पुणे : अग्रवाल परिवार आणि लायन्स क्लब ऑफ पूना गणेशखिंड यांच्या वतीने गणेश पेठ परिसरातील बोरा हॉस्पिटल कोविड सेंटरला व्हेंटिलेटर मशीन भेट देण्यात आले. लायन्स क्लब इंटरनॅशनलचे प्रांतपाल लायन अभय शास्त्री व अग्रवाल कुटुंबियांच्या हस्ते हे व्हेंटिलेंटर मशीन हॉस्पिटलचे डॉ. महेश बोरा यांच्याकडे सुपूर्त करण्यात आले.
प्रसंगी लायन्स क्लब ऑफ पुना गणेशखिंडचे अध्यक्ष ज्योतिकुमार अगरवाल, अग्रवाल परिवारातील जगदीशप्रसाद अग्रवाल, उद्योजक श्याम अग्रवाल व विजय अग्रवाल जगदीशप्रसाद अग्रवाल, उद्योजक श्याम अग्रवाल व विजय अग्रवाल, लायन्स क्लब ऑफ पूना गणेशखिंडचे विजय भंडारी, द्वारका जालान, श्याम खंडेलवाल, महेंद्र गादिया, अजय जैन, कुरेश पोलन, कांतीलाल पालेशा, राकेश मित्तल आदी पदाधिकारी उपस्थित होते.
लायन्स अभय शास्त्री म्हणाले, “कोरोना महामारीचा सामना करताना गरजुंसाठी मदतीचा हात पुढे करण्यात येतोय, ही बाब सकारात्मक आहे. आजच्या परिस्थितीत रुग्णालयाकरीता व्हेंटिलेटर खूप गरजेची गोष्ट आहे. अग्रवाल परिवार यांनी व्हेंटिलेटर मशीन भेट देत माणुसकीचे काम केले आहे. लायन्स क्लब गणेशखिंडच्या माध्यमातून निरनिराळे सामाजिक उपक्रम राबवले जात आहेत. क्लबमधील सर्व सभासद यामध्ये मनापासून सहभागी होत आहेत, हे पाहून आनंद होतो.”
डॉ. महेश बोरा म्हणाले, “हॉस्पिटलच्या कोविड सेंटरला व्हेंटिलेटर भेट दिल्याबद्दल अग्रवाल परिवार आणि लायन्स क्लब ऑफ पूना गणेशखिंडचा आभारी आहे. गेल्या सहा-सात महिन्यापासून सर्व डॉक्टर, नर्स, इतर कर्मचारी मेहनत घेत काम करत आहे. रुग्णाला बरे करण्यासाठी झटत आहेत. रुग्णांना उपचार करताना व्हेंटिलेटर मशीनचा खूप उपयोग होईल.” द्वारका जालान यांनी आभार मानले. यावेळी येथील नियोजन पाहणारे, तसेच डॉक्टर्स यांचा सत्कार मान्यवरांच्या हस्ते करण्यात आला.

पुणे- वैद्यकीय महाविद्यालयासाठी पुण्यातील ऐतिहासिक नायडू रुग्णालय स्थलांतरित करणार असल्याच्या बातम्या ..खोट्या असल्याचा दावा करणाऱ्या महापौरांना आता त्यांच्या सत्तेत सहभागी झालेल्या आरपीआय आठवले गटाने हि टोला लगावला आहे. आणि ..खबरदार नायडूला धक्का लावू देणार नाही … अशी भूमिका आज जाहीर केली आहे पुण्यातील गोरगरीब आणि मध्यमवर्गीयांना परवडणारे नायडू हॉस्पिटल अन्यत्र स्थलांतरित करून तेथे वैद्यकीय महाविद्यालय उभारण्याची प्रशासनाची तयारी सुरु असल्याचा दावा करत रिपब्लिक पार्टी ऑफ इंडियाने (आठवले गट)यांनी त्यास तीव्र विरोध केला आहे.
पुण्यातील नायडू हॉस्पिटल हे ब्रिटिशांच्या काळातील असून तेथे सर्व संसर्गजन्य आजारावर उपचार केले जातात. राज्याच्या कानाकोपऱ्यातून नागरिक येथे येतात. सर्वसामान्य नागरिक आणि गोरगरिबांसाठी हे हॉस्पिटल अत्यंत उपयुक्त ठरले आहे. कोरोनाच्या काळात नुकताच त्याचा अनुभव शेकडो नागरिकांना आला आहे.
