पुणे- मोदी सरकारने केलेल्या काळ्या कृषी कायद्याला विरोध म्हणून उद्या दिनांक ८ डिसेम्बर रोजी पुकारण्यात आलेल्या भारत बंद मध्ये पुणे शहर देखील सहभागी होईल असा विश्वास व्यक्त करीत महाविकास आघाडीच्या नेत्यांनी बंद चे आवाहन करून उद्या मोर्चाचे आयोजन देखील केले आहे. अशी माहिती शहर कॉंग्रेसचे अध्यक्ष रमेश बागवे आणि राष्ट्रवादी चे शहराध्यक्ष आ. चेतन तुपे यांनी येथे दिली .

ते म्हणाले उद्या सकाळी अलका टॉकिज चौकातून साडेदहा वाजता मोर्चा सुरु करण्यात येईल आणि मंडई तील टीळक पुतळ्याजवल मोर्चाचा समारोप होईल .पुण्यातील हमाल पंचायत , रिक्षा संघटना ,मार्केट यार्ड कामगार युनियन ,पुणे मर्चंट चेम्बर्स , पुणे पेट्रोल डीझेल असोसिएशन ,व्यापारी संघटना , पीएमपी एल कामगार संघटना, अशा अनेकांनी या बंदला पाठींबा दिल्याचा दावा महाविकास आघाडीच्या वतीने करण्यात आला आहे. या संदर्भात आज बोलविण्यात आलेल्या बैठकीस आ. तुपे, श्री . बागवे यांच्यासह शिवसेना शहरप्रमुख संजय मोरे, राष्ट्रवादीचे अंकुश काकडे, अंग मेहनती कास्त्कारी संघटनेचे नितीन पवार ,माकप चे अजित अभ्यंकर ,शेकाप चे सागर आळत सेनेचे रघुनाथ कुचिक,प्रशांत बढे, ,दगडखाण कामगार संघटनेचे बी एम रेगे ,नगरसेवक अविनाश बागवे, अजित दरेकर तसेच लोकायत चे नीरज जैन, कॉंग्रेसचे प्रदेश सरचिटणीस अभय छाजेड आदी मान्यवर कार्यकर्ते आणि नेते उपस्थित होते.

