पुणे- मी घेतलेली लस करोनाची नाही असं म्हणत सिरममध्ये जाऊन घेतलेल्या लशीवर शरद पवारांनी स्पष्टीकरण दिलं आहे.  मात्र मी आणि माझ्या स्टाफने घेतलेली लस ही करोनावरची नसून प्रतिकार शक्ती वाढवणारी आहे. कोविडवरची लस येण्यासाठी जानेवारी अखेरपर्यंत वेळ लागेल असं सिरमकडून सांगण्यात आल्याचंही शरद पवार यांनी स्पष्ट केलं आहे. लोकांना वाटते की मी लस घेतली आहे. अशी चर्चा लोकांमध्ये खासगी असते की सिरमचे प्रमुख पवारांचे वर्ग मित्र आहे. त्यामुळे त्यांनी ती लस घेतली असेल असं लोक बोलतात. पण मी आणि माझ्या स्टाफने घेतली लस ही करोनावरची नाही तर प्रतिकारशक्ती वाढवणारी आहे असं शरद पवार यांनी स्पष्ट केलं आहे.

पुणे : “आज देशात कलुषित वातावरण बनले आहे. प्राकृतिक आणि मानसिक आरोग्य गंभीर होत चालले आहे. पर्यावरणाचा ऱ्हास मोठ्या प्रमाणात होत आहे. कोरोना महामारी हे त्याचेच द्योतक आहे. आज निसर्गाने मानवाला विषाणू संसर्गाचा वाहक बनवले असून, मानवजातीचे अस्तित्व धोक्यात आले आहे. या परिस्थितीला माणूसच कारणीभूत आहे. त्यामुळे मानवजातीच्या रक्षणासाठी सद्यस्थितीत पर्यावरण संवर्धन आणि गांधी विचारांचे आचरण आवश्यक आहे,” असे प्रतिपादन ज्येष्ठ गांधीवादी नेते, विचारवंत डॉ. कुमार सप्तर्षी यांनी केले.
राष्ट्रपिता महात्मा गांधी यांच्या १५१ व्या जयंतीचे औचित्य साधून सूर्यदत्ता ग्रुप ऑफ इन्स्टिट्यूटतर्फे ‘सूर्यदत्ता ग्लोबल पीस रिसर्च फाउंडेशन’ची स्थापना करण्यात आली. या फाउंडेशनच्या माध्यमातून दिला जाणारा पहिला ‘सूर्यदत्ता गांधीयन फिलॉसॉफी अवार्ड २०२०’ डॉ. कुमार सप्तर्षी यांना योगाचार्य डॉ. संप्रसाद विनोद यांच्या हस्ते प्रदान करण्यात आला. कोरोनाच्या पार्श्वभूमीवर हा पुरस्कार सोहळा डॉ. कुमार सप्तर्षी यांच्या कर्वेनगर निवासस्थानी सोशल डिस्टनसिंग आणि इतर नियमाचे पालन करून झाला. प्रसंगी डॉ. उर्मिला सप्तर्षी, सूर्यदत्ता ग्रुप ऑफ इन्स्टिट्यूटचे संस्थापक अध्यक्ष प्रा. डॉ. संजय चोरडिया, सल्लागार सचिन इटकर, कार्यकारी संचालक प्रा. सुनील धाडीवाल, प्रा. अक्षित कुशल, प्रा. रेणुका घोसपुरकर, सिद्धांत चोरडिया, सेवासदनच्या सीमा दाबके आदी उपस्थित होते.
डॉ. कुमार सप्तर्षी म्हणाले, “गांधींना प्रत्यक्षात पाहता आले नाही. परंतु, जयप्रकाश नारायण, एस. एम. जोशी, बाळासाहेब भारदे अशा गुरूंकडून गांधीविचार आत्मसात केला आणि जगलो. ग्रामीण भागात रोजगाराच्या संधी निर्माण करून आत्मनिर्भर भारत करण्याचा संकल्प महात्मा गांधींनी केला होता. म्हणूनच त्यांनी ‘खेड्याकडे चला’ असा संदेश दिला होता. मात्र, आज त्याचा उलट अर्थ घेतला जात आहे. आजही विषमता, अस्पृश्यता, लाचारी अशा गंभीर समस्या आपली पाठ सोडत नाहीत. अशावेळी गांधीविचार प्रत्येक माणसापर्यंत पोहोचवण्याची आणि तो प्रत्यक्षात आणण्याची आवश्यकता आहे. सज्जनांची संख्या वाढवून दुर्जनाची संख्या कमी करायला हवी. गांधींनी सुरु केलेले निसर्गोपचार आजच्या काळातही उपयुक्त ठरत आहेत. अणुबॉम्बसारख्या विनाशकारी निर्मितीवर गांधी विचारांचा उतारा अधिक प्रभावी आहे.”

