मुंबई, दि. ५ : सिनेमा व नाटक हा समाजाचा आरसा आहे असे म्हटले जाते. कारण समाजात जे आजूबाजूला घडत असते त्याचे प्रतिबिंब आपल्याला सिनेमातून पहायला मिळते. महाराष्ट्रात वेगवेगळ्या विषयावर बनत असलेल्या कलाकृती गावपातळीवर, खेड्यापाड्यात पोहोचण्यासाठी येणाऱ्या काळात महाराष्ट्रात ‘परवडणारी सिनेमागृहे’ उभारण्यासाठी राज्यशासन पुढाकार घेईल, असे मुख्यमंत्री श्री.उद्धव ठाकरे यांनी स्पष्ट केले.

महाराष्ट्र चित्रपट रंगभूमी आणि सांस्कृतिक विकास महामंडळातर्फे ५ ते ७ नोव्हेंबर या कालावधीत ‘पॅनोरमा इन्वीशनिंग फिल्म मीडिया अँड एन्टरटेनमेन्ट पॉलिसी फॉर महाराष्ट्र’ या विषयावर तीन दिवसीय ऑनलाईन चर्चासत्राचे आयोजन करण्यात आले आहे. या चर्चासत्राचे उद्घाटन मुख्यमंत्री उद्धव ठाकरे यांच्या हस्ते करण्यात आले. यावेळी सांस्कृतिक कार्य मंत्री अमित देशमुख, राज्यमंत्री राजेंद्र पाटील- यड्रावकर यांच्यासह मुख्य सचिव संजय कुमार, सांस्कृतिक कार्य विभागाचे सचिव सौरभ विजय, महाराष्ट्र चित्रपट रंगभूमी आणि सांस्कृतिक विकास महामंडळाच्या व्यवस्थापकीय संचालिका मनीषा वर्मा, सहसंचालिका आंचल गोयल, निर्माते दिग्दर्शक राकेश ओमप्रकाश मेहरा, निर्माते सिध्दार्थ रॉय कपूर, टी.पी.अग्रवाल. अभिनेते आदेश बांदेकर, अभिनेते सुबोध भावे, आदी मान्यवर उपस्थित होते.

मुख्यमंत्री श्री. ठाकरे म्हणाले की, मनोरंजन हे एकमेव असे माध्यम आहे जिथे आपण आपले दु:ख काही वेळाकरिता का होईना विसरुन जातो. मनोरंजन क्षेत्र मनोरंजनाबरोबरच समाज प्रबोधनाचे काम करीत असते. या क्षेत्रामुळे एक चांगला समाज घडण्यास मदत होत असते. त्यामुळेच महाराष्ट्रात राहणाऱ्या प्रत्येकाला या क्षेत्राचा आनंद घेता यावा यासाठी ‘परवडणारी सिनेमागृहे’ उभारण्यासाठी राज्य शासन प्रयत्न करेल. राज्य शासनाचा एखादा संदेश सर्वसामान्य जनतेपर्यंत पोहोचवण्यासाठी कलाकार हे एक उत्तम माध्यम आहे. कारण जनमानसात कलाकारांची लोकप्रियता आणि त्यांच्या मनातील स्थान असते. त्यामुळे महाराष्ट्रातील कलाकारांच्या पाठिशी राज्य शासन कायम उभे असून कलाकारांना बळ देण्याचे काम करण्यात येईल, असेही श्री.ठाकरे यांनी सांगितले.

हिंदी आणि इतर भाषांबरोबरच मराठीतही उत्तम चित्रपट बनत असतात. पण काही वेळा एकाच दिवशी अनेक हिंदी चित्रपट प्रदर्शित झाल्यावर मराठी चित्रपटांसाठी चित्रपटगृहातले शो (खेळ) मिळत नाही आणि पर्यायाने या चित्रपटांचे नुकसान होते. त्यामुळेच मराठी चित्रपटांसाठीही पुरेशा प्रमाणात शो राखीव ठेवण्याबाबत राज्य शासन आग्रही असल्याचे श्री. ठाकरे यांनी यावेळी स्पष्ट केले.