पुणे, दि. 7: कोरोना संसर्गाच्या पार्श्वभूमीवर देशभरातील लॉकडाऊनमुळे परप्रांतीय कामगारांचे स्थलांतर झाले. त्यामुळे आता अनलॉक 1.0 अंतर्गत काही अटी व शर्तीच्या आधारे सुरू झालेल्या औद्योगिक कंपन्यांना मोठ्या प्रमाणात मनुष्यबळाची कमतरता भासत आहे. त्या अनुषंगाने कौशल्य विकास, रोजगार व उद्योजकता मार्गदर्शन केंद्र, पिंपरी (तांत्रिक) रास्तापेठ पुणे या कार्यालयाच्या वतीने नोकरी इच्छुक बेरोजगार युवक युवतींसाठी ऑनलाईन रोजगार मेळावा आयोजित करण्यात आला असून पुणे जिल्ह्यातील नामांकित आस्थापना, कंपन्यांमधील विविध प्रकारच्या रिक्तपदाद्वारे संधी देण्यात येत आहे. इच्छुक युवक युवतींनी 9 डिसेंबर 2020 पर्यंत आपापले पसंतीक्रम नोंदवून या संधीचा लाभ घ्यावा, असे आवाहन कौशल्य विकास, रोजगार व उद्योजकता मार्गदर्शन अधिकारी हणमंत नलावडे यांनी केले आहे. या ऑनलाईन रोजगार मेळाव्यांतर्गत पुणे जिल्ह्यातील नामवंत विविध उद्योजकांकडील सर्वसाधारणपणे मशीन ऑपरेटर, वेल्डर, फिटर, शीटमेटल वर्कर, ऑटो मेकॅनिक, मेसन, प्लंबर, इलेक्ट्रिशिअन, कारपेंटर, ग्राईंडर, टर्नर, मशिनिस्ट, इंजिनिअरिंग डिप्लोमा मेकॅनिकल, ॲटोमोबाईल इंजिनिअर, इलेक्ट्रॉनिक टेलिकम्युनिकेशन पदवीधर यासारख्या पदांसाठी आवश्यक ती पात्रताधारक तसेच एसएससी, एचएससी, पदवीधर उमेदवारांसाठी एकूण 563 पेक्षा अधिक रिक्तपदे उपलब्ध करून देण्यात आली आहेत.
सदरचा मेळावा हा केवळ ऑनलाईन पसंतीक्रम नोंदविणा-या उमेदवारांसाठीच घेण्यात येणार आहे. त्यामुळे पुणे जिल्ह्यातील इच्छुक उमेदवारांना आवाहन करण्यात येते की, या संधीचा लाभ घेण्यासाठी आपापल्या युझर आयडी व पासवर्डच्या आधारे या विभागाच्या www.rojgar.mahaswayam.gov.in या संकेतस्थळाद्वारे लॉगीन करून आपल्या शैक्षणिक पात्रतेनुसार उचित असलेल्या रिक्तपदासाठी आपला पंसतीक्रम व उत्सुकता ऑनलाईन पध्दतीने नोंदवावा. पसंतीक्रम नोंदविताना शक्यतो आपण वास्तव्यास असलेल्या ठिकाणाच्या आसपासच्या कंपन्यांची तसेच आवश्यक पात्रता धारण करीत असल्याची खात्री करून पदाची निवड करण्याची दक्षता घ्यावी जेणेकरून कोरोनाच्या प्रादुर्भावामुळे शासनाने विहीत केलेल्या अटी व शर्तींचे पालन करणे व संधीचा लाभ घेणे उद्योजक व उमेदवार यांना सहज शक्य होईल.
इच्छुक व ऑनलाईन पसंतीक्रम नोंदविणा-या उमेदवारांना त्यांच्या पंसतीक्रमानुसार व उद्योजकांच्या सोईनुसार त्यांच्या मुलाखतीचे ठिकाण दिनांक व वेळ एसएमएसने कळविण्यात येईल व शक्य असेल तेथे ऑनलाईन किंवा ऑफलाईन मुलाखतीचे आयोजन करण्यात येईल. तरी इच्छुक युवक युवतींनी दि. 9 डिसेंबर 2020 पर्यंत आपापले पसंतीक्रम नोंदवून या संधीचा लाभ घ्यावा असे आवाहन कौशल्य विकास, रोजगार व उद्योजकता मार्गदर्शन अधिकारी श्री. हणमंत नलावडे यांनी केले आहे.

