प्रा. डॉ. संजय चोरडिया यांचे प्रतिपादन; ‘फिसा’तर्फे परदेशी विद्यार्थ्यांचा पदवीदान समारंभ संपन्न
पुणे : “भारतात शिकत असलेल्या परदेशी विद्यार्थ्यांमुळे भारतीय संस्कृती व परंपरा जगभर पोहोचण्यास मदत होते. विद्यार्थ्यांच्या आदान-प्रदानामुळे उभय देशातील प्रगतीला हातभार लागत असतो. सूर्यदत्ताला परदेशी विद्यार्थ्यांबद्दल सहानुभूती असून, गेल्या १८ वर्षांपासून सूर्यदत्तामध्ये २५० पेक्षा जास्त परदेशी विद्यार्थ्यांनी पदवी प्राप्त केली आहे,” असे प्रतिपादन सूर्यदत्ता ग्रुप ऑफ इन्स्टिट्यूटचे संस्थापक अध्यक्ष प्रा. डॉ. संजय चोरडिया यांनी केले.

फेडरेशन ऑफ इंटरनॅशनल स्टूडंट्स असोसिएशन-पुणेच्या वतीने वेस्टिन हॉटेल, कोरेगाव पार्क येथे पुण्यात शिकणार्‍या परदेशी विद्यार्थ्यांसाठी पदवीदान समारंभाचे नुकतेच आयोजन केले होते. यावेळी प्रमुख पाहुणे म्हणून प्रा. डॉ. चोरडिया बोलत होते. या कार्यक्रमाला ५८ देशातील ३०० पेक्षा जास्त विद्यार्थी उपस्थित होते. संस्कृतीतील विविधतेचा उत्सव साजरा करण्याविषयी आणि त्यास प्रोत्साहन देण्यासाठी अंतर्भाव देणारा हा सोहळा होता. यावेळी सावित्रीबाई फुले पुणे विद्यापीठातील इंटरनॅशनल स्टुडंट्स सेंटरचे संचालक प्रा. डॉ.  विजय खरे, अफगाणिस्तान कौन्सलेटचे कॉन्सुल जनरल शफीकुल्लाह इब्राहिमी, एलपीसीपीएसचे संस्थापक डॉ. एस. पी. सिंग, अजिंक्य डीवाय पाटील युनिव्हर्सिटीतील इंटरनॅशनल सेंटरच्या संचालक प्रा. निरुपमा प्रकाश, ‘फिसा’चे अध्यक्ष अब्बा ओमर आदी उपस्थित होते.

कार्यक्रमाची सुरुवात अफगाणी नृत्य आणि सांस्कृतिक कार्यक्रमांनी झाली. चाड, तुर्कमेनिस्तान, अफगाणिस्तान, कॅमरून, युगांडा, केनिया, टांझानिया, दक्षिण सुदान, दक्षिण कोरिया, सौदी अरेबिया, येमेन, झांबिया, नायजेरिया, जिबूती, तुर्की, गॅम्बिया, कांगो, दक्षिण आफ्रिका, अंगोला, मलावी, श्रीलंका, नेपाळ, रुवांडा, कझाकस्तान, बुरुंडी, गिनी, लेसोथो, इथिओपिया, मालदीव, युक्रेन, रशिया, आयव्हरी कोस्ट, नायजर, थायलंड, बोत्सवाना, मोझांबिक, गॅबॉन, बेनिन प्रजासत्ताक, स्वाझीलँड, मादागास्कर, एरिट्रिया, इराक, इराण, इजिप्त, मोरोक्को, सोमाली, मॉरिशस, सेशेल्स आदी ५८ देशातील ३०० विद्यार्थी या कार्यक्रमास उपस्थित होते.

प्रा. डॉ. संजय चोरडिया यांनी ‘अतिथी देवो भव’ या भारतीय परंपरेनुसार सर्व परदेशी विद्यार्थ्यांचे स्वागत केले.  ते म्हणाले की, सूर्यदत्तमध्ये गेल्या १८ वर्षांपासून परदेशी विद्यार्थी आहेत. आजवर सूर्यदत्तामधून जवळपास २५० विद्यार्थी पदवी घेऊन गेले आहेत. ३३ देशातील विद्यार्थ्यांचा यात समावेश आहे. भारतात शिकणाऱ्या परदेशी विद्यार्थ्यांबद्दल सूर्यदत्ता संस्थेला आस्था असून, त्यांच्या सुविधेसाठी सूर्यदत्ता इंटरनॅशनल एज्युकेशनल अँड कल्चरल सेंटर सुरु करण्यात आले आहे. या सेंटर अंतर्गत नियमितपणे आंतरराष्ट्रीय विद्यार्थ्यांसाठी सांस्कृतिक कार्यक्रम, विद्यार्थी मेळावा, दीक्षांत समारंभ आयोजित करतो. पुण्यात शिकणार्‍या आंतरराष्ट्रीय विद्यार्थ्यांना त्यांच्या सामाजिक आणि वैयक्तिक क्रियाकलापांच्या आधाराची आवश्यकता आहे जेणेकरून ते चांगले प्रदर्शन करू शकतील.