मागील अनेक वर्षात या क्षेत्रातून अनेक कलाकार घडले. याच क्षेत्रामुळे अनेकांना रोजगारही मिळाले आहेत त्यामुळे येणाऱ्या काळात महाराष्ट्रात सर्व प्रकारच्या चित्रीकरणासाठी चांगली जागा विकसित करणे, नव नवीन तंत्रज्ञान आणणे यासाठी प्रयत्न केले जातील. मुंबईत असलेल्या दादासाहेब फाळके चित्रनगरीचे येणाऱ्या काळात दर्जोन्नती करण्यावर भर असेल. आज देशासह राज्यावरही कोविड-19 चे संकट आहे. गेल्या आठ महिन्यानंतर आजपासून सिनेमागृहे व नाट्यगृहे 50 टक्के क्षमतेसह सुरु होत आहेत. त्यामुळे या क्षेत्राला बळकटी देत असताना प्राधान्याने कोणती कामे करण्याची आवश्यकता आहे हे ठरविणे आवश्यक असल्याचेही श्री. ठाकरे यांनी यावेळी सांगितले. चित्रपट व करमणूक माध्यम क्षेत्र गतीमान व्हावे यासाठी महाराष्ट्र चित्रपट रंगभूमी आणि सांस्कृतिक विकास महामंडळाकडून आयोजित करण्यात आलेल्या चर्चासत्राचे मुख्यमंत्री उद्धव ठाकरे यांनी कौतुक केले. पहिल्यांदाच अशा प्रकारे चर्चासत्र आयोजित करुन या क्षेत्राला उभारी देण्याचे काम होत असल्याचे त्यांनी यावेळी नमूद केले.

सांस्कृतिक कार्य मंत्री श्री. देशमुख म्हणाले की, महाराष्ट्र हे भारतीय चित्रपट सृष्टीचे जन्मस्थान असून चित्रपट व करमणूक माध्यमांच्या क्षेत्रात कायमच अग्रेसर राहिले आहे. या अनुषंगाने चित्रपट, मनोरंजन क्षेत्रासाठी धोरण असावे या मुख्य उद्देशातूनच तीन दिवसीय चर्चासत्राचे आयोजन करण्यात आले आहे. या सत्राचा उद्देश या क्षेत्रातील महाराष्ट्राचे अग्रस्थान बळकट करणे, राज्यात चित्रपट निर्मिती आणि मनोरंजन माध्यम केंद्र प्रस्थापित करणे आणि या क्षेत्रात आधुनिक तंत्रज्ञानाला चालना देणे असा असणार आहे.

चित्रीकरण केंद्र बनविणे,चित्रपट माध्यम व करमणूक क्षेत्रास उद्योगाचा दर्जा देणे,चित्रपट माध्यम व करमणूक क्षेत्राच्या वाढीसाठी सकारात्मक वातावरण उपलब्ध करून देणे, प्रादेशिक चित्रपट निर्मितीस प्रोत्साहन देऊन चित्रपट, माध्यम व करमणूक क्षेत्रातील कौशल्य विकास वृद्धिंगत करणे यासारख्या सर्वांगीण विषयांचा समावेश असणार आहे, असेही श्री.देशमुख यांनी सांगितले.

या चर्चासत्राच्या दरम्यान केंद्रीय माहिती व प्रसारणमंत्री प्रकाश जावडेकर यांनी व्हिडिओ संदेशाद्वारे या उपक्रमाचे कौतुक केले. मुंबई ही सांस्कृतिक राजधानी म्हणून ओळखली जात असताना आजच्या काळात चित्रपट, माध्यम व करमणूक धोरण आखण्यासाठी ठोस सूचना मिळतील असा विश्वास त्यांनी यावेळी व्यक्त केला.या चर्चासत्रात चित्रपट क्षेत्रातील प्रतिनिधी आणि अनेक नामवंत तज्ञ मंडळी सहभागी झाले होते.