डॉ. संजय चोरडिया म्हणाले, “सूर्यदत्ता शिक्षण संस्थेने गांधी विचारांना आदर्श मानत गेली दोन दशके कार्य उभारले आहे. आमच्या विद्यार्थी-शिक्षकांमध्ये हे विचार रुजावेत, यासाठी प्रयत्नशील आहोत. गतवर्षी गांधीजींच्या १५० व्या जयंतीनिमित्त सूर्यदत्ताच्या विद्यार्थ्यांनी खास खादीला प्रोत्साहन देण्यासाठी मोठे प्रदर्शन भरवले. खादी संकल्पनेवर फॅशन शो केला. गांधी विचारांतून आणखी प्रभावीपणे विद्यार्थ्यांपर्यंत पोहोचावेत, तसेच हे विचार जगणाऱ्यांचा सन्मान करावा, या उद्देशाने ‘सूर्यदत्ता ग्लोबल पीस रिसर्च फाउंडेशन’ची स्थापना केली आहे.”
डॉ. संप्रसाद विनोद म्हणाले, “स्वओळख झालेले आणि वैचारिक पातळी, अधिष्ठान असलेले असे डॉ. कुमार सप्तर्षी आहेत. त्यांचे कार्य आपल्या सगळ्यांसाठी प्रेरणादायी आहे. आताच्या परिस्थितीत युवापिढीला गांधी विचार पटवून देण्यासाठी विविध उपक्रम राबवायला हवेत. कारण, युवकांमध्ये गांधी विचार रुजले तर देशाच्या जडणघडणीला आकार येईल. या पिढीला दिशा देण्याचे डॉ. सप्तर्षी यांच्यासारख्या गांधीवादी लोकांनी करावे.” डॉ. उर्मिला सप्तर्षी यांनीही आपल्या भावना व्यक्त केल्या. सचिन इटकर यांनी आभार मानले. 

पुणे-यूपी मध्ये सुरु असलेला अत्याचार आणि अनागोंदी कारभाराबाबत पंतप्रधान आणि गृहमंत्री यांना निषेधाची १० हज्जार पत्रे पाठविण्याचा निर्धार राष्ट्रवादी कांग्रेस पार्टी महिला विभागाच्या वतीने करण्यात आला आहे .याबाबतची घोषणा आज येथे नगरसेविका अश्विनी कदम यांनी केली

