मुंबई दि. 31 : संत सेवालाल महाराजांचे वंशज, बंजारा समाजाचे धर्मगुरू डॉ. रामराव बापू महाराज यांच्या निधनाचे वृत्त दुःखद असून, मला त्यांचे सान्निध्य, आशीर्वाद लाभले हे माझे भाग्य आहे; अशा शब्दात राज्याचे सामाजिक न्याय व विशेष सहाय्य मंत्री धनंजय मुंडे यांनी डॉ. रामराव बापू महाराजांना श्रद्धांजली अर्पण केली आहे.

डॉ. रामराव बापू महाराज यांना कर्नाटकातील गुलबर्गा विद्यापीठातून डी. लिट. पदवी देऊन सन्मानित केले होते. त्यांनी आयुष्यभर समाजातील अनिष्ट रूढी – परंपरा, बालविवाह, अंधश्रद्धा विरोधात समाज प्रबोधनाच्या माध्यमातून वैचारिक चळवळ उभी केली. केवळ बंजारा समाजच नव्हे तर संपूर्ण मानव जातीच्या कल्याणासाठी सुधारणावादी विचारांनी महाराजांनी संत सेवालाल महाराजांचा वारसा समर्थपणे चालवला.

श्री . मुंडे यांनी डॉ. रामराव बापूंच्या स्मृतींना उजाळा दिला. महाराजांना वाशिम येथील पोहरादेवी तीर्थ क्षेत्रासह अनेक ठिकाणी भेटून त्यांचे आशीर्वाद घेतले, त्यांचे सान्निध्य लाभले हे माझे भाग्यच म्हणावे लागेल असेही धनंजय मुंडे यांनी आपल्या शोकसंदेशात म्हटले आहे. नुकतेच मुंबई येथील रुग्णालयात उपचार सुरू असताना धनंजय मुंडे यांनी त्यांची रुग्णालयात जाऊन भेट घेत तब्येतीची विचारपूस केली होती.

डॉ. रामराव बापू महाराजांच्या निधनाने अध्यात्मिक व सामाजिक क्षेत्राची मोठी हानी झाली असून, महाराजांचे बंजारा समाज, व्हीजेएनटी आरक्षण लढ्यातील योगदान, त्यांचे अध्यात्मिक व सामाजिक कार्य सदैव स्मरणात राहील तसेच पुढील अनेक पिढ्यांना प्रेरणा देत राहील असेही धनंजय मुंडे यांनी म्हटले आहे.

मुंबई, दि. 31:-  मुख्यमंत्री उद्धव ठाकरे यांनी माजी पंतप्रधान इंदिरा गांधी यांना पुण्यतिथीनिमित्त विनम्र आदरांजली वाहिली आहे.

मातोश्री निवासस्थानी मुख्यमंत्री श्री. ठाकरे यांनी माजी पंतप्रधान इंदिरा गांधी यांच्या प्रतिमेस पुष्पहार अर्पण करून विनम्र आदरांजली वाहिली.

मुख्यमंत्री अभिवादन संदेशात म्हणतात, कणखर आणि विकासाची दृष्टी असणारे नेतृत्व म्हणून माजी पंतप्रधान इंदिरा गांधी यांची जगभरात ओळख होती. स्वर्गीय इंदिराजींचे भारताच्या विकासात अमूल्य असे योगदान आहे. आधुनिक भारताच्या उभारणीसाठी तसेच देशाला एकात्म, अखंड ठेवण्यासाठी त्यांनी कणखरपणे निर्णय घेतले. त्यासाठी त्यांना बलिदानही द्यावे लागले. त्यांच्या बलिदानातून आपल्याला देश महासत्ता बनविण्याची प्रेरणा घ्यावी लागेल. त्यासाठी आजच्या राष्ट्रीय संकल्प दिवसाचेही आपण गांभीर्यपूर्वक स्मरण करूया, असेही मुख्यमंत्र्यांनी म्हटले आहे.

मुंबई.- – ब्राह्मण समाजाच्या महामंडळाबाबत राज्य सरकारला निर्देश देणार असल्याचे राज्यपाल भगतसिंह कोश्यारी यांना मुंबईतील राजभवनात समस्त ब्राह्मण समाजाच्या शिष्टमंडळाने भेट घेतली असता आश्वासन दिले असल्याची माहिती येथे देण्यात आली .