मुंबई, दि. 5 : नाटकांसाठी आता सरकारने तिसरी घंटा वाजविली आहे, मात्र कोरोनाची भीती अद्याप गेलेली नाही हे लक्षात  घेऊन निश्चित केलेल्या कार्यपद्धतीप्रमाणे नाट्यप्रयोग करा व कलाकार तसेच प्रेक्षकांची काळजी घ्या, असे आवाहन मुख्यमंत्री उद्धव ठाकरे यांनी केले. मराठी रंगभूमीदिनानिमित्त त्यांनी नाट्य निर्माते, कलाकार यांच्याशी दूरदृश्य प्रणालीद्वारे संवाद साधला व त्यांच्या सूचनाही ऐकून घेतल्या. यावेळी सांस्कृतिक कार्यमंत्री अमित देशमुख, मुख्य सचिव संजय कुमार, मुख्यमंत्र्यांचे प्रधान सचिव विकास खारगे, सांस्कृतिक कार्य सचिव सौरभ विजय हे देखील सहभागी झाले होते.

मुख्यमंत्री श्री.ठाकरे म्हणाले की, कोरोना नंतरच्या काळात निर्मात्यांचे नुकसान झाले आहे, त्यांच्या विविध मागण्या येत आहेत. नाट्यगृहांच्या भाड्याच्या बाबतीत आपल्या मागणीवर शासन नक्की विचार करेल. ‘मराठी पाऊल पडते पुढे’ असे आपण म्हणतो पण आता पुढील काळात ते अत्यंत खबरदारीने टाकणे गरजेचे आहे असे सांगून मुख्यमंत्री श्री.ठाकरे यांनी लंडन आणि युरोपमध्ये कोरोनाचे संकट परत वाढले आहे याची जाणीव करून दिली.

चित्रपट आणि थिएटर यात फरक हा आहे की इथे रिटेक नाही. त्यामुळे अधिक दक्षता घेणे गरजेचे आहे. प्रत्येक निर्मात्याने कलाकारांचे चेकअप करावे, स्टेजवर कलाकारांनी अंतर ठेवावे, स्वच्छता ठेवावी. थिएटरमध्ये सुद्धा ‘नो मास्क नो एन्ट्री’ असे असले पाहिजे. नाट्यगृहाबाहेरील खाण्याचे स्टॉल्स देखील नियम पाळतात की नाही हे पाहिले पाहिजे, असेही श्री.ठाकरे यांनी सांगितले.

सांस्कृतिक कार्यमंत्री अमित देशमुख म्हणाले की, बऱ्याच कालावधीनंतर नाट्यगृहे उघडतो आहोत. अनेक छोट्या मोठ्या समस्या येतील. आपण सर्वांनी बरोबर राहून यातून मार्ग काढू, असेही श्री.देशमुख यांनी सांगितले.

यावेळी आदेश बांदेकर, सुबोध भावे, मंजिरी भावे, अमेय खोपकर, प्रदीप कबरे, बिभीषण चवरे, डॉ.गणेश चंदनशिवे, प्रदीप वैद्य, प्रसाद कांबळी, यांनी चर्चेत सहभाग घेऊन काही सूचनाही केल्या.