उत्तर प्रदेश मधील हाथरस शहरा मध्ये एक अल्पवयीन मुलीवर सामूहिक बलात्कार करून तिची हत्या करण्याचा प्रयत्न केला गेला. त्यात तीचा काही दिवसात मृत्यू झाला. पण अजून आरोपी हे जेल बंद झाले नाहीत. आरोपींना लवकरात लवकर कठोर शिक्षा व्हावी व गुन्हेगाराना फाशीची शिक्षा द्यावी यासाठी युपी सरकारचा निषेधार्थ राष्ट्रवादी कांग्रेस पार्टी पर्वती मतदार संघाच्या वतीने दांडेकर फुल येथे आंदोलन करण्यात आले.
नगरसेविका अश्विनी कदम म्हणाल्या राष्ट्रवादी कांग्रेस पार्टी महिला विभागाच्या वतीने पंतप्रधान, केंद्रीय गृहमंत्री तसेच उत्तर प्रदेशचे मुख्यमंत्री यांना 10 हजार पोस्ट कार्ड पाठवून निषेध व्यक्त करणार आहेत. याप्रसंगी केंद्र, यु पी सरकारवर टीका करत भारतामध्ये डॉ. बाबासाहेब आंबेडकर यांनी स्त्री पुरुष सम-समान कायदा देत एक चांगले संविधान या देशाला दिले. स्त्रीला देवीचे रूप दिले आहे आणि याच देशात स्त्री वर अत्याचार होतो याबाबत संताप व्यक्त केला
तर नगरसेविका प्रिया गदादे यांनी मीडियावर आरोप करत अनावश्यक बातम्यांना महत्व देणे देशासाठी मारक आहे.यावेळी नगरसेविका सौ.अश्विनी नितीन कदम , नगरसेविका प्रिया गदादे, दिलीप अरुंदेकर , संतोष नांगरे ,रवी शिंदे, अमोल ननावरे , प्रेम गदादे , डॉ. सुनीता मोरे , मृणालिनी वाणी , प्राजक्ता जाधव,संजय दामोदरे , समीर पवार, संतोष पिसाळ , फारुख शेख , रुपेश आखाडे,प्रशांत कुदळे,वैभव डोळस , संकेत शिंदे, सागर कांबळे उपस्थित होते.

पुणे- पुण्यात  शिवसेना युवासेनेचे पदाधिकारी व दिवंगत माजी नगरसेवकाचे पुत्र दीपक विजय मारटकर (वय ३२) यांचा बुधवार मध्यरात्री बुधवार पेठेतील विजयानंद चित्रपटगृह परिसरात तीक्ष्ण हत्याराने वार करून खून करण्यात आला. या प्रकरणी कस्सून तपास करून आरोपींची पार्श्वभूमी पाहुन मोक्का अंतर्गत कारवाई करावी उसे पत्र  बिधानपरिषदेच्या उपसभापती नीलम गोऱ्हे  यांनी गृहमंत्री अनिल देशमुख यांना दिले आहे.

पोलिसांनी दिलेल्या माहिती नुसार   या खूनामुळे मध्यवस्तीत तणावाचे वातावरण निर्माण झाले होते. पोलिसांनी काही वेळातच यातील मुख्य सूत्रधार असणाऱ्या एका तरुणीसह तिघांना अटक केली आहे. तर इतरांचा शोध घेतला जात आहे. अश्विनी कांबळे, महेंद्र सराफ आणि निरंजन मकाळे यांना अटक केली आहे. तर, सनी कोलते, संदीप कोलते, रोहित कांबळे, राहुल रागीर व इतर दोघांवर फरासखाना पोलीस ठाण्यात खुनाचा गुन्हा दाखल करण्यात आला आहे.याप्रकरणी मारटकर यांचे मेहुणे राहुल भगवान आलमखाने (वय ४३,रा. गवळी आळी, विजयानंद चित्रपटगृहाजवळ, बुधवार पेठ) यांनी फिर्याद दिली आहे.

महापालिका निवडणुकीत विजय मारटकर यांनी बुधवार पेठ भागातून शिवसेनेकडून निवडणूक लढविली होती. त्यावेळी अश्विनी कांबळे हिने सुद्धा बहुजन समाज पार्टीकडून या भागातून निवडणुक लढविली होती. त्यावेळी कांबळे व मारटकर यांच्यात वाद झाला होता. दरम्यान, आरोपी महेंद्र सराफ याच्या बरोबर मारटकर यांचा वाद झाला होता. तर काही महिन्यांपूर्वी दीपक मारटकर यांना आरोपींनी धमकावले होते. चार दिवसांपूर्वी दीपक यांनी फरासखाना पोलीस ठाण्यात या प्रकाराची माहिती दिली होती. गुरूवारी (१ ऑक्टोबर) मध्यरात्री सव्वा बाराच्या सुमारास मारटकर जेवण करून गवळी आळी परिसरात थांबले होते. त्यावेळी दबा धरून बसलेले हल्लेखोर दुचाकीवरून आले. मारटकर यांच्यावर तीक्ष्ण शस्त्राने वार करण्यास सुरूवात केली. तीक्ष्ण शस्त्राने ४७ वार केले. यात मारटकर गंभीर जखमी झाले. त्यांना तात्काळ खासगी रूग्णालयात दाखल करण्यात आले. मात्र उपचारादरम्यान त्यांचा पहाटे मृत्यू झाला.