यावेळी समस्त ब्राह्मण समाजाचे समन्वयक प्रा. काकासाहेब कुलकर्णी यांनी ब्राह्मण समाजाच्या आर्थिक विकास महामंडळाबाबात चर्चा केली असता राज्यपालांनी राज्य सरकारला सकारात्मक निर्देश देण्याचे वचन दिले. तसेच ब्रम्ह महा शिखर परिषदेचे प्रवक्ते विश्वजीत देशपांडे यांनी ब्राह्मण समाजाची महाराष्ट्रातील लोकसंख्या व त्यांच्या ग्रामीण भागातील अडचणी मांडल्या. तर मकरंद कुलकर्णी यांनी राज्य सरकार सोबत आजमितीस झालेला पत्रव्यवहार व आजची स्थिती कथन केली. त्याच बरोबर संजीवनी पांडे यानी ब्राह्मण समाजातील महिला त्यांची आर्थिक व शैक्षणिक स्थिती बाबत अडचणी कथन केली. तसेच ॲड. आरती सदावर्ते – पुरंदरे यांनी ब्राह्मण समाजावर होणाऱ्या लिखाणावर बंदी घालावी व ब्राह्मण समाजाच्या  संरक्षणासाठी कडक कायदे करावे असे ही त्या म्हणाले.

दरम्यान राज्यपाल भगतसिंह कोश्यारी यांनी सगळ्या अडचणी ऐकून घेऊन तसेच सकारात्मक चर्चा करून राज्य सरकारला निर्देश देण्याचे अभिवचन दिले. या शिष्टमंडळात ब्राह्मण समाजाचे समन्वयक प्रा. काकासाहेब कुलकर्णी, ब्रम्ह महा शिखर परिषदेचे प्रवक्ते विश्वजीत देशपांड, मकरंद कुलकर्णी, संजीवनी पांड, ॲड. आरती सदावर्ते – पुरंदरे हे उपस्थित होते.