मुंबई : अमेरिकन राष्ट्रध्यक्षपदाची मत मोजणी निर्णायक टप्प्यावर आली असून त्याचे पडसाद कमॉडिटी बाजारावर उमटत आहेत. सोने आणि चांदीने आज गुरुवारी सकाळी जोरदार उसळी घेतली आहे. मल्टी कमॉडिटी एक्सचेंजमध्ये (MCX) सध्या सोन्याचा भाव प्रती १० ग्रॅम ५१२५८ रुपये आहे. त्यात ४३८ रुपयांची वाढ झाली आहे. चांदीच्या किमतीत देखील ६७४ रुपयांची वाढ झाली असून एक किलोचा भाव ६२०६३ रुपये झाला आहे.goodreturns.in या वेबसाईटनुसार गुरुवारी मुंबईत २२ कॅरेट सोन्याचा भाव प्रती १० ग्रॅम ४९९०० रुपये आहे. तर २४ कॅरेटचा भाव ५०९१० रुपये आहे. दिल्लीत २२ कॅरेटचा भाव ४९६६० रुपये असून २४ कॅरेटचा भाव ५४१६० रुपये आहे. कोलकात्यात ग्राहकांना २२ कॅरेट सोने खरेदीसाठी ४९७६० रुपये मोजावे लागत आहेत. तर २४ कॅरेटचा भाव ५२९६० रुपये आहे. चेन्नईत २२ कॅरेट सोने प्रती १० ग्रॅमसाठी ४७९०० रुपये आहे. २४ कॅरेटसाठी तो ५२२६० रुपये आहे. सोमवारी कमॉडिटी बाजारात सोने आणि चांदीच्या दरात वाढ झाली होती. तर मंगळवारी आणि बुधवारी घसरण झाली होती. बुधवारी बाजार बंद होताना सोने ५०८१० रुपयांवर बंद झाले होते. त्यात ७८८ रुपयांची घसरण झाली. चांदीचा भाव १३६५ रुपयांनी कमी झाला होता.जागतिक बाजारात आज सोन्याचा भाव प्रती औंस भाव १९०४.६६ डॉलर आहे. चांदीच्या दरात ०.३ टक्के वाढ झाली असून चांदीचा भाव प्रती औंस २३.९८ डॉलर आहे. इतर चलनांच्या तुलनेत डॉलर इंडेक्स ०.०२ टक्क्यांनी वधारला आहे. त्याआधीच्या सत्रात डॉलर इंडेक्स ०.८ टक्क्यांनी वधारला होता.अमेरिकेच्या राष्ट्राध्यक्षपदासाठीचे प्रत्यक्ष मतदान संपल्यानंतर मतमोजणी सुरू झाली आहे. सुरुवातीच्या मतमोजणी कलानुसार, विद्यमान राष्ट्राध्यक्ष डोनाल्ड ट्रम्प आणि डेमोक्रॅटीक पक्षाचे उमेदवार जो बायडन यांच्यात अटीतटीची लढत सुरू असल्याचे समोर आले होते. त्यानंतर आता डेमोक्रॅटीक पक्षाचे उमेदवार जो बायडन यांनी निर्णायक आघाडी घेतली असून विजयासमीप ते पोहचले आहेत.

अमेरिकेत अध्यक्ष डोनाल्ड ट्रम्प यांचे श्वेत-कृष्णवर्णीय हे कार्ड अपयशी ठरत असल्याचे दिसत आहे. मतदानपूर्व सर्व्हेचे निष्कर्ष चुकीचे ठरवत ते तगडी लढत देण्यात यशस्वी ठरले. मतदानानंतरच्या चाचणीनुसार, ट्रम्प यांच्या अप्रवासी धोरणाविरुद्ध ८७% आणि ६७% आशियाई वंशाच्या लोकांनी डेमाेक्रॅटिक पक्षाच्या जो बायडेन यांना मतदान केले. २० वर्षांतील सर्वात रोमांचक लढतीत बायडेन विजयाकडे वाटचाल करत आहेत. त्यांना २३७ इलेक्टोरल मते पडली आहेत. ३३ मते असलेल्या ३ राज्यांत ते आघाडीवर आहेत. तर, ट्रम्प यांना २१३ मते असून ५४ इलेक्टोरल मते असलेल्या ४ राज्यांत ते आघाडीवर आहेत. व्हाइट हाऊसमध्ये विराजमान होण्यासाठी २७० मते हवी आहेत. अद्याप पेन्सिल्व्हेनिया, जॉर्जिया, विस्कोन्सिन आणि नॉर्थ कॅरोलिनासारख्या राज्यांतून टपालाने पाठवलेली मते मोजलेली नाहीत. म्हणूनच ११६ वर्षांत प्रथमच मतदानादिवशी राष्ट्राध्यक्ष ठरला नाही. या राज्यांतील ८० लाख मतांची मोजणी होण्यापूर्वीच ट्रम्प यांनी आपल्या विजयाची घोषणा केली होती. या मतांमध्ये घोटाळे झाल्याचा आरोप करत ट्रम्प यांनी कोर्टात जाण्याची धमकीही दिली आहे. तर, बायडेन यांनी लोकांना संयम राखण्याचे आवाहन करत आपण विजयाकडे वाटचाल करत असल्याचे म्हटले आहे. उपाध्यक्षपदाच्या उमेदवार कमला हॅरिस यांनी म्हटले आहे की, पूर्ण मतमोजणी होईपर्यंत निकाल स्पष्ट होणार नाही. भारतीयांची अधिक लोकसंख्या असलेल्या ६ पैकी ५ राज्यांत बायडेन यांच्या पक्षाला विजय मिळाला आहे. भारतीय वंशाचे डॉ. अमी बेरा, प्रमिला जयपाल, रो खन्ना आणि राजा कृष्णमूर्ती विजयी झाले आहेत. रिपब्लिकन नीरज अंतानी ओहायोतून सिनेटमध्ये दाखल झाले आहेत. न्यूयॉर्कमधून मीरा नायर यांचा मुलगा जोहरान व वकील जेनिफर राजकुमार विजयी ठरले.