पुणे महानगरपालिकेने नुकतेच तेथे स्व. अटलबिहारी वाजपेयी हे वैद्यकीय महाविद्यालय सुरु करण्याचा निर्णय घेतला आहे. त्यासाठी बांधकाम देखील सुरु केले. आर. पी आय (आठवले गटाने) याला तीव्र विरोध दर्शविला आहे. महापालिकेतील आर.पी.आय च्या पक्षनेत्या सुनीता वाडेकर, उपमहापौर आणि नगरसेवक सिदार्थ धेंडे ,घोले रोड प्रभाग समितीच्या अध्यक्षा सोनाली लांडगे ,नगरसेविका हिमाली कांबळे यांनी प्रसिद्धीस दिलेल्या पत्रकात म्हंटले आहे कि ,शहरात अन्यत्र ओपन स्पेस उपलब्ध असताना याच जागेचा अट्टाहास सत्ताधारी भाजपच्या लोकप्रतिनिधींना का व्हावा. नैसर्गिक आपत्ती तसेच साथीच्या आजारांच्या काळात हे रुग्णालय गरिबांसाठी वरदान ठरले आहे. आर.पी आय ( आठवले गट) पक्षाचा वैदकीय महाविद्यालयाला विरोध नाही परंतु ते अन्यत्र स्थलांतरित करावे अशी मागणी त्यांनी केली असून त्यासाठी रस्त्यावर उतरून आंदोलन करण्याची तयारी दर्शवली आहे.

पुणे, :-पुणे जिल्हा शिक्षक व पदवीधर मतदार संघाची निवडणूक-२०२० साठी निश्चित करण्यात आलेल्या प्रारूप मतदान केंद्रांच्या यादीबाबत उप जिल्हा निवडणूक अधिकारी मृणालिनी सावंत यांच्या अध्यक्षतेखाली बैठक घेण्यात आली. यावेळी तहसीलदार प्रशांत पिसाळ, विविध राजकीय पक्षांचे प्रतिनिधी, शिक्षक आणि पदवीधर संघटनेचे पदाधिकारी उपस्थित होते. पुणे जिल्हा शिक्षक व पदवीधर मतदार संघाच्या प्रारूप मतदान केंद्रांची यादी जिल्हाधिकारी कार्यालय, जिल्हाधिकारी कार्यालयाचे संकेतस्थळ pune.nic.in उपविभागीय अधिकारी, तहसिल कार्यालय यांच्या नोटीस बोर्डवर दिनांक १५ ऑक्टोबर २०२० रोजी प्रसिद्ध करण्यात आली आहे. ही यादी निरीक्षणासाठी तसेच मतदारांना पाहण्यासाठी उपलब्ध करून देण्यात आलेली आहे. प्रारूप मतदान केंद्राच्या यादीबाबत पुणे जिल्हाच्या हद्दीतील हरकती व सूचना असल्यास त्या प्रारूप मतदान केंद्रांची यादी प्रसिद्ध झाल्याच्या दिनांक पासून ७ दिवसांपर्यंत म्हणजे दिनांक २२ऑक्टोबर २०२० पर्यंत जिल्हाधिकारी तथा जिल्हा निवडणूक अधिकारी पुणे यांच्याकडे पाठवाव्यात.

पुणे,: महात्मा ज्योतिबा फुले जनआरोग्य योजनेचा कोविड रुग्णांना लाभ न देणाऱ्या रुग्णालयांची या योजनेची मान्यता रद्द करुन त्याऐवजी अन्य रुग्णालयांचा समावेश करण्याची शिफारस राज्य आरोग्य हमी सोसायटीकडे करण्यात येणार असल्याचे जिल्हाधिकारी डॉ. राजेश देशमुख यांनी सांगितले.
महात्मा ज्योतिबा फुले जनआरोग्य योजनेची आढावा बैठक जिल्हाधिकारी डॉ. देशमुख यांच्या अध्यक्षतेखाली जिल्हाधिकारी कार्यालयात घेण्यात आली, यावेळी ते बोलत होते. बैठकीला जिल्हा आरोग्य अधिकारी डॉ. भगवान पवार, जिल्हा शल्यचिकित्सक डॉ. अशोक नांदापूरकर, योजनेचे जिल्हा समन्वयक डॉ. सागर पाटील तसेच इंडियन मेडिकल असोसिएशनचे प्रतिनिधी व समिती सदस्य उपस्थित होते.
महात्मा ज्योतिबा फुले जनआरोग्य योजनेंतर्गत कामकाजाचा सविस्तर आढावा घेऊन जिल्हाधिकारी डॉ. देशमुख म्हणाले, जिल्ह्यातील कोविड व नॉन कोविडच्या हजारो रुग्णांना आतापर्यंत या योजनेचा लाभ मिळाला आहे. काही रुग्णालये योजनेचा लाभ मिळवून देण्यात टाळाटाळ करत असल्याचे आढळून येत आहे. या योजनेचे काम न केल्यामुळे मान्यता रद्द करण्यात येणाऱ्या रुग्णालयांची चौकशी करुन जिल्हा प्रशासनाकडे अहवाल सादर करा, अशा सूचना जिल्हाधिकारी डॉ देशमुख यांनी दिल्या. अधिकाधिक रुग्णांना योजनेचा लाभ मिळवून देणाऱ्या रुग्णालयांच्या कामाचे कौतुक करुन अशा रुग्णालयांना प्रोत्साहन द्यावे,असेही त्यांनी इंडियन मेडिकल असोसिएशन व समिती सदस्यांना सांगितले.