डॉ. चोरडिया यांनी सांगितले की, सूर्यदत्त येथील पायाभूत सुविधा परदेशी विद्यार्थ्यांसाठी त्यांच्या कार्यक्रमांसाठी उपलब्ध असतात. सूर्यदत्त ग्रुप ऑफ इन्स्टिट्यूट्समधील सर्व पायाभूत सुविधा, मूल्य, परंपरा आणि शैक्षणिक प्रगती अनुभवण्यासाठी परदेशी विद्यार्थ्यांना त्यांनी आमंत्रित केले. त्यातून सूर्यदत्ता आणि परदेशी विद्यार्थी यांच्यातील नाते आणखी दृढ होत जाईल, असा विश्वास वाटतो. प्रा. डॉ. विजय खरे यांनी एसपीपीयूआय इंटरनॅशनल स्टूडंट सेलविषयी परदेशी विद्यार्थ्यांबाबतचे धोरण, मार्गदर्शक सूचना व इतर आवश्यक माहिती माहिती दिली.प्रा. डॉ. संजय चोरडिया यांनी इतर मान्यवरांनांही सन्मानित केले. त्यामध्ये अध्यक्ष, सचिव व वरिष्ठ स्तरावरील अधिकाऱ्यांचा समावेश होता.

पुणे, दि.२८:- प्रधानमंत्री नरेंद्र मोदी यांनी आज सीरम इन्स्टिट्यूट ऑफ इंडियाला भेट देऊन कोविड-१९ विषाणू प्रतिबंधात्मक लस विकास, उत्पादन, वितरण, साठवण आणि व्यवस्थापन प्रक्रियेची माहिती घेतली. यावेळी सीरम इन्स्टिट्यूट ऑफ इंडियाचे मुख्य कार्यकारी संचालक डॉ. सायरस पुनावाला, मुख्य कार्यकारी अधिकारी अदर पुनावाला, कार्यकारी संचालक नताशा पुनावाला, शास्त्रज्ञ तसेच संबंधित विभागाचे वरिष्ठ अधिकारी उपस्थित होते.

प्रारंभी अदर पुनावाला यांनी संस्थेची माहिती दिली. त्यानंतर
प्रधानमंत्री श्री. मोदी यांनी सीरम इन्स्टिट्यूट ऑफ इंडिया या संस्थेतील कोविड -१९ प्रतिबंधात्मक लस निर्मितीच्या अनुषंगाने सुरु असलेल्या कामाची पाहणी केली. यावेळी त्यांना लस देण्याच्या प्रयत्नांची पूर्वतयारी, आव्हाने आणि नियोजन यांची माहिती शास्त्रज्ञांनी दिली.

पुणे विभागातील 5 लाख 1 हजार 266 कोरोना बाधित रुग्ण बरे होऊन घरी
विभागात कोरोना बाधित 5 लाख 30 हजार 983 रुग्ण
-विभागीय आयुक्त सौरभ राव
पुणे,दि.27 :- पुणे विभागातील 5 लाख 1 हजार 266 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 30 हजार 983 झाली आहे. तर ॲक्टीव रुग्ण संख्या 14 हजार 797 इतकी आहे. कोरोनाबाधीत एकुण 14 हजार 920 रुग्णांचा मृत्यू झाला असून मृत्यूचे प्रमाण 2.81 टक्के आहे. पुणे विभागामध्ये बऱ्या होणा-या रुग्णांचे प्रमाण 94.40 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 3 लाख 39 हजार 562 रुग्णांपैकी 3 लाख 20 हजार 418 रुग्ण बरे होवून घरी गेले आहेत. ॲक्टीव रुग्ण 10 हजार 883 आहे. कोरोनाबाधित एकूण 8 हजार 261 रुग्णांचा मृत्यू झाला आहे. मृत्यूचे प्रमाण 2.43 टक्के इतके आहे तर बरे होणा-या रुग्णांचे प्रमाण 94.36 टक्के आहे.
सातारा जिल्हा
सातारा जिल्हयातील कोरोना बाधीत एकूण 50 हजार 529 रुग्णांपैकी 48 हजार 78 रुग्ण बरे होवून घरी गेले आहेत. ॲक्टीव रुग्ण संख्या 748 आहे. कोरोनाबाधित एकूण 1 हजार 703 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 45 हजार 226 रुग्णांपैकी 41 हजार 428 रुग्ण बरे होवून घरी गेले आहेत. ॲक्टीव रुग्ण संख्या 2 हजार 211 आहे. कोरोनाबाधित एकूण 1 हजार 587 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 46 हजार 674 रुग्णांपैकी 44 हजार 506 रुग्ण बरे होवून घरी गेले आहेत. ॲक्टीव रुग्ण संख्या 475 आहे. कोरोनाबाधित एकूण 1 हजार 693 रुग्णांचा मृत्यू झाला आहे.
कोल्हापूर जिल्हा
कोल्हापूर जिल्हयातील कोरोना बाधीत एकूण 48 हजार 992 रुग्णांपैकी 46 हजार 836 रुग्ण बरे होवून घरी गेले आहेत. ॲक्टीव रुग्ण संख्या 480 आहे. कोरोनाबाधित एकूण 1 हजार 676 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 1446 ने वाढ झाली आहे. यामध्ये पुणे जिल्ह्यात 966, सातारा जिल्ह्यात 178, सोलापूर जिल्ह्यात 223, सांगली जिल्ह्यात 53 तर कोल्हापूर जिल्ह्यात 26 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 1468 रुग्णांमध्ये पुणे जिल्हयामध्ये 725, सातारा जिल्हयामध्ये 583, सोलापूर जिल्हयामध्ये 103, सांगली जिल्हयामध्ये 17 व कोल्हापूर जिल्हयामध्ये 40 रुग्णांचा समावेश आहे.
पुणे विभागातील सर्व्हेक्षण
आजपर्यत विभागामध्ये एकुण 28 लाख 460 नमून्यांचा तपासणी अहवाल प्राप्त झाला. प्राप्त अहवालांपैकी 5 लाख 30 हजार 983 नमून्यांचा अहवाल सकारात्मक (पॉझिटिव्ह) आहे.