> १९९२ पासून आतापर्यंत अध्यक्षांना दोन टर्म: १९९२ पासून २०१६ पर्यंत केवळ तीन अध्यक्ष झाले. बिल क्लिंटन, जॉर्ज डब्ल्यू बुश आणि बराक ओबामा. ट्रम्प हरले तर जॉर्ज डब्ल्यू बुश सीनियर यांच्यानंतर अमेरिकेत एकही अध्यक्ष दुसऱ्यांदा निवड झालेला नाही.

> परंतु, ट्रम्प यांना २०१६ च्या तुलनेत अधिक मते : ट्रम्प यांना आतापर्यंत ६.७ कोटींहून अधिक मते पडली आहेत. २०१६ मध्ये त्यांना ६.३ कोटी मते पडली होती. बायडेन यांना आतापर्यंत ६.९५ कोटी मते पडली आहे. २०१६ मध्ये हिलरी क्लिंटन यांना ६.६ कोटी मते पडली होती.

गेमचेंजर: 6.5 कोटी टपाली मते ठरवणार नवा राष्ट्राध्यक्ष

अमेरिकेत प्रथमच टपालाने पाठवलेली मते सरकार पलटवू शकतात. यंदा टपालाने (मेल-इन) विक्रमी ६.५ कोटी मते पडली होती. हा घोळ असल्याचे ट्रम्प सुरुवातीपासूनच म्हणत आहेत. दुसरीकडे, बायडेन व कमला हॅरिस यांनीही आपली मते टपालाने पाठवली. ट्रम्प यांनी बूथवर जाऊन मतदान केले आणि आपल्या समर्थकांना मतदानाच्या दिवशीच मतदानाचे आवाहन केले. आता हीच टपाली मते ट्रम्प यांची व्हाइट हाऊसमधून गच्छंती करू शकतात. आता फक्त मेल इन मतांची माेजणी बाकी आहे. यात बायडेन आघाडीवर असल्याचे अमेरिकेचे सर्व पोल सांगत आहेत. यामुळे ट्रम्प सुरुवातीपासून त्याविरुद्ध बोलत आलेले आहेत.

मुंबई : रिपब्लिक टीव्हीचे एडिटर इन चीफ, पत्रकार अर्णब गोस्वामी यांची रवानगी न्यायालयीन कोठडीत करण्यात आली आहे. अलिबाग कोर्टाकडून अर्णब गोस्वामी यांना १४ दिवसांची न्यायालयांनी कोठडी सुनावण्यात आली आहे. पोलिस कोठडीची मागणी न्यायालयाने फेटाळली आहे. आज सकाळी अर्णब गोस्वामी यांना रायगड पोलिसांनी अटक केली.

अन्वय नाईक आत्महत्या प्रकरणात अर्णब गोस्वामी यांना अटक केली गेली आहे. यानंतर त्यांना अलिबाग न्यायालयात हजर करण्यात आलं. अन्वय नाईक यांनी मे २०१८ मध्ये त्यांच्या राहत्या घरी अलिबागमध्ये आत्महत्या केली होती. अर्णब गोस्वामी यांनी पैसे थकवल्याने अन्वय नाईक यांना आत्महत्या करावी लागली असा आरोप नाईक कुटुंबियांकडून केला गेलाय.