महात्मा ज्योतिबा फुले जनआरोग्य योजनेचा लाभ देण्यात येणारी रुग्णालये व त्यांनी रुग्णांना दिलेला लाभ यांची आकडेवारी, आतापर्यंतचे एकूण लाभार्थी याबाबतची माहिती घेवून जिल्हाधिकारी डॉ. देशमुख म्हणाले, महात्मा ज्योतिबा फुले जनआरोग्य योजनेचा लाभ जास्तीत जास्त रुग्णांना मिळवून देण्यासाठी समितीने प्रभावीपणे काम करावे. या कामी इंडियन मेडिकल असोसिएशनचे सहकार्य महत्वाचे आहे. समाजात डॉक्टरांना मानाचे स्थान दिले जाते. डॉक्टरांनीही समाजासाठी सेवाभावी वृत्तीतून आरोग्य सेवा द्यायला हवी,असेही त्यांनी सांगितले.
जिल्हा शल्यचिकित्सक डॉ. अशोक नांदापूरकर व जिल्हा आरोग्य अधिकारी डॉ. भगवान पवार यांनी योजनेच्या अनुषंगाने येणाऱ्या तक्रारींचे जलदगतीने निराकरण करुन योजनेची अंमलबजावणी करण्यात येईल असे सांगितले.
सागर पाटील यांनी योजने अंतर्गत हॉस्पिटल, लाभार्थी रुग्ण व अन्य अनुषंगिक माहिती दिली.
अधिकाधिक रुग्णांना महात्मा ज्योतिबा फुले जनआरोग्य योजनेचा लाभ मिळवून देण्यासाठीच्या उपाययोजनांबाबत इंडियन मेडिकल असोसिएशनचे प्रतिनिधी व समिती सदस्यांनी बैठकीत चर्चा केली.

पुणे- महानगरपालिकेने शहराच्या एकूण बजेट च्या ५% रक्कम अपंगांसाठी खर्च करण्याचे बंधन असून ते होताना दिसत नाही,त्यासाठी व नौकरी मधे ४% दिव्यांगांना संधी मिळावी यासाठी आगामी काळात आपल्याला संघर्ष करावा लागेल.असे वक्तव्य येथे क्रिएटिव्ह फौंडेशन आणि एनॅब्लर चॅरिटेबल ट्रस्ट ह्या संस्थांनी दिव्यांगां साठी आयोजित केलेल्या कार्यक्रमात भाजपचे प्रदेशाध्यक्ष आणि कोथरूड चे आ. चंद्रकांत दादा पाटील यांनी येथे केले आहे. समाजात सातत्याने सेवाकार्य करत राहायचे ही राष्ट्रीय स्वयंसेवक संघाची शिकवण असून त्या संस्कारांमुळेच पंतप्रधान नरेंद्र मोदी यांनी त्यांचा वाढदिवस सेवा सप्ताह म्हणून साजरा करण्यात आला असे ते येथे म्हणाले

यावेळी क्रिएटिव्ह चे अध्यक्ष संदीप खर्डेकर,नगरसेविका मंजुश्री खर्डेकर,एनॅब्लर चॅरिटेबल ट्रस्टचे अमोल शिनगारे,नेचरवॉक चे अनुज खरे,नगरसेवक दीपक पोटे,नगरसेवक जयंत भावे,नगरसेविका माधुरीताई सहस्त्रबुद्धे,कोथरूड मंडल अध्यक्ष पुनीत जोशी,शहर चिटणीस प्रशांत हरसुले,महिला आघाडी अध्यक्ष हर्षदा फरांदे,कोथरूड मंडल सरचिटणीस गिरीश भेलके व अनुराधा एडके,उपाध्यक्ष राज तांबोळी,प्रभाग १३ चे अध्यक्ष राजेंद्र येडे व इतर मान्यवर उपस्थित होते.