( टिप :- दि. 26 नोव्हेंबर 2020 रोजी रात्री 9.00 वा. पर्यंतच्या आकडेवारीनुसार )

ललित बजाज यांची पत्रकार परिषदेत माहिती; विद्यार्थी, सीए सभासदांचे उल्लेखनीय कार्य

पुणे : कोरोनाच्या पार्श्वभूमीवरही योग्य नियोजन आणि नियमांचे काटेकोरपणे पालन यामुळे ‘सीए’च्या परीक्षा सुरळीतपणे सुरु आहेत. सोशल डिस्टंसिन्ग पाळले जावे, तसेच विद्यार्थ्यांना परीक्षा देण्यात अडचणी येऊ नयेत, यासाठी परीक्षा केंद्रांची संख्या ५०० वरून ११०० वर नेण्यात आली. त्यामुळे ग्रामीण भागातील विद्यार्थ्यांनाही परीक्षा देणे सोयीचे होत आहे,” अशी माहिती दि इन्स्टिट्यूट ऑफ चार्टर्ड अकाउंटंट्स ऑफ इंडियाच्या (आयसीएआय) वेस्टर्न इंडिया रिजनल कौन्सिलचे (डब्ल्यूआयआरसी) अध्यक्ष सीए ललित बजाज यांनी दिली.

कोरोनाच्या पार्श्वभूमीवर ‘आयसीएआय’चे उपक्रम, विविध बदल, विद्यार्थी व सीएंसाठी आणलेल्या तरतुदी याबाबत ललित बजाज यांनी पत्रकार परिषदेत माहिती दिली. प्रसंगी केंद्रीय समितीचे सदस्य सीए चंद्रशेखर चितळे, सीए यशवंत कासार, ‘डब्ल्यूआयआरसी’चे सचिव सीए मुर्तुझा काचवला, पुणे शाखेचे अध्यक्ष सीए अभिषेक धामणे, उपाध्यक्ष सीए समीर लड्डा, सचिव सीए काशिनाथ पठारे आदी उपस्थित होते.

ललित बजाज म्हणाले, “कोरोना काळात समाजाला मदतीचा हात देण्यासाठी सीए इन्स्टिट्यूटच्या सर्व सभासदांनी देशभर उल्लेखनीय कार्य केले. कोरोनाबाबत जागरूकता, गरजूना मदत असे अनेक उपक्रम राबवले. सीए परीक्षेबाबत विद्यार्थी, पालक चिंतीत होते. मात्र, इन्स्टिट्यूटमार्फत सर्व प्रकारची काळजी घेऊन सध्या परीक्षा सुरु आहेत. अभ्यासासाठीचे सर्व साहित्य ऑनलाईन स्वरूपात उपलब्ध करून देण्यात आले आहे. येत्या काळात नाविन्यपूर्ण बदल करण्यासंदर्भात सकारात्मक चर्चा सुरु आहे.”