पुणे विभागातील 5 लाख 13 हजार 421 कोरोना बाधित रुग्ण बरे होऊन घरी
विभागात कोरोना बाधित 5 लाख 42 हजार 723 रुग्ण
-विभागीय आयुक्त सौरभ राव

पुणे,दि.07 :- पुणे विभागातील 5 लाख 13 हजार 421 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 5 लाख 42 हजार 723 झाली आहे. तर ॲक्टीव रुग्ण संख्या 14 हजार 146 इतकी आहे. कोरोनाबाधीत एकुण 15 हजार 156 रुग्णांचा मृत्यू झाला असून मृत्यूचे प्रमाण 2.79 टक्के आहे. पुणे विभागामध्ये बऱ्या होणा-या रुग्णांचे प्रमाण 94.60 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा
पुणे जिल्हयातील कोरोना बाधीत एकूण 3 लाख 47 हजार 815 रुग्णांपैकी 3 लाख 28 हजार 488 रुग्ण बरे होवून घरी गेले आहेत. ॲक्टीव रुग्ण 10 हजार 927 आहे. कोरोनाबाधित एकूण 8 हजार 400 रुग्णांचा मृत्यू झाला आहे. मृत्यूचे प्रमाण 2.42 टक्के इतके आहे तर बरे होणा-या रुग्णांचे प्रमाण 94.44 टक्के आहे.
सातारा जिल्हा
सातारा जिल्हयातील कोरोना बाधीत एकूण 51 हजार 947 रुग्णांपैकी 49 हजार 579 रुग्ण बरे होवून घरी गेले आहेत. ॲक्टीव रुग्ण संख्या 627 आहे. कोरोनाबाधित एकूण 1 हजार 741 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 46 हजार 779 रुग्णांपैकी 43 हजार 197 रुग्ण बरे होवून घरी गेले आहेत. ॲक्टीव रुग्ण संख्या 1 हजार 957 आहे. कोरोनाबाधित एकूण 1 हजार 625 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 47 हजार 22 रुग्णांपैकी 44 हजार 944 रुग्ण बरे होवून घरी गेले आहेत. ॲक्टीव रुग्ण संख्या 375 आहे. कोरोनाबाधित एकूण 1 हजार 703 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 49 हजार 160 रुग्णांपैकी 47 हजार 213 रुग्ण बरे होवून घरी गेले आहेत. ॲक्टीव रुग्ण संख्या 260 आहे. कोरोनाबाधित एकूण 1 हजार 687 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 1 हजार 17 ने वाढ झाली आहे. यामध्ये पुणे जिल्ह्यात 685 , सातारा जिल्ह्यात 173, सोलापूर जिल्ह्यात 114, सांगली जिल्ह्यात 29 तर कोल्हापूर जिल्ह्यात 16 अशी रुग्ण संख्येमध्ये वाढ झालेली आहे.
कालच्या रुग्णसंख्येमध्ये बऱ्या होणा-या रुग्णांचे प्रमाण –
पुणे विभागामध्ये बऱ्या होणाऱ्या एकूण 939 रुग्णांमध्ये पुणे जिल्हयामध्ये 664, सातारा जिल्हयामध्ये 56, सोलापूर जिल्हयामध्ये 138, सांगली जिल्हयामध्ये 56 व कोल्हापूर जिल्हयामध्ये 25 रुग्णांचा समावेश आहे.

