्रशासन विभागाचे राज्यमंत्री दत्तात्रय भरणे, पुण्याचे महापौर मुरलीधर मोहोळ, पिंपरी चिंचवडच्या महापौर उषा उर्फ माई ढोरे, जिल्हा परिषद अध्यक्षा निर्मला पानसरे, खासदार श्रीरंग बारणे, आ. माधुरी मिसाळ, आ. चेतन तुपे, आ. सुनिल शेळके, आ.सिद्धार्थ शिरोळे, विभागीय आयुक्त सौरभ राव, जमाबंदी आयुक्त एस. चोक्कलिंगम, पिंपरी-चिंचवडचे पोलीस आयुक्त कृष्ण प्रकाश, पुणे महापालिका आयुक्त विक्रम कुमार, जिल्हाधिकारी डॉ. राजेश देशमुख, पिंपरी चिंचवड महापालिका आयुक्त श्रावण हर्डीकर, अतिरिक्त आयुक्त रुबल अग्रवाल, शांतनू गोयल, जिल्हा परिषदेचे मुख्य कार्यकारी अधिकारी आयुष प्रसाद, डॉ. सुभाष साळुंखे, ससूनचे अधिष्ठाता डॉ. मुरलीधर तांबे तसेच संबंधित विभागांचे वरिष्ठ अधिकारी व पदाधिकारी उपस्थित होते.
उपमुख्यमंत्री अजित पवार म्हणाले, कोरोनाचा प्रादुर्भाव रोखण्यासाठी राज्य शासनाने ‘माझे कुटुंब माझी जबाबदारी’ ही अत्यंत महत्वाकांक्षी मोहिम सुरू केली आहे. घरोघरी जावून या मोहिमे अंतर्गत प्रत्येक कुटुंबाची आरोग्याच्या दृष्टीने तपासणी होणार आहे, या मोहिमेमुळे कोरोनाचे पूर्वनिदान होण्यास मदत होणार आहे, यातून रुग्णाला वेळेपूर्वीच उपचार मिळतील व रुग्ण लवकर बरा होईल, त्यामुळे माझे कुटुंब, माझी जबाबदारी मोहिम प्रभावीपणे राबवा, असे निर्देशही त्यांनी दिले.
कोरोना आजारातून बरे झालेल्या रुग्णांसाठी इतर आवश्यक उपचाराबाबतही दक्षता घेण्याच्या सूचना करून उपमुख्यमंत्री अजित पवार म्हणाले, कोरोनाबाधितांची वाढती संख्या विचारात घेत उपचारासाठीच्या सुविधांही सातत्याने वाढविण्यात येत आहेत. कोरोनाच्या संसर्गाचे गांभीर्य लक्षात घेऊन नागरिकांनीही आपली जबाबदारी ओळखून मास्कचा वापर, सुरक्षित अंतर व स्वच्छता या त्रिसूत्रीचा अवलंब करावा. कोरोनाला कुणीही सहजपणे घेऊ नये. या साथीवर मात करण्यासाठी आपली जबाबदारी लक्षात घेत ‘माझे कुटुंब, माझी जबाबदारी’ मोहिम यशस्वी करावी, असे आवाहनही त्यांनी केले.

        महापौर मुरलीधर मोहोळ म्हणाले, कोरोनाबाधित रुग्णांवर उपचार करण्यासाठी पुणे महानगरपालिकाही सातत्याने उपचार सुविधांमध्ये वाढ करते आहे. जम्बो रुग्णांलयामध्येही उपचार सुविधा वाढविण्यात आल्याचे त्यांनी सांगितले.
        विभागीय आयुक्त सौरभ राव यांनी कोरोना स्थिती, उपाययोजनांची माहिती दिली. पुणे महापालिका आयुक्त विक्रम कुमार यांनी पुणे महानगरपालिका क्षेत्रातील कोरोना संसर्गाबाबतची स्थिती, उपाययोजनांची माहिती दिली.
                  जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी आयुष प्रसाद तसेच उपस्थित प्रमुख अधिकाऱ्यांनी कोरोना नियंत्रणासाठी आवश्यक असणाऱ्या उपाययोजनांची माहिती दिली. यावेळी प्रमुख अधिकारी उपस्थित होते.