माहिती मिळताच पोलीस उपायुक्त स्वप्ना गोरे, सहाय्यक आयुक्त मिलींद पाटील, फरासखाना पोलीस ठाण्याचे वरिष्ठ निरीक्षक जगन्नाथ कळसकर, गुन्हे शाखेचे निरीक्षक दादासाहेब गायकवाड यांनी घटनास्थळी भेट दिली. दरम्यान याची माहिती वाऱ्या सारखी पसरली. त्यावेळी परिसरात तणावाचे वातावरण निर्माण झाले होते. हल्लेखोरांना पकडण्यासाठी प्रयत्न सुरू असून पथके रवाना केली असल्याचे सांगण्यात आले.

मारटकर यांचा खूनानंतर सर्वपक्षीय पदाधिकारी व कार्यकर्ते फरासखाना पोलीस ठाण्यात जमले होते. शिवसेना शहर प्रमुख संजय मोरे, अजय भोसले, प्रशांत बधे, नगरसेवक विशाल धनवडे, गजानन पंडीत, राजेंद्र शिंदे, भारतीय जनता पक्षाचे प्रमोद कोंढरे, रिपब्लीकन पक्षाचे मंदार जोशी, राष्ट्रवादीचे अजय दराडे, गणेश नलावडे, मनसेचे वसंत मोरे, रूपाली पाटील ठोंबरे, आशिष साबळे आदींनी पोलीस उपायुक्त गोरे यांची भेट घेतली. हल्लेखोरांवर कठोर कारवाईची मागणी निवेदनाद्वारे करण्यात आली.

• प्रा. डॉ. विश्वनाथ कराड लिखित ‘फे्रन्डस, यू मे बिलिव्ह इट ऑर नॉट’ या पुस्तकाचे प्रकाशन