अर्णब गोस्वामी यांची दुसऱ्यांदा मेडिकल टेस्ट केल्यानंतर संध्याकाळी पाच वाजता कोर्टात पुन्हा सुनावणीला सुरवात केली गेली. आता अर्णब गोस्वामी यांना १४ दिवसांची न्यायालयीन कोठडी सुनावण्यात आली आहे.

दरम्यान अर्णब गोस्वामी यांच्याविरोधात मुंबईत कलम ३५३ अंतर्गत आणखीन एक गुन्हा दाखल करण्यात आला आहे. सरकारी कामात अडथळा निर्माण करणे आणि पोलिसांसोबत गैरवर्तन करणे, या आरोपात अर्णब गोवामी यांच्याविरोधात मुंबईतील लोअर परळमधील ना म जोशी पोलिस स्थानकात गुन्हा दाखल करण्यात आला आहे.बुधवारी सकाळी मुंबई पोलिसांनी त्यांच्या घरातून अटक केली. यावेळी गोस्वामी आणि त्यांच्या पत्नीने पोलिसांच्या कारवाईला विरोध केला. यावेळी अर्णब यांनी एका महिला पोलीस अधिकाऱ्याला मारहाण केल्याचं पोलिसांचं म्हणणं आहे. त्यामुळे त्यांच्यावर कलम ३५३, ५०४, ५०६, ३४ अंतर्गत गुन्हे दाखल करण्यात आले आहेत.

मुंबई :  उद्या दिनांक ५ नोव्हेंबरपासून राज्यातील कंटेनमेंट झोनच्या बाहेरील जलतरण तलाव, योगा संस्था, चित्रपटगृहे, नाट्यगृहे, मल्टिप्लेक्स आणि काही इनडोर खेळांना सुरू करण्याची परवानगी राज्य शासनाने दिली आहे. ‘मिशन बिगिन अगेन’ अंतर्गत याबाबतचे निर्देश जारी करण्यात आले आहेत.

राज्याचे मुख्य सचिव संजय कुमार यांनी एका परिपत्रकाद्वारे ही माहिती देताना असे म्हटले आहे की, राज्य, राष्ट्रीय आणि आंतरराष्ट्रीय पातळीवरील खेळाडूंच्या प्रशिक्षणासाठी कंटेनमेंट झोनच्या बाहेरील जलतरण तलावांना परवानगी देण्यात येत आहे. यासाठी क्रीडा व युवक कल्याण विभागाच्या मार्गदर्शक सूचना व निर्देश लागू असतील.

प्रतिबंधित क्षेत्राच्या बाहेर असलेल्या योगा संस्थांना पुनश्च सुरु करण्यासाठीही परवानगी देण्यात येत असून सार्वजनिक आरोग्य विभागामार्फत जारी करण्यात आलेल्या मार्गदर्शक सूचना लागू राहतील.

बॅडमिंटन, टेनिस, स्क्वॅश, इनडोर शूटिंग सारख्या इनडोर क्रीडा प्रकारांनाही शारीरिक अंतर आणि सॅनिटेशनसंबंधी मार्गदर्शक सूचनांचे पालन करण्याच्या अटीवर पाच नोव्हेंबरपासून मुभा देण्यात येत आहे.

चित्रपटगृहे, नाट्यगृहे, मल्टिप्लेक्स यांनाही ५० टक्के आसन व्यवस्था पालन करण्याच्या अटीवर प्रतिबंधित क्षेत्राच्या बाहेर पुन्हा सुरू करण्यासाठीही अनुमती देण्यात आली आहे. परंतु चित्रपटगृहे, नाट्यगृहे, मल्टिप्लेक्समध्ये कोणत्याही खाद्यपदार्थांना परवानगी नसेल. यासंबंधीच्या मार्गदर्शक सूचना सांस्कृतिक कार्य विभाग तथा स्थानिक प्रशासनाद्वारे लागू असतील.