मुंबई, दि. ३१ – कोरोनाच्या कठीण प्रसंगी कोविड सेंटरला दिलेल्या भेटी तसेच निसर्ग चक्रिवादळाची परिस्थिती असो वा महाराष्ट्रातील अतिवृष्टीचे प्रसंग पण प्रत्येक संकटाच्या काळात केवळ स्वस्थ बसून न राहता जनतेमध्ये प्रत्यक्ष फिरून व त्यांच्या अडीअडचणी समजावून घेऊन त्यांना न्याय मिळवून देण्याचे काम कोविड योध्दे देवेंद्र फडणवीस यांनी ख-या अर्थाने केले. देवेंद्रजी यांनी केलेल्या या सामाजिक कार्याची नोंद घेऊन प्रकाशित करण्यात आलेले ‘जनसेवक’ हा विशेषांक पुढच्या पिढीला नक्कीच प्रेरणादायी व दिशादर्शक ठरेल असा ठाम विश्वास विधानपरिषदेचे विरोधी पक्ष नेते प्रविण दरेकर यांनी आज व्यक्त केला.
माजी मुख्यमंत्री आणि विरोधी पक्ष नेते देवेंद्र फडणवीस
यांच्या कार्यकर्तृत्वाला उजाळा देणारे तसेच कोरोनोच्या कार्यकाळात त्यांनी केलेल्या सेवाकार्याचा समावेश असलेल्या ‘जनसेवक‘ या विशेषांकाचे प्रकाशन आज विरोधी पक्ष नेते प्रविण दरेकर यांच्या हस्ते व भाजपा महाराष्ट्राचे उपाध्यक्ष तसेच जनसेवक विशेषांकाचे अतिथी संपादक माधव भांडारी यांच्या प्रमुख उपस्थितीत झाले. याप्रसंगी भाजपाच्या नेत्या चित्रा वाघ, हिन्दुस्थान प्रकाशन संस्थेचे अध्यक्ष रमेश पतंगे, भाजपाचे मुख्य प्रवक्ते विश्वास पाठक, दिपाली मोकाशी, रविंद्र गोळे आदी मान्यवर उपस्थित होते. भाजपा महाराष्ट्र प्रदेश कार्यालयात विवेक साप्ताहिक प्रकाशित ‘जनसेवक‘ विशेषांक सोहळा पार पडला.
विवेक साप्ताहिकाने या विशेषांकाच्या माध्यमातून आदर्श उपक्रम रावबिला आहे. त्यांनी एका चांगल्या विशेषांकाचे प्रकाशन केले असे सांगतानाच दरेकर म्हणाले की, विवेकने प्रकाशित केलेला हा विशेषांक म्हणजे प्रत्येक सामाजिक कार्यकर्त्यासाठी संग्रही ठेवा आहे. आपल्या जीवाची पर्वा न करता कोरोना सारख्या कठिण प्रसंगी राज्य सरकारची यंत्रणा सर्वच स्तरावर अपयशी ठरत असताना देवेंद्रजी यांनी कोविड सेंटरचा दौरा केला. ज्यावेळी राज्य सरकारची यंत्रणा कुचकामी ठरत होते व प्रशासनाचे प्रमुख घरी बसले होते. तेव्हा विरोधी पक्ष नेते देवेंद्र फडणवीस यांनी संकटात सापडलेल्या जनतेला धीर दिला. मग फक्त कोरोनाचा काळ नव्हे तर त्यानंतर आलेले निसर्ग चक्रिवादळ तसेच राज्यातील अतिवृष्टी या संकटसमयी ते प्रत्यक्ष घटनास्थळी गेले. आपण स्वत: या सर्व घटनांचे साक्षीदार आहोत. कारण या प्रत्येक ठिकाणी आपण त्यांच्यासमेवत सामाजिक कार्य करीत होतो. त्यामुळे या सर्व काळात त्यांनी अविरत परिश्रम केले. राज्यातील जनतेला धीर दिला व त्यांच्या या सामाजिक कार्याची नोंद विवेक या साप्ताहिकाने घेतली व एका अर्थाने जनतेच्यावतीने त्यांच्या योगादनाप्रति कृतज्ञता व्यक्त केली असे आपले मत असल्याचेही दरेकर यांनी सांगितले.
मुख्यमंत्री म्हणून गेली पाच वर्षे दिवस रात्र राज्यातील जनेतेची सेवा देवेंद्रजी यांनी केलीच, पण विरोधी पक्ष नेता या नात्याने त्यांनी वेळ प्रसंगी आपला जीव धोक्यात टाकून जनसेवेचे कार्य केले त्यामुळे जनतेने फडणवीस यांना जनसेवक हा किताब दिल्याचे उद्गार देरकर यांनी काढले.
देवेंद्र फडणवीस यांचे व्यक्तिमत्व हे नेहमीच विवेकशील व संयमी राहिले आहे, त्यामुळे विवेक साप्ताहिकाने देवेंद्रजी यांच्यावर विशेषांक प्रकाशित करणे हा सुध्दा एक योगायोग आहे असे सांगतानच दरेकर म्हणाले की, विवेक चा उपक्रम अतिशय आदर्श असा आहे. त्यांनी प्रकाशित केलेला पुस्तरुपी ठेवा संग्रही ठेवण्यासारखा आहेच, पण ख-या अर्थाने पुढच्या युवा पिढीला प्रेरणादायी व दिशादर्शक असा आहे असेही त्यांनी सांगितले.
देवेंद्रजी यांनी एमएमआरडीए रिजन, महाराष्ट्रातील सर्वच भाग या कठिण काळात पालथा घातला. त्यातच पक्षाने त्यांच्याकडे बिहार विधानसभा निवडणूकीची जबाबदारी सोपविली, तेथेही त्यांनी आपली जबाबदारी पूर्ण केली, पण अखेर त्यांना कोरोनाने गाठले असे सांगतानाच दरेकर म्हणाले की, अन्य राजकीय नेते कोरोना झाल्यावर पंचातारांकित रुग्णालयात उपचार घेत असतानाच फडणवीस यांनी सेंट जॉर्ज या सरकारील रुग्णालयात उपचार घेणे पसंत केले. एका प्रकारे त्यांनी सरकारी यंत्रणेवर विश्वास दाखविला असेही त्यांनी सांगितले.

मुंबई, दि. 31 : दिवंगत उपपंतप्रधान लोहपुरूष सरदार वल्लभभाई पटेल यांच्या 145 व्या जयंतीनिमित्त त्यांच्या प्रतिमेला पुष्पांजली वाहून राज्यपाल भगत सिंह कोश्यारी यांनी अभिवादन केले.

देशाच्या माजी पंतप्रधान दिवंगत श्रीमती इंदिरा गांधी यांची आज 36 वी पुण्यतिथी. त्यानिमित्ताने राज्यपालांनी इंदिरा गांधी यांच्याही प्रतिमेला पुष्पांजली वाहून अभिवादन केले.

सरदार पटेल यांची जयंती राष्ट्रीय एकता दिवस म्हणून साजरी केली जाते. यानिमित्त राज्यपालांनी राजभवनातील कर्मचारी, अधिकारी व उपस्थित पोलीस जवान यांचेसह राष्ट्रीय एकता दिवसाची शपथ घेतली.