पुणे, 2 ऑक्टोबर: “ संत ज्ञानेश्वर महाराज व संत तुकाराम महाराज यांनी ज्ञान आणि वैराग्य काय आहे हे सांगितले. त्याच ज्ञानाच्या आधारेच मानवला आत्मज्ञानाची अनुभूती येते. ज्ञानेश्वरांनी सांगितलेले विश्वात्मक तत्वेच हे जगाला शांतीचा मार्ग दाखवेल. व्यक्ति, समष्ठी, सृष्टी आणि प्रकृती या गोष्टी जीवनात अत्यंत महत्वाच्या आहेत. मानवी जीवन सार्थ करण्यासाठी आत्मचिंतनाबरोबरच भक्ती व तपश्चर्या गरजेची आहे.” असे विचार श्रीराम जन्मभूमी तीर्थक्षेत्राचे खजिनदार स्वामी गोविंददेव गिरीजी महाराज यांनी व्यक्त केले.
एमआयटी वर्ल्ड पीस युनिव्हर्सिटी, पुणेतर्फे राष्ट्रपिता महात्मा गांधी यांच्या जयंतीचे औचित्य साधून एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्वनाथ दा. कराड लिखित ‘फे्रन्डस, यू मे बिलिव्ह इट ऑर नॉट’ या पुस्तकाचे प्रकाशन गोविंददेव गिरीजी महाराज, सुप्रसिद्ध विद्वान व साधक स्वामी योगी अमरनाथ व जगप्रसिद्ध संगणक तज्ज्ञ पद्मभूषण डॉ. विजय भटकर यांच्या हस्ते करण्यात आले. त्यावेळी प्रमुख पाहुणे म्हणून ते बोलत होते.
या प्रसंगी पद्मविभूषण डॉ. विरेंद्र हेगड हे सन्माननीय अतिथि म्हणून उपस्थित होते. तसेच, एमआयटी वर्ल्ड पीस युनिव्हर्सिटीचे संस्थापक अध्यक्ष प्रा.डॉ. विश्वनाथ दा. कराड, कार्याध्यक्ष राहुल विश्वनाथ कराड, एमआयटी एडीटी युनिव्हर्सिटीचे कार्याध्यक्ष प्रा.डॉ. मंगेश तु. कराड, एमआयटी डब्ल्यूपीयूचे कुलगुरू डॉ.एन.टी.राव, प्र कुलगुरू प्रा.डॉ. मिलिंद पांडे, प्रा.डी.पी. आपटे, डॉ. आर.एम. चिटणीस, प्रा. पुष्पिता अवस्थी, मिटसॉग व पब्लिक पॉलिसीचे वरिष्ठ संचालक रविंद्रनाथ पाटील व वर्ल्ड पीस डोमचे संचालक दर्शन मुंदडा हे उपस्थित होते.
स्वामी गोविंदगिरी महाराज म्हणाले,“ डॉ. विश्वनाथ दा. कराड यांनी शिक्षण, मानवी हक्क, शांतता अभ्यास, विज्ञान आणि अध्यात्म इत्यादी विविध विषयांवर बरेच पुस्तक लिहिले आहे. त्यांच्या पुस्तकामध्ये जगभर पसरलेली नैतिकता सापडेल. जागतिक शांततेचा संदेश देणारी सार्वभौम शांतता आणि सौहार्दाच्या शोधात मानवाधिकार, मानवी मूल्ये आणि सामाजिक बदल दिसेल. डॉ. कराड यांची सर्वात प्रेरणादायक बाब म्हणजे त्यांनी जागतिक शांतता आणि त्यांचे राष्ट्रीय कर्तव्य यावर पुस्तके लिहिणे सुरूच ठेवले आहे. त्यांचे जीवन जसे आहे तसेच पुस्तके ही प्रेरणादायी आहेत.”
डॉ. विजय भटकर म्हणाले,“ डॉ. कराड यांनी उत्तम पुस्तक लिहिले आहे. भगवद गीता, स्वामी विवेकानंद, संत ज्ञानेश्वर यांनी मानव कल्याणाचा उपदेश केला आहे. त्याच तत्वाचा मानव कल्याणसाठी कसा उपयोग करता येईल हे त्यांनी पुस्तकात नमूद केले आहे. हे पुस्तक कल्पनाकरू शकत नाही अशा प्रकारचे आहे. यातून संपूर्ण मानवजातीला विश्वात्मक संदेश दिला जाईल. निसर्गाचे चक्र सतत विस्तार पावत आहे. हे सर्व कोण घडवित आहे. हे एक गुह्य आहे.”
स्वामी योगी अमरनाथ म्हणाले,“ साधना, तपस्चर्या आणि भक्ती या गोष्टी मानवला परमांनद देतात. या सृष्टीवर साधनेशिवाय काहीच साध्य होऊ शकत नाही. तसेच समर्पण भाव व निष्काम कर्म करीत राहिल्यास मानवाचे उत्थान होते.”  
प्रा.डॉ. विश्वनाथ दा. कराड म्हणाले,“ संत ज्ञानेश्वरांनी 730 वर्षापूर्वी ज्ञानतत्व, विश्वात्मक तत्व सांगितले जे सर्व धर्मासाठी लागू होतात. हे गुपित तत्व आज प्रत्येक मानवासाठी महत्वपूर्ण आहेत. कोरोना व्हायरसच्या काळात हे तत्वे मानवाला सुख, समाधान आणि शांती देईल.”
राहुल कराड यांनी स्वागत पर भाषण केले. प्रा.डॉ. मिलिंद पांडे यांनी पुस्तकाची पार्श्वभूमी सांगितली.
प्रा.गौतम बापट यांनी सूत्रसंचालन व प्रा.डॉ. आर.एम. चिटणीस यांनी आभार मानले.