मास्कचा वापर, सामाजिक अंतर राखणे यासारख्या कोविड-19 प्रतिबंधक मार्गदर्शक निर्देशांचे पालन करणे बंधनकारक असल्याचेही आदेशात नमूद करण्यात आले आहे.

नागपूर:-अतिवृष्टीमुळे झालेल्या शेतकऱ्यांच्या नुकसानीची भरपाई देण्यास राज्य सरकारकडून विलंब होत आहे. परिणामी राज्यातील शेतकरी सध्या मोठ्या संकटात सापडला आहे. शेतकऱ्यांच्या विविध प्रश्नांकडे नागपूरच्या हिवाळी अधिवेशनात सरकारला जाब विचारला जाईल, असे प्रतिपादन भारतीय जनता पार्टीचे प्रदेशाध्यक्ष आ.चंद्रकांतदादा पाटील यांनी बुधवारी नागपूर येथे पत्रकार परिषदेत केले. प्रदेश सरचिटणीस चंद्रशेखर बावनकुळे यावेळी उपस्थित होते.

श्री. पाटील म्हणाले की, विदर्भात अतिवृष्टीमुळे सोयाबीन, कापूस या पिकांचे अतोनात नुकसान झाले आहे. मराठवाडा, पश्चिम महाराष्ट्रातही अतिवृष्टीमुळे पिकांचे प्रचंड नुकसान झाले आहे. मात्र राज्य सरकारने शेतकऱ्यांना नुकसान भरपाई देण्यासाठी काहीच हालचाल केलेली नाही. राज्यभरातील शेतकऱ्यांच्या प्रश्नांकडे आघाडी सरकारचे अक्षम्य दुर्लक्ष होत आहे. शेतकऱ्यांचे प्रश्न सोडविण्यात राज्य सरकारला आलेल्या अपयशाचा जाब नागपूर येथे होणाऱ्या विधिमंडळाच्या हिवाळी अधिवेशनात सरकारला विचारला जाईल.

कांजूरमार्ग येथील मिठागराच्या जमिनीवरून सुरु असलेल्या वादाबाबत बोलताना चंद्रकांत पाटील म्हणाले की आघाडी सरकार नियम, संकेत बाजूला ठेवून काम करत आहे. मिठागरांच्या जमिनीवर कार शेड उभे करायचे झाल्यास त्यासाठी प्रचंड खर्च येणार आहे, परिणामी मेट्रो प्रकल्प आणखी रेंगाळणार आहे.

यावेळी श्री . पाटील यांनी रिपब्लिक टीव्ही चे संपादक अर्णब गोस्वामी यांच्या अटकेचा तीव्र निषेध केला. सोनिया गांधींच्या विरोधात मत व्यक्त केले म्हणून गोस्वामी यांना अटक करण्यात आली आहे. गांधी घराणे, काँग्रेस आणि मुख्यमंत्री ठाकरे यांच्याविरोधात बोलणाऱ्या पत्रकारच नव्हे तर सामान्य माणसांचाही आवाज बंद करण्याचा प्रयत्न महाआघाडी सरकारच्या राजवटीत होत आहे, असे श्री. पाटील यांनी सांगितले.