सीए चंद्रशेखर चितळे म्हणाले, “अभ्यासाचे साहित्य ऑनलाईन उपलब्ध करून देण्यासह वेबिनार्स, ऑनलाईन कार्यशाळा, तज्ज्ञांची व्याख्याने आयोजिली जाताहेत. सर्वसामान्य कुटुंबातल्या विद्यार्थ्यालाही सीए परीक्षा देता येईल, यासाठी पोषक वातावरण निर्माण केले जात आहेत. विविध शिष्यवृत्ती योजना आणल्या जात आहेत. त्याचबरोबर अर्थव्यवस्थेला बळकटी देण्यासाठी ‘आयसीएआय’कडून विविध सूचना दिल्या जात आहेत. लघु व माध्यम उद्योगांना प्रोत्साहित केले जात आहे. सीए संदर्भातील कायद्यांमधील बदल विद्यार्थी व सीएपर्यंत पोहोचवले जात आहेत.”

सीए मुर्तुझा काचवाला म्हणाले, “कोरोनाच्या अवघड काळातही सनदी लेखापालांनी जीएसटी भरण्याचे काम व्यवस्थितपणे पार पाडले. ऑनलाईन प्रणालीला आत्मसात करत सीएनी केलेले काम उल्लेखनीय आहे. इन्स्टिट्यूटच्या माध्यमातून सभासदांना येणाऱ्या अडचणी सोडवण्यासह ऑनलाईन व्याख्यानातून मार्गदर्शन होत आहे. ऑनलाईन फायलिंग करताना घ्यायची काळजीबद्दलही जागृती झाली आहे.” सीए यशवंत कासार यांनीही कोरोनामुळे सनदी लेखापाल क्षेत्रावर झालेल्या बदलांविषयी सांगितले. सीए अभिषेक धामणे यांनी स्वागत-प्रास्ताविक केले. सीए काशिनाथ पाठारे यांनी आभार मानले.

पुणे : येत्या १ डिसेंबर रोजी होत असलेल्या विधानपरिषद पदवीधर व शिक्षक मतदारसंघ निवडणुकीत ब्राह्मण समाजाने अधिकाधिक मतदानाचा हक्क बजवावा, असे आवाहन ब्राह्मण महासंघाच्या वतीने करण्यात आले.

ब्राह्मण समाजातील सुक्षितित मतदारांनी अधिकाधिक संख्येने मतदान करून योग्य उमेदवारांना निवडून द्यावे, याबाबत जनजागृती करण्यासाठी ब्राह्मण महासंघाच्या वतीने उभारण्यात आलेल्या संपर्क कार्यालयाचे (कॉल सेंटर) उद्घाटन स्थायी समितीचे अध्यक्ष हेमंत रासने यांच्या हस्ते करण्यात आले. प्रसंगी नगरसेवक योगेश समेळ, माजी नगरसेवक दिलीप काळोखे, ब्राह्मण महासंघाचे संस्थापक आनंद दवे, विश्वस्त मनोज तारे, श्रीपाद कुलकर्णी, रसिका घाणेकर, महिला आघाडी शहराध्यक्ष नीता जोशी, तृप्ती तारे, मिलिंद बर्वे, हर्षद ठकार आदी उपस्थित होते.

हेमंत रासने म्हणाले, “सुशिक्षित मतदारांनी आळस झटकून मतदान केले पाहिजे. ही पदवीधर व शिक्षक मतदार संघाची निवडणूक असून, त्यात पाच जिल्ह्यांचा समावेश आहे. त्यामुळे उमेदवार कोणा एका जिल्ह्याचा नाही, तर मतदारसंघाचा असतो. त्यामुळे आपल्याला योग्य वाटेल, त्या उमेदवाराला मतदान करून आपला हक्क बजवावा.”

आनंद दवे म्हणाले, “मतदारांनी कोणाला मतदान करायचा हा सर्वस्वी त्यांचा निर्णय आहे. पण ब्राह्मण समाजातील मतदारांनी शंभर टक्के मतदान करावे. जास्तीतजास्त मतदान झाले, तर चांगले उमेदवार निवडून येतील.”

पदवीधर व शिक्षक मतदारांनी मतदानादिवशी सुटीवर न जाता मतदानाचा हक्क बजावण्याबाबत जागृती करण्यात येणार असल्याचेही दवे यांनी सांगितले. योगेश समेळ यांनीही मनोगत व्यक्त केले.

पेशव्यांच्या पुतळ्याला लोखंडी जिना करणार
शनिवारवाडा येथील श्रीमंत बाजीराव पेशवे यांच्या पुतळ्याला स्वखर्चाने लोखंडी जिना करण्याची तयारी ब्राह्मण महासंघाने केली असून, त्या जिन्याच्या कामासाठी पुणे महापालिकेने परवानगी द्यावी, अशी मागणी रासने यांच्याकडे केली. त्याला प्रतिसाद देत रासने यांनी पुढील दोन महिन्यात हे काम मार्गी लावण्याचे आश्वासन दिले.