यावेळी आ.पाटील म्हणाले या कार्यक्रमाचे मी जाहीर कौतुक करतो.पंतप्रधान नरेंद्र मोदी यांचे हे स्वप्न आहे की या देशात कोणीही मागून पोट भरु नये तर कष्ट करुन पोट भरावे,त्यासाठी त्यांनी आत्मनिर्भर भारत ची घोषणा केली आहे व तसे नियोजन केले आहे असे ही चंद्रकांतदादा पाटील म्हणाले नरेंद्रभाई गुजरातचे मुख्यमंत्री असताना त्यांना मिळालेल्या सर्व भेटवस्तुंचा लिलाव आयोजित करायचे,अनेक धनिक व दानशूर व्यक्ती त्या वस्तू  खरेदी करत असत व त्यातून उभ्या राहणाऱ्या निधीतून मोदीजी गरजूंना मदत करत असत,यातूनच त्यांनी स्त्रीयांसाठीची शाळा उभी केली व दिव्यांगांना स्वयं पूर्ण करण्यासाठीचे अनेक उपक्रम राबवले.अहमदाबाद येथील संस्कारधाम ही स्त्री शिक्षणासाठी उभारलेली संस्था सर्वांनीच अनुभवावी अशी असल्याचे ही ते म्हणाले.त्यालाच अनुसरून त्यांच्या वाढदिवसाच्या निमित्ताने सेवा सप्ताहांतर्गत अनेक कार्यक्रमांचे नियोजन झाले
दिव्यांग व्यक्तीस सहानुभूतीची नव्हे तर स्वतःच्या पायावर उभे राहण्यासाठी बळ देण्याची व त्यांचे मनोबल वाढविण्यासाठी कार्य करण्याची गरज असून क्रिएटिव्ह फौंडेशन त्यादृष्टीने काम करत आहे.येणाऱ्या काळात दिव्यांगांना आत्मनिर्भर करण्याच्या दृष्टीने उपक्रम राबविले जातील असे क्रिएटिव्ह फौंडेशनचे अध्यक्ष संदीप खर्डेकर म्हणाले.तसेच विविध उद्योगां मधे दिव्यांगां साठी ४% जागा राखीव असून त्या जागांवर दिव्यांगांनाच नौकरी मिळावी यासाठी प्रयत्न करण्याची गरज असल्याचे ही संदीप खर्डेकर म्हणाले.एनॅब्लर चॅरिटेबल ट्रस्ट ही दिव्यांगां साठी काम करणारी संस्था असून दिव्यांगांचे प्रश्न सोडवण्यासाठी कार्यरत आहे, पण कोरोनाच्या संकटकाळी दिव्यांगांना अनेक अडचणींना तोंड द्यावे लागले असून आजच्या कार्यक्रमातून त्यांना दसरा दिवाळी साठी उपयुक्त शिधा देउन एक छोटीशी मदत करत आहोत असेही ते म्हणाले.यावेळी पुनीत जोशी यांच्या वतीने कर्वेनगर येथील जिम मधे उकडलेली अंडी विकून उदरनिर्वाह करणाऱ्या दिव्यांग उल्हास जौंजाळ या बांधवास व्हील चेयर भेट देण्यात आली.तर क्रिएटिव्हच्या वतीने चहा विक्री करुन उदरनिर्वाह करु पाहणाऱ्या संतोष भालेराव या दिव्यांग मित्रास चहाचा मोठा थर्मास भेट देण्यात आला.हा धागा पकडून आमदार चंद्रकांतदादा पाटील यांनी सांगितले की महानगरपालिकेने शहराच्या एकूण बजेट च्या ५% रक्कम अपंगांसाठी खर्च करण्याचे बंधन असून ते होताना दिसत नाही,त्यासाठी व नौकरी मधे ४% दिव्यांगांना संधी मिळावी यासाठी आगामी काळात आपल्याला संघर्ष करावा लागेल.कारण तसे झाल्यास दिव्यांग बेरोजगार राहणार नाहीत व स्वावलंबी होतील.तसेच उपस्थितांना मार्गदर्शन करताना चंद्रकांतदादांनी नरेंद्र भाई मोदी यांचे वक्तव्य सांगितले की राजकारण करत असताना किंवा लोकप्रतिनिधी म्हणून निवडून आल्यावर मिळणाऱ्या निधीचा विनियोग हा समाजोपयोगी विकासासाठीच व्हावा तसेच तुम्ही जिथे कुठे आहात तिथे कोणी अडचणीत नाही ना हे बघावे असे ही ते म्हणाले.
मंजुश्री खर्डेकर यांनी समाजातील सर्व घटकांना न्याय मिळावा यासाठी मी माझ्या पदाचा वापर करत असून राजकारणापेक्षा सामाजिक कार्यात जास्त समाधान मिळते व पदाचा वापर हा गरजूंसाठी करता येतो हे स्पष्ट करतानाच दिव्यांगां साठी सर्वतोपरी मदत करेन असेही त्या म्हणाल्या.
मंजुश्री खर्डेकर व अमोल शिनगारे यांनी प्रास्ताविक,संदीप खर्डेकर यांनी सूत्रसंचालन तर अनुज खरे यांनी आभार प्रदर्शन केले.