मुंबई- रिपब्लिकन चॅनेलचे संपादक अर्णब गोस्वामी यांच्या अटकेच्या निषेधार्थ विधानपरिषदेचे विरोधी नेते प्रविण दरेकर यांच्या नेतृत्वाखाली भाजपाच्या कार्यकर्त्यांनी आज अलिबाग न्यायालयलाबाहेर जोरदार आंदोलन केले. कायदा सर्वांना समान आहे व तो आम्हालाही मान्य आहे. परंतु अर्णब गोस्वामी यांना करण्यात आलेली अटक म्हणजे सरकारने सूडभावनेने केलेली कारवाई आहे. लोकशाहीच्या चौथा स्तंभाच्या पाठीशी भाजप ठामपणे उभे आहोत. परंतु महाराष्ट्रातील ठाकरे सरकारची हुकुमशाही या प्रकारची प्रवृत्ती आम्ही खपवून घेणार नाही असा जोरदार इशारा विधानपरिषदेचे विरोधी पक्ष नेते प्रविण दरेकर यांनी दिला.
भाजपाने हा निषेध मोर्चा भाजपा पक्ष कार्यालय ते अलिबाग न्यायालय असा काढला केला होता. भारत माता की जय…,वंदे मातरम, आणीबाणी लावणा-या सरकारचा धिक्कार असो.. महाविकास आघाडी सरकारचा निषेध असो…मुर्दाबाद मुर्दाबाद ठाकरे सरकार मुर्दाबाद…अशा जोरदार घोषणा यावेळी देण्यात आल्या. यावेळी विरोधी पक्ष नेते दरेकर यांनी भाषण केले.
यावेळी माजी खासदार किरिट सोमय्या, आमदार रविशेठ पाटील, आमदार राहुल नार्वेकर, आमदार प्रशांत ठाकूर, भाजपा युवा मोर्चा प्रदेशाध्यक्ष विक्रांत पाटील, जिल्हाध्यक्ष महेश मोहिते, कृष्णा कोबनाक, पनवेलच्या महापौर कविता चौतमल, उपमहापौर जगदीश गायकवाड आदी मान्यवर उपस्थित होते.
यावेळी बोलताना प्रविण दरेकर म्हणाले की, आज आणीबाणी सदृश्य परिस्थिती राज्यात निर्माण झाली आहे कारण काँग्रेसने १९७५ मध्ये लावलेल्या आणीबाणीला शिवसेनेने समर्थन केले होते आणि पुन्हा अश्या प्रकारचे वातावरण या राज्यात निर्माण होतेय, जी केस बंद केली आहे ती पुन्हा उकरून काढायची आणि केवळ दिखावा करण्याचा प्रयत्न केला जोतोय. नाईक यांच्या आत्महत्या प्रकरणी आम्ही गोस्वामी यांना अटक करत आहे, पण यामागील मूळ उद्देश हा मीडियाची मुस्कटदाबी करणे हाच आहे असा आरोपही त्यांनी केला.
सूडाचा अंत हा वाईटच असतो. मग तो कुठलाही पक्ष असो वा कुठलेही सरकार, कोणालही सूडाने फार काळ वागता येत नाही. जेव्हा देशात आणीबाणी झाली त्यावेळी जनतेने काय उठाव केलाय हे देशाने पाहिले आहे. मोठे सत्ताधीश व दिग्गज उध्वस्त करण्याची ताकद या जनतेत आहे. जेव्हा अत्याचार होतात तेव्हा जनतेमध्ये यांना उध्वस्त करण्याची ताकद असते आणि तशा प्रकारची परिस्थिती निर्माण झाल्यास जनतेचा उद्रेकच या सरकारला यांची जागा दाखवून देईल अशी टिकाही दरेकर यांनी केवली.
राज्यात आणीबाणी सारखे वातावरण होऊ नये म्हणून भारतीय जनता पार्टी वृत्तपत्र स्वातंत्र्यासाठी त्यांच्या पाठीशी उभी आहे असे स्पष्ट करतानाच ते म्हणाले की, याप्रकरणात महिलेचे कुंकू पुसण्याची गोष्ट काही जण करत आहेत पण महाराष्ट्रात तुमच्या सरकारच्या काळात अनेक महिलांचे कुंकू पुसले गेल्याच्या घटना आहेत, मग या निमित्ताने त्याही केसेस बाहेर काढाव्यात. परंतु केवळ अर्णब गोस्वामी यांना याप्रकरणात अडकवायचे हाच उद्देश्य असेल तर ते अत्यंत वाईट आहे. केवळ नाईक कुटुंबिय नाही तर महाराष्ट्रातील ज्या-ज्या महिलांवर अत्याचार झाले आहेत, त्या कुटुंबियांना न्याय मिळवून देण्यासाठी आम्ही त्यांच्या पाठिशी आहोत. परंतु केवळ अर्णब गोस्वामी यांना टार्गेट करण्यासाठी या केसचा आधार घेतला जातोय व या माध्यमातून ठाकरे सरकार खालच्या पातळीवर जाऊन राजकारण करत आहे असा आरोपही दरेकर यांनी यावेळी केला.