पुणे दि.25: जिल्हयातील जलसंपदा विभागाच्या विविध कामांचा उपमुख्यमंत्री तथा जिल्हयाचे पालकमंत्री अजित पवार यांनी आज आढावा घेतला.
पुण्यातील विधानभवन सभागृहात झालेल्या या बैठकीला सार्वजनिक बांधकाम विभागाचे राज्यमंत्री दत्तात्रय भरणे, विभागीय आयुक्त सौरभ राव, पुणे महानगरपालिका आयुक्त विक्रम कुमार, पिंपरी- चिंचवड महानगरपालिका आयुक्त श्रावण हर्डिकर, जिल्हाधिकारी डॉ.राजेश देशमुख, पाटबंधारे विभागाचे सेवानिवृत्त सचिव अविनाश सुर्वे, मुख्य अभियंता हनुमंत गुणाले, महाराष्ट्र जीवन प्राधिकरणाचे मुख्य अभियंता सुभाष भुजबळ, पाटबंधारे विभागाचे अधिक्षक अभियंता संजीव चोपडे, तसेच पाटबंधारे व महाराष्ट्र जीवन प्राधिकरणाचे वरिष्ठ अधिकारी उपस्थित होते.
उपमुख्यमंत्री अजित पवार म्हणाले, नीरा डावा कालव्यावरील वितरण प्रणालीचे विशेष दुरुस्ती प्रस्ताव तसेच शेटफळ तलाव धरण व कालव्याच्या कामाचे प्रस्ताव निधीसाठी राज्य शासनाकडे सादर करावेत. नीरा डावा मुख्य कालव्यातून होणारी पाणीगळती थांबविण्यासाठी या कालव्याच्या अस्तरीकरण व दुरुस्तीच्या कामाचा प्रस्ताव तातडीने सादर करा. नीरा नदीवरील कोल्हापूर पध्दतीच्या बंधाऱ्याच्या जीर्ण झालेल्या दगडी बांधकामांचे काँक्रेटीकरण करुन बांधकामे मजबूत करावीत, असे सांगून इंदापूर तालुक्यातील जुन्या शासकीय इमारती, कार्यालये व विश्रांतीगृहाच्या इमारतीच्या दुरुस्तीची कामेही हाती घ्यावीत, अशा सूचना करुन मुळशी धरण प्रकल्पातून नागरिकांना शेती, आणि पिण्यासाठी दोन टीएमसी वाढीव पाणी मिळण्यासाठी तसेच कोळवण खोऱ्यातील शेतीसाठी पाणी उपसा योजना राबविण्यासाठी सुर्वे समितीने लवकरात लवकर अहवाल सादर करावा, असेही उपमुख्यमंत्री श्री. पवार यांनी यावेळी सांगितले.
राज्यमंत्री दत्तात्रय भरणे यांनी इंदापूर तालुक्यातील नागरिकांना पुरेसे पाणी मिळवून देण्यासाठी अपूर्ण कामे लवकरात लवकर पूर्ण करावेत. भागाचे सेवानिवृत्त सचिव अविनाश सुर्वे, मुख्य अभियंता हनुमंत गुणाले, महाराष्ट्र जीवन प्राधिकरणाचे मुख्य अभियंता सुभाष भुजबळ, पाटबंधारे विभागाचे अधिक्षक अभियंता संजीव चोपडे यांनी पाटबंधारे विभागातील कामांच्या प्रश्नांबाबत तसेच विविध प्रकल्पांबाबत माहिती दिली.

पुणे दि.25: नागरिकांच्या वाहतूक कोंडीची समस्या दूर करण्याबरोबरच वेळेची बचत होण्याच्या दृष्टीने चांदणी चौकातील उड्डाणपुलाचे काम गतीने मार्गी लावा, असे निर्देश उपमुख्यमंत्री अजित पवार यांनी आज दिले.
उपमुख्यमंत्री अजित पवार यांनी आज पहाटे मेट्रोच्या कामाची पाहणी केल्यानंतर विभागीय आयुक्त कार्यालयात सकाळी आठ वाजल्यापासून पुणे जिल्हयातील विकासकामांचा आढावा घेऊन आवश्यक त्या सूचना दिल्या. यावेळी विभागीय आयुक्त सौरभ राव, पुणे महानगरपालिका आयुक्त विक्रम कुमार, पिंपरी- चिंचवड महानगरपालिका आयुक्त श्रावण हर्डिकर, जिल्हाधिकारी डॉ.राजेश देशमुख, पुणे महानगरपालिकेच्या अतिरिक्त आयुक्त रुबल अग्रवाल, राष्ट्रीय महामार्ग प्राधिकरणाचे प्रकल्प संचालक एस.डी.चिटणीस, सैन्य दल तसेच सबंधित विभागांचे वरिष्ठ अधिकारी उपस्थित होते.

उपमुख्यमंत्री अजित पवार म्हणाले, नागरिकांच्या सोयीसाठी चांदणी चौकातील उड्डाणपुलाचे काम लवकरात लवकर पूर्ण होणे आवश्यक आहे. यासाठी शासनाकडून आवश्यक तो निधी पुरविला जाईल, तथापि दोन्ही महानगरपालिका व महसूल विभागाने भूसंपादनाची कामे तातडीने पूर्ण करावीत. तसेच या परिसरातील सुशोभिकरणाच्या दृष्टीने आवश्यक असणाऱ्या परवानग्या महानगरपालिका व राष्ट्रीय महामार्ग प्राधिकरणाने मिळवून द्याव्यात. चांदणी चौकाची सुधारणा करण्याच्या कामात अडचण येऊ नये यासाठी सबंधित वरिष्ठ अधिकाऱ्यांनी लक्ष देण्याच्या सूचनाही यावेळी उपमुख्यमंत्री श्री.पवार यांनी दिल्या. नाशिक रोडवरील वाहतूक कोंडी कमी करण्यासाठी नाशिक फाटा ते मोशी रस्ता रुंदीकरण काम लवकरात लवकर पूर्ण करावे, असे सांगून यामार्गावरील मेट्रोचा समावेश करण्यात येत असल्यामुळे त्या अनुषंगाने भूसंपादनासह अन्य कामे जलद गतीने पूर्ण करावीत,असे ही ते म्हणाले. विभागीय आयुक्त सौरभ राव, पुणे महानगरपालिका आयुक्त विक्रम कुमार, पिंपरी- चिंचवड महानगरपालिका आयुक्त श्रावण हर्डिकर, जिल्हाधिकारी डॉ.राजेश देशमुख तसेच राष्ट्रीय महामार्ग प्राधिकरणाचे प्रकल्प संचालक एस.डी.चिटणीस यांनी कामांच्या सद्यस्थितीची माहिती दिली.