देशाची एकता, अखंडता आणि सुरक्षा राखण्यासाठी स्वतःला समर्पित करण्याची तसेच देशाची अंतर्गत सुरक्षा सुनिश्चित करण्यासाठी आपले योगदान देण्याची शपथ यावेळी देण्यात आली.

राज्यपालांचे प्रधान सचिव संतोष कुमार, उपसचिव श्वेता सिंघल, खासगी सचिव उल्हास मुणगेकर तसेच अधिकारी व कर्मचारी यावेळी उपस्थित होते.

मुंबई, दि. 31 :-  मुख्यमंत्री उद्धव ठाकरे यांनी लोहपुरूष माजी उपपंतप्रधान सरदार वल्लभभाई पटेल यांना जयंतीनिमित्त अभिवादन केले.

मातोश्री निवासस्थानी मुख्यमंत्री श्री. ठाकरे यांनी दिवंगत सरदार पटेल यांच्या प्रतिमेस पुष्पहार अर्पण करून विनम्र अभिवादन केले.

सरदार पटेल यांच्या जयंतीनिमित्त साजरा करण्यात येणाऱ्या राष्ट्रीय एकता दिवसाच्याही मुख्यमंत्री श्री. ठाकरे यांनी शुभेच्छा दिल्या आहेत.

मुख्यमंत्री अभिवादन संदेशात म्हणतात, राष्ट्रीय ऐक्यासाठी सरदार वल्लभभाई पटेल यांनी दिलेले योगदान अभूतपूर्व असे आहे. पूर्णतः वास्तववादी विचारसरणीच्या सरदार पटेल यांनी स्वातंत्र्य संग्रामात तसेच पुढे संस्थांनांच्या विलिनीकरणात महत्त्वाची भूमिका बजावली. अखंड आणि बलशाली भारत हा सरदार पटेल यांचा ध्यास होता. त्याचसाठी त्यांनी आयुष्य वेचले. सरदार वल्लभभाई पटेल यांना जयंतीनिमित्त विनम्र अभिवादन. त्यांच्या अखंड भारताच्या प्रयत्नांना वंदन करण्यासाठी साजरा करण्यात येणाऱ्या राष्ट्रीय एकता दिवसांच्याही सर्वांना मनःपूर्वक शुभेच्छा.

मुंबई, दि. 31 : माजी पंतप्रधान, भारतरत्न स्वर्गीय  इंदिरा गांधी यांच्या स्मृतिदिनानिमित्त उपमुख्यमंत्री अजित पवार यांनी त्यांना भावपूर्ण आदरांजली अर्पण केली आहे. देशाची एकता, अखंडता, सार्वभौमता कायम राखत देशाला ‘महासत्ता’ बनण्याच्या वाटेवर आणण्यात स्वर्गीय इंदिराजींचं नेतृत्व, कर्तृत्व, त्याग, बलिदानाचं योगदान सर्वाधिक आहे, अशा शब्दात उपमुख्यमंत्र्यांनी त्यांच्या कार्याचे स्मरण करुन कृतज्ञता व्यक्त केली.

स्वर्गीय इंदिराजींच्या स्मृतीदिनानिमित्त अभिवादन करताना उपमुख्यमंत्री अजित पवार म्हणाले, देशाच्या स्वातंत्र्यालढ्यात व स्वातंत्र्योत्तर जडणघडणीत इंदिराजींनी दिलेले योगदान, केलेल्या त्यागाबद्दल देशवासीय त्यांच्याबद्दल सदैव कृतज्ञ राहतील. इंदिराजींनी देशाच्या स्वातंत्र्यलढ्यात सहभाग घेतला. तुरुंगवास भोगला. पहिल्या महिला पंतप्रधान म्हणून देशाच्या विकासाचा पाया भक्कम केला. आशियाई खेळांचं आयोजन असो की, अलिप्त राष्ट्रांचं नेतृत्व करण्याची क्षमता, इंदिराजींच्या अनेक निर्णयांनी राष्ट्रीय, आंतरराष्ट्रीय पातळीवर देशाचा गौरव वाढवला. देशाच्या एकता, अखंडता, सार्वभौमत्वासाठी प्राणांचं बलिदान करणाऱ्या महान नेतृत्वास कृतज्ञतापूर्वक अभिवादन, अशा शब्दांत उपमुख्यमंत्र्यांनी आदरांजली वाहिली.