पुणे विभागातील सर्व्हेक्षण
आजपर्यत विभागामध्ये एकुण 29 लाख 62 हजार 361 नमून्यांचा तपासणी अहवाल प्राप्त झाला. प्राप्त अहवालांपैकी 5 लाख 42 हजार 723 नमून्यांचा अहवाल सकारात्मक (पॉझिटिव्ह) आहे.

( टिप :- दि. 6 डिसेबर 2020 रोजी रात्री 9.00 वा. पर्यंतच्या आकडेवारीनुसार )

पुणे -रस्ता रूंदीच्या आवश्यक भूसंपादनासाठीच क्रेडीट बॉण्डचा वापर करावा अशी मागणी कॉंग्रेसचे महापालिकेतील गटनेते आबा बागुल यांनि महापालिका आयुक्तांकडे केली आहे.

यासंदर्भात त्यांनी आयुक्तांना दिलेल्या पत्रात म्हटले आहे कि, ‘शहरातील वाहतूक समस्या सोडविण्यासाठी रस्ते रूंद करणे क्रमप्राप्त असून रस्ते रूंद करणेसाठी भूसंपादन हा अत्यंत महत्वाचा भाग आहे. केवळ भूसंपादनाअभावी शहरातील रस्ते अरूंद आहेत. रस्त्यासाठी भूसंपादनाची कार्यवाही होत असताना जागा मालकांकडून टीडीआर घेणेबाबत प्रतिसाद अल्प प्रमाणात असून रोख रकमेचा मोबदल्याची मागणी होत असते. अशा विविध कारणांमुळे रस्त्यासाठी आवश्यक जागांचे भूसंपादन होणेस विलंब झाल्याने शहरातील वाहतूक समस्या दिवसेंदिवस जटील होत आहे. मागील १० वर्षात हजारो निष्पाप नागरिकांना वाहतूकीची समस्येमुळे अपघात होवून आपला जीव गमवावा लागला आहे, यामुळे अनेक कुटुंब रस्त्यावर आलेली आहेत.
पुणे महापालिकेकडून क्रेडीट बॉण्ड देणे संदर्भात कार्यवाही चालू होणार असून पुणे महापालिकेकडून के्रडिट बॉण्डची निर्मिती करण्यात येणार आहे. याचा उपयोग भूसंपादनासाठी करण्यात येवून यामध्ये प्राधान्याने रस्तारूंदीसाठी आवश्यक भूसंपादन करणेसाठी करण्यात यावा. रस्ते नव्याने डांबरी करणे, काँक्रीट करणे यासाठी क्रेडिट बॉण्डचा वापर करण्यात येवू नये.
पुणे महापालिकेने स्मार्ट सिटीचे धोरण स्विकारले असून शहरातील रस्ते विकास आराखडयाप्रमाणे करणे हे क्रमप्राप्त आहे. रस्त्यांची रूंदी सर्वांना ज्ञात व्हावी यासाठी आम्ही अनेक वर्षांपासून रस्तारूंदीबाबत जागेवर आखणी करणेसाठी देखील आग्रही असून राज्य शासनाने याबाबत अध्यादेश काढलेला आहे. विकास आराखडयाप्रमाणे रस्ते रूंद होणेसाठी क्रेडिट बॉण्ड दिल्यास यास चांगला प्रतिसाद मिळेल. पर्यायाने पुणे महापालिकेच्या ताब्यात रस्त्यासाठी आवश्यक जागा संपादित होणेची प्रक्रिया जलद होवून ख-या अर्थाने शहरातील वाहतूकीची समस्या सुटण्यास मदत होईल. विकास आराखडयाप्रमाणे रस्तारूंदी केल्यास अर्बन स्ट्रीट गाईडलाईननुसार रस्त्याच्या कडेने \ुटपाथ, डक्टिंग या सुविधा देखील होतील. रस्त्याची जागा ताब्यात नसल्याने अंध, अपंग, ज्येष्ठ नागरिक यांना चालण्यास \ुटपाथ देखील उपलब्ध नाहीत, ही वस्तुस्थिती असून आम्ही पूर्वी मुख्य सभेत याप्रकरणी प्रश्नोत्तरे दिले असता शहरात ७० टक्के रस्त्यांच्या कडेने \ुटपाथ नसल्याचे निदर्शनास आलेले आहे. तसेच अनेक ठिकाणी रस्ताच्या जागांवर अतिक्रमण होवून टप-या टाकण्यात आलेल्या आहे. अनेक ठिकाणी रस्त्याच्या जागा संपादित न केल्याने सदर ठिकाणी रस्ता करण्यात येवू नये म्हणून अज्ञातांकडून वृक्षारोपण केले जाते. अशा अनेक समस्या केवळ रस्त्यासाठी आवश्यक जागांचे भूसंपादन रस्ता रूंदीप्रमाणे न केल्याने निर्माण होत आहे.
तरी पुणे महापालिकेकडून क्रेडीट बॉण्ड देताना सदर बॉण्ड हे रस्ता रूंदीकरणासाठी आवश्यक भूसंपानासाठीच वापरण्यात यावेत, ही नम्र विनंती. या अनुषंगाने आवश्यक कार्यवाही करून आम्हास त्याचा लेखी अहवाल कळवावा. अशी मागणी आबा बागुल यांनी लेखी पत्राद्वारे केली आहे.

पुणे-महामानव भारतरत्न डॉ.बाबासाहेब आंबेडकरांचे विचार आत्मसात करून सर्वांनी उच्च शिक्षित होऊन संस्कारक्षम पिढी निर्माण करण्याची गरज असल्याचे मत सिंहागडरोड पोलीस ठाण्याचे वरिष्ठ पोलीस निरीक्षक देविदास घेवारे यांनी नऱ्हे येथील नवदीप सोसायटी मध्ये अभिवादन सभेत व्यक्त केले.
या वेळी झालेल्या अभिवादन सभेच्या अध्यक्षस्थानी नवदीप सोसायटीचे चेअरमन विष्णु कदम होते.
व.पो. नि. देविदास घेवारे, सामाजिक कार्यकर्ते दादासाहेब ढाकणे यांच्या हस्ते प्रतिमेचे पूजन करण्यात आले.
कार्यक्रमाचे आयोजन शिवसेना नऱ्हे आंबेगाव विभाग प्रमुख राज कदम यांनी केले होते.
हवेली पंचायत समितीच्या माजी सभापती प्रभावती भुमकर, प.स.सदस्या ललिता कुटे,ग्रा. प.सदस्या सुप्रिया भुमकर,प्रेरणा बहुउद्देशीय सामाजिक संस्थेच्या अध्यक्षा वंदना कदम, राजु कुटे,दयानंद लोखंडे, रणजित माने, मस्तान जाधव, दशरथ राजगुरू, विशाल वाघमारे, इत्यादी मान्यवर उपस्थित होते.
कार्यक्रमाचे संयोजन अविनाश गायकवाड, आनंद लोखंडे, किरण शिरसाट, विशाल ओव्हाळ, अजय मळेकर, प्रतीक कदम, अमित कदम व नवदीप मित्र मंडळाच्या वतीने करण्यात आले.
सूत्रसंचालन दशरथ राजगुरू यांनी केले.