पुणे : माँ आशापुरा चॅरिटेबल ट्रस्ट, लायन्स क्लब ऑफ पूना गणेशखिंड, लायन्स क्लब ऑफ पुणे विजयनगर यांच्या संयुक्त विद्यमाने होम क्वारंटाईन आणि लक्षणे नसलेल्या रुग्णांसाठी औषध किट वाटप उपक्रमाचा शुभारंभ करण्यात आला. पुणे महानगर पालिकेचे आयुक्त विक्रमकुमार यांच्या हस्ते या औषधे किट वाटप सुरुवात झाली. या औषधांच्या किटमध्ये १५ दिवसांचे डॉक्टरांनी सुचवलेल्या गोळ्या आहेत. जवळपास औषधांच्या ५००० किटचे वाटप केले जाणार आहे. यंदाचा नवरात्र महोत्सव टाळून आशापुरा मंदिराच्या माध्यमातून हा उपक्रम राबविण्यात येत आहे.
यावेळी महाराष्ट्र प्रदेश काँग्रेस कमिटीचे सरचिटणीस अभय छाजेड, माँ आशापुरा मंदिर ट्रस्टचे अध्यक्ष विजय भंडारी, पुणे चॅप्टरचे अध्यक्ष ओमप्रकाश रांका, राजेश सांकला, इंदर छाजेड, मंगेश कटारिया, हेमंत रायसोनी, अशोक भंडारी, लायन्स क्लब ऑफ पूना गणेशखिंडचे अध्यक्ष  लायन्स ज्योतिकुमार अगरवाल, लायन्स क्लब ऑफ पुणे विजयनगरचे अविनाश शहाणे, सामाजिक सेवा उपक्रम प्रमुख राजेंद्र गोयल, समन्वयक शाम खंडेलवाल आदी उपस्थित होते.

पुणे विभागातील 4 लाख 40 हजार 681 कोरोना बाधित रुग्ण बरे होऊन घरी गेले,
विभागात कोरोना बाधित 3 लाख 59 हजार 462 रुग्ण
-विभागीय आयुक्त सौरभ राव

पुणे, दि.2 :- पुणे विभागातील 4 लाख 40 हजार 681 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 3 लाख 59 हजार 462 झाली आहे. तर ॲक्टीव रुग्ण संख्या 69 हजार 578 इतकी आहे. कोरोनाबाधीत एकुण 11 हजार 641 रुग्णांचा मृत्यू झाला असून मृत्यूचे प्रमाण 2.64 टक्के आहे. पुणे विभागामध्ये बऱ्या होणा-या रुग्णांचे प्रमाण 81.57 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा
पुणे जिल्हयातील कोरोना बाधीत एकूण 2 लाख 86 हजार 677 रुग्णांपैकी 2 लाख 42 हजार 180 रुग्ण बरे होवून घरी गेले आहेत. ॲक्टीव रुग्ण संख्या 38 हजार 10 आहे. कोरोनाबाधित एकूण 6 हजार 487 रुग्णांचा मृत्यू झाला आहे. मृत्यूचे प्रमाण 2.26 टक्के इतके आहे तर बरे होणा-या रुग्णांचे प्रमाण 84.48 टक्के आहे.

सातारा जिल्हा
सातारा जिल्हयातील कोरोना बाधीत एकूण 37 हजार 812 रुग्णांपैकी 28 हजार 60 रुग्ण बरे होवून घरी गेले आहेत. ॲक्टीव रुग्ण संख्या 8 हजार 592 आहे. कोरोनाबाधित एकूण 1 हजार 160 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 33 हजार 954 रुग्णांपैकी 25 हजार 807 रुग्ण बरे होवून घरी गेले आहेत. ॲक्टीव रुग्ण संख्या 6 हजार 980 आहे. कोरोनाबाधित एकूण 1 हजार 167 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 37 हजार 339 रुग्णांपैकी 28 हजार 886 रुग्ण बरे होवून घरी गेले आहेत. ॲक्टीव रुग्ण संख्या 7 हजार 80 आहे. कोरोनाबाधित एकूण 1 हजार 373 रुग्णांचा मृत्यू झाला आहे.
कोल्हापूर जिल्हा
कोल्हापूर जिल्हयातील कोरोना बाधीत एकूण 44 हजार 899 रुग्णांपैकी 34 हजार 529 रुग्ण बरे होवून घरी गेले आहेत. ॲक्टीव रुग्ण संख्या 8 हजार 916 आहे. कोरोनाबाधित एकूण 1 हजार 454 रुग्णांचा मृत्यू झाला आहे

कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 4 हजार 462 ने वाढ झाली आहे. यामध्ये पुणे जिल्ह्यात 2 हजार 656, सातारा जिल्ह्यात 512, सोलापूर जिल्ह्यात 465, सांगली जिल्ह्यात 525 तर कोल्हापूर जिल्ह्यात 304 अशी रुग्ण संख्येमध्ये वाढ झालेली आहे.
पुणे विभागामध्ये ब-या होणा-या रुग्णांमध्ये एकूण 6 हजार 265रुग्णांचा समावेश आहे. यात पुणे जिल्हा 3 हजार 768, सातारा 602, सोलापूर 641, सांगली 789 व कोल्हापूर जिल्हयामध्ये 465 अशा रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 19 लाख 36 हजार 619 नमून्याचा तपासणी अहवाल प्राप्त झाला. प्राप्त अहवालांपैकी 4 लाख 40 हजार 681 नमून्यांचा अहवाल सकारात्मक (पॉझिटिव्ह) आहे.

( टिप :- दि. 1 ऑक्टोबर 2020 रोजी रात्री 9.00 वा. पर्यंतच्या आकडेवारीनुसार )

• आतापर्यंत 61 लाख 5 हजार 305 नागरिकांची तपासणी – जिल्हाधिकारी डॉ. राजेश देशमुख यांची माहिती

पुणे, दि.2 :- कोरोनाचा संसर्ग रोखण्याच्या दृष्टीन ‘माझे कुटुंब माझी जबाबदारी’ मोहिम राज्यभर राबविण्यात येत आहे. राज्याचे उपमुख्यमंत्री तथा पुणे जिल्हयाचे पालकमंत्री अजित पवार यांच्या सूचनेनुसार पुणे जिल्हयात घरोघरी सर्वेक्षणावर भर देवून ही मोहिम प्रभावीपणे राबविण्यात येत आहे. या सर्वेक्षणात आतापर्यंत 61 लाख 5 हजार 305 नागरिकांची तपासणी करण्यात आली असून 32 हजार 368 नागरिक कोरोना संशयित आढळून आले आहेत. यातील 28 हजार 300 नागरिक संदर्भित करण्यात आले असून 3 हजार 841 नागरिक कोरोना बाधित आढळून आल्याची माहिती जिल्हाधिकारी डॉ. राजेश देशमुख यांनी दिली.
‘माझे कुटुंब माझी जबाबदारी’ मोहिमे अंतर्गत पुणे महानगरपालिका क्षेत्रात 16 लाख 37 हजार 86 नागरिकांची, पिंपरी चिंचवड महानगरपालिका क्षेत्रातील 18 लाख 79 हजार 217 नागरिकांची तर ग्रामीण भागातील 25 लाख 89 हजार 2 अशा एकूण 61 लाख 5 हजार 305 नागरिकांची तपासणी करण्यात आली आहे. पुणे महानगरपालिका क्षेत्रात 7 हजार 60 संशयित नागरिक सापडले आहेत, पिंपरी चिंचवड महानगरपालिका क्षेत्रात 2 हजार 400, ग्रामीण भागात 22 हजार 908 असे एकूण 32 हजार 368 एवढे कोरोना संशयित नागरिक सापडले आहेत.
पुणे महानगरपालिका क्षेत्रात 6 हजार 984 नागरिक, पिंपरी चिंचवड महानगरपालिका क्षेत्रातील 1 हजार 516 नागरिक तर पुणे ग्रामीण भागात 19 हजार 800 असे एकूण 28 हजार 300 नागरिक संदर्भित करण्यात आले आहेत. या मोहिमेंतर्गत केलेल्या सर्वेक्षणा दरम्यान पुणे महानगरपालिका क्षेत्रात 780 कोरोना बाधित आढळून आले आहेत. तर पिंपरी चिंचवड महानगरपालिका क्षेत्रात 286, पुणे ग्रामीण भागात 2 हजार 775 असे एकूण 3 हजार 841 कोरोना बाधित नागरिक आढळून आले आहेत. जिल्हयातील ग्रामीण भागात एकूण 574 गावांचे सर्वेक्षण झाले असल्याचेही जिल्हाधिकारी डॉ.देशमुख यांनी सांगितले आहे.